Oʻzbekiston Respublikasining “Rasmiy statistika toʻgʻrisida”gi Qonuni, Oʻzbekiston Respublikasi Prezidentining 2024-yil 4-martdagi PQ-114-son “Oʻzbekiston Respublikasi Prezidenti huzuridagi Statistika agentligi faoliyatini tashkil etish chora-tadbirlari toʻgʻrisida”gi qaroriga muvofiq buyuraman:

1. Bir yillik statistika dasturini hisoblash metodikasi ilovaga muvofiq tasdiqlansin.

2. Mazkur buyruq Oʻzbekiston Respublikasi Iqtisodiyot va moliya vazirligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Metodika Oʻzbekiston Respublikasi Milliy statistika qoʻmitasi (bundan buyon matnda Milliy statistika qoʻmitasi deb yuritiladi) tomonidan bir yillik statistika dasturining qiymatini hisoblash, shuningdek statistika maʼlumotlariga boʻlgan ehtiyojlarni aniqlash, bir yillik statistika dasturini ishlab chiqish va tasdiqlash tartibini belgilaydi.

1. Mazkur Metodikada quyidagi asosiy tushunchalar qoʻllaniladi:

rasmiy statistika — Oʻzbekiston Respublikasining “Rasmiy statistika toʻgʻrisida”gi Qonunining qoidalariga muvofiq davlat statistika organlari va rasmiy statistikaning boshqa tayyorlovchilari tomonidan tayyorlanadigan hamda tarqatiladigan statistika maʼlumotlaridan iboratdir;

bir yillik statistika dasturi (bundan buyon matnda Statistika dasturi deb yuritiladi) — har bir rasmiy statistikani tayyorlovchi tomonidan ishlab chiqiladigan va tarqatiladigan statistika maʼlumotlarining ularni bajarish davriyligi hamda muddatlari koʻrsatilgan holdagi roʻyxatini oʻz ichiga oladi;

statistika maʼlumotlari — statistika kuzatuvlari natijasida va (yoki) maʼmuriy maʼlumotlar asosida tayyorlangan iqtisodiy, demografik, ijtimoiy, moliyaviy, ekologik xususiyatga hamda boshqa xususiyatga ega axborot;

statistika maʼlumotlarini tayyorlash — statistika maʼlumotlarini yigʻish, ularga ishlov berish, ularni umumlashtirish, tahlil qilish, tarqatish va saqlash bilan bogʻliq faoliyat;

davlat statistika organlari — Milliy statistika qoʻmitasi, Qoraqalpogʻiston Respublikasining, viloyatlarning va Toshkent shahrining statistika boshqarmalari, tumanlarning (shaharlarning) statistika boʻlimlari.

2. Rasmiy statistika sohasida statistika kuzatuvlarini tashkil etish va oʻtkazish, rasmiy statistika maʼlumotlarini shakllantirish va tarqatish har yili Milliy statistika qoʻmitasining Respublika statistika kengashi (bundan buyon matnda Statistika kengashi deb yuritiladi) tomonidan tasdiqlanadigan Statistika dasturiga muvofiq amalga oshiriladi.

3. Statistika dasturi quyidagi vazifalarni oʻz ichiga oladi:

rasmiy statistikani rivojlantirishning ustuvor yoʻnalishlarini belgilash;

rasmiy statistikani tayyorlovchilar tomonidan oʻtkazilishi lozim boʻlgan statistika kuzatuvlarini tashkil etish;

maʼmuriy maʼlumotlarni tayyorlash va rasmiy statistikani tayyorlovchilarga taqdim etish;

statistika registrlarini ishlab chiqish va yuritish;

rasmiy statistikani tarqatish.

4. Davlat statistika organlarini moliyalashtirish va ularning moddiy-texnika taʼminoti Statistika dasturiga muvofiq Oʻzbekiston Respublikasi Davlat budjeti mablagʻlari hamda qonunchilikda taqiqlanmagan boshqa manbalar hisobidan amalga oshiriladi.

5. Statistika dasturiga kiritilmagan ishlarni moliyalashtirish mazkur ishlarni bajarish tashabbusi bilan chiqqan jismoniy va yuridik shaxslarning mablagʻlari hisobidan amalga oshiriladi.

6. Mazkur Metodikada Statistika dasturining qiymati deganda Statistika dasturida belgilangan va faqat Milliy statistika qoʻmitasi tomonidan bajariladigan statistika ishlarining qiymati nazarda tutiladi.

7. Statistika dasturining qiymati davlat statistika organlari hamda Milliy statistika qoʻmitasining Kadrlar malakasini oshirish va statistik tadqiqotlar institutini (bundan buyon matnda Statistik tadqiqotlar instituti deb yuritiladi) saqlab turish xarajatlari, yaʼni ularning xodimlari mehnatiga haq toʻlash xarajatlari va statistika faoliyatini amalga oshirish uchun zarur boʻlgan boshqa xarajatlar summasini hisoblash yoʻli bilan aniqlanadi.

8. Davlat statistika organlari hamda Statistik tadqiqotlar institutining xodimlari mehnatiga haq toʻlash xarajatlari qonunchilikda belgilangan lavozim maoshlari, qoʻshimcha toʻlovlar, ustamalar, shuningdek mukofotlar va kompensatsiya yoki ragʻbatlantirish xususiyatiga ega boshqa toʻlovlarni oʻz ichiga oladi.

9. Statistika faoliyatini amalga oshirish uchun zarur boʻlgan boshqa xarajatlarga Budjet tasnifini qoʻllash boʻyicha yoʻriqnomaga (roʻyxat raqami 2146, 2010-yil 11-oktabr) muvofiq xarajatlar iqtisodiy tasnifining IV guruh xarajatlari boʻyicha davlat statistika organlari hamda Statistik tadqiqotlar instituti tomonidan amalga oshiriladigan xarajatlar kiradi.

10. Statistika dasturining qiymatiga kiritiladigan xarajatlarni hisoblab chiqarishda budjet sohasidagi qonunchilik hujjatlariga hamda tovar va xizmatlarning davlat tomonidan tartibga solinadigan narxlari va tariflariga amal qilinishi zarur.

Jumladan:

mehnatga haq toʻlash xarajatlari qonunchilik hujjatlari bilan belgilangan lavozim maoshlari va bazaviy mehnatga haq toʻlash stavkalari, ularga qoʻshimcha haq toʻlash va ustamalar hamda amaldagi namunaviy shtatlar va shtat normativlariga rioya etilgan holda hisoblanadi;

ijtimoiy soliqni toʻlash xarajatlari belgilangan stavkalardan va qonunchilik hujjatlariga muvofiq ijtimoiy soliq toʻlanadigan barcha toʻlov summalaridan kelib chiqqan holda aniqlanadi;

ish beruvchining fuqarolik javobgarligini majburiy sugʻurta qilish boʻyicha sugʻurta mukofotini toʻlash xarajatlari qonunchilik hujjatlarida belgilangan tartibda ish beruvchining barcha xodimlarining oʻtgan yilgi ish haqining haqiqiy xarajatlaridan kelib chiqqan holda hisoblanadi;

xoʻjalik xarajatlari, jumladan kommunal xizmatlar uchun xarajatlar har bir tashkilotga koʻrsatiladigan xizmatga oʻtgan hisobot davridagi haqiqiy xarajatdan kelib chiqib yoki belgilangan limit (jismoniy hajmlar) doirasida hamda narx va tariflarni hisobga olgan holda hisoblanadi;

telefon va boshqa telekommunikatsiya xizmatlari xarajatlari abonent raqamlari soni va xizmatlar uchun tasdiqlangan tariflardan kelib chiqib hisoblanadi;

qoʻriqlash faoliyati xizmatlarining toʻlovi bilan bogʻliq xarajatlar mazkur xizmatlarni yetkazib beruvchilarning tariflariga muvofiq aniqlanadi;

tashkilotlarning binolar, inshootlar, transport vositalaridan foydalanish, binolar va transport vositalari, shuningdek boshqa mulk ijarasi bilan bogʻliq xarajatlari qonunchilik hujjatlarida belgilangan xarajatlar meʼyori, limitlar va natural koʻrsatkichlardan kelib chiqib aniqlanadi;

xizmat safarlariga xarajatlar tashkilotlarning oldiga qoʻyilgan vazifalaridan, shuningdek qonunchilik hujjatlarida belgilangan meʼyorlardan kelib chiqqan holda aniqlanadi.

11. Statistika dasturining qiymati Milliy statistika qoʻmitasi tomonidan ushbu bobda belgilangan tartibda hisoblab chiqariladi hamda uning toʻgʻri hisoblanishi uchun Milliy statistika javobgar boʻladi.

12. Statistika dasturining qiymati Statistika dasturida belgilanadi.

13. Statistika dasturini ishlab chiqish uchun rasmiy statistikadan foydalanuvchilarning (bundan buyon matnda foydalanuvchilar deb yuritiladi) statistika maʼlumotlariga boʻlgan ehtiyojlari aniqlanadi.

Statistika maʼlumotlariga boʻlgan ehtiyojlarni aniqlashda Oʻzbekiston Respublikasi Hukumati, respublika ijro etuvchi hokimiyat organlari, mahalliy ijro etuvchi hokimiyat organlari, xalqaro tashkilotlar, chet el davlatlari, shuningdek jismoniy va yuridik shaxslarning statistika maʼlumotlariga boʻlgan joriy va istiqboldagi ehtiyojlari oʻrganiladi.

14. Foydalanuvchilarning statistika maʼlumotlariga boʻlgan ehtiyojlarini oʻrganish:

toʻgʻridan-toʻgʻri yoki zamonaviy axborot-kommunikatsiya vositalari (internet, veb-saytlar, ijtimoiy tarmoqlar, pochta aloqasi va boshqalar) orqali kelib tushgan takliflarni tahlil qilish;

Milliy statistika qoʻmitasining tarmoq boshqarmalari tomonidan Statistika dasturiga kiritilgan rasmiy statistikaning boshqa tayyorlovchilari va maʼmuriy maʼlumotlarni taqdim etuvchilarga bevosita yozma murojaat qilish orqali ularning takliflarini soʻrash;

eʼlon qilinayotgan statistika maʼlumotlaridan foydalanuvchilarning qoniqish va ishonch darajasini aniqlash boʻyicha Milliy statistika qoʻmitasining rasmiy veb-sayti orqali ular oʻrtasida onlayn soʻrovlar oʻtkazish orqali tashkil etiladi.

15. Foydalanuvchilar statistika maʼlumotlariga boʻlgan ehtiyojlarini oʻrganish va tahlil qilish jarayonida ular tomonidan soʻralayotgan maʼlumotlarning mazmuni, doimiyligi, dolzarbligi, respublika va viloyat darajasida muhim ahamiyatga ega ekanligi inobatga olinadi.

16. Foydalanuvchilar statistika maʼlumotlariga boʻlgan ehtiyojlarini oʻrganish hamda ulardan kelib tushgan takliflarni koʻrib chiqish natijalari asosida har yili 25-oktabrga qadar Milliy statistika qoʻmitasi tomonidan kelgusi yil uchun Statistika dasturi loyihasi ishlab chiqiladi.

17. Statistika dasturi loyihasini tayyorlashda rasmiy statistika maʼlumotlarining ishonchliligi, dolzarbligi va ochiqligi, oʻz vaqtida taqdim etilishi hamda foydalanuvchilarning manfaatlari hisobga olinishini taʼminlash maqsadida:

statistika maʼlumotlarining (statistika kuzatuvi shakllari va maʼmuriy maʼlumotlar) oqilona tanlash;

respondentlarga hisobot yuklamasini qisqartirish;

statistika ishlarini bajarishda bir-birini takrorlash holatlariga yoʻl qoʻymasligi lozim.

18. Statistika dasturi loyihasiga rasmiy statistika maʼlumotlarini tayyorlash boʻyicha ishlarni kiritishda:

foydalanuvchilarga rasmiy statistika maʼlumotlarini taqdim etish muddatlari — respondentlar tomonidan statistika kuzatuvlari shakllarini taqdim etish muddatlaridan kelib chiqqan holda koʻrsatkichlarni shakllantirish imkoniyati, jumladan maʼmuriy maʼlumotlar manbalari bilan oʻzaro solishtirish ishlarini tashkil etish, turli statistika hisoboti shakllaridagi oʻzaro bogʻliq maʼlumotlarni birlashtirish, olingan maʼlumotlarni qayta ishlash, tahlil etish, umumlashtirish va taqdim etishga tayyorlash uchun ketadigan vaqtni hisobga olgan holda belgilanadi;

statistika maʼlumotlarini tayyorlash va ularning davriyligi — Oʻzbekiston Respublikasining iqtisodiy, demografik, ijtimoiy, moliyaviy, ekologik hamda boshqa hodisa va jarayonlar toʻgʻrisida statistika maʼlumotlari bilan taʼminlash ehtiyojlaridan kelib chiqib, amaldagi statistik tasniflash tizimidan foydalanish hamda maxfiylik tamoyillariga rioya etish asosida ushbu jarayonlar toʻgʻrisida yetarli darajada toʻliq maʼlumot bilan taʼminlash imkoniyatlarini hisobga olgan holda belgilanadi.

19. Statistika dasturi loyihasi tasdiqlash uchun kiritilishidan oldin unda belgilanadigan Statistika dasturining qiymati Milliy statistika qoʻmitasi tomonidan Oʻzbekiston Respublikasi Iqtisodiyot va moliya vazirligi bilan kelishilishi lozim.

20. Statistika dasturi loyihasi tasdiqlash uchun Milliy statistika qoʻmitasi tomonidan har yili 1-noyabrga qadar Statistika kengashiga kiritiladi.

21. Statistika dasturi har yili yakuniga qadar Oʻzbekiston Respublikasi Prezidentining 2025-yil 24-fevraldagi PQ-75-son qarori bilan tasdiqlangan Respublika statistika kengashi toʻgʻrisidagi nizomda belgilangan tartibda Statistika kengashi tomonidan tasdiqlanadi.

22. Statistika dasturida belgilangan va amalga oshirilgan statistika ishlari uchun haq toʻlash statistika ishlarini bajarishga shartnoma va Milliy statistika qoʻmitasi tomonidan har oyda taqdim etiladigan bajarilgan ishlar dalolatnomalari asosida amalga oshiriladi.

23. Statistika dasturini bajarish uchun ajratilgan Oʻzbekiston Respublikasi Davlat budjeti mablagʻlarining sarflanishi boʻyicha hisob va hisobotlarni yuritish budjet qonunchiligiga muvofiq Milliy statistika qoʻmitasi tomonidan amalga oshiriladi.

24. Statistika dasturi ijrosini taʼminlash, shuningdek uni bajarish uchun ajratilgan moliyaviy mablagʻlarning maqsadli sarflanishi natijalari har chorak yakunlari boʻyicha Milliy statistika qoʻmitasining Hayʼat yigʻilishlarida muhokama etib boriladi.

25. Ushbu Metodika talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.