“Oʻzqishloqxoʻjalikmash-xolding” xolding kompaniyasi va uning tarkibiga kiruvchi korxonalarni yanada rivojlantirish uchun zarur shart-sharoitlar yaratish, zamonaviy qishloq xoʻjaligi texnikasi ishlab chiqarishni kengaytirish va xorijiy investorlarni jalb qilish maqsadida Vazirlar Mahkamasi qaror qiladi:

1. 1999-yil 1-iyundagi holatiga koʻra:

“Oʻzqishloqxoʻjalikmash-xolding” xolding kompaniyasi tomonidan 1-ilovaga* muvofiq 2123648,86 ming soʻm miqdoridagi ustav jamgʻarmasi shakllantirilganligi;

davlat ulushi 88,6 foiz (1881713,86 ming soʻm) va boshqa aksiyadorlar ulushi 11,4 foiz (241935 ming soʻm) boʻlgan oʻz aksiyalarini birinchi chiqarish va ularni joylashtirish tugallanganligi;

1-ilovada koʻrsatilgan korxonalar aksiyalarining davlatga tegishli paketlari hamda mulkiy ulushlar Oʻzbekiston Respublikasi Davlat mulki qoʻmitasi tomonidan “Oʻzqishloqxoʻjalikmash-xolding” xolding kompaniyasiga mulk qilib berilganligi maʼlumot uchun qabul qilinsin.

2. “Oʻzqishloqxoʻjalikmash-xolding” xolding kompaniyasi aksiyadorlari umumiy yigʻilishining ustav jamgʻarmasini 2-ilovada* koʻrsatilgan manbalar hisobiga 7818748,86 ming soʻm miqdorida belgilagan holda koʻpaytirish toʻgʻrisidagi qaroriga rozilik berilsin.

3. “Oʻzqishloqxoʻjalikmash-xolding” xolding kompaniyasi va uning tarkibiga kiruvchi korxonalarga bir oy muddatda taʼsis hujjatlariga tegishli oʻzgarishlar kiritish hamda ularni belgilangan tartibda roʻyxatdan oʻtkazish tavsiya qilinsin.

4. Oʻzbekiston Respublikasi Davlat mulki qoʻmitasi, Moliya vazirligi Adliya vazirligi bilan birgalikda “OʻzPGS a.j.” aksiyadorlik jamiyati qoʻshma korxonasi va Italiyaning “Adjind interneyshnl” firmasi bilan, Italiya tomoni oldidagi majburiyatlarni “Oʻzqishloqxoʻjalikmash-xolding” xolding kompaniyasiga yuklamagan holda, mulkiy masalalarni bir oy muddatda tartibga keltirsinlar.

5. Qishloq xoʻjaligi mashinasozligini modernizatsiya qilishni jadallashtirish, yuqori samarali va raqobatbardoshli qishloq xoʻjaligi texnikasi ishlab chiqarishni kengaytirish zaruriyatini hisobga olgan holda, istisno tariqasida, belgilab qoʻyilsinki, 2001-yil 1-yanvarga qadar, “Oʻzqishloqxoʻjalikmash-xolding” xolding kompaniyasining davlatga tegishli aksiyalarini sotishdan olingan mablagʻlar (qonun hujjatlariga muvofiq korxonalar ixtiyorida qoldiriladigan mablagʻlardan tashqari) 3 yil muddatga ulardan “Oʻzqishloqxoʻjalikmash-xolding” xolding kompaniyasi tarkibiga kiruvchi korxonalarni texnika bilan qayta jihozlash va rivojlantirish uchun foizsiz qaytarish asosida xolding kompaniyasiga beriladi.

Oʻzbekiston Respublikasi Moliya vazirligi, Davlat mulki qoʻmitasi xolding kompaniyasi tomonidan davlatga tegishli aksiyalar paketini sotishdan olinadigan hamda unga foizsiz qaytarish asosida berilayotgan mablagʻlardan maqsadli foydalanilishi ustidan qatʼiy nazorat oʻrnatsinlar.

6. Quyidagilar:

“Oʻzqishloqxoʻjalikmash-xolding” xolding kompaniyasiga moliyaviy xoldinglarga tegishli qoidalar tatbiq etilmasligi;

“Oʻzqishloqxoʻjalikmash-xolding” xolding kompaniyasi tomonidan amaldagi qonun hujjatlariga muvofiq zaxira jamgʻarmasi tashkil etilishi, jamgʻarma mablagʻlaridan belgilangan tartibda, shu jumladan imtiyozli aksiyalar boʻyicha dividendlar toʻlash uchun foydalanilishi mumkinligi maʼlumot uchun qabul qilinsin.

7. Viloyatlar va Toshkent shahar hokimliklari 2000-yil 1-fevralgacha “Oʻzqishloqxoʻjalikmash-xolding” xolding kompaniyasi tarkibiga kiruvchi korxonalarning ijtimoiy infratuzilmasi obyektlari 2000-yil 1-yanvardagi holatiga koʻra tuman (shahar) hokimliklari balansiga qabul qilinishini taʼminlasinlar.

8. Oʻzbekiston Respublikasi Hukumatining qarorlariga quyidagi oʻzgartirishlar kiritilsin:

Oʻzbekiston Respublikasi Vazirlar Mahkamasining 1996-yil 31-yanvardagi 45-son qarori 3-bandining uchinchi va toʻrtinchi xatboshilari oʻz kuchini yoʻqotgan deb hisoblansin;

Oʻzbekiston Respublikasi Vazirlar Mahkamasining 1998-yil 25-sentabrdagi 410-son qaroriga 1-ilovada:

97-99, 101-105-satrlar chiqarib tashlansin;

“Ustav jamgʻarmasi” ustuni 100-satrdagi 2003920000 soʻm raqamlari 7818748860 soʻm raqamlariga, “Aksiyalarning umumiy soni” ustunidagi 2003920 raqamlari 7818749 raqamlariga, “XIFlarga sotish uchun moʻljallangan aksiyalar paketi” ustunidagi 300588 raqamlari 1172812 raqamlariga almashtirilsin.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.