Oʻzbekiston Respublikasi Prezidentining “Mahalla institutini yanada takomillashtirish chora-tadbirlari toʻgʻrisida” 2017-yil 3-fevraldagi PF-4944-son Farmoni ijrosini taʼminlash, aholining ijtimoiy ehtiyojmand toifalarini aniqlash hamda ularni ijtimoiy qoʻllab-quvvatlash boʻyicha fuqarolarning oʻzini oʻzi boshqarish, sogʻliqni saqlash va moliya organlari hamkorligini yanada mustahkamlash maqsadida Vazirlar Mahkamasi qaror qiladi:

1. Oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarning roʻyxatini shakllantirish tartibi toʻgʻrisida nizom ilovaga muvofiq tasdiqlansin.

2. Qoraqalpogiston Respublikasi Vazirlar Kengashi, viloyatlar va Toshkent shahri hokimliklari Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi, Oʻzbekiston Respublikasi Sogliqni saqlash vazirligi, Moliya vazirligi hamda boshqa manfaatdor vazirliklar va idoralar bilan birgalikda aholining ijtimoiy ehtiyojmand toifalariga qonun hujjatlarida belgilangan tartibda koʻrsatilayotgan ijtimoiy xizmatlar monitoringini olib borsinlar.

Belgilab qoʻyilsinki, hududda istiqomat qiluvchi fuqarolarga qonun hujjatlariga muvofiq ijtimoiy himoya qilish boʻyicha amalga oshirilayotgan chora-tadbirlari doirasida fuqarolarning oʻzini oʻzi boshqarish organlari tomonidan yuborilgan soʻrovlariga belgilangan tartibda tegishli maʼlumotlar taqdim etilishi uchun tuman (shahar) tibbiyot birlashmalari hamda moliya boʻlimlari masʼuldirlar.

3. Fuqarolarning oʻzini oʻzi boshqarish organlari faoliyatini muvofiqlashtirish boʻyicha respublika kengashi, Oʻzbekiston Respublikasi Moliya vazirligi, Sogʻliqni saqlash vazirligi hamda Bandlik va mehnat munosabatlari vazirligi:

aholining ijtimoiy ehtiyojmand toifalarini qoʻllab-quvvatlash, ularga ijtimoiy xizmatlar koʻrsatish yoʻnalishidagi faoliyatlarini muvofiqlashtirish yuzasidan hamkorlikni yanada kuchaytirsinlar;

har yil yakuniga koʻra fuqarolar yigʻinida (fuqarolar vakillarining yigʻilishida) aholini ijtimoiy himoya qilish sohasida amalga oshirilgan ishlar yuzasidan tegishli tarmoqlarning hisobotlarini eshitish, yoʻl qoʻyilgan xato va kamchiliklarni muhokama qilish hamda ularni bartaraf etish toʻgʻrisida hamkorlikda chora-tadbirlar ishlab chiqish amaliyotini joriy etsinlar.

4. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari ― Oʻzbekiston Respublikasi moliya vaziri J.A. Qoʻchqorov, Oʻzbekiston Respublikasi sogʻliqni saqlash vaziri A.K. Shadmanov zimmasiga yuklansin.

1. Ushbu Nizom oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarning roʻyxatini shakllantirish tartibini belgilaydi.

2. Oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarning roʻyxatini shakllantirishda va ularni ijtimoiy qoʻllab-quvvatlashni tashkil etishda quyidagi asosiy tamoyillarga amal qilinadi:

qonuniylik;

insonparvarlik;

profilaktik yoʻnaltirilganlik;

aniq yoʻnaltirilganlik va individual yondashuv;

ijtimoiy adolat.

3. Oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslar quyidagicha aniqlanadi:

uyma-uy yurish chogʻida;

jismoniy va yuridik shaxslar tomonidan berilgan axborot asosida;

ijtimoiy xizmatlarga muhtoj shaxs mustaqil ravishda murojaat etganda.

4. Ijtimoiy qoʻllab-quvvatlashga muhtoj boʻlgan kam taʼminlangan oilalar roʻyxatini shakllantirish va ularni ijtimoiy qoʻllab-quvvatlash Oʻzbekiston Respublikasi Vazirlar Mahkamasining 2013-yil 15-fevraldagi 44-son qarori bilan tasdiqlangan Kam taʼminlangan oilalarga ijtimoiy nafaqalar va moddiy yordam tayinlash va toʻlash tartibi toʻgʻrisidagi Nizom asosida amalga oshiriladi.

5. Oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarning roʻyxatini shakllantirish ushbu Nizomga 1-ilovaga muvofiq sxema boʻyicha amalga oshiriladi.

6. Tuman (shahar) tibbiyot birlashmasi fuqarolarning oʻzini oʻzi boshqarish organlari bilan birgalikda uyma-uy yurish chogʻida toʻplangan axborotga asosan oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslarni aniqlab ularning roʻyxatini tuzadi.

Ushbu roʻyxatga ijtimoiy qoʻllab-quvvatlashga muhtoj shaxs, uning oila aʼzosi yoki vakolatli vakili murojaati yoxud jismoniy va yuridik shaxslar tomonidan berilgan axborot asosida ham qoʻshimcha kiritiladi.

7. Har oy yakuni boʻyicha tuzilgan roʻyxat tuman (shahar) hokimligiga kiritiladi.

8. Tuman (shahar) hokimligi:

taqdim etilgan oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslar toʻgʻrisidagi roʻyxatni besh ish kuni mobaynida tasdiqlaydi;

tasdiqlangan roʻyxat asosida koʻrsatilayotgan xizmatlar turi boʻyicha reyestr tuzadi hamda uch ish kuni mobaynida tuman (shahar) tibbiyot birlashmasiga va moliya boʻlimiga ijro etish uchun yuboradi.

9. Tuman (shahar) tibbiyot birlashmasi tuman (shahar) hokimligi tomonidan tasdiqlangan roʻyxat asosida tegishli shtat birliklari, ijtimoiy xizmat xarajatlarining hisob-kitobini besh ish kuni mobaynida ishlab chiqib, tuman (shahar) moliya boʻlimiga yuboradi.

10. Tuman (shahar) moliya boʻlimi taqdim etilgan roʻyxatlar va hisob-kitoblar asosida tuman (shahar) tibbiyot birlashmasining tegishli shtat birliklarini va xarajatlar smetasini belgilangan tartibda koʻrib chiqadi va har yilning 1-apreliga qadar roʻyxatdan oʻtkazadi.

Yil davomida oʻzgalar parvarishiga muhtoj boʻlgan yolgʻiz keksalar va nogironligi boʻlgan shaxslar roʻyxatiga qoʻshimchalar kiritilganda, xarajatlarning moliyalashtirish manbai aniqlangandan soʻng, uch ish kuni mobaynida xarajatlar smetasiga oʻzgartirish kiritiladi.

11. Tuman (shahar) tibbiyot birlashmasi roʻyxatdan oʻtkazilgan xarajatlar smetasi doirasida belgilangan tartibda tegishli ijtimoiy xizmatlar koʻrsatadi.

12. Nogironligi boʻlgan shaxslarning roʻyxatini shakllantirish ushbu Nizomga 2-ilovaga muvofiq sxema boʻyicha amalga oshiriladi.

13. Tuman (shahar) tibbiyot birlashmasi uchastka vrachi uyma-uy yurish chogʻida aniqlagan, kasallikka chalingan shaxslarga davolash-profilaktika muassasasining tegishli mutaxassislariga bir ish kuni mobaynida yoʻllanma beradi.

Ushbu yoʻllanmani tuman (shahar) tibbiyot birlashmasi uchastka vrachi kasallikka chalingan shaxs, uning oila aʼzosi yoki vakolatli vakili murojaati yoxud jismoniy va yuridik shaxslar tomonidan berilgan axborot asosida ham kasallikka chalingan shaxslarga davolash-profilaktika muassasasining tegishli mutaxassislariga yoʻllanma berishi mumkin.

14. Davolash-profilaktika muassasasidagi tegishli mutaxassis kasallikka chalingan shaxsni kasallik turidan kelib chiqib, bir oy mobaynida belgilangan tartibda Tibbiy-maslahat komissiyasiga kasallikka chalingan shaxsning hujjatlarini tayyorlab yuboradi.

15. Tibbiy-maslahat komissiyasi raisi yoki masʼul shaxsi kasallikka chalingan shaxsning hujjatlarini kasallik turiga koʻra belgilangan muddatlarda rasmiylashtirib, tuman, tumanlararo, shahar va ixtisoslashtirilgan tibbiy-mehnat ekspert komissiyalariga (keyingi oʻrinlarda TMEK deb ataladi) taqdim etadi.

16. TMEKlar hujjatlar qabul qilingan kundan boshlab ikki hafta mobaynida nogironlik guruhi, sababi va muddatini belgilaydi.

TMEK maʼlumotnomaning bir qismini nogironligi boʻlgan shaxsga yoki uning vakiliga, ikkinchi qismini Moliya vazirligi huzuridagi Budjetdan tashqari Pensiya jamgʻarmasiga oʻn kun mobaynida taqdim etadi.

17. Nogironligi boʻlgan shaxslarning koʻrik ishlaridagi maʼlumotlari uch ish kuni mobaynida “TMEK dasturi”ga tegishli TMEK vrach-eksperti va hamshirasi tomonidan kiritiladi.

“TMEK dasturi” boʻyicha nogironligi boʻlgan shaxslar roʻyxati har oyda bir marta shakllantiriladi.

18. Moliya vazirligi huzuridagi Budjetdan tashqari Pensiya jamgʻarmasining tegishli tuman (shahar) boʻlimi tomonidan nogironligi boʻlgan shaxs yoki uning vakolatli vakilining nogironlik pensiyasi (nafaqa) olish uchun arizasi va pensiya tayinlash toʻgʻrisidagi hujjatlari taqdim etilgandan soʻng oʻn kundan kechiktirmasdan pensiya tayinlash masalasi koʻrib chiqiladi.

Pensiya tayinlash rad etilgan taqdirda, tegishli qaror chiqarilgandan keyin besh kun mobaynida arizachiga yoki uning vakolatli vakiliga pensiya tayinlash rad etilgani haqida rad etish sabablari va shikoyat berish tartibi koʻrsatilgan xabarnomani beradi yoki joʻnatadi hamda ayni chogʻda barcha hujjatlarni qaytaradi.

19. Mazkur Nizom talablari buzilishida aybdor boʻlgan shaxslar qonun hujjatlariga muvofiq javob beradilar.