Oʻzbekiston Respublikasi Prezidentining “Respublika davlat boshqaruvi organlari tizimini takomillashtirish toʻgʻrisida” 2003-yil 9-dekabrdagi PF-3358-son Farmoniga muvofiq hamda Oʻzbekiston Respublikasi Davlat geologiya va mineral resurslar qoʻmitasini boshqarish tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar Oʻzbekiston Respublikasi Davlat geologiya va mineral resurslar qoʻmitasining asosiy vazifalari etib belgilansin:

yer osti boyliklarini geologik oʻrganish, ulardan foydalanish va ularni qoʻriqlash, mineral-xomashyo bazasini takroriy ishlab chiqarish sohasida yagona davlat siyosatini roʻyobga chiqarish, kon munosabatlari sohasida davlat boshqaruvini amalga oshirish;

yer osti boyliklarini geologik oʻrganish, konlarni prognoz qilish va aniqlash boʻyicha ishlarni tashkil etish, foydali qazilmalar resurslarini (uglevodorodlar bundan mustasno) geologik-iqtisodiy baholash, yer osti boyliklari uchastkalaridan foydali qazilmalarni qazib chiqarish bilan bogʻliq boʻlmagan maqsadlarda foydalanish imkoniyatini asoslash;

oʻz vakolatlari doirasida davlat yer osti boyliklari fondini va davlat tosh geologik materiallari fondini, shuningdek alohida qoʻriqlanadigan geologik obyektlarni davlat tomonidan boshqarish;

Oʻzbekiston hududini geologik oʻrganish bilan bogʻliq ishlarni (uglevodorodlar boʻyicha ishlar bundan mustasno) muvofiqlashtirish.

2. Quyidagilar:

Oʻzbekiston Respublikasi Davlat geologiya va mineral resurslar qoʻmitasi toʻgʻrisidagi nizom 3-ilovaga muvofiq tasdiqlansin.

Oʻzbekiston Respublikasi Davlat geologiya va mineral resurslar qoʻmitasi raisiga xodimlarning belgilangan umumiy soni doirasida Davlat qoʻmitasi markaziy apparati tuzilmasiga oʻzgartirishlar kiritish huquqi berilsin.

3. Oʻzbekiston Respublikasi Davlat geologiya va mineral resurslar qoʻmitasi bir oy muddatda Oʻzbekiston Respublikasi Davlat geologiya va mineral resurslar qoʻmitasi huzuridagi Foydali qazilmalar zaxiralari boʻyicha davlat komissiyasi toʻgʻrisidagi nizom loyihasini ishlab chiqsin va belgilangan tartibda Oʻzbekiston Respublikasi Vazirlar Mahkamasiga kiritsin.

4. Oʻzbekiston Respublikasi Hukumatining 4-ilovaga muvofiq qarorlari oʻz kuchini yoʻqotgan deb hisoblansin, shuningdek ayrimlariga oʻzgartirishlar kiritilsin.

5. Mazkur qarorning bajarilishini nazorat qilish Bosh vazir oʻrinbosari Oʻ.T. Sultonov zimmasiga yuklansin.

1. Oʻzbekiston Respublikasi Davlat geologiya va mineral resurslar qoʻmitasi (keyingi oʻrinlarda matnda Davlat geologiya qoʻmitasi deb yuritiladi) davlat boshqaruvi organi hisoblanadi.

Davlat geologiya qoʻmitasi oʻz faoliyatida Oʻzbekiston Respublikasi Vazirlar Mahkamasiga hisobot beradi.

2. Davlat geologiya qoʻmitasi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi qarorlariga va boshqa hujjatlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek mazkur Nizomga amal qiladi.

3. Davlat geologiya qoʻmitasi oʻz faoliyatini davlat boshqaruvining boshqa organlari, mahalliy davlat hokimiyati organlari, jamoat birlashmalari va boshqa tashkilotlar bilan oʻzaro hamkorlikda amalga oshiradi.

4. Davlat geologiya qoʻmitasi apparati taʼminoti Oʻzbekiston Respublikasi Moliya vazirligi bilan kelishilgan xarajatlar smetasiga muvofiq Qoʻmitaga qarashli davlat korxonalari va tashkilotlarining ajratmalari hamda qonun hujjatlarida taqiqlanmagan boshqa manbalar hisobiga amalga oshiriladi.

5. Davlat geologiya qoʻmitasi yuridik shaxs hisoblanadi, Oʻzbekiston Respublikasi Davlat gerbi aks ettirilgan va oʻz nomi yozilgan muhrga ega boʻladi.

6. Quyidagilar Davlat geologiya qoʻmitasining asosiy vazifalari hisoblanadi:

yer osti boyliklarini geologik oʻrganish, ulardan foydalanish va ularni qoʻriqlash, mineral-xomashyo bazasini takroriy ishlab chiqarish sohasida yagona davlat siyosatini roʻyobga chiqarish, kon munosabatlari sohasida davlat boshqaruvini amalga oshirish;

yer osti boyliklarini geologik oʻrganish, konlarni prognoz qilish va aniqlash boʻyicha ishlarni tashkil etish, foydali qazilmalar resurslarini (uglevodorodlar bundan mustasno) geologik-iqtisodiy baholash, yer osti boyliklari uchastkalaridan foydali qazilmalarni qazib chiqarish bilan bogʻliq boʻlmagan maqsadlarda foydalanish imkoniyatini asoslash;

oʻz vakolatlari doirasida davlat yer osti boyliklari fondini va davlat tosh geologik materiallari fondini, shuningdek alohida qoʻriqlanadigan geologik obyektlarni davlat tomonidan boshqarish;

Oʻzbekiston hududini geologik oʻrganish bilan bogʻliq ishlarni (uglevodorodlar boʻyicha ishlar bundan mustasno) muvofiqlashtirish.

7. Davlat geologiya qoʻmitasi oʻziga yuklangan vazifalarni bajarish uchun quyidagi funksiyalarni amalga oshiradi:

Oʻzbekiston hududining geologik jihatdan oʻrganilganligini, iqtisodiyotning foydali qazilmalar zaxiralari bilan taʼminlanganligini tahlil qiladi va shuning asosida vazirliklar, idoralar va mahalliy davlat hokimiyati organlari bilan birgalikda mineral-xomashyo bazasidan foydalanish, takroriy ishlab chiqarish surʼatlarini, yanada kengaytirish, mustahkamlash va sifat jihatidan yaxshilash, oqilona va kompleks foydalanish strategiyasi va ushbu maqsadlar uchun zarur boʻlgan davlat mablagʻlari va boshqa investitsiyalar haqida takliflarni ishlab chiqadi;

respublikani ijtimoiy va iqtisodiy rivojlantirish prognozlarini, respublikaning mineral-xomashyo bazasini takroriy ishlab chiqarish, yer osti boyliklarini muhofaza qilish dasturlarini, yer osti boyliklarini geologik oʻrganish va muhofaza qilish xalqaro dasturlarini ishlab chiqishda va amalga oshirishda qatnashadi;

yer osti boyliklarini geologik oʻrganish va mineral resurslardan foydalanish sohasida ilmiy-tadqiqot, mavzuli, tajriba-konstruktorlik ishlari, konlar va kon jinslarining texnologik tadqiqotlari, shuningdek boshqa ishlarning ustuvor yoʻnalishlari ilmiy asoslanishini taʼminlaydi;

geologiya-qidiruv, ilmiy-tadqiqot va tajriba-konstruktorlik ishlari oʻtkazilishiga davlat buyurtmalarini oʻziga qarashli korxonalar va tashkilotlar oʻrtasida taqsimlaydi, Davlat budjeti mablagʻlari va Davlat geologiya qoʻmitasining oʻz mablagʻlari hisobiga ularning bajarilishini moliyalashtiradi;

yer osti boyliklarini geologik oʻrganish ishlari olib borilishini, foydali qazilmalarning asosiy turlari zaxiralari oʻsishi va respublika moddiy-xomashyo bazasi shakllantirilishi, mustahkamlanishi va kengaytirilishi boʻyicha (uglevodorod xomashyodan tashqari) hamda respublika hududini geologik oʻrganish sohasidagi boshqa ishlar boʻyicha davlat buyurtmalari bajarilishini taʼminlaydi;

Oʻzbekiston hududining geologiya-ekologik tadqiq etilishi dasturlari ishlab chiqilishi va amalga oshirilishida ishtirok etadi;

tadbirkorlik tavakkalchiligi sharoitlarida geologik oʻrganish, foydali qazilmalarni qazib olish, foydali qazilmalarni qazib olish bilan bogʻliq boʻlmagan yer osti inshootlari qurish va ulardan foydalanish uchun yer osti uchastkalaridan foydalanish huquqini beruvchi litsenziyalarni Oʻzbekiston Respublikasi Vazirlar Mahkamasi tomonidan belgilangan tartibda beradi (uglevodorodlar konlarini izlash va razvedka qilish hamda qazib olish maqsadida geologik oʻrganish, uglevodorodlarni saqlash uchun yer osti inshootlari qurish va ulardan foydalanish, chiqindilarni saqlash va koʻmish uchun litsenziyalardan tashqari), texnogen mineral hosilalardan, alohida qoʻriqlanadigan geologik obyektlar hosilalaridan foydalanish hamda tovlanadigan tosh xomashyo, paleontologik qoldiqlar namunalarini va boshqa geologik kolleksiya materiallarini toʻplash;

Davlat budjeti mablagʻlari hisobiga geologik oʻrganish uchun yer osti boyliklari uchastkalaridan foydalanish huquqi paydo boʻlishining asosi hisoblangan yer osti boyliklarini geologik oʻrganishga loyiha-smeta hujjatlarini oʻz vakolatlari doirasida tasdiqlaydi;

Oʻzbekiston Respublikasi Vazirlar Mahkamasi tomonidan belgilangan tartibda foydalanish uchun berilgan yer osti boyliklari uchastkalarining davlat hisobini yuritadi, yer osti boyliklari uchastkalaridan foydalanish huquqini va yer osti boyliklarini geologik oʻrganish ishlarining davlat hisobini yuritish huquqini davlat roʻyxatidan oʻtkazadi;

Oʻzbekiston Respublikasi Davlat geologiya va mineral resurslar qoʻmitasi huzuridagi Foydali qazilmalar zaxiralari boʻyicha davlat komissiyasi ekspertlarining shaxsiy tarkibini tasdiqlaydi;

geologiya materiallarini koʻrib chiqadi va sanoat ahamiyatini yoʻqotgan yoxud keyinchalik olib borilgan geologiya-qidiruv ishlarida yoki konni qazishda tasdiqlanmagan foydali qazilmalar zaxiralarini yer osti boyliklaridan foydalanuvchilar balansidan qonun hujjatlarida belgilangan tartibda hisobdan chiqarish toʻgʻrisidagi takliflarni Oʻzbekiston Respublikasi Davlat geologiya va mineral resurslar qoʻmitasi huzuridagi Foydali qazilmalar zaxiralari boʻyicha davlat komissiyasiga kiritadi;

davlat mablagʻlari hisobiga olingan yer osti boyliklari toʻgʻrisidagi geologik axborotga va boshqa axborotga mulkdorning huquq va majburiyatlarini amalga oshiradi (uglevodorod xomashyo boʻyicha axborotdan tashqari);

oʻz vakolatlari doirasida yer osti boyliklarini geologik oʻrganish, ulardan foydalanish va ularni muhofaza qilish ustidan davlat nazoratini amalga oshiradi;

idoraviy boʻysunishi va mulkchilik shakllaridan qatʼi nazar korxonalar va tashkilotlar tomonidan yer osti boyliklarining geologik oʻrganilishi boʻyicha ishlarni amalga oshirish uchun ajratiladigan davlat mablagʻlaridan foydalanilishini nazorat qiladi;

ilmiy, tarixiy, madaniy, estetik ahamiyatga va boshqa ahamiyatga ega boʻlgan alohida muhofaza qilinadigan geologiya obyektlari hududida (ilmiy va oʻquv poligonlari, geologiya zakazniklari, tabiat yodgorliklari, gʻorlar va boshqa yer osti boʻshligʻi) ilmiy-tadqiqot ishlari olib borilishini nazorat qiladi, alohida muhofaza qilinadigan yangi geologiya obyektlari vujudga kelishi toʻgʻrisida xulosalar beradi va takliflar kiritadi;

Davlat budjeti mablagʻlari hisobiga yer osti boyliklarini geologik oʻrganish ishlarini olib boruvchi yuridik va jismoniy shaxslar tomonidan bajarilishi majburiy boʻlgan yer osti boyliklarini geologik oʻrganish ishlarini loyihalashtirish va yuritish sohasida normalar va qoidalarni ishlab chiqadi va tasdiqlaydi;

yer osti boyliklarini geologik oʻrganish ishlarini olib borishga loyiha-smeta hujjatlari ekspertizasini tashkil etadi va uning amalga oshirilishini taʼminlaydi, belgilangan tartibda loyiha-smeta hujjatlarini tasdiqlaydi;

Oʻzbekiston Respublikasi Davlat tabiatni muhofaza qilish qoʻmitasi va Sanoatda va konchilikda ishlarning bexatar olib borilishini nazorat qilish davlat inspeksiyasi bilan birgalikda Oʻzbekiston Respublikasining keng tarqalgan foydali qazilmalari roʻyxatini aniqlaydi va uni tasdiqlash uchun Oʻzbekiston Respublikasi Vazirlar Mahkamasiga taqdim etadi;

yer osti boyliklari toʻgʻrisidagi geologik axborotlar va boshqa axborotlarning davlat fondini, tosh geologik materiallari davlat fondini yuritadi;

foydali qazilmalar konlarini kelgusida aniqlash mumkin boʻlgan konlar va yer osti boyliklari uchastkalari davlat reyestrini (oʻz vakolatlari doirasida), foydali qazilmalar zaxiralari davlat balansini, shu jumladan uglevodorodlar davlat balansini, konlarning, foydali qazilmalar va texnogen mineral hosilalar namoyon boʻlishi davlat kadastrini, davlat suv kadastrini (yer osti suvlari), tabiiy xavf yuqori zonalar (xavfli geologiya jarayonlari paydo boʻlish zonalari) davlat kadastrini yuritadi, shuningdek muhofaza etiladigan tabiiy hududlar davlat kadastri boʻyicha chuchuk yer osti suvlari shakllanishi zonalari yuzasidan maʼlumotlarni tuzadi va taqdim etadi;

manfaatdor vazirliklar va idoralar bilan oʻzaro hamkorlikda yer osti boyliklari davlat monitoringi, shu jumladan yer osti suvlari monitoringi amalga oshirilishini taʼminlaydi;

xavfli geologiya jarayonlari (koʻchki, oʻpirilish, choʻkish, suffoziylar, karstlar)ni oʻrganish, shuningdek ularning hosil boʻlishi va rivojlanishini kuzatish ishlarini amalga oshiradi;

qoʻshni davlatlarning geologiya xizmatlari bilan birgalikda transchegara hududlar doirasida radioaktiv va zaharli elementlar bilan ifloslanish oʻchoqlarini aniqlash va oʻrganish ishlarini amalga oshiradi, qoʻshni hududlarning ekologik holatiga salbiy taʼsir koʻrsatishi mumkin boʻlgan alohida xavfli zonalar va uchastkalarni aks ettirgan holda geologiya xaritalari va atlaslarini tuzadi hamda ularni Oʻzbekiston Respublikasi Vazirlar Mahkamasiga, manfaatdor vazirliklar va idoralarga taqdim etadi;

vazirliklar va idoralar bilan birgalikda suv resurslaridan (yer osti suvlaridan) foydalanish hamda hududlarni texnogen va xavfli geologiya jarayonlari taʼsiridan himoya qilish sxemalarini ishlab chiqadi;

qonun hujjatlarida belgilangan tartibda geologiya muhiti obyektlari qoʻriqlanishi, shu jumladan yer osti suvlarining ifloslanish va qurib qolishdan qoʻriqlanishi ustidan nazoratni amalga oshiradi;

suvdan foydalanish uchun quduqlarni burgʻulashga ruxsatnoma va suvdan (yer osti suvlaridan) maxsus foydalanishga ruxsatnoma berilishini kelishadi;

respublikaning shoʻrlangan va choʻlga aylangan hududlariga taʼsir koʻrsatuvchi mintaqaviy ekzogen geologiya jarayonlarini oʻrganadi;

kelgusida sanoat va xoʻjalik qurilishi obyektlarini joylashtirish uchun muhandislik-geologiya, gidrogeologiya va geoekologiya asoslashlarini tayyorlaydi;

qurilayotgan va rekonstruksiya qilinayotgan yirik sanoat va qishloq xoʻjaligi obyektlarining atrof muhitga taʼsirini baholash ishlarida ishtirok etadi;

yer osti boyliklari uchastkalaridan foydali qazilmalarni qazish bilan bogʻliq boʻlmagan, shu jumladan chiqindilarni saqlash va koʻmish uchun yer osti inshootlari qurish va ulardan foydalanish uchun foydalanish imkoniyati oʻrganib chiqilishini taʼminlaydi va xulosalar beradi;

boʻlajak qurilish uchastkalari ostida foydali qazilmalar yoʻqligi, sanoat oʻzlashtirishi uchun berilmagan foydali qazilmalar konlari maydonlarida imorat qurish imkoniyati toʻgʻrisida (keng tarqalgan foydali qazilmalar konlaridan tashqari) xulosalar, shuningdek xavfli geologiya jarayonlari paydo boʻlishi mumkin boʻlgan zonalarda xalq xoʻjaligi va xoʻjalik obyektlari qurish uchun uchastkalarni tanlash boʻyicha xulosalar berilishini taʼminlaydi;

yer osti boyliklari uchastkalaridan foydalanish huquqini berishga ommaviy savdolar tashkil etilishi va oʻtkazilishiga vazirliklar va idoralar bilan birgalikda materiallar tayyorlaydi va ularda qatnashadi, yer osti boyliklari uchastkalaridan foydalanish bilan bogʻliq investitsiya loyihalarining texnik-iqtisodiy asoslashlari ishlab chiqilishida ishtirok etadi;

vazirliklar, idoralar va mahalliy davlat hokimiyati organlari bilan birgalikda geologik oʻrganish, yer osti boyliklaridan foydalanish va ularni muhofaza qilish sohasida tashqi iqtisodiy aloqalarni rivojlantirish strategiyasi toʻgʻrisidagi takliflarni ishlab chiqadi;

xorijiy investitsiyalarni jalb etish ishlarini olib boradi, xorijiy investorlar bilan toʻgʻridan toʻgʻri muzokaralar oʻtkazadi va ularga yer osti boyliklari uchastkalaridan foydalanish huquqini berish toʻgʻrisidagi takliflarni (oʻz vakolatlari doirasida) Oʻzbekiston Respublikasi Vazirlar Mahkamasiga kiritadi;

xalqaro hamkorlikni amalga oshiradi, konferensiyalar, simpoziumlar, koʻrgazmalar oʻtkazadi, Davlat geologiya qoʻmitasi vakolatiga kiradigan masalalar boʻyicha xalqaro tashkilotlar, boshqa mamlakatlarning geologiya xizmatlari bilan belgilangan tartibda aloqalar oʻrnatadi;

Oʻzbekiston Respublikasining xalqaro tashkilotlardagi aʼzoligidan hamda geologik oʻrganish, yer osti boyliklaridan foydalanish va ularni muhofaza qilish, mineral-xomashyo potensialini takroriy ishlab chiqarish va rivojlantirish sohasida xalqaro shartnomalarda ishtirok etishidan kelib chiquvchi majburiyatlar bajarilishini tashkil etishda va ularning muvofiqlashtirilishida ishtirok etadi;

respublikaning mineral-xomashyo bazasi holati toʻgʻrisidagi axborot tizimlari faoliyat koʻrsatishi va rivojlanishini taʼminlaydi, geologiya, geofizika, geokimyo, gidrogeologiya, muhandislik-geologiya, geoekologiya mundarijasiga ega boʻlgan davlat xaritalari va atlaslarini, boshqa kartografiya materiallarini, axborotnomalarni, shu jumladan yer osti suvlarining holati toʻgʻrisidagi axborotnomalarni, geologik oʻrganish, yer osti boyliklaridan foydalanish va ularni muhofaza qilish sohasida toʻplamlar, kataloglar, metodik materiallar, yoʻriqnomalar, maʼlumotnomalarni belgilangan tartibda nashr etadi;

manfaatdor vazirliklar va idoralar bilan birgalikda geologiya-qidiruv ishlariga xarajatlarni (mineral-xomashyo bazasini takroriy ishlab chiqarish) qoplash stavkalari miqdorlarini, geologiya-qidiruv ishlarini moliyalashtirish va ularga kreditlar ajratish boʻyicha normativ hujjatlarni ishlab chiqadi;

tarmoq korxonalari va tashkilotlarini davlat tasarrufidan chiqarish va xususiylashtirishga koʻmaklashadi;

ekstremal sharoitlarda (suvsizlik, baland togʻli, yer osti va boshqa sharoitlarda) ishlarni olib borish uchun qoʻshimcha haq miqdorlarini belgilash yuzasidan takliflarni asoslaydi va ishlab chiqadi;

tarmoqda mehnatni muhofaza qilish ishlarini muvofiqlashtiradi;

kadrlarni tayyorlash va ularning malakasini oshirish ishlarini olib boradi, geolog mutaxassislarni oʻqitishni amalga oshiradi;

qonun hujjatlarida nazarda tutilgan boshqa funksiyalarni bajaradi.

8. Davlat geologiya qoʻmitasi oʻziga yuklangan vazifalar va funksiyalarni bevosita, shuningdek oʻziga qarashli davlat korxonalari va tashkilotlari orqali hal etadi.

9. Davlat geologiya qoʻmitasi oʻziga yuklangan vazifalar va funksiyalarni bajarish uchun quyidagi huquqlarga ega:

vazirliklar, idoralar va mahalliy davlat hokimiyati organlaridan, yuridik shaxslardan Davlat geologiya qoʻmitasi vakolatiga tegishli masalalari boʻyicha axborotlarni soʻrash va olish;

oʻz vakolatlari doirasida yer osti boyliklari uchastkalaridan foydalanish huquqini berish;

oʻz vakolatlari doirasida yer osti boyliklaridan foydalanuvchilarning yer uchastkalaridan foydalanish huquqini beruvchi litsenziyalarda belgilangan shartlarga, yer osti boyliklarini geologik oʻrganish ishlarini olib borish normalari va qoidalariga rioya etilishini tekshirish;

vazirliklar, idoralar, korxonalar va tashkilotlar bilan kelishuv boʻyicha geologiya materiallari ekspertizasini oʻtkazish uchun ularning mutaxassislarini jalb etish;

Oʻzbekiston Respublikasi Vazirlar Mahkamasi tomonidan belgilangan tartibda yer osti boyliklari uchastkalaridan foydalanish huquqini cheklash, toʻxtatib turish va toʻxtatish toʻgʻrisida qaror qabul qilish;

zaruriyat boʻlganda normativ-huquqiy hujjatlarni ishlab chiqish uchun olimlar, tarmoq mutaxassislari orasidan vaqtinchalik ishchi guruhlar tashkil etish, shartnoma asosida ushbu ishga boshqa vazirliklar va idoralarning mutaxassislari va ekspertlarini jalb etish;

geologiya, geofizika, geokimyo, gidrogeologiya, muhandislik-geologiya, geologiya-ekologiya mundarijasidan iborat davlat xaritalari va atlaslarini hamda boshqa kartografiya materiallari, axborotnomalar, shu jumladan yer osti suvlarining holati toʻgʻrisidagi axborotnomalar, yer osti boyliklarini geologik oʻrganish, ulardan foydalanish va ularni muhofaza qilish sohasidagi toʻplamlar, kataloglar, metodik materiallar, ilmiy asarlarni nashr etish;

Davlat budjeti mablagʻlari va oʻz mablagʻlari hisobiga olingan yer osti boyliklari toʻgʻrisidagi geologik axborotlar va boshqa axborotlarni belgilangan tartibda shartnoma asosida realizatsiya qilish (berish, almashtirish, sotish);

Davlat geologiya qoʻmitasi, geologiya tarmogʻi korxonalari va tashkilotlari xodimlarini, shuningdek Oʻzbekiston Respublikasi va xorijiy mamlakatlarning fuqarolarini geologiya tarmogʻi koʻkrak nishonlari, faxriy yorliqlar bilan mukofotlashni taʼsis etish va belgilangan tartibda mukofotlash.

Davlat geologiya qoʻmitasi Oʻzbekiston Respublikasi qonun hujjatlariga muvofiq boshqa huquqlarga ham ega boʻlishi mumkin.

10. Davlat geologiya qoʻmitasi oʻz vakolatlari doirasida vazirliklar va idoralar, mahalliy davlat hokimiyati organlari, korxonalar, muassasalar, tashkilotlar, mansabdor shaxslar va fuqarolar tomonidan bajarilishi majburiy boʻlgan normativ-huquqiy hujjatlarni tasdiqlashga haqlidir.

Davlat geologiya qoʻmitasi, zarur hollarda, boshqa vazirliklar va idoralar bilan birgalikda qoʻshma qarorlar va boshqa hujjatlar chiqarishga haqlidir.

11. Davlat geologiya qoʻmitasi oʻziga yuklangan vazifalarning samarali bajarilishi uchun javob beradi.

12. Davlat geologiya qoʻmitasiga qonun hujjatlarida belgilangan tartibda lavozimga tayinlanadigan va lavozimdan ozod etiladigan rais boshchilik qiladi.

Raisning qonun hujjatlarida belgilangan tartibda lavozimga tayinlanadigan va lavozimdan ozod etiladigan bir nafar oʻrinbosari boʻladi.

Davlat geologiya qoʻmitasi raisi moddiy, maishiy, transport va tibbiy xizmat koʻrsatish shart-sharoitlari boʻyicha vazirga, uning oʻrinbosari esa vazirning birinchi oʻrinbosariga tenglashtiriladi.

13. Davlat geologiya qoʻmitasi raisi:

Davlat geologiya qoʻmitasi faoliyatiga umumiy rahbarlik qiladi va Davlat geologiya qoʻmitasiga yuklangan vazifalar va funksiyalarning bajarilishi uchun shaxsan javob beradi;

zaruriyat boʻlganda xodimlarning belgilangan umumiy soni doirasida Davlat geologiya qoʻmitasi markaziy apparati tuzilmasiga oʻzgartirishlar kiritadi, shtat jadvalini va xarajatlar smetasini tasdiqlaydi;

Davlat geologiya qoʻmitasi tizimiga kiruvchi davlat korxonalari va tashkilotlarining ustavlarini belgilangan tartibda tasdiqlaydi;

Davlat geologiya qoʻmitasi markaziy apparati xodimlarini, Davlat geologiya qoʻmitasi tizimiga kiruvchi davlat korxonalari va tashkilotlari rahbarlarini belgilangan tartibda lavozimga tayinlaydi va lavozimdan ozod qiladi;

geologiya tarmogʻining koʻkrak nishonlari toʻgʻrisidagi nizom ishlab chiqilishini tashkil etadi va uni belgilangan tartibda tasdiqlaydi, koʻkrak nishonlari tavsifini ishlab chiqadi va tasdiqlaydi, soha xodimlarini, shuningdek Oʻzbekiston Respublikasi va xorijiy mamlakatlarning fuqarolarini geologiya tarmogʻi koʻkrak nishonlari, faxriy yorliqlar bilan mukofotlashga taqdim etish tartibini belgilaydi.

Rais qonun hujjatlariga muvofiq boshqa vakolatlarni amalga oshiradi.

14. Davlat geologiya qoʻmitasida qoʻmita raisi (hayʼat raisi), raisning oʻrinbosari (lavozimiga koʻra), Davlat geologiya qoʻmitasi markaziy apparati, shuningdek qoʻmitaga qarashli korxonalar va tashkilotlar rahbar xodimlaridan iborat tarkibda 7 kishidan iborat hayʼat tashkil etiladi.

Hayʼatning shaxsiy tarkibi Davlat geologiya qoʻmitasi raisining taqdimnomasi boʻyicha Oʻzbekiston Respublikasi Vazirlar Mahkamasi tomonidan tasdiqlanadi.

Davlat geologiya qoʻmitasi hayʼati Davlat geologiya qoʻmitasi faoliyatining asosiy masalalarini koʻrib chiqadi, Davlat geologiya qoʻmitasi korxonalari va tashkilotlarining rahbarlari hisobotlarini eshitadi, Davlat geologiya qoʻmitasining muhim qarorlari va boshqa hujjatlari loyihalarini muhokama qiladi.

Hayʼat qarorlari Davlat geologiya qoʻmitasining buyruqlari bilan hayotga joriy etiladi.

15. Yer osti boyliklarini geologik oʻrganish bilan bogʻliq eng muhim yoʻnalishlarni, ishlar natijalarini va boshqa masalalarni koʻrib chiqish uchun Davlat geologiya qoʻmitasida yuqori malakali mutaxassislardan, shuningdek ilmiy-tadqiqot institutlari va boshqa tashkilotlarning vakillaridan iborat tarkibda ilmiy-texnik kengash tashkil etiladi. Ilmiy-texnik kengashning tarkibi va uning toʻgʻrisidagi Nizom Davlat geologiya qoʻmitasi raisi tomonidan tasdiqlanadi.

16. Qidiruv va foydalanish konditsiyalarini, foydali qazilmalar zaxiralarini tasdiqlash va geologiya materiallarining davlat ekspertizasini oʻtkazish uchun Davlat geologiya qoʻmitasida Foydali qazilmalar zaxiralari boʻyicha davlat komissiyasi tashkil etiladi, komissiyaga Davlat geologiya qoʻmitasi raisi boshchilik qiladi.

17. Davlat geologiya qoʻmitasi qonun hujjatlarida belgilangan tartibda qayta tashkil etiladi va tugatiladi.

1. Vazirlar Mahkamasining “Oʻzbekiston SSJ Davlat geologiya va mineral resurslar qoʻmitasini tashkil etish toʻgʻrisida” 1991-yil 10-maydagi 125-son qarori (Oʻzbekiston Respublikasi QT, 1991-y., 5-son, 15-modda).

2. Vazirlar Mahkamasining “Davlat geologiya qoʻmitasining neft va gazni geologik-qidiruv hamda izlash ishlarini amalga oshiruvchi korxonalarini “Oʻzbekneftgaz” milliy korporatsiyasi tarkibiga oʻtkazish toʻgʻrisida” 1995-yil 3-yanvardagi 2-son qaroriga 2-ilovaning 1-bandi.

3. Vazirlar Mahkamasining “Oʻzbekiston Respublikasi Davlat geologiya va mineral resurslar qoʻmitasi toʻgʻrisidagi nizomni tasdiqlash haqida” 1996-yil 9-dekabrdagi 435-son qarori (Oʻzbekiston Respublikasi QT, 1996-y., 12-son, 34-modda).

1. Vazirlar Mahkamasining 1997-yil 13-yanvardagi 19-son qarori bilan tasdiqlangan Yer osti boyliklaridan foydalanish va muhofaza qilish, yer qaʼrini geologik oʻrganish va mineral resurslardan oqilona foydalanish ustidan davlat tekshiruvi va nazorati oʻrnatish toʻgʻrisidagi nizomda:

3-bandning toʻrtinchi xatboshidagi “va uning hududiy boʻlimlari” soʻzlari chiqarib tashlansin;

6-bandda:

birinchi xatboshidagi “Yer qaʼrini geologik oʻrganish va mineral resurslardan oqilona foydalanish ustidan davlat nazorati (davlat geologiya nazorati boʻlimi) boʻlimi boshligʻi” soʻzlari “Davlat geologiya nazorati boshqarmasi boshligʻi” soʻzlari bilan almashtirilsin;

ikkinchi va uchinchi xatboshidagi “boʻlim” soʻzi “boshqarma” soʻzi bilan almashtirilsin;

toʻrtinchi xatboshi chiqarib tashlansin.

2. Vazirlar Mahkamasining “Davlat va xoʻjalik boshqaruvi respublika organlarining boshqaruv xodimlari sonini maqbullashtirish va qisqartirish toʻgʻrisida” 2004-yil 5-yanvardagi 1-son qaroriga 3-ilovaning “V. Yoqilgʻi-energetika kompleksi boʻlimida” 52-bandning 6-satrida “41” raqami “45” raqami bilan, “564,5” raqami “560,5” raqami bilan almashtirilsin.