Tabiiy gaz qazib chiqarishni koʻpaytirish hamda Ustyurt mintaqasidagi Shaxpaxta konini qoʻshimcha ochishga toʻgʻridan-toʻgʻri xorijiy investitsiyalarni jalb etish maqsadida Vazirlar Mahkamasi qaror qiladi:

1. Quyidagilar:

“Oʻzbekneftgaz” milliy xolding kompaniyasi va “Gazprom” ochiq aksiyadorlik jamiyati (Rossiya) oʻrtasida 2004—2012-yillar davrida Oʻzbekiston tabiiy gazini sotish, Shaxpaxta konini qoʻshimcha ochishda ishtirok etish yuzasidan uzoq muddatli hamkorlik toʻgʻrisidagi bitim imzolaganligi;

“Gazprom” ochiq aksiyadorlik jamiyati tomonidan Rossiyaning “Zarubejneftegaz” yopiq aksiyadorlik jamiyati va Shveysariyaning “Gas Projekt Development Central Asia AG” kompaniyasidan iborat tarkibdagi yuridik shaxs boʻlmagan Konsorsium investor sifatida belgilanganligi;

texnik-iqtisodiy asoslar ishlab chiqilganligi hamda Shaxpaxta konini qoʻshimcha ochish yuzasidan Mahsulot taqsimoti toʻgʻrisidagi bitim loyihasi (Mahsulot taqsimoti toʻgʻrisida bitim) tayyorlanganligi;

investor 2004—2007-yillarda Shaxpaxta konini qoʻshimcha ochish uchun 15 mln AQSH dollari miqdoridagi toʻgʻridan-toʻgʻri investitsiya ajratishi va ilgʻor texnologiyalarni jalb qilishi, 2004-yilda konni qoʻshimcha jihozlashni tugatish hamda 2004-yilning II yarim yilligida tabiiy gaz qazib chiqarishni qaytadan boshlash majburiyatini olganligi;

investor “Mahsulot taqsimotiga oid bitimlar toʻgʻrisida”gi Oʻzbekiston Respublikasi Qonuni hamda Mahsulot taqsimoti toʻgʻrisidagi bitimda nazarda tutilgan barcha soliqlar, toʻlovlar va yigʻimlarni toʻlashi;

Mahsulot taqsimoti toʻgʻrisidagi bitim boʻyicha ishlarning bajarilishini tashkil etish uchun investor tomonidan Oʻzbekiston Respublikasi rezidenti — yuridik shaxs (keyingi oʻrinlarda matnda “Operator” deb ataladi) tashkil etilayotganligi;

investor Oʻzbekiston Respublikasi va vakolatli kompaniya oldida operator xatti-harakatlari yuzasidan oʻz xatti-harakatlari sifatida mulkiy javob berishi maʼlumot uchun qabul qilinsin.

2. Mahsulot taqsimoti toʻgʻrisidagi bitim maʼqullansin va “Oʻzbekneftgaz” milliy xolding kompaniyasiga uni Oʻzbekiston Respublikasi nomidan imzolash vakolati berilsin.

3. Belgilab qoʻyilsinki, “Oʻzbekneftgaz” milliy xolding kompaniyasi Mahsulot taqsimoti toʻgʻrisidagi bitimni amalga oshirishda Oʻzbekiston Respublikasi nomidan ish koʻruvchi Vakolatli kompaniya hisoblanadi.

4. Mahsulot taqsimoti toʻgʻrisidagi bitimni amalga oshirish munosabati bilan investorga berilgan imtiyozlar va preferensiyalar Operatorga tatbiq etilsin.

5. “Oʻzbekneftgaz” milliy xolding kompaniyasi Mahsulot taqsimoti toʻgʻrisidagi bitim imzolangandan keyin besh ish kuni mobaynida “Mahsulot taqsimotiga oid bitimlar toʻgʻrisida”gi Oʻzbekiston Respublikasi Qonuniga muvofiq “Zarubejneftegaz” yopiq aksiyadorlik jamiyatiga Mahsulot taqsimoti toʻgʻrisidagi bitim amal qilish muddatiga Oʻzbekiston Respublikasi Ustyurt mintaqasida joylashgan Shaxpaxta koni yer osti uchastkasidan foydalanish huquqiga litsenziya bersin.

6. Oʻzbekiston Respublikasi Vazirlar Mahkamasining Neft, gaz hamda gaz kondensatini qazib chiqarish, qayta ishlash va sotish, magistral gaz quvurlari, neft quvurlari va neft mahsulotlari quvurlarini loyihalashtirish, qurish, ulardan foydalanish va ularni taʼmirlash komissiyasi (Oʻ.T. Sultonov) zarur hujjatlar taqdim etilgan kundan boshlab besh ish kuni mobaynida “Zarubejneftegaz” yopiq aksiyadorlik jamiyatiga Mahsulot taqsimoti toʻgʻrisidagi bitim amal qilish muddatiga Neft, gaz hamda gaz kondensatini qazib chiqarish, qayta ishlash va sotish faoliyatini amalga oshirishga litsenziya bersin.

11. Oʻzbekiston Respublikasi Markaziy bankiga Operatorga xorijiy davlatlar hududidagi banklarda faqat Mahsulot taqsimoti toʻgʻrisidagi bitimni amalga oshirish uchun foydalanadigan xorijiy valyutadagi bank hisob raqamlari ochishga ruxsat berish tavsiya etilsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Oʻ.T.Sultonov zimmasiga yuklansin.