Oʻzbekiston Respublikasi Vazirlar Mahkamasining 2022-yil 28-sentabrdagi 540-son “Fuqarolik holati dalolatnomalarini yozish tartiblarini yanada takomillashtirish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi adliya vazirining 2018-yil 13-dekabrdagi 554-mh-son “Fuqarolik holati dalolatnomalarini qayd etuvchi organlar tomonidan gerbli guvohnomalarni toʻldirish qoidalarini tasdiqlash haqida”gi buyrugʻiga (roʻyxat raqami 3098, 2018-yil 13-dekabr) (Qonun hujjatlari maʼlumotlari milliy bazasi, 14.12.2018-y., 09/18/3098/2315-son) ilovaga muvofiq oʻzgartirishlar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Buyruqning nomi va 1-bandidagi “qayd etuvchi organlar” degan soʻzlar “yozish organlari” degan soʻzlar bilan almashtirilsin.

2. Qoidalarda:

1) nomidagi “qayd etuvchi organlar” degan soʻzlar “yozish organlari” degan soʻzlar bilan almashtirilsin;

2) muqaddima quyidagi tahrirda bayon etilsin:

“Mazkur Qoidalar fuqarolik holati dalolatnomalarini yozish organlari (bundan buyon matnda FHDY organlari deb yuritiladi) tomonidan gerbli guvohnomalar blankalarini (bundan buyon matnda gerbli guvohnomalar deb yuritiladi) toʻldirish tartibini belgilaydi.”;

3) 10-band quyidagi tahrirda bayon etilsin:

“10. Tugʻilganlik haqida gerbli guvohnomada shaxsning tugʻilgan sanasi raqamlar va soʻzlar bilan yoziladi.

Nikoh tuzilganligi va nikohdan ajralganlik haqidagi gerbli guvohnomalarda nikoh qayd etilgan hamda nikoh bekor qilingan yil va kun raqamlar bilan, oy esa harflar bilan yoziladi.”;

4) 12-band quyidagi tahrirda bayon etilsin:

“12. Oʻlim haqidagi gerbli guvohnomada shaxs vafot etgan yil va kun raqamlar bilan, oy esa harflar bilan yoziladi. Agar oʻlim sodir boʻlgan kun haqida aniq maʼlumot boʻlmasa, guvohnomada faqat aniq boʻlgan maʼlumot yoziladi, aniq boʻlmagan maʼlumot oʻrniga chiziq chiziladi (masalan, 2018-yil - oktyabr).”;

5) 14-banddan “qoʻlda,” degan soʻz chiqarib tashlansin;

6) 16-bandda:

uchinchi xatboshi quyidagi tahrirda bayon etilsin:

“FHDY organi nomi oʻzgargan taqdirda gerbli guvohnomaning “Guvohnoma bergan organ” ustunida FHDY organining takroriy guvohnoma berilayotgan vaqtdagi nomi.”;

toʻrtinchi xatboshi chiqarib tashlansin.