O‘zbekiston Respublikasi Prezidentining “Jamiyatda ijtimoiy-ma’naviy muhitni sog‘lomlashtirish, mahalla institutini yanada qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida” 2020-yil 18-fevraldagi PF-5938-son Farmoni va “O‘zbekiston Respublikasi Mahalla va oilani qo‘llab-quvvatlash vazirligi faoliyatini tashkil etish to‘g‘risida” 2020-yil 18-fevraldagi PQ-4602-son qarori ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Jamiyatda ijtimoiy-ma’naviy muhitni sog‘lomlashtirish, mahalla institutini yanada qo‘llab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari to‘g‘risida” 2020-yil 18-fevraldagi PF-5938-son Farmoni bilan O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi hamda “Mahalla ziyosi” respublika o‘quv-uslubiy markazi negizida O‘zbekiston Respublikasi Mahalla va oilani qo‘llab-quvvatlash vazirligi huzuridagi “Mahalla va oila” ilmiy-tadqiqot instituti (keyingi o‘rinlarda — Institut) tashkil etilganligi ma’lumot uchun qabul qilinsin.

Belgilansinki, Institut mahalla va oila institutlarini mustahkamlashga ko‘maklashuvchi, fuqarolar yig‘inlarini aholining chinakam maslakdoshiga aylantirish va “Sog‘lom oila — sog‘lom jamiyat” g‘oyasini hayotga tatbiq etish ishlarini ilmiy-uslubiy va axborot-tahliliy jihatdan ta’minlash faoliyatini amalga oshiruvchi ixtisoslashtirilgan davlat ilmiy-tadqiqot muassasasi hisoblanadi.

2. Quyidagilar Institutning asosiy vazifalari etib belgilansin:

jamiyatda “Obod va xavfsiz mahalla” tamoyiliga asoslangan tizimni to‘laqonli va samarali joriy etish, mahalla va oila institutlarini mustahkamlash sohasidagi ustuvor yo‘nalishlarni shakllantirishda ishtirok etish, fanlararo fundamental, ilmiy-amaliy tadqiqotlar va innovatsion loyihalarni amalga oshirish;

mahalla va oila institutlarini mustahkamlash, xotin-qizlar va keksalarni qo‘llab-quvvatlash hamda ijtimoiy faollikni oshirishga qaratilgan konsepsiyalarni, kompleks, maqsadli, sohaviy va hududiy dasturlarni ishlab chiqishning ilmiy-metodologik asoslarini shakllantirish;

mahallalar va oilalarda sog‘lom va barqaror ijtimoiy-ma’naviy muhit hamda tinchlik, totuvlik va osoyishtalikni ta’minlash, umuminsoniy va milliy qadriyatlarni, shu jumladan oilaviy qadriyatlarni mustahkamlashning ilmiy asoslarini ishlab chiqish;

oilaviy zo‘ravonlikning kelib chiqish omillari va sabablarini chuqur o‘rganish, oilalarda sog‘lom muhitni shakllantirish, xotin-qizlarning muammolarini o‘z vaqgida aniqlash, zo‘ravonlikka uchragan yoki o‘z joniga suiqasd qilgan yoxud o‘z joniga qasd qilishga moyil bo‘lgan xotin-qizlarga ijtimoiy-huquqiy, psixologik va moddiy yordam ko‘rsatish tizimini takomillashtirish bo‘yicha tahliliy materiallar va ilmiy asoslangan tavsiyalar ishlab chiqish;

mahalla va oila institutlarini mustahkamlash, xotin-qizlar va keksalarni qo‘llab-quvvatlash hamda ijtimoiy faollikni oshirish sohasidagi normativ-huquqiy hujjatlarni ishlab chiqish;

mahalla va oilani qo‘llab-quvvatlash sohasidagi dolzarb ilmiy muammolarga bag‘ishlangan ilmiy, ilmiy-amaliy konferensiyalar, seminarlar, yig‘ilishlar tashkil etish, shuningdek, ushbu sohada yuqori malakali ilmiy kadrlarni tayyorlash, ilmiy xodimlarning kasbiy darajasini doimiy oshirib borish;

o‘z faoliyati yo‘nalishlari bo‘yicha respublikadagi ta’lim va ilmiy-tadqiqot muassasalari bilan hamkorlikni amalga oshirish, xorijiy mamlakatlarning ilg‘or ilmiy-tadqiqot muassasalari bilan xalqaro aloqalarni rivojlantirish;

ommaviy axborot vositalarida, jumladan, televideniye va Internet jahon axborot tarmog‘ida ilmiy tadqiqotlar natijalarini keng yoritish, shuningdek, aholining mahalla va oila institutlarini mustahkamlashdagi ijtimoiy faolligini oshirishda ishtirok etish.

3. Quyidagilar:

O‘zbekiston Respublikasi Mahalla va oilani qo‘llab-quvvatlash vazirligi huzuridagi “Mahalla va oila” ilmiy-tadqiqot institutining tuzilmasi 1-ilovaga;

O‘zbekiston Respublikasi Mahalla va oilani qo‘llab-quvvatlash vazirligi huzuridagi “Mahalla va oila” ilmiy-tadqiqot institutining ustavi 2-ilovaga muvofiq tasdiqlansin.

O‘zbekiston Respublikasi mahalla va oilani qo‘llab-quvvatlash vaziriga, zarur hollarda, Institut tuzilmasiga boshqaruv xodimlarining umumiy cheklangan soni doirasida o‘zgartirishlar kiritish huquqi berilsin.

4. Quyidagilar Institut faoliyatini moliyalashtirish manbalari etib belgilansin:

O‘zbekiston Respublikasi Davlat budjeti mablag‘lari (xodimlar mehnatiga haq to‘lash, binolar va inshootlarni saqlash xarajatlarini moliyalashtirish hamda ilmiy faoliyatga oid davlat dasturlarini amalga oshirish uchun);

ilmiy faoliyatga oid dasturlarni amalga oshirish uchun O‘zbekiston Respublikasi Innovatsion rivojlanish vazirligi tomonidan o‘tkaziladigan tanlovlar natijalari bo‘yicha ajratiladigan O‘zbekiston Respublikasi Davlat budjeti mablag‘lari;

O‘zbekiston Respublikasi Mahalla va oilani qo‘llab-quvvatlash vazirligining budjetdan tashqari mablag‘lari;

xalqaro moliya institutlari va boshqa xorijiy tashkilotlarning grantlari;

respublika ilmiy-tadqiqot loyihalari grantlari;

xo‘jalik faoliyatidan hamda shartnoma asosida tadqiqotlar o‘tkazishdan tushadigan tushumlar;

qonun hujjatlarida taqiqlanmagan boshqa manbalar.

5. Belgilansinki:

Institut direktori O‘zbekiston Respublikasi mahalla va oilani qo‘llab-quvvatlash vazirining tavsiyasiga asosan Vazirlar Mahkamasi tomonidan lavozimga tayinlanadi va lavozimidan ozod qilinadi;

direktor o‘rinbosarlari Institut direktorining tavsiyasiga asosan O‘zbekiston Respublikasi mahalla va oilani qo‘llab-quvvatlash vaziri tomonidan lavozimga tayinlanadi va lavozimidan ozod qilinadi;

Institut xodimlariga O‘zbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq to‘lash va moddiy rag‘batlantirish shartlari tatbiq etiladi;

Institut O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi hamda “Mahalla” o‘quv-uslubiy va ilmiy-tadqiqot markazining huquq va majburiyatlari, shuningdek, tuzilgan shartnomalar bo‘yicha huquqiy vorisi hisoblanadi.

6. O‘zbekiston Respublikasi Mahalla va oilani qo‘llab-quvvatlash vazirligining Toshkent shahar, Mirzo Ulug‘bek tumani, Ismoiliy ko‘chasi, 1G-uy manzilidagi binoni tegishli hududi bilan birgalikda Institutga operativ boshqaruv huquqi asosida tekin berish to‘g‘risidagi taklifiga rozilik berilsin.

7. O‘zbekiston Respublikasi Mahalla va oilani qo‘llab-quvvatlash vazirligi bir oy muddatda:

belgilangan tartibda Institutni xalqaro talablarga javob beradigan zamonaviy axborot-kommunikatsiya texnologiyalari, shuningdek, mebel va boshqa texnik vositalar bilan jihozlash choralarini ko‘rsin;

O‘zbekiston Respublikasi Mahalla va oilani qo‘llab-quvvatlash vazirligi Institut apparatini yuqori malakali va tashabbuskor kadrlar bilan to‘ldirish choralarini ko‘rsin.

8. Belgilab qo‘yilsinki, O‘zbekiston Respublikasi Mahalla va oilani qo‘llab-quvvatlash vazirligining asoslangan hisob-kitoblariga muvofiq 2020-yilda Institutni saqlash uchun mablag‘lar O‘zbekiston Respublikasi Davlat budjetidan 2020-yil ijtimoiy soha uchun tasdiqlangan parametrlar doirasida, 2021-yildan boshlab esa O‘zbekiston Respublikasi Davlat budjeti parametrlarida nazarda tutiladi.

Institutga 3 ta, jumladan, 2 ta yengil va 1 ta navbatchi avtotransport vositasini saqlash uchun limit ajratilsin.

8¹. Institutga yuklatilgan asosiy vazifalarni amalga oshirish bilan bog‘liq boshqa xarajatlar, shuningdek, “Mahalla va oila” institutining moddiy-texnika bazasini mustahkamlash, tizimda faoliyat yuritayotgan xodimlarni moddiy qo‘llab-quvvatlash hamda institutda bajariladigan ilmiy-amaliy loyihalar uchun mablag‘lar Mahalla va oilani qo‘llab-quvvatlash vazirligi tomonidan institutning budjetdan tashqari shaxsiy g‘azna hisobvaraqlariga ajratilgan mablag‘lar hisobidan amalga oshiriladi.

9. O‘zbekiston Respublikasi Mahalla va oilani qo‘llab-quvvatlash vazirligi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

10. O‘zbekiston Respublikasi Hukumatining 3-ilovaga muvofiq ayrim qarorlari o‘z kuchini yo‘qotgan deb hisoblansin.

11. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy masalalar bo‘yicha o‘rinbosari B.A. Musayev hamda O‘zbekiston Respublikasi mahalla va oilani qo‘llab-quvvatlash vaziri R.M. Mamatov zimmasiga yuklansin.

1. Ushbu Ustav O‘zbekiston Respublikasi Mahalla va oilani qo‘llab-quvvatlash vazirligi huzuridagi “Mahalla va oila” ilmiy-tadqiqot institutining (keyingi o‘rinlarda — Institut) maqomi, asosiy vazifalari va faoliyat yo‘nalishlari, funksiyalari, huquqlari, javobgarligini, faoliyatini tashkil etish va hisobot berish tartibini, shuningdek, uning rahbarlarining funksional vazifalari va javobgarligini belgilaydi.

2. Institut mahalla va oila institutlarini mustahkamlashga ko‘maklashuvchi, fuqarolar yig‘inlarini aholining chinakam maslakdoshiga aylantirish va “Sog‘lom oila — sog‘lom jamiyat” g‘oyasini hayotga tatbiq etish ishlarini ilmiy-uslubiy va axborot-tahliliy jihatdan ta’minlash faoliyatini amalga oshiruvchi ixtisoslashtirilgan davlat ilmiy-tadqiqot muassasasi hisoblanadi.

3. Institut o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, ushbu Ustavga va boshqa qonun hujjatlariga amal qiladi.

4. Institut o‘z faoliyatini davlat boshqaruvi organlari, mahalliy ijro etuvchi hokimiyat organlari, xo‘jalik birlashmalari va boshqa tashkilotlar bilan o‘zaro hamkorlikda amalga oshiradi.

5. Institutning rasmiy nomi:

a) davlat tilida:

to‘liq nomi — O‘zbekiston Respublikasi Mahalla va oilani qo‘llab-quvvatlash vazirligi huzuridagi “Mahalla va oila” ilmiy-tadqiqot instituti, qisqartirilgan nomi — “Mahalla va oila” instituti;

b) rus tilida:

to‘liq nomi — Nauchno-issledovatelskiy institut “Maxalli i semi” pri Ministerstve po podderjke maxalli i semi Respubliki Uzbekistan, qisqartirilgan nomi — Institut “Maxalli i semi”;

v) ingliz tilida:

to‘liq nomi — Scientific Research Institute “Makhalla and family” under the Ministry of Support of Makhalla and Family of the Republic of Uzbekistan, qisqartirilgan nomi — Institute “Makhalla and family”;

6. Institut joylashgan joy (pochta manzili): 100000, Toshkent shahri, Mirzo Ulug‘bek tumani, Ismoiliy ko‘chasi, 1 G-uy.

7. Institut tizimiga quyidagilar kiradi:

Institut apparati;

“Markaziy Osiyoda jamiyat, gender va oila” xalqaro ilmiy jurnali tahririyati.

8. Quyidagilar Institutning asosiy vazifalari hisoblanadi:

jamiyatda “Obod va xavfsiz mahalla” tamoyiliga asoslangan tizimni to‘laqonli va samarali joriy etish, mahalla va oila institutlarini mustahkamlash sohasidagi ustuvor yo‘nalishlarni shakllantirishda ishtirok etish, fanlararo fundamental, ilmiy-amaliy tadqiqotlar va innovatsion loyihalarni amalga oshirish;

mahalla va oila institutlarini mustahkamlash, xotin-qizlar va keksalarni qo‘llab-quvvatlash hamda ijtimoiy faollikni oshirishga qaratilgan konsepsiyalarni, kompleks, maqsadli, sohaviy va hududiy dasturlarni ishlab chiqishning ilmiy-metodologik asoslarini shakllantirish;

mahallalar va oilalarda sog‘lom va barqaror ijtimoiy-ma’naviy muhit hamda tinchlik, totuvlik va osoyishtalikni ta’minlash, umuminsoniy va milliy qadriyatlarni, shu jumladan oilaviy qadriyatlarni mustahkamlashning ilmiy asoslarini ishlab chiqish;

mahalla va oila institutlarini mustahkamlash, xotin-qizlar va keksalarni qo‘llab-quvvatlash hamda ijtimoiy faollikni oshirish sohasidagi normativ-huquqiy hujjatlarni ishlab chiqish;

mahalla va oilani qo‘llab-quvvatlash sohasidagi dolzarb ilmiy muammolarga bag‘ishlangan ilmiy, ilmiy-amaliy konferensiyalar, seminarlar, yig‘ilishlar tashkil etish, shuningdek, ushbu sohada yuqori malakali ilmiy kadrlarni tayyorlash, ilmiy xodimlarning kasbiy darajasini doimiy oshirib borish;

o‘z faoliyati yo‘nalishlari bo‘yicha respublikadagi ta’lim va ilmiy-tadqiqot muassasalari bilan hamkorlikni amalga oshirish, xorijiy mamlakatlarning ilg‘or ilmiy-tadqiqot muassasalari bilan xalqaro aloqalarni rivojlantirish;

ommaviy axborot vositalarida, jumladan, televideniye va Internet jahon axborot tarmog‘ida ilmiy tadqiqotlar natijalarini keng yoritish, shuningdek, aholining mahalla va oila institutlarini mustahkamlashdagi ijtimoiy faolligini oshirishda ishtirok etish.

9. Institut o‘ziga yuklangan vazifalarga muvofiq quyidagi funksiyalarni amalga oshiradi:

a) jamiyatda “Obod va xavfsiz mahalla” tamoyiliga asoslangan tizimni to‘laqonli va samarali joriy etish, mahalla va oila institutlarini mustahkamlash sohasidagi ustuvor yo‘nalishlarni shakllantirishda ishtirok etish, fanlararo fundamental, ilmiy-amaliy tadqiqotlar va innovatsion loyihalarni amalga oshirish sohasida:

“Obod va xavfsiz mahalla” tamoyilining asosiy mezonlari hamda ularga asoslangan tizimni fuqarolarning o‘zini o‘zi boshqarish organlari faoliyatiga to‘laqonli va samarali joriy etish mexanizmlari bo‘yicha ilmiy asoslangan takliflarni ishlab chiqadi, bu borada huquqni qo‘llash amaliyotini takomillashtirishga doir tahliliy materiallar tayyorlaydi;

aholi muammolarini aniqlash va hal etish bo‘yicha “mahalla — sektor — Xalq qabulxonasi — mahalla” tamoyili asosida hamkorlik tizimini takomillashtirish bo‘yicha tahliliy materiallar va ilmiy asoslangan tavsiyalar ishlab chiqadi;

fuqarolarning o‘zini o‘zi boshqarish organlarining ta’sirchan jamoatchilik nazoratini amalga oshirishdagi mavqeyini yuksaltirishga qaratilgan takliflar va metodik tavsiyalar ishlab chiqadi;

“Obod va xavfsiz mahalla” tamoyiliga asoslangan tizimni to‘laqonli va samarali joriy etish, mahalla va oila institutlarini mustahkamlash va rivojlantirishga qaratilgan fanlararo fundamental, amaliy ilmiy tadqiqotlar hamda innovatsion loyihalarni amalga oshiradi;

b) mahalla va oila institutlarini mustahkamlash, xotin-qizlar va keksalarni qo‘llab-quvvatlash hamda ijtimoiy faollikni oshirishga qaratilgan konsepsiyalarni, kompleks, maqsadli, sohaviy va hududiy dasturlarni ishlab chiqishning ilmiy-metodologik asoslarini shakllantirish sohasida:

mahalla va oila institutlarini mustahkamlash va rivojlantirishga qaratilgan konsepsiyalar loyihalarini ishlab chiqadi, shuningdek, kompleks, maqsadli, sohaviy va hududiy dasturlar loyihalariga ilmiy asoslangan takliflar tayyorlaydi;

oila va nikoh, reproduktiv salomatlik, shuningdek, oilalarda sog‘lom turmush tarzi, ma’naviy-axloqiy tarbiya, iqtisodiy, huquqiy bilimlar, tibbiy madaniyatni oshirish, oilaviy munosabatlar psixologiyasi bo‘yicha fuqarolarning o‘zini o‘zi boshqarish organlariga hamda keng jamoatchilikka metodik tavsiyalar tayyorlaydi;

oila institutida kutilayotgan o‘zgarishlar tahlili va prognozlarini ishlab chiqadi, demografik rivojlanish va oila farovonligining o‘sish darajasini o‘rganadi, tahlil qiladi hamda konseptual yo‘nalishlar bo‘yicha ilmiy asoslangan takliflar va tahliliy materiallar tayyorlaydi;

xotin-qizlarni qo‘llab-quvvatlashga doir davlat siyosatining samarali amalga oshirilishini ta’minlash, ularning huquq va qonuniy manfaatlarini himoya qilish, ijtimoiy faolligini oshirish bo‘yicha tahliliy materiallar va ilmiy asoslangan tavsiyalar tayyorlaydi;

xotin-qizlarning muammolarini o‘z vaqtida aniqlash, yordamga muhtoj bo‘lgan va og‘ir ijtimoiy ahvolga tushib qolgan xotin-qizlarga, shu jumladan nogironligi bo‘lgan ayollarga ijtimoiy-huquqiy, psixologik va moddiy yordam ko‘rsatish tizimini takomillashtirish bo‘yicha tahliliy materiallar va ilmiy asoslangan tavsiyalar ishlab chiqadi;

yolg‘iz keksalar, ijtimoiy himoyaga muhtoj va kam ta’minlangan oilalarga moddiy ko‘maklashish, ularni ijtimoiy qo‘llab-quvvatlashni ta’minlashda huquqiy, uslubiy va amaliy yordam ko‘rsatish amaliyotini tahlil qiladi;

mahallalarda nuroniylarning bilim va boy hayotiy tajribasidan yoshlar ma’naviyatini yuksaltirish, ularda vatanparvarlik ruhini mustahkamlash masalalarida samarali foydalanish tizimini rivojlantirish bo‘yicha takliflar va metodik tavsiyalar ishlab chiqadi;

v) mahallalar va oilalarda sog‘lom va barqaror ijtimoiy-ma’naviy muhit hamda tinchlik, totuvlik va osoyishtalikni ta’minlash, umuminsoniy va milliy qadriyatlarni, shu jumladan oilaviy qadriyatlarni mustahkamlashning ilmiy asoslarini ishlab chiqish sohasida:

mahallalarda va oilalarda ijtimoiy-ma’naviy muhitga salbiy ta’sir ko‘rsatuvchi holatlarni o‘rganadi, tahlil qiladi hamda ularning oldini olish bo‘yicha takliflar ishlab chiqadi;

oilalar mustahkamligini ta’minlash, oilaviy ajrashishlarning oldini olish, oilaning farzand tarbiyasi borasidagi mas’uliyatini oshirish, oilaviy qadriyatlarni mustahkamlash, jamiyatda tinchlik va barqarorlikni saqlashda oilaning o‘rnini targ‘ib qilish, shuningdek, namunali oilalarning hayotiy tajribasini ommalashtirish bo‘yicha takliflar tayyorlaydi;

er-xotin, ota-ona va farzandlar, er-xotin va ularning ota-onalari o‘rtasidagi sog‘lom munosabatlarni yo‘lga qo‘yish, oila va nikohni saqlab qolishdagi o‘zaro mas’uliyatni ta’minlash masalalarini o‘rganadi;

notinch va muammoli oilalardagi ma’naviy-axloqiy muhitni sog‘lomlashtirish, nizoli holatlarning oldini olish, oilaviy munosabatlarni mustahkamlash masalalari bo‘yicha takliflar va metodik tavsiyalar ishlab chiqadi;

umuminsoniy va milliy oilaviy qadriyatlarni, ilg‘or xorijiy tajribani tahlil qilish asosida mahallalarda va oilalarda ma’naviy-axloqiy qadriyatlarni mustahkamlash bilan bog‘liq metodik tavsiyalar ishlab chiqadi;

yoshlarni oilaviy hayotga tayyorlash, oiladagi nizoli holatlarni hal qilishning huquqiy va psixologik asoslarini o‘rgatish, ajrashishlarning oldini olish bo‘yicha ilmiy asoslangan takliflar tayyorlaydi;

g) mahalla va oila institutlarini mustahkamlash, xotin-qizlar va keksalarni qo‘llab-quvvatlash hamda ijtimoiy faolligini oshirish sohasidagi normativ-huquqiy hujjatlarni ishlab chiqish sohasida:

mahalla va oilani qo‘llab-quvvatlash, shuningdek, ushbu sohadagi normativ-huquqiy bazani takomillashtirish yuzasidan O‘zbekiston Respublikasi Mahalla va oilani qo‘llab-quvvatlash vazirligi faoliyatining ustuvor yo‘nalishlari bo‘yicha tahliliy materiallar va ilmiy asoslangan takliflar ishlab chiqadi;

fuqarolarning o‘zini o‘zi boshqarish organlari, ulardagi jamoatchilik tuzilmalari faoliyatiga oid qonun hujjatlarini ishlab chiqishda bevosita ishtirok etadi;

umuminsoniy va milliy oilaviy qadriyatlarni, ilg‘or xorijiy tajribani tahlil qilish asosida oila institutini mustahkamlash bo‘yicha, eng avvalo, “Sog‘lom oila — sog‘lom jamiyat” g‘oyasini hayotga tatbiq etishga qaratilgan normativ-huquqiy hujjatlarni takomillashtirish bo‘yicha tahliliy materiallar va ilmiy asoslangan takliflar ishlab chiqadi;

xotin-qizlar va erkaklar uchun teng huquq hamda imkoniyatlar kafolatlarini ta’minlash tizimini o‘rganadi, tahlil qiladi hamda sohaga oid normativ-huquqiy bazani takomillashtirish bo‘yicha takliflar tayyorlaydi;

d) mahalla va oilani qo‘llab-quvvatlash sohasidagi dolzarb ilmiy muammolarga bag‘ishlangan ilmiy, ilmiy-amaliy konferensiyalar, seminarlar, yig‘ilishlar tashkil etish, shuningdek, ushbu sohada yuqori malakali ilmiy kadrlarni tayyorlash, ilmiy xodimlarning kasbiy darajasini doimiy oshirib borish sohasida:

mahallalarda oila va xotin-qizlar bilan ishlash tizimini yangi bosqichga olib chiqish, nuroniylar ijtimoiy faolligini oshirish, hududlarni jinoyatchilikdan xoli hududga aylantirishda fuqarolar yig‘inlarining roli va mavqeyini yanada mustahkamlashning dolzarb masalalari bo‘yicha ilmiy seminarlar, davra suhbatlarini muntazam tashkil etib boradi;

“Obod va xavfsiz mahalla” tamoyiliga asoslangan tizimni joriy etish, mahallalarda aholining kundalik muammolari bilan ishlash tizimini kuchaytirish borasidagi ustuvor vazifalar kabi mavzular bo‘yicha ilmiy, ilmiy-amaliy konferensiyalar o‘tkazadi;

mahallalarda oilalarni mustahkamlash, xotin-qizlarni qo‘llab-quvvatlash, bandlikni ta’minlash, tadbirkorlikni rivojlantirish, aholi salomatligini saqlash, xonadon va ko‘chalarning obodligini tashkil etish, ma’naviyat va ma’rifat ishlarining ta’sirchanligini oshirish kabi yo‘nalishlarga bag‘ishlangan ilmiy, ilmiy-amaliy konferensiyalar, seminarlar, yig‘ilishlar tashkil etadi;

o‘tkazilgan tadbir natijalari bo‘yicha tahliliy materiallar va ilmiy asoslangan takliflar ishlab chiqadi;

Institutda mahalla va oilani qo‘llab-quvvatlash sohasida yuqori malakali ilmiy kadrlarni tayyorlash, ilmiy xodimlarning kasbiy darajasini doimiy oshirib borish tizimini joriy etadi;

e) o‘z faoliyati yo‘nalishlari bo‘yicha respublikadagi ta’lim va ilmiy-tadqiqot muassasalari bilan hamkorlikni amalga oshirish, xorijiy mamlakatlarning ilg‘or ilmiy-tadqiqot muassasalari bilan xalqaro aloqalarni rivojlantirish sohasida:

oliy ta’lim muassasalari, ilmiy-tadqiqot muassasalari, xo‘jalik birlashmalari va boshqa manfaatdor tashkilotlar, shuningdek, nodavlat notijorat tashkilotlari bilan mahalla va oilani qo‘llab-quvvatlash sohasida innovatsiyalarni joriy etishga yo‘naltirilgan chora-tadbirlarni hamkorlikda amalga oshiradi;

mahalla va oilani qo‘llab-quvvatlash sohasida, shu jumladan manfaatdor vazirliklar, idoralar, xo‘jalik birlashmalari, oliy ta’lim muassasalari hamda vazirliklar va idoralar tizimidagi boshqa ilmiy muassasalar bilan birgalikda fundamental, amaliy va innovatsion tadqiqot ishlarini amalga oshiradi;

Institutning asosiy vazifa va funksiyalari bilan bog‘liq yo‘nalishlarda ilmiy konferensiyalar, seminarlar, hamkorlikdagi tadqiqotlar, loyihalar, xodimlarning tajriba almashishi va ularni o‘qitish bo‘yicha xalqaro, xorijiy ilmiy-tadqiqot muassasalari, institutlar va markazlar bilan hamkorlikni rivojlantiradi;

mahalla va oilani qo‘llab-quvvatlash bilan bog‘liq yo‘nalishlarda bakalavr va magistrlarni tayyorlashda ilmiy-metodik jihatdan ko‘maklashadi, shuningdek, Institut bazasida bu sohada ilmiy kadrlar tayyorlaydi;

mahalla va oilani qo‘llab-quvvatlash bilan bog‘liq yo‘nalishlarda mutaxassislar tayyorlovchi ta’lim muassasalari uchun ilmiy, o‘quv, o‘quv-metodik adabiyotlarning yangi avlodini nashr etishga tayyorlash ishlarida ishtirok etadi;

xorijiy mamlakatlarning o‘zini o‘zi boshqarish tizimi hamda oilalarni mustahkamlash sohalarida faoliyat yuritayotgan milliy institutlari bilan yaqin va faol hamkorlikni amalga oshiradi;

ilmiy-tadqiqot va ta’lim muassasalari bilan birgalikda fundamental, amaliy va innovatsion tadqiqotlarni tashkil etish va o‘tkazishda ishtirok etadi;

Institut negizida, shu jumladan xorijiy mutaxassislarni jalb etgan holda stajirovka o‘tashni, mahorat darslarini tashkil etadi va o‘tkazadi;

mahalla va oila institutining dolzarb masalalari bo‘yicha yozgi va qishki maktablar, ilmiy ma’ruzalar va munozaralar maydonchalarini tashkil etadi;

j) ommaviy axborot vositalarida, jumladan, televideniye va Internet jahon axborot tarmog‘ida ilmiy tadqiqotlar natijalarini keng yoritish, shuningdek, aholining mahalla va oila institutlarini mustahkamlashdagi ijtimoiy faolligini oshirishda ishtirok etish sohasida:

o‘z faoliyati, shu jumladan amalga oshirilgan ilmiy-tadqiqot ishlari natijalari to‘g‘risidagi materiallarni ommaviy axborot vositalarida keng yoritib boradi;

Institut faoliyatini keng yoritish maqsadida rasmiy veb-saytlarni, shuningdek, ijtimoiy tarmoqlardagi sahifalarni yaratadi, turli shakllardagi targ‘ibot materiallarini chop etadi;

aholining “Obod va xavfsiz mahalla” tamoyiliga asoslangan tizimni joriy etishdagi daxldorlik hissini hamda fuqarolik mas’uliyatini oshirish bo‘yicha ommaviy axborot vositalarida, shu jumladan Internet jahon axborot tarmog‘idagi rasmiy veb-saytlarda, ijtimoiy tarmoqlarda tashviqot ishlarini tashkil etadi;

keng jamoatchilikning oilalar mustahkamligi, aholi salomatligi, xonadon va ko‘chalarning obodligi, yoshlar tarbiyasi, bandlik, ma’naviyat va ma’rifat ishlaridagi ijtimoiy faolligini oshirishga qaratilgan turli targ‘ibot loyihalarini ishlab chiqadi va amalga oshiradi.

10. Institut o‘ziga yuklangan asosiy vazifalar va funksiyalarni bajarishda quyidagi huquqlarga ega:

O‘zbekiston Respublikasi Vazirlar Mahkamasiga yoki O‘zbekiston Respublikasi Prezidenti Administratsiyasiga normativ-huquqiy hujjatlar loyihalarini, shuningdek, Institutga yuklangan vazifalar va funksiyalarni bajarish bilan bog‘liq bo‘lgan boshqa hujjatlarni O‘zbekiston Respublikasi Mahalla va oilani qo‘llab-quvvatlash vazirligi orqali belgilangan tartibda kiritish;

davlat boshqaruvi organlari, mahalliy ijro etuvchi hokimiyat organlari va xo‘jalik birlashmalaridan Institut vakolatiga tegishli masalalarni hal qilish uchun zarur bo‘lgan axborotni so‘rash va olish;

Institutning vakolatiga tegishli masalalar bo‘yicha zarur ma’lumotlarni davlat statistika organlari, davlat soliq xizmati organlari, davlat xizmatlari markazlari hamda boshqa vazirliklar va idoralardan bepul olish;

Institutga yuklangan vazifalarni bajarish uchun davlat boshqaruvi organlari, xo‘jalik birlashmalari va boshqa tashkilotlarning mutaxassislarini, shu jumladan xorijiy mutaxassislarni shartnoma asosida jalb etish;

mahalla va oilani qo‘llab-quvvatlash tizimini takomillashtirish, amalga oshirilayotgan chora-tadbirlarning samaradorligini oshirish masalalari bo‘yicha O‘zbekiston Respublikasi Mahalla va oilani qo‘llab-quvvatlash vazirligiga takliflar kiritish;

mahalla va oilani qo‘llab-quvvatlashning dolzarb va istiqbolli vazifalarini hal qilish uchun tashkil etilgan ishchi guruhlar yig‘ilishlarida, ekspert kengashlari va komissiyalar ishida ishtirok etish;

mahalla va oilani qo‘llab-quvvatlash bilan bog‘liq sohalarda dasturlar, o‘quv qo‘llanmalari, ilmiy asarlar to‘plamlari, ilmiy-amaliy konferensiyalar materiallari, metodik tavsiyalar, shuningdek, kadrlarni qayta tayyorlash va ularning malakasini oshirish bo‘yicha qo‘llanmalar tayyorlash va nashr qilish;

mahalla va oilani qo‘llab-quvvatlash bilan bog‘liq masalalar bo‘yicha ilmiy-amaliy konferensiyalar, seminarlar, simpoziumlar, ko‘rgazmalar, yarmarkalar o‘tkazish, shuningdek, metodik materiallar va tavsiyalar, xalqaro loyihalar va dasturlarni ishlab chiqish va amalga oshirishda ishtirok etish;

mahalla va oilani qo‘llab-quvvatlash bilan bog‘liq yo‘nalishlar bo‘yicha ilmiy-pedagogik kadrlar tayyorlash, ilmiy darajalar berish uchun doktorantura va ilmiy kengash tuzish;

Institut vakolatiga kiradigan masalalarni hal etish uchun shartnoma asosida mahalliy va xorijiy ilmiy muassasalar, olim va mutaxassislarni jalb qilish va xodimlar ishtirokida vaqtincha ijodiy guruhlarni tuzish;

Institut xodimlarini qonunchilikda belgilangan tartibda moddiy rag‘batlantirish, muassasaning moddiy-texnik bazasini mustahkamlash va ijtimoiy masalalarni hal qilish uchun daromad shaklida olingan mablag‘larni jalb etish;

o‘z vakolati doirasida xalqaro va xorijiy tashkilotlar, ilmiy-tadqiqot institutlari bilan hamkorlikni amalga oshirish;

belgilangan tartibda noshirlik faoliyatini amalga oshirish, mahalla va oilani qo‘llab-quvvatlash bilan bog‘liq davriy ilmiy, uslubiy va amaliy nashrlar chiqarish hamda tarqatish.

Institut qonun hujjatlariga muvofiq boshqa huquqlarga ham ega bo‘lishi mumkin.

11. Institut:

o‘ziga yuklangan vazifalar va funksiyalarni samarali bajarish, shuningdek, ushbu Ustavda belgilangan asosiy vazifalar va funksiyalarning sifatli va o‘z vaqtida bajarilishini ta’minlash;

mahalla va oila institutlarini mustahkamlash, fuqarolar yig‘inlarini aholining chinakam maslakdoshiga aylantirish, “Sog‘lom oila — sog‘lom jamiyat” g‘oyasini hayotga tatbiq etish, xotin-qizlar va keksa avlod vakillarini qo‘llab-quvvatlash hamda ularning ijtimoiy faolligini oshirish bo‘yicha ilmiy asoslangan tavsiyalarni muntazam ravishda ishlab chiqish;

O‘zbekiston Respublikasi Mahalla va oilani qo‘llab-quvvatlash vazirligiga har oyda kamida bir marta tahliliy materiallar va ilmiy asoslangan takliflarni taqdim etib borish;

o‘z faoliyati to‘g‘risidagi axborot bilan tanishish erkinligini ta’minlash;

qonun hujjatlarida belgilangan tartibda tegishli davlat organlariga hisobot berish uchun javob beradi.

12. Institut o‘z faoliyatida bevosita O‘zbekiston Respublikasi Mahalla va oilani qo‘llab-quvvatlash vazirligiga bo‘ysunadi va unga hisobot beradi.

13. Institutga O‘zbekiston Respublikasi mahalla va oilani qo‘llab-quvvatlash vazirining tavsiyasiga ko‘ra, O‘zbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod qilinadigan direktor rahbarlik qiladi.

14. Institut direktorining uning tavsiyasiga asosan O‘zbekiston Respublikasi mahalla va oilani qo‘llab-quvvatlash vaziri tomonidan lavozimga tayinlanadigan va lavozimidan ozod qilinadigan ikki nafar o‘rinbosari bo‘ladi.

Institut direktori bo‘lmagan vaqtda, uning vakolatlarini vazifalar taqsimotiga muvofiq o‘rinbosarlari amalga oshiradi.

15. Institut direktori:

Institut faoliyatiga umumiy rahbarlik qiladi;

O‘zbekiston Respublikasi mahalla va oilani qo‘llab-quvvatlash vaziri bilan kelishgan holda boshqaruv xodimlarining umumiy cheklangan soni va mehnatga haq to‘lash fondi doirasida Institutning shtat jadvalini tasdiqlaydi;

O‘zbekiston Respublikasi mahalla va oilani qo‘llab-quvvatlash vaziri bilan kelishgan holda, zarur nazariy bilim va amaliy ko‘nikmalarga ega bo‘lgan yuqori malakali mutaxassislar bilan belgilangan tartibda mehnat shartnomalarini tuzadi va bekor qiladi;

Institut xodimlari bajarishi majburiy bo‘lgan buyruq va yo‘riqnomalarni qabul qiladi;

Institut direktorining o‘rinbosarlari va bo‘lim boshliqlarining hisobotlarini Ilmiy kengashda eshitadi;

Institut xodimlarini qonun hujjatlariga muvofiq rag‘batlantirish shakllarini belgilaydi, lavozim maoshlariga ustama va qo‘shimcha to‘lovlarni belgilaydi, xodimlarga moddiy yordam ko‘rsatish bo‘yicha buyruqlar chiqaradi, ularni intizomiy jazoga tortish masalalarini hal qiladi;

Institutning tarkibiy bo‘linmalari to‘g‘risidagi nizomlarni, bo‘lim boshliqlari va xodimlarining funksional vazifalarini tasdiqlaydi;

har yili 25-dekabrga qadar O‘zbekiston Respublikasi mahalla va oilani qo‘llab-quvvatlash vaziri bilan kelishgan holda, Institut tadbirlari kalendar rejasini, ilmiy-tadqiqot ishlarining mavzuli rejalarini shakllantiradi va tasdiqlaydi;

Institutning hisobotlarini tasdiqlaydi;

Institutning xarajatlar smetasini tasdiqlaydi;

Institutning aktivlarini tasarruf etadi, mol-mulkni boshqarish to‘g‘risida qarorlar qabul qiladi, moliyaviy, to‘lov-hisob-kitob va boshqa hujjatlarni imzolaydi, zarur hollarda Institut mas’ul mansabdor shaxslariga ishonchnomalar beradi;

Institut nomidan yuridik va jismoniy shaxslar, shu jumladan xalqaro tashkilotlar va xorijiy davlatlarning ilmiy-tadqiqot muassasalari hamda boshqa mutasaddi tashkilotlari bilan shartnoma va memorandumlar tuzadi;

zarur hollarda, Institut tuzilmasiga xodimlarning belgilangan cheklangan umumiy soni va ish haqi fondi doirasida o‘zgartirishlar kiritish bo‘yicha O‘zbekiston Respublikasi mahalla va oilani qo‘llab-quvvatlash vaziriga takliflar kiritadi.

Institut direktori qonun hujjatlariga muvofiq boshqa vakolatlarni ham amalga oshirishi mumkin.

16. Institut direktori:

Institutga yuklangan asosiy vazifalar ijrosini ta’minlash bo‘yicha sifatli tadqiqot ishlarini amalga oshirish hamda ta’sirchan, ilmiy asoslangan, amaliy taklif va tavsiyalarni, tahliliy materiallarni ishlab chiqishga;

mahalla va oila institutlarini mustahkamlash, xotin-qizlar va keksalarni qo‘llab-quvvatlash hamda ularning ijtimoiy faolligini oshirishga qaratilgan konsepsiyalarni, kompleks, maqsadli, sohaviy va hududiy dasturlarni ishlab chiqishning ilmiy-metodologik asoslarini shakllantirishga shaxsan javobgardir.

17. Institut xodimlarining huquq va majburiyatlari mehnat qonunchiligi, lavozim yo‘riqnomasi, ichki mehnat qoidalari, jamoa va mehnat shartnomalariga muvofiq belgilanadi.

18. Institut direktorining o‘rinbosarlari:

tarkibiy bo‘linmalar faoliyatiga bevosita rahbarlik qiladi, ushbu bo‘linmalarga yuklangan vazifalar va funksiyalar bajarilishini tashkil etadi;

O‘zbekiston Respublikasi mahalla va oilani qo‘llab-quvvatlash vazirining buyruqlari, qarorlari va farmoyishlari, Institut direktorining buyruqlari va topshiriqlari o‘z vaqtida va sifatli bajarilishini ta’minlaydi;

tarkibiy bo‘linmalarga yuklangan vazifalar bajarilishini nazorat qiladi va muvofiqlashtiradi;

tarkibiy bo‘linmalar faoliyatini takomillashtirish bo‘yicha takliflar ishlab chiqadi va ularni ko‘rib chiqish uchun Institut direktoriga kiritadi;

Institut direktoriga tarkibiy bo‘linmalarda xodimlarni tanlash va joy-joyiga qo‘yish bo‘yicha takliflar kiritadi, ularning kasbiy mahoratini, malakasini, amaliy tajribasini, ishchanlik va axloqiy fazilatlarini yuqori darajada ta’minlash, ularning kasbiy malakalarini oshirish, tarkibiy bo‘linmalarda kadrlar zaxirasini shakllantirish choralarini ko‘radi;

Institutning tarkibiy bo‘linmalari xodimlari faoliyatining samaradorligi va natijadorligini tizimli tanqidiy tahlil qiladi, yig‘ilishlarda ularning shaxsiy hisobotlarini eshitadi, yakunlari bo‘yicha zarur choralar ko‘radi.

19. Institut huzurida direktor (Ilmiy kengash raisi), faoliyatning asosiy yo‘nalishlarini muvofiqlashtiruvchi uning o‘rinbosarlari (lavozimiga ko‘ra), Ilmiy kotib, Institut tarkibiy bo‘linmalari rahbarlari, Mahalla va oilani qo‘llab-quvvatlash vazirligi mas’ul xodimlari, Fanlar akademiyasi vakillari, shuningdek, turdosh ilmiy-tadqiqot institutlarida va tashkilotlarda ishlovchi yetakchi olimlar, malakali mutaxassislar hamda fuqarolar yig‘inlari xodimlaridan iborat tarkibda Ilmiy kengash tashkil etiladi.

Institut Ilmiy kengashining shaxsiy tarkibi, a’zolari soni va nizomi Institut direktori taqdimiga binoan O‘zbekiston Respublikasi Mahalla va oilani qo‘llab-quvvatlash vazirligi tomonidan tasdiqlanadi.

Institut Ilmiy kengashining ish tartibi Institutning ish rejalariga muvofiq belgilanadi.

20. Institut faoliyatini moliyalashtirish manbalari quyidagilardan iborat:

O‘zbekiston Respublikasi Davlat budjeti mablag‘lari (xodimlar mehnatiga haq to‘lash, binolar va inshootlarni saqlash xarajatlarini moliyalashtirish hamda ilmiy faoliyatga oid davlat dasturlarini amalga oshirish uchun);

ilmiy faoliyatga oid dasturlarni amalga oshirish uchun O‘zbekiston Respublikasi Innovatsion rivojlanish vazirligi tomonidan o‘tkaziladigan tanlovlar natijalari bo‘yicha ajratiladigan O‘zbekiston Respublikasi Davlat budjeti mablag‘lari;

O‘zbekiston Respublikasi Mahalla va oilani qo‘llab-quvvatlash vazirligining budjetdan tashqari mablag‘lari;

xalqaro moliya institutlari va boshqa xorijiy tashkilotlarning grantlari;

respublika ilmiy-tadqiqot loyihalar grantlari;

xo‘jalik faoliyatidan hamda shartnoma asosida tadqiqotlar o‘tkazishdan tushadigan tushumlar;

qonun hujjatlarida taqiqlanmagan boshqa manbalar.

21. Institut o‘zining ko‘chmas va ko‘char mol-mulkiga, pul mablag‘lariga, shu jumladan chet el valyutasidagi pul mablag‘lari, qimmatli qog‘ozlari va boshqa mol-mulkiga ega bo‘lishi mumkin.

Xo‘jalik, ilmiy-texnik faoliyatdan tushgan daromadlar, shuningdek, yuridik va jismoniy shaxslarning homiylik xayriyalari hisobiga sotib olingan mulk va vositalar Institut mulki hisoblanadi.

22. Barcha tadqiqot materiallari, shuningdek, tuzilgan shartnomalarga muvofiq bajarilgan tadqiqotlar Institut faoliyatining intellektual mulki obyektlari hisoblanadi.

23. Institut direktori belgilangan ish haqi fondini tejashdan hamda budjetdan tashqari tushgan, shuningdek, xodimlarning tasdiqlangan shtatlar jadvalida nazarda tutilgan shtat birliklari yetishmasligidan iqtisod qilingan mablag‘lardan xodimlarni moddiy rag‘batlantirishda, Institutning moddiy-texnik bazasini mustahkamlashda foydalanishga haqlidir.

24. Institut xodimlariga O‘zbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq to‘lash va moddiy rag‘batlantirish shartlari tatbiq etiladi.

Institut xodimlarining avvalgi uzoq yillik ish staji uchun oladigan qo‘shimcha haqlari va ustamalari saqlab qolinadi.

25. Institut direktori O‘zbekiston Respublikasi mahalla va oilani qo‘llab-quvvatlash vaziri bilan kelishgan holda, Institutning o‘z mablag‘lari hisobidan xodimlar o‘z xizmat vazifalarirni tashabbus ko‘rsatib va vijdonan bajarishini rag‘batlantirish maqsadida ularga belgilangan tartibda lavozim maoshining 100 foizgacha miqdorda oylik ustamalar belgilashga, har chorakda mukofotlashga, biryo‘la moddiy yordam tayinlashga haqli.

26. Institut faoliyatining samaradorligi muntazam baholanadi.

27. Institut faoliyatining samaradorligi va natijadorligiga berilgan baho O‘zbekiston Respublikasi Mahalla va oilani qo‘llab-quvvatlash vazirligi tomonidan tasdiqlanadigan Institut faoliyati samaradorligi va natijadorligini baholash mezonlari va ish indikatorlariga asoslanadi.

28. Institut faoliyatining samaradorligi va natijadorligini baholash yakunlari bo‘yicha:

Institut rahbarlari va xodimlarini rag‘batlantirish (mukofotlash) yoki intizomiy javobgarlik choralari;

Institut faoliyatida aniqlangan kamchiliklarni bartaraf etish va uning faoliyatini yanada takomillashtirish choralari ko‘riladi.

29. Institut faoliyatining samaradorligi va natijadorligini baholash tartibi qonun hujjatlari bilan belgilanadi.

30. Institut qonun hujjatlarida belgilangan tartibda qayta tashkil etiladi va tugatiladi.

31. Ushbu Ustav talablari buzilishida aybdor bo‘lgan shaxslar qonun hujjatlarida belgilangan tartibda javob beradi.

1. Vazirlar Mahkamasining “O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi faoliyatini tashkil etish chora-tadbirlari to‘g‘risida” 2018-yil 26-martdagi 229-son qarori (O‘zbekiston Respublikasi QT, 2018-y., 3-son, 63-modda).

2. Vazirlar Mahkamasining “Oila institutini mustahkamlash sohasida kadrlarni qayta tayyorlash va ularnnng malakasini oshirish bo‘yicha maxsus o‘quv kurslari tashkil etish to‘g‘risida” 2018-yil 26-martdagi 230-son qarori (O‘zbekiston Respublikasi QT, 2018-y., 3-son, 64-modda).