Oʻzbekiston Respublikasining qonunchilik hujjatlariga kiritilgan oʻzgartish va qoʻshimchalarni, mamlakatimizda olib borilayotgan siyosiy-huquqiy, ijtimoiy-iqtisodiy islohotlar natijasida davlat boshqaruvi sohasidagi tarkibiy oʻzgarishlarni inobatga olgan holda, shuningdek, mahalliy vakillik organlari faoliyati samaradorligini oshirishga koʻmaklashish maqsadida Oʻzbekiston Respublikasi Oliy Majlisining Senati qaror qiladi:

1. Quyidagilar:

Xalq deputatlari viloyat, tuman, shahar Kengashining namunaviy reglamenti 1-ilovaga;

Xalq deputatlari viloyat, tuman, shahar Kengashining doimiy komissiyalari toʻgʻrisidagi namunaviy nizom 2-ilovaga muvofiq tasdiqlansin.

2. Xalq deputatlari viloyatlar, tumanlar, shaharlar Kengashlariga oʻn kunlik muddatda:

xalq deputatlari viloyat, tuman shahar Kengashlarining reglamentlari va doimiy komissiyalari toʻgʻrisidagi nizomlarni Xalq deputatlari viloyat, tuman, shahar Kengashining namunaviy reglamenti hamda Xalq deputatlari viloyat, tuman, shahar Kengashining doimiy komissiyalari toʻgʻrisidagi namunaviy nizomda bayon etilgan qoidalar asosida qayta koʻrib chiqish;

nizomlarga kiritilgan qoʻshimcha va oʻzgartirishlar asosida xalq deputatlari mahalliy Kengashlari doimiy komissiyalari tarkibini qayta shakllantirish tavsiya etilsin.

3. Oʻzbekiston Respublikasi Oliy Majlisi Senati qoʻmitalari:

xalq deputatlari mahalliy Kengashlarining tegishli doimiy komissiyalari bilan hamkorlikda ishlarni kuchaytirsin;

doimiy komissiyalar vakolati va vazifalaridan kelib chiqib, ularning faoliyat samaradorligini oshirish maqsadida har chorakda kamida bir marotaba doimiy komissiya aʼzolari uchun amaliy seminarlar tashkil etishni yoʻlga qoʻysin;

Senat qoʻmitalari tomonidan hududlarda amalga oshiriladigan nazorat tadbirlari hamda oʻrganishlarga joylardagi doimiy komissiyalar aʼzolarini faol jalb etsin.

4. Oʻzbekiston Respublikasi Oliy Majlisi Senatining Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi xalq deputatlari mahalliy Kengashlariga oʻz faoliyatini reglament asosida olib borishlari uchun amaliy yordam koʻrsatib borsin.

5. Quyidagilar:

Oʻzbekiston Respublikasi Oliy Majlisi Senati Kengashining 2006-yil 8-iyundagi “Oʻzbekiston Respublikasi Prezidenti Islom Karimovning 2005-yilda mamlakatni ijtimoiy-iqtisodiy rivojlantirish yakunlari va 2006-yilda iqtisodiy islohotlarni chuqurlashtirishning eng muhim ustuvor yoʻnalishlariga bagʻishlangan Vazirlar Mahkamasining 2006-yil 10-fevralda boʻlib oʻtgan yigʻilishidagi hamda Oʻzbekiston Respublikasi Oliy Majlisi Senatining 2006-yil 24-fevralda oʻtkazilgan beshinchi yalpi majlisidagi “Mamlakatimiz taraqqiyotining qonuniy asoslarini mustahkamlash — faoliyatimiz mezoni boʻlishi darkor” maʼruzalarining asosiy qoidalarini amalga oshirishga qaratilgan chora-tadbirlarni bajarishga oid Oʻzbekiston Respublikasi Oliy Majlisi Senati harakat dasturining 10-bandini amalga oshirish haqida”gi 173-I-sonli Qarori;

Oʻzbekiston Respublikasi Oliy Majlisi Senati Kengashining 2007-yil 9-martdagi “Oʻzbekiston Respublikasi Oliy Majlisi Senati Kengashining 2006-yil 8-iyundagi 173-I-sonli Qarori bilan tasdiqlangan Xalq deputatlari mahalliy Kengashlarining namunaviy reglamentiga, Xalq deputatlari mahalliy Kengashlarining doimiy komissiyalari toʻgʻrisidagi namunaviy nizomga hamda Xalq deputatlari mahalliy Kengashlari faoliyatini tashkil etishga oid ayrim tavsiyalarga oʻzgartish va qoʻshimchalar kiritish haqida”gi 305-I-sonli Qarori;

Oʻzbekiston Respublikasi Oliy Majlisi Senati Kengashining 2010-yil 30-dekabrdagi “Xalq deputatlari viloyat, tuman, shahar Kengashining namunaviy reglamentini va Xalq deputatlari viloyat, tuman, shahar Kengashining doimiy komissiyalari toʻgʻrisidagi namunaviy nizomni tasdiqlash haqida”gi 154-II-sonli Qarori;

Oʻzbekiston Respublikasi Oliy Majlisi Senati Kengashining 2015-yil 22-iyundagi “Xalq deputatlari viloyat, tuman, shahar Kengashining namunaviy reglamentiga oʻzgartish va qoʻshimcha kiritish toʻgʻrisida”gi KQ-28-III-sonli Qarori;

Oʻzbekiston Respublikasi Oliy Majlisi Senati Kengashining 2017-yil 30-iyundagi “Xalq deputatlari viloyat, tuman, shahar Kengashining namunaviy reglamentiga qoʻshimcha kiritish toʻgʻrisida”gi KQ-203-III-sonli Qarori;

Oʻzbekiston Respublikasi Oliy Majlisi Senati Kengashining 2018-yil 25-maydagi “Xalq deputatlari viloyat, tuman, shahar Kengashining namunaviy reglamentiga hamda Xalq deputatlari viloyat, tuman, shahar Kengashining doimiy komissiyalari toʻgʻrisidagi namunaviy nizomga oʻzgartirish va qoʻshimchalar kiritish toʻgʻrisida”gi KQ-354-III-sonli Qarori;

Oʻzbekiston Respublikasi Oliy Majlisi Senati Kengashining 2019-yil 18-iyundagi “Xalq deputatlari viloyat, tuman, shahar Kengashining namunaviy reglamentiga hamda Xalq deputatlari viloyat, tuman, shahar Kengashining doimiy komissiyalari toʻgʻrisidagi namunaviy nizomga oʻzgartirishlar kiritish toʻgʻrisida”gi KQ-550-III-sonli Qarori oʻz kuchini yoʻqotgan deb topilsin.

6. Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari mazkur qarorning xalq deputatlari tuman (shahar) Kengashlariga yetkazilishini taʼminlasin.

7. Ushbu Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

8. Mazkur Qaror qabul qilingan kundan eʼtiboran kuchga kiradi.

1-modda. Xalq deputatlari viloyat, tuman, shahar Kengashi (bundan buyon matnda mahalliy Kengash deb yuritiladi) davlat hokimiyatining vakillik organidir.

Mahalliy Kengash oʻz faoliyatini Oʻzbekiston Respublikasining Konstitutsiyasi, Oʻzbekiston Respublikasining Saylov kodeksi, Oʻzbekiston Respublikasining “Mahalliy davlat hokimiyati toʻgʻrisida”gi, “Xalq deputatlari viloyat, tuman va shahar Kengashi deputatining maqomi toʻgʻrisida”gi qonunlari va boshqa qonunlari, Oʻzbekiston Respublikasi Oliy Majlisi palatalarining qarorlari, shuningdek oʻz reglamentiga muvofiq amalga oshiradi.

Qoraqalpogʻiston Respublikasi hududidagi xalq deputatlari tuman (shahar) Kengashi oʻz faoliyatini Oʻzbekiston Respublikasining Konstitutsiyasi va qonunlari, Qoraqalpogʻiston Respublikasi Konstitutsiyasi va qonunlari, shuningdek oʻz reglamentiga muvofiq amalga oshiradi.

2-modda. Mahalliy Kengash faoliyati masalalarni jamoa boʻlib va erkin muhokama qilishga, oshkoralikka, jamoatchilik fikrini hisobga olishga asoslanadi.

3-modda. Mahalliy Kengash oʻz faoliyatining asosiy yoʻnalishlarini mahalliy Kengashning sessiyasida (bundan buyon matnda sessiya deb yuritiladi) tasdiqlangan ish rejasi asosida belgilab oladi. Mahalliy Kengash faoliyatining asosiy yoʻnalishlarini oʻz ichiga oladigan ish rejasi asosida mahalliy Kengashning doimiy komissiyalari (bundan buyon matnda doimiy komissiyalar deb yuritiladi) ish rejalari tuziladi.

Mahalliy Kengashning ish rejasi mahalliy Kengash deputatlari (bundan buyon matnda deputatlar deb yuritiladi), doimiy komissiyalar, mahalliy hokimlikning boʻlimlari, boshqarmalari va boshqa tarkibiy boʻlinmalari, hududda joylashgan korxona, tashkilot va muassasalar, nodavlat notijorat tashkilotlari, fuqarolarning oʻzini oʻzi boshqarish organlari takliflari, shuningdek hududiy vakillik organi sifatida Oʻzbekiston Respublikasi Oliy Majlisi Senati tavsiyalarini inobatga olgan holda ishlab chiqiladi.

Mahalliy Kengashning ish rejasi sessiyada qabul qilinadi va ommaviy axborot vositalarida eʼlon qilinadi.

Mahalliy Kengash ish rejasining bajarilishi uning sessiyalarida, sessiyalar oraligʻida esa doimiy komissiyalar majlislarida muhokama qilinadi.

Mahalliy Kengashning ish rejasiga oʻzgartirish va qoʻshimchalar kiritish toʻgʻrisidagi masala hokim — mahalliy Kengash rahbari, doimiy komissiyalar, deputatlarning taklifiga binoan sessiyada koʻrib chiqiladi. Ushbu masala yuzasidan qaror mahalliy Kengash reglamentida belgilangan tartibda qabul qilinadi.

Mahalliy Kengashning ish rejasi bajarilishini tashkil etish, shuningdek doimiy komissiyalarning ish rejalari doimiy komissiyalar tomonidan oʻz vaqtida ijro qilinishi uchun hokim — mahalliy Kengash rahbari masʼul hisoblanadi.

4-modda. Hokim — mahalliy Kengash rahbari mahalliy Kengash ishini tashkil etadi, mahalliy Kengashga koʻrib chiqish uchun kiritiladigan masalalarni tayyorlashga umumiy rahbarlik qiladi, uning sessiyalarida raislik qiladi.

Hokim oʻz faoliyati toʻgʻrisida mahalliy Kengash oldida hisobot beradi.

Mahalliy Kengashning vakolat muddati — besh yil.

5-modda. Mahalliy Kengash hudud uchun umumiy boʻlgan ijtimoiy-iqtisodiy rivojlanish vazifalarining amalga oshirilishini, joylarda Oʻzbekiston Respublikasining Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmon va qarorlari, Oʻzbekiston Respublikasi Vazirlar Mahkamasining qarorlari, yuqori turuvchi mahalliy Kengash va hokimning qarorlari ijro etilishini, Oʻzbekiston Respublikasi davlat hokimiyati va boshqaruvi organlari bilan fuqarolarning oʻzini oʻzi boshqarish organlari oʻrtasidagi aloqani, aholini tegishli hududni boshqarishga jalb etishni taʼminlaydi.

Mahalliy Kengash hududda oʻzini oʻzi boshqarishning rivojlanishiga koʻmaklashadi, fuqarolarning oʻzini oʻzi boshqarish organlarining faoliyatini yoʻnaltirib turadi.

6-modda. Mahalliy Kengashning asosiy vakolatlariga:

hokimning taqdimiga binoan hududni rivojlantirishning istiqbolga moʻljallangan dasturlarini, tuman, shaharning bosh rejasi va uni qurish qoidalarini tasdiqlash;

mahalliy budjetni (tuman, shahar budjetini) hokimning taqdimnomasiga binoan koʻrib chiqish hamda qabul qilish;

mahalliy budjetning (tuman, shahar budjetining) tegishli davrdagi ijrosi toʻgʻrisidagi hisobotni hokimning taqdimnomasiga binoan koʻrib chiqish hamda tasdiqlash;

mahalliy soliqlar va boshqa majburiy toʻlovlarning stavkalarini qonun hujjatlarida belgilangan miqdorlar doirasida belgilash;

hokimni va uning oʻrinbosarlarini lavozimga tasdiqlash, hokimni va uning oʻrinbosarlarini lavozimdan ozod etish, ularning faoliyatiga doir hisobotlarini, shuningdek hokimning hudud ijtimoiy-iqtisodiy rivojlanishining eng muhim va dolzarb masalalari yuzasidan hisobotini tinglash;

Oʻzbekiston Respublikasining “Mahalliy davlat hokimiyati toʻgʻrisida”gi Qonunida nazarda tutilgan hollarda hokim qarorlarini tasdiqlash;

mahalliy Kengashning Ish tartibini, doimiy komissiyalar va boshqa komissiyalar toʻgʻrisidagi nizomlarni tasdiqlash, ularga oʻzgartirishlar va qoʻshimchalar kiritish;

doimiy komissiyalar va muvaqqat komissiyalarni, mahalliy Kengashning boshqa organlarini tuzish, saylash va tugatish, ularning tarkibini oʻzgartirish, ular ishiga doir hisobotlarni tinglash;

qonunlarda belgilangan hollarda va tartibda deputatlarning vakolatlarini eʼtirof etish va muddatidan oldin toʻxtatish, ularni javobgarlikka tortish uchun rozilik berish;

mahalliy ijro hokimiyati boʻlimlari, boshqarmalari, boshqa tarkibiy boʻlinmalari, mahalliy davlat boshqaruvi organlari rahbarlarining hisobotlarini (axborotlarini), shu jumladan qonunlarga rioya etilishi, mahalliy Kengash qarorlarining va doimiy komissiyalar tavsiyalarining bajarilishi yuzasidan hisobotlarini (axborotlarini) eshitish;

deputatlarning soʻrovlarini koʻrib chiqish va ular yuzasidan qarorlar qabul qilish;

hokimning va quyi mahalliy Kengashning Oʻzbekiston Respublikasi qonunchiligiga mos kelmaydigan qarorlarini bekor qilish;

hokimning taqdimiga binoan hokimlik tarkibiy tuzilmalarini, uning xodimlari shtatlari va ish haqi fondini tasdiqlash kiradi.

Mahalliy Kengash fuqarolarning huquqlari va qonuniy manfaatlariga, ijtimoiy-iqtisodiy rivojlanishni taʼminlashga, atrof muhitni muhofaza qilishga doir oʻz vakolatlariga berilgan masalalarni, tashkiliy masalalar va Oʻzbekiston Respublikasining qonunchilik hujjatlariga muvofiq boshqa masalalarni hal etadi.

7-modda. Mahalliy Kengash berilgan vakolatlari doirasida umum manfaatini ifodalovchi tadbirlarni oʻtkazish maqsadida Oʻzbekiston Respublikasining boshqa hududlaridagi davlat hokimiyati va boshqaruvi organlari bilan shartnomaviy munosabatlar oʻrnatishga haqlidir.

8-modda. Mahalliy Kengash oʻz faoliyatini sessiyalar, doimiy komissiyalar va muvaqqat komissiyalar, mahalliy Kengashning boshqa organlari orqali, shuningdek deputatlarning Oʻzbekiston Respublikasi qonun hujjatlari va mahalliy Kengash reglamentida belgilangan tartibda oʻz vakolatlarini roʻyobga chiqarish yoʻli bilan amalga oshiradi.

9-modda. Mahalliy Kengashning asosiy ish shakli sessiyadir.

Sessiya Oʻzbekiston Respublikasi qonun hujjatlari bilan mahalliy Kengash vakolatiga kiritilgan har qanday masalani koʻrib chiqishga haqli.

10-modda. Sessiyalar hokim — mahalliy Kengash rahbari, u yoʻqligida esa uning oʻrinbosarlaridan biri tomonidan zaruratga qarab, biroq yiliga kamida ikki marta chaqiriladi.

Sessiyalar deputatlarning kamida uchdan ikki qismi tashabbusi bilan ham chaqirilishi mumkin.

11-modda. Sessiya kun tartibi hokim — mahalliy Kengash rahbari, partiyalar guruhlari, doimiy komissiyalar va deputatlar tomonidan bildirilgan takliflarni inobatga olgan holda tayyorlanadi.

Sessiya muhokamasiga kiritilayotgan eng muhim va dolzarb ahamiyatga ega masalalarni tayyorlash uchun hokim — mahalliy Kengash rahbari tomonidan tegishli tarmoqlar mutaxassislari hamda ekspertlarini jalb etgan holda ishchi guruh tashkil etilishi mumkin. Ishchi guruh masalani tayyorlash vaqtida saylovchilar, hokimlikning boʻlimlari, boshqarmalari va boshqa tarkibiy boʻlinmalari, shuningdek tegishli hududdagi korxonalar, tashkilotlar, muassasalar, nodavlat notijorat tashkilotlari, fuqarolarning oʻzini oʻzi boshqarish organlarining fikr-mulohazalarini inobatga oladi.

Sessiya muhokamasiga kiritilayotgan masalalar dastlabki tarzda tegishli doimiy komissiyalar tomonidan koʻrib chiqiladi, ular tomonidan tayyorlangan qaror loyihalari va kun tartibi boʻyicha boshqa hujjatlar hokim — mahalliy Kengash rahbariga hamda mahalliy Kengash kotibiyati mudiriga beriladi.

Sessiyada koʻrib chiqilishi kerak boʻlgan masalalar sessiya kun tartibi loyihasiga ularni koʻrib chiqish navbati, har bir masalani koʻrib chiqish uchun tayyorlashga masʼul boʻlgan doimiy komissiyalar, maʼruzachilar (qoʻshimcha maʼruzachilar), shuningdek boshqa maʼlumotlar kiritilgan holda tuziladi.

Sessiya kun tartibi mahalliy Kengash qarori bilan tasdiqlanadi.

12-modda. Sessiyani, shu jumladan navbatdan tashqari sessiyani chaqirish haqidagi qaror hokim — mahalliy Kengash rahbari tomonidan qabul qilinadi.

Sessiya oʻtkaziladigan vaqt, sana, joy va kun tartibi deputatlar eʼtiboriga sessiya ochilishidan kamida yetti kun oldin yetkaziladi. Deputatlarga tanishib chiqish uchun tegishli hujjatlar ham yuboriladi.

Sessiyani chaqirish toʻgʻrisidagi xabar ommaviy axborot vositalari orqali eʼlon qilinishi mumkin.

Sessiyalar ochiq, oshkora oʻtkaziladi va ommaviy axborot vositalari tomonidan yoritiladi.

Zarur hollarda mahalliy Kengash yopiq sessiya oʻtkazish toʻgʻrisida qaror qabul qilishi mumkin. Bunday qaror, agar bu haqdagi taklif hokim — mahalliy Kengash rahbari, doimiy komissiyalar, partiyalar guruhlari tomonidan kiritilgan boʻlsa, qabul qilinishi mumkin. Yopiq sessiya oʻtkazish toʻgʻrisidagi qaror deputatlar umumiy sonining kamida uchdan ikki qismining ovozi bilan qabul qilinadi.

Sessiyalar axborot-kommunikatsiya texnologiyalari vositalaridan foydalangan holda videokonferensaloqa rejimida oʻtkazilishi ham mumkin. Bunda deputatlar joylardan turib jamoaviy yoki yakka tartibda ishtirok etishlari mumkin.

Videokonferensaloqa rejimida oʻtkaziladigan sessiyani olib borish, kun tartibidagi masalalarni koʻrib chiqish va qarorlar qabul qilish mahalliy Kengash Reglamentida belgilangan umumiy tartibda amalga oshiriladi.

Sessiya videokonferensaloqa rejimida oʻtkazilganda ovozlarni hisoblash va ovoz berish natijalarini aniqlash bilan bogʻliq masalalarni hal etish uchun deputatlar orasidan sanoq komissiyasi tuziladi.

Videokonferensaloqa rejimida oʻtkaziladigan sessiyalarda ovoz berish quyidagi tartibda amalga oshiriladi:

sessiyada raislik qiluvchi tomonidan masala ovozga qoʻyilganligi eʼlon qilinadi;

markaziy studiyada hozir boʻlgan, jamoaviy va yakka tartibda ulanish nuqtasidan ishtirok etayotgan deputatlar qoʻllarini koʻtarib ovoz beradilar, ovoz berish elektron tizim orqali ham amalga oshirilishi mumkin;

raislik qiluvchi “qarshilar” bormi, “betaraflar” bormi degan savollar bilan murojaat qiladi, deputatlar bu savollarga ham qoʻllarini koʻtarib javob beradilar;

sessiyada ishtirok etayotgan barcha deputatlar tasviri ekranga chiqariladi, ovoz berish jarayonida barcha deputatlar koʻrinib turishi shart;

ovoz berish natijasi sanoq komissiyasi tomonidan qayd etib boriladi;

sessiyada ishtirok etayotgan barcha deputatlar ovoz berib boʻlganidan soʻng sanoq komissiyasi tomonidan raislik qiluvchiga ovoz berish natijalari toʻgʻrisida maʼlumot beriladi;

raislik qiluvchi ovoz berish natijalarini eʼlon qiladi.

13-modda. Agar sessiyada deputatlar umumiy sonining kamida uchdan ikki qismi hozir boʻlsa, u vakolatli hisoblanadi.

Deputatlarni roʻyxatga olish sessiya ochilishidan oldin va uning ishidagi har bir tanaffusdan keyin amalga oshiriladi.

Agar sessiyalarni oʻtkazishga moʻljallangan binoda elektron ovoz berish tizimidan foydalanish koʻzda tutilgan boʻlsa, har bir deputat uchun doimiy oʻrin ajratiladi.

14-modda. Sessiyalar ishi davlat tilida olib boriladi va zarurat boʻlganda mahalliy Kengashning qarori asosida boshqa tillarga sinxron tarjima taʼminlanadi.

15-modda. Sessiyalarda Oʻzbekiston Respublikasi Oliy Majlisi Senatining aʼzolari, Oʻzbekiston Respublikasi Oliy Majlisi Qonunchilik palatasining deputatlari, shuningdek hududdagi davlat organlari, korxonalar, tashkilotlar, muassasalar, nodavlat notijorat tashkilotlari, fuqarolarning oʻzini oʻzi boshqarish organlari, ommaviy axborot vositalarining taklif etilgan vakillari hamda boshqa shaxslar ishtirok etishlari mumkin.

Sessiyaga taklif etilgan shaxslar muhokama etilayotgan masalalar yuzasidan qaror qabul qilishda ovoz berish huquqiga ega emas, shuningdek mahalliy Kengashning reglamentida belgilangan tartibga rioya qilishlari va raislik qiluvchining farmoyishlariga boʻysunishlari shart.

Sessiyaga taklif qilinadigan shaxslarning soni va tarkibi hokim — mahalliy Kengash rahbari tomonidan hal etiladi.

Sessiyada raislik qiluvchi sessiyada ishtirok etayotgan deputatlar soni, taklif etilgan shaxslar tarkibi toʻgʻrisida deputatlarga axborot beradi.

Sessiyaga taklif qilingan shaxslar uchun majlislar zalida maxsus joylar ajratiladi.

16-modda. Yangi saylangan mahalliy Kengashning birinchi sessiyasi hokim tomonidan saylovdan keyin kechi bilan uch hafta muddat ichida chaqiriladi.

Birinchi sessiya mahalliy Kengashning keksa deputatlaridan biri tomonidan ochiladi, u mahalliy Kengash tomonidan mahalliy Kengash rahbari tasdiqlangunga qadar sessiyani boshqaradi.

Sessiyalarda hokim — mahalliy Kengash rahbari, u yoʻqligida esa mahalliy Kengash qaroriga yoki hokim topshirigʻiga binoan deputatlardan biri raislik qiladi.

17-modda. Deputatlarning vakolatlarini tasdiqlash toʻgʻrisidagi qaror yangi saylangan mahalliy Kengashning birinchi sessiyasida saylovni oʻtkazgan saylov komissiyasining taqdimiga muvofiq qabul qilinadi.

Boʻshab qolgan deputatlik oʻrniga saylov oʻtkazilganida deputatning vakolatini tasdiqlash toʻgʻrisidagi qaror sessiyada saylov komissiyasining taqdimiga muvofiq qabul qilinadi.

18-modda. Sessiya oʻz ishini kun tartibini tasdiqlashdan boshlaydi.

Sessiya kun tartibidagi masalalar raislik qiluvchi tomonidan bandma-band yoki butunlay ovozga qoʻyilishi mumkin.

Sessiyaning kun tartibi boʻyicha taklif va mulohazalar deputatlar tomonidan ogʻzaki yoki yozma shaklda beriladi va sessiyada raislik qiluvchi tomonidan ularning kelib tushish tartibi boʻyicha eʼlon qilinadi.

Sessiya kun tartibi boʻyicha qaror deputatlar bildirgan takliflarni hisobga olgan holda qabul qilinadi.

19-modda. Har bir sessiyani oʻtkazish vaqtida deputatlar orasidan sessiya kotibi saylanadi yoki sessiya kotibiyati tuziladi.

Sessiya kotibi yoki kotibiyati:

soʻzga chiquvchilarning roʻyxatini olib boradi;

deputat soʻrovlarini, deputatlardan tushadigan savollar, maʼlumotnomalar, xabarlar, arizalar, takliflar va boshqa materiallarni roʻyxatga oladi;

soʻzga chiqish uchun yozilganlarning roʻyxati va tushgan materiallar haqida raislik qiluvchiga axborot beradi;

sessiya ishiga taalluqli masalalar yuzasidan deputatlarga tushuntirishlar beradi;

sessiya yakunlari yuzasidan axborot tayyorlaydi;

bayonnoma yoki stenogramma yuritilishini tashkil etadi.

Sessiyada sessiya kotibi yoki kotibiyati tomonidan tayyorlangan axborot tinglanadi.

20-modda. Sessiyada bayonnoma yuritiladi. Sessiya bayonnomasi raislik qiluvchi va kotib tomonidan imzolanadi.

Sessiya bayonnomasida quyidagilar koʻrsatiladi:

mahalliy Kengashning nomi, sessiyaning tartib raqami (chaqiriq doirasida);

sessiyani oʻtkazish vaqti, sanasi, joyi va sessiya kun tartibi;

hozir boʻlgan va qatnashmayotgan deputatlar soni, shuningdek taklif etilgan shaxslarning soni;

sessiyaning kun tartibi, sessiya muhokamasiga kiritilgan har bir masala yuzasidan har bir maʼruzachi va qoʻshimcha maʼruzachining familiyasi hamda lavozimi;

muzokaralarda soʻzga chiqqan, shuningdek maʼruzachilar va qoʻshimcha maʼruzachilarga soʻrovlar yoʻllagan yoki savollar bergan (yozma yoki ogʻzaki shaklda) deputatlarning familiyalari, saylov okruglarining raqami va lavozimlari;

qabul qilingan, “yoqlayman”, “qarshiman” yoki “betarafman” deb berilgan ovozlar soni koʻrsatilgan qarorlar roʻyxati.

Bayonnomada sessiya kun tartibiga qoʻyilgan masalalarning mohiyati ochib beriladi, sessiya davomida soʻzlangan nutqlarning mohiyati qisqacha bayon etiladi, shuningdek sessiya kun tartibidagi masalalar yuzasidan ovoz berish yakunlari qayd etiladi.

Sessiyaning bayonnomasiga deputatlar va taklif etilgan shaxslarning sessiyadagi maʼruzalari matnlari, sessiyada hozir boʻlgan va qatnashmayotgan deputatlar roʻyxati, taklif etilgan shaxslar roʻyxati va boshqa materiallar ilova qilinadi.

Sessiya bayonnomasi sessiya tugaganidan soʻng uch kundan kechiktirmay tayyorlanadi va sessiya vaqtida raislik qilgan shaxs hamda kotib tomonidan imzolanadi.

Sessiya jarayoni audio, video shaklda yozib olinishi yoki stenogrammasi yuritilishi mumkin.

Sessiya bayonnomasining asl nusxasi, audio, video yozuvlari, stenogrammasi mahalliy Kengash kotibiyatida saqlanadi.

Sessiya bayonnomasi, audio, video yozuvlari, stenogrammasi deputatlarning talabiga binoan tanishib chiqish uchun ularga berilishi mumkin.

Yopiq sessiya bayonnomasi, audio, video yozuvlari, stenogrammasi mahalliy Kengash kotibiyatida “maxfiy hujjat” belgisi bilan saqlanadi. Yopiq sessiya bayonnomasi unga unga taalluqli materiallar bilan deputatlarni tanishtirish bevosita mahalliy Kengash kotibiyatida tilxat olinib amalga oshiriladi.

21-modda. Sessiyada raislik qiluvchi:

sessiya ishining umumiy borishiga rahbarlik qiladi, mahalliy Kengash reglamentiga rioya etilishini taʼminlaydi;

maʼruzachilar, qoʻshimcha maʼruzachilarga va muzokaralarda soʻzga chiquvchilarga navbati bilan soʻz beradi;

zarur hollarda sababini tushuntirib, soʻzga chiqish tartibini oʻzgartiradi;

muhokama qilinayotgan masala yuzasidan xohlagan paytda soʻzga chiqishi mumkin;

mahalliy Kengash reglamentida belgilangan tartibni qoʻpol ravishda buzgan deputat yoki ishtirokchini tartibga chaqiradi;

deputatlarning yozma soʻrovlari, arizalari, takliflari, fikr-mulohazalarini oʻqib eshittiradi;

deputatga deputat soʻrovi, savol, taklif, fikr-mulohaza yuzasidan soʻzga chiqish, shuningdek sessiyani olib borish tartibi boʻyicha eʼtirozlar bildirish uchun, qaror loyihalariga tuzatish, ovoz berish masalasi boʻyicha takliflar kiritish uchun uning iltimosiga koʻra soʻz beradi;

muhokama tugaganidan keyin qarorlar loyihalarini ovozga qoʻyadi va ovoz berish natijalarini eʼlon qiladi;

sessiyada qabul qilingan qarorlarni va sessiya bayonnomalarini imzolaydi;

muhokama jarayonida soʻzga chiqqan deputatlar yoki boshqa ishtirokchilar fikrini biron-bir tarzda baholash yoxud sharhlashdan, shuningdek qaror qabul qilishda tazyiq oʻtkazishdan oʻzini tiyishi lozim.

Sessiyada raislik qiluvchi:

mahalliy Kengash reglamenti talablari qoʻpol ravishda buzilgan taqdirda deputatni ogohlantirishga, takroran buzishga yoʻl qoʻyilganida esa, uni butun sessiya kuni davomida soʻzdan mahrum qilishga;

sessiya ishiga xalaqit berayotgan taklif qilingan shaxslarni sessiya zalidan chiqarib yuborishga haqli.

22-modda. Hududni ijtimoiy-iqtisodiy rivojlantirish masalalarini va eng muhim muammolarni muhokama etish maqsadida Oʻzbekiston Respublikasi Oliy Majlisi Senati qoʻmitalari (komissiyalari) va mahalliy Kengashning qoʻshma majlisi oʻtkazilishi mumkin.

Oʻzbekiston Respublikasi Oliy Majlisi Senatining qoʻmitasi (komissiyasi) va mahalliy Kengashning qoʻshma majlisi Oʻzbekiston Respublikasi Oliy Majlisi Senati qoʻmitasi (komissiyasi)ning raisi va hokim — mahalliy Kengash rahbari oʻrtasida kelishuv boʻyicha oʻtkaziladi.

Oʻzbekiston Respublikasi Oliy Majlisi Senatining qoʻmitasi (komissiyasi) va mahalliy Kengashning qoʻshma majlisi kun tartibidagi masalalar Oʻzbekiston Respublikasi Oliy Majlisi Senatining qoʻmitasi (komissiyasi) tomonidan mahalliy Kengashning tegishli doimiy komissiyasi bilan hamkorlikda tayyorlanadi.

Oʻzbekiston Respublikasi Oliy Majlisi Senatining qoʻmitasi (komissiyasi) va mahalliy Kengashning qoʻshma majlisini chaqirish, uni oʻtkazish vaqti, sanasi, joyi va boshqa masalalar mahalliy Kengash reglamentiga muvofiq Oʻzbekiston Respublikasi Oliy Majlisi Senati qoʻmitasi (komissiyasi)ning raisi va hokim — mahalliy Kengash rahbari oʻrtasida kelishuv boʻyicha hal etiladi.

23-modda. Mahalliy Kengash oʻz sessiyalarida vakolatlari doirasida qonuniylik va huquqiy-tartibotni, fuqarolarning xavfsizligini taʼminlash, hududni iqtisodiy, ijtimoiy va madaniy rivojlantirish, mahalliy budjetni shakllantirish hamda uni ijro etish, mahalliy soliq va boshqa majburiy toʻlovlar miqdorlarini belgilash, atrof-muhitni muhofaza qilish va qonun hujjatlariga muvofiq boshqa masalalarni koʻrib chiqadi hamda tegishli qarorlarni qabul qiladi.

24-modda. Sessiya muhokamasiga kiritilgan kun tartibidagi har bir masala, jumladan mahalliy budjet toʻgʻrisidagi va uning ijrosi haqidagi hisobot, hokim — mahalliy Kengash rahbari va uning oʻrinbosarlari, hokimlik boʻlimlari, boshqarmalari va boshqa tarkibiy boʻlinmalari faoliyati haqidagi hisobotlar tinglanadi hamda erkin muhokama qilinadi.

Muhokama jarayoni mazkur masala yuzasidan hokim — mahalliy Kengash rahbari, uning oʻrinbosarlari, doimiy komissiyalar raislarining maʼruzalari va qoʻshimcha maʼruzalarini, deputatlarning maʼruzalari va qoʻshimcha maʼruzalarini tinglash, shuningdek taklif etilgan shaxslarning fikr bildirishi shaklida amalga oshiriladi.

Ayrim hollarda muhokama etilayotgan masalaning mazmunini hisobga olgan holda, sessiya mazkur masalaning mazmuniga doir qisqacha axborotni tinglab yoki doimiy komissiyalar raislari yoxud deputatlarning tushuntirishlari bilan cheklanib, uni muhokama etmasdan qaror qabul qilishi mumkin.

25-modda. Sessiyada raislik qiluvchi tomonidan maʼruzachilar va qoʻshimcha maʼruzachilar bilan kelishuvga koʻra, qoida tariqasida, maʼruza uchun — 30 daqiqagacha, qoʻshimcha maʼruza uchun — 20 daqiqagacha va yakunlovchi soʻz uchun 15 daqiqagacha vaqt belgilanadi.

Muzokaralarda soʻzga chiquvchi deputatlarga 10 daqiqagacha vaqt beriladi. Muzokaralarda takroran soʻzga chiqish uchun, shuningdek sessiya ishini olib borish tartibi, ovoz berish asoslari, nomzodlar boʻyicha soʻzga chiqish uchun, arizalar, savollar, takliflar, xabarlar, maʼlumotlar uchun 3 daqiqagacha vaqt beriladi.

Sessiyada hozir boʻlgan deputatlar koʻpchiligining roziligi bilan raislik qiluvchi sessiya kun tartibiga kiritilgan masalani muhokama qilishning umumiy vaqtini, savollar va javoblar uchun ajratiladigan vaqtni belgilab qoʻyishi, soʻzlash vaqtini uzaytirishi mumkin.

Sessiyalarda deputat ayni bir masala boʻyicha muzokaralarda koʻpi bilan ikki marta soʻzga chiqishi mumkin.

Muzokaralarni toʻxtatish toʻgʻrisida qaror qabul qilingandan keyin maʼruzachi va qoʻshimcha maʼruzachi yakunlovchi soʻzni aytish huquqiga ega.

Agar soʻzga chiquvchi ajratilgan vaqtdan ortiq soʻzlasa yoki muhokama etilayotgan masala yuzasidan fikr bildirmayotgan boʻlsa, sessiyada raislik qiluvchi uni avval ogohlantirib, keyin soʻzdan mahrum qiladi.

26-modda. Sessiyada qarorlar ochiq ovoz berish yoʻli bilan qabul qilinadi. Zarur hollarda mahalliy Kengash qaroriga asosan yashirin ovoz berish oʻtkazilishi mumkin.

Elektron ovoz berish tizimlari oʻrnatilgan zallarda ochiq yoki yashirin ovoz berish elektron ovoz berish tizimidan foydalangan holda oʻtkaziladi.

27-modda. Deputat oʻzining ovoz berish huquqini shaxsan amalga oshiradi.

Har bir deputat bir ovozga ega boʻladi va muhokama qilinayotgan masala yuzasidan “yoqlayman”, “qarshiman” yoki “betarafman” deb ovoz beradi.

Ovoz berish vaqtida hozir boʻlmagan deputat keyinchalik ovoz berishga haqli emas.

Ochiq ovoz berish ovozlar mutlaq koʻpchilikni tashkil etgan taqdirda ovozlarni sanamasdan, agar faqat deputatlardan hech biri boshqacha tartibni taklif etmasa yoki ovozlarni qayta sanab chiqishni talab qilmasa, oʻtkazilishi mumkin.

28-modda. Sessiyalarda yashirin ovoz berishni oʻtkazish va uning natijalarini hisoblash uchun deputatlar orasidan sanoq komissiyasi saylanadi.

Sanoq komissiyasi oʻz tarkibidan komissiya raisi va kotibini saylaydi. Sanoq komissiyasining qarorlari komissiya aʼzolarining koʻpchilik ovozi bilan qabul qilinadi.

29-modda. Sessiyada yashirin ovoz berishni byulletenlardan foydalangan holda oʻtkazish toʻgʻrisida qaror qabul qilingan taqdirda, ovoz berish uchun zarur axborotga ega boʻlgan yashirin ovoz berish byulletenlari sanoq komissiyasi nazorati ostida tayyorlanadi.

Yashirin ovoz berish oʻtkaziladigan vaqti va joyi, uni oʻtkazish tartibi sanoq komissiyasi tomonidan belgilanadi.

30-modda. Yashirin ovoz berish byulletenlar yordamida oʻtkazilganida sanoq komissiyasi har bir deputatga bittadan byulleten beradi.

Byulletenni toʻldirish deputat tomonidan yashirin ovoz berish kabinasida yoki xonasida byulletendagi oʻzi yoqlab ovoz berayotgan nomzod familiyasining qarshisida oʻng tomonda joylashgan boʻsh katakka “+” yoki “” yoxud “x” qoʻyish, qaror loyihasiga oid byulletenda esa, agar u tegishli qarorni yoqlab ovoz berayotgan boʻlsa, “qarshiman” degan soʻzni oʻchirish, taklif etilayotgan qarorga (qaror variantiga) qarshi ovoz berayotgan boʻlsa, “yoqlayman” degan soʻzni oʻchirish orqali amalga oshiriladi.

Belgilanmagan shakldagi byulletenlar, shuningdek deputatlarning xohish-irodasini aniqlashga imkon bermagan byulletenlar deputatlarning ovozlarini hisoblab chiqish vaqtida haqiqiy emas deb topiladi. Byulletenga kiritilgan qoʻshimchalar ovozlarni hisoblab chiqish vaqtida eʼtiborga olinmaydi.

31-modda. Agar sessiyada elektron ovoz berish tizimi yordamida yashirin ovoz berishni oʻtkazish toʻgʻrisida qaror qabul qilingan boʻlsa, sanoq komissiyasi ovoz berish boshlanishidan oldin elektron tizimning sozligini tekshirishi hamda yashirin ovoz berish uchun deputatlar umumiy soni boʻyicha kartochkalarning toʻliq komplektini roʻyxatga olishi kerak.

32-modda. Ochiq yoki yashirin ovoz berish natijalari toʻgʻrisida sanoq komissiyasi bayonnoma tuzadi, u komissiyaning barcha aʼzolari tomonidan imzolanadi.

Sanoq komissiyasining maʼruzasiga asosan mahalliy Kengash yashirin ovoz berish natijalarini tasdiqlash toʻgʻrisida ochiq ovoz berish yoʻli bilan qaror qabul qiladi.

33-modda. Sessiyada qabul qilingan qarorlar raislik qiluvchi tomonidan imzolangan vaqtdan eʼtiboran, agar hujjatning oʻzida boshqacha tartib nazarda tutilgan boʻlmasa, kuchga kiradi.

Mahalliy Kengash tomonidan oʻz vakolatlari doirasida qabul qilingan qarorlar hududda joylashgan barcha davlat organlari, korxonalar, tashkilotlar, muassasalar, nodavlat notijorat tashkilotlari, fuqarolarning oʻzini oʻzi boshqarish organlari, mansabdor shaxslar va fuqarolar tomonidan ijro etilishi majburiydir.

Mahalliy Kengash qarorlari uning doimiy komissiyalariga, hokimlikning boʻlimlari, boshqarmalari va boshqa tarkibiy boʻlinmalariga, tegishli davlat organlariga, korxonalar, tashkilotlar, muassasalarga, nodavlat notijorat tashkilotlariga, fuqarolarning oʻzini oʻzi boshqarish organlariga, mansabdor shaxslarga va quyi turuvchi hokimliklarga tarqatiladi.

Sessiyada qabul qilingan qarorlar, qoida tariqasida, ommaviy axborot vositalarida eʼlon qilinadi, mahalliy Kengashning rasmiy veb-saytiga joylashtiriladi (yopiq qarorlar bundan mustasno).

34-modda. Viloyat (Toshkent shahar) hokimi — mahalliy Kengash rahbarining nomzodi Oʻzbekiston Respublikasi Prezidenti tomonidan mahalliy Kengashdagi partiya guruhlarining har biri bilan maslahatlashuvlar oʻtkazilganidan soʻng xalq deputatlari viloyat (Toshkent shahar) Kengashiga tasdiqlash uchun taqdim etiladi.

35-modda. Viloyat (Toshkent shahar) hokimi — mahalliy Kengash rahbarining nomzodini tasdiqlash toʻgʻrisidagi masalani xalq deputatlari viloyat (Toshkent shahar) Kengashi Oʻzbekiston Respublikasi Prezidenti tomonidan taqdimnoma kiritilgan kundan eʼtiboran uch kun ichida koʻrib chiqadi.

36-modda. Viloyat (Toshkent shahar) hokimi — mahalliy Kengash rahbari lavozimiga nomzodga deputatlarning savollariga javob berish uchun 30 daqiqagacha vaqt ajratiladi. Nomzodni sessiyada muhokama qilish uchun 20 daqiqagacha vaqt ajratiladi.

37-modda. Xalq deputatlari viloyat (Toshkent shahar) Kengashining viloyat (Toshkent shahar) hokimi — mahalliy Kengash rahbari nomzodini tasdiqlash yoki rad etish toʻgʻrisidagi qarori ochiq ovoz berish yoʻli bilan qabul qilinib, kechi bilan uch kun ichida Oʻzbekiston Respublikasi Prezidentiga yuboriladi.

38-modda. Xalq deputatlari viloyat (Toshkent shahar) Kengashi deputatlari umumiy sonining koʻpchilik ovozini olgan viloyat (Toshkent shahar) hokimi — mahalliy Kengash rahbarining nomzodi tasdiqlangan hisoblanadi.

39-modda. Agar ovoz berish vaqtida viloyat (Toshkent shahar) hokimi —mahalliy Kengash rahbarining nomzodlari deputatlar umumiy sonining koʻpchilik ovozini ololmasa, Oʻzbekiston Respublikasi Prezidenti mazkur lavozimga nomzodlarni partiya guruhlari bilan qoʻshimcha maslahatlashuvlar oʻtkazganidan soʻng bir oy ichida yana ikki marta taqdim etish huquqiga ega.

40-modda. Xalq deputatlari viloyat (Toshkent shahar) Kengashi taqdim etilgan viloyat (Toshkent shahar) hokimi — mahalliy Kengash rahbarining nomzodlarini uch marta rad etgan taqdirda, Oʻzbekiston Respublikasi Prezidenti viloyat (Toshkent shahar) hokimi vazifasini bajaruvchini tayinlash, xalq deputatlari viloyat (Toshkent shahar) Kengashini tarqatib yuborish huquqiga ega. Bunda xalq deputatlari viloyat (Toshkent shahar) Kengashiga saylov tarqatib yuborish toʻgʻrisida qaror qabul qilingan kundan eʼtiboran uch oy ichida oʻtkaziladi.

41-modda. Tuman (shahar) hokimi — mahalliy Kengash rahbarining nomzodi viloyat (Toshkent shahar) hokimi tomonidan xalq deputatlari tuman (shahar) Kengashiga tasdiqlash uchun taqdim etiladi.

42-modda. Tuman (shahar) hokimi — mahalliy Kengash rahbarining nomzodlarini tasdiqlash toʻgʻrisidagi masala viloyat (Toshkent shahar) hokimi tomonidan taqdimnoma kiritilgan kundan eʼtiboran, qoida tariqasida, uch kun ichida koʻrib chiqiladi.

43-modda. Tuman (shahar) hokimi — mahalliy Kengash rahbari lavozimiga nomzodga deputatlarning savollariga javob berish uchun 20 daqiqagacha vaqt ajratiladi. Nomzodni sessiyada muhokama qilish uchun 10 daqiqagacha vaqt ajratiladi.

44-modda. Xalq deputatlari tuman (shahar) Kengashining tuman (shahar) hokimi — mahalliy Kengashi rahbarining nomzodini tasdiqlash toʻgʻrisidagi qarori ochiq ovoz berish yoʻli bilan qabul qilinib, kechi bilan uch kun ichida viloyat (Toshkent shahar) hokimiga yuboriladi.

45-modda. Xalq deputatlari tuman (shahar) Kengashi deputatlari umumiy sonining koʻpchilik ovozini olgan tuman (shahar) hokimi — mahalliy Kengash rahbarining nomzodi tasdiqlangan hisoblanadi.

46-modda. Oʻzbekiston Respublikasi Oliy Majlisi Senatining aʼzolari (bundan buyon matnda Senat aʼzolari deb yuritiladi) Qoraqalpogʻiston Respublikasi Joʻqorgʻi Kengesi, xalq deputatlari viloyat, tuman, shahar Kengashlari deputatlarining qoʻshma majlislarida Qoraqalpogʻiston Respublikasi, viloyatlar va Toshkent shahridan teng miqdorda — olti kishidan mazkur deputatlar orasidan yashirin ovoz berish yoʻli bilan saylanadi.

47-modda. Oʻzbekiston Respublikasi Markaziy saylov komissiyasi (bundan buyon matnda Markaziy saylov komissiyasi deb yuritiladi) Qoraqalpogʻiston Respublikasi Joʻqorgʻi Kengesi, xalq deputatlari viloyat, tuman, shahar Kengashlariga saylov yakunlari eʼlon qilinganidan keyin uch kunlik muddatda Senat aʼzolarini saylash uchun deputatlarning qoʻshma majlislari (bundan buyon matnda qoʻshma majlis deb yuritiladi) oʻtkazilishini eʼlon qiladi.

Markaziy saylov komissiyasining Qoraqalpogʻiston Respublikasi, viloyatlar va Toshkent shahrida qoʻshma majlislarni oʻtkazish vaqti, sanasi va joyi koʻrsatilgan qarori ommaviy axborot vositalarida eʼlon qilinadi.

48-modda. Qoʻshma majlis ochilishi oldidan Qoraqalpogʻiston Respublikasi Joʻqorgʻi Kengesi va mahalliy Kengashlar deputatlari roʻyxatdan oʻtkaziladi.

Agar qoʻshma majlisda, deputatlar umumiy sonining kamida uchdan ikki qismi hozir boʻlsa, u vakolatli hisoblanadi.

Qoʻshma majlis ishida Markaziy saylov komissiyasining vakili ishtirok etishi shart.

49-modda. Qoʻshma majlisni Markaziy saylov komissiyasining vakili ochadi. U majlisda raislik qiluvchining nomzodi boʻyicha taklif kiritadi, bu nomzod eng obroʻli, katta tajribaga ega, yoshi ulugʻ deputatlar orasidan tanlab olinadi.

Qoʻshma majlis ishtirokchilari majlisning kun tartibini va ish reglamentini tasdiqlaydilar.

Qoʻshma majlis kun tartibiga Senat aʼzolarini saylash toʻgʻrisidagi masala kiritiladi.

50-modda. Qoʻshma majlis ishini taʼminlash va olib borish uchun ochiq ovoz berish orqali oddiy koʻpchilik ovoz bilan uch kishidan besh kishigacha boʻlgan ishchi hayʼat tuziladi. Turli mahalliy Kengashlar deputatlari orasidan hayʼat aʼzoligiga nomzodlar raislik qiluvchi tomonidan taklif etiladi.

51-modda. Mahalliy Kengash deputatlari vakolatlarini tekshirish, tushgan takliflarni hisobga olish va qoʻshma majlis tomonidan qabul qilinadigan qarorlarni rasmiylashtirish uchun uch kishidan iborat kotibiyat tuziladi.

52-modda. Qoʻshma majlisda raislik qiluvchi taqdimiga muvofiq ochiq ovoz berish orqali oddiy koʻpchilik ovoz bilan Senat aʼzoligiga nomzodlar koʻrsatish boʻyicha Maslahat kengashi (bundan buyon matnda Maslahat kengashi deb yuritiladi) saylanadi.

Maslahat kengashi deputatlik faoliyatida katta tajribaga ega boʻlgan eng obroʻli, yoshi ulugʻ deputatlardan, qoida tariqasida, har bir mahalliy Kengashdan bir nafar vakildan saylanadi.

53-modda. Maslahat kengashi eng obroʻli, oʻz saylovchilari tomonidan keng qoʻllab-quvvatlanayotgan, davlat va jamiyat faoliyatining turli sohalarida katta amaliy tajribaga ega boʻlgan hamda alohida xizmat koʻrsatgan deputatlar orasidan Senat aʼzoligiga nomzodlarni koʻrib chiqadi.

Yashirin ovoz berish byulleteniga kiritish uchun Senat aʼzoligiga olti nafar nomzod boʻyicha Maslahat kengashining taklifi Maslahat kengashining raisi tomonidan oʻqib eshittiriladi. Yashirin ovoz berish byulleteniga olti nafar Senat aʼzoligiga nomzod kiritiladi.

54-modda. Saylov kuniga qadar yigirma besh yoshga toʻlgan va kamida besh yil Oʻzbekiston Respublikasi hududida muqim yashayotgan Qoraqalpogʻiston Respublikasi Joʻqorgʻi Kengesining, xalq deputatlari viloyat, tuman, shahar Kengashining deputati Senat aʼzoligiga nomzod boʻlishi mumkin.

55-modda. Qoʻshma majlisda Senat aʼzoligiga har bir nomzod boʻyicha alohida muhokama oʻtkaziladi.

Qoʻshma majlisda ishtirok etayotgan har bir deputat Senat aʼzoligiga nomzodga savollar berish, nomzod xususida oʻz fikrini bildirish huquqiga ega.

Senat aʼzoligiga har bir nomzod boʻyicha alohida muhokamadan keyin uni yashirin ovoz berish byulleteniga kiritish toʻgʻrisida qaror qabul qilinadi.

Taklif etilgan u yoki bu nomzodlar rad etilgan taqdirda, muhokama etish va yashirin ovoz berish byulleteniga kiritish uchun boshqa nomzodni faqat Maslahat kengashi koʻrsatishi mumkin.

Senat aʼzoligiga nomzodlarni muhokama qilish qoʻshma majlis qaroriga binoan tugallanadi.

Qoʻshma majlisda ishtirok etayotgan deputatlarning koʻpchilik ovozini olgan Senat aʼzoligiga nomzod yashirin ovoz berish byulleteniga kiritilgan hisoblanadi.

56-modda. Yashirin ovoz berish uchun byulletenning namunasi Markaziy saylov komissiyasi tomonidan tasdiqlanadi.

Yashirin ovoz berish byulletenida uni toʻldirish tartibi haqida tushuntirish berilgan boʻlishi lozim. Byulletenning old tomonida oʻng yuqori burchakda muhr va kamida ikki nafar sanoq komissiyasi aʼzosining imzosi boʻlishi kerak.

57-modda. Yashirin ovoz berishni oʻtkazish va uning natijalarini aniqlash uchun qoʻshma majlisda ishtirok etayotgan deputatlar orasidan toʻqqiz nafargacha aʼzodan, shu jumladan, komissiya raisi va kotibidan iborat tarkibda sanoq komissiyasi saylanadi.

Sanoq komissiyasining tarkibiga Senat aʼzoligiga nomzod saylanishi mumkin emas.

Sanoq komissiyasi:

Senat aʼzolarini saylash boʻyicha ovoz berishni tashkil qiladi va oʻtkazadi;

qoʻshma majlis ishtirokchilariga yashirin ovoz berishni oʻtkazish vaqti, joyi va tartibini eʼlon qiladi;

yashirin ovoz berish byulletenlarini ularga Senat aʼzoligiga har bir nomzodning familiyasi, ismi va otasining ismini alifbo tartibida kiritish yoʻli bilan, tugʻilgan sanasi, lavozimi (mashgʻulotining turi) va ish joyini koʻrsatgan holda tayyorlaydi;

ovoz beruvchilarning roʻyxatini aniqlaydi, ularga yashirin ovoz berish byulletenlarini beradi;

yashirin ovoz berish byulletenlarining old tomoniga muhr qoʻyadi va yashirin ovoz berish byulletenida sanoq komissiyasi aʼzolarining imzolari boʻlishini taʼminlaydi;

ovozlarni sanab chiqadi va yashirin ovoz berish natijalari toʻgʻrisida bayonnoma tuzadi;

yashirin ovoz berish natijalarini qoʻshma majlis tasdigʻiga kiritadi.

58-modda. Yashirin ovoz berish boshlanishidan oldin sanoq komissiyasining raisi yashirin ovoz berishni oʻtkazish tartibini eʼlon qiladi, sanoq komissiyasi aʼzolari hozirligida saylov qutisini tekshiradi va muhrlaydi.

Saylov qutisi uning yoniga ovoz beruvchilar albatta yashirin ovoz berish kabinasi yoki xonasidan oʻtib boradigan qilib joylashtiriladi.

Qoʻshma majlisda ishtirok etayotgan deputat sanoq komissiyasi aʼzosiga oʻz shaxsini tasdiqlovchi hujjatni koʻrsatadi hamda ovoz beruvchilar roʻyxatiga imzo chekadi, shundan keyin unga yashirin ovoz berish byulleteni beriladi.

Yashirin ovoz berish byulleteni ovoz beruvchi tomonidan yashirin ovoz berish kabinasi yoki xonasida oʻzi yoqlab ovoz berayotgan Senat aʼzoligiga nomzodlarning familiyalari qarshisida oʻng tomonda joylashgan boʻsh katakka “+” yoki “” yoxud “x” qoʻyish yoʻli bilan toʻldiriladi.

Ovoz beruvchi toʻldirilgan yashirin ovoz berish byulletenini koʻrinarli joyda turishi lozim boʻlgan saylov qutisiga tashlaydi.

Buzib qoʻyilgan yashirin ovoz berish byulleteni ovoz beruvchining iltimosiga koʻra yangisiga almashtirilishi mumkin.

Yashirin ovoz berish jarayoni tugallangandan keyin foydalanilmagan, shuningdek buzib qoʻyilgan yashirin ovoz berish byulletenlari ularga maxsus shtamp qoʻyish yoʻli bilan bekor qilinadi, shundan soʻng ular muhrlanadi va alohida saqlanadi.

59-modda. Ovozlarni sanab chiqish sanoq komissiyasi aʼzolari tomonidan yashirin ovoz berish natijalari aniqlangunga qadar tanaffussiz amalga oshiriladi.

Saylov qutisidagi yashirin ovoz berish byulletenlariga asosan sanoq komissiyasi ovoz berishda ishtirok etgan deputatlarning umumiy sonini, Senat aʼzoligiga har bir nomzodni yoqlab berilgan ovozlar sonini, haqiqiy emas deb topilgan byulletenlar sonini aniqlaydi.

Ovoz beruvchilar tomonidan saylov byulleteniga qoʻshimcha yozib qoʻyilgan fuqarolarning familiyalari boʻyicha berilgan ovozlar hisobga olinmaydi.

Belgilanmagan namunadagi yashirin ovoz berish byulletenlari, ovoz berish vaqtida bitta ham katakka “+” yoki “” yoxud “x” qoʻyilmagan byulletenlar, shuningdek old tomonida muhr va sanoq komissiyasi aʼzolarining imzolari boʻlmagan byulletenlar haqiqiy emas, deb topiladi.

Ovoz berish natijalariga koʻra ovoz berishda qatnashgan deputatlar ovozining ellik foizidan ortigʻini olgan Senat aʼzoligiga nomzodlar saylangan, deb hisoblanadi.

Yashirin ovoz berish natijalari boʻyicha bayonnoma tuzilib, u sanoq komissiyasining barcha aʼzolari tomonidan imzolanadi. Bayonnomaning qalamda toʻldirilishiga va unga hech qanday tuzatishlar kiritilishiga yoʻl qoʻyilmaydi.

Sanoq komissiyasi raisining maʼruzasi boʻyicha qoʻshma majlisda yashirin ovoz berish natijalarini tasdiqlash toʻgʻrisida qaror qabul qilinib, u qoʻshma majlisning Senat aʼzolari saylovining yakunlari toʻgʻrisidagi bayonnomasida aks ettiriladi.

Qoʻshma majlisning Senat aʼzolari saylovining yakunlari toʻgʻrisidagi bayonnomasi ikki nusxada tuzilib, raislik qiluvchi tomonidan imzolanadi.

Bayonnomaning qalamda toʻldirilishiga va unga birorta tuzatish kiritilishiga yoʻl qoʻyilmaydi.

Agar ovoz berishda yashirin ovoz berish byulleteniga kiritilgan nomzodlardan kimdir saylanmagan boʻlsa, boʻsh qolgan oʻrinlarga Senat aʼzolarini qoʻshimcha saylash uchun yangi saylov tayinlanadi.

Senat aʼzolarini qoʻshimcha saylash boʻyicha qoʻshma majlis asosiy saylov oʻtkazilganidan soʻng ikki kun ichida oʻtkaziladi. Qoʻshma majlisning oʻtkazilish vaqti, sanasi va joyi qoʻshma majlis qarori bilan belgilanadi.

60-modda. Saylangan Senat aʼzolarini roʻyxatdan oʻtkazish uchun qoʻshma majlisning Senat aʼzolari saylovining yakunlari toʻgʻrisidagi bayonnomasi ikki kunlik muddatdan kechiktirmay Markaziy saylov komissiyasiga topshiriladi.

Qoʻshma majlisning Senat aʼzolari saylovining yakunlari toʻgʻrisidagi bayonnomasining ikkinchi nusxasi va Senat aʼzolari saylovini oʻtkazish bilan bogʻliq boshqa hujjatlar tegishincha Qoraqalpogʻiston Respublikasi Joʻqorgʻi Kengesi, xalq deputatlari viloyatlar, Toshkent shahar Kengashlari arxivlarida saqlanadi.

61-modda. Hokim har yili mahalliy Kengashga hudud ijtimoiy-iqtisodiy rivojlanishining eng muhim va dolzarb masalalari yuzasidan hisobot taqdim etadi.

Hokimning hudud ijtimoiy-iqtisodiy rivojlanishining eng muhim va dolzarb masalalari yuzasidan hisoboti mahalliy Kengashning hududning oʻtgan yildagi ijtimoiy-iqtisodiy rivojlanishi yakunlari va joriy yilga moʻljallangan ijtimoiy-iqtisodiy dasturning eng muhim ustuvor yoʻnalishlariga bagʻishlangan majlisida eshitiladi.

62-modda. Hokimlik apparatining tegishli tarkibiy boʻlinmasi hokimning hisobotiga doir materiallarni hokim hisobotini eshitishga oʻn kun qolgunga qadar mahalliy Kengash kotibiyatiga taqdim etadi.

63-modda. Hisobotda hokim va mahalliy ijro hokimiyati organlari tomonidan:

hudud iqtisodiyotining barqaror oʻsishini, uning tarmoqlari rivojlanishini taʼminlash, ishlab chiqarishni modernizatsiya qilish, texnik va texnologik jihatdan yangilash, chet el investitsiyalarini jalb qilish, eksport hajmini oshirish, kichik biznes va xususiy tadbirkorlikni rivojlantirish;

qonun hujjatlarini, ijtimoiy-iqtisodiy rivojlantirishning eng muhim davlat dasturlari va hududiy dasturlarni bajarish;

ijtimoiy sohani rivojlantirish, yangi ish oʻrinlarini yaratish va aholi bandligini taʼminlash, uy-joylar qurish va aholi punktlarini obodonlashtirish, taʼlim hamda sogʻliqni saqlash sifatini yaxshilash, hududning ijtimoiy-iqtisodiy, madaniy rivojlanishiga oid boshqa masalalarni hal qilish yuzasidan koʻrilgan chora-tadbirlar toʻgʻrisidagi maʼlumotlar aks ettiriladi.

64-modda. Hokim hisoboti boʻyicha mahalliy Kengash qarori loyihasi yuzasidan nuqtai nazarni shakllantirish va takliflar olish maqsadida hokimning hisobotiga doir materiallar olingan kuni mahalliy Kengash kotibiyati tomonidan tegishli doimiy komissiyalarga, mahalliy Kengashdagi partiya guruhlarining vakillariga va deputatlarga yuboriladi.

65-modda. Hokim hisobotini eshitish toʻgʻrisidagi masalani tayyorlash va sessiya muhokamasiga kiritish tegishli doimiy komissiya tomonidan amalga oshiriladi. Zarurat boʻlganda ushbu doimiy komissiya hokim hisobotini eshitish toʻgʻrisidagi masalani atroflicha tayyorlash uchun boshqa doimiy komissiyalarni ham jalb etishi mumkin.

66-modda. Hokim hisoboti boʻyicha materiallarni umumlashtirish uchun tegishli doimiy komissiya tomonidan soha mutaxassislarini jalb etgan holda ishchi guruh tashkil etilishi mumkin.

Hokim hisobotiga doir materiallarni umumlashtirish natijalari boʻyicha tegishli doimiy komissiya tomonidan mahalliy Kengashdagi partiya guruhlarining fikr-mulohazalarini hisobga olgan holda doimiy komissiya xulosasi va mahalliy Kengash qarori loyihasi tayyorlanadi.

67-modda. Hokimning hisobotini eshitishda mahalliy Kengash qaroriga asosan deputatlardan biri sessiyaga raislik qiladi.

68-modda. Hokimning hisobotini eshitish uchun maʼruzachi bilan kelishilgan holda kamida 30 daqiqa beriladi.

Hokimning hisoboti boʻyicha masʼul doimiy komissiya xulosasining mazmunini va mahalliy Kengash qarori loyihasining asosiy qoidalarini bayon etish maqsadida doimiy komissiya raisiga 15 daqiqagacha vaqt beriladi.

Partiya guruhlari vakillariga va deputatlarga maʼruzachiga savol berishi uchun 3 daqiqagacha, hisobot boʻyicha muzokaralar uchun 10 daqiqagacha vaqt beriladi.

69-modda. Viloyat (Toshkent shahar) hokimining hisobotini eshitishga ushbu viloyat (Toshkent shahri)dan saylangan Oʻzbekiston Respublikasi Oliy Majlisi Senati aʼzolari, Qonunchilik palatasi deputatlari, Oʻzbekiston Respublikasi Vazirlar Mahkamasi aʼzolari, davlat boshqaruvi organlari rahbarlari, tumanlar va shaharlar hokimlari, viloyat (Toshkent shahar) ijro hokimiyati organlari tarkibiy boʻlinmalari rahbarlari taklif etiladi.

Tuman (shahar) hokimining hisobotini eshitishga tegishli saylov okruglaridan saylangan Oʻzbekiston Respublikasi Oliy Majlisi Senati aʼzolari, Qonunchilik palatasi deputatlari va xalq deputatlari viloyat (Toshkent shahar) Kengashi deputatlari, Oʻzbekiston Respublikasi Vazirlar Mahkamasining, davlat boshqaruvi organlarining vakillari, viloyat (Toshkent shahar) hokimi yoki uning oʻrinbosarlari, tuman (shahar) ijro hokimiyati organlari tarkibiy boʻlinmalari rahbarlari taklif etiladi.

Hokimning hisobotini eshitishga hududda joylashgan boshqa davlat organlari, fuqarolarning oʻzini oʻzi boshqarish organlari, korxona, tashkilot va muassasalar, shu jumladan nodavlat notijorat tashkilotlari, siyosiy partiyalar, ommaviy axborot vositalari vakillari va boshqa shaxslar taklif etilishi mumkin.

70-modda. Viloyat (Toshkent shahar) hokimining hisobotini muhokama qilish Oʻzbekiston Respublikasi Vazirlar Mahkamasining majlisida berilgan baholar va belgilangan vazifalar hisobga olingan holda amalga oshiriladi.

Tuman (shahar) hokimining hisobotini muhokama qilish Oʻzbekiston Respublikasi Vazirlar Mahkamasining, shuningdek xalq deputatlari viloyat (Toshkent shahar) Kengashining majlislarida berilgan baholar va belgilangan vazifalar hisobga olingan holda amalga oshiriladi.

71-modda. Hokimning hisobotini muhokama qilish yakunlari boʻyicha, shuningdek doimiy komissiya xulosasi va partiya guruhlari fikr-mulohazalarini inobatga olgan holda mahalliy Kengashning qarori qabul qilinadi. Qarorda hokim va mahalliy ijro hokimiyati organlari ishining samaradorligiga kompleks baho beriladi, ularning ishini takomillashtirishga doir tavsiyalar va takliflar, shuningdek qaror amalga oshirilishining borishi ustidan nazoratni taʼminlash boʻyicha chora-tadbirlar nazarda tutiladi.

72-modda. Hokimning hisoboti boʻyicha qarorning ijro etilishini nazorat qilish masʼul doimiy komissiya zimmasiga yuklatiladi.

73-modda. Hokimning hisoboti boʻyicha mahalliy Kengash qarori va hokimning hisoboti mahalliy davlat hokimiyati organining rasmiy nashrlarida hamda veb-saytlarida eʼlon qilinishi shart.

74-modda. Masʼul doimiy komissiya hokimning hisoboti boʻyicha mahalliy Kengash qarori ijro etilishini monitoring qiladi va qarorda belgilangan muddatlarda mahalliy Kengashni xabardor qiladi.

75-modda. Oʻzbekiston Respublikasining “Mahalliy davlat hokimiyati toʻgʻrisida”gi Qonuniga va boshqa qonunlariga, Oʻzbekiston Respublikasi Prezidentining farmon va qarorlariga koʻra mahalliy Kengash mahalliy davlat boshqaruvi organlari rahbarlarining hisobot va axborotlarini eshitib boradi.

76-modda. Mahalliy davlat boshqaruvi organi tomonidan hisobot (axborot)ga doir materiallar mahalliy Kengashning tegishli doimiy komissiyasiga imzolangan hamda elektron shaklda taqdim etiladi.

77-modda. Tegishli doimiy komissiya hisobot (axborot)ni komissiya majlisida mahalliy davlat boshqaruvi organi rahbari ishtirokida muhokama qiladi hamda doimiy komissiyaning xulosasi va mahalliy Kengash qarori loyihasini tayyorlaydi.

78-modda. Hisobot (axborot)ni eshitish toʻgʻrisidagi masalani tayyorlash va sessiya muhokamasiga kiritish tegishli doimiy komissiya tomonidan amalga oshiriladi.

79-modda. Hisobot (axborot) boʻyicha materiallarni puxta tayyorlash maqsadida tegishli doimiy komissiya tomonidan soha mutaxassislarini jalb etgan holda ishchi guruh tashkil etilishi mumkin.

80-modda. Sessiyada mahalliy davlat boshqaruvi organi rahbarining hisoboti (axboroti)ni eshitish uchun maʼruzachi bilan kelishilgan holda 20 daqiqagacha vaqt beriladi.

Hisobot (axborot) boʻyicha masʼul doimiy komissiya xulosasining mazmunini va mahalliy Kengash qarori loyihasining asosiy qoidalarini bayon etish maqsadida doimiy komissiya raisiga 10 daqiqagacha vaqt beriladi.

Deputatlarga maʼruzachiga savol berishi uchun 3 daqiqagacha, hisobot boʻyicha muzokaralar uchun 5 daqiqagacha vaqt beriladi.

81-modda. Hisobot (axborot) boʻyicha mahalliy Kengash qarori va hisobot (axborot) mahalliy davlat hokimiyati organining rasmiy nashrlarida hamda veb-saytlarida eʼlon qilinishi mumkin.

82-modda. Yigirma besh yoshga toʻlgan, qoida tariqasida, oliy maʼlumotga, saylovlarni tashkil etish va oʻtkazish borasida ish tajribasiga ega boʻlgan, jamoatchilik oʻrtasida obroʻ-eʼtibor qozongan hamda kamida oxirgi besh yil Oʻzbekiston Respublikasi hududida doimiy yashab turgan Oʻzbekiston Respublikasi fuqarosi Markaziy saylov komissiyasining aʼzosi boʻlishi mumkin.

Qoraqalpogʻiston Respublikasi Joʻqorgʻi Kengesining Qonuniylik, sud-huquq va korrupsiyaga qarshi kurashish masalalari qoʻmitasi, xalq deputatlari viloyat (Toshkent shahar) Kengashining Sud-huquq masalalari va korrupsiyaga qarshi kurashish boʻyicha doimiy komissiyasi oʻzining majlisida Markaziy saylov komissiyasi aʼzoligiga nomzodlarni dastlabki tarzda tanlab oladi va taqdim etadi, materiallarni koʻrib chiqadi va ular boʻyicha xulosalar tayyorlaydi, maʼqullash va Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining navbatdagi sessiyasi kun tartibiga kiritish toʻgʻrisida qaror qabul qiladi, shuningdek Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining Markaziy saylov komissiyasi aʼzoligiga nomzodlarni taqdim etish toʻgʻrisidagi qarori loyihasini ishlab chiqadi.

Markaziy saylov komissiyasi tarkibiga kirish huquqiga ega ekanligi haqida qaror qabul qilingan nomzodlar alifbo tartibida ovoz berish uchun roʻyxatga kiritiladi hamda Qoraqalpogʻiston Respublikasi Joʻqorgʻi Kengesiga, xalq deputatlari viloyat (Toshkent shahar) Kengashiga koʻrib chiqish uchun kiritiladi.

Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining sessiyasida muhokama oʻtkaziladi va muhokamada deputatlar Markaziy saylov komissiyasi aʼzoligiga koʻrsatilgan nomzodga savollar berishga haqli.

Muhokama natijalari boʻyicha Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining nomzodni Markaziy saylov komissiyasi aʼzoligiga tavsiya etish toʻgʻrisidagi qarori qabul qilinadi hamda koʻrib chiqish uchun Oliy Majlis palatalariga yuboriladi.

Qaror Qoraqalpogʻiston Respublikasi Joʻqorgʻi Kengesi, xalq deputatlari viloyat (Toshkent shahar) Kengashi deputatlari umumiy sonining koʻpchilik ovozi bilan qabul qilinadi.

83-modda. Oʻzbekiston Respublikasi Prezidenti saylovi boʻyicha, Oʻzbekiston Respublikasi Oliy Majlisiga saylov boʻyicha okrug saylov komissiyalariga nomzodlar yigirma bir yoshga toʻlgan, qoida tariqasida, oliy maʼlumotga, saylovni tashkil etish va oʻtkazish borasida ish tajribasiga ega boʻlgan, jamoatchilik oʻrtasida obroʻ-eʼtibor qozongan Oʻzbekiston Respublikasi fuqarolari orasidan tanlab olinadi va taqdim etiladi.

Okrug saylov komissiyalari aʼzoligiga nomzodlar Qoraqalpogʻiston Respublikasi Joʻqorgʻi Kengesining Qonuniylik, sud-huquq va korrupsiyaga qarshi kurashish masalalari qoʻmitasining, xalq deputatlari viloyat (Toshkent shahar) Kengashining Sud-huquq masalalari va korrupsiyaga qarshi kurashish boʻyicha doimiy komissiyasining majlisida dastlabki tarzda muhokama etiladi.

Qoraqalpogʻiston Respublikasi Joʻqorgʻi Kengesi tegishli qoʻmitasining, xalq deputatlari viloyat (Toshkent shahar) Kengashi tegishli doimiy komissiyasining majlisida qoʻmita (komissiya) raisining tashabbusi bilan okrug saylov komissiyalari aʼzoligiga nomzodlar, mansabdor shaxslar va fuqarolar ishtirok etishlari mumkin.

Qoraqalpogʻiston Respublikasi Joʻqorgʻi Kengesining tegishli qoʻmitasi, xalq deputatlari viloyat (Toshkent shahar) Kengashi tegishli doimiy komissiyasi materiallarni koʻrib chiqadi, nomzodlar boʻyicha xulosalarni hamda Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining okrug saylov komissiyasi aʼzoligiga nomzodlarni tavsiya etish toʻgʻrisidagi qarori loyihasini tayyorlaydi. Dastlabki tarzdagi muhokama natijalariga koʻra, ushbu masalani maʼqullash hamda Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining navbatdagi sessiyasi kun tartibiga kiritish toʻgʻrisidagi tegishli qoʻmita (doimiy komissiya)ning qarori qabul qilinadi.

Okrug saylov komissiyasi tarkibiga kirish huquqiga ega ekanligi haqida qaror qabul qilingan nomzodlar alifbo tartibida ovoz berish uchun roʻyxatga kiritiladi.

Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining sessiyasida muhokama oʻtkaziladi va muhokamada deputatlar okrug saylov komissiyasi aʼzoligiga koʻrsatilgan nomzodlarga savol berishga haqli.

Muhokama natijalari boʻyicha Qoraqalpogʻiston Respublikasi Joʻqorgʻi Kengesining, xalq deputatlari viloyat (Toshkent shahar) Kengashining nomzodni okrug saylov komissiyasi aʼzoligiga tavsiya etish toʻgʻrisidagi qarori qabul qilinadi hamda tasdiqlash uchun Markaziy saylov komissiyasiga yuboriladi.

Qaror Qoraqalpogʻiston Respublikasi Joʻqorgʻi Kengesi, xalq deputatlari viloyat (Toshkent shahar) Kengashi deputatlari umumiy sonining koʻpchilik ovozi bilan qabul qilinadi.

84-modda. Xalq deputatlari viloyat (Toshkent shahar) Kengashlariga saylovlar boʻyicha viloyat (Toshkent shahar) va okrug saylov komissiyalari aʼzoligiga nomzodlar yigirma bir yoshga toʻlgan, oʻrta yoki oliy maʼlumotga, qoida tariqasida saylovga tayyorgarlik koʻrish va uni oʻtkazish borasida ish tajribasiga ega boʻlgan, aholi oʻrtasida obroʻ-eʼtibor qozongan fuqarolari orasidan tanlab olinadi hamda taqdim etiladi.

Viloyat (Toshkent shahar) va okrug saylov komissiyalari aʼzoligiga nomzodlar xalq deputatlari tuman (shahar) Kengashlarining Sud-huquq masalalari va korrupsiyaga qarshi kurashish boʻyicha doimiy komissiyaning majlisida dastlabki tarzda muhokama etiladi.

Doimiy komissiya majlisida komissiya raisining tashabbusiga koʻra viloyat (Toshkent shahar) va okrug saylov komissiyalari aʼzoligiga nomzodlar, mansabdor shaxslar hamda fuqarolar ishtirok etishlari mumkin.

Xalq deputatlari tuman (shahar) Kengashining tegishli doimiy komissiyasi materiallarni koʻrib chiqadi, nomzodlar boʻyicha xulosalar hamda xalq deputatlari tuman (shahar) Kengashining nomzodlarni viloyat (Toshkent shahar) va okrug saylov komissiyalari aʼzoligiga tavsiya etish toʻgʻrisidagi qarori loyihasini tayyorlaydi. Dastlabki tarzdagi muhokama natijalari boʻyicha ushbu masalani maʼqullash va xalq deputatlari tuman (shahar) Kengashi navbatdagi sessiyasining kun tartibiga kiritish toʻgʻrisidagi doimiy komissiyaning qarori qabul qilinadi.

Viloyat (Toshkent shahar) va okrug saylov komissiyalari tarkibiga kirish huquqiga ega ekanligi haqida qaror qabul qilingan nomzodlar alifbo tartibida ovoz berish uchun roʻyxatga kiritiladi.

Xalq deputatlari tuman (shahar) Kengashining sessiyasida muhokama oʻtkaziladi va muhokamada deputatlar viloyat (Toshkent shahar) va okrug saylov komissiyalari aʼzoligiga koʻrsatilgan nomzodlarga savollar berishga haqli.

Muhokama natijalari boʻyicha xalq deputatlari tuman (shahar) Kengashining nomzodni viloyat (Toshkent shahar) saylov komissiyasi aʼzoligiga tavsiya etish toʻgʻrisidagi qarori qabul qilinadi hamda tasdiqlash uchun xalq deputatlari viloyat (Toshkent shahar) Kengashiga yuboriladi.

Muhokama natijalari boʻyicha qabul qilingan xalq deputatlari tuman (shahar) Kengashining nomzodni okrug saylov komissiyalari aʼzoligiga tavsiya etish toʻgʻrisidagi qarori esa, tasdiqlash uchun xalq deputatlari viloyat (Toshkent shahar) Kengashiga oʻtkaziladigan saylovlar boʻyicha viloyat (Toshkent shahar) komissiyasiga yuboriladi.

Qarorlar xalq deputatlari tuman (shahar) Kengashi deputatlari umumiy sonining koʻpchilik ovozi bilan qabul qilinadi.

85-modda. Xalq deputatlari tuman (shahar) Kengashiga saylovlar boʻyicha tuman (shahar) saylov komissiyasi aʼzoligiga nomzodlar yigirma bir yoshga toʻlgan, oʻrta yoki oliy maʼlumotga, qoida tariqasida, saylovga tayyorgarlik koʻrish va uni oʻtkazish borasida ish tajribasiga ega boʻlgan, aholi oʻrtasida obroʻ-eʼtibor qozongan fuqarolari orasidan tanlab olinadi hamda taqdim etiladi.

Tuman (shahar) saylov komissiyasi aʼzoligiga nomzodlar fuqarolarning oʻzini oʻzi boshqarish organlari tomonidan tanlanadi. Fuqarolarning oʻzini oʻzi boshqarish organlari koʻrib chiqish natijalari boʻyicha xalq deputatlari tuman (shahar) Kengashiga taqdim etish toʻgʻrisida qarorlar qabul qiladi.

Xalq deputatlari tuman (shahar) Kengashining Sud-huquq masalalari va korrupsiyaga qarshi kurashish boʻyicha doimiy komissiyasi fuqarolarning oʻzini oʻzi boshqarish organlarining tuman (shahar) saylov komissiyasi aʼzoligiga nomzodlar toʻgʻrisidagi qarorini dastlabki tarzda koʻrib chiqib, uni xalq deputatlari tumun (shahar) Kengashining navbatdagi sessiyasi kun tartibiga kiritishni tavsiya etadi.

Tegishli doimiy komissiya raisining axboroti boʻyicha xalq deputatlari tuman (shahar) Kengashi xalq deputatlari tuman (shahar) Kengashiga saylovlar boʻyicha saylov komissiyasi aʼzolarini tasdiqlash toʻgʻrisida qaror qabul qiladi.

86-modda. Mahalliy Kengash sessiyaga kiritiladigan masalalarni dastlabki tarzda koʻrib chiqish va tayyorlash uchun oʻz vakolatlari muddatiga jamoatchilik asosida faoliyatni amalga oshiruvchi doimiy va muvaqqat komissiyalar tuzishi hamda ular tarkibiga oʻzgartirishlar kiritishi mumkin.

Doimiy va muvaqqat komissiyalar raisligiga hamda aʼzoligiga nomzodlar sessiyaga hokim — mahalliy Kengash rahbari tomonidan taqdim etiladi.

Doimiy komissiya raisligiga nomzod boʻyicha ovoz berish alohida oʻtkaziladi.

Doimiy va muvaqqat komissiyalar aʼzolari deputatlar orasidan saylanadi.

Doimiy va muvaqqat komissiyalar aʼzoligiga nomzodlarni saylash nomzodlarning har birini alohida yoki komissiyaning butun tarkibni yalpi muhokama qilish yoʻli bilan amalga oshiriladi, ovoz berishda qaror har bir nomzod boʻyicha alohida yoki komissiya butun tarkibi boʻyicha deputatlar umumiy sonining koʻpchilik ovozi bilan qabul qilinadi.

87-modda. Doimiy komissiyalar soni va tarkibi sessiyada belgilanadi. Mahalliy Kengash tarkibida, qoida tariqasida, quyidagi doimiy komissiyalar tuzilishi mumkin:

mahalliy budjet, iqtisodiy islohotlarni amalga oshirish, investitsiyalar va tadbirkorlikni rivojlantirish masalalari boʻyicha;

sud-huquq masalalari va korrupsiyaga qarshi kurashish boʻyicha;

taʼlim, sogʻliqni saqlash, madaniyat, sport va ijtimoiy himoya masalalari boʻyicha;

yoshlar siyosati, xotin-qizlar va gender tenglik masalalari boʻyicha;

sanoat, transport, qurilish, kommunal soha va aholiga xizmat koʻrsatish masalalari boʻyicha;

agrar, suv xoʻjaligi masalalari va ekologiya boʻyicha;

axborot siyosati va mahalliy davlat organlarida ochiqlikni taʼminlash masalalari boʻyicha;

odob-axloq masalalari boʻyicha komissiya.

Zarur hollarda mahalliy Kengash tomonidan yangi doimiy komissiyalar tuzilishi va ilgari tashkil qilingan doimiy komissiyalar tugatilishi, doimiy komissiyalar tarkibiga oʻzgartirishlar kiritilishi mumkin.

Doimiy komissiyalar faoliyati mahalliy Kengash qarori bilan tasdiqlanadigan nizom bilan tartibga solinadi.

88-modda. Doimiy komissiyalar oʻz majlislarida rais oʻrinbosarlari va kotiblarini saylaydi.

Deputat bitta doimiy komissiya aʼzosi etib saylanadi. Faqat Odob-axloq masalalari boʻyicha doimiy komissiya aʼzolari boshqa doimiy komissiya aʼzolari boʻlishi mumkin.

Doimiy komissiya tarkibiga kirmagan deputat uning ishida maslahat ovozi huquqi bilan ishtirok etishi mumkin.

Hokim — mahalliy Kengash rahbari hamda mahalliy Kengash kotibiyati mudiri, doimiy komissiyalar tarkibiga saylanishi mumkin emas.

Doimiy komissiyalar mahalliy Kengash oldida masʼul va unga hisobdordir.

89-modda. Doimiy komissiyalar oʻz faoliyatini mahalliy Kengash qarori bilan tasdiqlanadigan ish rejalari asosida amalga oshiradi.

Doimiy komissiyaning tashabbusi bilan doimiy komissiyaning ish rejasiga tegishli oʻzgartirishlar va qoʻshimchalar kiritilishi mumkin. Doimiy komissiyaning ish rejasidagi oʻzgartirishlar navbatdagi sessiyada tasdiqlanadi.

90-modda. Doimiy komissiyalar oʻz faoliyatini majlis shaklida amalga oshiradi.

Doimiy komissiyalarning majlislari, qoida tariqasida, har oyda kamida bir marta oʻtkaziladi.

Doimiy komissiyalarning qoʻshma majlislari ular oʻrtasidagi kelishuvga muvofiq oʻtkaziladi.

91-modda. Mahalliy Kengash aniq vazifalarni bajarish uchun deputatlar orasidan muvaqqat komissiya tuzishi mumkin.

Muvaqqat komissiya tuzish toʻgʻrisidagi qaror sessiyada qabul qilinadi.

Muvaqqat komissiya zimmasiga yuklatilgan vazifalarni bajarganidan soʻng oʻz faoliyatini tugatadi.

Muvaqqat komissiyaning vazifalari mahalliy Kengash qarori bilan belgilanadi.

92-modda. Doimiy va muvaqqat komissiyalarning hududdagi davlat organlari, korxonalar, tashkilotlar, muassasalar, nodavlat notijorat tashkilotlari, fuqarolarning oʻzini oʻzi boshqarish organlari va mansabdor shaxslarga yuboriladigan qarorlari tavsiya xususiyatiga ega boʻladi va ular tomonidan koʻrib chiqilib, koʻrib chiqish natijalari toʻgʻrisida yoki koʻrilgan chora-tadbirlar haqida bir oylik muddatda xabar qilinishi shart.

93-modda. Har bir deputat sessiya, doimiy va muvaqqat komissiyalar ishida tashabbuskorlik va faollik bilan qatnashishi lozim. Deputat oʻz vakolatlarini ishlab chiqarishdan yoki xizmat vazifalaridan ajralmagan holda amalga oshiradi.

94-modda. Partiya guruhlari siyosiy partiyalar tomonidan koʻrsatilgan deputatlarning taʼsis yigʻilishlarida oʻz partiyalarining siyosatini uyushgan holda oʻtkazish uchun kamida uch nafar deputat birlashgan taqdirda tuziladi. Partiya guruhlari partiya guruhi rahbarining tegishli arizasi va taʼsis hujjatlariga asosan mahalliy Kengash tomonidan roʻyxatga olinadi.

Partiya guruhlari quyidagi huquqlarga ega:

sessiya kun tartibini shakllantirishda ishtirok etish;

sessiya kun tartibidagi har bir masala boʻyicha muzokaralarda partiya guruhi vakiliga kafolatlangan tarzda soʻz berilishi;

hokim — mahalliy Kengash rahbariga, hokim oʻrinbosarlariga, hokimlikning boʻlimlari, boshqarmalari va boshqa tarkibiy boʻlinmalari boshliqlariga, shuningdek hududda joylashgan korxona, tashkilot va muassasalarning rahbarlariga soʻrovlar bilan murojaat etish;

doimiy va muvaqqat komissiyalar raisligiga nomzodlar boʻyicha takliflar kiritish;

sessiyada muhokama qilinayotgan masala boʻyicha partiya guruhining fikrini deputatlar orasida tarqatish;

tuman (shahar) hokimining, shuningdek mahalliy ijro etuvchi hokimiyat organlari mansabdor shaxslarining qoniqarsiz faoliyati toʻgʻrisida Qoraqalpogʻiston Respublikasi Joʻqorgʻi Kengesiga, viloyat (Toshkent shahar) hokimiga xulosa taqdim etish;

xalq deputatlari viloyat (Toshkent shahar) Kengashidagi partiya guruhlari viloyat (Toshkent shahar) hokimi — mahalliy Kengash rahbarining lavozimiga tasdiqlangan shaxslarning qoniqarsiz faoliyati toʻgʻrisida Oʻzbekiston Respublikasi Prezidentiga asoslangan xulosalar taqdim etish tashabbusi;

deputatlar uchun qonun hujjatlarida nazarda tutilgan boshqa vazifalarni amalga oshirish.

Partiya guruhlarining faoliyatiga tashkiliy, texnikaviy va boshqa xizmatlar koʻrsatish mahalliy Kengash kotibiyati tomonidan taʼminlanadi.

95-modda. Deputat sessiyada koʻrib chiqilayotgan barcha masalalar boʻyicha hal qiluvchi ovoz huquqidan foydalanadi.

Deputat:

doimiy hamda muvaqqat komissiyalarga saylash va saylanishga;

sessiyada koʻrib chiqilishi uchun masalalar taklif etishga;

sessiya muhokamasiga kiritilayotgan masalalarni dastlabki tarzda koʻrib chiqish va ular yuzasidan takliflar kiritishga, sessiya kun tartibi, muhokama qilinayotgan masalalarni koʻrib chiqish tartibi va mohiyati yuzasidan takliflar va mulohazalar kiritishga;

mahalliy Kengash tomonidan saylanadigan, tayinlanadigan yoki tasdiqlanadigan mansabdor shaxslarning nomzodlari boʻyicha fikr bildirishga;

muzokaralarda ishtirok etishga, maʼruzachi, qoʻshimcha maʼruzachi va sessiyada raislik qiluvchiga savollar berishga;

deputat soʻrovi bilan murojaat etishga;

oʻz takliflarini asoslab berish uchun soʻzga chiqishga va ovoz berish sabablari yuzasidan maʼlumot berishga;

sessiyada raislik qiluvchiga sessiyada muhokama qilinayotgan masala yuzasidan oʻz nutqi, taklifi yoki mulohazasining matnini topshirishga;

tarkibiga oʻzi kirgan mahalliy Kengash organining qaroriga qoʻshilmagan taqdirda oʻz nuqtai nazarini sessiyada bayon qilishga yoki bu haqda mahalliy Kengash rahbariga yozma shaklda maʼlum qilishga;

mahalliy Kengashga hisobdor boʻlgan yoki uning nazorati ostidagi har qanday organ yoxud mansabdor shaxsning hisoboti yoki axborotini sessiyalarda eshitish toʻgʻrisida taklif kiritishga;

Oʻzbekiston Respublikasi qonunlarining, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmon va qarorlari, Oʻzbekiston Respublikasi Vazirlar Mahkamasi qarorlarining ijro etilishi, shuningdek mahalliy Kengash qarorlarining bajarilishi yuzasidan tekshirishlar oʻtkazish toʻgʻrisidagi masalalar boʻyicha taklif kiritishga;

sessiya bayonnomasi (stenogrammasi) bilan belgilangan tartibda tanishishga haqli.

Deputat qonun hujjatlariga muvofiq boshqa huquqlarga ham ega boʻlishi mumkin.

96-modda. Deputat:

sessiya samarali ishlashiga koʻmaklashishi, sessiya vaqtini tejashi;

mahalliy Kengash reglamentiga rioya qilishi va sessiyada raislik qiluvchining talablarini bajarishi;

sessiyada faqat raislik qiluvchining ruxsati bilangina soʻzga chiqishi;

Xalq deputatlari viloyat, tuman, shahar Kengashi deputatlarining odob-axloq qoidalariga rioya qilishi;

sessiyada ishtirok etishi va uning ishida faol qatnashishi;

oʻzi tarkibiga saylangan doimiy yoki muvaqqat komissiya majlislarida ishtirok etishi;

mahalliy Kengash reglamentida belgilangan tartibda ovoz berishda shaxsan ishtirok etishi shart.

Deputat sessiyada, oʻzi tarkibiga kirgan doimiy yoki muvaqqat komissiya majlisida ishtirok etish imkoniyati boʻlmagan taqdirda, bu haqda hokim — mahalliy Kengash rahbariga, mahalliy Kengash kotibiyati mudiriga, sessiyada raislik qiluvchiga yoxud doimiy yoki muvaqqat komissiya raisiga oldindan xabar qilishi shart.

97-modda. Deputat hududda joylashgan davlat hokimiyati va boshqaruvi organlarining mansabdor shaxslariga ularning vakolatlariga kiradigan masalalar yuzasidan asoslantirilgan tushuntirish berish yoki oʻz nuqtai nazarini bayon qilish talabi bilan deputat soʻrovi yuborishga haqli.

Davlat hokimiyati va boshqaruvi organlarining mansabdor shaxslari deputat soʻroviga, agar unda boshqa muddat koʻrsatilmagan boʻlsa, mazkur soʻrov olingan kundan eʼtiboran oʻn kundan kechiktirmay javob yuborishlari shart.

Sudlarning raislari, prokurorlar, surishtiruv va tergov organlarining rahbarlariga yoʻllangan deputat soʻrovi ularning ish yurituvidagi aniq ishlar va materiallarga taalluqli boʻlishi mumkin emas.

Deputat soʻrovlari boʻyicha axborot sessiyada yoki doimiy yoxud muvaqqat komissiyalar majlisida muhokama qilinishi mumkin.

99-modda. Deputat Xalq deputatlari viloyat, tuman, shahar Kengashi deputatlarining odob-axloq qoidalariga qatʼiy rioya etishi lozim. Deputatning oʻz maqomidan fuqarolar, jamiyat va davlatning huquqlari hamda qonuniy manfaatlariga ziyon yetkazadigan tarzda foydalanishiga yoʻl qoʻyilmaydi.

Xalq deputatlari viloyat, tuman, shahar Kengashi deputatlarining odob-axloq qoidalari buzilgan taqdirda deputatning xulq-atvori toʻgʻrisidagi masala mahalliy Kengash tomonidan yoxud uning topshirigʻiga koʻra Reglament va deputatlik odobi masalalari boʻyicha doimiy komissiya tomonidan koʻrib chiqilishi mumkin.

99¹-modda. Deputatni daxlsizlik huquqidan mahrum qilish toʻgʻrisidagi masala tegishincha viloyat, tuman, shahar prokurorining yoki yuqori turuvchi prokurorning taqdimnomasiga binoan mahalliy Kengash tomonidan oʻn kun ichida hal etiladi.

Senator etib saylangan deputatni daxlsizlik huquqidan mahrum qilish masalasi “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi Oʻzbekiston Respublikasi Qonunida belgilangan tartibda hal etiladi.

99²-modda. Deputatni javobgarlikka tortishga rozilik olish toʻgʻrisida quyi prokuror tomonidan kiritilgan taqdimnomani yuqori turuvchi prokuror chaqirtirib olishi mumkin.

99³-modda. Deputatni jinoiy javobgarlikka tortishga, ushlab turishga, qamoqqa olishga yoki unga nisbatan sud tartibida beriladigan maʼmuriy jazoni qoʻllashga rozilik olish toʻgʻrisidagi prokuror taqdimnomasi mahalliy Kengashga kelib tushgandan keyin mahalliy Kengash kotibiyati tomonidan rasmiylashtiriladi va shu kunning oʻzida mahalliy Kengash raisiga hamda Reglament va deputatlik odobi masalalari boʻyicha doimiy komissiya raisiga taqdim etiladi.

99⁴-modda. Taqdimnoma Reglament va deputatlik odobi masalalari boʻyicha doimiy komissiyaga kelib tushgandan keyin ikki kun ichida komissiya majlisida muhokama qilinadi.

Muhokama jarayonida daxlsizlik huquqidan mahrum qilishga rozilik soʻralgan deputatning oʻzi ham ishtirok etadi.

99⁵-modda. Reglament va deputatlik odobi masalalari boʻyicha doimiy komissiya majlisida taqdimnomani muhokama qilish yakunlari bayonnoma shaklida rasmiylashtiriladi.

Bayonnomada majlis boʻlib oʻtgan sana, vaqt, joy, komissiya aʼzolarining va daxlsizlik huquqidan mahrum qilishga rozilik soʻralgan deputatning ishtiroki, raislik qiluvchi, prokuratura vakilining familiyasi, ismi, lavozimi, muhokama jarayonida bildirilgan fikr-mulohazalar mazmuni va ovoz berish natijalari batafsil yoritiladi.

Bayonnomada Reglament va deputatlik odobi masalalari boʻyicha doimiy komissiyaning deputatni daxlsizlik huquqidan mahrum qilishga rozilik berish yoki rad etish boʻyicha xulosasi aks ettiriladi hamda ushbu masalani mahalliy Kengash sessiyasi muhokamasiga kiritish nazarda tutiladi.

99⁶-modda. Mahalliy Kengash kotibiyati taqdimnomani rasmiylashtirgandan keyin uni koʻrib chiqish boʻyicha kelgusi oʻn kun ichida oʻtkaziladigan sessiya kun tartibiga kiritish yuzasidan mahalliy Kengash raisiga taklif kiritadi.

Agarda navbatdagi sessiya yaqin uch kun ichida oʻtkazilishi belgilangan va bu sessiya Reglament va deputatlik odobi masalalari boʻyicha doimiy komissiyaning majlisi oʻtkaziladigan kundan oldin boʻlsa yoki yaqin oʻn kun ichida sessiya oʻtkazilishi rejalashtirilmagan boʻlsa taqdimnomani muhokama qilish boʻyicha navbatdan tashqari sessiya chaqiriladi. Bunda sessiyani chaqirish boʻyicha qonunchilikda belgilangan talablarga rioya etilishi shart.

99⁷-modda. Mahalliy Kengash sessiyasida daxlsizlik huquqidan mahrum qilishga rozilik soʻralgan deputatning oʻzi ham ishtirok etadi, taqdimnoma prokuratura vakili ishtirokida muhokama qilinadi.

Mahalliy Kengash sessiyasida taqdimnomani koʻrib chiqish masalasi muhokama qilinayotganda daxlsizlik huquqidan mahrum qilishga rozilik soʻralgan deputatning raislik qilishi mumkin emas.

Muhokama yakunlari boʻyicha deputatni daxlsizlik huquqidan mahrum qilishga rozilik berish yoki rad etish boʻyicha ovoz berish jarayoni oʻtkaziladi. Sessiyada ishtirok etayotgan deputatlarning taklifiga asosan ovoz berish yopiq shaklda oʻtkazilishi ham mumkin.

99⁸-modda. Mahalliy Kengash sessiyasida deputatni daxlsizlik huquqidan mahrum qilishga rozilik olish boʻyicha taqdimnomani koʻrib chiqish jarayoni daxlsizlik huquqidan mahrum qilishga rozilik soʻralgan deputatning roziligi bilan sessiya ochiq yoki yopiq shaklda oʻtkazilishidan qatʼiy nazar videotasvirga olinadi hamda videomateriallar mahalliy Kengash kotibiyatida saqlanadi.

99⁹-modda. Mahalliy Kengashning deputatni daxlsizlik huquqidan mahrum qilishga rozilik berish yoki rad etish masalasiga doir qarori rasmiylashtirilgandan keyin darhol tegishli prokurorga yuboriladi.

99¹⁰-modda. Deputatni daxlsizlik huquqidan mahrum qilishga rozilik olgan prokuror ish yuritish tamomlangan kundan eʼtiboran uch kunlik muddat ichida mahalliy Kengashga ishni tergov qilish, sudda koʻrib chiqish natijalari toʻgʻrisida xabar qilishi shart.

Mahalliy Kengashning deputatni daxlsizlik huquqidan mahrum qilishga rozilik berishni rad etgani unga nisbatan jinoyat ishi yuritilishini yoki sud tartibida beriladigan maʼmuriy jazoni nazarda tutadigan maʼmuriy huquqbuzarlik toʻgʻrisidagi ish yuritilishini istisno etadigan va bunday ishlarni tugatishga olib keladigan holat hisoblanadi.

100-modda. Mahalliy Kengash, doimiy komissiyalar va deputatlar faoliyatiga tashkiliy, texnikaviy va boshqa jihatlardan xizmat koʻrsatish mahalliy Kengash kotibiyati tomonidan taʼminlanadi.

101-modda. Mahalliy Kengash kotibiyati oʻz faoliyatini mahalliy Kengash qarori bilan tasdiqlanadigan nizom asosida olib boradi.

102-modda. Mahalliy hokimlik deputatlik faoliyatini olib borishlari uchun deputatlarga, shuningdek mahalliy Kengash kotibiyatiga xonalar, texnik vositalar, aloqa vositalari ajratadi, maʼlumotlar bazalaridan foydalanish uchun shart-sharoitlar yaratib beradi.

103-modda. Mahalliy Kengash reglamenti, unga oʻzgartirishlar va qoʻshimchalar mahalliy Kengash qarori bilan tasdiqlanadi.

Mahalliy Kengash reglamentiga oʻzgartirishlar va qoʻshimchalar kiritish toʻgʻrisidagi takliflar doimiy komissiyalar, partiya guruhlari, deputatlar tomonidan kiritilishi mumkin.

Mahalliy Kengash reglamentiga oʻzgartirishlar va qoʻshimchalar kiritish toʻgʻrisidagi masala sessiya kun tartibi loyihasiga kiritiladi hamda birinchi navbatda koʻrib chiqiladi.

104-modda. Mahalliy Kengash reglamentida nazarda tutilmagan mahalliy Kengash faoliyatiga doir masalalarni sessiyada koʻrib chiqish tartib-taomillari sessiyada deputatlar umumiy sonining koʻpchilik ovozi bilan qabul qilinadi, bayonnoma tarzida rasmiylashtiriladi va qabul qilingan kundan eʼtiboran amal qiladi.

1. Ushbu Nizom “Mahalliy davlat hokimiyati toʻgʻrisida”gi Oʻzbekiston Respublikasi Qonuni, xalq deputatlari viloyat, tuman, shahar Kengashi (bundan buyon matnda mahalliy Kengash deb yuritiladi) reglamenti asosida ishlab chiqilgan va mahalliy Kengashning doimiy komissiyalarini shakllantirish va ishini tashkil qilish tartibini, ular faoliyatining asosiy yoʻnalishlari hamda vakolatlarini belgilaydi.

“Mahalliy davlat hokimiyati toʻgʻrisida”gi Oʻzbekiston Respublikasi Qonuniga muvofiq mahalliy Kengash sessiyasi muhokamasiga kiritiladigan masalalarni dastlabki tarzda koʻrib chiqish va tayyorlash, Oʻzbekiston Respublikasining qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari va qarorlari, Oʻzbekiston Respublikasi Vazirlar Mahkamasining qarorlari, mahalliy Kengash qarorlari hayotga tatbiq etilishiga koʻmaklashish, oʻz vakolatlari doirasida nazorat vazifalarini amalga oshirish uchun mahalliy Kengash oʻz vakolati muddatiga mahalliy Kengash deputatlari orasidan mahalliy Kengashning doimiy komissiyalarini (bundan buyon matnda doimiy komissiyalar deb yuritiladi) saylaydi.

2. Doimiy komissiyalar oʻz faoliyatlarini Oʻzbekiston Respublikasining Konstitutsiyasi, “Mahalliy davlat hokimiyati toʻgʻrisida”gi, “Xalq deputatlari viloyat, tuman va shahar Kengashi deputatining maqomi toʻgʻrisida”gi Oʻzbekiston Respublikasi qonunlari asosida, shuningdek mahalliy Kengash reglamenti hamda doimiy komisiyalari toʻgʻrisidagi nizomga muvofiq amalga oshiradi.

3. Doimiy komissiyalar mahalliy Kengash sessiyasida (bundan buyon matnda sessiya deb yuritiladi) mahalliy Kengash deputatlari orasidan rais va aʼzolardan iborat tarkibda saylanadi. Doimiy komissiyalar oʻz faoliyatlarini jamoatchilik asosida amalga oshiradilar.

4. Mahalliy Kengash deputati faqat bitta doimiy komissiya aʼzosi etib saylanishi mumkin (Odob-axloq masalalari boʻyicha doimiy komissiya bundan mustasno).

Doimiy komissiya tarkibiga kirmagan mahalliy Kengash deputati uning ishida maslahat ovozi huquqi bilan ishtirok etishi mumkin.

Hokim — mahalliy Kengash rahbari hamda mahalliy Kengash kotibiyati mudiri doimiy komissiyalar tarkibiga saylanishi mumkin emas.

5. Doimiy komissiyalar raisligiga va aʼzoligiga nomzodlar sessiyaga hokim — mahalliy Kengash rahbari tomonidan taqdim qilinadi.

Doimiy komissiya raisligiga nomzod boʻyicha ovoz berish alohida oʻtkaziladi.

Doimiy komissiyalar aʼzoligiga nomzodlarni saylash nomzodlarning har birini alohida yoki doimiy komissiyaning butun tarkibini yalpi muhokama qilish yoʻli bilan amalga oshiriladi, ovoz berishda qaror har bir nomzod boʻyicha alohida yoki doimiy komissiyaning butun tarkibi boʻyicha mahalliy Kengash deputatlari umumiy sonining koʻpchilik ovozi bilan qabul qilinadi.

6. Doimiy komissiyalar oʻz majlislarida ochiq ovoz berish yoʻli bilan doimiy komissiya aʼzolarining koʻpchilik ovozi bilan rais oʻrinbosarlarini va kotiblarini saylaydi.

7. Doimiy komissiyalarning barcha aʼzolari teng huquqlardan foydalanadi.

8. Doimiy komissiyalar mahalliy Kengash oldida masʼul va hisobdordir.

9. Mahalliy Kengash deputatining doimiy komissiyadagi vakolatlari uning iltimosiga koʻra, shuningdek uning oʻz vazifalarini bajarishga imkon bermaydigan holatlar munosabati bilan muddatidan ilgari tugatilishi mumkin.

Doimiy komissiya raisining taklifi boʻyicha doimiy komissiya tarkibidagi oʻzgartirishlar sessiyada koʻrib chiqiladi.

10. Doimiy komissiyalar soni, ularning nomlanishi va tarkibi sessiyada belgilanadi.

Mahalliy Kengash tarkibida, qoida tariqasida, quyidagi doimiy komissiyalar tuzilishi mumkin:

mahalliy budjet, iqtisodiy islohotlarni amalga oshirish, investitsiyalar va tadbirkorlikni rivojlantirish masalalari boʻyicha;

sud-huquq masalalari va korrupsiyaga qarshi kurashish boʻyicha;

taʼlim, sogʻliqni saqlash, madaniyat, sport va ijtimoiy himoya masalalari boʻyicha;

yoshlar siyosati, xotin-qizlar va gender tenglik masalalari boʻyicha;

sanoat, transport, qurilish, kommunal soha va aholiga xizmat koʻrsatish masalalari boʻyicha;

agrar, suv xoʻjaligi masalalari va ekologiya boʻyicha;

axborot siyosati va mahalliy davlat organlarida ochiqlikni taʼminlash masalalari boʻyicha;

odob-axloq masalalari boʻyicha.

Zarur hollarda mahalliy Kengash tomonidan yangi doimiy komissiyalar tuzilishi va ilgari tashkil qilingan doimiy komissiyalar tugatilishi, doimiy komissiyalarning tarkibiga oʻzgartirishlar kiritilishi mumkin.

11. Mahalliy budjet, iqtisodiy islohotlarni amalga oshirish, investitsiyalar va tadbirkorlikni rivojlantirish masalalari boʻyicha doimiy komissiya:

mahalliy budjet loyihasini, unga oʻzgartishlar va qoʻshimchalar kiritish haqidagi takliflarni, shuningdek mahalliy budjet ijrosi toʻgʻrisidagi hisobotlarni dastlabki tarzda koʻrib chiqadi, boshqa doimiy komissiyalarning fikrlarini oʻrganadi, xulosalar tayyorlaydi, mazkur masalalar yuzasidan sessiyada maʼruzalar va takliflar bilan chiqadi;

iqtisodiy islohotlarni amalga oshirishda va tadbirkorlikni rivojlantirishning hududiy strategik yoʻnalishlarini ishlab chiqishda ishtirok etadi, oʻz vakolatlari doirasida takliflar kiritadi va ijrosi ustidan deputatlik nazoratini amalga oshiradi;

hududda yangi ish oʻrinlarini yaratish, xususiy va oilaviy tadbirkorlikni qoʻllab-quvvatlash, ularni yanada rivojlantirish uchun zarur infratuzilmani shakllantirish hamda tadbirkorlik subyektlari uchun mutaxassislarni tayyorlash borasida amalga oshirilayotgan ishlarni doimiy oʻrganib boradi va deputatlik nazoratini amalga oshiradi;

budjet mablagʻlaridan maqsadli va samarali foydalanish masalalarini oʻrganadi, ular boʻyicha tavsiyalar tayyorlaydi;

mahalliy budjet ijrosi, budjetdan tashqari va maqsadli fondlar mablagʻlaridan maqsadli va samarali foydalanish tartibi ustidan nazoratni amalga oshiradi;

mahalliy budjetning qoʻshimcha daromad zaxiralari va manbalarini aniqlash boʻyicha ish olib boradi;

mahalliy budjet xarajatlarining qonunchilikda belgilangan qismining jamoatchilik fikri asosida shakllantirilgan tadbirlarni moliyalashtirishga yoʻnaltirilishida ishtirok etadi va ushbu mablagʻlarning maqsadli sarflanishi ustidan nazoratni amalga oshiradi;

mahalliy budjet qoʻshimcha mablagʻlarining belgilangan tartibda taqsimlanishida ishtirok etadi, ushbu masala yuzasidan sessiyaga takliflar kiritadi, mablagʻlarning maqsadli ishlatilishi ustidan nazoratni amalga oshiradi;

mahalliy soliqlar va mahalliy budjetga tushadigan boshqa majburiy toʻlovlarni qonun hujjatlarida belgilangan miqdorlar doirasida belgilash masalalarini koʻrib chiqadi va xulosalar beradi;

tegishliligicha mahalliy budjetga ajratiladigan tartibga soluvchi budjetlararo transfertlarning cheklangan miqdorlarini dastlabki tarzda koʻrib chiqadi hamda xulosalar beradi;

hududning ekspert salohiyatini oshirish, investitsiyalar va turizm masalalari boʻyicha rivojlantirish dasturlari loyihalarining ishlab chiqilishida ishtirok etadi, ularning amalga oshirilishini monitoring qiladi va nazorat qilib boradi;

hududning eksport salohiyati oʻsishiga toʻsqinlik qiladigan tizimli muammolarni oʻrganadi, uning eksport salohiyatini oshirish, shu jumladan, qonunchilikka tegishli oʻzgartishlar kiritish boʻyicha takliflar ishlab chiqadi;

hududiy investitsiya dasturlari bajarilishini tahlil qilib boradi, investitsiyalar, shu jumladan, xorijiy investitsiyalar ishtirokidagi loyihalarning amalga oshirilishi ustidan deputatlik nazoratini oʻrnatadi;

hududga investitsiya jalb etilishiga toʻsqinlik qilayotgan omillarni aniqlaydi, ularni bartaraf etish boʻyicha takliflar ishlab chiqadi va tegishli ijro organiga kiritadi;

hududning turizm salohiyatini tahlil qilish, tizimli muammolarni aniqlash hamda ularni bartaraf etish, shu bilan birga hududning turistik salohiyatini oshirish boʻyicha takliflar ishlab chiqishda ishtirok etadi;

mahalliy Kengash huzuridagi “Xalqparvar” komissiyasi faoliyati samarali yoʻlga qoʻyilishini taʼminlaydi hamda muvofiqlashtirib boradi;

hokimlikning tuzilishi, shtatlari va xodimlarining mehnatiga haq toʻlash fondi toʻgʻrisidagi hokim — mahalliy Kengash rahbari taqdimnomasini dastlabki tarzda koʻrib chiqadi;

mahalliy Kengashning rejalashtirish va budjet-moliyaviy faoliyati bilan bogʻliq boʻlgan boshqa masalalarni koʻrib chiqishda qatnashadi;

aholi bandligini taʼminlash, ularning mehnat sohasidagi huquq va manfaatlarini himoya qilish, daromadlarini oshirish, kambagʻallikni qisqartirish borasidagi ustuvor yoʻnalishlarni belgilashda ishtirok etadi, sohaga oid qonun hujjatlari ijrosi ustidan nazoratni amalga oshiradi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

hokimlik boʻlimlari va boshqarmalari, korxonalar, muassasalar va tashkilotlar rahbarlarining komissiya vakolatiga taalluqli masalalar boʻyicha hisobotini (axborotini) eshitadi, tavsiyalar beradi va ularning ijrosini nazorat qiladi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

12. Sud-huquq masalalari va korrupsiyaga qarshi kurashish boʻyicha doimiy komissiya:

mahalliy Kengash tomonidan rejalashtirilayotgan dasturlarni, shuningdek viloyat, tuman, shahar hududida (keyingi oʻrinlarda hudud deb yuritiladi) qonuniylikni taʼminlash, korrupsiyaga qarshi kurashish, jamoat tartibini saqlash, jinoyatchilikka qarshi kurashish va fuqarolarning huquqlari hamda qonuniy manfaatlarini himoya qilish boʻyicha tadbirlarni ishlab chiqish va amalga oshirishda ishtirok etadi;

qonunchilik, sud-huquq masalalari va korrupsiyaga qarshi kurashish sohasiga oid qonun hujjatlari, davlat dasturlarining ijrosi ustidan tizimli nazoratni amalga oshiradi;

hududda korrupsiyaga qarshi kurashish sohasidagi ishlarning holatini kompleks oʻrganadi hamda ushbu sohadagi faoliyatni takomillashtirish yuzasidan takliflar ishlab chiqadi;

korrupsiya koʻrinishlarining namoyon boʻlishiga olib keladigan tizimli muammolar haqida Oʻzbekiston Respublikasi Oliy Majlisi Senatining Sud-huquq masalalari va korrupsiyaga qarshi kurashish qoʻmitasiga hamda Oʻzbekiston Respublikasi Oliy Majlisi Qonunchilik palatasining Korrupsiyaga qarshi kurashish va sud-huquq masalalari qoʻmitasiga muntazam ravishda axborot kiritib boradi;

oʻz vakolatiga taalluqli boʻlgan mahalliy Kengashning dasturlari va hokim qarorlari loyihalarini koʻrib chiqishda qatnashadi va xulosalar beradi;

hokimlik boʻlimlari va boshqarmalari, korxonalar, muassasalar va tashkilotlar, shuningdek sud, prokuratura, majburiy ijro byurosi, ichki ishlar, adliya organlari rahbarlarining komissiya vakolatiga taalluqli masalalar boʻyicha dastlabki tarzda komissiya majlislarida hisobotlarini (axborotlarini) eshitadi, ular boʻyicha yakuniy xulosa tayyorlaydi hamda mazkur masalani sessiya muhokamasiga kiritadi;

hokim — mahalliy Kengash raisining Oʻzbekiston Respublikasi qonun hujjatlariga mos kelmaydigan qarorlarini bekor qilish toʻgʻrisidagi, xalq deputatlari viloyat Kengashining doimiy komissiyasi esa tegishli viloyat hududida joylashgan xalq deputatlari tuman (shahar) Kengashi qarorlarini bekor qilish toʻgʻrisidagi masalalarni dastlabki tarzda koʻrib chiqadi;

ommaviy axborot vositalari, siyosiy partiyalar va jamoat birlashmalari bilan oʻzaro hamkorlikni amalga oshiradi, tegishli hududda jamoat tadbirlarini oʻtkazish bilan bogʻliq masalalarni koʻrib chiqadi;

fuqarolar va xoʻjalik yurituvchi subyektlarning hududda qonuniylik hamda inson huquqlarining buzilishi masalalariga oid murojaatlarini koʻrib chiqadi, shuningdek tegishli davlat organlariga soʻrovlar yuboradi va doimiy komissiya qarorlarining bajarilishini nazorat qiladi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

13. Taʼlim, sogʻliqni saqlash, madaniyat, sport va ijtimoiy himoya masalalari boʻyicha doimiy komissiya:

hududni taʼlim, sogʻliqni saqlash, madaniyat, sport va ijtimoiy himoya masalalari boʻyicha rivojlantirish dasturlari loyihalarining ishlab chiqilishida ishtirok etadi;

hududni taʼlim, sogʻliqni saqlash, madaniyat, sport va ijtimoiy himoya masalalari boʻyicha rivojlantirish dasturlari bajarilishi ustidan nazoratni amalga oshiradi, shuningdek ularning bajarilishi haqidagi hisobotlarni dastlabki tarzda koʻrib chiqadi, boshqa doimiy komissiyalar bilan birgalikda xulosalar tayyorlaydi, mazkur masalalar yuzasidan sessiyada maʼruza va qoʻshimcha maʼruzalar bilan chiqadi;

hokimlik boʻlimlari va boshqarmalari, korxonalar, muassasalar va tashkilotlar rahbarlarining komissiya vakolatiga taalluqli masalalar boʻyicha hisobotini (axborotini) eshitadi, tavsiyalar beradi va ularning ijrosini nazorat qiladi;

hududdagi taʼlim muassasalarining sharoiti, moddiy-texnik taʼminotini tahlil qilgan holda, ularni yaxshilash boʻyicha takliflarni shakllantiradi va tegishli manzilli dasturlarga kiritish yuzasidan takliflar beradi;

taʼlim tizimining holatini tahlil va nazorat qiladi, taʼlim sifatini yanada yaxshilash, maktablar, litseylar, kollejlar, kasb-hunar maktablari, texnikumlar va oliy oʻquv yurtlarida oʻquv-tarbiya jarayonini rivojlantirish boʻyicha tavsiyalar kiritadi;

taʼlim muassasalari tarmogʻini rivojlantirish, moddiy-texnika bazasini mustahkamlash, oʻquv-tarbiya jarayoni qatnashchilarini sogʻlomlashtirish va moddiy ragʻbatlantirish masalalarini hal qilishga koʻmaklashadi, taʼlim sohasi xodimlarining ijtimoiy masalalarini hal qilish uchun pul mablagʻlari ajratilishi tashabbusi bilan chiqadi;

maktab direktori lavozimiga tavsiya qilingan nomzodlarni oʻrganadi va xulosalar beradi, shuningdek direktorlikka maʼqullangan nomzodlarning uch yillik dasturlari bajarilishini nazorat qilib boradi, zarur hollarda ularning faoliyatiga baho beradi;

kadrlar tayyorlashni yaxshilash, hududning intellektual salohiyatini saqlab qolish maqsadida mahalliy Kengashning oliy oʻquv yurtlari bilan hamkorligi masalalarini dastlabki tarzda oʻrganadi va uni kuchaytirish boʻyicha takliflar kiritadi;

oʻquvchilarni taʼlimning keyingi bosqichi bilan qamrab olish, ularning muayyan kasb egasi boʻlishini, bandligi taʼminlanishini tahlil qilib borish va yaxshilash boʻyicha takliflar ishlab chiqadi;

jismoniy tarbiya va sport muassasalari moddiy-texnik bazasini mustahkamlash, sportni rivojlantirish, shuningdek aholi turar joylarida jismoniy tarbiya va sport bilan shugʻullanish uchun sharoitlar yaratish masalalarini oʻrganadi;

madaniyat muassasalari tarmogʻini rivojlantirishga koʻmaklashadi, ularning yoshlarni estetik tarbiyalashdagi rolini oshirish boʻyicha takliflar kiritadi;

anʼanaviy xalq ijodiyoti markazlari, aholining milliy-madaniy anʼanalari, badiiy hunarmandchilikni rivojlantirish uchun sharoitlar yaratishga koʻmaklashadi;

tibbiy yordam koʻrsatish sifatini yaxshilash, mahalliy davolash-profilaktika muassasalarini, shu jumladan, tabiiy-iqlim sharoitlarini hisobga olgan holda rivojlantirish boʻyicha takliflar ishlab chiqadi;

hududning “tibbiy xaritasi” shakllantirilishi, undan kelib chiqqan holda, aholiga zarur va sifatli tibbiy xizmat koʻrsatilishi boʻyicha nazorat olib boradi;

hududda aholining ijtimoiy himoyalanganlik holatini tahlil qiladi, aholining ijtimoiy himoyalanganligini taʼminlash tizimini takomillashtirish boʻyicha takliflar kiritadi;

budjet mablagʻlari hamda korxonalar, muassasalar va tashkilotlarning xayriya badallari hisobidan aholini ijtimoiy himoya qilishning qoʻshimcha kafolatlarini belgilashda ishtirok etadi;

nogironlar, urush va mehnat faxriylari, koʻp bolali oilalar hamda keksa fuqarolarning uy-joy va moddiy-maishiy sharoitlarini yaxshilash boʻyicha qonun hujjatlarida koʻzda tutilgan chora-tadbirlarni amalga oshirishga koʻmaklashadi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

14. Yoshlar siyosati, xotin-qizlar va gender tenglik masalalari boʻyicha doimiy komissiya:

yoshlar siyosatini amalga oshirish, xotin-qizlar va gender tenglikni taʼminlash sohasidagi dasturlarni ishlab chiqishda qatnashadi, dastlabki tarzda koʻrib chiqadi hamda ularning bajarilishini nazorat qiladi;

mahalliy Kengash huzuridagi “Yoshlar guruhi” hamda “Yoshlar parlamenti vakillari maktabi” tashkil etilishini, ularning faoliyati samarali yoʻlga qoʻyilishini taʼminlaydi hamda muvofiqlashtirib boradi.

yoshlarning oʻz iqtidor va salohiyatlarini namoyon etish, ularning jamiyatda munosib oʻrin topishlari uchun zarur shart sharoitlarni yaratish, yosh kadrlar zaxirasini shakllantirish, ularni tayyorlab borish va bosqichma-bosqich turli rahbarlik lavozimlariga tavsiya etishda ishtirok etadi.

hududda yoshlar siyosati, xotin-qizlar va gender tenglik masalalariga oid qonun hujjatlariga rioya etilishi ustidan nazoratni amalga oshiradi, ularni takomillashtirish yuzasidan takliflar ishlab chiqadi va Oliy Majlis Senatining tegishli qoʻmitalariga taqdim etadi;

yoshlarni va xotin-qizlarning muammolarini oʻz vaqtida aniqlash va hal etish, ularni ijtimoiy muhofaza qilish, bandligini taʼminlash, tadbirkorlik faoliyatiga jalb etish borasida hududda amalga oshirilayotgan ishlarni tahlil qiladi, ushbu yoʻnalishdagi ishlar samaradorligini oshirish boʻyicha taklif va tavsiyalar ishlab chiqadi;

yoshlarning va xotin-qizlarning huquq va erkinliklari, qonuniy manfaatlarini himoya qilishda, ularning jamiyatdagi faol ishtirokini taʼminlashda ishtirok etadi;

yoshlarni oilaga tayyorlash, sogʻlom oilani shakllantirish, “Sogʻlom oila — sogʻlom jamiyat” gʻoyasini hayotga tatbiq etishga yoʻnaltirilgan davlat siyosatini olib borish, jamiyat va oilada sogʻlom ijtimoiy-maʼnaviy muhitni, tinch-totuvlik va osoyishtalikni taʼminlash borasidagi ishlarni tashkil etishda faol ishtirok etadi;

yoshlar va xotin-qizlar bandligini taʼminlash, mehnat sharoitlarini yaxshilash, ularni kichik biznes va xususiy tadbirkorlikka keng jalb etish, kasb-hunarga oʻqitish borasidagi ishlarni tashkil etishda ishtirok etadi, bu boradagi ishlar samaradorligini oshirish boʻyicha takliflar ishlab chiqadi;

yosh oilalarni hamda ogʻir ijtimoiy vaziyatga tushib qolgan xotin-qizlarni uy-joy bilan taʼminlashdagi muammolarni tahlil qiladi va bu boradagi chora-tadbirlarni amalga oshirishga koʻmaklashadi;

ayollarning ijtimoiy turmush sharoitlarini yaxshilashga qaratilgan davlat siyosatini amalga oshirishda faol ishtirok etadi, bu sohadagi ishlar samaradorligini oshirishga doir tavsiyalar ishlab chiqadi;

xotin-qizlarni kamsitish, ularga nisbatan zoʻravonlikning barcha shakllariga barham berish, erta nikoh va majburiy nikohning oldini olish hamda bartaraf qilish boʻyicha takliflar ishlab chiqadi;

hokimlik boʻlimlari va boshqarmalari, korxonalar, muassasalar va tashkilotlar rahbarlarining komissiya vakolatiga taalluqli masalalar boʻyicha hisobotlarini (axborotlarini) eshitadi, tavsiyalar beradi va ularning ijrosini nazorat qiladi;

bola huquqlarini himoya qilish, voyaga yetmaganlar ustidan vasiylik va homiylik boʻyicha ishlarni nazorat qiladi;

Oʻzbekiston Respublikasida gender tenglikka erishish strategiyasida belgilangan vazifalardan kelib chiqib, hududiy chora-tadbirlar dasturlarining ijro etilishi yuzasidan vazirlik, idoralarning hududiy boʻlinmalari rahbarlarining axborotini eshitish va tanqidiy muhokama qilib borish;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

15. Sanoat, transport, qurilish, kommunal soha va aholiga xizmat koʻrsatish masalalari boʻyicha doimiy komissiya:

hududni ijtimoiy-iqtisodiy rivojlantirish dasturlarining sanoat, transport, qurilish, kommunal soha va aholiga xizmat koʻrsatishni rivojlantirish qismini dastlabki tarzda koʻrib chiqadi va tayyorlashda qatnashadi;

hududning bosh rejasi va qurilish qoidalari loyihalarini koʻrib chiqishda ishtirok etadi;

kommunal soha, transport va aloqa holatini oʻrganadi, aholiga kommunal va maishiy xizmat koʻrsatish sifatini oshirish, jamoat transportini rivojlantirish boʻyicha takliflar kiritadi;

hokimlik boʻlimlari va boshqarmalari, korxonalar, muassasalar va tashkilotlar rahbarlarining komissiya vakolatiga taalluqli masalalar boʻyicha hisobotlarini (axborotlarini) eshitadi, tavsiyalar beradi va ularning ijrosini nazorat qiladi;

savdo, umumiy ovqatlanishni tashkil etish, isteʼmol bozori faoliyati bilan bogʻliq masalalarni koʻrib chiqadi;

bozorlar ishini optimallashtirish, sanoat va oziq-ovqat mollarini realizatsiya qilish, hududda savdo yarmarkalarini tashkil qilish boʻyicha takliflar kiritadi;

yoqilgʻi-energetika taʼminoti, suv taʼminoti, oqova suvlarni chetga chiqarib yuborish va tozalash, maishiy chiqindilarni yigʻish, tashish va utilizatsiya qilish masalalarini koʻrib chiqadi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

16. Agrar, suv xoʻjaligi masalalari va ekologiya boʻyicha doimiy komissiya:

agrar, suv xoʻjaligi masalalari va ekologiya boʻyicha dasturlarni dastlabki tarzda koʻrib chiqadi va tayyorlashda qatnashadi;

yerdan oqilona foydalanish, tuproq unumdorligini saqlash va qayta ishlov berish, tabiiy muhitni yaxshilash boʻyicha ijtimoiy-iqtisodiy va tashkiliy-xoʻjalik sharoitlari masalalarini koʻrib chiqadi;

dehqon va fermer xoʻjaliklari, sanoat korxonalari, savdo va umumiy ovqatlanish korxonalari oʻrtasidagi ishlab chiqarish aloqalarini oʻrganadi va ularni mustahkamlash boʻyicha takliflar kiritadi;

tabiatni muhofaza qilish va tabiiy resurslardan camarali foydalanish ustidan nazoratni amalga oshiradi;

qishloq xoʻjaligi hamda dehqon va fermer xoʻjaliklarini samarali rivojlantirish uchun zarur sharoitlar yaratish boʻyicha takliflar kiritadi;

hududdagi suv resurslaridan foydalanish va ularni muhofaza qilishning asosiy yoʻnalishlarini belgilashda, shuningdek suv resurslaridan foydalanishni tartibga solish va ularni muhofaza qilish sohasida qonuniylik hamda huquq-tartibotni taʼminlashda ishtirok etadi;

suv obyektlari holatini saqlash va yaxshilash, ularga zararli taʼsir koʻrsatilishining oldini olish va bartaraf etish, shuningdek avariyalar, toshqin, sel va tabiiy ofatlar natijasida vayron boʻlgan obyektlarni tiklash yuzasidan takliflar kiritadi;

zarur hollarda qonun hujjatlariga muvofiq ekologik ekspertiza oʻtkazish boʻyicha takliflar kiritadi;

hokimlik boʻlimlar va boshqarmalari, korxonalar, muassasalar va tashkilotlar rahbarlarining komissiya vakolatiga taalluqli masalalar boʻyicha hisobotlarini (axborotlarini) eshitadi, tavsiyalar beradi va ularning ijrosini nazorat qiladi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

17. Axborot siyosati va mahalliy davlat organlarida ochiqlikni taʼminlash masalalari boʻyicha doimiy komissiya:

mahalliy davlat organlari va tashkilotlari faoliyati ochiqligini taʼminlash sohasini muvofiqlashtiradi hamda doimiy monitoring qiladi;

axborot siyosati, mahalliy davlat organlarida ochiqlik va oshkoralikni taʼminlashga oid qonun hujjatlari, davlat dasturlarining ijro etilishi ustidan nazoratni amalga oshiradi, shu jumladan, mahalliy davlat organlari, xoʻjalik boshqaruvi organlari rahbarlarining ochiqlikni taʼminlash borasidagi faoliyati yuzasidan hisobotlarini (axborotlarini) eshitadi;

axborot siyosati, mahalliy davlat organlarida ochiqlik va oshkoralikni taʼminlashga oid mavjud qonunchilik bazasini tahlil qilgan holda, uni yanada takomillashtirish yuzasidan takliflar ishlab chiqadi;

axborot siyosati, mahalliy davlat organlarida ochiqlikni taʼminlashga doir masalalar yuzasidan oʻrganishlar olib boradi;

joylarda aholi, jumladan, axborot xizmati sohasida faoliyat olib borayotgan xodimlar va ommaviy axborot vositalari vakillari bilan bevosita muloqot qilish orqali axborot siyosati hamda mahalliy davlat organlarida ochiqlik va oshkoralikni taʼminlash masalalariga oid haqiqiy ahvolni oʻrganadi hamda bu borada aniqlangan dolzarb masalalarni deputatlik nazorati doirasida hal etish choralarini koʻradi;

jismoniy va yuridik shaxslarning axborot siyosati hamda mahalliy davlat organlarida ochiqlik va oshkoralikni taʼminlash masalalariga oid murojaatlarini koʻrib chiqadi;

vakolati doirasida nodavlat notijorat tashkilotlari va fuqarolik jamiyatining boshqa institutlari bilan yaqindan hamkorlik qiladi, fuqarolik jamiyati institutlari faoliyatini samarali yoʻlga qoʻyishga, davlat tuzilmalari va nodavlat notijorat tashkilotlari oʻrtasida ijtimoiy sheriklikni rivojlantirishga koʻmaklashadi;

oʻz vakolatiga taalluqli boʻlgan mahalliy Kengash dasturlari va hokim qarorlari loyihalarini koʻrib chiqishda qatnashadi hamda xulosalar beradi;

hududdagi mahalliy davlat hokimiyati organlari va fuqarolik jamiyati institutlarining oʻzaro hamkorligi samaradorligini oshirish yuzasidan tahlillar olib boradi va tegishli takliflar tayyorlaydi;

hududdagi nodavlat notijorat tashkilotlarini va fuqarolik jamiyatining boshqa institutlari faoliyati uchun zarur shart-sharoitlar yaratish hamda ularni qoʻllab-quvvatlash borasida amalga oshirilayotgan ishlarni tahlil qiladi, zarur hollatda holatni yaxshilash boʻyicha takliflar kiritib boradi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

18. Odob-axloq masalalari boʻyicha doimiy komissiya:

mahalliy Kengash deputatining vakolatlarini muddatidan ilgari tugatish, shu jumladan, uni chaqirib olish toʻgʻrisidagi, mahalliy Kengash deputatini jinoiy javobgarlikka tortishga, ushlab turishga, qamoqqa olishga yoki unga nisbatan sud tartibida beriladigan maʼmuriy jazoni qoʻllashga tegishincha viloyat, tuman, shahar prokurorining taqdimnomasi boʻyicha rozilik berish haqidagi masalalarni dastlabki tarzda koʻrib chiqadi va mahalliy Kengash tomonidan koʻrib chiqishga tayyorlaydi;

mahalliy Kengashning doimiy va muvaqqat komissiyalari, boshqa organlarini tashkil qilish va tugatish haqidagi masalalarni dastlabki tarzda koʻrib chiqadi;

mahalliy Kengashning topshirigʻiga muvofiq mahalliy Kengash deputati tomonidan qonun hujjatlari, axloq normalari va Xalq deputatlari viloyat, tuman, shahar Kengashi deputatlarining odob-axloq qoidalarini buzish faktlari boʻyicha materiallarni koʻrib chiqadi hamda mazkur masala boʻyicha xulosa taqdim qiladi;

mahalliy Kengashning reglamenti loyihasini ishlab chiqadi va tasdiqlash uchun kiritadi, shuningdek unga oʻzgartishlar va qoʻshimchalar kiritish toʻgʻrisida takliflar tayyorlaydi;

mahalliy Kengashning doimiy va muvaqqat komissiyalari toʻgʻrisidagi nizomlar loyihalarini ishlab chiqishda ishtirok etadi;

Xalq deputatlari viloyat, tuman, shahar Kengashi deputatlarining odob-axloq qoidalari loyihasini ishlab chiqadi va tasdiqlash uchun sessiyaga kiritadi, shuningdek unga oʻzgartishlar va qoʻshimchalar kiritish toʻgʻrisida takliflar tayyorlaydi;

saylovchilarning mahalliy Kengash deputatlari tomonidan Xalq deputatlari viloyat, tuman, shahar Kengashi deputatlarining odob-axloq qoidalarini buzish bilan bogʻliq shikoyatlarini koʻrib chiqadi;

mahalliy Kengash deputatlari, boshqa shaxslar tomonidan mahalliy Kengashning reglamenti normalariga rioya qilinishi ustidan nazoratni amalga oshiradi va uni buzish holatlari mavjud boʻlganda ularni bartaraf qilish choralarini koʻradi;

oʻz vakolatiga taalluqli boshqa masalalarni koʻrib chiqadi, ular boʻyicha qarorlar qabul qiladi, tavsiyalar beradi va zarur hollarda mahalliy Kengash qarorlari loyihalarini sessiyada koʻrib chiqish uchun kiritadi.

19. Doimiy komissiyalar oʻz faoliyatlarini sessiyada tasdiqlanadigan ish rejalari asosida amalga oshiradilar. Doimiy komissiyaning ish rejasi mahalliy Kengashning ish rejasi bilan belgilangan hududni ijtimoiy-iqtisodiy rivojlantirish faoliyatining asosiy yoʻnalishlariga muvofiq ishlab chiqiladi.

Doimiy komissiyaning tashabbusi bilan doimiy komissiyaning ish rejasiga tegishli oʻzgartishlar va qoʻshimchalar kiritilishi mumkin. Doimiy komissiyaning ish rejasidagi oʻzgartishlar navbatdagi sessiyada tasdiqlanadi.

20. Doimiy komissiyalar oʻz ishlarini masalalarni birgalikda, erkin muhokama qilish va hal etish, oshkoralik hamda doimiy komissiyalar aʼzolarining keng tashabbuskorligi asosida tashkil etadilar.

21. Doimiy komissiyalar oʻz faoliyatlarini majlis shaklida amalga oshiradilar.

Doimiy komissiyalarning majlislari, qoida tariqasida, har oyda kamida bir marta oʻtkaziladi.

Doimiy komissiyaning majlislari rais, rais yoʻqligida esa rais oʻrinbosarining tashabbusi bilan, shuningdek komissiya aʼzolari koʻpchiligi tomonidan chaqirilishi mumkin.

Doimiy komissiyalarning qoʻshma majlislari ular oʻrtasidagi kelishuvga muvofiq oʻtkaziladi.

22. Doimiy komissiyalar majlislarida ish davlat tilida olib boriladi.

23. Doimiy komissiyalarning majlislari, basharti ularda doimiy komissiya tarkibining yarmidan koʻpi ishtirok etsa, vakolatli hisoblanadi.

Doimiy komissiya aʼzosi majlisda ishtirok etish imkoniyati boʻlmagan taqdirda, bu haqda doimiy komissiya raisiga oldindan xabar qilishi shart.

24. Doimiy komissiyalar majlislari kun tartibi loyihasiga doimiy komissiyalar ish rejalaridagi masalalar, mahalliy Kengash qarorlarida belgilangan masalalar, shuningdek doimiy komissiyalar aʼzolari tomonidan taklif qilingan masalalar kiritiladi.

Kun tartibi loyihasi va majlisni olib borish tartibi doimiy komissiya raisi tomonidan eʼlon qilinadi va muhokama qilingandan soʻng tasdiqlanadi.

25. Doimiy komissiya majlislarida bayonnomalar yuritiladi.

Majlis bayonnomasida quyidagilar koʻrsatiladi:

doimiy komissiyaning nomi, majlisning tartib raqami;

majlis oʻtkaziladigan vaqt, sana va joy;

hozir boʻlgan va qatnashmayotgan doimiy komissiya aʼzolarining soni, shuningdek taklif etilgan shaxslar soni;

majlisning kun tartibi, majlisda koʻrib chiqish uchun kiritilgan har bir masala yuzasidan har bir maʼruzachi hamda qoʻshimcha maʼruzachining familiyasi va lavozimi;

kun tartibiga muvofiq muhokama qilinayotgan masalalarning mohiyati;

“yoqlayman”, “qarshiman” yoki “betarafman” deb berilgan ovozlar soni koʻrsatilgan, qabul qilingan qarorlar roʻyxati.

Majlis bayonnomasiga majlisda hozir boʻlgan va qatnashmayotgan doimiy komissiya aʼzolari roʻyxati, taklif etilgan shaxslar roʻyxati, maʼruzalar matnlari va boshqa materiallar ilova qilinadi.

Doimiy komissiya majlisining bayonnomasi majlis tugaganidan soʻng uch kundan kechiktirmay rasmiylashtiriladi. Bayonnoma doimiy komissiya raisi yoki uning vazifasini bajaruvchi shaxs va doimiy komissiya kotibi tomonidan imzolanadi.

26. Doimiy komissiya majlisini samarali olib borish uchun, qoida tariqasida, maʼruza uchun 20 daqiqagacha, qoʻshimcha maʼruza uchun 10 daqiqagacha, muzokaralarda soʻzga chiquvchilarga 5 — 7 daqiqagacha, axborot yoki maʼlumot berish uchun esa 3 daqiqagacha vaqt beriladi.

27. Doimiy komissiyalarning majlislari ochiq oʻtkaziladi. Doimiy komissiya yopiq yoki sayyor majlis oʻtkazish toʻgʻrisida qaror qabul qilishga haqli.

Majlislarda Oʻzbekiston Respublikasi Oliy Majlisi Senatining aʼzolari, Oʻzbekiston Respublikasi Oliy Majlisi Qonunchilik palatasining deputatlari, shuningdek hududda joylashgan davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari, ommaviy axborot vositalarining taklif qilingan vakillari va boshqa shaxslar ishtirok etishi mumkin.

Majlisga taklif etilgan shaxslar muhokama etilayotgan masalalar yuzasidan qaror qabul qilishda ovoz berish huquqiga ega emas, shuningdek ular raislik qiluvchining farmoyishlariga boʻysunishlari shart.

Majlisga taklif qilinayotgan shaxslarning soni va tarkibi doimiy komissiya raisi tomonidan hal etiladi.

Majlisda raislik qiluvchi majlisga taklif qilingan shaxslar tarkibi va soni toʻgʻrisida doimiy komissiya aʼzolarini xabardor qiladi.

28. Doimiy komissiyalar masalalarni tayyorlash va ularni puxta ishlab chiqish uchun mahalliy Kengash deputatlaridan, davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari vakillari, mutaxassislar va ekspertlardan iborat ishchi guruhlar tuzishga haqli.

29. Doimiy komissiyalar oʻzlariga taalluqli masalalarni koʻrib chiqish vaqtida teng huquqlardan foydalanadilar va bir xil majburiyatlarga egadirlar.

30. Doimiy komissiyalarning aʼzolari doimiy komissiyalar faoliyatida ishtirok etishlari, ularning qarorlarini hayotga tatbiq etishga koʻmaklashishlari, doimiy komissiyalarning topshiriqlarini bajarishlari shart. Doimiy komissiyalar aʼzolari har chorakda doimiy komissiya raisiga doimiy komissiya ish rejasida nazarda tutilgan tadbirlarning ijro etilishi boʻyicha oʻz faoliyati yakunlari va deputatlik vazifalarini bajarish natijalari toʻgʻrisida yozma hisobotlar taqdim etadilar.

Doimiy komissiyalar aʼzolari oʻz vakolatlarini ishlab chiqarish yoki xizmat faoliyatidan ajralmagan holda amalga oshiradilar. Korxonalar, muassasalar va tashkilotlarning rahbarlari doimiy komissiyalar aʼzolarini ular oʻz deputatlik vazifalarini bajaradigan vaqtda, ularning ish joyini (lavozimini) saqlagan holda, ishdan ozod qilishlari shart. Deputatlik vazifalarini bajarayotgan vaqtda doimiy komissiyalar aʼzolarining oʻrtacha ish haqi saqlanib qoladi.

31. Doimiy komissiyaning aʼzosi koʻrib chiqilayotgan masalalar boʻyicha hal qiluvchi ovoz huquqidan foydalanadi, ularni tayyorlash, muhokama qilish va qarorlar qabul qilishda, shuningdek mahalliy Kengashning, doimiy komissiyaning qarorlari bajarilishini tashkil etishda ishtirok etadi. Doimiy komissiyaning har bir aʼzosi bir ovozga ega va muhokama qilinayotgan masala yuzasidan “yoqlayman”, “qarshiman” yoki “betarafman” deb ovoz beradi. Doimiy komissiya majlisida ishtirok etayotgan doimiy komissiyaning har bir aʼzosi muhokama qilinayotgan masala boʻyicha ovoz berishda ishtirok etishga majbur.

32. Doimiy komissiya aʼzosiga doimiy komissiya tomonidan koʻrib chiqilayotgan barcha masalalarni hal etishda faol ishtirok etish uchun sharoit yaratib beriladi, unga zarur hujjatlar yoki boshqa materiallar oldindan yuboriladi. Doimiy komissiya aʼzolari doimiy komissiya majlisi oʻtkaziladigan vaqt, sana, joy va kun tartibi toʻgʻrisida kamida bir kun oldin xabardor qilinadi.

Doimiy komissiya aʼzolari doimiy komissiya tomonidan joylarda koʻrib chiqilishi lozim boʻlgan masalalarni hokim – mahalliy Kengash rahbari, doimiy komissiya raisining topshirigʻiga binoan yoki oʻz tashabbusi bilan oʻrganadi, ushbu masala yuzasidan davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari va fuqarolardan kelgan takliflarni umumlashtiradi, ularni doimiy komissiya majlisida muhokama qiladi va takliflar kiritadi.

33. Bir nechta doimiy komissiyalarga taalluqli masalalar doimiy komissiyalar tomonidan birgalikda tayyorlanishi va koʻrib chiqilishi mumkin.

Doimiy komissiyalarning qoʻshma majlislarini doimiy komissiyalar raislari oʻzaro kelishuv asosida olib boradilar.

Doimiy komissiya oʻzi koʻrib chiqayotgan masalalar yuzasidan boshqa doimiy komissiyalarning fikrini soʻrab olishi mumkin.

Boshqa doimiy komissiyalarning iltimosiga binoan doimiy komissiya oʻziga taalluqli masalalar boʻyicha ushbu doimiy komissiyalar tomonidan koʻrib chiqilayotgan masalalarni tayyorlashda ishtirok etishi mumkin.

34. Ayni bir masala boʻyicha doimiy komissiyalarning fikri turlicha boʻlgan taqdirda ular kelishmovchiliklarni bartaraf etish choralarini koʻradilar. Agar murosaga kelinmasa, ushbu masalani tayyorlashga masʼul boʻlgan doimiy komissiyaning qarori uzil-kesil hisoblanadi.

35. Doimiy komissiyalarda barcha masalalar doimiy komissiya aʼzolari umumiy tarkibining koʻpchilik ovozi bilan hal etiladi.

Bir nechta doimiy komissiyalarning qoʻshma majlislari oʻtkazilganda qaror har bir doimiy komissiyada kvorum mavjud boʻlgan holda majlisda qatnashayotgan doimiy komissiyalar aʼzolari umumiy tarkibining koʻpchilik ovozi bilan qabul qilinadi.

36. Doimiy komissiyalar koʻrib chiqilayotgan masalalar yuzasidan tavsiyaviy xususiyatga ega boʻlgan qarorlar qabul qiladi yoki mahalliy Kengash qarorlari loyihalari boʻyicha oʻzlariga taalluqli masalalar yuzasidan xulosalar beradi.

37. Doimiy komissiyalarning qarorlari, xulosalari va bayonnomalari doimiy komissiya raisi tomonidan imzolanadi.

Doimiy komissiyalar tomonidan qabul qilingan qoʻshma qarorlar, ular tomonidan birgalikda tayyorlangan xulosalar, shuningdek qoʻshma majlislarning bayonnomalari ularning raislari tomonidan imzolanadi.

38. Doimiy komissiyalar tomonidan qabul qilingan qarorlar tegishli davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari va manfaatdor shaxslarga yuboriladi.

39. Doimiy komissiyalarning qarorlari qaysi davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari va mansabdor shaxslarga nisbatan qabul qilingan boʻlsa, ular tomonidan koʻrib chiqilishi shart.

Doimiy komissiya qarorida boshqa muddat koʻrsatilgan boʻlmasa, koʻrib chiqish natijalari yoki koʻrilgan choralar haqida doimiy komissiyalarga bir oy muddatda xabar qilinishi lozim. Doimiy komissiyalar qarorlarini koʻrib chiqish yakunlari doimiy komissiyalar majlislarida, zarur hollarda esa sessiyalarda koʻrib chiqiladi. Zaruratga qarab, doimiy komissiya majlisida uning qarori ijro etilishi muddatini uzaytirish toʻgʻrisida qaror qabul qilinishi mumkin.

40. Doimiy komissiya qarorlari bajarilishining borishi yuzasidan nazorat doimiy komissiya raisi yoki qarorda koʻrsatilgan doimiy komissiya aʼzosi tomonidan amalga oshiriladi.

41. Doimiy komissiyalar sessiyalar kun tartibiga doir takliflarni shakllantirishda ishtirok etadilar.

42. Doimiy komissiyalar oʻzlariga taalluqli masalalar boʻyicha davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari, mansabdor shaxslardan hujjatlar, yozma xulosalar, hisobot maʼlumotlari va boshqa materiallarni soʻrab olishga haqli.

43. Doimiy komissiyalar hududda joylashgan davlat organlari, korxonalar, muassasalar, tashkilotlar, nodavlat notijorat tashkilotlari va fuqarolarning oʻzini oʻzi boshqarish organlari rahbarlarini oʻz majlislariga taklif etishi hamda ularning mahalliy Kengash qarorlari va doimiy komissiyalar tavsiyalarining bajarilishi toʻgʻrisidagi hisobotini (axborotini) tinglash huquqiga ega.

Doimiy komissiyalar tegishli organlar va tashkilotlarni koʻrib chiqiladigan masalalar xususida oldindan xabardor qiladilar.

44. Doimiy komissiyalar oʻrganib chiqish uchun oʻzlariga berilgan masalalarni dastlabki tarzda koʻrib chiqish yakunlari yuzasidan mahalliy Kengashga oʻz qarorlari yoki xulosalarini taqdim etadilar.

45. Mahalliy Kengashning topshirigʻiga binoan, doimiy komissiyalar mahalliy Kengash deputatlari bildirgan takliflar, tanqidiy mulohazalar va soʻrovlarning amalga oshirilishini nazorat qiladilar.

46. Doimiy komissiya raisi:

zarur materiallar tayyorlanishini tashkil etadi, doimiy komissiya majlisini chaqiradi, majlis haqida doimiy komissiya aʼzolari va boshqa ishtirokchilarni xabardor qiladi;

doimiy komissiya majlislarida raislik qiladi;

doimiy komissiyaning ish rejasi loyihasining tayyorlanishini tashkil etadi;

doimiy komissiya aʼzolari, shu jumladan, doimiy komissiya raisi oʻrinbosari va doimiy komissiya kotibi oʻrtasida ishlarni taqsimlaydi hamda ular faoliyatini yoʻnaltiradi;

doimiy komissiya aʼzolariga topshiriqlar beradi, ularga doimiy komissiyaning faoliyati bilan bogʻliq materiallar va hujjatlarni yuboradi;

doimiy komissiya aʼzolarini ishchi guruhlarning ishida qatnashish, shuningdek doimiy komissiyaning boshqa topshiriqlarini bajarish uchun taklif qiladi;

davlat organlari, korxonalar, muassasalar, tashkilotlar, nodavlat notijorat tashkilotlari, fuqarolarning oʻzini oʻzi boshqarish organlari vakillarini, mutaxassislar va olimlarni doimiy komissiya ishida ishtirok etish uchun taklif qiladi;

sessiyalarda, davlat organlari, korxonalar, muassasalar, tashkilotlar, nodavlat notijorat tashkilotlari va fuqarolarning oʻzini oʻzi boshqarish organlari bilan boʻladigan munosabatlarda doimiy komissiya nomidan vakillik qiladi;

doimiy komissiya faoliyati toʻgʻrisida yarim yillik va yillik hisobot tayyorlaydi va sessiyada hisobot beradi;

doimiy komissiya qarorlarining ijro etilishi yuzasidan ishlarni tashkil etadi;

mahalliy Kengashga, hokimga — mahalliy Kengash rahbariga ularning topshiriqlari bajarilishi yuzasidan axborot beradi;

doimiy komissiya aʼzolarini ular tomonidan qabul qilingan qarorlar bajarilganligi va tavsiyalari koʻrib chiqilganligi toʻgʻrisida xabardor qiladi;

boshqa doimiy komissiyalar bilan birgalikda ishlar olib borilishini tashkil qiladi;

doimiy komissiya majlisi qarorlari, xulosalari va bayonnomalarini imzolaydi;

oʻz vakolati doirasida boshqa vazifalarni amalga oshiradi.

47. Doimiy komissiya raisi oʻrinbosari doimiy komissiya raisining topshirigʻiga koʻra uning ayrim vazifalarini bajaradi, doimiy komissiya raisi yoʻqligida yoki uning oʻz vazifalarini amalga oshirishga imkoni boʻlmagan hollarda rais vazifasini bajaradi.

48. Doimiy komissiya kotibi:

doimiy komissiya ish rejasining loyihasini tayyorlaydi;

doimiy komissiya ish rejasining bajarilishi ustidan nazoratni amalga oshiradi;

doimiy komissiya ish yurituvi uchun javob beradi, mahalliy Kengash kotibiyatiga hujjatlarni saqlash uchun oʻrnatilgan tartibda topshiradi;

doimiy komissiya majlisi bayonnomasini yuritadi va uni imzolaydi;

doimiy komissiya faoliyati bilan bogʻliq boshqa vazifalarni bajaradi.

49. Doimiy komissiyalar faoliyatini tashkiliy, texnikaviy va boshqa jihatlardan xizmat koʻrsatish tegishli mahalliy Kengash kotibiyati tomonidan taʼminlanadi.

50. Tegishli mahalliy Kengash kotibiyati doimiy komissiyalarni hujjatlar, zarur axborot va maʼlumot materiallari, shuningdek doimiy komissiyalar faoliyati bilan bogʻliq masalalar boʻyicha mutaxassislarning maslahatlari bilan taʼminlaydi.

51. Doimiy komissiyalar toʻgʻrisidagi nizomni qabul qilish, unga oʻzgartirish va qoʻshimchalar kiritish masalalari yuzasidan qarorlar sessiyada mahalliy Kengash deputatlari umumiy sonining koʻpchilik ovozi bilan qabul qilinadi.