O‘zbekiston Respublikasi Vazirlar Mahkamasining 2000-yil 30-iyundagi № 250-sonli “Valyuta bozorini yanada takomillashtirish va valyuta almashtirish operatsiyalarini kengaytirishga doir chora-tadbirlar to‘g‘risida”gi qarori ijrosini bajarish maqsadida, O‘zbekiston Respublikasi Markaziy banki tomonidan rezident jismoniy shaxslarga 5000 AQSh dollariga teng miqdordan oshuvchi naqd xorijiy valyutani respublika hududidan tashqariga olib chiqishga ruxsatnomalar berish tartibi ishlab chiqilgan va mazkur me’yoriy hujjat O‘zbekiston Respublikasi Adliya vazirligiga davlat ro‘yxatidan o‘tkazish uchun taqdim etilgan. Adliya vazirligining ushbu me’yoriy hujjatga tegishli o‘zgartirishlar kiritish bo‘yicha taklifini inobatga olib, Markaziy bank Boshqaruvi qaror qiladi:

1. “O‘zbekiston Respublikasi Markaziy banki tomonidan jismoniy shaxslar — rezidentlarga naqd xorijiy valyutani mamlakat hududidan tashqariga olib chiqishga ruxsatnomalar berish tartibi to‘g‘risida”gi Nizom* (Yangi tahriri) tasdiqlansin.

2. Valyuta ayirboshlash operatsiyalari Bosh maxsus boshqarmasiga (B. Jumayev) mazkur me’yoriy hujjatni Adliya vazirligida davlat ro‘yxatidan o‘tkazilishini ta’minlash vazifasi yuklatilsin.

3. O‘zbekiston Respublikasi Markaziy banki Boshqaruvining 2000-yil 5-iyuldagi 12/1-son qarorining 3-bandi o‘z kuchini yo‘qotgan deb hisoblansin.

4. Mazkur qarorning bajarilishini nazorat qilish rais o‘rinbosari Sh. Toshmurodov zimmasiga yuklatilsin.