Mamlakatimizda “Ayollar daftari” joriy qilinib, xotin-qizlarga ijtimoiy-iqtisodiy, tibbiy, huquqiy va psixologik ko‘mak berish tizimi yo‘lga qo‘yildi.

Shu bilan birga, xotin-qizlarni qo‘llab-quvvatlash borasida ijtimoiy yordam ko‘rsatishning manzilliligini ta’minlash, haqiqiy ijtimoiy yordamga muhtoj xotin-qizlarni aniqlashda muayyan qiyinchiliklar yuzaga kelmoqda.

O‘zbekiston Respublikasi Prezidentining “Oilalarni mustahkamlash va xotin-qizlarning faolligini oshirish bo‘yicha qo‘shimcha chora-tadbirlar to‘g‘risida” 2023-yil 21-dekabrdagi PQ-401-son qarori ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi o‘zgartirish va qo‘shimchalar kiritilsin:

Vazirlar Mahkamasining 2020-yil 25-martdagi 182-son qarori bilan tasdiqlangan Uy-joy sotib olish yoki yakka tartibdagi uy-joylarni qurish va rekonstruksiya qilish uchun fuqarolarga subsidiya to‘lash tartibi to‘g‘risidagi nizomda nikohi bekor qilingan oilani to‘liqsiz oila sifatida nazarda tutish;

Vazirlar Mahkamasining “Uy-joyga muhtoj xotin-qizlarni uy-joy bilan ta’minlash hamda Toshkent shahrida boshpanasiz, og‘ir turmush sharoitiga tushib qolgan fuqarolarning yashash sharoitlarini yaxshilash chora-tadbirlari to‘g‘risida” 2021-yil 6-dekabrdagi 737-son qarorida uy-joyga muhtoj xotin-qizlarning ota-onasidan yoki ularning biridan ayrilganligini hamda yolg‘iz onasi yoki otasi qaramog‘ida voyaga yetganligini Fuqarolik holati dalolatnomalarini yozish organlarining ma’lumotnomasi asosida aniqlashtirish tartibini joriy qilish.

2. O‘zbekiston Respublikasi Oila va xotin-qizlar qo‘mitasi manfaatdor vazirlik va idoralar bilan birgalikda ikki oy muddatda o‘zlari qabul qilgan normativ-huquqiy hujjatlarni ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasining Bosh vaziri o‘rinbosari Z.B. Mahkamova zimmasiga yuklansin.

1. Vazirlar Mahkamasining 2020-yil 25-martdagi 182-son qarori bilan tasdiqlangan Uy-joy sotib olish yoki yakka tartibdagi uy-joylarni qurish va rekonstruksiya qilish uchun fuqarolarga subsidiya to‘lash tartibi to‘g‘risidagi nizomning 2-bandida:

a) quyidagi mazmundagi to‘qqizinchi xatboshi bilan to‘ldirilsin:

“to‘liqsiz oila — nikohi bekor qilingan oila, turmush o‘rtog‘i vafot etgan, bedarak yo‘qolgan yoki yolg‘iz o‘zi bo‘la turib, nikohdan o‘tmasdan bolali bo‘lgan yoxud boshqa sabablarga ko‘ra ota-onalardan birining yolg‘iz o‘zi bir yoki bir nechta bolani tarbiyalayotgan oila”;

b) to‘qqizinchi — yigirma ikkinchi xatboshilar o‘ninchi — yigirma uchinchi xatboshilar deb hisoblansin.

2. Vazirlar Mahkamasining “Uy-joyga muhtoj xotin-qizlarni uy-joy bilan ta’minlash hamda Toshkent shahrida boshpanasiz, og‘ir turmush sharoitiga tushib qolgan fuqarolarning yashash sharoitlarini yaxshilash chora-tadbirlari to‘g‘risida” 2021-yil 6-dekabrdagi 737-son qarori 2-bandi “a” kichik bandining ikkinchi xatboshisi quyidagi tahrirda bayon qilinsin:

“tuman (shahar)larda tashkil etiladigan Uy-joyga muhtoj xotin-qizlarni uy-joy bilan ta’minlashga ko‘maklashish komissiyalari tomonidan noturar joylarda istiqomat qilayotgan, shuningdek, ota-onasidan yoki ularning biridan ayrilgan hamda yolg‘iz onasi, yolg‘iz otasi (Fuqarolik holati dalolatnomalarini yozish organlarining ma’lumotnomasi asosida) yoki boshqa shaxslar qaramog‘ida bo‘lgan voyaga yetgan uy-joyga muhtoj xotin-qizlarni (keyingi o‘rinlarda — uy-joyga muhtoj xotin-qizlar) aniqlash”.