Oʻzbekiston Respublikasining “Davlat bojxona xizmati toʻgʻrisida”gi Qonunining 6-moddasi va Oʻzbekiston Respublikasi Vazirlar Mahkamasining 2004-yil 9-apreldagi 168-sonli “Oʻzbekiston Respublikasining Ustyurt mintaqasidagi Shaxpaxta konini qoʻshimcha ochish toʻgʻrisida”gi qaroriga muvofiq, Oʻzbekiston Respublikasi Davlat bojxona qoʻmitasi va Tashqi iqtisodiy aloqalar agentligi qaror qiladilar:

1. Shaxpaxta konini qoʻshimcha ochish boʻyicha 2004-yil 14-apreldagi mahsulot taqsimotiga oid bitim doirasida Oʻzbekiston Respublikasi bojxona chegarasi orqali olib oʻtiladigan tovarlarning bojxona rasmiylashtiruv Qoidalari ilovaga muvofiq tasdiqlansin.

2. Ushbu qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiritilsin.

Mazkur Qoidalar Oʻzbekiston Respublikasi Bojxona kodeksi (Oʻzbekiston Respublikasi Oliy Majlis axborotnomasi, 1998-y., 2-son, 36-b.), Oʻzbekiston Respublikasining 2001-yil 7-dekabrdagi “Mahsulot taqsimotiga oid bitim toʻgʻrisida”gi 312-II-son Qonuni, Oʻzbekiston Respublikasi Vazirlar Mahkamasining 2004-yil 9-apreldagi “Oʻzbekiston Respublikasining Ustyurt mintaqasidagi Shaxpaxta konini qoʻshimcha ochish toʻgʻrisida”gi 168-sonli qarori, Oʻzbekiston Respublikasi Vazirlar Mahkamasining 2004-yil 22-apreldagi 262-f-son farmoyishi, 2004-yil 14-aprelda “Oʻzbekneftgaz” Milliy xolding kompaniyasi hamda “Zarubejneftegaz” Yopiq aksiyadorlik jamiyati va “Gas Project Development Central Asia AG” Kompaniyasi tarkibidagi Konsorsium oʻrtasida tuzilgan “Shaxpaxta” konini qoʻshimcha ochish boʻyicha mahsulot taqsimotiga oid bitimga muvofiq ishlab chiqilgan va qayd etilgan Bitim doirasida Oʻzbekiston Respublikasi bojxona chegarasi orqali olib oʻtiladigan tovarlarning bojxona rasmiylashtiruvini amalga oshirish tartibini belgilaydi.

1. Mazkur Qoidalarda quyidagi asosiy atamalar va tushunchalardan foydalaniladi:

MTB — 2004-yil 14-aprelda “Oʻzbekneftgaz” Milliy xolding kompaniyasi hamda “Zarubejneftegaz” Yopiq aksiyadorlik jamiyati va “Gas Project Development Central Asia AG” Kompaniyasi tarkibidagi Konsorsium oʻrtasida tuzilgan “Shaxpaxta” konini qoʻshimcha ochish boʻyicha mahsulot taqsimotiga oid bitim, shu jumladan unga ilovalar, oʻzgartirishlar va qoʻshimchalar.

Investor — yuridik shaxslarning “Zarubejneftegaz” Yopiq aksiyadorlik jamiyati (Rossiya) va “Gas Project Development Central Asia AG” (Shveysariya) Kompaniyasi, shuningdek ularning huquqiy vorislari tarkibidagi Konsorsium koʻrinishida yuridik shaxs maqomiga ega boʻlmagan birlashmasi.

Operator — foyda keltirmaydigan yuridik shaxs — Investor tomonidan MTB boʻyicha ishlar bajarilishini tashkillashtirish uchun tashkil etilgan Oʻzbekiston Respublikasi rezidenti. Operator MTBga muvofiq Investorga belgilangan bojxona imtiyozlari va preferensiyalaridan foydalanadi.

Vakolatli kompaniya — “Oʻzbekneftgaz” Milliy xolding kompaniyasi.

Boshqaruvchi qoʻmita — Investor va Vakolatli kompaniya vakillari tarkibidagi doimiy faoliyat olib boradigan, MTB boʻyicha ishlar bajarilishiga tegishli faoliyatning oʻzaro muvofiqlashtirilishini amalga oshiradigan va MTBda qayd etilgan funksiyalarga muvofiq MTB bajarilishi bilan bogʻliq MTB tomonlari uchun majburiy qarorlar qabul qiladigan qoʻmita.

Pudratchi — Investor va/yoki Operator tomonidan MTB boʻyicha ishlar bilan bogʻliq materiallar yetkazib berilishi, ishlar bajarilishi yoki xizmatlar koʻrsatilishi uchun fuqarolik-huquqiy shartnoma tuzilgan har qanday jismoniy yoki yuridik shaxs. Ushbu atama Pudratchi yoki uning subpudratchilari tomonidan MTB boʻyicha ishlar bilan bogʻliq materiallar yetkazib berilishi, ishlar bajarilishi yoki xizmatlar koʻrsatilishi uchun shartnomalar tuzilgan subpudratchilarni oʻz ichiga oladi.

DBQB — Oʻzbekiston Respublikasi Davlat bojxona qoʻmitasining Investor (Operator), Pudratchi tomonidan olib kiriladigan (olib chiqiladigan) tovarlarning bojxona nazorati va/yoki bojxona rasmiylashtiruvini amalga oshiradigan taalluqli hududiy bojxona boshqarmasi.

MTB boʻyicha ishlar — Oʻzbekiston Respublikasi hududida amalga oshiriladigan tabiiy gaz konlarini oʻzlashtirish, qazib olish, transportirovka va realizatsiya qilishga, shu jumladan har qanday infratuzilma va transport obyektlarini qurishga, tabiiy gazni ishlash (tozalash), uni saqlashga yoʻnaltirilgan faoliyat turlari, tadqiqotlar va ishlar majmui, tabiatni muhofazalash chora-tadbirlari, shuningdek ushbu ishlar bilan bevosita bogʻliq va MTB doirasida amalga oshiriladigan har qanday boshqa faoliyat.

Tovarlar — Investorning MTB doirasida Oʻzbekiston Respublikasi bojxona chegarasi orqali olib oʻtiladigan har qanday koʻchar mulki, shu jumladan sarflash materiallari, qaytariladigan tovarlar va tabiiy gaz.

Sarflanadigan tovarlar — MTB boʻyicha ishlar amalga oshirilish jarayonida foydalaniladigan, Oʻzbekiston Respublikasi bojxona hududiga erkin muomalaga chiqarish bojxona rejimida olib kiriladigan materiallar, asbob-uskunalar, moslamalar va detallar, YoMM (yonilgʻi-moylash materiallari), transport vositalari va boshqa koʻchar mulklar, shuningdek moddiy-texnik resurslar, loyiha va texnik hujjatlar.

Qaytariladigan tovarlar — Oʻzbekiston Respublikasi bojxona hududiga vaqtincha olib kirish bojxona rejimida olib kiriladigan, keyinchalik Oʻzbekiston Respublikasi bojxona hududidan tashqariga olib chiqiladigan materiallar, asbob-uskunalar, moslamalar va detallar, transport vositalari va boshqa koʻchar mulklar hamda loyiha va texnik hujjatlar.

Investor tabiiy gazi — MTB 15.1-bandiga muvofiq oʻtkaziladigan oʻlchovlar bilan aniqlanadigan shartnoma hududida qazib olingan umumiy tabiiy gaz (uglevodorod gazi, shuningdek boshqa barcha gazsimon uglevodorodlar va ularning tarkibidagi komponentlar, shu jumladan serovodorodlar, uglerod dvuokisi va geliy) hajmining MTBga muvofiq Investorga tegishli ulushi.

2. Operator va Pudratchi tomonidan olib kiriladigan tovarlar, shuningdek olib chiqiladigan qaytariladigan tovarlar va Investorning tabiiy gazi bojxona rasmiylashtiruvi MTB 20-moddasiga muvofiq soliqlar, bojxona bojlari, aksizlar va boshqa yigʻimlar toʻlanmagan holda amalga oshiriladi (bojxona rasmiylashtiruvi uchun yigʻimlar bundan mustasno). Bunda berilgan imtiyozlar hisobi yuritilishi uchun bojxona yuk deklaratsiyasi bojxona toʻlovlari hisoblab chiqarilgan holda toʻldiriladi.

Oʻzbekiston Respublikasi bojxona chegarasi orqali olib oʻtiladigan tovarlar hisobi amaldagi qonun hujjatlariga muvofiq Operatorga berilgan OKPO kodi asosida yuritiladi.

3. Operator va Pudratchilar tomonidan Oʻzbekiston Respublikasi bojxona hududiga olib kiriladigan, shuningdek olib chiqiladigan qaytariladigan tovarlar va Investorning tabiiy gazi bojxona rasmiylashtiruvi uchun bojxona yigʻimlari oʻz vaqtida va toʻliq toʻlanishi uchun Investor va/yoki Operator javobgar boʻladi.

4. Olib kirilishi vakolatli organlar ruxsatini olish zarurati bilan bogʻliq tovarlar Oʻzbekiston Respublikasining amaldagi qonun hujjatlari va MTB bilan belgilangan tartibda va shartlarda olib kiriladi.

5. Operator MTB boʻyicha ishlar amalga oshirilishi uchun Oʻzbekiston Respublikasi Vazirlar Mahkamasining 2003-yil 20-noyabrdagi 523-son Qarori va 2004-yil 27-fevraldagi ““Bojxona ombori” bojxona rejimi toʻgʻrisida”gi 1318-son Nizomga muvofiq bojxona omborini taʼsis etish huquqiga ega (2004-yil 27-fevralda 1318-son bilan roʻyxatdan oʻtkazilgan — Oʻzbekiston Respublikasi qonun hujjatlari toʻplami, 2004-y., 8-son, 103-modda).

6. Operator tomonidan Oʻzbekiston Respublikasi bojxona hududida xarid qilinadigan va ushbu hududdan tashqariga olib chiqishsiz foydalanish uchun moʻljallangan tovarlarga bojxona rasmiylashtiruvi amalga oshirilmaydi.

7. Qaytariladigan tovarlar vaqtincha olib kirish bojxona rejimiga bojxona yuk deklaratsiyasi toʻldirilib, ikki yilgacha muddatda quyidagi oʻziga xos xususiyatlar hisobga olingan holda joylashtiriladi:

a) 24-grafaning chap kichik boʻlimida bitim kodi koʻrsatiladi: “79”;

b) 44-grafaning 3-bandida MTB, shuningdek Investor va/yoki Operatorning olib oʻtiladigan tovarlar yuzasidan xatining raqami va sanasi koʻrsatiladi.

8. Qaytariladigan tovarlarning vaqtincha olib kirish rejimida bojxona rasmiylashtiruvi va bojxona nazorati taalluqli DBQB tomonidan amalga oshiriladi.

9. Operator vaqtincha olib kirishning eng oxirgi muddati tugagungacha qaytariladigan tovarlarni quyidagi usullardan biri yordamida tasarruf qilishi kerak:

Oʻzbekiston Respublikasi bojxona hududidan tashqariga reeksport rejimida olib chiqish;

vaqtincha olib kirishning belgilangan muddati tugagungacha 30 kundan kechiktirmay taalluqli DBQBga yozma murojaat asosida tovarlarni vaqtincha olib kirish muddatini uzaytirish;

ularni erkin muomalaga chiqarish bojxona rejimiga yoki qonun hujjatlari va MTB bilan belgilangan tartibda boshqa rejimga joylashtirish toʻgʻrisida maʼlum qilish.

10. Qaytariladigan tovarlar vaqtincha olib kirilishini MTB amal qiladigan butun vaqt mobaynida ikki yildan yuqori muddatga uzaytirish Oʻzbekiston Respublikasi Vazirlar Mahkamasining 2013-yil 13-apreldagi “Oʻzbekiston Respublikasida tovarlar va transport vositalarining vaqtincha olib kirilishi (olib chiqilishi) shartlari toʻgʻrisida”gi 106-son Qaroriga muvofiq Oʻzbekiston Respublikasi Davlat bojxona qoʻmitasi tomonidan amalga oshiriladi (Oʻzbekiston Respublikasi qonun hujjatlari toʻplami, 2013-y., 16-son, 217-modda).

11. Qayta olib chiqilayotgan qaytariladigan tovarlar bojxona rasmiylashtiruvi ushbu tovarlarni maʼlum qilingan vaqtincha olib kirish bojxona rejimiga muvofiq nazoratga qoʻygan taalluqli DBQB tomonidan amalga oshiriladi.

12. Sarflanadigan tovarlar erkin muomalaga chiqarish bojxona rejimiga joylashtiriladi. Bunda bojxona yuk deklaratsiyasi mazkur Qoidalarning 7-bandida qayd etilgan oʻziga xos xususiyatlar hisobga olingan holda toʻldiriladi.

13. Operator yoki Pudratchining sarflanadigan tovarlar bojxona ombori rejimiga joylashtirilishi mumkin.

14. Bojxona rasmiylashtiruvi maqsadlarida majburiy sertifikatlanadigan sarflanadigan tovarlarning sertifikatlanishi Oʻzbekiston Respublikasi Vazirlar Mahkamasining 2004-yil 6-iyuldagi 318-son Qarori (Oʻzbekiston Respublikasi qonun hujjatlari toʻplami, 2004-y., 27-son, 315-modda) va “Majburiy sertifikatlanadigan tovarlar (mahsulotlar)ni Oʻzbekiston Respublikasi hududiga olib kirish tartibi toʻgʻrisida”gi Yoʻriqnoma (2000-yil 26-fevralda 901-son bilan roʻyxatdan oʻtkazilgan) bilan belgilangan tartibda va muddatlarda amalga oshiriladi (Oʻzbekiston Respublikasi vazirliklar, davlat qoʻmitalari va muassasalari meʼyoriy hujjatlar byulleteni, 2000-y., 4-son).

15. Erkin muomalaga chiqarish bojxona rejimiga joylashtirilgan sarflanadigan tovarlar, “Bojxona reeksport rejimi toʻgʻrisida”gi Nizom bilan belgilangan shartlar va talablarga rioya qilingan taqdirda, Investor va/yoki Operator yoki Pudratchi arizasiga muvofiq Oʻzbekiston Respublikasi bojxona hududidan tashqariga reeksport rejimida olib chiqilishi mumkin (2002-yil 2-mayda 1134-son bilan roʻyxatdan oʻtkazilgan — Meʼyoriy hujjatlar byulleteni, 2002-y., 9-son).

16. Investorning tabiiy gazini Oʻzbekiston Respublikasidan tashqariga olib chiqish eksport rejimida amalga oshiriladi.

17. Investorning eksport qilinadigan tabiiy gazi bojxona rasmiylashtiruvi Operator tomonidan Investor tomonidan belgilanadigan hajmlarda va narxlarda — Oʻzbekiston Respublikasi DAF-chegarasi shartlarida (Inkoterms-2000) Markaziy Osiyo — Markaz gaz quvurining Beynov kompressor stansiyasida vakolatli bank tomonidan beriladigan hisob-kitoblar toʻgʻrisidagi maʼlumotlar taqdim qilinmagan holda amalga oshiriladi.

18. Investorning tabiiy gaziga Operatorning arizasiga muvofiq vakolatli organ tomonidan belgilangan tartibda “Tovarlarni olib oʻtish sertifikatlarini berish tartibi toʻgʻrisida”gi Nizomga muvofiq tovarlarni olib oʻtish sertifikatlari beriladi (2010-yil 13-avgustda 2131-son bilan roʻyxatdan oʻtkazilgan — Oʻzbekiston Respublikasi qonun hujjatlari toʻplami, 2010-y., 33-son, 279-modda).

19. Investorning quvuryoʻl transporti orqali olib oʻtiladigan tabiiy gazi deklaratsiya qilinishi va bojxona rasmiylashtiruvi ikki bosqichli asosda amalga oshiriladi.

20. Birinchi bosqichda: har oy Investorning tabiiy gazi Oʻzbekiston Respublikasi bojxona chegarasi orqali olib oʻtiladigan oydan keyingi oyning oʻninchi sanasidan kechiktirmay Operator yoki uning vakolatli shaxsi bojxona organiga hisobot oyida Oʻzbekiston Respublikasi bojxona chegarasi orqali olib oʻtilgan Investorning tabiiy gazi hajmlariga vaqtincha (toʻliqsiz) bojxona yuk deklaratsiyasi (quyida matn boʻyicha — “VBYuD”)ni va quyidagi hujjatlarni taqdim qiladi:

MTB nusxasi (faqat dastlabki rasmiylashtiruvda taqdim etiladi);

Investor (Operator) va Vakolatli kompaniya tomonidan imzolangan MTB boʻyicha tabiiy gaz qazib olish dalolatnomasi;

Investor va Oʻzbekiston Respublikasi gaz-transport kompaniyasi tomonidan imzolangan Oʻzbekiston Respublikasi bojxona chegarasigacha transportirovka qilingan Investorning tabiiy gazini qabul qilish-topshirish tijorat dalolatnomasi;

Oʻzbekiston Respublikasi gaz-transport kompaniyasi va Qozogʻiston Respublikasi gaz-transport kompaniyasi tomonidan imzolangan Oʻzbekiston Respublikasi bojxona chegarasida Investorning tabiiy gazini qabul qilish-topshirish texnik dalolatnomasi yoxud Investor va xaridor tomonidan imzolangan Oʻzbekiston Respublikasi bojxona chegarasida Investorning tabiiy gazini qabul qilish-topshirish tijorat dalolatnomasi;

hisobot oyida Oʻzbekiston Respublikasi bojxona chegarasi orqali olib oʻtilgan Investorning tabiiy gazi hajmlariga invoys (hisobvaraq-faktura);

Oʻzbekiston Respublikasi bojxona chegarasi orqali olib oʻtilgan Investorning tabiiy gazi yuboriladigan mamlakat, ogʻirligi, miqdori va qiymati toʻgʻrisidagi maʼlumotlarni oʻz ichiga olgan hujjat.

21. Investorning tabiiy gazi eksporti uchun vaqtincha bojxona yuk deklaratsiyasi (vaqtincha BYuD) “Bojxona yuk deklaratsiyasini toʻldirish tartibi toʻgʻrisida”gi Yoʻriqnomaga muvofiq (1999-yil 3-noyabrda 834-son bilan roʻyxatdan oʻtkazilgan — Meʼyoriy hujjatlar byulleteni, 1999-y., 12-son), quyidagi oʻziga xos xususiyatlar hisobga olingan holda toʻldiriladi:

a) “Deklaratsiya turi” 1-grafasi uchinchi kichik boʻlimida “VD” harfli indeksi — vaqtincha (toʻliqsiz) bojxona yuk deklaratsiyasi koʻrsatiladi;

b) 2, 9 va 28-grafalarda Operatorning “Investor topshirigʻi boʻyicha” belgili taalluqli rekvizitlari koʻrsatiladi;

v) 8-grafada Investor tomonidan maʼlum qilinadigan oluvchi rekvizitlari koʻrsatiladi;

g) 24-grafaning chap kichik boʻlimida bitim kodi koʻrsatiladi: “79”;

d) 37-grafaning soʻnggi ikkita raqamida kod koʻrsatiladi: “33”;

e) 44-grafada “Qoʻshimcha axborot/taqdim qilinadigan hujjatlar” 3 raqami ostida olib chiqish uchun asos sifatida MTB koʻrsatiladi;

j) 50-grafada “Taqdim etilgan maʼlumotlar uchun javobgar boʻladi” soʻzlari “Bojxona yuk deklaratsiyasi (BYuD)ni 200_ yil “__” _______ gacha taqdim qilish majburiyatini olaman” soʻzlari bilan toʻldiriladi.

22. Ikkinchi bosqichda: VBYuD bojxona rasmiylashtiruvi sanasidan boshlab 90 (toʻqson) kundan kechiktirmay DBQBga BYuD, dastlabki VBYuD hamda MTBga muvofiq mahsulot taqsimotini tasdiqlaydigan Investor va Vakolatli kompaniya oʻrtasida mahsulot (tabiiy gaz) taqsimoti boʻyicha Dalolatnoma nusxasi, shuningdek muvofiqlik sertifikati taqdim etiladi.

23. VBYuD boʻyicha deklaratsiya qilingan Investor tabiiy gazining hajmi MTBga muvofiq mahsulot taqsimotini tasdiqlaydigan Investor va Vakolatli kompaniya oʻrtasida mahsulot (tabiiy gaz) taqsimoti boʻyicha Dalolatnoma nusxasida qayd etilgan hajm bilan farq qilgan holatlarda, taalluqli VBYuDga Oʻzbekiston Respublikasi qonun hujjatlari bilan belgilangan tartibda oʻzgartirishlar kiritiladi.

24. BYuD “Bojxona yuk deklaratsiyasini toʻldirish tartibi toʻgʻrisida”gi Yoʻriqnomaga muvofiq (1999-yil 3-noyabrda 834-son bilan roʻyxatdan oʻtkazilgan — Meʼyoriy hujjatlar byulleteni, 1999-y., 12-son), quyidagi oʻziga xos xususiyatlar hisobga olingan holda toʻldiriladi:

a) 2, 9 va 28-grafalarda Operatorning “Investor topshirigʻi boʻyicha” belgili taalluqli rekvizitlari koʻrsatiladi;

b) 8-grafada Investor tomonidan maʼlum qilinadigan oluvchi rekvizitlari koʻrsatiladi;

v) 24-grafaning chap kichik boʻlimida bitim kodi koʻrsatiladi: “79”;

g) 37-grafaning soʻnggi ikkita raqamida kod koʻrsatiladi: “33”;

d) 44-grafada “Qoʻshimcha axborot/taqdim qilinadigan hujjatlar” 3 raqami ostida olib chiqish uchun asos sifatida MTB koʻrsatiladi;

e) 44-grafada “Qoʻshimcha axborot/taqdim qilinadigan hujjatlar” 8 raqami ostida Boshqaruvchi qoʻmita hujjatlari koʻrsatiladi.

Bunda BYuDga VBYuD maʼlumotnoma raqami beriladi.

25. MTBda belgilangan shartlarda Vakolatli kompaniya Investorning tabiiy gazini kerakli hajmda AQSh dollarida toʻlov orqali va MTBga muvofiq narxlar boʻyicha xarid qilish huquqiga ega.

26. Vakolatli kompaniya tomonidan xarid qilinadigan Investorning tabiiy gazi hajmlari Vakolatli kompaniya va Investor oʻrtasidagi tashqi savdo kontraktlari (shartnomalari) bilan belgilanadi. Kontraktlar (shartnomalar) qonun hujjatlari bilan belgilangan tartibda vakolatli organlarda roʻyxatdan oʻtkaziladi.

27. MTB 18.3.5-bandiga muvofiq Vakolatli kompaniya tomonidan Investordan xarid qilinadigan Investorning tabiiy gazi bojxona rasmiylashtiruvi dastlab mazkur Qoidalar IV boʻlimiga muvofiq bojxona eksport rejimida, soʻngra esa Vakolatli kompaniya nomiga bojxona reimport rejimida amalga oshiriladi. Bunda transport xarajatlari mavjud emasligi tufayli BYuD 20-grafasida EXW (Inkoterms-2000) yetkazib berish shartlari qayd etiladi.

Boshqa holatlarda Investorning tabiiy gazi bojxona rasmiylashtiruvi Oʻzbekiston Respublikasining amaldagi qonun hujjatlariga muvofiq amalga oshiriladi.

28. Investorning tabiiy gazi reimport qilinganda, Oʻzbekiston Respublikasining qonun hujjatlariga muvofiq, Vakolatli kompaniya tegishli soliqlarni toʻlaydi.

29. Investor va/yoki Operator quyidagi majburiyatlarga ega:

a) maʼlum qilingan bojxona rejimi shartlariga muvofiq DBQBga olib kiriladigan/olib chiqiladigan tovarlarni koʻrsatish va ularning bojxona rasmiylashtiruvi uchun kerakli hujjatlarni taqdim etish;

b) qonun hujjatlari bilan belgilangan bojxona rasmiylashtiruvi uchun yigʻimlarni toʻlash;

v) har yili DBQBga qaytariladigan tovarlardan foydalanish va ular joylashtirilgan manzil toʻgʻrisida maʼlumotlar berish;

g) qaytariladigan tovarlarni erkin muomalaga chiqarish bojxona rejimida rasmiylashtirishda, ushbu qaytariladigan tovarlardan kelgusida voz kechilgan taqdirda, qonun hujjatlari bilan belgilangan tartibda bojxona toʻlovlarini toʻlash;

d) qaytariladigan tovarlarni vaqtincha olib kirishni uzaytirish zarurati mavjud boʻlmagan taqdirda, vaqtincha olib kirish belgilangan muddati tugagungacha ularni Oʻzbekiston Respublikasi bojxona hududidan tashqariga olib chiqish yoki boshqa bojxona rejimiga joylashtirish;

e) har yili DBQBga sarflash tovarlaridan foydalanish toʻgʻrisidagi yakuniy hisobotni taqdim etish.

30. Pudratchi mazkur Qoidalarning 29-bandi “a” — “e” kichik bandlari bilan nazarda tutilgan vazifalarni bajaradi.

31. Mazkur Qoidalarning 29-bandi bilan nazarda tutilgan vazifalar tuzilgan shartnomalarga muvofiq Investor, Operator va Pudratchilar tomonidan vakolat berilgan shaxslar tomonidan bajarilishi mumkin.

32. Operator, zarur hollarda, Investorning topshirigʻi boʻyicha MTB talablariga muvofiq, taalluqli DBQBga yozma murojaat boʻyicha ishlash, tahlil qilish va oʻrganish maqsadlarida Oʻzbekiston Respublikasidan tashqariga texnik, hisobot hujjatlarini, geologik-geofizik materiallarni, geologik jinslar va qatlamli flyuidlar namunalari va sinovlarini olib chiqadi.

33. Operator Investorning topshirigʻi boʻyicha va Vakolatli kompaniyaning roziligi bilan Oʻzbekiston Respublikasidan tashqariga ishlash, tahlil qilish va oʻrganish uchun asl yozuvlar va boshqa maʼlumotlarni olib chiqishi mumkin. Investor (Operator) qayd etilgan olib chiqilgan yozuvlar va maʼlumotlarni Oʻzbekiston Respublikasiga qayta olib kirishi shart.

34. Investor (Operator) va Pudratchilarning chet ellik xodimlariga MTB bilan nazarda tutilgan barcha imtiyozlar va preferensiyalar tatbiq etiladi.

35. Olib chiqilgan tovarlardan belgilangan maqsad boʻyicha foydalanilmagan, shu jumladan boshqa shaxsga oʻtkazilgan taqdirda, Oʻzbekiston Respublikasining amaldagi qonun hujjatlari muvofiq tegishli DBQB belgilangan tartibda davlat budjetiga toʻlanadigan barcha bojxona toʻlovlarini undirib oladi.

36. Mazkur Qoidalar Vakolatli kompaniya va Investor bilan kelishilgan.