Oʻzbekiston Respublikasi Vazirlar Mahkamasining 2003-yil 13-fevraldagi “Oʻzbekiston Respublikasida chakana savdo qoidalarini hamda Oʻzbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarini tasdiqlash toʻgʻrisida”gi 75-sonli qarori ijrosini taʼminlash yuzasidan viloyat hududida umumiy ovqatlanish taomlarining ayrim turlarini maxsus ajratilgan joylarda sotish tartibini belgilash maqsadida Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-moddasiga asosan qaror qilaman:

1. Viloyat hududida umumiy ovqatlanish maxsulotlari (taomlari) ayrim turlarini maxsus ajratilgan joylarda sotish tartibi (keyingi oʻrinlarda Tartib deb ataladi) ilovaga muvofiq tasdiqlansin.

2. Viloyat Favqulodda vaziyatlar boshqarmasi (O. Hazratqulov), Davlat soliq boshqarmasi (A. Bozorov), Davlat sanitariya-epidemiologiya nazorati boshqarmasi (Sh. Sherov), Sanitariya-epidemiologik osoyishtalik markazi (S. Rahimov) Qurilish bosh boshqarmasi (O. Xudoynazarov) va tuman (shahar) hokimliklari ushbu Tartibga rioya etilishini taʼminlasinlar.

3. Mazkur qaror “Qashqadaryo” va “Novosti Kashkadari” gazetalarida eʼlon qilinsin hamda hokimlikning qashqadaryo.uz rasmiy veb-saytiga joylashtirilsin.

4. Mazkur qaror rasmiy eʼlon qilingan kundan boshlab kuchga kiritilsin.

5. Ushbu qarorning bajarilishini nazorat qilish viloyat hokimining birinchi oʻrinbosari U. Butayev zimmasiga yuklansin.

1. Ushbu Tartib Qashqadaryo viloyati hududida majburiy tartibda ustav fondidagi ulushi kamida 51 foiz boʻlgan mahalliy davlat hokimiyati organi muassisligida tashkil etilgan dehqon (oziq-ovqat) bozorlari va savdo komplekslari (keyingi oʻrinlarda tashkilotlar deb yuritiladi) hududidaumumiy ovqatlanish maxsulotlari (taomlari) ayrim turlarini maxsus ajratilgan joylarda sotish tartib-qoidalarini belgilaydi.

2 Umumiy ovqatlanish maxsulotlari (taomlari) ayrim turlarini uy sharoitlarida tayyorlab kelingan yoki joylardagi vakolatli organ qarori bilan maxsus ajratilgan joylarda ovqatlanish oʻrinlari tashkil etmasdan donali tayyorlash va sotish boʻyicha xizmat koʻrsatuvchi — yakka tartibdagi tadbirkor sifatida roʻyxatdan oʻtgan jismoniy shaxslar tomonidan amalga oshiriladi.

3. Umumiy ovqatlanish maxsulotlari (taomlari) ayrim turlarini, donali tayyorlash, pishirish va sotish uchun maxsus ajratilgan joylar yengil konstruktiv qurilgan va shaharsozlik, sanitariya va yongʻin xavfsizligi normalari va talablariga javob beradigan, oziq-ovqat mahsulotlarini vaqtincha saqlash, masallik tayyorlash, pishirish va personal shaxsiy gigiyenasiga rioya etish imkoniyatiga ega boʻlishi kerak.

4. Ushbu Tartibda quyidagi asosiy tushunchalar qoʻllaniladi:

umumiy ovqatlanish maxsulotlari (taomlari) ayrim turlari — masalligʻi uy sharoitida yoki vakolatli organ tomonidan maxsus ajratilgan joylarda tayyorlanib, ovqat pishirish vositalarida pishiriladigan va sotiladigan donali taomlar (somsa, blinchik, cheburek, manti, xonim, sosiskali kulcha, fast-fud va boshqa donali taomlar);

maxsus ajratilgan joy — tuman (shahar) hokimliklari tomonidan belgilangan tartibda ajratilgan, umumiy ovkatlanish maxsulotlari (taomlari) ayrim turlari tayyorlanadigan va sotiladigan joy;

talabgor — uy sharoitida yoki maxsus ajratilgan joylarda ovqatlanish joylarini tashkil etmasdan umumiy ovqatlanish maxsulotlari (taomlari) ayrim turlarini tayyorlash va sotish istagini bildirgan yakka tartibdagi tadbirkor;

vakolatli organ — tuman (shahar) hokimliklari;

vakolatli davlat organlari — viloyat Favqulodda vaziyatlar boshqarmasi, Davlat soliq boshqarmasi, Davlat sanitariya-epidemiologiya nazorati boshqarmasi, Sanitariya-epidemiologik osoyishtalik markazi, Qurilish bosh boshqarmasi;

joylashish sxemasi — vakolatli organ tomonidan maxsus ajratilgan joylarning oldindan tasdiqlangan joylashuvi.

5. Tuman (shahar) hokimliklari tomonidan tashkilotlar maʼmuriyati taklifiga binoan umumiy ovqatlanish maxsulotlari (taomlari) ayrim turlarini tayyorlash va sotish uchun maxsus ajratilgan joy tanlangan kundan keyin 1 ish kuni davomida vakolatli davlat organlari (Davlat sanitariya-epidemiologiya nazorati boshsarmasi va uning tuman (shahar) fshiallari bundan mustasno) bilan kelishish uchun yuboriladi.

Vakolatli davlat organlari mazkur kelishishni 3 ish kunida amalga oshirishi lozim.

Umumiy ovqatlanish maxsulotlari (taomlari) ayrim turlarini tayyorlash va sotish uchun maxsus ajratilayotgan joyni kelishish asoslari koʻrsatilib rad etilgan taqdirda, vakolatli organlar tomonidan 2 ish kuni davomida yangi taklif tayyorlanib, qayta kelishish uchun yuboriladi.

6. Vakolatli davlat organlari bilan kelishish uchun maxsus ajratilayotgan joy alohida koʻrsatilgan holda tashkilot hududining umumiy joylashish sxemasi taqdim etilishi lozim.

7. Tashkilot hududidagi maxsus ajratilayotgan joylar sanitariya qoidalari va gigiyena normalari, yongʻindan saqlanish va shaharsozlik normalariga javob bergan taqdirda kelishiladi.

8. Maxsus ajratilgan joylarning soni hududning ijtimoiy-iqtisodiy rivojlanganlik darajasi, savdo aylanmasining yuqori va pastligi, aholining kunlik isteʼmol talabidan kelib chiqib vakolatli organlar tomonidan belgilanadi.

9. Donabay umumiy ovqatlanish maxsulotlari (taomlari) ayrim turlari masalliqlarini uy sharoitida tayyorlab kelib pishirib sotish yoki maxsus ajratilgan joyda tayyorlab, pishirib sotish joylarining joylashish sxemasi tashkilot maʼmuriyati taklifiga binoan vakolatli organlari tomonidan tuziladi hamda joylashuv sxemasi xaritasi tashkilotga kirish joyi qismida koʻrinarli tarzda joylashtirilishi shart.

Umumiy ovqatlanish maxsulotlari (taomlari) ayrim turlarini sotish uchun maxsus joylarni ajratish har ikki yilda bir marta qayta koʻrib chiqiladi.

10. Talabgor tashkilot maʼmuriyati bilan tuzilgan ijara shartnomasi asosida uy sharoitida yoki vakolatli organ qarori bilan maxsus ajratilgan joylarda umumiy ovqatlanish maxsulotlari (taomlari) ayrim turlarini tayyorlash va sotish boʻyicha xizmat koʻrsatadi.

Ushbu xizmat koʻrsatish faoliyati bilan shugʻullanish uchun ruxsatnoma talab etilmaydi.

Xizmat koʻrsatish faoliyatini amalga oshirish davomida nazorat-kassa texnikasi qoʻllanilmaydi.

Umumiy ovqatlanish maxsulotlari (taomlari) ayrim turlarini tayyorlash va sotishni amalga oshirishning majburiy talablari va shartlari quyidagilardan iborat:

sanitariya qoidalari va gigiyena normalari;

yongʻindan saqlanish normalari;

texnika xavfsizligi qoidalariga rioya qilinishi lozim.

Talabgorlar va ular tomonidan yollangan xodimlar qonun hujjatlarida belgilangan tartibda toʻliq tibbiy koʻrikdan oʻtishlari shart.

Umumiy ovqatlanish mahsulotlari (taomlari) ayrim turlari uy sharoitida tayyorlansa, ovqat masalliqlari vaqtincha saqlanishi, taom tayyorlanishi, pishirilishi jarayoni va foydalaniladigan xonalar hamda jihozlar sanitariya qoidalari va gigiyena normalariga muvofiqligi yakka tartibdagi tadbirkorning zimmasiga yuklanadi.

Maxsus ajratilgan joylarda maishiy chiqindilarni yigʻish uchun qopqoqli chiqindi qutilari boʻlishi lozim.

11. Umumiy ovqatlanish maxsulotlari (taomlari) ayrim turlarini tashkilotlarning kirish yoʻlaklari, avtomobil toʻxtash joylarida, bozor va savdo kompleksi hududida joylashgan savdo magazinlariga kirish yoʻllariga tutash joylar, hojatxona, chiqindixonaga 25 metr va undan kam masofada joylashgan hududlarda tayyorlash va sotishga yoʻl qoʻyilmaydi.

12. Ushbu Tartibga rioya etilishini nazorat qilish qonun hujjatlarida belgilangan tartibda vakolatli davlat organlari tomonidan amalga oshiriladi.

13. Ushbu Tartib asosida faoliyat olib boruvchi talabgorlarning soni cheklanmaydi.

14. Maxsus ajratilgan joylarda umumiy ovqatlanish maxsulotlari (taomlari) ayrim turlarini tayyorlash va sotish davomida muhandislik- kommunikatsiya tarmoqlariga ulanish talabgorlar tomonidan qonun hujjatlarida belgilangan tartibga muvofiq amalga oshiriladi.

15. Ushbu Tartib talablarini buzgan aybdor shaxslar qonun hujjatlarida belgilangan tartibda javobgar boʻladilar.