“Oʻzbekiston Respublikasi Oliy Majlisining Senati toʻgʻrisida”gi Konstitutsiyaviy Qonunning 16-moddasiga, “Oʻzbekiston Respublikasi Oliy Majlisi Senatining Reglamenti toʻgʻrisida”gi Qonunning 6-moddasiga muvofiq Oʻzbekiston Respublikasi Oliy Majlisi Senatining Kengashi qaror qiladi:

1. Xalq deputatlari viloyat, tuman, shahar Kengashining doimiy komissiyalari toʻgʻrisidagi namunaviy nizom ilovaga muvofiq tasdiqlansin.

2. Xalq deputatlari viloyat, tuman, shahar Kengashlariga ikki hafta muddatda Xalq deputatlari viloyat, tuman, shahar Kengashining doimiy komissiyalari toʻgʻrisidagi namunaviy nizomni muhokama qilish va tasdiqlash tavsiya etilsin.

3. Oʻzbekiston Respublikasi Oliy Majlisi Senati devonining Hududiy vakillik organlari faoliyatini oʻrganish markazi ushbu Qaror ijrosini taʼminlashda xalq deputatlari viloyat, tuman, shahar Kengashlari va ularning kotibiyatlariga amaliy yordam koʻrsatib borsin.

4. Mazkur Qarorning ijrosini nazorat qilish Oʻzbekiston Respublikasi Oliy Majlisi Senatining Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi raisi T. Madumarov zimmasiga yuklansin.

5. Ushbu Qaror qabul qilingan kundan eʼtiboran kuchga kiradi.

1. Ushbu Nizom “Mahalliy davlat hokimiyati toʻgʻrisida”gi Oʻzbekiston Respublikasi Qonuni, xalq deputatlari viloyat, tuman, shahar Kengashi (bundan buyon matnda mahalliy Kengash deb yuritiladi) reglamenti asosida ishlab chiqilgan va mahalliy Kengashning doimiy komissiyalarini shakllantirish va ishini tashkil qilish tartibini, ular faoliyatining asosiy yoʻnalishlari hamda vakolatlarini belgilaydi.

“Mahalliy davlat hokimiyati toʻgʻrisida”gi Oʻzbekiston Respublikasi Qonuniga muvofiq mahalliy Kengash sessiyasi muhokamasiga kiritiladigan masalalarni dastlabki tarzda koʻrib chiqish va tayyorlash, Oʻzbekiston Respublikasining qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari va qarorlari, Oʻzbekiston Respublikasi Vazirlar Mahkamasining qarorlari, mahalliy Kengash qarorlari hayotga tatbiq etilishiga koʻmaklashish, oʻz vakolatlari doirasida nazorat vazifalarini amalga oshirish uchun mahalliy Kengash oʻz vakolati muddatiga mahalliy Kengash deputatlari orasidan mahalliy Kengashning doimiy komissiyalarini (bundan buyon matnda doimiy komissiyalar deb yuritiladi) saylaydi.

2. Doimiy komissiyalar oʻz faoliyatlarini Oʻzbekiston Respublikasining Konstitutsiyasi, “Mahalliy davlat hokimiyati toʻgʻrisida”gi, “Xalq deputatlari viloyat, tuman va shahar Kengashi deputatining maqomi toʻgʻrisida”gi Oʻzbekiston Respublikasi qonunlari asosida, shuningdek mahalliy Kengash reglamenti hamda doimiy komissiyalari toʻgʻrisidagi nizomga muvofiq amalga oshiradi.

3. Doimiy komissiyalar mahalliy Kengash sessiyasida (bundan buyon matnda sessiya deb yuritiladi) mahalliy Kengash deputatlari orasidan rais va aʼzolardan iborat tarkibda saylanadi. Doimiy komissiyalar oʻz faoliyatlarini jamoatchilik asosida amalga oshiradilar.

4. Mahalliy Kengash deputati faqat bitta doimiy komissiya aʼzosi etib saylanishi mumkin (Reglament va deputatlik odob-axloqi masalalari boʻyicha doimiy komissiya bundan mustasno).

Doimiy komissiya tarkibiga kirmagan mahalliy Kengash deputati uning ishida maslahat ovozi huquqi bilan ishtirok etishi mumkin.

Mahalliy Kengash raisi hamda mahalliy Kengash kotibiyati mudiri doimiy komissiyalar tarkibiga saylanishi mumkin emas.

5. Doimiy komissiyalar raisligiga va aʼzoligiga nomzodlar sessiyaga mahalliy Kengash raisi tomonidan taqdim qilinadi.

Doimiy komissiya raisligiga nomzod boʻyicha ovoz berish alohida oʻtkaziladi.

Doimiy komissiyalar aʼzoligiga nomzodlarni saylash nomzodlarning har birini alohida yoki doimiy komissiyaning butun tarkibini yalpi muhokama qilish yoʻli bilan amalga oshiriladi, ovoz berishda qaror har bir nomzod boʻyicha alohida yoki doimiy komissiyaning butun tarkibi boʻyicha mahalliy Kengash deputatlari umumiy sonining koʻpchilik ovozi bilan qabul qilinadi.

6. Doimiy komissiyalar oʻz majlislarida ochiq ovoz berish yoʻli bilan doimiy komissiya aʼzolarining koʻpchilik ovozi bilan rais oʻrinbosarlarini va kotiblarini saylaydi.

7. Doimiy komissiyalarning barcha aʼzolari teng huquqlardan foydalanadi.

8. Doimiy komissiyalar mahalliy Kengash oldida masʼul va hisobdordir.

9. Mahalliy Kengash deputatining doimiy komissiyadagi vakolatlari uning iltimosiga koʻra, shuningdek uning oʻz vazifalarini bajarishga imkon bermaydigan holatlar munosabati bilan muddatidan ilgari tugatilishi mumkin.

Doimiy komissiya raisining taklifi boʻyicha doimiy komissiya tarkibidagi oʻzgartirishlar sessiyada koʻrib chiqiladi.

10. Doimiy komissiyalar soni, ularning nomlanishi va tarkibi hududning oʻziga xos xususiyatlarini inobatga olib sessiyada belgilanadi.

Xalq deputatlari viloyat, Toshkent shahar Kengashida, qoida tariqasida, quyidagi doimiy komissiyalar tuzilishi mumkin:

Mahalliy budjet, tadbirkorlikni rivojlantirish va iqtisodiy islohotlar masalalari boʻyicha;

Xorijiy investitsiyalar va turizm masalalari boʻyicha;

Korrupsiyaga qarshi kurashish va xavfsizlik masalalari boʻyicha;

Fan, taʼlim va sogʻliqni saqlash masalalari boʻyicha;

Yoshlar siyosati, madaniyat va sport masalalari boʻyicha;

Agrar, suv xoʻjaligi va ekologiya masalalari boʻyicha;

Reglament va deputatlik odob-axloqi masalalari boʻyicha.

Xalq deputatlari tuman (shahar) Kengashida quyidagi doimiy komissiyalar tuzilishi mumkin:

Mahalliy budjet, tadbirkorlikni rivojlantirish va iqtisodiy islohotlar masalalari boʻyicha;

Korrupsiyaga qarshi kurashish va xavfsizlik masalalari boʻyicha;

Ijtimoiy soha, yoshlar siyosati, madaniyat va sport masalalari boʻyicha;

Agrar, suv xoʻjaligi va ekologiya masalalari boʻyicha;

Reglament va deputatlik odob-axloqi masalalari boʻyicha.

Zarur hollarda mahalliy Kengash tomonidan yangi doimiy komissiyalar tuzilishi va ilgari tashkil qilingan doimiy komissiyalar tugatilishi, doimiy komissiyalarning tarkibiga oʻzgartirishlar kiritilishi mumkin.

11. Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiya:

mahalliy budjet loyihasini, unga oʻzgartishlar va qoʻshimchalar kiritish haqidagi takliflarni, shuningdek mahalliy budjet ijrosi toʻgʻrisidagi hisobotlarni dastlabki tarzda koʻrib chiqadi, boshqa doimiy komissiyalarning fikrlarini oʻrganadi, xulosalar tayyorlaydi, mazkur masalalar yuzasidan sessiyada maʼruzalar va takliflar bilan chiqadi;

iqtisodiy islohotlarni amalga oshirishda va tadbirkorlikni rivojlantirishning hududiy strategik yoʻnalishlarini ishlab chiqishda ishtirok etadi, oʻz vakolatlari doirasida takliflar kiritadi va ijrosi ustidan deputatlik nazoratini amalga oshiradi;

hududda yangi ish oʻrinlarini yaratish, xususiy va oilaviy tadbirkorlikni qoʻllab-quvvatlash, ularni yanada rivojlantirish uchun zarur infratuzilmani shakllantirish hamda tadbirkorlik subyektlari uchun mutaxassislarni tayyorlash borasida amalga oshirilayotgan ishlarni doimiy oʻrganib boradi va deputatlik nazoratini amalga oshiradi;

mahalliy budjet ijrosi, budjetdan tashqari va maqsadli fondlar mablagʻlaridan maqsadli va samarali foydalanish tartibi ustidan nazoratni amalga oshiradi;

mahalliy budjet xarajatlarining qonunchilikda belgilangan qismining jamoatchilik fikri asosida shakllantirilgan tadbirlarni moliyalashtirishga yoʻnaltirilishida ishtirok etadi va ushbu mablagʻlarning maqsadli sarflanishi ustidan nazoratni amalga oshiradi;

mahalliy budjet qoʻshimcha mablagʻlarining belgilangan tartibda taqsimlanishida ishtirok etadi, ushbu masala yuzasidan sessiyaga takliflar kiritadi;

mahalliy soliqlar va mahalliy budjetga tushadigan boshqa majburiy toʻlovlarni qonun hujjatlarida belgilangan miqdorlar doirasida belgilash masalalarini koʻrib chiqadi va xulosalar beradi;

tegishliligicha mahalliy budjetga ajratiladigan tartibga soluvchi budjetlararo transfertlarning cheklangan miqdorlarini dastlabki tarzda koʻrib chiqadi hamda xulosalar beradi;

qurilish, kommunal, sanoat, transport va aholiga xizmat koʻrsatishga doir dasturlarni dastlabki tarzda koʻrib chiqadi hamda tayyorlashda qatnashadi;

hududning bosh rejasi va qurilish qoidalari loyihalarini koʻrib chiqishda ishtirok etadi;

kommunal soha, transport va aloqa holatini oʻrganadi, aholiga kommunal va maishiy xizmat koʻrsatish sifatini oshirish, jamoat transportini rivojlantirish boʻyicha takliflar kiritadi;

savdo, umumiy ovqatlanishni tashkil etish, isteʼmol bozori faoliyati bilan bogʻliq masalalarni koʻrib chiqadi;

yoqilgʻi-energetika taʼminoti, suv taʼminoti, oqova suvlarni chetga chiqarib yuborish va tozalash, maishiy chiqindilarni yigʻish, tashish va utilizatsiya qilish masalalarini koʻrib chiqadi;

mahalliy Kengash huzuridagi “Xalqparvar” komissiyasi faoliyati samarali yoʻlga qoʻyilishini taʼminlaydi hamda muvofiqlashtirib boradi;

hokimlikning tuzilishi, shtatlari va xodimlarining mehnatiga haq toʻlash fondi toʻgʻrisidagi hokim taqdimnomasini dastlabki tarzda koʻrib chiqadi;

aholi bandligini taʼminlash, ularning mehnat sohasidagi huquq va manfaatlarini himoya qilish, daromadlarini oshirish, kambagʻallikni qisqartirish borasidagi ustuvor yoʻnalishlarni belgilashda ishtirok etadi, sohaga oid qonun hujjatlari ijrosi ustidan nazoratni amalga oshiradi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

hokimlik boʻlimlari va boshqarmalari, korxonalar, muassasalar va tashkilotlar rahbarlarining komissiya vakolatiga taalluqli masalalar boʻyicha hisobotini (axborotini) eshitadi, tavsiyalar beradi va ularning ijrosini nazorat qiladi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

12. Xorijiy investitsiyalar va turizm masalalari boʻyicha doimiy komissiya:

hududning eksport salohiyatini oshirish, investitsiyalar va turizm masalalari boʻyicha rivojlantirish dasturlari loyihalarining ishlab chiqilishida ishtirok etadi;

xorijiy investitsiyalar va turizm sohasidagi qonunchilik hujjatlari, davlat va hududiy dasturlarning ijrosi ustidan tizimli deputatlik nazoratini amalga oshiradi;

hududning eksport salohiyati oʻsishiga toʻsqinlik qiladigan tizimli muammolarni oʻrganadi, uning eksport salohiyatini oshirish, shu jumladan, qonunchilikka tegishli oʻzgartishlar kiritish boʻyicha takliflar ishlab chiqadi;

hududiy investitsiya dasturlari bajarilishini tahlil qilib boradi, investitsiyalar, shu jumladan, xorijiy investitsiyalar ishtirokidagi loyihalarning amalga oshirilishi ustidan deputatlik nazoratini oʻrnatadi;

hududga investitsiya jalb etilishiga toʻsqinlik qilayotgan omillarni aniqlaydi, ularni bartaraf etish boʻyicha takliflar ishlab chiqadi va tegishli ijro organiga kiritadi;

hududning turizm salohiyatini tahlil qilish, tizimli muammolarni aniqlash hamda ularni bartaraf etish, shu bilan birga hududning turistik salohiyatini oshirish boʻyicha takliflar ishlab chiqishda ishtirok etadi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

hokimlik boʻlimlari va boshqarmalari, korxonalar, muassasalar va tashkilotlar rahbarlarining komissiya vakolatiga taalluqli masalalar boʻyicha hisobotini (axborotini) eshitadi, tavsiyalar beradi va ularning ijrosini nazorat qiladi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

13. Korrupsiyaga qarshi kurashish va xavfsizlik masalalari boʻyicha doimiy komissiya:

hududda qonuniylikni taʼminlash, korrupsiyaga qarshi kurashish, jamoat tartibini saqlash, jinoyatchilikning oldini olish va fuqarolarning huquqlari hamda qonuniy manfaatlarini himoya qilish boʻyicha dasturlarni, tadbirlarni ishlab chiqish va amalga oshirishda ishtirok etadi;

korrupsiyaga qarshi kurashish, davlat organlarida ochiqlikni taʼminlash va huquqiy masalalarga oid qonun hujjatlari, davlat dasturlarining ijrosi ustidan tizimli nazoratni amalga oshiradi;

hududda korrupsiyaga qarshi kurashish sohasidagi ishlarning holatini kompleks oʻrganadi hamda ushbu sohadagi faoliyatni takomillashtirish yuzasidan takliflar ishlab chiqadi;

korrupsiya koʻrinishlarining namoyon boʻlishiga olib keladigan tizimli muammolar haqida Oʻzbekiston Respublikasi Oliy Majlisi Senatining Sud-huquq masalalari va korrupsiyaga qarshi kurashish qoʻmitasiga muntazam ravishda axborot kiritib boradi;

oʻz vakolatiga taalluqli boʻlgan mahalliy Kengashning dasturlari va hokim qarorlari loyihalarini koʻrib chiqishda qatnashadi va xulosalar beradi;

hokimlik boʻlimlari va boshqarmalari, korxonalar, muassasalar va tashkilotlar, shuningdek xalq qabulxonasi, Oliy Majlisning Inson huquqlari boʻyicha vakili (ombudsman) mintaqaviy vakili, Oliy Majlisning Bola huquqlari boʻyicha vakili (Bolalar ombudsmani) mintaqaviy vakili, prokuratura, majburiy ijro byurosi, ichki ishlar, adliya organlari rahbarlarining komissiya vakolatiga taalluqli masalalar boʻyicha dastlabki tarzda komissiya majlislarida hisobotlarini (axborotlarini) eshitadi, ular boʻyicha yakuniy xulosa tayyorlaydi hamda mazkur masalani sessiya muhokamasiga kiritadi;

hokimning Oʻzbekiston Respublikasi qonun hujjatlariga mos kelmaydigan qarorlarini bekor qilish toʻgʻrisidagi, tegishli mahalliy Kengash qarorlarini bekor qilish toʻgʻrisidagi masalalarni dastlabki tarzda koʻrib chiqadi;

hokimning mahalliy Kengashning qonunchilikka zid qarorlarini qayta koʻrib chiqish toʻgʻrisidagi taqdimnomasini dastlabki tarzda koʻrib chiqadi;

mahalliy davlat organlarida ochiqlik va oshkoralikni taʼminlashga oid qonun hujjatlari, davlat dasturlarining ijro etilishi ustidan nazoratni amalga oshiradi, shu jumladan, mahalliy davlat organlari, xoʻjalik boshqaruvi organlari rahbarlarining ochiqlikni taʼminlash borasidagi faoliyati yuzasidan hisobotlarini (axborotlarini) eshitadi;

axborot siyosati, mahalliy davlat organlarida ochiqlikni taʼminlashga doir masalalar yuzasidan oʻrganishlar olib boradi;

oʻz vakolatiga taalluqli masalalar boʻyicha jismoniy va yuridik shaxslar vakillarining murojaatlarini koʻrib chiqadi, zarur hollarda davlat organlari va tashkilotlariga soʻrovlar yuboradi;

vakolati doirasida ommaviy axborot vositalari, nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi;

taalluqli boshqa masalalarni koʻrib chiqadi, ular boʻyicha qarorlar qabul qiladi va ijrosini nazorat qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

14. Fan, taʼlim va sogʻliqni saqlash masalalari boʻyicha doimiy komissiya:

hududni fan, taʼlim, sogʻliqni saqlash va ijtimoiy himoya masalalari boʻyicha rivojlantirish dasturlari loyihalarining ishlab chiqilishida ishtirok etadi;

hududni taʼlim, sogʻliqni saqlash, ijtimoiy himoya masalalari boʻyicha rivojlantirish dasturlari bajarilishi ustidan nazoratni amalga oshiradi, shuningdek ularning bajarilishi haqidagi hisobotlarni dastlabki tarzda koʻrib chiqadi, boshqa doimiy komissiyalar bilan birgalikda xulosalar tayyorlaydi, mazkur masalalar yuzasidan sessiyada maʼruza va qoʻshimcha maʼruzalar bilan chiqadi;

fan va sogʻliqni saqlash sohalarini rivojlantirishga, taʼlim tizimini takomillashtirishga qaratilgan qonunchilik hujjatlari va davlat dasturlari ijrosi ustidan tizimli deputatlik nazoratini amalga oshiradi;

taʼlim va sogʻliqni saqlash muassasalari obyektlarining sharoiti, moddiy-texnik taʼminotini tahlil qilgan holda, ularni yaxshilash boʻyicha tegishli manzilli dasturlarga kiritish yuzasidan takliflar beradi;

taʼlim tizimining holatini tahlil qiladi, taʼlim sifatini yanada yaxshilash, maktablar, litseylar, kollejlar, kasb-hunar maktablari, texnikumlar va oliy oʻquv yurtlarida oʻquv-tarbiya jarayonini rivojlantirish, taʼlim oluvchilarning muayyan kasb egasi boʻlishini, bandligi taʼminlanishini oʻrganib borish va yaxshilash boʻyicha tavsiyalar kiritadi;

hududda davlat maktabgacha taʼlim tashkilotlarini, davlat taʼlim muassasalarini tashkil etish, qayta tashkil etish, tugatish boʻyicha takliflar ishlab chiqadi;

tibbiy xizmat koʻrsatish sifatini yaxshilash, mahalliy davolash-profilaktika muassasalarini, shu jumladan, tabiiy-iqlim sharoitlarini hisobga olgan holda rivojlantirish boʻyicha takliflar ishlab chiqadi;

hududning “tibbiy xaritasi” shakllantirilishi, undan kelib chiqqan holda, aholiga zarur va sifatli tibbiy xizmat koʻrsatilishi boʻyicha nazorat olib boradi;

hududda aholining ijtimoiy himoyalanganlik holatini tahlil qiladi va sohani takomillashtirish boʻyicha takliflar kiritadi;

nogironlar, urush va mehnat faxriylari, koʻp bolali oilalar hamda keksa fuqarolarning uy-joy va moddiy-maishiy sharoitlarini yaxshilash boʻyicha qonun hujjatlarida koʻzda tutilgan chora-tadbirlarni amalga oshirishga koʻmaklashadi;

oʻz vakolatiga taalluqli masalalar boʻyicha hokimlik boʻlimlari va boshqarmalari, korxonalar, muassasalar va tashkilotlar rahbarlarining hisobotlarini (axborotlarini) eshitadi, tavsiyalar beradi va ularning ijrosini nazorat qiladi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

15. Yoshlar siyosati, madaniyat va sport masalalari boʻyicha doimiy komissiya:

yoshlar siyosati, madaniyat va sport masalalari boʻyicha dasturlar loyihalarining ishlab chiqilishida ishtirok etadi;

yoshlar siyosati, madaniyat va sport masalalari boʻyicha dasturlar bajarilishi ustidan nazoratni amalga oshiradi, shuningdek ularning bajarilishi haqidagi hisobotlarni dastlabki tarzda koʻrib chiqadi;

jismoniy tarbiya va sport muassasalari moddiy-texnik bazasini mustahkamlash, sportni rivojlantirish, shuningdek aholi turar joylarida jismoniy tarbiya va sport bilan shugʻullanish uchun sharoitlar yaratish masalalarini oʻrganadi;

madaniyat muassasalari tarmogʻini rivojlantirishga koʻmaklashadi, ularning yoshlarni estetik tarbiyalashdagi rolini oshirish boʻyicha takliflar kiritadi;

anʼanaviy xalq ijodiyoti markazlari, aholining milliy-madaniy anʼanalari, badiiy hunarmandchilikni rivojlantirish uchun sharoitlar yaratishga koʻmaklashadi;

mahalliy Kengash huzuridagi “Yoshlar guruhi” hamda “Yoshlar parlamenti vakillari maktabi” faoliyatini muvofiqlashtirib boradi;

yosh oilalarni hamda ogʻir ijtimoiy vaziyatga tushib qolgan xotin-qizlarni uy-joy bilan taʼminlashdagi muammolarni tahlil qiladi va bu boradagi chora-tadbirlarni amalga oshirishga koʻmaklashadi;

xotin-qizlarni kamsitish, ularga nisbatan zoʻravonlikning barcha shakllariga barham berish, erta nikoh va majburiy nikohning oldini olish hamda bartaraf qilish boʻyicha takliflar ishlab chiqadi;

oʻz vakolatiga taalluqli masalalar boʻyicha hokimlik boʻlimlari va boshqarmalari, korxonalar, muassasalar va tashkilotlar rahbarlarining hisobotlarini (axborotlarini) eshitadi, tavsiyalar beradi va ularning ijrosini nazorat qiladi;

bola huquqlarini himoya qilish, voyaga yetmaganlar ustidan vasiylik va homiylik masalalariga oid ishlarni nazorat qiladi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi va ijrosini nazorat qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

16. Agrar, suv xoʻjaligi va ekologiya masalalari boʻyicha doimiy komissiya:

agrar, suv xoʻjaligi, ekologiya masalalariga doir dasturlarni dastlabki tarzda koʻrib chiqadi hamda tayyorlashda qatnashadi;

ekologiya, atrof-muhitni muhofaza qilish, hududlarni obodonlashtirishga qaratilgan tadbirlarni tashkil etish boʻyicha tashabbuslar kiritadi, ularni amalga oshirishda ishtirok etadi hamda samarali deputatlik nazoratini olib boradi;

muhofaza etiladigan tabiiy hududlarni saqlash, ularni kengaytirish hamda ulardagi biologik xilma-xillikni asrash boʻyicha dasturlar ijrosi samaradorligini nazorat qiladi;

yer osti suvlaridan foydalanish boʻyicha amalga oshirilayotgan ishlarni oʻrganadi;

atmosfera havosini muhofaza qilish, uning ifloslanishi monitoring qilish, iqlim oʻzgarishini oldini olish, uning salbiy oqibatlarini yumshatish, iqlim oʻzgarishiga moslashish boʻyicha dasturlar ijrosi ustidan taʼsirchan nazorat oʻrnatadi;

chiqindilarni boshqarish, aholi punktlaridan chiqindilarni olib chiqib ketish qamrovi, chiqindilarni qayta ishlash, chiqindi poligonlarini rekultivatsiya qilish masalalarida oʻrganishlar oʻtkazadi;

daraxt va butalarning zararkunandalari hamda kasalliklariga qarshi kurashish tadbirlariga mahalliy budjetlar qoʻshimcha manbalaridan mablagʻ ajratilishini nazorat qiladi;

“Yashil makon” umummilliy loyihasi amalga oshirilishi yuzasidan qatʼiy nazorat olib boradi;

dolzarb mahalliy ekologik muammolar va ularning oldini olish boʻyicha masalalarni doimiy ravishda mahalliy Kengashlar sessiyalarida muhokama qilib borilishini tashkil etadi;

tabiiy obyektlarni davlat tabiat yodgorliklari deb eʼlon qilish, mahalliy ahamiyatga molik tabiat bogʻlarini, botanika va dendrologiya bogʻlarini, buyurtma qoʻriqxonalarini, tabiiy pitomniklarni, rekreatsiya zonalarini tashkil etish masalalarini dastlabki tarzda koʻrib chiqadi;

yerdan oqilona foydalanish, tuproq unumdorligini saqlash va qayta ishlov berish, tabiiy muhitni yaxshilash boʻyicha ijtimoiy-iqtisodiy va tashkiliy-xoʻjalik sharoitlari masalalarini koʻrib chiqadi;

dehqon va fermer xoʻjaliklari, sanoat korxonalari, savdo va umumiy ovqatlanish korxonalari oʻrtasidagi ishlab chiqarish aloqalarini oʻrganadi va ularni mustahkamlash boʻyicha takliflar kiritadi;

tabiatni muhofaza qilish va tabiiy resurslardan samarali foydalanish ustidan nazoratni amalga oshiradi;

qishloq xoʻjaligi hamda dehqon va fermer xoʻjaliklarini samarali rivojlantirish uchun zarur sharoitlar yaratish boʻyicha takliflar kiritadi;

hududdagi suv resurslaridan foydalanish va ularni muhofaza qilishning asosiy yoʻnalishlarini belgilashda, shuningdek suv resurslaridan foydalanishni tartibga solish va ularni muhofaza qilish sohasida qonuniylik hamda huquq-tartibotni taʼminlashda ishtirok etadi;

suv obyektlari holatini saqlash va yaxshilash, ularga zararli taʼsir koʻrsatilishining oldini olish va bartaraf etish, shuningdek avariyalar, toshqin, sel va tabiiy ofatlar natijasida vayron boʻlgan obyektlarni tiklash yuzasidan takliflar kiritadi;

zarur hollarda qonun hujjatlariga muvofiq ekologik ekspertiza oʻtkazish boʻyicha takliflar kiritadi;

hokimlik boʻlimlari va boshqarmalari, korxonalar, muassasalar hamda tashkilotlar rahbarlarining komissiya vakolatiga taalluqli masalalar boʻyicha hisobotlarini (axborotlarini) eshitadi, tavsiyalar beradi va ularning ijrosini nazorat qiladi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi va ijrosini nazorat qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

17. Reglament va deputatlik odob-axloqi masalalari boʻyicha doimiy komissiya:

mahalliy Kengash deputatining vakolatlarini muddatidan ilgari tugatish, shu jumladan, uni chaqirib olish toʻgʻrisidagi, mahalliy Kengash deputatini jinoiy javobgarlikka tortishga, ushlab turishga, qamoqqa olishga yoki unga nisbatan sud tartibida beriladigan maʼmuriy jazoni qoʻllashga tegishincha viloyat, tuman, shahar prokurorining taqdimnomasi boʻyicha rozilik berish haqidagi masalalarni dastlabki tarzda koʻrib chiqadi va mahalliy Kengash tomonidan koʻrib chiqishga tayyorlaydi;

mahalliy Kengashning doimiy va muvaqqat komissiyalari, boshqa organlarini tashkil qilish va tugatish haqidagi masalalarni dastlabki tarzda koʻrib chiqadi;

mahalliy Kengashning topshirigʻiga muvofiq mahalliy Kengash deputati tomonidan qonun hujjatlari, axloq normalari va Xalq deputatlari viloyat, tuman, shahar Kengashi deputatlarining odob-axloq qoidalarini buzish faktlari boʻyicha materiallarni koʻrib chiqadi hamda mazkur masala boʻyicha xulosa taqdim qiladi;

mahalliy Kengashning reglamenti loyihasini ishlab chiqadi va tasdiqlash uchun kiritadi, shuningdek unga oʻzgartishlar va qoʻshimchalar kiritish toʻgʻrisida takliflar tayyorlaydi;

mahalliy Kengashning doimiy va muvaqqat komissiyalari toʻgʻrisidagi nizomlar loyihalarini ishlab chiqishda ishtirok etadi;

mahalliy Kengash deputatlarining odob-axloq qoidalari loyihasini ishlab chiqadi va tasdiqlash uchun sessiyaga kiritadi, shuningdek unga oʻzgartishlar va qoʻshimchalar kiritish toʻgʻrisida takliflar tayyorlaydi;

saylovchilarning mahalliy Kengash deputatlari tomonidan Xalq deputatlari viloyat, tuman, shahar Kengashi deputatlarining odob-axloq qoidalarini buzish bilan bogʻliq shikoyatlarini koʻrib chiqadi;

mahalliy Kengash deputatlari, boshqa shaxslar tomonidan mahalliy Kengashning reglamenti normalariga rioya qilinishi ustidan nazoratni amalga oshiradi va uni buzish holatlari mavjud boʻlganda ularni bartaraf qilish choralarini koʻradi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

18. Xalq deputatlari tuman (shahar) Kengashining:

Mahalliy budjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi — ushbu Namunaviy nizomning 11 va 12-bandlarida;

Korrupsiyaga qarshi kurashish va xavfsizlik masalalari boʻyicha doimiy komissiyasi — ushbu Namunaviy nizomning 13-bandida;

Ijtimoiy soha, yoshlar siyosati, madaniyat va sport masalalari boʻyicha doimiy komissiyasi — ushbu Namunaviy nizomning 14 va 15-bandida;

Agrar, suv xoʻjaligi va ekologiya masalalari boʻyicha doimiy komissiyasi — ushbu Namunaviy nizomning 16-bandida;

Reglament va deputatlik odob-axloqi masalalari boʻyicha doimiy komissiyasi — ushbu Namunaviy nizomning 17-bandida belgilangan vazifalarni amalga oshiradi.

19. Doimiy komissiyalar oʻz faoliyatlarini sessiyada tasdiqlanadigan ish rejalari asosida amalga oshiradilar. Doimiy komissiyaning ish rejasi mahalliy Kengashning ish rejasi bilan belgilangan hududni ijtimoiy-iqtisodiy rivojlantirish faoliyatining asosiy yoʻnalishlariga muvofiq ishlab chiqiladi.

Doimiy komissiyaning tashabbusi bilan doimiy komissiyaning ish rejasiga tegishli oʻzgartishlar va qoʻshimchalar kiritilishi mumkin. Doimiy komissiyaning ish rejasidagi oʻzgartishlar navbatdagi sessiyada tasdiqlanadi.

20. Doimiy komissiyalar oʻz ishlarini masalalarni birgalikda, erkin muhokama qilish va hal etish, oshkoralik hamda doimiy komissiyalar aʼzolarining keng tashabbuskorligi asosida tashkil etadilar.

21. Doimiy komissiyalar oʻz faoliyatlarini majlis shaklida amalga oshiradilar.

Doimiy komissiyalarning majlislari, qoida tariqasida, har oyda kamida bir marta oʻtkaziladi.

Doimiy komissiyaning majlislari rais, rais yoʻqligida esa rais oʻrinbosarining tashabbusi bilan, shuningdek komissiya aʼzolari koʻpchiligi tomonidan chaqirilishi mumkin.

Doimiy komissiyalarning qoʻshma majlislari ular oʻrtasidagi kelishuvga muvofiq oʻtkaziladi.

22. Doimiy komissiyalar majlislarida ish davlat tilida olib boriladi.

23. Doimiy komissiyalarning majlislari, basharti ularda doimiy komissiya tarkibining yarmidan koʻpi ishtirok etsa, vakolatli hisoblanadi.

Doimiy komissiya aʼzosi majlisda ishtirok etish imkoniyati boʻlmagan taqdirda, bu haqda doimiy komissiya raisiga oldindan xabar qilishi shart.

24. Doimiy komissiyalar majlislari kun tartibi loyihasiga doimiy komissiyalar ish rejalaridagi masalalar, mahalliy Kengash qarorlarida belgilangan masalalar, shuningdek doimiy komissiyalar aʼzolari tomonidan taklif qilingan masalalar kiritiladi.

Kun tartibi loyihasi va majlisni olib borish tartibi doimiy komissiya raisi tomonidan eʼlon qilinadi va muhokama qilingandan soʻng tasdiqlanadi.

25. Doimiy komissiya majlislarida bayonnomalar yuritiladi.

Majlis bayonnomasida quyidagilar koʻrsatiladi:

doimiy komissiyaning nomi, majlisning tartib raqami;

majlis oʻtkaziladigan vaqt, sana va joy;

hozir boʻlgan va qatnashmayotgan doimiy komissiya aʼzolarining soni, shuningdek taklif etilgan shaxslar soni;

majlisning kun tartibi, majlisda koʻrib chiqish uchun kiritilgan har bir masala yuzasidan har bir maʼruzachi hamda qoʻshimcha maʼruzachining familiyasi va lavozimi;

kun tartibiga muvofiq muhokama qilinayotgan masalalarning mohiyati;

“yoqlayman”, “qarshiman” yoki “betarafman” deb berilgan ovozlar soni koʻrsatilgan, qabul qilingan qarorlar roʻyxati.

Majlis bayonnomasiga majlisda hozir boʻlgan va qatnashmayotgan doimiy komissiya aʼzolari roʻyxati, taklif etilgan shaxslar roʻyxati, maʼruzalar matnlari va boshqa materiallar ilova qilinadi.

Doimiy komissiya majlisining bayonnomasi majlis tugaganidan soʻng uch kundan kechiktirmay rasmiylashtiriladi. Bayonnoma doimiy komissiya raisi yoki uning vazifasini bajaruvchi shaxs va doimiy komissiya kotibi tomonidan imzolanadi.

26. Doimiy komissiya majlisini samarali olib borish uchun, qoida tariqasida, maʼruza uchun 20 daqiqagacha, qoʻshimcha maʼruza uchun 10 daqiqagacha, muzokaralarda soʻzga chiquvchilarga 5 — 7 daqiqagacha, axborot yoki maʼlumot berish uchun esa 3 daqiqagacha vaqt beriladi.

27. Doimiy komissiyalarning majlislari ochiq oʻtkaziladi. Doimiy komissiya yopiq yoki sayyor majlis oʻtkazish toʻgʻrisida qaror qabul qilishga haqli.

Majlislarda Oʻzbekiston Respublikasi Oliy Majlisi Senatining aʼzolari, Oʻzbekiston Respublikasi Oliy Majlisi Qonunchilik palatasining deputatlari, shuningdek hududda joylashgan davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari, ommaviy axborot vositalarining taklif qilingan vakillari va boshqa shaxslar ishtirok etishi mumkin.

Majlisga taklif etilgan shaxslar muhokama etilayotgan masalalar yuzasidan qaror qabul qilishda ovoz berish huquqiga ega emas, shuningdek ular raislik qiluvchining farmoyishlariga boʻysunishlari shart.

Majlisga taklif qilinayotgan shaxslarning soni va tarkibi doimiy komissiya raisi tomonidan hal etiladi.

Majlisda raislik qiluvchi majlisga taklif qilingan shaxslar tarkibi va soni toʻgʻrisida doimiy komissiya aʼzolarini xabardor qiladi.

28. Doimiy komissiyalar masalalarni tayyorlash va ularni puxta ishlab chiqish uchun mahalliy Kengash deputatlaridan, davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari vakillari, mutaxassislar va ekspertlardan iborat ishchi guruhlar tuzishga haqli.

29. Doimiy komissiyalar oʻzlariga taalluqli masalalarni koʻrib chiqish vaqtida teng huquqlardan foydalanadilar va bir xil majburiyatlarga egadirlar.

30. Doimiy komissiyalarning aʼzolari doimiy komissiyalar faoliyatida ishtirok etishlari, ularning qarorlarini hayotga tatbiq etishga koʻmaklashishlari, doimiy komissiyalarning topshiriqlarini bajarishlari shart. Doimiy komissiyalar aʼzolari har chorakda doimiy komissiya raisiga doimiy komissiya ish rejasida nazarda tutilgan tadbirlarning ijro etilishi boʻyicha oʻz faoliyati yakunlari va deputatlik vazifalarini bajarish natijalari toʻgʻrisida yozma hisobotlar taqdim etadilar.

Doimiy komissiyalar aʼzolari oʻz vakolatlarini ishlab chiqarish yoki xizmat faoliyatidan ajralmagan holda amalga oshiradilar. Korxonalar, muassasalar va tashkilotlarning rahbarlari doimiy komissiyalar aʼzolarini ular oʻz deputatlik vazifalarini bajaradigan vaqtda, ularning ish joyini (lavozimini) saqlagan holda, ishdan ozod qilishlari shart. Deputatlik vazifalarini bajarayotgan vaqtda doimiy komissiyalar aʼzolarining oʻrtacha ish haqi saqlanib qoladi.

31. Doimiy komissiyaning aʼzosi koʻrib chiqilayotgan masalalarni tayyorlash, muhokama qilish va qarorlar qabul qilishda, shuningdek mahalliy Kengashning, doimiy komissiyaning qarorlari bajarilishini tashkil etishda ishtirok etadi. Doimiy komissiyaning har bir aʼzosi bir ovozga ega va muhokama qilinayotgan masala yuzasidan “yoqlayman”, “qarshiman” yoki “betarafman” deb ovoz beradi. Doimiy komissiya majlisida ishtirok etayotgan doimiy komissiyaning har bir aʼzosi muhokama qilinayotgan masala boʻyicha ovoz berishda ishtirok etishga majbur.

32. Doimiy komissiya aʼzosiga doimiy komissiya tomonidan koʻrib chiqilayotgan barcha masalalarni hal etishda faol ishtirok etish uchun sharoit yaratib beriladi, unga zarur hujjatlar yoki boshqa materiallar oldindan yuboriladi. Doimiy komissiya aʼzolari doimiy komissiya majlisi oʻtkaziladigan vaqt, sana, joy va kun tartibi toʻgʻrisida kamida bir kun oldin xabardor qilinadi.

Doimiy komissiya aʼzolari doimiy komissiya tomonidan joylarda koʻrib chiqilishi lozim boʻlgan masalalarni mahalliy Kengash raisi, doimiy komissiya raisining topshirigʻiga binoan yoki oʻz tashabbusi bilan oʻrganadi, ushbu masala yuzasidan davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari va fuqarolardan kelgan takliflarni umumlashtiradi, ularni doimiy komissiya majlisida muhokama qiladi va takliflar kiritadi.

33. Bir nechta doimiy komissiyalarga taalluqli masalalar doimiy komissiyalar tomonidan birgalikda tayyorlanishi va koʻrib chiqilishi mumkin.

Doimiy komissiyalarning qoʻshma majlislarini doimiy komissiyalar raislari oʻzaro kelishuv asosida olib boradilar.

Doimiy komissiya oʻzi koʻrib chiqayotgan masalalar yuzasidan boshqa doimiy komissiyalarning fikrini soʻrab olishi mumkin.

Boshqa doimiy komissiyalarning iltimosiga binoan doimiy komissiya oʻziga taalluqli masalalar boʻyicha ushbu doimiy komissiyalar tomonidan koʻrib chiqilayotgan masalalarni tayyorlashda ishtirok etishi mumkin.

34. Ayni bir masala boʻyicha doimiy komissiyalarning fikri turlicha boʻlgan taqdirda ular kelishmovchiliklarni bartaraf etish choralarini koʻradilar. Agar murosaga kelinmasa, ushbu masalani tayyorlashga masʼul boʻlgan doimiy komissiyaning qarori uzil-kesil hisoblanadi.

35. Doimiy komissiyalarda barcha masalalar doimiy komissiya aʼzolari umumiy tarkibining koʻpchilik ovozi bilan hal etiladi.

Qaror qabul qilishda ovozlar teng boʻlib qolgan taqdirda doimiy komissiya raisining ovozi hal qiluvchi hisoblanadi.

Bir nechta doimiy komissiyaning qoʻshma majlislari oʻtkazilganda qaror har bir doimiy komissiyada kvorum mavjud boʻlgan holda majlisda qatnashayotgan doimiy komissiyalar aʼzolari umumiy tarkibining koʻpchilik ovozi bilan qabul qilinadi.

36. Doimiy komissiyalar koʻrib chiqilayotgan masalalar yuzasidan tavsiyaviy xususiyatga ega boʻlgan qarorlar qabul qiladi yoki mahalliy Kengash qarorlari loyihalari boʻyicha oʻzlariga taalluqli masalalar yuzasidan xulosalar beradi.

37. Doimiy komissiyalarning qarorlari, xulosalari va bayonnomalari doimiy komissiya raisi tomonidan imzolanadi.

Doimiy komissiyalar tomonidan qabul qilingan qoʻshma qarorlar, ular tomonidan birgalikda tayyorlangan xulosalar, shuningdek qoʻshma majlislarning bayonnomalari ularning raislari tomonidan imzolanadi.

38. Doimiy komissiyalar tomonidan qabul qilingan qarorlar tegishli davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari va manfaatdor shaxslarga yuboriladi.

39. Doimiy komissiyalarning qarorlari qaysi davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari va mansabdor shaxslarga nisbatan qabul qilingan boʻlsa, ular tomonidan koʻrib chiqilishi shart.

Doimiy komissiya qarorida boshqa muddat koʻrsatilmagan boʻlsa, koʻrib chiqish natijalari yoki koʻrilgan choralar haqida doimiy komissiyalarga bir oy muddatda xabar qilinishi lozim. Doimiy komissiyalar qarorlarini koʻrib chiqish yakunlari doimiy komissiyalar majlislarida, zarur hollarda esa sessiyalarda koʻrib chiqiladi. Zaruratga qarab, doimiy komissiya majlisida uning qarori ijro etilishi muddatini uzaytirish toʻgʻrisida qaror qabul qilinishi mumkin.

40. Doimiy komissiya qarorlari bajarilishining borishi yuzasidan nazorat doimiy komissiya raisi yoki qarorda koʻrsatilgan doimiy komissiya aʼzosi tomonidan amalga oshiriladi.

41. Doimiy komissiyalar sessiyalar kun tartibiga doir takliflarni shakllantirishda ishtirok etadilar.

42. Doimiy komissiyalar oʻzlariga taalluqli masalalar boʻyicha davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari, mansabdor shaxslardan hujjatlar, yozma xulosalar, hisobot maʼlumotlari va boshqa materiallarni soʻrab olishga haqli.

43. Doimiy komissiyalar hududda joylashgan davlat organlari, korxonalar, muassasalar, tashkilotlar, nodavlat notijorat tashkilotlari va fuqarolarning oʻzini oʻzi boshqarish organlari rahbarlarini oʻz majlislariga taklif etishi hamda ularning mahalliy Kengash qarorlari va doimiy komissiyalar tavsiyalarining bajarilishi toʻgʻrisidagi hisobotini (axborotini) tinglash huquqiga ega.

Doimiy komissiyalar tegishli organlar va tashkilotlarni koʻrib chiqiladigan masalalar xususida oldindan xabardor qiladilar.

44. Doimiy komissiyalar oʻrganib chiqish uchun oʻzlariga berilgan masalalarni dastlabki tarzda koʻrib chiqish yakunlari yuzasidan mahalliy Kengashga oʻz qarorlari yoki xulosalarini taqdim etadilar.

45. Mahalliy Kengashning topshirigʻiga binoan doimiy komissiyalar mahalliy Kengash deputatlari bildirgan takliflar, tanqidiy mulohazalar va soʻrovlarning amalga oshirilishini nazorat qiladilar.

46. Doimiy komissiya raisi:

zarur materiallar tayyorlanishini tashkil etadi, doimiy komissiya majlisini chaqiradi, majlis haqida doimiy komissiya aʼzolari va boshqa ishtirokchilarni xabardor qiladi;

doimiy komissiya majlislarida raislik qiladi;

doimiy komissiyaning ish rejasi loyihasining tayyorlanishini tashkil etadi;

doimiy komissiya aʼzolari, shu jumladan, doimiy komissiya raisi oʻrinbosari va doimiy komissiya kotibi oʻrtasida ishlarni taqsimlaydi hamda ular faoliyatini yoʻnaltiradi;

doimiy komissiya aʼzolariga topshiriqlar beradi, ularga doimiy komissiyaning faoliyati bilan bogʻliq materiallar va hujjatlarni yuboradi;

doimiy komissiya aʼzolarini ishchi guruhlarning ishida qatnashish, shuningdek doimiy komissiyaning boshqa topshiriqlarini bajarish uchun taklif qiladi;

davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari vakillarini, mutaxassislar va olimlarni doimiy komissiya ishida ishtirok etish uchun taklif qiladi;

sessiyalarda, davlat organlari, korxonalar, muassasalar, tashkilotlar, nodavlat notijorat tashkilotlari va fuqarolarning oʻzini oʻzi boshqarish organlari bilan boʻladigan munosabatlarda doimiy komissiya nomidan vakillik qiladi;

doimiy komissiya faoliyati toʻgʻrisida yarim yillik va yillik hisobot tayyorlaydi va sessiyada hisobot beradi;

doimiy komissiya qarorlarining ijro etilishi yuzasidan ishlarni tashkil etadi;

mahalliy Kengashga, mahalliy Kengash raisiga ularning topshiriqlari bajarilishi yuzasidan axborot beradi;

doimiy komissiya aʼzolarini ular tomonidan qabul qilingan qarorlar bajarilganligi va tavsiyalari koʻrib chiqilganligi toʻgʻrisida xabardor qiladi;

boshqa doimiy komissiyalar bilan birgalikda ishlar olib borilishini tashkil qiladi;

doimiy komissiya majlisi qarorlari, xulosalari va bayonnomalarini imzolaydi;

oʻz vakolati doirasida boshqa vazifalarni amalga oshiradi.

47. Doimiy komissiya raisi oʻrinbosari doimiy komissiya raisining topshirigʻiga koʻra uning ayrim vazifalarini bajaradi, doimiy komissiya raisi yoʻqligida yoki uning oʻz vazifalarini amalga oshirishga imkoni boʻlmagan hollarda rais vazifasini bajaradi.

48. Doimiy komissiya kotibi:

doimiy komissiya ish rejasining loyihasini tayyorlaydi;

doimiy komissiya ish rejasining bajarilishini monitoring qilib boradi va natijalari haqida doimiy komissiya raisiga axborot beradi;

doimiy komissiya ish yurituvi uchun javob beradi, mahalliy Kengash kotibiyatiga hujjatlarni saqlash uchun oʻrnatilgan tartibda topshiradi;

doimiy komissiya majlisi bayonnomasini yuritadi va uni imzolaydi;

doimiy komissiya faoliyati bilan bogʻliq boshqa vazifalarni bajaradi.

49. Doimiy komissiyalar faoliyatiga tashkiliy, axborot-tahliliy, texnikaviy va boshqa jihatlardan xizmat koʻrsatish mahalliy Kengash kotibiyati tomonidan taʼminlanadi.

50. Mahalliy Kengash kotibiyati doimiy komissiyalarni hujjatlar, zarur axborot va maʼlumot materiallari, shuningdek doimiy komissiyalar faoliyati bilan bogʻliq masalalar boʻyicha mutaxassislarning maslahatlari bilan taʼminlaydi.

51. Doimiy komissiyalar toʻgʻrisidagi nizomni qabul qilish, unga oʻzgartirish va qoʻshimchalar kiritish masalalari yuzasidan qarorlar sessiyada mahalliy Kengash deputatlari umumiy sonining koʻpchilik ovozi bilan qabul qilinadi.