Oʻzbekistonda koronavirus infeksiyasi (COVID-19) tarqalishiga qarshi kurashish davrida oʻrnatilgan cheklovlarni inobatga olgan holda, shuningdek koronavirus infeksiyasining deputatlar orasida tarqalishining oldini olish maqsadida “Oʻzbekiston Respublikasi Oliy Majlisining Qonunchilik palatasi toʻgʻrisida”gi Oʻzbekiston Respublikasi Konstitutsiyaviy Qonunining 10-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekistonda koronavirus infeksiyasi (COVID-19) tarqalishiga qarshi kurashish davrida Oʻzbekiston Respublikasi Oliy Majlisi Qonunchilik palatasi majlislarini videokonferensaloqa rejimida oʻtkazish boʻyicha vaqtinchalik reglament 1-ilovaga muvofiq tasdiqlansin.

2. Oʻzbekiston Respublikasi Oliy Majlisi Qonunchilik palatasi majlislarini videokonferensaloqa rejimida oʻtkazishni tashkil etish uchun 2-ilovaga muvofiq tarkibda sanoq komissiyasi tuzilsin.

3. Ushbu Qaror qabul qilingan kundan eʼtiboran kuchga kiradi.

4. Ushbu Qaror Oʻzbekistonda koronavirus infeksiyasi (COVID-19) tarqalishiga qarshi kurashish boʻyicha karantin choralari bekor qilinguniga qadar amal qiladi.

1-modda. Oʻzbekistonda koronavirus infeksiyasi (COVID-19) tarqalishiga qarshi kurashish davrida Oʻzbekiston Respublikasi Oliy Majlisi Qonunchilik palatasi majlislarini videokonferensaloqa rejimida oʻtkazish boʻyicha vaqtinchalik reglamenti (bundan buyon matnda Vaqtinchalik reglament deb yuritiladi) Oʻzbekiston Respublikasining Konstitutsiyasiga, “Oʻzbekiston Respublikasi Oliy Majlisining Qonunchilik palatasi toʻgʻrisida”gi Konstitutsiyaviy Qonunining 10-moddasiga muvofiq Oʻzbekiston Respublikasi Oliy Majlisining Qonunchilik palatasi (bundan buyon matnda Qonunchilik palatasi deb yuritiladi) majlislarini videokonferensaloqa rejimida oʻtkazish, ovoz berish tartib-taomillarini hamda uning natijalarini hisobga olish tartibini belgilaydi.

2-modda. Qonunchilik palatasining majlisini videokonferensaloqa rejimida oʻtkazish toʻgʻrisidagi qaror Qonunchilik palatasi Spikeri tomonidan qabul qilinishi mumkin.

Qonunchilik palatasining videokonferensaloqa rejimidagi majlislari Qonunchilik palatasi binosidagi majlislar zalidan oʻtkaziladi.

3-modda. Qonunchilik palatasining videokonferensaloqa rejimida oʻtkaziladigan majlislari, agar majlislar ishida palata deputatlari umumiy sonining kamida yarmi ishtirok etsa, vakolatli hisoblanadi.

Videokonferensaloqa rejimida oʻtkaziladigan majlislarda Oʻzbekiston Respublikasining Konstitutsiyasini, konstitutsiyaviy qonunlarini qabul qilishga, ularga oʻzgartishlar va qoʻshimchalar kiritishga yoʻl qoʻyilmaydi.

4-modda. Qonunchilik palatasining videokonferensaloqa rejimida oʻtkaziladigan majlislarining kun tartibi Oʻzbekiston Respublikasi Oliy Majlisi Qonunchilik palatasi Reglamentida belgilangan tartibda Qonunchilik palatasi Kengashi tomonidan shakllantiriladi.

Qonunchilik palatasining yopiq majlislarini videokonferensaloqa rejimida oʻtkazish mumkin emas.

5-modda. Qonunchilik palatasining videokonferensaloqa rejimida oʻtkaziladigan majlislarida Qonunchilik palatasi deputatlari, Devoni xodimlari, qonunchilik tashabbusi huquqi subyektlari va ularning vakillari, shuningdek Oʻzbekiston Respublikasi Konstitutsiyasi 81-moddasining yettinchi qismida belgilangan shaxslar ishtirok etishga haqli.

Bunday majlislar ochiq, oshkora oʻtkaziladi va ommaviy axborot vositalari tomonidan yoritiladi.

6-modda. Qonunchilik palatasining videokonferensaloqa rejimida oʻtkaziladigan majlislarida hozir boʻlgan deputatlarni roʻyxatdan oʻtkazish, ochiq ovoz berish natijalarini sanab chiqish va ovoz berish natijalarini aniqlash sanoq komissiyasi tomonidan amalga oshiriladi.

Sanoq komissiyasining qarori komissiya aʼzolarining koʻpchilik ovozi bilan qabul qilinadi.

7-modda. Qonunchilik palatasining videokonferensaloqa rejimida oʻtkaziladigan majlislarining kun tartibiga kiritilgan qonun loyihalari va ularga doir materiallar masʼul qoʻmitaning taqdimiga binoan Qonunchilik palatasi Devoni tomonidan, qoida tariqasida, majlis boshlanguniga qadar uch kundan kechiktirmay deputatlarga yetkaziladi.

8-modda. Qonunchilik palatasining videokonferensaloqa rejimida oʻtkaziladigan majlisi boshlanishidan avval sanoq komissiyasi Qonunchilik palatasining majlislar zaliga toʻplangan deputatlarni hamda videokonferensaloqa rejimida majlisga ulangan deputatlarni roʻyxatdan oʻtkazadi.

Roʻyxatdan oʻtkazish majlis boshlanishidan 30 daqiqa oldin boshlanadi va 10 daqiqa qolganda yakunlanadi.

9-modda. Qonunchilik palatasining majlisi videokonferensaloqa rejimida oʻtkazilganda Qonunchilik palatasining majlislar zalida quyidagi shaxslarning boʻlishi shart:

Qonunchilik palatasining majlisida raislik qiluvchi;

kun tartibiga kiritilgan qonun loyihalari yuzasidan masʼul etib belgilangan maʼruzachilar;

sanoq komissiyasining aʼzolari;

har bir siyosiy partiya fraksiyasining kamida bittadan vakili.

Qonunchilik palatasining boshqa deputatlari majlisda videokonferensaloqa rejimida ishtirok etishi mumkin.

10-modda. Qoida tariqasida, maʼruza uchun — 30 daqiqagacha, qoʻshimcha maʼruza uchun — 20 daqiqagacha va yakunlovchi soʻz uchun 15 daqiqagacha boʻlgan vaqt belgilanadi.

Munozaralarda soʻzga chiquvchi deputatlarga 10 daqiqagacha vaqt beriladi. Munozaralarda takroriy soʻzga chiqish uchun, shuningdek majlisni olib borish tartibi, bayonotlar, savollar, takliflar, xabarlar, maʼlumotlar uchun — 3 daqiqagacha vaqt beriladi.

11-modda. Qonunchilik palatasining videokonferensaloqa rejimida oʻtkaziladigan majlisini olib borish Oʻzbekiston Respublikasi Oliy Majlisi Qonunchilik palatasining Reglamentida belgilangan umumiy tartibda amalga oshiriladi.

12-modda. Videokonferensaloqa rejimida oʻtkaziladigan majlislarda Qonunchilik palatasining qarorlari ochiq ovoz berish orqali qabul qilinadi.

13-modda. Har bir masala boʻyicha ovoz berishda deputat bitta ovozga ega boʻladi va u qaror qabul qilinishini “yoqlab” yoki unga “qarshi” yoxud qaror qabul qilinishiga betaraflik bildirib ovoz beradi.

Deputat oʻzining ovoz berish huquqini shaxsan amalga oshiradi.

Ovoz berish vaqtida hozir boʻlmagan deputat ovoz berish uchun ajratilgan vaqt oʻtganidan keyin ovoz berishga haqli emas.

14-modda. Videokonferensaloqa rejimida oʻtkaziladigan majlislarda ovoz berish quyidagi tartibda amalga oshiriladi:

1) majlisda raislik qiluvchi masala ovozga qoʻyilganligini eʼlon qiladi;

2) majlislar zalida hozir boʻlgan deputatlar birinchi navbatda ovoz beradi. Ovoz berish elektron tizim orqali amalga oshirilishi mumkin;

3) majlisda videokonferensaloqa rejimida jamoaviy ulanish nuqtasidan ishtirok etayotgan deputatlar ikkinchi navbatda ovoz beradi. Bunda videokonferensaloqa rejimida jamoaviy ulanish nuqtasidan ishtirok etayotgan deputatlar tasviri ketma ketlikda ekranga chiqariladi. Ovoz berish jarayonida ovoz berayotgan barcha deputatlar koʻrinib turishi shart. Ovoz berish natijalari ularning orasidan tayinlangan vakil tomonidan oʻqib eshittiriladi (“tarafdorlar”, “qarshilar”, “betaraflar”);

4) majlisda videokonferensaloqa rejimida yakka tartibda ulanish nuqtasidan ishtirok etayotgan deputatlar uchinchi navbatda ovoz beradi. Bunda barcha deputatlarning tasviri bir vaqtning oʻzida ekranga chiqarib turiladi. Raislik qiluvchi tomonidan “tarafdorlar”, “qarshilar” va “betaraflar” bormi degan savollar bilan murojaat qilinadi. Deputatlar bu savollarga qoʻllarini koʻtarib javob beradilar;

5) ovoz berishning har bir navbatining natijasi sanoq komissiyasi tomonidan qayd etib boriladi. Majlisda ishtirok etayotgan barcha deputatlar ovoz berib boʻlganidan soʻng sanoq komissiyasining raisi raislik qiluvchiga ovoz berish natijalari toʻgʻrisida maʼlumot beradi;

6) raislik qiluvchi ovoz berish natijalarini eʼlon qiladi.

15-modda. Qonunchilik palatasining qarorlari, agar Oʻzbekiston Respublikasining Konstitutsiyasida va qonunida boshqacha tartib nazarda tutilmagan boʻlsa, deputatlar umumiy sonining koʻpchilik ovozi bilan qabul qilinadi.

16-modda. Barcha masalalar boʻyicha ovoz berish natijalari Qonunchilik palatasining bayonnomasi va stenogrammasiga kiritiladi.