Oʻzbekiston Respublikasi “Yoʻl harakati xavfsizligi toʻgʻrisida”gi Qonuni, Vazirlar Maxkamasining 2003-yil 31-yanvardagi 54-sonli qarori tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisida”gi nizomga muvofiq transport vositalarining 2020-yilgi texnik koʻrigini tashkil qilish maqsadida, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-moddasiga asosan, qaror qilaman:

1. Shahar xududidagi barcha yuridik va jismoniy shaxslarga tegishli boʻlgan avtomototransport vositalari va ularning tirkamalari majburiy texnik koʻrikdan oʻtkazilsin.

2. Transport vositalarini majburiy texnik koʻrikdan oʻtkazish boʻyicha shahar komissiyasi tarkibi 1-ilovaga, texnik koʻrikni oʻtkazish jadvali 2-ilovaga muvofiq tasdiqlansin.

3. Shahardagi barcha transport vositalari egalari boʻlgan yuridik va jismoniy shaxslarga transport vositalarining texnik pasporti bilan birgalikda, oʻz vaqtida reja jadval asosida koʻrikdan oʻtkazish majburiyati yuklatilsin.

4. Transport vositalari quyidagi davriylikka muvofiq texnik koʻrikdan oʻtkazilsin:

a) tijorat asosida yoʻlovchilar tashish uchun foydalaniladigan yengil avtomobillar, avtobuslar, trolleybuslar, tramvaylar va oʻtiriladigan joylar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ularga tirkamalar — bir yilda ikki marta;

b) ishlab chiqarilganligiga besh yildan koʻp boʻlmagan (ishlab chiqarilgan yili ham shu jumlaga kiradi) transport vositalari (mazkur bandning “a” kichik bandida koʻrsatilgan transport vositalaridan tashqari) — ikki yilda bir marta;

v) ishlab chiqarilgan yilini hisobga olgan holda ishlab chiqarilganligiga besh yildan ortiq boʻlgan transport vositalari, shuningdek ishlab chiqarilgan vaqti aniqlanmagan transport vositalari (mazkur bandning “b” kichik bandida koʻrsatilgan transport vositalaridan tashqari) — bir yilda bir marta;

g) tirkamalar koʻrikka transport vositasi — shatakchi uchun belgilangan muddatlarda taqdim etiladi.

5. Mazkur qarorning 4-bandi “a” kichik bandida koʻrsatilgan transport vositalarning texnik koʻrigi: birinchi marta — 1-martdan — 30-iyungacha; ikkinchi marta — 1-sentabrdan — 31-oktabrgacha oʻtkaziladi. Yuridik shaxslarga tegishli boʻlgan transport vositalarining texnik koʻrigi 1-martdan — 30-iyungacha; Jismoniy shaxslarga qarashli boʻlgan transport vositalarining texnik koʻrigi 15-fevraldan — 31-avgustga qadar oʻtkazilsin.

6. Transport vositalarinini majburiy texnik koʻrikdan oʻtkazish shahar komissiyasiga:

transport vositalarining texnik holati, ulardan foydalanish normalari va qoidalariga rioya etilishi ustidan samarali nazoratni tashkil etish;

transport vositalarining texnik holati va uskunalari yoʻl harakati xavfsizligi standartlari, qoidalari, normalariga muvofiqligini baholash vazifalari yuklatilsin.

7. Oʻzbekiston Respublikasi Vazirlar Mahkamasining 2003-yil 31-yanvardagi 54-sonli qarori tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisidagi nizomni tasdiqlash toʻgʻrisida”gi qarori 3-bandiga muvofiq, Oʻzbekiston Respublikasi Mudofaa vazirligi, Ichki ishlar vazirligining ichki va soqchilik qoʻshinlari, Milliy xavfsizlik xizmatining harbiy boʻlinmalari transport vositalari koʻrsatib oʻtilgan idoralar tomonidan belgilangan tartibda majburiy texnik koʻrikdan oʻtkazilishi inobatga olinsin.

8. Transport vositalarini texnik koʻrikdan oʻtkazilganligi uchun Oʻzbekiston Respublikasi Vazirlar Maxkamasining 2003-yil 31-yanvardagi 54-sonli qarori tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisida”gi nizomga muvofiq yigʻim undirilsin.

9. Shahar IIOFMB (A. Murodov) majburiy texnik koʻrik yakuni toʻgʻrisida shahar hokimligiga axborot taqdim etsin.

10. Ushbu qaror “Jizzax ovozi” gazetasida eʼlon qilinsin va belgilangan tartibda hokimlikning rasmiy veb-saytiga joylashtirilsin.

11. Shahar hokimining 2019-yil 12-fevraldagi 472-sonli qarori oʻz kuchini yoʻqotgan deb hisoblansin.

12. Ushbu qarorning bajarilishini nazorat qilish shahar hokimining oʻrinbosari R. Sharipov zimmasiga, ijrosini tashkil etish shahar IIO FMB boshligʻi A. Murodov zimmasiga yuklatilsin.

13. Ushbu qaror rasmiy eʼlon qilingan kundan eʼtiboran kuchga kiradi.