Oʻzbekiston Respublikasi Prezidentining “Turizm, sport va madaniy meros sohalarida davlat boshqaruvi tizimini yanada takomillashtirish chora-tadbirlari toʻgʻrisida” 2021-yil 6-apreldagi PF-6199-son Farmoni hamda “Turizm va sport vazirligi faoliyatini tashkil etish toʻgʻrisida” 2021-yil 6-apreldagi PQ-5054-son qarori ijrosi yuzasidan Vazirlar Mahkamasi qaror qiladi:

1. Quyidagilarni nazarda tutuvchi Oʻzbekiston Respublikasi Turizm va sport vazirligi faoliyatini tartibga solishga qaratilgan:

Turizm va sport vazirligining maqomi, asosiy vazifalari va funksiyalari, huquqlari hamda javobgarligi, uning faoliyatini tashkil etish tartibi, shuningdek, rahbariyatining asosiy funksional vazifalari va javobgarligini nazarda tutuvchi Oʻzbekiston Respublikasi Turizm va sport vazirligi toʻgʻrisidagi nizom 1-ilovaga muvofiq;

budjetdan tashqari Turizm va sportni qoʻllab-quvvatlash jamgʻarmasi mablagʻlarini shakllantirish manbalari, uning mablagʻlaridan foydalanish yoʻnalishlari, ushbu jamgʻarma mablagʻlaridan foydalanish yuzasidan hisobot va nazorat qilish tartibini nazarda tutuvchi Oʻzbekiston Respublikasi Turizm va sport vazirligi huzuridagi budjetdan tashqari Turizm va sportni qoʻllab-quvvatlash jamgʻarmasi toʻgʻrisidagi nizom 2-ilovaga muvofiq;

turistik (mehmonxona) yigʻimni mahalliy va xorijiy fuqarolardan undirish tartibi va turistik (mehmonxona) yigʻimning tabaqalashtirilgan miqdorlarini nazarda tutuvchi Oʻzbekiston Respublikasi hududida turistik (mehmonxona) yigʻimni undirish tartibi toʻgʻrisidagi nizom 3-ilovaga muvofiq tasdiqlansin:

2. Belgilansinki:

Vazirlikning Komplayens nazorati va ichki audit xizmati boshligʻi mehnatga haq toʻlash shart-sharoitlariga koʻra Vazirlikning boshqarma boshligʻiga tenglashtiriladi;

Respublika oliy sport mahorat maktablari direktorlari belgilangan tartibda Vazirlik tomonidan, Qoraqalpogʻiston Respublikasi, viloyatlar va Toshkent shahridagi ixtisoslashtirilgan bolalar va oʻsmirlar sport maktablari hamda bolalar va oʻsmirlar sport maktablari direktorlari Vazirlikning Qoraqalpogʻiston Respublikasi, viloyatlar va Toshkent shahar bosh boshqarmalar boshliqlari tomonidan lavozimga tayinlanadi va lavozimidan ozod etiladi.

3. Vazirlik bir oy muddatda mazkur qaror bilan tuziladigan Oʻzbekiston Respublikasi Turizm va sport vazirligi toʻgʻrisidagi nizomdan kelib chiqib, Vazirlikning hududiy bosh boshqarmalari, tuman (shahar) va boshqa tarkibiy boʻlinmalarining nizomlarini ishlab chiqsin va tasdiqlasin.

4. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirish va qoʻshimchalar kiritilsin.

5. Oʻzbekiston Respublikasi Turizm va sport vazirligi manfaatdor vazirliklar va idoralar bilan birgalikda ular tomonidan qabul qilingan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi turizm va sport vaziri A.A. Abduxakimov zimmasiga yuklansin.

1. Ushbu Nizom Oʻzbekiston Respublikasi Turizm va sport vazirligining (keyingi oʻrinlarda — Vazirlik) maqomi, asosiy vazifalari va funksiyalari, huquqlari, javobgarligi, faoliyatini tashkil etish va hisobot berishi tartibini, shuningdek, uning rahbarlarining funksional vazifalarini belgilaydi.

2. Vazirlik turizm, jismoniy tarbiya, sport va moddiy madaniy meros sohalarida yagona davlat siyosatini ishlab chiqish va amalga oshirish uchun masʼul boʻlgan vakolatli davlat boshqaruvi organi hisoblanadi.

3. Vazirlik Oʻzbekiston Respublikasi Vazirlar Mahkamasiga boʻysunadi.

4. Vazirlik oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonunchilik hujjatlariga amal qiladi.

5. Vazirlik oʻz vakolatlari doirasida umummajburiy boʻlgan normativ-huquqiy hujjatlarni qabul qilish huquqiga ega.

6. Vazirlik, uning hududiy boʻlinmalari va tuzilmasiga kiruvchi tashkilotlar yuridik shaxslar hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Oʻzbekiston Respublikasi Moliya vazirligi Gʻaznachiligida shaxsiy gʻazna hisobvaraqlariga, bank hisobvaraqlariga, shu jumladan, xorijiy valyutadagi shaxsiy gʻazna hisobvaraqlariga ega boʻladi.

7. Vazirlikning rasmiy nomi:

a) davlat tilida:

toʻliq nomi — Oʻzbekiston Respublikasi Turizm va sport vazirligi, qisqartirilgan nomi — Turizm va sport vazirligi;

b) rus tilida:

toʻliq nomi — Ministerstvo turizma i sporta Respubliki Uzbekistan, qisqartirilgan nomi — Ministerstvo turizma i sporta;

v) ingliz tilida:

toʻliq nomi — Ministry of tourism and sports of the Republic of Uzbekistan, qisqartirilgan nomi — Ministry of tourism and sports.

8. Vazirlikning joylashgan eri (pochta manzili): Oʻzbekiston Respublikasi, Toshkent shahri, Amir Temur shoh koʻchasi, 107 b-uy.

9. Vazirlik tizimiga quyidagilar kiradi:

Vazirlikning markaziy apparati;

Qoraqalpogʻiston Respublikasi, viloyatlar va Toshkent shahar turizm va sport bosh boshqarmalari;

tumanlar (shaharlar) turizm va sport boʻlimlari;

Madaniy meros agentligi;

“Milliy PR markazi” DUK;

“Sport va turizm xizmatlarini sertifikatlash markazi” DUK;

“Turistlarga xizmat koʻrsatish markazi” DUK;

“Binolardan foydalanish direksiyasi” DUK;

“Sport obyektlari infratuzilmasini rivojlantirish boʻyicha injiniring kompaniyasi” DUK;

“Ommaviy tadbirlarni tashkil etish va oʻtkazish direksiyasi” DUK;

“Beldersoy-Chimyon-Nanay” xalqaro umummavsumiy kurortni qurish va ekspluatatsiya qilish boʻyicha loyiha ofisi” DUK;

“Ipak yoʻli ofisi” UK;

“Ipak yoʻli” turizm xalqaro universiteti, Oʻzbekiston davlat jismoniy tarbiya va sport universiteti hamda uning Nukus va Fargʻona filiallari, “Rossiya davlat jismoniy tarbiya, sport, yoshlar va turizm universiteti” federal davlat budjeti oliy taʼlim muassasasining Samarqand filiali;

Turizmni rivojlantirish instituti, Jismoniy tarbiya va sport boʻyicha mutaxassislarni ilmiy-metodik taʼminlash, qayta tayyorlash va malakasini oshirish instituti hamda uning Nukus, Samarqand va Fargʻona filiallari, Moddiy madaniy meros ilmiy-tadqiqot instituti;

turizm, sport va moddiy madaniy meros sohalaridagi texnikum va kollejlar, Olimpiya zaxiralari kollejlari;

sport turlari boʻyicha ixtisoslashtirilgan davlat maktab-internatlari, Sport maktablari;

Olimpiya shon-shuhrati muzeyi;

turizm, sport va moddiy madaniy meros sohalaridagi nodavlat notijorat tashkilotlar.

Shuningdek, Vazirlik oʻz faoliyati doirasida akkreditatsiya qilingan tashkilotlarni tashkil etishga haqli.

10. Quyidagilar Vazirlikning asosiy vazifalari hisoblanadi:

turizm, sport va moddiy madaniy meros obyektlarini davlat-xususiy sheriklik tamoyili asosida samarali boshqarish hamda mazkur sohalarga zamonaviy axborot texnologiyalarini joriy etish;

turizm sohasini davlat tomonidan va bozor orqali tartibga solishni maqbullashtirish, turizm xizmatlari bozorida raqobatni rivojlantirish boʻyicha takliflarni ishlab chiqish, tadbirkorlar faolligini oshirishga har tomonlama koʻmaklashish;

turizm, sport va moddiy madaniy meros sohalari uchun kadrlar tayyorlash boʻyicha takliflar kiritish, turizm faoliyati, sport va moddiy madaniy meros subyektlari xodimlarini muntazam qayta tayyorlash va ularning malakasini oshirishni yuqori sifatli darajada tashkil etish, turizm, sport va moddiy madaniy meros sohalarida tarmoq ilm-fanini rivojlantirishga koʻmaklashish;

mamlakatning turizm salohiyatini tubdan oshirish, turizmga iqtisodiyotning strategik sektori maqomini berish, turizm sohasida yagona davlat siyosatini olib borish maqsadida turizmni rivojlantirishning yaxlit konsepsiyasini shakllantirish va amalga oshirishni taʼminlash;

turizm xizmatlarining tashqi va ichki bozorlarida marketing tadqiqotlarini amalga oshirish, turizm sohasida tarixiy-madaniy merosni keng targʻib qilishga qaratilgan faol reklama-axborot siyosatini amalga oshirish, mamlakatning turizm imijini saqlash va rivojlantirish, xalqaro turizm bozorlarida milliy mahsulotlar va brendlarni ilgari surish;

ichki, kirish va chiqish turizmini kompleks rivojlantirishning milliy va hududiy dasturlarini ishlab chiqishni muvofiqlashtirish va amalga oshirish monitoringini olib borish, keng qamrovli turizm turlarini jadal rivojlantirish, turizm infratuzilmasini xalqaro standartlarga mos ravishda rivojlantirish;

turizm faoliyatini rivojlantirishni muvofiqlashtirish, hududlarda yangi turizm yoʻnalishlari ochilishini taʼminlash, ularni pasportlashtirish, turizm sohasidagi yagona reyestrlarni shakllantirish;

turizm turlarini diversifikatsiyalash, eng avvalo ziyorat turizmi, ekologik turizm, etnoturizm, ishbilarmonlik turizmi, sport, gastronomik, tibbiy, taʼlim va ilmiy turizmni hamda ularning infratuzilmasini rivojlantirish boʻyicha kompleks chora-tadbirlarni amalga oshirish;

turizm xizmatlarini tashkil qilishda, turizm obyektlarida, ovqatlanish joylarida, respublika hududi boʻylab harakatlanish vaqtida, tashriflarni tashkil etishda turistlar xavfsizligi va sogʻligʻini taʼminlashga yoʻnaltirilgan turizm xizmatlarini koʻrsatish sifati va xavfsizligining standartlarini ishlab chiqishni muvofiqlashtirish;

turizm faoliyati sohasida, birinchi navbatda, BMTning Jahon turizm tashkiloti, turizm sohasidagi nufuzli xalqaro va milliy tashkilotlar, shuningdek, xorijiy kompaniyalar bilan xalqaro hamkorlikni kengaytirish, turistik faoliyat amaliyotiga xalqaro va davlatlararo standartlar va normalarni joriy etish;

turizm obyektlarini joylashtirish uchun salohiyatli hududlarda rejalashtirish va loyihalashtirish ishlarini tashkil etish, ularga investorlarni jalb qilish uchun qulay shart-sharoitlarni yaratish.

aholining keng qatlamlarini sport bilan shugʻullanishga va sogʻlom turmush tarzini yuritishga jalb etish, jismonan sogʻlom oʻsib kelayotgan avlodni tarbiyalash, sport industriyasi va infratuzilmasini rivojlantirish, oliy sport mahorati sohasida mamlakatimizning xalqaro sport maydonida munosib ishtirokini taʼminlashga qaratilgan yagona siyosatni amalga oshirish;

vazirliklar va idoralarning jismoniy tarbiya va sport jamiyatlari hamda klublarining, sport sohasidagi nodavlat notijorat tashkilotlarning faoliyatini muvofiqlashtirish, shuningdek, respublika maktabgacha taʼlim va tarbiya tashkilotlari, umumiy oʻrta va oʻrta maxsus taʼlim, professional taʼlim hamda oliy taʼlim muassasalari jismoniy tarbiya oʻqituvchilari, trener va instruktorlari faoliyatiga tashkiliy-metodik rahbarlikni amalga oshirish;

mahalliy davlat hokimiyati organlari, fuqarolarning oʻzini oʻzi boshqarish organlari, jismoniy tarbiya va sport jamiyatlari, taʼlim muassasalari, jamoat tashkilotlari bilan birgalikda aholi oʻrtasida jismoniy tarbiya va sport bilan shugʻullanishni ommalashtirish, ommaviy sport turlariga keng jalb qilish borasida keng koʻlamli ishlarni tashkil etish;

bolalar va yoshlarni sport bilan muntazam ravishda shugʻullanishga jalb etish, bolalar sport taʼlimi sifatini oshirish, barcha hududlarda, ayniqsa, qishloq va chekka hududlarda sport obyektlari tarmogʻini yanada kengaytirish orqali bolalar sportini yanada rivojlantirish;

Olimpiya, Paralimpiya va Osiyo oʻyinlari, jahon, Osiyo chempionatlari va boshqa xalqaro musobaqa va turnirlarda muvaffaqiyatli ishtirokini taʼminlash uchun istiqbolli sportchilarni saralash (seleksiya qilish), tayyorlash va mahoratini oshirish;

mamlakat terma jamoalari sifatli sport zaxirasi va tarkibini shakllantirishning samarali tizimini yaratishda Oʻzbekiston Milliy olimpiya qoʻmitasi, sport sohasidagi nodavlat notijorat tashkilotlar bilan hamkorlik qilish;

milliy va noolimpiya sport turlarini rivojlantirish, ularga aholini keng jalb etish va “mahallabay” tizimi asosida qulay shart-sharoitlar yaratish;

respublikadagi barcha vazirliklar va idoralar (jumladan, huquqni muhofaza qiluvchi organlar) uchun sport normativlarini ishlab chiqish va qabul qilish boʻyicha yagona siyosatni olib borish;

mamlakatimizda ommaviy va professional sportni, shu jumladan, sport oʻyinlari, ekstremal va qishki sport turlarini rivojlantirishni ragʻbatlantirish va qoʻllab-quvvatlash;

ilgʻor xalqaro tajribani hisobga olgan holda sport tayyorgarligi jarayoniga zamonaviy texnologiyalarni joriy etish, barcha sport turlari boʻyicha milliy chempionatlar darajasi va sifatini oshirish, xalqaro va mintaqaviy musobaqalar tashkil etish;

jismoniy tarbiya va sportni ilmiy-metodik, tibbiy-biologik taʼminlash va antidoping choralarini rivojlantirish, nosogʻlom sport raqobatiga va taqiqlangan preparatlar ishlatilishiga qarshi tizimli choralar koʻrish;

ommaviy sport va professional sport yoʻnalishlari boʻyicha moddiy-texnika bazani rivojlantirish hamda mustahkamlash;

sport jihozlari, anjomlari va uskunalari hamda inventarlarining mamlakatimizda ishlab chiqarilishini tashkil etish va kengaytirish boʻyicha takliflar tayyorlashda qatnashish;

jismoniy imkoniyati cheklangan shaxslar uchun moslashtirilgan (adaptiv) sport boʻyicha malakali mutaxassislar tayyorlashni tashkil etish;

jismoniy tarbiya va sportni rivojlantirishning asosiy yoʻnalishlari boʻyicha xalqaro sport tashkilotlari bilan hamkorlikni yoʻlga qoʻyish va mustahkamlash;

jismoniy tarbiya va sport sohasida xalqaro va davlatlararo aloqalarni kengaytirish hamda mustahkamlash, xorijiy investitsiyalar va grantlarni jalb etish borasidagi ishlarni tashkil qilish, ommabop sport dasturlarini tashkil etish;

jismoniy imkoniyati cheklangan shaxslarni jismoniy tarbiya va sport bilan shugʻullanishga jalb qilish, ularning taʼlim muassasalarida jismoniy tarbiya va sport bilan muntazam shugʻullanishi uchun shart-sharoitlar yaratish;

moddiy madaniy merosni saqlash sohasida davlat nazoratini amalga oshirish hamda moddiy madaniy meros obyektlarining, shu jumladan, muzey ashyolari va kolleksiyalarining davlat hisobini yuritish, ularni muhofaza qilish, ilmiy tadqiq etish va ommalashtirish, shuningdek, ulardan oqilona foydalanishni taʼminlash;

Oʻzbekiston Respublikasining xalqaro shartnomalarini, xususan, Umumjahon madaniy va tabiiy merosini muhofaza qilish toʻgʻrisidagi konvensiya talablarini hamda YUNESKO va boshqa tegishli xalqaro tashkilotlar tavsiyalarini samarali bajarish, xalqaro va xorijiy tashkilotlar, olimlar, ekspertlar hamda keng jamoatchilik bilan yaqin hamkorlik qilish;

alohida muhofaza qilinadigan tarixiy-madaniy hududlar, Umumjahon merosi roʻyxatiga kiritilgan hududlar va tarixiy mahallalarning tarixiy-madaniy qimmati, noyobligi, tabiiy landshafti va oʻziga xosligini saqlab qolish;

madaniy boyliklarning Oʻzbekiston Respublikasi hududidan olib chiqilishi va uning hududiga olib kirilishi ustidan davlat nazoratini amalga oshirish, shu jumladan, madaniy boyliklarni badiiy ekspertizadan oʻtkazish va sertifikatlarni rasmiylashtirish;

chet ellarda saqlanayotgan, mamlakatimiz tarixi va madaniyatiga oid madaniy boyliklarni aniqlash, ularning toʻliq maʼlumotlar bazasini yaratish va uni muntazam yangilab borishni tashkil qilish.

11. Vazirlik oʻziga yuklangan vazifalarga muvofiq quyidagi funksiyalarni amalga oshiradi:

a) turizm, sport va moddiy madaniy meros obyektlarini davlat-xususiy sheriklik tamoyili asosida samarali boshqarish, mazkur sohaga zamonaviy axborot texnologiyalarini joriy etish hamda tadbirkorlik subyektlarini qoʻllab-quvvatlash sohasida:

ijobiy sinovdan oʻtgan tajribani oʻrgangan holda turizm, sport va moddiy madaniy meros obyektlarini davlat-xususiy sheriklik tamoyili asosida samarali boshqarish tizimini joriy etadi, shu jumladan yangi, istiqbolli loyihalarni shakllantirishga doir takliflar ishlab chiqadi;

“Davlat-xususiy sheriklik toʻgʻrisida”gi Oʻzbekiston Respublikasi Qonuni talablariga muvofiq sohadagi loyihalarning manfaatdor shaxslar uchun ochiq, shaffof va tushunarli hujjatlar paketini tayyorlaydi;

davlat-xususiy sheriklik loyihasining konsepsiyasini turizm, sport va madaniy meros sohalariga kiruvchi ustuvor yoʻnalishlari boʻyicha ishlab chiqadi;

davlat-xususiy sheriklik loyihasini tayyorlash loyihaning oqilonaligi va samaradorligini hamda bu loyihani amalga oshirish maqsadida uning maqbul shaklini aniqlashni taʼminlovchi dastlabki moliyaviy hisob-kitoblar asosida, xususan:

davlat-xususiy sheriklik loyihasining moliyaviy-iqtisodiy samaradorligi koʻrsatkichlari;

davlat-xususiy sheriklik toʻgʻrisidagi bitimga muvofiq xususiy sherik tomonidan loyihalashtirilayotgan, barpo etilayotgan, moliyalashtirilayotgan, rekonstruksiya qilinayotgan, foydalanilayotgan yoki xizmat koʻrsatilayotgan davlat-xususiy sheriklik obyektining tarkibi va parametrlari;

xususiy sherikning kutilayotgan investitsiyalari hajmi va Oʻzbekiston Respublikasi budjet tizimi budjetlaridan taxmin qilinayotgan moliyalashtirish hajmi;

davlat sherigining va xususiy sherikning majburiyatlari;

xususiy sherikka koʻrsatiladigan davlat koʻmagining turlari;

muzokaralar oʻtkazish muddatlari;

davlat-xususiy sheriklik obyektidan foydalangan holda taqdim etiladigan xizmatlardan foydalanish shartlarini hisobga olgan holda amalga oshiradi;

davlat-xususiy sheriklik loyihasini tayyorlashni jamoatchilik muhokamalari bilan birga olib boradi;

bahslashuv va xolislik tanloviga koʻra saralab olish mexanizmlaridan foydalanib, xususiy sheriklarni tanlaydi, ular bilan muzokaralar oʻtkazadi va bitimlar tuzadi;

turizm, sport va moddiy madaniy meros obyektlarini davlat-xususiy sheriklik tamoyili asosida rivojlantirish masalalarida manfaatdor tashkilotlar bilan oʻzaro hamkorlik qiladi;

ilgʻor innovatsion va axborot-kommunikatsiya texnologiyalari joriy etilishini ragʻbatlantirishga qaratilgan kompleks tashkiliy-huquqiy chora-tadbirlarni ishlab chiqadi va amalga oshiradi;

tadbirkorlik faolligi mexanizmlari va ragʻbatlantirish choralari samaradorligini zamonaviy axborot texnologiyalarini joriy etish orqali oshirishga qaratilgan kompleks tashkiliy-huquqiy chora-tadbirlarni ishlab chiqadi va amalga oshiradi;

sohalar faoliyatini davlat va bozor orqali tartibga solishni maqbullashtirish, chet el turistlari uchun viza, elektron viza va roʻyxatga olish tartib-tamoyillari, pasport hamda bojxona nazoratini yanada soddalashtirish boʻyicha takliflar tayyorlaydi;

sohalarda faoliyat olib boruvchi tadbirkorlik subyektlarini qoʻllab-quvvatlashga oid qonunchilikka rioya qilinishi ustidan samarali monitoringni taʼminlaydi, qonunchilikning buzilishi sabablarini tahlil qiladi va ularni bartaraf qilish boʻyicha takliflar kiritadi;

sohalardagi subyektlarning faoliyatini rivojlantirishga toʻsqinlik qilayotgan gʻovlarni bartaraf etish boʻyicha chora-tadbirlarni amalga oshiradi;

respublika turizm bozorining rivojlanish tendensiyalari va ularda boʻlayotgan oʻzgarishlar monitoringini olib boradi, raqobat muhiti shakllangan turizm xizmatlari bozorini yanada rivojlantirish boʻyicha takliflar tayyorlaydi;

b) turizmni yanada rivojlantirish sohasida:

1) mamlakatning turizm salohiyatini tubdan oshirish, turizmga iqtisodiyotning strategik sektori maqomini berish, turizm sohasida yagona davlat siyosatini olib borish maqsadida turizmni rivojlantirishning qisqa, oʻrta va uzoq muddatga moʻljallangan yaxlit konsepsiyasini shakllantirish va amalga oshirishni taʼminlash yuzasidan:

turizmni rivojlantirishning asosiy tendensiyalari va prognozlarini tahlil qilishni inobatga olgan holda turizm sohasini rivojlantirishning ustuvor yoʻnalishlari va vazifalarini belgilashda ishtirok etadi;

davlat va xoʻjalik boshqaruvi organlari, mahalliy davlat hokimiyati va boshqaruvi organlari va boshqa tashkilotlar, shuningdek, turistik faoliyat subyektlari tomonidan turizm sohasida yagona davlat siyosatining amaliy ijrosini taʼminlaydi;

turizm sohasida davlat tomonidan tartibga solish va boshqaruv mexanizmlari hamda tuzilmasini tashkiliy-huquqiy takomillashtirish boʻyicha takliflar ishlab chiqadi;

turizmni rivojlantirish masalalarida normativ-huquqiy hujjatlar loyihalarini ishlab chiqadi va ularni belgilangan tartibda Oʻzbekiston Respublikasi Vazirlar Mahkamasiga kiritadi;

2) turizm xizmatlarining tashqi va ichki bozorlarida marketing tadqiqotlarini amalga oshirish, turizm sohasida tarixiy-madaniy merosni keng targʻib qilishga qaratilgan faol reklama-axborot siyosatini amalga oshirish, mamlakatning turizm imijini saqlash va rivojlantirish, xalqaro turizm bozorlarida milliy mahsulotlar va brendlarni ilgari surish yuzasidan:

turistlar oqimining salohiyatli va istiqbolli bozorlarini oʻrganadi, turizm sohasida reklama-axborot siyosatini olib borishning samarali uslub va mexanizmlarini belgilaydi, uning natijalariga koʻra tegishli kompleks choralar koʻradi;

mamlakatning turizm salohiyatini targʻib qilish samaradorligini oshirish maqsadida xorijiy turistlar nimani afzal koʻrishini oʻrganish va talab yuqori boʻlgan turizm mahsulotlarini aniqlashga qaratilgan marketing tadqiqotlarini tashkil etadi;

milliy turizm mahsulotlari va brendlarini xalqaro turizm bozorlarida taqdim etishga koʻmaklashadi;

turizm faoliyati subyektlari va boshqa manfaatdor shaxslarni xalqaro turizm bozorlarida mamlakatning turizm salohiyatini targʻib qilishda ishtirok etishga ragʻbatlantirishni taʼminlaydi;

Oʻzbekiston Respublikasida xorijiy turoperatorlar, ommaviy axborot vositalari va boshqa tashkilotlar ishtirokida axborot turlari (infoturlar)ni tashkil etadi;

turistlarning maqsadli toifalari orasida turizm zonalarining salohiyatini targʻib qilish boʻyicha marketing ishlarini olib boradi;

respublika kinolokatsiyalarini, shu jumladan, jamoat tashkilotlari va tadbirkorlik subyektlarini jalb qilgan holda xorijda targʻib qiladi;

3) ichki, kirish va chiqish turizmini kompleks rivojlantirish boʻyicha milliy va hududiy dasturlarni ishlab chiqish, ularni amalga oshirish, shuningdek, turizm turlari va infratuzilmasini xalqaro standartlarga mos ravishda rivojlantirish yuzasidan:

mavjud turizm salohiyati, turizm xizmatlari bozorining hamda turizm va logistika sohasidagi infratuzilmalar holatini tizimli asosda tahlil qiladi, shuningdek, mazkur sohadagi xalqaro standartlarni oʻrganadi;

davlat va xoʻjalik boshqaruvi organlari, mahalliy davlat hokimiyati va boshqaruvi organlari va boshqa tashkilotlar ishtirokida ichki, kirish va chiqish turizmini kompleks rivojlantirish dasturlarini ishlab chiqadi;

turizm industriyasini rivojlantirish, turizm xizmatlari infratuzilmasini, eng avvalo, asosiy turizm yoʻnalishlari boʻylab mehmonxonalar va kempinglar, transport-logistika va yoʻl infratuzilmasi, umumiy ovqatlanish obyektlari va turizmning boshqa infratuzilmalarini shakllantirish boʻyicha takliflar ishlab chiqadi;

turizmni rivojlantirish boʻyicha milliy va hududiy dasturlar bajarilishini muvofiqlashtiradi, turizmni rivojlantirish dasturlarining amaldagi ijrosini taʼminlashga qaratilgan kompleks chora-tadbirlari ishlab chiqadi, ularning bajarilishi ustidan samarali monitoring olib boradi;

turizm infratuzilmasini xalqaro standartlarga mos ravishda rivojlantirishga xorijiy investitsiyalar, shuningdek, xalqaro moliya institutlari va boshqa tashkilotlarning kreditlari va grantlarini jalb qiladi;

turizm infratuzilmasini rivojlantirish uchun taqdim etilgan mablagʻlar, grantlar, boshqa moliyaviy va moddiy resurslardan oqilona va maqsadli foydalanishni taʼminlash boʻyicha choralar koʻradi;

4) turizm faoliyatini rivojlantirishni muvofiqlashtirish, hududlarda yangi turizm yoʻnalishlari ochilishini taʼminlash, ularni pasportlashtirish, turizm sohasidagi yagona reyestrlarni shakllantirish yuzasidan:

turizm sohasidagi tashkilotlar, shuningdek, davlat va xoʻjalik boshqaruvi organlari, mahalliy davlat hokimiyati va boshqaruvi organlari va boshqa tashkilotlarning faoliyatini muvofiqlashtirishga qaratilgan kompleks chora-tadbirlarni amalga oshiradi, shu jumladan, ularning turizm sohasidagi ishlarini takomillashtirish boʻyicha tavsiyalar ishlab chiqadi;

davlat va xoʻjalik boshqaruvi organlari, mahalliy davlat hokimiyati va boshqaruvi organlari va boshqa tashkilotlar bilan birgalikda hududlarda yangi turizm yoʻnalishlarining ishlab chiqilishini hamda ularning ichki va tashqi turizm bozorlarida targʻib qilinishini taʼminlaydi;

turizm faoliyatining belgilangan standartlariga muvofiq turizm yoʻnalishlarini pasportlashtirishni amalga oshiradi;

turoperatorlar va turagentlar, gidlar (gid-tarjimonlar), ekskursiya yetakchilari va yoʻriqchi-yoʻl boshlovchilar, joylashtirish vositalari, togʻ changʻisi trassalari va plyajlar, shuningdek, turizm yoʻnalishlari va turizm obyektlarining yagona reyestrlarni shakllantiradi va yuritadi;

davlat va xoʻjalik boshqaruvi organlari, mahalliy davlat hokimiyati va boshqaruvi organlari va boshqa tashkilotlarga turizm sohasini iqtisodiyotning boshqa tarmoqlari bilan hamohang rivojlantirish boʻyicha takliflar kiritadi;

5) turistlar xavfsizligi va sogʻligʻini taʼminlashga yoʻnaltirilgan tizimli tadbirlarni amalga oshirish yuzasidan:

turizm xizmatlari sifati va xavfsizligiga qoʻyiladigan talablarni shakllantirish uchun turizm xizmatlari koʻrsatish jarayonini va ulardan turistlarning qoniqish hosil qilishi ustidan monitoring olib boradi;

milliy oʻziga xosliklar, iqlim sharoitlari va ilgʻor xorijiy tajribani inobatga olgan holda turizm xizmatlarining sifati va xavfsizligi boʻyicha milliy standartlar ishlab chiqilishini muvofiqlashtiradi, shuningdek, ularning doimiy takomillashtirib borilishini taʼminlaydi;

turizm xizmatlarini belgilangan tartibda litsenziyalashni amalga oshiradi;

joylashtirish vositalari, transport, umumiy ovqatlanish obyektlari va koʻngilochar, maʼrifiy, ishbilarmonlik, jismoniy tarbiya-sport obyektlari hamda turistik xizmatlarni belgilangan tartibda sertifikatlash, shu jumladan sanitariya-gigiyena jihatidan xavfsiz xizmat koʻrsatish talablari asosida sertifikatlash tadbirlarining amalga oshirilishini tashkil etadi;

turizm xizmatlarining tasnifini belgilaydi;

sertifikatlanayotgan turizm xizmatlarining belgilangan talablar va standartlarga muvofiqligi ustidan inspeksiya nazorati amalga oshirilishini taʼminlaydi;

ommaviy axborot vositalarida tegishli maʼlumotlarni joylashtirish orqali turizm sohasi subyektlari va ishtirokchilarini muayyan vaqtda tashrif buyurish turistlar xavfsizligi uchun xatarli boʻlgan mamlakatlar (joylar) toʻgʻrisida xabardor qiladi;

turizm sohasida “ishonch telefonlari” ishlashini tashkil etadi;

7) turizm turlarini diversifikatsiyalash, eng avvalo ziyorat turizmi, ekologik turizm, etnoturizm, ishbilarmonlik turizmi, sport, gastronomik, tibbiy, taʼlim va ilmiy turizmni hamda ularning infratuzilmasini rivojlantirish boʻyicha kompleks chora-tadbirlarni amalga oshirish yuzasidan:

ziyorat, etnoturizm, ishbilarmonlik turizmi, sport, gastronomik, tibbiy, taʼlim va ilmiy turizm sohasini barqaror rivojlantirish uchun normativ-huquqiy bazani ishlab chiqadi va takomillashtiradi;

xalqaro miqyosda va respublikada sport va turizm rivojlanishining asosiy tendensiyalarini oʻrganadi va tahlil qiladi hamda uning asosida sport va turizm xizmatlarini yanada diversifikatsiyalashga qaratilgan takliflarni ishlab chiqadi;

respublika hududlarining turizm salohiyatidan kelib chiqib turizmning istiqbolli yoʻnalishlarini rivojlantirish boʻyicha takliflar kiritadi;

turizm sohasidagi davlat dasturlarining amalga oshirilishini, shuningdek sohada iqtisodiy, ijtimoiy va maʼmuriy islohotlarning olib borilishini tizimli tahlil qilishni, oʻtgan davr bilan qiyosiy oʻrganish va istiqbolni belgilashni amalga oshiradi;

Oʻzbekiston Respublikasining xilma-xil hamda yilning turli fasllarida jozibador va raqobatbardosh yangi turizm mahsulotlarini yaratish boʻyicha dasturlarni ishlab chiqadi;

sport va turizm sohasining turli yoʻnalish va turlarining rivojlanish tendensiyalari boʻyicha chora-tadbirlarni ishlab chiqadi;

8) turizm faoliyati sohasida, birinchi navbatda, BMTning Jahon turizm tashkiloti, turizm sohasidagi nufuzli xalqaro va milliy tashkilotlar, shuningdek, xorijiy kompaniyalar bilan xalqaro hamkorlikni kengaytirish, turistik faoliyat amaliyotiga xalqaro va davlatlararo standartlar va normalarni joriy etish yuzasidan:

xalqaro turizm tashkilotlari, chet davlatlarning vakolatli organlari, shuningdek, turizm sohasidagi xorijiy kompaniyalari bilan xalqaro hamkorlik, oʻzaro samarali harakat qilish mexanizmlarini rivojlantirish va takomillashtirish sohasida takliflarni ishlab chiqishda ishtirok etadi;

belgilangan tartibda Birlashgan Millatlar Tashkilotining Jahon turizm tashkiloti (YNVTO) va boshqa xalqaro tashkilotlarda Oʻzbekiston Respublikasining manfaatlarini ifoda etadi va turizm masalalari boʻyicha oʻzaro hamkorlik qiladi, turizm sohasini tartibga soluvchi universal xalqaro konvensiyalar va shartnomalarda Oʻzbekiston ishtirokini taʼminlaydi;

YNVTO hujjatlari qoidalarining ijrosi monitoringini tashkil etadi, belgilangan tartibda tegishli axborotlarni tayyorlaydi;

turizmni rivojlantirishga yoʻnaltirilgan chet el donorlari va kredit tashkilotlari mablagʻlarining belgilangan tartibda jalb qilinishi va undan foydalanilishini tashkil etadi;

har yili Toshkent shahrida Toshkent xalqaro turistik yarmarkasi oʻtkazilishini taʼminlaydi;

xorijiy mamlakatlarda oʻtkaziladigan xalqaro turizm yarmarkalari, koʻrgazmalari va biznes-uchrashuvlarda mamlakatning turizm sohasi subyektlari ishtirokini tashkil etish boʻyicha tayyorgarlik chora-tadbirlarini muvofiqlashtiradi, shuningdek, xalqaro turizm tashkilotlari, xorijiy davlatlarning vakolatli organlari va xorijiy kompaniyalar bilan oʻzaro hamkorlikda xalqaro turizm tadbirlarini oʻtkazadi va ularda ishtirok etadi;

9) turizm obyektlarini joylashtirish uchun salohiyatli hududlarda rejalashtirish va loyihalashtirish ishlarini tashkil etish, ularga investorlarni jalb qilish uchun qulay shart-sharoitlarni yaratish yuzasidan:

turizm salohiyati yuqori boʻlgan hududlarni oʻrganish asosida turizm zonalari va klasterlarini tashkil etish boʻyicha takliflarni ishlab chiqadi;

turizm infratuzilma obyektlarini joylashtirish uchun salohiyatli hududlarda rejalashtirish va loyihalashtirish ishlarini tashkil etadi;

turizm zonalarining samarali boshqaruvini tashkil qilish choralarini koʻradi;

turizm zonalari hududida turizm infratuzilmasi obyektlarini barpo etish va ularning samarali faoliyat yuritishi uchun zarur investitsiyaviy shart-sharoitlarni yaratishga qaratilgan chora-tadbirlarni ishlab chiqadi;

shaharlar va tumanlar bosh rejalarini ishlab chiqish va tasdiqlash jarayonida ularning turizm infratuzilmasini rivojlantirish qismi yuzasidan takliflarni ishlab chiqadi va mazkur yoʻnalishda davlat organlari bilan hamkorlik qiladi;

v) jismoniy tarbiya va sport sohasida:

1) mahalliy davlat hokimiyati organlari, fuqarolarning oʻzini oʻzi boshqarish organlari, jismoniy tarbiya va sport jamiyatlari, taʼlim muassasalari, jamoat tashkilotlari bilan birgalikda aholi, ayniqsa, yoshlar oʻrtasida jismoniy tarbiya va sport bilan shugʻullanishni ommalashtirish borasida keng koʻlamli ishlarni tashkil etish yuzasidan:

davlat boshqaruvi organlari, mahalliy davlat hokimiyati organlari, fuqarolarning oʻzini oʻzi boshqarish organlari, jismoniy tarbiya-sport tashkilotlari, ommaviy axborot vositalari bilan birgalikda jismoniy tarbiya va sport bilan shugʻullanishni ommalashtirish ishlarini tashkil etadi;

aholining keng qatlamlari orasida sport va jismoniy tarbiya-ommaviy tadbirlar tashkil etilishi va oʻtkazilishiga koʻmaklashadi;

tumanlarda va shaharlarda sport-ommaviy va jismoniy tarbiya-sogʻlomlashtirish tadbirlari, shu jumladan, sportning milliy turlari boʻyicha xalq oʻyinlari va musobaqalar aholi, ayniqsa, yoshlar, xotin-qizlar, keksalar va qishloq aholisi orasida oʻtkazilishini muntazamlilik asosida tashkil etadi;

Oʻzbekistonda milliy sport turlarini va xalq oʻyinlarini rivojlantirishga har tomonlama koʻmaklashadi, milliy sport turlari boʻyicha sport musobaqalari, xalq oʻyinlari boʻyicha ommaviy tadbirlar mamlakatda va chet elda tashkil etilishi va oʻtkazilishi moliyalashtirilishini, shuningdek, milliy sport turlari xalqaro sport maydonida keng targʻib qilinishi va rivojlantirilishini belgilangan tartibda taʼminlaydi;

2) jismoniy tarbiya va sport sohasida aholining keng qatlamlarini sport bilan shugʻullanishga va sogʻlom turmush tarzini yuritishga jalb etishga, jismonan sogʻlom oʻsib kelayotgan yosh avlodni tarbiyalash, sport industriyasi va infratuzilmasini rivojlantirishga, xalqaro sport maydonida yuqori natijalarga erishib mamlakatni munosib ifodalashni taʼminlashga qaratilgan yagona davlat siyosatini amalga oshirish yuzasidan:

jismoniy tarbiya va sport sohasida vazirliklar, idoralar, mahalliy ijro etuvchi hokimiyat organlari va boshqa tashkilotlarning ishini muvofiqlashtiradi;

qonunchilikni takomillashtirish boʻyicha takliflarni ishlab chiqadi va ularni koʻrib chiqish uchun belgilangan tartibda Vazirlar Mahkamasiga taqdim etadi;

oʻz vakolatlari doirasida jismoniy tarbiya va sport sohasida normativ-huquqiy hujjatlarni, shuningdek, sport normativlarini ishlab chiqadi va tasdiqlaydi;

respublikada jismoniy tarbiya va sport sohasidagi qonunchilik ijro etilishi monitoringini olib boradi, shuningdek, jismoniy tarbiya va sportni rivojlantirishning holatini tahlil qiladi, ularni mamlakatda yanada rivojlantirish boʻyicha har yillik prognozlarni shakllantiradi;

jismoniy tarbiya va sportni rivojlantirish boʻyicha maqsadli dasturlarni, dasturiy-metodik hujjatlarni hamda jismoniy tarbiya va sport sohasiga tegishli boshqa normativ hujjatlarni ishlab chiqadi va belgilangan tartibda tasdiqlaydi, ularning ijrosini taʼminlaydi;

Vazirliklar, idoralar va boshqa tashkilotlar bilan birgalikda jismoniy tarbiya va sport, shuningdek, aholini jismoniy tarbiyalash sohasida ilmiy tadqiqotlarning rivojlanishiga koʻmaklashadi, ilmiy tadqiqotlar natijalarini amaliyotga joriy etadi va ushbu ishlar amalga oshirilishini muvofiqlashtiradi;

davlat boshqaruvining boshqa organlari bilan birgalikda jismoniy tarbiya va sport namoyandalarini, shu jumladan sportchilar, trenerlar, sport faxriylarini va boshqa mutaxassislarni ijtimoiy muhofaza qilish masalalarini hal etadi;

mamlakatda sport turlarini rivojlantirishning ustuvor vazifalarini belgilaydi;

sport sohasidagi nodavlat notijorat tashkilotlar reyestrini yuritadi, uni yuritish tartibini belgilaydi;

sport turlari boʻyicha Yagona sport tasnifini, shuningdek, u toʻgʻrisidagi nizomni, sport turlari va sport fanlarini eʼtirof etish, ular reyestrini yuritish tartibini ishlab chiqadi va tasdiqlaydi;

xalqaro va respublika darajalaridagi sport va jismoniy tarbiya-ommaviy tadbirlarning kalendar rejasini shakllantiradi va tasdiqlash uchun Vazirlar Mahkamasiga kiritadi, manfaatdor tashkilotlar bilan birgalikda ularning moliyalashtirilishini va oʻtkazilishini taʼminlaydi;

manfaatdor vazirliklar, idoralar va boshqa tashkilotlar bilan birgalikda mamlakatda sport industriyasi va infratuzilmasini rivojlantirishga doir takliflarni ishlab chiqadi;

3) bolalarni sport bilan muntazam ravishda shugʻullanishga jalb etish, bolalar sport taʼlimi sifatini oshirish, barcha mintaqalarda, ayniqsa, qishloq va chekka tumanlarda bolalar sporti obyektlari tarmogʻini yanada kengaytirish orqali bolalar sportini yanada rivojlantirish yuzasidan:

jismoniy va maʼnaviy sogʻlom oʻsib kelayotgan avlodni kamol toptirishning muhim sharti sifatida bolalar orasida jismoniy tarbiya va sport bilan shugʻullanishning ommaviyligini, ularda sogʻlom turmush tarziga intilishni va sportga muhabbatni singdirishni taʼminlaydi;

bolalar sportining moddiy-texnika va resurs bazasini rivojlantirish chora-tadbirlarini amalga oshiradi;

iqtidorli yoshlar va sport namoyandalarining xalqaro va respublika darajasida jismoniy tarbiya va sport sohasida oʻtkaziladigan koʻriklar, tanlovlar, festivallarga, boshqa anjumanlarga borishi va ishtirok etishini taʼminlaydi;

davlat boshqaruvi organlari, mahalliy davlat hokimiyati organlari bilan birgalikda “Umid nihollari”, “Barkamol avlod” va “Universiada” musobaqalarining uch bosqichli tizimi oʻyinlari tashkil etilishi va oʻtkazilishini tashkil etishda ishtirok etadi;

4) Olimpiya, Paralimpiya va Osiyo oʻyinlari, jahon, Osiyo chempionatlari va boshqa xalqaro musobaqa va turnirlarda muvaffaqiyatli ishtirok etishni taʼminlash uchun istiqbolli sportchilarni tanlash, tayyorlash va mahoratini oshirishning, ular orasidan mamlakat terma jamoalari sifatli sport zaxirasi va tarkibini shakllantirishning samarali tizimini yaratishda Oʻzbekiston Milliy olimpiya qoʻmitasi, sport federatsiyalari (uyushmalari) bilan hamkorlik qilish sohasida:

Oʻzbekiston Respublikasi sport terma jamoalari tarkiblarini va ularning zaxiralarini tasdiqlaydi, Oʻzbekiston sport delegatsiyalarini shakllantiradi, ularni xalqaro sport musobaqalariga va jismoniy tarbiya-ommaviy tadbirlarga tayyorlaydi;

Oʻzbekiston Respublikasi sport terma jamoalarining Olimpiya va Paralimpiya oʻyinlari, jahon, qitʼa sport musobaqalarida muvaffaqiyatli ishtirok etishini taʼminlaydi;

Oʻzbekiston Milliy olimpiya qoʻmitasi bilan birgalikda jismoniy tarbiya va sport sohasida sport markazlari va dopingga qarshi markazlar, taʼlim muassasalari va ilmiy tashkilotlar tashkil etish boʻyicha takliflar kiritadi va ular faoliyatini tashkil etishni taʼminlaydi;

Oʻzbekiston Milliy olimpiya qoʻmitasi, sport federatsiyalari (uyushmalari) va jismoniy tarbiya va sport sohasida boshqa nodavlat notijorat tashkilotlar faoliyatini rivojlantirishga koʻmaklashadi;

Oʻzbekiston Milliy olimpiya qoʻmitasi, sport federatsiyalari (uyushmalari) bilan birgalikda keyinchalik sport zaxirasini shakllantirish uchun isteʼdodli va istiqbolli sportchilarni tanlash, tayyorlash va ularning mahoratini oshirishning uzluksiz tizimini oʻtkazish boʻyicha kompleks tadbirlarni amalga oshiradi;

xalqaro hamda respublika sport va jismoniy tarbiya-ommaviy tadbirlar oʻtkazilishini, sportchilar, trenerlar va boshqa mutaxassislar taʼminotini, Oʻzbekiston Respublikasi sportchilarini, sport terma jamoalarini Olimpiya, Paralimpiya va Osiyo oʻyinlariga, jahon, Osiyo chempionatlariga, kuboklariga va birinchiligiga va boshqa xalqaro sport musobaqalariga tayyorlashni va ishtirok etishini, xalqaro tashkilotlarga aʼzolik badallari toʻlanishini belgilangan tartibda taʼminlaydi;

jismoniy imkoniyati cheklangan va ijtimoiy himoyaga muhtoj shaxslarni jismoniy tarbiya va sport bilan shugʻullanishga jalb etish hamda Surdlimpiya va Paralimpiya harakatini rivojlantirish boʻyicha chora-tadbirlarni ishlab chiqadi;

5) mamlakatimizda professional, ommaviy sportni, shu jumladan, sport oʻyinlari va qishki sport turlarini rivojlantirishni ragʻbatlantirish va qoʻllab-quvvatlash, ilgʻor xalqaro tajribani hisobga olgan holda sport tayyorgarligi jarayoniga zamonaviy texnologiyalarni joriy etish, barcha sport turlari boʻyicha milliy chempionatlar darajasi va sifatini oshirish, xalqaro va mintaqaviy musobaqalarni tashkil etish, nosogʻlom sport raqobatiga va taqiqlangan substansiyalar va (yoki) taqiqlangan usullar ishlatilishiga qarshi tizimli choralar koʻrishni ragʻbatlantirish yuzasidan:

davlat boshqaruvi organlari, mahalliy davlat hokimiyati organlari, Milliy olimpiya qoʻmitasi, sport turlari boʻyicha federatsiyalar va uyushmalar bilan birgalikda mamlakatda professional sportni tashkil etish va yanada rivojlantirish boʻyicha takliflar kiritadi;

yuqori malakali sportchilarni va sport zaxirasini tayyorlash ishlarini olib boradi, idoraviy boʻysunishidan qatʼi nazar, sport maktablari, klublar va sport tayyorgarligi markazlari rivojlanishi va ixtisoslashtirilishini muvofiqlashtiradi;

xorijiy mamlakatlarda jismoniy tarbiya va sportni rivojlantirishning jahon ilmiy-texnik taraqqiyoti yutuqlari, ilgʻor tajribasini oʻrganadi, ushbu yutuqlar respublikada joriy etilishini taʼminlaydi;

sport musobaqalarida doimiy ravishda ishtirok etuvchi sportchilarning yagona maʼlumotlar bazasini shakllantiradi va muntazam ravishda yuritib borish tizimini joriy qiladi;

sportning alohida turlari boʻyicha Oʻzbekiston Respublikasi sport terma jamoalari sportchilarining Oʻzbekiston Respublikasi Davlat budjeti mablagʻlari va sport sohasidagi nodavlat notijorat tashkilotlar va Oʻzbekiston Milliy olimpiya qoʻmitasining oʻz mablagʻlari hisobiga moliyalashtiriladigan xalqaro sport musobaqalarida va jismoniy tarbiya-ommaviy tadbirlarda ishtirok etishini taʼminlaydi;

jismoniy tarbiya va sport sohasida eng oʻrnak koʻrsatgan xodimlarni, shuningdek, Oʻzbekiston Respublikasida jismoniy tarbiya va sportni rivojlantirishga koʻmaklashgan boshqa shaxslarni idoraviy koʻkrak nishonlari bilan mukofotlaydi;

sport unvonlari, sport razryadlarini berish tartibini tasdiqlaydi;

sport sohasidagi ulkan yutuqlari uchun mukofotlar taʼsis etish va Oʻzbekiston Respublikasining faxriy unvonlarini berish toʻgʻrisidagi takliflarni ishlab chiqadi va belgilangan tartibda kiritadi;

jismoniy tarbiya va sport sohasi xodimlari va mutaxassislarini ularning koʻp yillik va samarali faoliyati, alohida yutuqlari va xizmatlari uchun belgilangan tartibda Oʻzbekiston Respublikasi davlat mukofotlariga taqdim qiladi va tavsiyalar beradi;

6) jismoniy tarbiya-sogʻlomlashtirish va sport tashkilotlari, obyektlari va inshootlarining ommaviy sport, bolalar sporti va professional sport yoʻnalishlari boʻyicha moddiy-texnika bazasini rivojlantirish hamda mustahkamlash, ulardan maksimal darajada va samarali foydalanilishini taʼminlash, sport asbob-uskunalari hamda inventarlarining mamlakatimizda ishlab chiqarilishini tashkil etish va kengaytirish boʻyicha takliflar tayyorlashda qatnashish:

Oʻzbekiston Respublikasi sportchilarini va sport terma jamoalari aʼzolarini sport kiyim-boshlari, sport jihozlari, anjomlari hamda uskunalari bilan taʼminlaydi;

ommaviy, bolalar va professional sport yoʻnalishlari boʻyicha obyektlar va inshootlar faoliyatini takomillashtirish va yangilarini qurish boʻyicha takliflar kiritadi, ulardan eng koʻp darajada va samarali foydalanishni taʼminlaydi;

jismoniy tarbiya-sogʻlomlashtirish va sport tovarlarini ishlab chiqarishni tashkil etishga koʻmaklashadi;

idoraviy mansub tashkilotlarga ularning moddiy-texnika bazasini rivojlantirishda va axborot taʼminotini tashkil etishda, kadrlarni tayyorlash va ularni qayta tayyorlash boʻyicha maslahatlar berish va boshqa masalalar boʻyicha koʻmaklashadi;

7) jismoniy tarbiya va sport sohasida xalqaro va davlatlararo sport aloqalarini kengaytirish hamda mustahkamlash, xorijiy investitsiyalar va grantlarni jalb etish borasidagi ishlarni tashkil qilish, ommabop sport dasturlarini tashkil etishga koʻmaklashish, jismoniy tarbiya va sport sohasiga oid ommaviy adabiyotlarni chop etish, video va kino materiallar tayyorlash yuzasidan:

jismoniy tarbiya va sport boʻyicha ilmiy, oʻquv, ilmiy-ommabop va ommaviy adabiyotlar yaratilishi va nashr etilishini, shuningdek, jismoniy tarbiya va sport sohasida foto va video materiallar yaratilishini tashkil etadi;

xalqaro sport aloqalarini amalga oshiradi va rivojlantiradi, xalqaro sport hamjamiyatlari bilan oʻzaro munosabatlarda Oʻzbekiston Respublikasi manfaatlarini ifodalaydi;

hamkorlik boʻyicha xalqaro loyihalarni ishlab chiqadi hamda jismoniy tarbiya va sport sohasiga xorijiy investitsiyalar va grantlarni jalb etishda ishtirok etadi, Oʻzbekiston Respublikasining xalqaro shartnomalari bajarilishini taʼminlaydi;

sport sohasida iqtidorli yoshlar vakillariga koʻmaklashadi va yordam beradi, ularni oʻqish va tajriba orttirish uchun chet elga yuboradi;

konferensiyalar, koʻrgazmalar va sport musobaqalarini oʻtkazadi, sport sohasiga xorijiy investitsiyalar va grantlarni jalb etish borasidagi ishlarni tashkil etadi;

manfaatdor tashkilotlar bilan birgalikda ommabop sport dasturlari tashkil etilishida, jismoniy tarbiya va sport sohasida ommaviy adabiyotlar nashr etilishida va mavzuli video va kino materiallar yaratilishida ishtirok etadi;

taniqli sport namoyandalarini, respublikaning va xorijiy mamlakatlarning yetakchi pedagog-mutaxassislarini respublika sport taʼlim muassasalarida oʻqituvchilik qilishga va mahorat darslari oʻtkazishga taklif etadi;

sport turizmini (ayniqsa ichki) rivojlantirish maqsadida yirik sport obyektlarini mamlakatning ommalashgan turistik yoʻnalishlari xaritalariga kiritadi, hududlarning sport brendlarini shakllantiradi;

g) moddiy madaniy meros sohasida:

1) moddiy madaniy meros obyektlarini muhofaza qilish sohasida:

moddiy madaniy meros obyektlarini aniqlash, hisobga olish, muhofaza qilish, targʻib qilish, davlat reyestri, elektron katalogi, pasporti va davlat kadastrini yuritish, qoʻriqlanadigan tegralarini belgilash hamda sohada davlat nazoratini amalga oshirish;

moddiy madaniy meros obyektlaridan oqilona foydalanish, shu jumladan ularni davlat-xususiy sheriklik asosida samarali boshqarish, sohani raqamlashtirish va zamonaviy axborot texnologiyalarini joriy etish;

moddiy madaniy merosning koʻchmas mulk obyektlarida asrashga doir ishlarni amalga oshirish, buyurtmachi funksiyasini bajarish, uzluksiz ravishda ilmiy-texnik nazorat qilish, tarixiy-madaniy ekspertiza va loyiha-smeta hujjatlarining tarixiy-madaniy qimmatga taʼsiri boʻyicha ekspertizasini amalga oshirish;

2) muzeylar sohasida:

milliy muzey fondining davlat katalogini yuritish, muzey ashyolari va muzey kolleksiyalarini milliy muzey fondi tarkibiga kiritish, undan chiqarish, universal huquqiy vorislik tartibida yoxud boshqa usulda bir shaxsdan ikkinchi shaxsga oʻtkazish hamda sohada davlat nazoratini amalga oshirish;

muzeylar faoliyatini muvofiqlashtirish, rivojlantirish, muzey xodimlarining malakasini oshirish, qayta tayyorlash, attestatsiyadan oʻtkazish, muzeylarning toifalarini belgilash, milliy muzey fondining ochiqligini taʼminlash va muzey ashyolari hamda muzey kolleksiyalarini oʻrganish, ommalashtirish, restavratsiya va asrashga doir ishlarni amalga oshirish;

3) alohida muhofaza qilinadigan tarixiy-madaniy hududlar sohasida:

alohida muhofaza qilinadigan tarixiy-madaniy hududlarni muhofaza qilish, ularning pasporti, boshqarish rejalari, rejimi, qoʻriqlanadigan tegralarini belgilash, ushbu hududlar va tarixiy mahallalarning tarixiy-madaniy qimmati, noyobligi, tabiiy landshafti va oʻziga xosligini saqlab qolish;

tarixiy joylarni Umumjahon merosi roʻyxatiga kiritishga tavsiya etish, Umumjahon madaniy va tabiiy merosini muhofaza qilish toʻgʻrisidagi konvensiya talablari, YUNESKO, Umumjahon merosi markazi, Umumjahon merosi qoʻmitasi tavsiyalarining mamlakat hududida bajarilishini nazorat qilish;

4) arxeologiya sohasida:

arxeologiya tadqiqotlarini qoʻllab-quvvatlash, muvofiqlashtirish, nazorat qilish, arxeologiya tadqiqoti uchun ruxsatnoma berish, ilmiy hisobotni ekspertizadan oʻtkazish va uning saqlanishini taʼminlash;

Arxeologiya ashyolari davlat katalogini yuritish, arxeologiya ashyolarining davlatga topshirilishini tashkil qilish hamda fan, madaniyat va taʼlim muassasalariga biriktirib qoʻyish va tasarrufdan chiqarish;

arxeologiya merosi obyektlarini muhofaza qilish, halokat yoqasidagi arxeologiya obyektlarida zudlik bilan tadqiqot oʻtkazilishini taʼminlash, arxeologiya obyektlarini konservatsiyalash, muzeylashtirish hamda arxeologiya parklarini yaratish;

5) mamlakatimiz va xorijdagi madaniy boyliklar sohasida:

madaniy boyliklarni muhofaza qilish, shu jumladan ularning Oʻzbekiston Respublikasi hududidan olib chiqilishi va uning hududiga olib kirilishi boʻyicha sertifikat berish va realizatsiya qilishni muvofiqlashtirish, madaniy boyliklarni badiiy ekspertizadan oʻtkazish, ularning toifasini aniqlash, davlat reyestrini yuritish, sohada davlat nazoratini amalga oshirish;

mamlakatimiz tarixi va madaniyatiga oid xorijdagi madaniy boyliklarni aniqlash, ularning toʻliq maʼlumotlar bazasini yaratish, muntazam yangilab borish hamda asl yoki koʻchirma nusxalari, foto va videotasvirlarini yurtimizga olib kelish;

ilmiy oʻrganish asosida olingan ilmiy maʼlumotlar va ularning tahliliy natijalariga oid bibliografik toʻplamlar, kataloglar, kitob-albomlar, axborot byulletenlari va boshqa matbaa mahsulotlarini turli tillarda nashr etish, ommaviy axborot vositalari va Internet tarmogʻida keng yoritish, xalqaro va xorijiy tashkilotlar bilan hamkorlik qilish.

d) turizm, jismoniy tarbiya, sport va moddiy madaniy meros sohalari uchun malakali kadrlar tayyorlash, ularni muntazam qayta tayyorlash va malakasini oshirishni yuqori darajada tashkil etish hamda ilm-fanni rivojlantirish sohasida:

manfaatdor vazirliklar va idoralar bilan birgalikda turizm sohasidagi oʻrta maxsus taʼlim, professional taʼlim hamda oliy taʼlim bitiruvchilarining bandligi boʻyicha tadqiqotlar olib boradi, taʼlim muassasalarida kadrlar va mutaxassislarning kasbiy tayyorgarlik yoʻnalishlarini takomillashtirish boʻyicha takliflar ishlab chiqadi;

turizm, ayniqsa, menejment va marketing sohasida kasbiy tayyorlash, gid (gid-tarjimon), ekskursiya yetakchisi va yoʻriqchi-yoʻl boshlovchilarning malakasini oshirishga koʻmaklashadi;

kadrlarning muntazam malakasini oshirish va qayta tayyorlashni tashkil etishni taʼminlaydi, Vazirlik, uning hududiy boʻlinmalari va idoraviy mansub tashkilotlarning rahbarlari va mutaxassislarini attestatsiyadan oʻtkazadi, shu jumladan, ularning tegishli xorijiy oʻquv markazlari va taʼlim muassasalarida stajirovkadan oʻtishini taʼminlaydi;

jismoniy tarbiya-sogʻlomlashtirish hamda sport tashkilotlarini, taʼlim va sport-taʼlim muassasalarini yuqori malakali trenerlar va boshqa sport mutaxassislari bilan taʼminlash choralarini koʻradi;

turizm, sport va moddiy madaniy meros sohalarida ilm-fanni rivojlantirish choralarini koʻradi va ilmiy-tadqiqot, ekspertlik ishlarini tashkil etadi;

respublika maktabgacha taʼlim tashkilotlari, umumtaʼlim maktablari, akademik litsey, kasb-hunar maktabi, kollej va texnikumlar va oliy taʼlim muassasalarining jismoniy tarbiya oʻqituvchilari va instruktorlari uchun oʻquv-mashq mashgʻulotlarini tashkil etish boʻyicha metodik koʻrsatmalar, oʻquv, metodik qoʻllanmalar va boshqa ilmiy-metodik materiallarni ishlab chiqadi;

jismoniy tarbiya va sport klublari toʻgʻrisidagi nizomni tasdiqlaydi;

vazirliklar va idoralarning jismoniy tarbiya-sport jamiyatlari va klublari, respublikaning maktabgacha taʼlim tashkilotlari, umumtaʼlim maktablari, akademik litsey, kasb-hunar maktabi, kollej va texnikumlar va oliy taʼlim muassasalarining jismoniy tarbiya oʻqituvchilari va instruktorlarining faoliyatini baholash mezonlarini ishlab chiqadi va tasdiqlaydi;

respublikaning maktabgacha taʼlim tashkilotlari, umumtaʼlim maktablari, akademik litsey, kasb-hunar maktabi, kollej va texnikumlar va oliy taʼlim muassasalarining jismoniy tarbiya oʻqituvchilari va instruktorlari uchun sport turlari boʻyicha oʻquv-mashq mashgʻulotlarini oʻtkazish metodikasi boʻyicha tushuntirish ishlarini olib boradi;

keyinchalik hududiy sport musobaqalarida qatnashish uchun iqtidorli yoshlarni tanlash (seleksiya) va bolalar-oʻsmirlar sport maktablari zaxirasini shakllantirish maqsadida umumtaʼlim maktablari oʻquvchilari orasida jismoniy tarbiya oʻqituvchilarini jalb qilgan holda darsdan tashqari toʻgaraklar va seksiya mashgʻulotlarini tashkil etadi;

keyinchalik hududiy va respublika sport musobaqalarida ishtirok etish uchun iqtidorli yoshlarni tanlash (seleksiya) va ixtisoslashtirilgan bolalar-oʻsmirlar sport maktablari zaxirasini shakllantirish maqsadida akademik litsey, kasb-hunar maktabi, kollej va texnikumlar oʻquvchilari orasida jismoniy tarbiya oʻqituvchilari va sport turlari boʻyicha trenerlarni jalb qilgan holda darsdan tashqari olimpiya va milliy sport turlari boʻyicha sport toʻgaraklari va seksiya mashgʻulotlarini tashkil etadi;

keyinchalik respublika va xalqaro sport musobaqalarida ishtirok etish uchun iqtidorli yoshlarni tanlash (seleksiya) va milliy terma jamoalar sport zaxirasini hamda sport turlari boʻyicha respublika oliy sport mahorati maktablari zaxirasini shakllantirish maqsadida oliy taʼlim muassasalarida olimpiya va milliy sport turlari boʻyicha talabalar sport klublari hamda jamoalarini tashkil etadi;

oliy taʼlim muassasalarining jismoniy tarbiya oʻqituvchilari (kafedra mudirlari)ni lavozimga tayinlash va lavozimdan ozod etishda oliy taʼlim muassasasi bilan birgalikda tashkil etiladigan tanlovlarda Vazirlik vakilining ilmiy kengash yigʻilishida ishtirokini taʼminlaydi;

jismoniy tarbiya va sport sohasida kadrlar malakasini oshirishni, ularni qayta tayyorlashni, tajriba orttirishini, shu jumladan, chet elda attestatsiyadan oʻtkazishni taʼminlaydi;

sport jamoalari, mutaxassislari, shuningdek, sportchilar hamda jismoniy tarbiya va sport sohasidagi boshqa vakillarni, ularning idoraviy mansubligidan qatʼi nazar, xalqaro tanlovlar, festivallar, sport musobaqalarida va chet eldagi boshqa tadbirlarda ishtirok etish uchun tayyorlashni, joʻnatishni va qabul qilishni taʼminlaydi;

jismoniy tarbiya va sport sohasida chet el mutaxassislarini jalb qilishga, shu jumladan, moliyaviy tarafdan, koʻmaklashadi.

12. Quyidagilar Vazirlik markaziy apparatining asosiy vazifalari hisoblanadi:

1) Vazirlikning hududiy boʻlinmalari va unga idoraviy mansub tashkilotlar bilan birgalikda Vazirlikka yuklangan vazifalar va funksiyalarning samarali bajarilishini taʼminlash;

2) turizm, jismoniy tarbiya va sport, moddiy madaniy meros sohalarida yagona davlat siyosati amalga oshirilishini taʼminlash;

3) Vazirlik va uning tarkibiy hamda hududiy boʻlinmalari faoliyati bilan bogʻliq prognoz koʻrsatkichlariga erishilishini taʼminlash;

4) Vazirlik faoliyati sohasiga kiradigan masalalar boʻyicha vazirliklar va idoralar bilan oʻzaro hamkorlik qilish, Vazirlar Mahkamasi va uning Rayosatlari majlislarida tegishliligi boʻyicha masalalarni koʻrib chiqishda ishtirok etish;

5) Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari topshiriqlarini oʻz vaqtida va sifatli bajarish;

6) Vazirlik xodimlarini tizimli qayta tayyorlash va malakasi oshirilishini tashkil qilish;

7) markaziy apparat va hududiy boʻlinmalar faoliyati samaradorligi hamda natijadorligini tanqidiy tahlil qilish, tahlil yakunlariga koʻra zarur choralar koʻrish;

8) Vazirlik hamda uning tarkibiy va hududiy boʻlinmalari ishini tashkil etishning zamonaviy shakllarini joriy etish;

9) davlat xizmatlari samaradorligi, sifati va qulayligini taʼminlash;

10) jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish;

11) Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Vazirlik xodimlari va rahbarlarining faol ishtirok etishini taʼminlash, jismoniy va yuridik shaxslarning Oʻzbekiston Respublikasi Prezidenti Virtual qabulxonasi va Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonalaridan tushgan murojaatlari oʻz vaqtida va toʻliq koʻrib chiqilishini taʼminlash;

12) turizm, jismoniy tarbiya va sport, moddiy madaniy meros tashkilotlarining moddiy-texnika bazasini rivojlantirish hamda mustahkamlash, mahalliy korxonalar tomonidan sport jihozlari, anjomlari va uskunalarining ishlab chiqarilishini kengaytirish, tashkil qilish boʻyicha takliflar tayyorlash;

13) turizm, jismoniy tarbiya, sport va moddiy madaniy meros sohalarida berilgan (beriladigan) unvonlar, razryadlar hamda malaka toifalarini tasdiqlash;

14) turizm, jismoniy tarbiya va sportni rivojlantirish hamda moddiy madaniy merosni saqlash boʻyicha maqsadli dasturlar, turizm, jismoniy tarbiya, sport va madaniy meros sohalariga oid dasturiy-metodik hamda boshqa normativ hujjatlarni belgilangan tartibda tasdiqlash;

15) Oʻzbekiston sportchilarining Olimpiada va Paralimpiya oʻyinlariga tayyorlanishi va ularda ishtirok etishi boʻyicha qabul qilingan dasturlarning bajarilishini taʼminlash;

16) xalqaro maydonlarda xalqaro va davlatlararo aloqalarni kengaytirish hamda mustahkamlash, turizm, jismoniy tarbiya, sport va madaniy meros sohalarida xorijiy investitsiyalar va grantlarni jalb etish borasidagi ishlarni tashkil qilish boʻyicha tadbirlarda Oʻzbekiston Respublikasi nomidan qatnashishni taʼminlash;

17) Vazirlik hayʼati qarorlarining, Oʻzbekiston Respublikasi turizm va sport vaziri (keyingi oʻrinlarda — Vazir) buyruq va topshiriqlarining oʻz vaqtida va sifatli ijro etilishini taʼminlash;

18) tarkibiy boʻlinmalarda kadrlarni tanlash va joy-joyiga qoʻyish, professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

19) Vazirlikning turizm, jismoniy tarbiya, sport va moddiy madaniy meros sohalarida ommaviy tadbirlarining kalendar rejasini shakllantirish, manfaatdor tashkilotlar va idoralar bilan birgalikda uning amalga oshirilishini taʼminlash;

20) Oʻzbekiston Respublikasi Prezidenti va Oʻzbekiston Respublikasi Hukumatining xorijda oʻtkaziladigan turli xalqaro munosabatlarda hamda Oʻzbekiston Respublikasida oʻtkaziladigan xalqaro tadbirlarida turizm, jismoniy tarbiya va sport hamda moddiy madaniy meros sohalari vakillarining ishtirok etishi masalalariga doir qarorlari loyihalarini tayyorlash;

21) turizm, jismoniy tarbiya va sport hamda moddiy madaniy meros sohalarida isteʼdodli va istiqbolli kadrlarni saralash, oʻqitish hamda malakasini oshirishda muvaffaqiyatli ishtirok etishini, shuningdek, uzluksiz saralash tizimini yaxshilashni, sport zaxirasi va terma jamoalar tarkibini shakllantirish;

22) turizm, jismoniy tarbiya va sport sohalarini rivojlantirilishni va moddiy madaniy merosni saqlashni ragʻbatlantirish, ilgʻor xalqaro tajribani hisobga olgan holda ilgʻor texnologiyalarni turizm, sport va moddiy madaniy meros sohalariga joriy qilish, milliy tadbirlar darajasi va sifatini oshirish, xalqaro hamda hududiy tadbirlarni tashkil etish, sportdagi nosogʻlom holatlar, taqiqlangan substansiyalar va (yoki) taqiqlangan usullardan foydalanishga qarshi kurash olib borish boʻyicha tizimli choralarning amalga oshirilishini taʼminlash;

23) Oʻzbekiston Respublikasi sport terma jamoalari va ularning zaxirasi tarkibini shakllantirish, Oʻzbekiston sport delegatsiyalarini butlash, ularning xalqaro sport musobaqalariga, jismoniy tarbiya va sport sohasidagi ommaviy tadbirlarga tayyorlanishi hamda qatnashishini taʼminlash;

24) Oʻzbekiston Milliy Olimpiya qoʻmitasi, sport sohasidagi nodavlat notijorat tashkilotlar hamda jismoniy tarbiya va sport sohasidagi boshqa nodavlat notijorat tashkilotlar faoliyatini rivojlantirishga yordam berish;

25) jismoniy tarbiya va sport sohasidagi ilgʻor jahon tajribasi hamda ilmiy-texnik yutuqlarni oʻrganishni tashkil etish, bunday tajribani respublikada sportni yanada rivojlantirish uchun joriy qilish;

26) milliy sport turlarini xalqaro maydonda keng targʻib qilish va rivojlantirish;

27) sportchilar, jismoniy tarbiya va sport sohasining boshqa vakillarini idoraviy mansubligidan qatʼi nazar, xorijdagi xalqaro sport musobaqalari, festivallar va boshqa tadbirlarda ishtirok etishga tayyorlash, ularning joʻnatilishi hamda kutib olinishini taʼminlash;

28) konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarning oʻtkazilishini tashkil qilish, shuningdek, boshqa tashkilotlar tomonidan uyushtirilgan shunday tadbirlarda qatnashishini taʼminlash;

29) turizm, jismoniy tarbiya, sport va madaniy meros sohalarida zarur maʼlumotlarni yagona tizim orqali yigʻish maqsadida manfaatdor idoralarning tizim va maʼlumotlar bazalari bilan integratsiya qilish, shuningdek, ushbu tizim toʻliq ishlashini taʼminlash uchun maʼlumotlarni raqamlashtirish choralarini koʻrish;

30) Vazirlik oldida turgan vazifalarni hal etishni taʼminlash, mavjud talablar va ehtiyojlarni qanoatlantirish, shuningdek, davlat xaridlari uchun ajratilgan mablagʻlardan samarali foydalanish, shu jumladan tovarlarni (ishlarni, xizmatlarni) olishdan koʻrilgan naf, ularning sifati va qiymati oʻrtasidagi maqbul nisbatni (foydalanish davri xarajatlarini hisobga olgan holda) taʼminlash, davlat xaridlarini maqbul muddatlarda oʻtkazish imkonini beradigan oqilona va tejamkor usulda amalga oshirish;

31) turizm zonalari va klasterlarini tashkil etish va ularda turizm sohasi subyektlari faoliyatini amalga oshirish tartibini belgilash, ularda kompleks turizm xizmatlari koʻrsatish, turizm faoliyatining raqobatbardoshliligi va sifatini oshirish maqsadida turizm mahsulotlarini shakllantirish, targʻib etish va realizatsiya qilish, turizm zonalari va klasterlarining rivojlanishini ragʻbatlantirish;

32) turizm bozorining turli segmentlariga yoʻnaltirilgan turizm mahsuloti va xizmatlarini diversifikatsiya qilish;

33) turizm, jismoniy tarbiya va sport sohalarida davlat tomonidan moliyalashtirishni qisqartirib borish va boqimondalik kayfiyatiga barham berish, sohani bozor mexanizmlari asosida boshqarish boʻyicha samaradorlikka erishish, monetizatsiya tamoyillarini yoʻlga qoʻyish, sport lotereyalari tashkil etish;

34) sport sohasini yanada rivojlantirish, uning investitsiyaviy jozibadorligini oshirish, qoʻshimcha mablagʻlarni jalb qilish, Oʻzbekiston Respublikasida bukmekerlik faoliyatini amalga oshirish;

35) milliy va noolimpiya sport turlari faoliyati monitoringini olib borish va ularni rivojlantirish;

36) turizm, jismoniy tarbiya, sport va moddiy madaniy meros sohalaridagi nodavlat notijorat tashkilotlarning faoliyatini muvofiqlashtirish;

37) aholining barcha qatlamlari oʻrtasida jismoniy tayyorgarlik darajasi sinovlarini joriy etish va oʻtkazish, aholi va yoshlar oʻrtasida bu borada olib borilayotgan ishlar samaradorligini muhokama etib borish;

38) turizm, jismoniy tarbiya va sport faoliyatining raqobat toʻgʻrisidagi qonunchilik hujjatlari talablariga muvofiqligini taʼminlash, ularning buzilishi xavfini aniqlash va oldini olish boʻyicha komplaens nazorat tizimini joriy etish, ichki audit xizmatini yoʻlga qoʻyish;

39) turizm, sport va moddiy madaniy meros obyektlarida zamonaviy sanitariya-gigiyena shoxobchalarini yaratish, turizm axborot markazlarini tashkil etish.

13. Vazirlikning markaziy apparati unga yuklangan asosiy vazifalarga muvofiq quyidagi funksiyalarni amalga oshiradi:

1) Vazirlik va uning rahbariyati faoliyatini tashkiliy va axborot-tahliliy jihatidan taʼminlaydi;

2) Vazirlikning tarkibiy, hududiy boʻlinmalari va idoraviy mansub tashkilotlari tomonidan Oʻzbekiston Respublikasining qonunlari, Oʻzbekiston Respublikasi Prezidentining farmonlari, qarorlari va farmoyishlari, Oʻzbekiston Respublikasi Vazirlar Mahkamasining qarorlari va farmoyishlari, shuningdek, Vazirlik hayʼati qarorlari, Vazirlikning buyruqlari va boshqa normativ-huquqiy hujjatlari bajarilishi ustidan muntazam nazoratni taʼminlaydi;

3) Vazirlik tomonidan Oʻzbekiston Respublikasi Prezidenti Administratsiyasiga va Vazirlar Mahkamasiga kiritiladigan hujjatlarning sifatli va oʻz vaqtida ishlab chiqilishini, ularning iqtisodiy, moliyaviy hamda huquqiy ekspertizadan oʻtkazilishini tashkil etadi;

4) Vazirlikning hududiy boʻlinmalari va idoraviy mansub tashkilotlariga rahbarlik qiladi, ular faoliyatini muvofiqlashtiradi va nazorat qiladi;

5) Vazirlikning faoliyati, shu jumladan, qonun ijodkorligi sohasidagi faoliyati huquqiy taʼminlanishini tashkil etadi;

6) Vazirlik vakolatiga tegishli operativ, tashkiliy, kadrlar, moliya, ishlab chiqarish-xoʻjalik masalalari va boshqa masalalar bilan shugʻullanadi;

7) Vazirlik va uning tarkibiy hamda hududiy boʻlinmalari faoliyati bilan bogʻliq prognoz koʻrsatkichlarga erishishning soʻzsiz taʼminlanishi boʻyicha amaliy choralarni ishlab chiqadi va amalga oshiradi;

8) Oʻzbekiston Respublikasi Prezidenti Administratsiyasi tarkibiy boʻlinmalari va Oʻzbekiston Respublikasi Vazirlar Mahkamasi, shuningdek, tegishli vazirliklar va idoralar bilan Vazirlik faoliyati sohasiga kiruvchi masalalar yuzasidan oʻzaro aloqalarning yoʻlga qoʻyilishini taʼminlaydi;

9) Vazirlikning tarkibiy va hududiy boʻlinmalari ishini tashkil etishning zamonaviy shakllari joriy etilishini taʼminlaydi;

10) Oʻzbekiston Milliy olimpiya qoʻmitasi va sport turlari boʻyicha federatsiyalar (uyushmalar) bilan birgalikda Oʻzbekiston sportchilarning Olimpiada va Paralimpiada oʻyinlari va boshqa yirik sport musobaqalariga tayyorlanishi hamda ularda ishtirok etishi boʻyicha qabul qilingan dasturlarning bajarilishini tashkil qiladi;

11) ilgʻor xorijiy tajribani eʼtiborga olgan holda respublikada turizm, professional sportni rivojlantirish, zamonaviy texnologiyalarni joriy qilish, turizm va sport turlari hamda madaniy meros boʻyicha milliy tadbirlar darajasi va sifatini oshirish, xalqaro va qitʼa miqyosidagi tadbirlarni tashkil etish boʻyicha tizimli choralarning qabul qilinishini, nosogʻlom sport raqobati hamda taqiqlangan substansiyalar va (yoki) taqiqlangan usullardan foydalanishga qarshi kurash boʻyicha tadbirlar oʻtkazilishini taʼminlaydi;

12) manfaatdor vazirliklar va idoralar bilan kelishgan holda sport, turizm va madaniy meros tashkilotlarining moddiy-texnika bazasini rivojlantirish hamda mustahkamlash, mahalliy korxonalar tomonidan sport asbob-uskunalari va inventarini ishlab chiqarish kengaytirilishini tashkil etish boʻyicha takliflarni tayyorlaydi;

13) turizm, sport va madaniy meros sohalaridagi federatsiyalar, uyushmalar va boshqa nodavlat notijorat tashkilotlarning murojaatlari asosida turizm, jismoniy tarbiya va sport hamda moddiy madaniy meros sohasidagi yagona tadbirlarning kalendar rejasida nazarda tutilgan, qonunchilikda belgilangan mablagʻlar hisobiga moliyalashtiriladigan tadbirlarda sohalar vakillari, jumladan, sport turlari boʻyicha xalqaro sport musobaqalari va jismoniy tarbiya-ommaviy tadbirlarda ishtirok etishini aniqlash boʻyicha takliflar tayyorlaydi;

14) respublika sportchilari tomonidan sport turlari boʻyicha oʻrnatilgan jahon rekordlarini tasdiqlash uchun xalqaro sport tashkilotlariga yuboriladigan tegishli hujjatlarni tayyorlaydi;

15) Vazirlikning samarali faoliyatini tashkil etish va takomillashtirish yuzasidan takliflar ishlab chiqadi;

16) turizm, jismoniy tarbiya, sport va moddiy madaniy meros sohalaridagi nodavlat notijorat tashkilotlar faoliyati monitoringini olib boradi va ular faoliyatini rivojlantirish boʻyicha takliflar tayyorlaydi;

17) turizm, jismoniy tarbiya va sportni rivojlantirish hamda moddiy madaniy meros obyektlarini saqlash boʻyicha monitoringni amalga oshiradi, ushbu sohalarni yanada rivojlantirish boʻyicha har yilgi prognozlarni shakllantiradi;

18) turizm, jismoniy tarbiya, sport va moddiy madaniy meros sohalarida isteʼdodli va istiqbolli kadrlarni tanlash, oʻqitish hamda malaka oshirishda muvaffaqiyatli ishtirok etishini, shuningdek, uzluksiz saralash tizimini yaxshilashni taʼminlaydi, sport zaxirasi va terma jamoalar tarkibini shakllantiradi;

19) Oʻzbekiston Milliy olimpiya qoʻmitasi, sport federatsiyalari va uyushmalari, turizm, jismoniy tarbiya, sport va madaniy meros sohalaridagi boshqa nodavlat notijorat tashkilotlar faoliyatini rivojlantirish chora-tadbirlarini ishlab chiqadi;

20) turizm, jismoniy tarbiya, sport va moddiy madaniy meros sohalaridagi xalqaro tashkilotlarga va boshqa tashkilotlarga aʼzolik badallari belgilangan tartibda toʻlanishini amalga oshiradi;

21) yuqori malakali kadrlar va ularning zaxirasi tayyorlanishini amalga oshirish, turizm, moddiy madaniy meros, sport-taʼlim muassasalari faoliyatini boshqarish hamda turizm, moddiy madaniy meros, jismoniy tarbiya va sport tashkilotlari faoliyatini muvofiqlashtirish chora-tadbirlarini tashkil qiladi;

22) Oʻzbekiston Respublikasining sport turlari boʻyicha terma jamoalari va ularning eng yaqin zaxirasi tarkibini tasdiqlaydi, Oʻzbekiston sport delegatsiyalarini butlaydi, ularning xalqaro sport musobaqalari va jismoniy tarbiya-ommaviy tadbirlarga tayyorlanishini hamda ishtirok etishini taʼminlaydi;

23) Oʻzbekiston Respublikasi Davlat budjeti va homiylik mablagʻlari hisobiga xalqaro musobaqalar va jismoniy tarbiya-ommaviy tadbirlarda Oʻzbekiston Respublikasi terma jamoalarining ishtirokini taʼminlash boʻyicha sport federatsiyalari (uyushma)ning iltimoslarini koʻrib chiqadi;

24) Oʻzbekiston hududida va uning tashqarisida konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarni tashkil etish hamda oʻtkazish boʻyicha ishlarni amalga oshiradi;

25) umumtaʼlim maktablari va akademik litsey, kasb-hunar maktabi, kollej va texnikumlar oʻquvchilari oʻrtasida oʻtkaziladigan tadbirlarning ommaviy axborot vositalarida muntazam ravishda va keng yoritilishi boʻyicha ishlarni amalga oshiradi;

26) turizm, jismoniy tarbiya, sport va moddiy madaniy meros sohalarida zarur maʼlumotlarni yagona tizim orqali yigʻish maqsadida manfaatdor idoralarning tizim va maʼlumotlar bazalari bilan integratsiya qilish, shuningdek, ushbu tizim toʻliq ishlashini taʼminlash uchun maʼlumotlarni raqamlashtirish choralarini koʻradi;

27) Vazirlik oldida turgan vazifalarni hal etishni taʼminlash, mavjud talablar va ehtiyojlarni qanoatlantirish, shuningdek, davlat xaridlari uchun ajratilgan mablagʻlardan samarali foydalanish, shu jumladan, tovarlarni (ishlarni, xizmatlarni) olishdan koʻrilgan naf, ularning sifati va qiymati oʻrtasidagi maqbul nisbatni (foydalanish davri xarajatlarini hisobga olgan holda) taʼminlash, davlat xaridlarini maqbul muddatlarda oʻtkazish imkonini beradigan oqilona va tejamkor usulda amalga oshiradi;

28) turizm zonalari va klasterlari tashkil etish va ularda turizm sohasi subyektlari faoliyatini amalga oshirish tartibini belgilash, turizm zonalari va klasterlarining rivojlanishini ragʻbatlantirish choralarini koʻradi;

29) turizm bozorining turli segmentlariga yoʻnaltirilgan turizm mahsuloti va xizmatlarini diversifikatsiya qilish boʻyicha takliflar tayyorlaydi;

30) sohalarni bozor mexanizmlari asosida boshqarish boʻyicha samaradorlikka erishish, monetizatsiya tamoyillarini yoʻlga qoʻyish va sport lotereyalari tashkil etish choralarini koʻradi;

31) jismoniy tarbiya va sport sohasini yanada rivojlantirish, uning investitsiyaviy jozibadorligini oshirish, qoʻshimcha mablagʻlarni jalb qilish, Oʻzbekiston Respublikasida bukmekerlik faoliyatini amalga oshirish choralarini koʻradi;

32) milliy va noolimpiya sport turlari faoliyati monitoringini olib boradi va ularni rivojlantiradi;

33) aholining barcha qatlamlari oʻrtasida jismoniy tayyorgarlik darajasi sinovlarini joriy etadi va oʻtkazadi, aholi va yoshlar oʻrtasida bu borada olib borilayotgan ishlar samaradorligini muhokama etib boradi;

34) turizm, jismoniy tarbiya va sport sohasini raqobat toʻgʻrisidagi qonunchilik hujjatlari talablariga muvofiqligini taʼminlash, ularning buzilish xavfini aniqlash va oldini olish boʻyicha komplaens nazorat tizimini joriy etadi, ichki audit xizmatini yoʻlga qoʻyadi;

35) turizm, sport va moddiy madaniy meros obyektlarida zamonaviy sanitariya-gigiyena shoxobchalarini yaratish, turizm axborot markazlarini tashkil etish choralarini koʻradi.

14. Quyidagilar hududiy bosh boshqarmalarning asosiy vazifalari va funksiyalari hisoblanadi:

turizm, jismoniy tarbiya va sportning rivojlanishi holati monitoringini olib boradi, ularni hududda yanada rivojlantirish boʻyicha har yillik prognozlarni shakllantiradi;

hududda vazirliklar, idoralarning hududiy boʻlinmalari hamda boshqa tashkilotlarning turizm, jismoniy tarbiya va sport sohalaridagi ishini muvofiqlashtiradi;

hududda turizm, jismoniy tarbiya va sport sohalariga tegishli boʻlgan dasturiy-metodik hamda belgilangan tartibda tasdiqlangan boshqa normativ-huquqiy hujjatlarning ijrosini taʼminlaydi;

turizm, jismoniy tarbiya va sport sohalarida ilmiy tadqiqotlarni rivojlantirishga, shuningdek, ilmiy tadqiqotlar natijalarini amaliyotga joriy etadi va ushbu ishlar hududda oʻtkazilishini muvofiqlashtiradi;

hududdagi turizm, jismoniy tarbiya va sport namoyandalarini, jumladan, turizm va sport faxriylari, sportchilar, trenerlar va boshqa mutaxassislarni davlat boshqaruvining boshqa hududiy organlari bilan birgalikda ijtimoiy muhofaza qilish masalalarini hal etadi;

hududda turizm va sport turlarini rivojlantirish istiqbollarini belgilaydi;

mahalliy davlat hokimiyati organlari, fuqarolarning oʻzini oʻzi boshqarish organlari, ommaviy axborot vositalari bilan birgalikda turizm, jismoniy tarbiya va sport sohalarini ommalashtirish ishlarini tashkil qiladi;

xalqaro va respublika darajalaridagi ommaviy sport tadbirlarining yagona kalendarini shakllantiradi va ushbu tadbirlarning hududiy bosqichlarini oʻtkazadi;

tegishli ravishda Qoraqalpogʻiston Respublikasi Joʻqorgʻi Kengesi Raisi, viloyatlar va Toshkent shahar, tuman (shahar) hokimlari, prokuratura, ichki ishlar va davlat soliq xizmati hududiy organlari rahbarlari boshchilik qiladigan kompleks ijtimoiy-iqtisodiy rivojlantirish sektorlari bilan oʻzaro hamkorlik qiladi;

jahon ilmiy-texnik taraqqiyoti yutuqlari, xorijiy mamlakatlarning ilgʻor tajribasi umumlashtirilishini hamda bu yutuqlarning hududda joriy qilinishini taʼminlaydi;

hududda konferensiyalar, koʻrgazmalar va tadbirlarni oʻtkazadi;

turizm, jismoniy tarbiya va sport sohalariga tegishli nodavlat notijorat tashkilotlar faoliyati rivojlanishiga yordam beradi;

kadrlarni milliy va umuminsoniy qadriyatlar, insonparvarlik, yuksak maʼnaviyat va professionalizm ruhida tayyorlash boʻyicha ishlarni tashkil etadi, hududda aholining oʻz jismoniy, umumtaʼlim va madaniy darajasini oshirishga boʻlgan intilishlarini ragʻbatlantirish ishlarini olib boradi;

hududda ilmiy, oʻquv, ilmiy-ommabop va ommaviy adabiyotlar ishlab chiqilishi va nashr etilishini, shuningdek, jismoniy tarbiya va sport sohasidagi foto va video materiallar ishlab chiqarilishini tashkil qiladi;

xalqaro aloqalarni amalga oshirish va rivojlantirish, hamkorlik boʻyicha xalqaro loyihalarni ishlab chiqishda ishtirok etadi, sohaga xorijiy investitsiyalar hamda grantlarni jalb qilishda qatnashadi;

respublika va xorijiy mamlakatlarning taniqli sport namoyandalari, yetakchi pedagog mutaxassislarini hududning sport taʼlim muassasalarida taʼlim berish va mahorat darslarini oʻtkazish uchun taklif etadi;

tegishli hududda turizm, jismoniy tarbiya va sportni rivojlantirish toʻgʻrisidagi axborotni toʻplash va tahlil qilishni amalga oshiradi va uni Vazirlikka, mahalliy davlat hokimiyati organlariga taqdim etadi;

tegishli hududda turizm salohiyatini oshirishga qaratilgan qisqa, oʻrta va uzoq muddatga moʻljallangan yaxlit konsepsiya amalga oshirilishini taʼminlaydi;

turizm resurslarini saqlash va rivojlantirish yuzasidan mahalliy davlat hokimiyati organlari bilan hamkorlik qiladi;

tegishli hududda turizm faoliyati rivojlanilishini taʼminlaydi, yangi turizm yoʻnalishlarini tashkil etishga koʻmaklashadi;

turizm sohasi subyektlariga ularning faoliyatini tashkil etish bilan bogʻliq masalalarda metodik va maslahat yordamini koʻrsatadi;

tegishli hududda harakatlanish vaqtida turistlar va ekskursantlarning turistik resurslarga moneliksiz kirishini taʼminlashga koʻmaklashadi;

turizm salohiyatini rivojlantirish, turizmni rivojlantirishga toʻsqinlik qilayotgan gʻovlarni bartaraf etish, shuningdek turizm sohasida tadbirkorlik faoliyatini ragʻbatlantirish boʻyicha takliflar ishlab chiqadi;

turizm bozorlarida tegishli hududning turizm salohiyati targʻib qilinishini tashkil etish, tegishli hududning turizm jozibadorligini saqlab qolish choralarini koʻradi;

hududda aholining keng qatlamlarini sport mashgʻulotlariga jalb qilishga va sogʻlom turmush tarziga rioya etishga, jismonan sogʻlom oʻsib kelayotgan yosh avlodni tarbiyalashga, turizm, jismoniy tarbiya va sport industriyasi va infratuzilmasini rivojlantirishga, mamlakat va mintaqaning xalqaro maydonlarda sport sohasida erishgan yutuqlarini ommalashtirish va keng eʼtirof etishga yoʻnaltirilgan faoliyatni amalga oshiradi;

hududda bolalar, ayniqsa, qizlarni sportga keng jalb qilish, bolalar sport taʼlimi sifatini oshirish, butun hududda, shu jumladan, qishloq hamda chekka tumanlarda bolalar sport obyektlari tarmogʻini yanada kengaytirish, uch bosqichli musobaqalar tizimi — “Umid nihollari”, “Barkamol avlod” va “Universiada” oʻyinlarining oʻtkazilishini tashkil etish orqali bolalar sportini yanada rivojlantirish choralarini koʻradi;

Oʻzbekiston Milliy olimpiya qoʻmitasi, sport turlari boʻyicha federatsiyalar (uyushmalar) vakillari bilan birgalikda sifatli sport zaxirasini va Olimpiya, Paralimpiya va Osiyo oʻyinlari, jahon va Osiyo chempionatlari hamda boshqa nufuzli xalqaro musobaqalar va turnirlarda muvaffaqiyatli ishtirok etishni taʼminlash uchun mamlakat terma jamoalari tarkibini shakllantirish maqsadida iqtidorli va istiqbolli sportchilarni saralash, tayyorlash hamda mahoratini oshirishning uzluksiz tizimini takomillashtirish chora-tadbirlarini amalga oshiradi;

ixtisoslashtirilgan bolalar-oʻsmirlar sport maktablari va Olimpiya zaxiralari kollejlari faoliyatini tashkil etish hamda ularni hududiy musobaqalar sovrindorlari boʻlgan sportchilar bilan toʻldirish choralarini koʻradi;

sport turlari boʻyicha hududiy terma jamoalarni shakllantiradi, sport musobaqalari gʻoliblari va sovrindorlarini respublika bosqichlarida ishtirok etishga yoʻnaltiradi;

hududda professional sportning rivojlanishini, xalqaro ilgʻor tajribani inobatga olgan holda sport tayyorgarligi jarayoniga zamonaviy texnologiyalar joriy qilinishini ragʻbatlantirish, sport turlari boʻyicha mintaqaviy, tuman (shahar) chempionatlari, xalqaro va hududiy musobaqalarni tashkil etish darajasi va sifatini oshirish boʻyicha, sportda nosogʻlom raqobatga va taqiqlangan preparatlar qoʻllanishiga qarshi tizimli chora-tadbirlarni amalga oshiradi;

turizm, jismoniy tarbiya, sport va moddiy madaniy meros sohalarida kadrlar tayyorlash, qayta tayyorlash hamda ularning malakasini oshirish boʻyicha belgilangan tadbirlarda hamda hududning taʼlim muassasalarini yuqori malakali kadrlar, trenerlar va boshqa mutaxassislar bilan taʼminlashda ishtirok etadi;

hududda turizm, jismoniy tarbiya va sport sohalaridagi dasturlarni tashkil qilish, ommaviy adabiyotlarni chop etishga hamda ushbu sohalarda mavjud video va kino materiallar ishlab chiqilishiga yordam koʻrsatadi va ishtirok etadi;

aholi keng qatlamlari orasida sport va jismoniy tarbiya-ommaviy tadbirlarni tashkil etish va oʻtkazishga yordam beradi;

milliy sport turlari va Oʻzbekiston xalq oʻyinlarini rivojlantirishga har tomonlama yordam koʻrsatadi, belgilangan tartibda hududda milliy sport turlari boʻyicha sport musobaqalari, xalq oʻyinlari boʻyicha jismoniy tarbiya-ommaviy tadbirlarni tashkil etish va oʻtkazish ishlari moliyalashtirilishini taʼminlaydi, shuningdek, xalqaro sport maydonlarida milliy sport turlarini keng targʻib qilish va rivojlantirishga yordam beradi;

hududda bolalar sportining moddiy-texnika va resurslar bazasini rivojlantirish chora-tadbirlarini amalga oshiradi;

hududning iqtidorli yoshlari va sport faxriylarining xalqaro va respublika miqyosida oʻtkaziladigan koʻrik-tanlovlar, festivallar, boshqa forumlar, sport tadbirlariga borishlari va ishtirok etishlarini tashkil etishni taʼminlaydi;

sport turlari boʻyicha hudud terma jamoalari va ularning yaqin zaxirasi tarkiblarini tasdiqlaydi, hudud sport delegatsiyasini butlaydi, ularning respublika sport musobaqalari va jismoniy tarbiya-ommaviy tadbirlarga tayyorgarlik koʻrishlarini hamda ularda ishtirok etishlarini taʼminlaydi;

mahalliy davlat hokimiyati organlari, sport turlari boʻyicha federatsiyalar va uyushmalarning mintaqaviy vakillari bilan birgalikda hududda professional sportni tashkil etish hamda toʻla shakllantirish boʻyicha takliflar kiritadi;

hududda yuqori malakali sportchilar va sport zaxirasini tayyorlash ishlarini olib boradi, idoraviy boʻysunishi va mulkchilik shakllaridan qatʼi nazar, hududdagi sport maktablari, klublar va sport tayyorgarligi markazlarining rivojlanishi hamda ixtisoslashishini muvofiqlashtiradi;

jismoniy tarbiya va sport sohasida oʻrnak koʻrsatgan xodimlarni hamda hududda jismoniy tarbiya va sportni rivojlantirishga koʻmaklashgan boshqa shaxslarni idoraviy koʻkrak belgilari bilan mukofotlash haqida takliflar tayyorlaydi va belgilangan tartibda Vazirlikka taqdim etadi;

hudud vakillarining jismoniy tarbiya va sport sohasida erishgan ulkan yutuqlari uchun sport unvonlari, sport razryadlari va malaka toifalari berish hamda mukofotlash va Oʻzbekiston Respublikasining faxriy unvonlarini berish toʻgʻrisidagi takliflarni ishlab chiqadi va belgilangan tartibda kiritadi;

hududdagi sportchilar va sport turlari boʻyicha terma jamoalar aʼzolarini sport inventari, asbob-uskunalar, shuningdek, kiyim-bosh va anjomlar bilan taʼminlaydi;

hududda jismoniy tarbiya-sogʻlomlashtirish va sportga moʻljallangan tovarlarni ishlab chiqarishni tashkil etishda yordam koʻrsatadi;

hududda yangi jismoniy tarbiya-sogʻlomlashtirish va sport inshootlarining qurilishini tashkil etish va faoliyat yuritayotganlarini rekonstruksiya qilish boʻyicha Vazirlikka asoslangan takliflar kiritadi;

mahalliy davlat hokimiyati organlari bilan birgalikda hududdagi jismoniy tarbiya-sogʻlomlashtirish va sport inshootlaridan maqsadli foydalanish ustidan nazorat qilinishini taʼminlaydi, respublika jismoniy tarbiya-sogʻlomlashtirish va sport inshootlarining zarur hujjatlarini tayyorlaydi hamda ularga pasportlarni rasmiylashtirish va berish uchun belgilangan tartibda yuboradi;

hududning iqtidorli yoshlariga sport sohasida yordam koʻrsatadi;

xalqaro va xorijiy tashkilotlar bilan hamkorlikni rivojlantirish, jumladan, moliyaviy institutlarning grantlari, kreditlari va homiylik xayriyalarini jalb etish choralarini koʻradi.

15. Turizm va sport vazirligining tumanlar (shaharlar)dagi boʻlimlarining asosiy vazifalari va funksiyalari quyidagilardan iborat:

Vazirlikka yuklangan vazifalar va funksiyalarni tegishli tuman (shahar)da samarali bajarish choralarini koʻradi;

turizm resurslarini saqlash va rivojlantirish yuzasidan mahalliy davlat hokimiyati organlari bilan hamkorlik qiladi;

turizm faoliyati rivojlanilishini taʼminlaydi, yangi turizm yoʻnalishlarini tashkil etishga koʻmaklashadi;

joylarda turizm va sport turlarini rivojlantirish istiqbollarini belgilaydi;

tegishli nodavlat notijorat tashkilotlar faoliyati rivojlanishiga yordam beradi;

tumanlar (shaharlar)ni kompleks ijtimoiy-iqtisodiy rivojlantirish boʻyicha sektorlar bilan oʻzaro hamkorlik qiladi;

fuqarolarning oʻzini oʻzi boshqarish organlari va nodavlat notijorat tashkilotlarga oʻz vakolatlari doirasida amaliy yordam koʻrsatadi;

tumanlar (shaharlar)ning turizm va sport yoʻnalishidagi resurslardan oqilona foydalanish choralarini koʻradi;

joylarda sohaga oid tadbirlarni samarali tashkil etish boʻyicha chora-tadbirlarni amalga oshiradi;

shahar va tuman miqyosida sohaga oid resurslar toʻgʻrisida maʼlumotlar bazasini yuritadi;

turizm, jismoniy tarbiya, sport va moddiy madaniy meros sohalarida targʻibot ishlarini olib boradi;

turizm, jismoniy tarbiya, sport va moddiy madaniy merosni rivojlantirish toʻgʻrisidagi axborotni toʻplash va tahlil qilishni amalga oshiradi va uni hududiy bosh boshqarmalarga, mahalliy davlat hokimiyati organlariga taqdim etadi;

fuqarolarning oʻzini oʻzi boshqarish organlari va nodavlat notijorat tashkilotlar bilan birgalikda mahalliy ommaviy axborot vositalarini jalb qilgan holda amalga oshirilayotgan islohotlardan xabardorlikni oshirish tadbirlarini tashkil etadi;

qonunchilikda belgilangan tartibda jismoniy va yuridik shaxslarga axborot va maslahatlar beradi;

keng jamoatchilik hamda tadbirkorlik subyektlarini jalb etgan holda sohani rivojlantirishga qaratilgan dasturlar va tadbirlarini amalga oshiradi;

joylarda harakatlanish vaqtida turistlar va ekskursantlarning turizm resurslariga moneliksiz kirishini taʼminlashga koʻmaklashadi;

sifatli sport zaxirasini va Olimpiya, Paralimpiya va Osiyo oʻyinlari, jahon va Osiyo chempionatlari hamda boshqa nufuzli xalqaro musobaqalar va turnirlarda muvaffaqiyatli ishtirok etishni taʼminlash uchun mamlakat terma jamoalari tarkibini shakllantirish maqsadida iqtidorli va istiqbolli sportchilarni saralash chora-tadbirlarini amalga oshiradi, aholining ushbu musobaqalarda ishtirok etishi choralarini koʻradi;

aholi keng qatlamlari orasida sport va jismoniy tarbiya-ommaviy tadbirlarni tashkil etish va oʻtkazishga yordam beradi.

16. Vazirlikning tumanlar (shaharlar)dagi boʻlimlari qonunchilikka hamda Vazirlik rahbariyatining qonunchilik doirasidagi topshiriqlariga muvofiq boshqa funksiyalarni ham amalga oshiradi.

17. Vazirlik oʻziga yuklangan vazifalar va funksiyalarni amalga oshirish uchun quyidagi huquqlarga ega:

1) normativ-huquqiy hujjatlar loyihalarini, shuningdek, Vazirlikka yuklangan vazifalar va funksiyalarni bajarish bilan bogʻliq boʻlgan boshqa hujjatlarni belgilangan tartibda Oʻzbekiston Respublikasi Prezidenti Administratsiyasiga yoki Vazirlar Mahkamasiga kiritish;

2) Vazirlik vakolatiga kiradigan masalalarda davlat va xoʻjalik boshqaruvi organlari, mahalliy davlat hokimiyati organlari faoliyatini belgilangan tartibda muvofiqlashtirish;

3) Vazirlik vakolatiga kiruvchi masalalarni hal qilish uchun zarur axborotni davlat va xoʻjalik boshqaruvi organlari, mahalliy davlat hokimiyati organlaridan belgilangan tartibda soʻrash va olish;

4) Vazirlik vakolatiga kiradigan masalalar boʻyicha zarur statistika axborotini davlat statistika organlaridan bepul olish;

5) Vazirlik va unga idoraviy mansub tuzilmalarning davlat mol-mulkini tashkiliy tuzilma doirasida bepul foydalanish huquqi bilan belgilangan tartibda bir boʻlinmadan ikkinchisiga berish;

6) Vazirlik va unga idoraviy mansub tashkilotlar xodimlarini ular tomonidan tegishli sohada ular faoliyatining asosiy koʻrsatkichlari parametrlari bajarilishini hisobga olgan holda moddiy ragʻbatlantirish tartibi, miqdorlari va shartlarini belgilash;

7) Vazirlik vakolatiga kiruvchi masalalar boʻyicha takliflarni koʻrib chiqish uchun Oʻzbekiston Respublikasi Vazirlar Mahkamasiga, davlat va xoʻjalik boshqaruvi organlariga, mahalliy davlat hokimiyati organlariga kiritish;

8) Vazirlik vakolatiga kiruvchi masalalar boʻyicha idoralararo tusdagi xalqaro shartnomalarni belgilangan tartibda tuzish;

9) Vazirlik vakolatiga tegishli boʻlgan masalalar boʻyicha xalqaro darajada Oʻzbekiston Respublikasi manfaatlarini belgilangan tartibda ifodalash;

10) turizm, jismoniy tarbiya, sport va moddiy madaniy merosni, jumladan, turizm, moddiy madaniy meros sport infratuzilmasini rivojlantirish va ommalashtirish uchun shart-sharoitlar yaratishda yoʻl qoʻyilayotgan kamchiliklarni bartaraf qilish toʻgʻrisida koʻrib chiqilishi majburiy boʻlgan taqdimnomalarni davlat va xoʻjalik boshqaruvi organlari, mahalliy davlat hokimiyati organlariga yuborish;

11) turizm, jismoniy tarbiya, sport va moddiy madaniy meros sohalarini mamlakatda, shu jumladan, hududlarda rivojlantirish boʻyicha ishlar va loyihalarni moliyalashtirishga oid davlat va xoʻjalik boshqaruvi organlari, mahalliy davlat hokimiyati organlarining xarajatlar smetalarini koʻrib chiqish va kelishishda ishtirok etish;

12) maslahatlar berish, ilmiy va ekspertlik ishlarini oʻtkazish, turizm, jismoniy tarbiya va sport, moddiy madaniy meros sohasining dolzarb masalalarini ishlab chiqish uchun shartnoma asosida olimlarni, vazirliklar, idoralar, taʼlim muassasalari va boshqa tashkilotlarning yuqori malakali mutaxassislarini, shuningdek, Vazirlik tizimiga kiruvchi taʼlim muassasalarida dars berish va mahorat darslari oʻtkazish uchun xorijiy malakali mutaxassislarni shartnoma asosida taklif qilish;

13) turizm, jismoniy tarbiya, sport va moddiy madaniy meros sohalaridagi tadbirlar oʻtkazilishini belgilangan tartibda tashkil etish;

14) Vazirlik tizimiga kiruvchi tashkilotlari va taʼlim muassasalari, shuningdek, nodavlat notijorat tashkilotlar uchun zarur texnik uskuna, inventar, kiyim-bosh va boshqa zarur jihozlarni markazlashtirilgan tartibda xarid qilish;

15) turizm, jismoniy tarbiya, sport va moddiy madaniy meros sohalaridagi xalqaro va respublika tadbirlarini oʻtkazishda gʻolib va sovrindorlarni, nominantlarni mukofotlash uchun zarur miqdorda medallar, diplomlar, kuboklar va sovrinlarni markazlashtirilgan tartibda xarid qilish;

16) turizm, jismoniy tarbiya va sport, madaniy meros sohalari vakillari, ularning jamoalariga unvonlar va malaka toifalarini berish, kuboklar, medallar, znachoklar, koʻkrak nishonlari, diplomlar, yorliqlar va sovrinlar bilan mukofotlash;

17) jismoniy tarbiya-sogʻlomlashtirish, sport va jismoniy tarbiya-ommaviy tadbirlarni oʻtkazish, turli tanlovlar, sport musobaqalari va shu kabilarda jismoniy tarbiya va sport namoyandalarini tayyorlash va ishtirok etishi uchun Vazirlik mablagʻlarini ajratish;

18) oʻz vakolati doirasida konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarni oʻtkazish, shuningdek, boshqa tashkilotlar tomonidan oʻtkaziladigan shu kabi tadbirlarda ishtirok etish;

19) turizm, jismoniy tarbiya, sport va moddiy madaniy meros sohalarini rivojlantirishga qaratilgan tadbirlarni birgalikda ishlab chiqish maqsadida xalqaro, xorijiy va respublika tashkilotlari bilan belgilangan tartibda aloqalarni yoʻlga qoʻyish;

20) turizm, jismoniy tarbiya, sport va moddiy madaniy meros sohalarini targʻib qiluvchi reklama va boshqa tusdagi mahsulotlarni (audio, video materiallar, risola, xaritalar va boshqa reklama-axborot materiallarini) chop etish, nusxasini koʻpaytirish, yaratish choralarini koʻrish;

21) Oʻzbekiston Respublikasi Vazirlar Mahkamasi va (yoki) Oʻzbekiston Respublikasi Prezidenti Administratsiyasi bilan kelishgan holda Vazirlikning markaziy apparati va idoraviy mansub boʻlinmalarida ishlash uchun yetakchi xorijiy mutaxassislarni shartnomalar asosda jalb qilish;

22) turizm sohasida viza rejimini takomillashtirish va soddalashtirishga doir takliflar ishlab chiqish;

23) turizmning rivojlantirilishini muvofiqlashtirish, yangi turizm yoʻnalishlari tashkil etilishini taʼminlash, ularni pasportlashtirishdan oʻtkazish;

24) turizm sohasidagi yagona reyestrlarni yuritish tartibini belgilash;

25) turizm faoliyatini litsenziyalashni, turizm sohasidagi xizmatlarni sertifikatlashni, turizm xizmatlari belgilangan talablar va standartlarga muvofiqligi ustidan nazoratni amalga oshirish;

26) joylashtirish vositalari, togʻ changʻi trassalari va plyajlar tasnifini belgilash;

27) turizm sohasidagi milliy tanitish belgisidan foydalanish tartibini belgilash;

28) jismoniy tarbiya va sport sohalarida tadbirkorlik, trenerlik va boshqa faoliyat bilan shugʻullanishga litsenziya, sertifikat, ruxsatnomalarni va jismoniy tarbiya-sogʻlomlashtirish va sport inshootlarining pasportlarini belgilangan tartibda berish, amal qilishini toʻxtatib turish va toʻxtatish, zarur holatlarda ruxsatnomalarni bekor qilish;

29) alohida fidokorlik, mehnatsevarlikni namoyon qilgan, oʻzining professional faoliyatida yuksak natijalarga erishgan turizm, jismoniy tarbiya, sport va moddiy madaniy meros sohalaridagi namoyandalar va xodimlarning nomzodlarini belgilangan tartibda davlat mukofotlariga taqdim etish;

Vazirlik qonunchilikka muvofiq boshqa huquqlarga ham ega boʻlishi mumkin.

18. Vazirlik:

1) unga yuklangan vazifalar va funksiyalarning samarali bajarilishi, shuningdek, turizm, jismoniy tarbiya, sport va moddiy madaniy meros sohalarida yagona davlat siyosati samarali amalga oshirilishi;

2) oʻz faoliyati bilan bogʻliq prognoz koʻrsatkichlarga soʻzsiz erishilishini taʼminlash;

3) Oʻzbekiston Respublikasi Vazirlar Mahkamasiga va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlarning ishlab chiqiladigan loyihalari, shuningdek, Vazirlik tomonidan qabul qilinadigan buyruqlarni oʻz muddatlarida va sifatli tayyorlash;

4) turizm, jismoniy tarbiya, sport va moddiy madaniy meros sohalarini rivojlantirish, shuningdek, ushbu sohalarda hududlarni ijtimoiy-iqtisodiy rivojlantirish va muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarni samarali amalga oshirish uchun javob beradi.

19. Vazirlikning markaziy apparati oʻziga yuklangan vazifalar va funksiyalarni amalga oshirish uchun quyidagi huquqlarga ega:

1) Vazirlikning hududiy boʻlinmalaridan va unga idoraviy mansub tashkilotlardan tahlil qilish va qayta ishlash uchun zarur boʻlgan masalalar boʻyicha materiallar va maʼlumotlarni, shuningdek, Vazirlikning markaziy apparatida koʻrib chiqiladigan normativ-huquqiy hujjatlar va boshqa hujjatlar loyihalarini soʻrash va olish;

2) Vazirlikda koʻrib chiqiladigan masalalarni ishlab chiqish, axborot va tahliliy materiallarni, shuningdek, normativ-huquqiy hujjatlar va boshqa hujjatlar loyihalarini tayyorlash uchun zarur boʻlganda Vazirlikning hududiy boʻlinmalari va unga idoraviy mansub tashkilotlar rahbarlari hamda vakillarini belgilangan tartibda jalb qilish, shu maqsadda ekspert va ishchi guruhlar tashkil etish;

3) Vazirlikning hududiy boʻlinmalari va idoraviy mansub tashkilotlardan ular tomonidan kiritilgan normativ-huquqiy hujjatlar va boshqa hujjatlar loyihalarini puxta ishlashni talab qilish, zarurat boʻlganda ularni qayta ishlash uchun qaytarish;

4) Vazirlikning hududiy boʻlinmalari va idoraviy mansub tashkilotlar rahbarlari hamda vakillari ishtirokida yigʻilishlar oʻtkazish;

5) Vazirlikning hududiy boʻlinmalari va idoraviy mansub tashkilotlar rahbarlariga tezlikda hal qilinishi talab etiladigan va Vazirlikka yuklangan vazifalar hamda funksiyalarni bajarish bilan bogʻliq masalalar yuzasidan topshiriqlar berish;

6) qabul qilingan normativ-huquqiy hujjatlar, Oʻzbekiston Respublikasi Prezidenti va Vazirlar Mahkamasining topshiriqlari, shuningdek, Vazirlik buyruqlarining Vazirlikning hududiy boʻlinmalari va idoraviy mansub tashkilotlari tomonidan bajarilishi yuzasidan ularning faoliyatini belgilangan tartibda oʻrganish va tekshirish;

7) Vazirlikning xalqaro va respublika darajalaridagi ommaviy tadbirlarining kalendar rejasini shakllantirish;

8) Vazirlik markaziy apparatining boshqarmalari va xodimlarining faoliyatini tasdiqlangan lavozim yoʻriqnomalariga muvofiq tashkil etish;

9) Vazirlikning tarkibiy tashkilotlari va muassasalaridagi boshqarmalarning faoliyatiga doir masalalar oʻrganilishini tashkil qilish boʻyicha takliflarni ishlab chiqish, shuningdek, ularga amaliy yordam koʻrsatish;

10) amaldagi normativ-huquqiy hujjatlarning talablariga muvofiq Vazirlik tizimida buxgalteriya hisobi yuritilishi tashkil etilishini taʼminlash, shuningdek, zamonaviy texnika vositalari va axborot texnologiyalaridan foydalangan holda tizimga kiruvchi tashkilotlarda buxgalteriya hisobi yuritilishini nazorat qilish;

11) budjet va budjetdan tashqari mablagʻlarni xarajatlar smetasiga kiritilgan aniq vazifalarga maqsadli sarflash, shuningdek, pul mablagʻlari va moddiy boyliklarning saqlanishi ustidan muntazam nazoratni amalga oshirish;

12) asosiy vositalar va boshqa moddiy boyliklarni ular saqlanadigan joylarda mavjudligini va ulardan foydalanishni muntazam nazorat qilish;

13) hududiy boʻlinmalar va idoraviy mansub tashkilotlarga yuklangan vazifalar amalga oshirilishini sifatli oʻrganish va monitoring olib borishni tashkil etish maqsadida komissiyalar, ishchi va ekspert guruhlar tuzish;

14) ilmiy va ekspertlik ishlari olib borish, maslahat berish, turizm, jismoniy tarbiya, sport va moddiy madaniy meros sohalaridagi dolzarb masalalarni ishlab chiqish uchun olimlarni, vazirliklar, maʼmuriy, taʼlim muassasalari va boshqa muassasalarning yuqori malakali mutaxassislarini taklif etish, shuningdek, Vazirlik tizimiga kiruvchi taʼlim muassasalarida dars berish va mahorat darslari oʻtkazish uchun xorijiy sport mutaxassislarini taklif etish;

15) turizm, jismoniy tarbiya, sport va moddiy madaniy meros sohalarida ommaviy tadbirlar oʻtkazilishini belgilangan tartibda tashkil etish;

16) idoraviy mansub tashkilotlar uchun zarur uskunalar, inventar, forma va boshqa zarur jihozlarni xarid qilish;

17) turizm, jismoniy tarbiya, sport va moddiy madaniy meros sohalarida tanlovlar gʻolib va sovrindorlarini mukofotlash uchun zarur miqdorda medallar, diplomlar, kuboklar va sovrinlarni xarid qilish;

18) turizm, jismoniy tarbiya, sport va moddiy madaniy meros sohalari vakillari va boshqa mutaxassislarni mukofotlash, ularga unvonlar va malaka toifalarini berish boʻyicha takliflarni belgilangan tartibda kiritish;

19) Vazirlik tizimida korrupsiyaga qarshi ichki nazorat (“komplaens-nazorat”)ni hamda ichki audit tizimi hamda “Sport va turizm xizmatlarini sertifikatlash markazi” davlat unitar korxonasi huzurida Vazirlikning komplaens nazorati va ichki audit xizmatiga boʻysunadigan inspeksiya faoliyatini samarali yoʻlga qoʻyish;

20) turizm, jismoniy tarbiya, sport va moddiy madaniy meros sohalaridagi tadbirlar, tanlovlar, jumladan, idoraviy mansub tashkilotlarda oʻtkaziladigan turli tanlovlar, bellashuvlar va boshqa tadbirlarga tayyorgarlik koʻrish va ishtirok etishini moliyalashtirish.

Vazirlikning markaziy apparati qonunchilikka muvofiq boshqa huquqlarga ham ega boʻlishi mumkin.

20. Vazirlikning markaziy apparati:

1) Vazirlikning tarkibiy va hududiy boʻlinmalari, shuningdek, idoraviy mansub tashkilotlar bilan birgalikda Vazirlikka yuklangan vazifalar va funksiyalar sifatli va oʻz vaqtida bajarilishini taʼminlash;

2) Vazirlik faoliyati bilan bogʻliq prognoz koʻrsatkichlarga erishishni taʼminlash boʻyicha Vazirlik markaziy apparati boʻlinmalarining ishini tashkil etish;

3) Vazirlik tomonidan koʻrib chiqish uchun Oʻzbekiston Respublikasi Vazirlar Mahkamasi va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalari, shuningdek, Vazirlik tomonidan qabul qilinadigan buyruqlarning oʻz vaqtida va sifatli tayyorlanishi;

4) turizm, jismoniy tarbiya, sport va moddiy madaniy meros sohalarini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlar tarkibiy va hududiy boʻlinmalar tomonidan amalga oshirilishini tashkil etish;

5) Vazirlik tizimida korrupsiyaga qarshi ichki nazoratni hamda ichki auditni amalga oshirishda qonun bilan belgilangan tartibda javob beradi.

21. Vazirlikning Komplayens nazorat va ichki audit xizmatining (keyingi oʻrinlarda — Xizmat) maqomi:

1) Xizmat Vazirlikning tarkibiy boʻlinmasi boʻlib, ichki nazorat tizimini doimiy monitoring qiluvchi qism hisoblanadi hamda toʻgʻridan-toʻgʻri Vazirga boʻysunadi va uning oldida hisobot beradi;

2) Xizmat komplaens nazorat, ichki audit va qisqa muddatli monitoringlarni oʻtkazish, shuningdek oʻtkazilgan ichki audit va qisqa muddatli monitoring natijalari toʻgʻrisida hisobotlar tayyorlashda mustaqildir;

3) Xizmat Vazirlik huzuridagi “Sport va turizm xizmatlarini sertifikatlash markazi” davlat unitar korxonasi huzuridagi inspeksiya (keyingi oʻrinlarda — Inspeksiya) faoliyatini muvofiqlashtiradi;

4) Xizmat xodimlarini Vazirlikning boshqa tarkibiy boʻlinmalariga tegishli boʻlgan ishlarga, shuningdek uning vakolatiga kirmaydigan dastur va loyihalarni tayyorlash yoki amalga oshirishga jalb qilinishiga yoʻl qoʻyilmaydi.

5) Xizmat Vazirlikning barcha ichki hujjatlari talablariga rioya etadi (vakolati doirasiga kirmaydigan hujjat talablari bundan mustasno).

22. Xizmat oʻziga yuklangan vazifalar va funksiyalarni amalga oshirish uchun quyidagi huquqlarga ega:

tizimdagi korxona, tashkilot va muassasa mansabdor shaxslaridan ichki audit obyekti roʻyxatini shakllantirish bilan bogʻliq savollar boʻyicha hujjatlar (oldingi oʻtkazilgan tekshirish yoki oʻrganish materiallari), maʼlumotlar, maxfiy axborot toifasiga oid maʼlumotlar bundan mustasno, shu jumladan elektron shaklda, ogʻzaki va yozma tushuntirishlar talab qilib olish;

oʻz vakolati doirasida nazorat obyektining mansabdor va javobgar shaxslaridan nazoratni oʻtkazishda yuzaga kelayotgan savollar boʻyicha tushuntirishlar hamda nazorat natijalari boʻyicha hujjatlarni imzolashni talab qilish;

tizimdagi korxona, tashkilot va muassasalarning moliyaviy xarajatlarini rejalashtirish, mablagʻlardan samarali foydalanish, shuningdek sohaga oid qonun hujjatlarini takomillashtirish yuzasidan takliflarni ishlab chiqish hamda ularni Vazirlik rahbariyatiga taqdim qilish.

23. Xizmat:

komplaens nazorat, ichki audit va nazorat tadbirlarini qonun hujjatlariga va mazkur Nizom talablariga mos ravishda oʻtkazish;

Inspeksiya xodimlarini jalb qilgan holda turizm va sport toʻgʻrisidagi qonun hujjatlarini qoʻllashda qonuniylikni taʼminlash va ularga rioya qilinishi boʻyicha tadbirlarning oʻtkazilishi yuzasidan tekshirishlar va oʻrganishlar oʻtkazish;

Inspeksiya bilan oʻtkazilgan tekshirish va oʻrganishlar natijalari boʻyicha aniqlangan tizimli ravishda yoʻl qoʻyilayotgan qoidabuzarlik va kamchiliklarning kelib chiqish sabablarini aniqlash hamda bunday holatlarga yoʻl qoʻygan mansabdor shaxslarning masʼuliyatini oshirish yuzasidan takliflar kiritish;

oʻtkazilgan tekshirish (taftish) va oʻrganishlar natijalari boʻyicha aniqlangan davlat budjetiga yetkazilgan moddiy zararni qaytarish choralarini koʻrish;

Xizmat xodimlarini oʻqitish va qayta tayyorlash rejasini ishlab chiqish va Vazirlik rahbariyatiga tasdiqlash uchun kiritish hamda ularning ijro etilishini taʼminlash;

Davlat moliyaviy nazoratini amalga oshirishda vakolatli idoralar tomonidan kiritilgan taqdimnomalarning bajarilishi monitoringini amalga oshirish;

nazorat tadbirlarini oʻtkazish vaqtida soʻralgan hujjatlar va materiallarni nazorat obyekti mansabdor shaxslari tomonidan taqdim etmaslik yoki oʻz vaqtida taqdim etmaslik holatlari boʻyicha dalolatnomalar tuzish;

nazorat obyekti mansabdor va masʼul shaxslarining tushuntirish berish va nazorat natijalari boʻyicha rasmiylashtiriladigan hujjatlarni imzolashdan bosh tortganliklari toʻgʻrisida dalolatnomani tuzish;

nazorat tadbirlari natijalariga doir hujjatlarda bayon etilgan maʼlumotlarning ishonchliligi, xolisligi va toʻliqligini taʼminlash;

tegishli hujjatlarga asoslangan holda oʻtkazilgan monitoring, tahlil va oʻrganish natijalarini rasmiylashtirish;

taqdim etilgan yoki Xizmat vazifalarini bajarish munosabati bilan ularga maʼlum boʻlgan sirlarni tashkil etadigan axborotlarning maxfiyligiga rioya qilish;

olingan hujjatlarning saqlanishi va qaytarilishini taʼminlash;

aniqlangan qonun buzilishlarni bartaraf etish yuzasidan, maqsadsiz va noqonuniy xarajatlarni, pul mablagʻlari va tovar-moddiy boyliklar kamomadini undirish, javobgarlikka tortish yuzasidan nazorat obyekti rahbariyatiga tegishli taklif va taqdimnomalar kiritish;

nazorat materiallarini Vazirlikning maʼlumotlar bazasiga umumlashtirish;

nazorat tadbirlari natijasida nazorat obyekti mansabdor shaxslarining harakatlarida jinoyat belgilari aniqlangan taqdirda Vazirlik rahbariyatiga axborot berish va belgilangan tartibda chora koʻrish boʻyicha takliflar kiritish;

nazorat tadbirlari natijasida nazorat obyekti mansabdor shaxslarining harakatlarida maʼmuriy huquqbuzarlik aniqlangan taqdirda materiallarni Vazirlik rahbariyati orqali maʼmuriy yoki jinoiy javobgarlikka tortish vakolatiga ega boʻlgan organlarga berish;

korrupsiyaning oldini olish, aniqlash va bartaraf etish boʻyicha majburiyatlarni Oʻzbekiston Respublikasi qonun hujjatlariga muvofiq oʻz vaqtida va toʻliq bajarish;

manfaatlar toʻqnashuviga sabab boʻladigan holatlar boʻyicha Vazirlik rahbariyatiga xabar berish;

jismoniy va yuridik shaxslarning murojaatlarini koʻrib chiqishda jismoniy va yuridik shaxslarning murojaatlari toʻgʻrisidagi qonun hujjatlari talablariga qatʼiy rioya qilish;

Xizmat tomonidan vazifa va funksiyalari bajarilishida korrupsiya holatlarini oldini olish boʻyicha tegishli, shu jumladan manfaatlar toʻqnashuvini hal etish choralarini koʻrish;

Vazirlikning tarkibiy tuzilmalari va hududiy boshqarmalarida Xizmat tomonidan oʻtkaziladigan tekshirish (taftish) va oʻrganishlar oʻtkazish davrida xato va kamchiliklarni haqqoniy, toʻgʻri va xolisona tarzda aniqlash, aniqlangan holatlar yuzasidan maʼlumotlarni belgilangan muddatlarda Vazirlik rahbariyatiga taqdim etish;

ish yuritishni belgilangan tartibda olib borish, tekshirish (taftish) va oʻrganish boʻyicha toʻplangan hujjatlarning nusxasini qonun hujjatlarida belgilangan muddatda saqlash hamda hisobini yuritish.

Xizmat oʻtkazilgan oʻrganish va tekshiruvlardan soʻng nazorat organlari tomonidan aniqlangan xato-kamchiliklar uchun shaxsan masʼul va javobgar hisoblanadi.

24. Hududiy bosh boshqarmalar ularga yuklangan vazifalar va funksiyalarni amalga oshirish uchun:

1) davlat va xoʻjalik boshqaruvi organlari, mahalliy davlat hokimiyati organlari hududiy boʻlinmalaridan oʻz vakolatiga kiradigan masalalarni hal qilish uchun zarur boʻlgan axborotni belgilangan tartibda soʻrash va olish;

2) oʻz vakolatiga kiruvchi masalalar boʻyicha takliflarni davlat va xoʻjalik boshqaruvi hududiy organlari, mahalliy davlat hokimiyati organlariga koʻrib chiqish uchun kiritish;

3) turizm, jismoniy tarbiya va sport infratuzilmasini rivojlantirish uchun shart-sharoitlarni yaratish doirasida yoʻl qoʻyilgan kamchiliklarni bartaraf qilish toʻgʻrisida koʻrib chiqilishi majburiy boʻlgan taqdimnomalarni davlat va xoʻjalik boshqaruvi organlarining hududiy boʻlinmalariga, mahalliy davlat hokimiyati organlariga yuborish;

4) turizm, jismoniy tarbiya va sport sohalarini rivojlantirish masalalarida, shu jumladan, hududlarni rivojlantirish boʻyicha ishlar va loyihalarni moliyalashtirish masalalarida davlat va xoʻjalik boshqaruvi hududiy organlari, mahalliy davlat hokimiyati organlarining xarajatlar smetalarini koʻrib chiqish va kelishishda ishtirok etish;

5) ilmiy va ekspertlik ishlarini olib borish, maslahat berish, turizm, jismoniy tarbiya va sport sohalaridagi dolzarb masalalarni ishlab chiqish uchun olimlarni, vazirliklar, maʼmuriy, taʼlim muassasalari va boshqa muassasalarning yuqori malakali mutaxassislarini taklif etish, shuningdek, Vazirlik bilan kelishgan holda idoraviy mansub taʼlim muassasalarida dars berish va mahorat darslari oʻtkazish uchun malakali mutaxassislarni taklif etish;

6) turizm, jismoniy tarbiya va sport sohalarida ommaviy tadbirlar oʻtkazilishini belgilangan tartibda tashkil etish;

7) idoraviy mansub tashkilotlari uchun uskunalari, inventar, forma va boshqa zarur jihozlarni xarid qilish;

8) viloyat va tumanlar (shaharlar) miqyosidagi turizm, jismoniy tarbiya va sport sohalaridagi tanlovlar gʻolib va sovrindorlarini mukofotlash uchun medallar, diplomlar, kuboklar va sovrinlarni xarid qilish;

9) hududdagi turizm, jismoniy tarbiya va sport namoyondalari va boshqa mutaxassislarni mukofotlash, shuningdek, ularga unvonlar va malaka toifalarini berish boʻyicha takliflarni belgilangan tartibda kiritish;

10) turizm, jismoniy tarbiya va sport sohalarida ommaviy tadbirlar oʻtkazilishini, shuningdek, hududning turizm, jismoniy tarbiya va sport vakillarini, shu jumladan, idoraviy mansub tashkilotlar tomonidan oʻtkaziladigan turli tadbiri, tanlovlar, musobaqalar va boshqa tadbirlarga tayyorlashni va ishtirok etishni moliyalashtirish;

11) hududdagi turizm, jismoniy tarbiya va sport sohalarida festivallar, tanlovlar, ommaviy tadbirlar, musobaqalarining gʻolib va sovrindorlari, shuningdek, boshqa ishtirokchi, mutaxassislarni esdalik medallari, diplomlar, kuboklar va qimmatli sovrinlar bilan mukofotlash boʻyicha Vazirlikka takliflar kiritish;

12) oʻz vakolatlari doirasida konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarni oʻtkazish, shuningdek, boshqa tashkilotlar tomonidan oʻtkaziladigan shunday tadbirlarda ishtirok etish;

13) hududda turizm, jismoniy tarbiya va sport sohalarini rivojlantirishga qaratilgan tadbirlarni birgalikda ishlab chiqish maqsadida xalqaro, xorijiy va respublika tashkilotlari bilan belgilangan tartibda aloqa qilish;

14) hududning turizm, jismoniy tarbiya va sport sohalari salohiyatini targʻib qiluvchi reklama va targʻibot mahsulotlarini (reklama tusidagi audio va video materiallar, risolalar, xaritalar va boshqa reklama materiallarini) tayyorlashga buyurtma berish;

15) turizm, jismoniy tarbiya va sport sohalarida ishlash uchun yetakchi xorijiy mutaxassislarni shartnoma asosda jalb qilish;

16) hududning turizm, jismoniy tarbiya va sport sohalarida alohida oʻrnak koʻrsatgan xodimlari va vakillarini davlat mukofotlariga taqdim etish toʻgʻrisida Vazirlikka takliflar kiritish huquqiga ega.

Vazirlikning hududiy bosh boshqarmalari qonunchilikka muvofiq boshqa huquqlarga ham ega boʻlishi mumkin.

25. Hududiy bosh boshqarmalar:

1) Vazirlikning tumanlar (shaharlar)dagi hududiy boʻlinmalari bilan birgalikda ularga yuklangan vazifalar va funksiyalarning sifatli va oʻz vaqtida bajarilishi taʼminlanishi;

2) Vazirlikning hududiy bosh boshqarmalari faoliyati bilan bogʻliq prognoz koʻrsatkichlarga erishilishi taʼminlanishi;

3) Vazirlikka kiritiladigan hujjatlar loyihalari va takliflarning sifati;

4) tumanlarda (shaharlarda) aniqlangan muammolarni har tomonlama chuqur tahlil qilish hamda umumlashtirish asosida Qoraqalpogʻiston Respublikasi, viloyatlar va Toshkent shahrida turizm va sportni rivojlantirishga doir takliflar tayyorlanishi;

5) Qoraqalpogʻiston Respublikasi, viloyatlar va Toshkent shahrida turizm va sport sohalarini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning Qoraqalpogʻiston Respublikasi, viloyatlar va Toshkent shahrida samarali amalga oshirilishi, muammoli masalalar hal etilishi;

6) tizimdagi tashkilotlar tomonidan budjet va budjetdan tashqari mablagʻlar maqsadli va samarali ishlatilishi uchun javob beradi.

Vazirlikning hududiy bosh boshqarmalari qonunchilikka muvofiq boshqa javobgarlikka ham ega boʻlishi mumkin.

26. Tuman (shahar) turizm va sport boʻlimlari ularga yuklangan vazifalar va funksiyalarni amalga oshirish uchun:

1) davlat va xoʻjalik boshqaruvi organlari, mahalliy davlat hokimiyati organlaridan oʻz vakolatiga kiradigan masalalarni hal qilish uchun zarur boʻlgan axborotni belgilangan tartibda soʻrash va olish;

2) Vazirlik vakolatiga kiruvchi masalalar boʻyicha Vazirlikning yuqori turuvchi boʻlinmalari, mahalliy davlat hokimiyati organlariga koʻrib chiqish uchun takliflar kiritish;

3) vakolatiga kiruvchi masalalar boʻyicha tegishli tuman (shahar)ning sport maktablari va maktab-internatlaridan hujjatlar, statistika axboroti, hisobotlar, tahliliy materiallar, xulosalar va boshqa axborotlarni soʻrash va olish;

4) tegishli tuman (shahar)da turizm, jismoniy tarbiya va sport sohalarini, shu jumladan, ularning tuman (shahar) infratuzilmasini rivojlantirish va ommalashtirish uchun shart-sharoitlar yaratishda yoʻl qoʻyilayotgan kamchiliklarni bartaraf qilish toʻgʻrisida koʻrib chiqilishi majburiy boʻlgan taqdimnomalarni davlat va xoʻjalik boshqaruvi organlari, mahalliy davlat hokimiyati organlariga yuborish;

5) tumanda (shaharda) turizm, jismoniy tarbiya va sport, moddiy madaniy meros sohasidagi tadbirlar belgilangan tartibda oʻtkazilishini tashkil etish;

6) tegishli tuman (shahar) miqyosida oʻtkaziladigan tadbirlar, chempionatlar, kuboklar, turnirlarni, shuningdek, tumanda (shaharda) turizm, jismoniy tarbiya va sport sohalaridagi ommaviy tadbirlarni oʻtkazishda gʻolib va sovrindorlarni, nominantlarni mukofotlash uchun zarur miqdorda medallar, diplomlar, kuboklar va sovrinlarni xarid qilish;

7) oʻz vakolatlari doirasida konferensiyalar, seminarlar, koʻrgazmalar, yarmarkalar va boshqa tadbirlarni oʻtkazish, shuningdek, boshqa tashkilotlar tomonidan tumanda (shaharda) oʻtkaziladigan shu kabi tadbirlarda ishtirok etish;

8) alohida fidokorlik, mehnatsevarlikni namoyon qilgan, oʻzining professional faoliyatida yuksak natijalarga erishgan tuman (shahar) turizm, jismoniy tarbiya va sport sohalari namoyandalari va xodimlarining nomzodlarini belgilangan tartibda davlat mukofotlariga taqdim etish boʻyicha takliflarni kiritish.

Tuman (shahar) turizm va sport boʻlimlari qonunchilikka muvofiq boshqa huquqlarga ham ega boʻlishi mumkin.

27. Tuman (shahar) turizm va sport boʻlimlari:

1) oʻziga yuklangan vazifalar va funksiyalar sifatli va oʻz vaqtida bajarilishini taʼminlash;

2) Vazirlikning hududiy bosh boshqarmalariga kiritiladigan hujjatlar loyihalari va takliflarning, shuningdek, oʻzlari tomonidan qabul qilinadigan qarorlarning sifati;

3) tumanlarda (shaharlarda) turizm, jismoniy tarbiya va sport sohalarini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlar samarali amalga oshirilishi, muammoli masalalar hal etilishi;

4) tuman (shahar)dagi davlat mulki boʻlgan turizm va sport obyektlari saqlanishi va ulardan maqsadli foydalanilishi;

5) tumanda (shaharda) turizm, jismoniy tarbiya va sport sohalaridagi tadbirlar tashkil etilishi;

6) budjet va budjetdan tashqari mablagʻlar maqsadli va samarali ishlatilishi uchun javob beradi.

Tuman (shahar) turizm va sport boʻlimlari qonunchilikka muvofiq boshqa javobgarlikka ham ega boʻlishi mumkin.

28. Oʻzbekiston Respublikasi turizm va sport vazirining asosiy funksional vazifalari:

1) Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya etish;

2) yakka boshchilik tamoyiliga asoslangan holda Vazirlik faoliyatiga umumiy rahbarlik qilish, Oʻzbekiston Respublikasi Prezidentining tegishli hujjatlari, Oʻzbekiston Respublikasi Vazirlar Mahkamasining qarori va boshqa qonunchilik bilan Vazirlikka yuklangan vazifalar va funksiyalarning bajarilishini tashkil etish;

3) Oʻzbekiston Respublikasi Prezidentining tegishli hujjatlari, Oʻzbekiston Respublikasi Vazirlar Mahkamasining qarorlari bilan sport, turizm va madaniy meros sohasini yanada takomillashtirish boʻyicha tasdiqlangan konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

4) Vazirlik va uning tarkibiy hamda hududiy boʻlinmalari faoliyati bilan bogʻliq prognoz koʻrsatkichlarga erishishni soʻzsiz taʼminlash boʻyicha amaliy choralarni ishlab chiqish va qabul qilish;

5) Vazirlik faoliyati sohasiga kiruvchi masalalar boʻyicha Oʻzbekiston Respublikasi Prezidenti Administratsiyasi tarkibiy boʻlinmalari, shuningdek, tegishli vazirliklar va idoralar bilan oʻzaro hamkorlik qilish, Oʻzbekiston Respublikasi Vazirlar Mahkamasi va uning Rayosati yigʻilishlarida masalalarni koʻrib chiqishda ishtirok etish;

6) Oʻzbekiston Respublikasi Prezidenti, Oʻzbekiston Respublikaning Bosh vaziri topshiriqlarining oʻz vaqtida va sifatli bajarilishini taʼminlash;

7) oʻz oʻrinbosarlari vakolatlarini belgilash, ular oʻrtasida vazifalarni taqsimlash, Vazirlikning boshqa mansabdor shaxslari vakolatlarini belgilash, Vazirlik faoliyatining alohida uchastkalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy javobgarligi darajasini belgilash;

8) Vazirlik faoliyatini rejalashtirishni tashkil etish, Vazirlik va oʻz oʻrinbosarlarining har choraklik ish rejalarini tasdiqlash, ularning bajarilishi nazorat qilinishini taʼminlash;

9) Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining hujjatlari va topshiriqlari ijrosini tashkil etish va monitoring olib borishning amaliy tizimini yaratish, Vazirlik faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlar oʻz vaqtida sifatli ijro etilishi uchun tarkibiy va hududiy boʻlinmalar hamda idoraviy mansub tashkilotlar rahbarlarining shaxsiy masʼuliyatini oshirish chora-tadbirlarini koʻrish;

10) Vazirlik xodimlarini tizimli qayta tayyorlashni va ularning malakasini oshirishni tashkil etish;

11) Vazirlik tizimida kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, Vazirlikning kadrlar zaxirasini shakllantirish;

12) Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi va Oʻzbekiston Respublikasi Vazirlar Mahkamasi nomenklaturasiga kiradigan boʻsh lavozimlarga taklif etilgan kadrlarning, shuningdek, Vazirlikka ishga qabul qilinayotgan boshqa kadrlarning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash;

13) faoliyat sohasiga kiradigan masalalar boʻyicha normativ-huquqiy hujjatlar loyihalari sifatli ishlab chiqilishini, ular “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlari, Oʻzbekiston Respublikasi Prezidenti Administratsiyasining Reglamenti va Oʻzbekiston Respublikasi Vazirlar Mahkamasining Reglamenti talablariga qatʼiy muvofiq ravishda oʻz vaqtida kiritilishini tashkil etish, ularning Vazirlar Mahkamasi apparatida puxta ishlanishida, Vazirlar Mahkamasi rahbariyati huzurida himoya qilinishida va Oʻzbekiston Respublikasi Prezidenti Administratsiyasida koʻrib chiqilishida ishtirok etish;

14) “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlariga va Vazirlar Mahkamasining 2016-yil 17-oktabrdagi 345-son qarori bilan tasdiqlangan Davlat va xoʻjalik boshqaruvi organlari, mahalliy ijro etuvchi hokimiyat organlarining qonun loyihasi faoliyatining namunaviy reglamentiga muvofiq Vazirlikning qonun loyihalarini tayyorlash faoliyatini tashkil etish;

15) Vazirlik vakolatiga kiruvchi masalalar boʻyicha normativ-huquqiy hujjatlarni, zarurat boʻlganda, boshqa vazirliklar va idoralar bilan birgalikda tegishli qarorlarni qabul qilish;

16) Vazirlikka taqdim etilgan takliflar va normativ-huquqiy hujjatlar loyihalari toʻliq va oʻz vaqtida koʻrib chiqilishini taʼminlash, ularni Oʻzbekiston Respublikasi Prezidenti Administratsiyasining Reglamenti va Oʻzbekiston Respublikasi Vazirlar Mahkamasining Reglamentida belgilangan muddatlarda kelishish (viza qoʻyish);

17) Vazirlik rahbarlari va xodimlari xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

18) oʻz oʻrinbosarlari hamda tarkibiy va hududiy boʻlinmalar rahbarlari faoliyati samaradorligini va natijadorligini muntazam tanqidiy tahlil qilish, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

19) Vazirlik xodimlarini ragʻbatlantirish va intizomiy javobgarlikka tortish masalalarini hal qilish, oʻz oʻrinbosarlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishining maqsadga muvofiqligiga doir masalalarni koʻrib chiqish toʻgʻrisida takliflar kiritish, ularning shaxsiy masʼuliyatini oshirishga doir tizimli chora-tadbirlarni amalga oshirish;

20) Vazirlik xodimlari tomonidan Vazirlar Mahkamasining 2016-yil 2-martdagi 62-son qarori bilan tasdiqlangan Davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida tasdiqlangan Vazirlik xodimlarining odob-axloq qoidalari talablariga rioya etilishini taʼminlashni nazorat qilish;

21) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonunchilikni takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

22) Vazirlik hamda uning tarkibiy va hududiy boʻlinmalari ishini tashkil etishning zamonaviy shakllari joriy etilishini taʼminlash;

23) aholi va tadbirkorlik subyektlari bilan hamkorlik qilishda, shu jumladan, “yagona darcha” prinsipini joriy etish orqali davlat xizmatlari sifati va samaradorligini hamda ulardan erkin foydalanishni oshirish hamda “Elektron hukumat toʻgʻrisida”gi Oʻzbekiston Respublikasi Qonunini amalga oshirish doirasida zamonaviy axborot-kommunikatsiya texnologiyalaridan foydalanish;

24) jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunida, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

25) Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Vazirlik xodimlari va rahbarlarining faol ishtirok etishini tashkil etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasi va Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonalaridan tushgan murojaatlari oʻz vaqtida va toʻliq koʻrib chiqilishini taʼminlash;

26) davlat siriga kiritilgan maʼlumotlar va maxfiy axborot bilan ishlashda qonunchilik talablariga rioya qilish;

27) Vazirlik markaziy apparati shtat jadvalini xodimlarning tasdiqlangan shtat birliklarining belgilangan soni asosida shuningdek, Oʻzbekiston Respublikasi budjet mablagʻlari hisobiga moliyalashtiriladigan markaziy apparat va idoraviy mansub tashkilotlarning xarajatlar smetasini tasdiqlash;

28) Vazirlikning hududiy boʻlinmalari nizomlari, idoraviy mansub tashkilotlar ustavlarini belgilangan tartibda tasdiqlash;

29) Oʻzbekiston Respublikasi Vazirlar Mahkamasiga vazir maslahatchilari va apparat boshqaruvchisini lavozimga tayinlash va lavozimidan ozod qilish uchun taqdimnomalar kiritish;

30) markaziy apparat xodimlarini, idoraviy mansub tashkilotlar rahbarlarini belgilangan tartibda lavozimga tayinlash va lavozimdan ozod etish;

31) Vazirlik hayʼatiga va markaziy apparat yigʻilishlariga rahbarlik qilish;

32) turizm, sport va moddiy madaniy meros sohalaridagi tashkilotlarni rivojlantirish va moddiy-texnika bazasini mustahkamlash, asbob-uskunalar va inventarlar mahalliy korxonalar tomonidan ishlab chiqarilishi kengaytirilishini tashkil etish boʻyicha manfaatdor vazirliklar va idoralar bilan kelishilgan takliflar tayyorlanishini tashkil etish;

33) turizm, sport va moddiy madaniy meros sohalarida isteʼdodli va istiqbolli kadrlarni tanlash, tayyorlash chora-tadbirlari qabul qilinishini taʼminlash, ularning mahoratini oshirish;

34) turizm, sport va moddiy madaniy meros sohalarida yagona davlat siyosati amalga oshirilishini taʼminlash, tegishli vazirliklar va idoralar, mahalliy hokimliklarning ijro etuvchi organlari, sport sohasidagi nodavlat notijorat tashkilotlar va boshqa tashkilotlar faoliyatini muvofiqlashtirish;

35) turizm, sport va moddiy madaniy meros sohalarida kadrlarni tayyorlash chora-tadbirlarini koʻrish, qayta tayyorlash va malaka oshirishni tashkil etish, taʼlim va sport muassasalarini yuqori malakali trenerlar va boshqa mutaxassislar bilan taʼminlash;

36) turizm, sport va moddiy madaniy meros sohalari xodimlari va mutaxassislarini, ularning koʻp yillik va samarali faoliyati, alohida oʻrnak koʻrsatganligi, xizmatlari uchun Oʻzbekiston Respublikasi Davlat mukofotlariga taqdimnomalar belgilangan tartibda kiritilishini taʼminlash va tavsiyalar berish;

37) turizm, sport va moddiy madaniy meros sohalarida Oʻzbekiston delegatsiyalarining xalqaro tadbirlarda ishtirokini taʼminlash;

38) turizm, sport va moddiy madaniy meros sohalarida berilgan unvonlarni, razryadlar va malaka toifalarini tasdiqlash;

39) turizm, sport va moddiy madaniy meros sohalarida xalqaro va davlatlararo aloqalarni kengaytirish va mustahkamlash, xorijiy investitsiyalar va grantlarni jalb qilish boʻyicha xalqaro tadbirlarda respublika vakillarining Oʻzbekiston Respublikasi nomidan ishtirokini taʼminlash;

40) hududiy boʻlinmalar tuzilmalari va nizomlarini tasdiqlash, shuningdek, ular boshqaruv xodimlarining cheklangan sonini belgilash.

Vazir qonunchilikka muvofiq boshqa funksional vazifalariga ham ega boʻlishi mumkin.

29. Quyidagilar vazirning birinchi oʻrinbosarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) Vazir vaqtincha boʻlmaganda tegishli buyruq asosida uning vazifalarini bajarish;

3) Vazirlikning mutasaddilik qilinadigan tarkibiy boʻlinmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari oʻrtasida vazifalarni taqsimlash;

4) davlat boshqaruvi organi faoliyatining mutasaddilik qilinadigan yoʻnalishlari boʻyicha Oʻzbekiston Respublikasi Prezidentining hujjatlari va Oʻzbekiston Respublikasi Vazirlar Mahkamasining qarorlari bilan tasdiqlangan davlat boshqaruvi organlari faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

5) mutasaddilik qilinadigan tarkibiy boʻlinmalar tomonidan prognoz koʻrsatkichlarga erishishni soʻzsiz taʼminlash chora-tadbirlarini koʻrish, boʻlinmalar rahbarlarining hisobotlarini muntazam eshitish va ushbu koʻrsatkichlarga erishish uchun ularning shaxsiy javobgarligini oshirish;

6) mutasaddilik qilinadigan tarkibiy boʻlinmalarning ish rejalarini tasdiqlash, ular bajarilishi ustidan nazoratni taʼminlash;

7) Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining hujjatlari va topshiriqlari ijrosini taʼminlash, mutasaddilik qilinadigan tarkibiy boʻlinmalarda ijro intizomi boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlar oʻz vaqtida va sifatli ijro etilishi uchun tarkibiy boʻlinmalar rahbarlarining shaxsiy masʼuliyatini oshirish chora-tadbirlarini koʻrish;

8) Vazirlik hayʼati qarorlari, Vazirning buyruqlari va topshiriqlari oʻz vaqtida va sifatli bajarilishini taʼminlash;

9) mutasaddilik qilinadigan tarkibiy boʻlinmalarda kadrlarni tanlash va joy-joyiga qoʻyish boʻyicha vazirga takliflar taqdim etish, ularning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasbiy malakasini oshirish chora-tadbirlarini koʻrish, mutasaddilik qilinadigan boʻlinmalarda kadrlar zaxirasini shakllantirish;

10) normativ-huquqiy hujjatlar loyihalari mutasaddilik qilinadigan tarkibiy boʻlinmalar tomonidan sifatli ishlab chiqilishini tashkil etish, Vazirlikning tarkibiy boʻlinmalarida tayyorlangan hujjatlar loyihalarini koʻrib chiqish va ular keyinchalik Vazirlik rahbari tomonidan koʻrib chiqilishi, imzolanishi (viza qoʻyilishi) uchun viza qoʻyish, ularning Oʻzbekiston Respublikasi Prezidenti Administratsiyasining Reglamenti va Oʻzbekiston Respublikasi Vazirlar Mahkamasining Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, shuningdek, Vazirlar Mahkamasi apparatida normativ-huquqiy hujjatlar loyihalarini ishlab chiqishda Vazirlik rahbari topshirigʻiga binoan ishtirok etish;

11) xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3137-son qarorlari talablariga toʻliq muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

12) mutasaddilik qilinadigan tarkibiy boʻlinmalar rahbarlari va xodimlari faoliyati samaradorligi va natijadorligini muntazam tanqidiy tahlil qilish, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

13) mutasaddilik qilinadigan tarkibiy boʻlinmalar faoliyati sohasiga tegishli masalalar boʻyicha Vazirlik faoliyatini takomillashtirishga doir amaliy chora-tadbirlar koʻrish, qonunchilikni takomillashtirish boʻyicha takliflar ishlab chiqish va ularni vazirga kiritish;

14) mutasaddilik qilinadigan tarkibiy boʻlinmalar rahbarlari va xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqligiga masalasini koʻrib chiqish boʻyicha takliflarni vazirga kiritish, funksional vazifalar va yuklangan vazifalar bajarilishi uchun ularning shaxsiy masʼuliyatini oshirish boʻyicha tizimli chora-tadbirlarni amalga oshirish;

15) Oʻzbekiston Respublikasi Vazirlar Mahkamasining 2016-yil 2-martdagi 62-son qarori bilan tasdiqlangan Davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalariga asosan tasdiqlangan Vazirlik xodimlarining odob-axloq qoidalari talablariga rioya etish, koʻrsatib oʻtilgan qoidalarga mutasaddilik qilinadigan tarkibiy boʻlinmalar rahbarlari va xodimlari tomonidan rioya etilishini taʼminlash;

16) huquqni qoʻllash amaliyotini va qonunchilikni takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

17) davlat xizmatlari samaradorligi, sifati va ulardan erkin foydalanishni oshirishga doir takliflarni vazirga kiritish;

18) davlat siriga kiritilgan maʼlumotlar va maxfiy axborot bilan ishlashda qonunchilik talablariga rioya qilish;

19) vazirliklar, idoralar, mahalliy ijro etuvchi hokimiyat organlari va boshqa tashkilotlarning jismoniy tarbiya va sport sohasidagi ishlarini muvofiqlashtirishda ishtirok etish;

20) turizm, sport va moddiy madaniy meros infratuzilmalarini rivojlantirish va ushbu sohalardagi xizmatlarni diversifikatsiyalash;

21) Vazirlikning xalqaro va respublika darajalaridagi sport va jismoniy tarbiya-ommaviy tadbirlarning kalendar rejasini shakllantirishda ishtirok etish, uni manfaatdor tashkilotlar va idoralar bilan birgalikda amalga oshirish;

22) respublikada turizm, sport va moddiy madaniy meros sohalari rivojlanishi monitoringini olib borish hamda ushbu sohalarni yanada rivojlantirish boʻyicha har yillik prognozlarni shakllantirish;

23) turizm, sport va moddiy madaniy meros sohalarida isteʼdodli va istiqbolli kadrlarni tanlash, tayyorlash va ularning mahoratini oshirish;

24) turizm, sport va moddiy madaniy meros sohalariga investitsiyalarni jalb qilish, ushbu sohalardagi hududiy dasturlar ijrosini taʼminlash

25) turizm, sport va moddiy madaniy meros sohalarini yanada rivojlantirishga qaratilgan tadbirlarni ishlab chiqish boʻyicha xalqaro, respublika va milliy sport tashkilotlari bilan birgalikda ishlashni taʼminlash.

30. Quyidagilar vazir oʻrinbosarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) vazir vaqtincha boʻlmaganda tegishli buyruq asosida uning vazifalarini bajarish;

3) Vazirlikning mutasaddilik qilinadigan tarkibiy boʻlinmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari oʻrtasida vazifalarni taqsimlash;

4) Vazirlik faoliyatining mutasaddilik qilinadigan yoʻnalishlari boʻyicha Oʻzbekiston Respublikasi Prezidentining hujjatlari va Oʻzbekiston Respublikasi Vazirlar Mahkamasining qarorlari bilan tasdiqlangan Vazirlik faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

5) mutasaddilik qilinadigan tarkibiy boʻlinmalar tomonidan prognoz koʻrsatkichlarga erishishni soʻzsiz taʼminlash chora-tadbirlarini koʻrish, boʻlinmalar rahbarlarining hisobotlarini muntazam eshitish va ushbu koʻrsatkichlarga erishish uchun ularning shaxsiy javobgarligini oshirish;

6) mutasaddilik qilinadigan tarkibiy boʻlinmalarning choraklik ish rejalarini tasdiqlash, ular bajarilishi ustidan nazoratni taʼminlash;

7) Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining hujjatlari va topshiriqlari ijrosini taʼminlash, Vazirlikning mutasaddilik qilinadigan tarkibiy boʻlinmalarida ijro intizomi boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlar oʻz vaqtida va sifatli ijro etilishi uchun tarkibiy boʻlinmalar rahbarlarining shaxsiy masʼuliyatini oshirish chora-tadbirlarini koʻrish;

8) Vazirlik hayʼati qarorlari, vazirning buyruqlari va topshiriqlari oʻz vaqtida va sifatli bajarilishini taʼminlash;

9) mutasaddilik qilinadigan tarkibiy boʻlinmalarda kadrlarni tanlash va joy-joyiga qoʻyish boʻyicha vazirga takliflar taqdim etish, ularning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasbiy malakasini oshirish chora-tadbirlarini koʻrish, mutasaddilik qilinadigan boʻlinmalarda kadrlar zaxirasini shakllantirish;

10) normativ-huquqiy hujjatlar loyihalari mutasaddilik qilinadigan tarkibiy boʻlinmalar tomonidan sifatli ishlab chiqilishini tashkil etish, Vazirlikning tarkibiy boʻlinmalarida tayyorlangan hujjatlar loyihalarini koʻrib chiqish, ularning Oʻzbekiston Respublikasi Prezidenti Administratsiyasining Reglamenti va Oʻzbekiston Respublikasi Vazirlar Mahkamasining Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, shuningdek, Vazirlar Mahkamasi apparatida normativ-huquqiy hujjatlar loyihalarini ishlab chiqishda Vazirning topshirigʻiga binoan ishtirok etish;

11) Vazirlikka taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish;

12) xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3137-son qarorlari talablariga toʻliq muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

13) mutasaddilik qilinadigan tarkibiy boʻlinmalar rahbarlari va xodimlari faoliyati samaradorligi va natijadorligini muntazam tanqidiy tahlil qilish, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

14) turizm, sport va moddiy madaniy meros sohalariga tegishli masalalar boʻyicha Vazirlik faoliyatini takomillashtirishga doir amaliy chora-tadbirlar koʻrish, qonunchilikni takomillashtirish boʻyicha takliflar ishlab chiqish va ularni vazirga kiritish;

15) mutasaddilik qilinadigan tarkibiy boʻlinmalar rahbarlari va xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqligi masalasini koʻrib chiqish boʻyicha takliflarni vazirga kiritish, funksional vazifalar va yuklangan vazifalar bajarilishi uchun ularning shaxsiy masʼuliyatini oshirish boʻyicha tizimli chora-tadbirlarni amalga oshirish;

16) Vazirlik xodimlarining odob-axloq qoidalari talablariga rioya etish, mutasaddilik qilinadigan tarkibiy boʻlinmalar rahbarlari va xodimlarining koʻrsatib oʻtilgan qoidalarga rioya etishini taʼminlash;

17) huquqni qoʻllash amaliyotini va qonunchilikni takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

18) davlat xizmatlari samaradorligi, sifati va ulardan erkin foydalanishni oshirishga doir takliflarni vazirga kiritish;

19) jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

20) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasi va Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonalaridan tushgan murojaatlari oʻz vaqtida va toʻliq koʻrib chiqilishini taʼminlash;

21) davlat siriga kiritilgan maʼlumotlar va maxfiy axborot bilan ishlashda qonunchilik talablariga rioya qilish.

31. Apparati boshqaruvchisi oʻz faoliyati davomida:

Vazirlikning markaziy apparati faoliyatini tashkil etadi hamda markaziy apparatga yuklangan vazifalar va funksiyalarning bajarilishi uchun javob beradi;

Vazir tomonidan imzolanadigan chiquvchi hujjat hamda qabul qilinadigan ichki hujjatlar loyihalarini vizalashga haqli, shuningdek, ularning chiqarilishini tashkil qiladi;

Vazirlar Mahkamasiga kiritilayotgan normativ-huquqiy hujjatlar loyihalarini, tahliliy materiallarni, Oʻzbekiston Respublikasining qonunlari, Oʻzbekiston Respublikasi Prezidenti va Vazirlar Mahkamasining hujjatlari loyihalarini chuqur va sifatli tayyorlash maqsadida Vazirlik markaziy apparati tarkibiy boʻlinmalarining faoliyatini muvofiqlashtirishni taʼminlaydi;

turizm, jismoniy tarbiya va sport, madaniy meros sohalariga oid Oʻzbekiston Respublikasining qonunlari, Oʻzbekiston Respublikasi Prezidenti va Vazirlar Mahkamasining hujjatlari, Oʻzbekiston Respublikasining xalqaro shartnomalari va Vazirlar Mahkamasida koʻrib chiqilishi talab etiladigan boshqa hujjatlarda belgilangan talablarga davlat va xoʻjalik boshqaruvi organlari, mahalliy ijro etuvchi hokimiyat organlari va boshqa tashkilotlar tomonidan rioya etilishi ustidan nazoratni taʼminlaydi;

ijro intizomini mustahkamlash va Oʻzbekiston Respublikasining qonunlari, Oʻzbekiston Respublikasi Prezidenti va Vazirlar Mahkamasining hujjatlari hamda topshiriqlari, Oʻzbekiston Respublikasi Prezidentining respublika hududlariga tashriflari yakunlari boʻyicha tasdiqlangan bayonnomalar, Oʻzbekiston Respublikasi Prezidenti raisligida oʻtkazilgan majlislar bayonnomalari hamda oliy va yuqori darajalardagi tashriflar yakunlari boʻyicha amaliy tadbirlar rejalari (“yoʻl xaritalari”) Vazirlik tomonidan bajarilishi ustidan nazorat qilinishi boʻyicha chora-tadbirlarni amalga oshiradi;

qabul qilinayotgan qonunchilik hujjatlari ijrosini samarali tashkil etish va monitoring olib borishning taʼsirchan tizimini yaratish, qonunchilik hujjatlari va topshiriqlar ijrosi amalda nazorat qilinishini shaxsan tashkil etish;

Oʻzbekiston Respublikasi Prezidentining hujjatlari va topshiriqlari, Oʻzbekiston Respublikasi Prezidenti Administratsiyasining topshiriqlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Vazirlar Mahkamasining hujjatlari ijrosini tashkil etish boʻyicha vazir nomidan tayyorlangan topshiriqlar (rezolyutsiyalar), vazir oʻrinbosarlari nomiga tushgan topshiriqlarni ijro etish boʻyicha ularning nomidan tayyorlanadigan topshiriqlar (rezolyutsiyalar) loyihalarini, shuningdek, Oʻzbekiston Respublikasi Prezidenti va Vazirlar Mahkamasining hujjatlari ijrosini tashkil etish boʻyicha vazir, uning oʻrinbosarlari tomonidan tasdiqlangan rejalar-jadvallar loyihalarini kelishadi (vizalaydi);

Vazirlikning markaziy apparati tarkibiy boʻlinmalari faoliyatiga bevosita rahbarlik qiladi va muvofiqlashtiradi;

vazirning oʻrinbosarlari bilan birgalikda vazir oʻrinbosarlarining kotib-ish yurituvchilari lavozimiga hamda texnik xodimlar lavozimlariga vazir bilan kelishgan holda kadrlarni tanlaydi va ishga qabul qilish boʻyicha buyruqni imzolaydi;

Vazirlik markaziy apparati xodimlarini respublika hududlarga xizmat safarlariga yuborish boʻyicha buyruqlarni imzolaydi;

Oʻzbekiston Respublikasi Oliy Majlisi, Oʻzbekiston Respublikasi Prezidenti va Vazirlar Mahkamasining hujjatlari va topshiriqlarida belgilangan ustuvor vazifalar va topshiriqlar ijrosini oʻz vaqtida va sifatli taʼminlash maqsadida Vazirlik markaziy apparatida yigʻilish, muhokamalar tashkil etadi. Bunda yigʻilishlarga vazir oʻrinbosarlari, maslahatchilari hamda tizim tashkilotlari rahbarlarini jalb etishi mumkin;

Vazirlikning markaziy apparati xodimlari, tarkibiy va hududiy boʻlinmalar rahbarlari faoliyati samaradorligini va natijadorligini muntazam tanqidiy tahlil qiladi, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish boʻyicha takliflar tayyorlaydi;

markaziy apparat tarkibiy boʻlinmalari rahbarlari va mutaxassislarini ragʻbatlantirish va intizomiy jazo qoʻllash toʻgʻrisida vazir nomiga belgilangan tartibda bildirishnomalar kiritadi;

oʻz faoliyati davomida samarali mehnat qilib kelayotgan Vazirlik xodimlarini qoʻshimcha ragʻbatlantirish yuzasidan vazirga taklif kiritadi.

Vazirning oʻz vakolati doirasida bergan topshiriqlariga asosan apparat boshqaruvchisiga boshqa vazifalar ham yuklatilishi mumkin.

32. Quyidagilar Vazirlik markaziy apparati tarkibiy boʻlinmalari rahbarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

2) tarkibiy boʻlinmalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalar bajarilishini tashkil etish;

3) Vazirlikning hududiy boʻlinmalari va idoraviy mansub tashkilotlar faoliyatini oʻz vakolatlari doirasida muvofiqlashtirish;

4) prognoz koʻrsatkichlarning bajarilishini muntazam tahlil qilish hamda tarkibiy va hududiy boʻlinmalar ushbu koʻrsatkichlarga soʻzsiz erishishini taʼminlashga qaratilgan qoʻshimcha chora-tadbirlar koʻrish boʻyicha takliflarni vazirning mutasaddilik qiladigan oʻrinbosarlariga kiritish;

5) Oʻzbekiston Respublikasi Prezidenti va Oʻzbekiston Respublikasi Vazirlar Mahkamasi hujjatlari va topshiriqlari ijrosini taʼminlash, Vazirlik tarkibiy boʻlinmalari xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy masʼuliyatini oshirish chora-tadbirlarini koʻrish;

6) hayʼat qarorlari hamda buyruqlar, vazir va uning oʻrinbosarlari topshiriqlari oʻz vaqtida va sifatli bajarilishini taʼminlash;

7) tarkibiy boʻlinmalarning ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifalar va tadbirlar oʻz vaqtida va sifatli bajarilishini taʼminlash;

8) tarkibiy boʻlinmalarga yuklangan vazifalar bajarilishini nazorat qilish va muvofiqlashtirish, Vazirlikning hududiy boʻlinmalari va idoraviy mansub tashkilotlar faoliyatiga amaliy va metodik yordam koʻrsatish;

9) tarkibiy boʻlinmalar faoliyatiga oid masalalar yuzasidan qonunchilikni takomillashtirish boʻyicha takliflarni ishlab chiqish va ularni koʻrib chiqish uchun Vazirlik rahbariyatiga kiritish;

10) tarkibiy boʻlinmalarda kadrlarni tanlash va joy-joyiga qoʻyishda Vazirlik rahbariyatiga takliflar taqdim etish, professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasb malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

11) normativ-huquqiy hujjatlar loyihalari tarkibiy boʻlinmalar tomonidan sifatli ishlab chiqilishini tashkil etish, Vazirlikning tarkibiy boʻlinmalarida tayyorlangan hujjatlar loyihalarini keyinchalik Vazirlik rahbariyati tomonidan koʻrib chiqish, imzolash (viza qoʻyish) uchun koʻrib chiqish va viza qoʻyish, ularning Oʻzbekiston Respublikasi Prezidenti Administratsiyasining Reglamenti va Oʻzbekiston Respublikasi Vazirlar Mahkamasining Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, Vazirlik rahbarlarining topshirigʻi boʻyicha normativ-huquqiy hujjatlar loyihalarini Vazirlar Mahkamasi apparatida ishlab chiqishda ishtirok etish;

12) Vazirlikka taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish;

13) xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlari asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

14) tarkibiy boʻlinmalar xodimlari faoliyati samaradorligi va natijadorligini muntazam ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

15) Vazirlik xodimlarining odob-axloq qoidalari talablariga rioya qilishini, tarkibiy boʻlinmalar xodimlari ushbu qoidalarga rioya etishini taʼminlash;

16) huquqni qoʻllash amaliyotini va qonunchilikni takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq tarkibiy boʻlinmalarda korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish boʻyicha takliflar kiritish;

17) davlat xizmatlarining samaradorligi, sifati va ulardan erkin foydalanishni oshirishga doir takliflarni Vazirlik rahbariyatiga kiritish;

18) jismoniy va yuridik shaxslarning murojaatlarini koʻrib chiqish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomda belgilangan muddatlarda va tartibda aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan, shu jumladan, joylarga borib qabul qilish;

19) Oʻzbekiston Respublikasi Prezidentining Xalq qabulxonalari va Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonalari bilan samarali hamkorlik qilish, Oʻzbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida” 2016-yil 28-dekabrdagi PF-4904-son Farmoniga muvofiq ularning faoliyatida faol ishtirok etish, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushgan murojaatlarini oʻz vaqtida va toʻlaqonli koʻrib chiqish;

20) davlat siriga kiritilgan maʼlumotlar va maxfiy axborot bilan ishlashda qonunchilik talablariga rioya qilish;

21) xalqaro va respublika darajalaridagi sport va jismoniy tarbiya-ommaviy tadbirlarning kalendar rejasini shakllantirishda ishtirok etish;

22) tarkibiy boʻlinmalar xodimlari faoliyatini tasdiqlangan lavozim majburiyatlariga muvofiq tashkil qilish;

23) boshqarmalar vakolatiga kiruvchi masalalar yuzasidan Vazirlik rahbariyatiga tahliliy materiallar tayyorlash;

24) Vazirlikning tarkibiy boʻlinmalari faoliyatini oʻrganishni tashkil etish va ularga amaliy koʻmaklashish boʻyicha takliflar ishlab chiqish.

33. Quyidagilar hududiy bosh boshqarmalar rahbarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) hududiy bosh boshqarmalar faoliyatiga umumiy rahbarlik qilish va nazorat qilish, ularga Oʻzbekiston Respublikasi Prezidenti va Vazirlar Mahkamasining qarorlari hamda boshqa qonunchilik va Vazirlikning buyruqlari bilan yuklangan vazifalar va funksiyalar bajarilishini tashkil etish;

3) hududiy bosh boshqarmalar faoliyati bilan bogʻliq prognoz koʻrsatkichlarga erishishni soʻzsiz taʼminlash boʻyicha amaliy chora-tadbirlarni ishlab chiqish va qabul qilish;

4) Oʻzbekiston Respublikasi Prezidenti va Vazirlar Mahkamasining hujjatlari va topshiriqlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, Oʻzbekiston Respublikasi Prezidenti maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun hududiy bosh boshqarmalar xodimlarining shaxsiy masʼuliyatini oshirish chora-tadbirlarini koʻrish;

5) Vazirlik hayʼati qarorlari, buyruqlari, Vazir va uning oʻrinbosarlarining topshiriqlari oʻz vaqtida va sifatli bajarilishini taʼminlash;

6) jismoniy tarbiya va sport sohasiga kiradigan masalalar boʻyicha mahalliy davlat hokimiyati organlari va kompleks ijtimoiy-iqtisodiy rivojlantirish boʻyicha sektorlar bilan hamkorlik qilish;

7) oʻz oʻrinbosarlari vakolatlarini belgilash, ular oʻrtasida vazifalarni taqsimlash, hududiy bosh boshqarmalarning boshqa mansabdor shaxslarining vakolatlarini belgilash, Vazirlik hududiy bosh boshqarmalari faoliyatining alohida uchastkalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy javobgarligi darajasini belgilash;

8) Vazirlikning hududiy bosh boshqarmalari faoliyatini rejalashtirishni tashkil etish, Vazirlikning tuman (shahar) boʻlimlari va oʻz oʻrinbosarlarining choraklik ish rejalarini tasdiqlash, ularning bajarilishini nazorat qilishni taʼminlash;

9) Vazirlikning hududiy bosh boshqarmalarida kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, hududiy bosh boshqarmalarning kadrlar zaxirasini shakllantirish;

10) Vazirlik markaziy apparati nomenklaturasiga kiradigan boʻsh lavozimlarga taklif etilgan kadrlarning, shuningdek, hududiy bosh boshqarmalarga ishga qabul qilinayotgan boshqa kadrlarning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash;

11) hududiy bosh boshqarmalar xodimlarini, oʻz oʻrinbosarlarini ragʻbatlantirish va intizomiy javobgarlikka tortish masalalarini hal qilish, shu jumladan, ular egallab turgan lavozimda qolishi maqsadga muvofiqligiga doir masalalarni koʻrib chiqish, ularning shaxsiy masʼuliyatini oshirish boʻyicha tizimli chora-tadbirlarni amalga oshirish;

12) hududiy bosh boshqarmalar xodimlari tomonidan Vazirlik xodimlarining Odob-axloq qoidalari talablariga rioya etishini taʼminlash;

13) huquqni qoʻllash amaliyotini va qonunchilikni takomillashtirishga doir chora-tadbirlarni ishlab chiqish va amalga oshirish orqali hududiy bosh boshqarmalar tizimida “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

14) prognoz koʻrsatkichlarning bajarilishini muntazam tahlil qilish hamda hududiy bosh boshqarmalar tomonidan ushbu koʻrsatkichlarga soʻzsiz erishishni taʼminlashga qaratilgan qoʻshimcha chora-tadbirlar koʻrish boʻyicha takliflarni Vazirlikka kiritish;

15) hududiy bosh boshqarmalar xodimlari faoliyatining samaradorligi va natijadorligini tizimli ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

16) hududiy bosh boshqarmalar faoliyatiga oid masalalar boʻyicha qonunchilikni takomillashtirish, shuningdek, davlat xizmatlari samaradorligi, sifati va ulardan erkin foydalanishni oshirish boʻyicha takliflarni ishlab chiqish hamda ularni koʻrib chiqish uchun Vazirlikka kiritish;

17) Vazirlikning tuman (shahar) boʻlinmalari va hududiy bosh boshqarmalari tarkibiga kiradigan tashkilotlar faoliyatini muvofiqlashtirish va nazorat qilish;

18) jismoniy va yuridik shaxslarning murojaatlarini koʻrib chiqish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatlarda va tartibda aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslarning vakillarini muntazam ravishda shaxsan qabul qilish, shu jumladan, joylarga borib qabul qilish;

19) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushgan barcha murojaatlarini oʻz vaqtida va toʻlaqonli koʻrib chiqish;

20) hududiy bosh boshqarmalar xodimlari lavozim maoshiga mukofotlar, ustamalar toʻlash, ularga moddiy yordam berish, ularni taqdirlash, ragʻbatlantirish va ularga intizomiy chora qoʻllash toʻgʻrisida qaror qabul qilish, ularni davlat mukofotlari va idoraviy mukofotlar bilan taqdirlash toʻgʻrisidagi takliflarni Vazirlikka kiritish;

21) davlat sirini yoki qonun bilan qoʻriqlanadigan boshqa sirni tashkil etuvchi maʼlumotlarning himoya qilinishini taʼminlash.

34. Quyidagilar Turizm va sport vazirligining tuman (shahar) boʻlimlari rahbarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) tuman (shahar) boʻlinmasiga rahbarlik qilish;

3) faoliyatning ayrim yoʻnalishlari boʻyicha xodimlar oʻrtasida funksional vazifalarni taqsimlash va ularning javobgarligi darajasini belgilash;

4) turizm, sport va moddiy madaniy meros sohasidagi tashkilotlar va muassasalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalar bajarilishini tashkil etish;

5) Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun tuman va shahar boʻlinmalari xodimlarining shaxsiy masʼuliyatini oshirish chora-tadbirlarini koʻrish;

6) Vazirlik hayʼati qarorlari, vazir va uning oʻrinbosarlari, shuningdek, hududiy boʻlinmalar rahbarlarining buyruqlari va topshiriqlari oʻz vaqtida va sifatli bajarilishini taʼminlash;

7) turizm, jismoniy tarbiya va sport, moddiy madaniy meros sohasiga kiradigan masalalar yuzasidan mahalliy davlat hokimiyati organlari va kompleks ijtimoiy-iqtisodiy rivojlantirish boʻyicha sektorlar bilan hamkorlik qilish;

8) tuman (shahar) turizm va sport boʻlimida kadrlarni tanlash va joy-joyiga qoʻyishda hududiy bosh boshqarmalar rahbarlariga, ularning oʻrinbosarlariga takliflar kiritish, ularning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasbiy malakasini oshirish chora-tadbirlarini koʻrish, tuman (shahar) turizm va sport boʻlimida kadrlar zaxirasini shakllantirish;

9) Vazirlik xodimlarining Odob-axloq qoidalari talablariga rioya qilishini, tuman (shahar) turizm va sport boʻlimlari xodimlarining ushbu qoidalarga rioya etishini taʼminlash;

10) huquqni qoʻllash amaliyotini va qonunchilikni takomillashtirishga doir chora-tadbirlarni ishlab chiqish va amalga oshirish orqali tuman (shahar) boʻlimlarida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

11) tuman (shahar) boʻlimlari xodimlari lavozim maoshiga mukofotlar, ustamalar toʻlash, ularga moddiy yordam berish, ularni taqdirlash, ragʻbatlantirish va ularga intizomiy chora qoʻllash, ularni davlat mukofotlari va idoraviy mukofotlar bilan taqdirlash toʻgʻrisida takliflar kiritish;

12) davlat sirini yoki qonun bilan qoʻriqlanadigan boshqa sirni tashkil etuvchi maʼlumotlarning himoya qilinishini taʼminlash.

35. Vazir:

1) Vazirlikka yuklangan vazifalar va funksiyalarning bajarilishi;

2) ushbu Nizomning 20-bandida nazarda tutilgan Vazirlikning javobgarlik sohalari boʻyicha;

3) ushbu Nizomning 25-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

36. Vazirning birinchi oʻrinbosari va oʻrinbosarlari:

1) Vazirlikning mutasaddilik qilinadigan tarkibiy boʻlinmalarda Vazirlikka yuklangan vazifalar va funksiyalarning bajarilishi;

2) ushbu Nizomning 18-bandida nazarda tutilgan mutasaddilik qilinadigan masalalarga doir javobgarlik sohalari boʻyicha;

3) ushbu Nizomning tegishli ravishda 26 va 27-bandlarida koʻrsatilgan oʻz funksional vazifalarining sifatli bajarilishi uchun shaxsan javob beradi.

37. Markaziy apparat tarkibiy boʻlinmalari rahbarlari;

1) tegishli tarkibiy boʻlinmalarga yuklangan vazifalar va funksiyalarning amalga oshirilishi;

2) ushbu Nizomning 21-bandida nazarda tutilgan Vazirlik markaziy apparatining javobgarlik sohalari boʻyicha;

3) ushbu Nizomning 28-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

38. Hududiy bosh boshqarmalar rahbarlari:

1) hududiy bosh boshqarmalarga yuklangan vazifalar va funksiyalar amalga oshirilishi uchun;

2) ushbu Nizomning 23-bandida nazarda tutilgan hududiy boʻlinmalarning javobgarlik sohalari boʻyicha;

3) ushbu Nizomning 30-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

39. Tumanlar (shaharlar)dagi turizm va sport boʻlimlari rahbarlari:

1) tuman (shahar) boʻlinmalariga yuklangan vazifalar va funksiyalar amalga oshirilishi uchun;

2) ushbu Nizomning 25-bandida nazarda tutilgan Vazirlikning tuman (shahar) boʻlinmalari javobgarligi sohalari boʻyicha;

3) ushbu Nizomning 31-bandida koʻrsatilgan oʻz funksional vazifalari sifatli bajarilishi uchun shaxsan javob beradi.

40. Vazirlikka Oʻzbekiston Respublikasi Oliy Majlisi Qonunchilik palatasi maʼqullaganidan keyin kiritilgan Oʻzbekiston Respublikasining Bosh vaziri taqdimnomasiga binoan Oʻzbekiston Respublikasi Prezidenti tomonidan tasdiqlanadigan va lavozimdan ozod etiladigan vazir boshchilik qiladi.

Vazir oʻz maqomiga koʻra Oʻzbekiston Respublikasi Vazirlar Mahkamasining aʼzosi hisoblanadi.

41. Vazirning besh nafar oʻrinbosari, shu jumladan, bir nafar birinchi oʻrinbosari boʻladi.

42. Vazirning birinchi oʻrinbosari va boshqa oʻrinbosarlari Oʻzbekiston Respublikasi Prezidenti tomonidan lavozimga tayinlanadi va lavozimdan ozod etiladi.

43. Vazir boʻlmagan vaqtda uning vakolatlari vazifalar taqsimotiga binoan uning oʻrinbosarlari tomonidan bajariladi.

44. Quyidagilar:

Vazirning masalahatchilari (xorijiy maslahatchilar, axborot siyosati masalalari boʻyicha maslahatchi hamda maʼnaviy-maʼrifiy ishlar samaradorligini oshirish, davlat tili toʻgʻrisidagi qonunchilikka rioya etilishini taʼminlash masalalari boʻyicha maslahatchidan tashqari) hamda Vazirlik apparati boshqaruvchisi vazirning taqdimnomasiga binoan Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimidan ozod etiladi;

Qoraqalpogʻiston Respublikasi, viloyatlar va Toshkent shahar turizm va sport bosh boshqarmalari boshliqlarini lavozimga tayinlash va lavozimidan ozod etish — vazir taqdimnomasiga asosan belgilangan tartibda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari tomonidan lavozimga tayinlanadi va lavozimidan ozod etiladi. Bunda vazir taqdimnomasi tegishli mahalliy xalq deputatlari Kengashiga koʻrib chiqish uchun kiritilishi shart;

Qoraqalpogʻiston Respublikasi, viloyatlar va Toshkent shahar turizm va sport bosh boshqarmasi boshliqlarining oʻrinbosarlari vazir tomonidan lavozimga tayinlanadi va lavozimidan ozod etiladi;

turizm va sport boʻlimlari rahbarlari Vazirlik bilan kelishgan holda Qoraqalpogʻiston Respublikasi, viloyatlar va Toshkent shahar turizm va sport bosh boshqarmalari boshliqlari tomonidan lavozimga tayinlanadi va lavozimidan ozod etiladi.

Qoraqalpogʻiston Respublikasi Vazirlar Kengashi Raisi, viloyatlar hamda Toshkent shahar hokimlarining turizm, sport, madaniyat, madaniy meros va ommaviy kommunikatsiyalar masalalari boʻyicha oʻrinbosarlari bir vaqtning oʻzida tegishlicha turizm va sport bosh boshqarmalarining rahbarlari hisoblanadi.

45. Vazir Vazirlik tizimiga kiradigan idoraviy mansub tashkilotlarning rahbarlarini belgilangan tartibda lavozimga tayinlaydi va lavozimidan ozod etadi.

46. Vazir Vazirlik markaziy apparatining boshqarmalari va boʻlimlari, boʻlinmalari toʻgʻrisidagi nizomni, idoraviy mansub tashkilotlarning ustavlarini belgilangan tartibda tasdiqlaydi.

47. Vazirlik markaziy apparati tarkibiy boʻlinmalarining Vazirlikning hududiy boʻlinmalari va idoraviy mansub tashkilotlar bilan oʻzaro hamkorligi markaziy apparat tarkibiy boʻlinmalarining rahbarlari tomonidan taʼminlanadi.

48. Vazirlik markaziy apparatining tarkibiy boʻlinmalari Vazirlikning hududiy boʻlinmalari va idoraviy mansub tashkilotlar bilan oʻz faoliyati yoʻnalishlari boʻyicha hamkorlik qilib:

1) topshiriqlarni hududiy boʻlinmalarga va idoraviy mansub tashkilotlarga yetkazadi hamda ularning bajarilishini nazorat qiladi;

2) Vazirlikning hududiy boʻlinmalariga va idoraviy mansub tashkilotlarga tarkibiy boʻlinmalarning bevosita faoliyati masalalari boʻyicha soʻrovlar yuboradi hamda ularning ijro etilishini nazorat qiladi;

3) Vazirlikning hududiy boʻlinmalari va idoraviy mansub tashkilotlar faoliyati amaliyotini tekshiradi va oʻrganadi, umumlashtiradi, uni takomillashtirishga qaratilgan chora-tadbirlarni ishlab chiqadi va qabul qiladi;

4) Vazirlikning hududiy boʻlinmalari va idoraviy mansub tashkilotlar faoliyatini tashkil etish va faoliyati natijalari toʻgʻrisida hisobot va axborot materiallari, statistika va boshqa maʼlumotlar oʻrganilishini tashkil etadi;

5) Vazirlikning hududiy boʻlinmalari va idoraviy mansub tashkilotlar ish rejalarini tahlil qiladi, ularning faoliyatini rejalashtirishni takomillashtirishga doir chora-tadbirlar koʻradi;