Oʻzbekiston Respublikasi Soliq kodeksining 15 va 132-moddalariga muvofiq Oʻzbekiston Respublikasi Davlat soliq qoʻmitasi qaror qiladi:

1. Soliq toʻlovchilar toʻgʻrisida hisob maʼlumotlarini yuritish, bu maʼlumotlarni uchinchi shaxslarga taqdim etish, shuningdek soliq toʻlovchilarning ayrim toifalari uchun maʼlumotlar tarkibini shakllantirish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom davlat soliq xizmati organlari (bundan buyon matnda soliq organlari deb yuritiladi) tomonidan soliq toʻlovchilar toʻgʻrisidagi hisob maʼlumotlarini yuritish, bu maʼlumotlarni uchinchi shaxslarga taqdim etish, shuningdek soliq toʻlovchilarning ayrim toifalari uchun maʼlumotlar tarkibini shakllantirish tartibini belgilaydi.

1. Mazkur Nizomda quyidagi asosiy tushunchalardan foydalaniladi:

soliq toʻlovchi — Oʻzbekiston Respublikasining Soliq kodeksiga (bundan buyon matnda Soliq kodeksi deb yuritiladi) muvofiq zimmasiga belgilangan soliqlar hamda yigʻimlarni toʻlash majburiyati yuklatilgan yuridik va jismoniy shaxslar;

soliq toʻlovchi toʻgʻrisida hisob maʼlumotlari — soliq organlariga soliq toʻlovchi tomonidan taqdim etilgan maʼlumotlar, shuningdek Soliq kodeksining 133-moddasida nazarda tutilgan tartibda davlat organlari, muassasalari va tashkilotlari tomonidan taqdim etilgan maʼlumotlar;

uchinchi shaxs — oʻz faoliyatida qonunchilikda taqiqlanmagan maqsadlarda foydalanish uchun soliq toʻlovchiga doir maʼlumotlarni taqdim etish yuzasidan soliq organlariga yoki “Ishonchli hamkor” avtomatlashtirilgan axborot tizimi (bundan buyon matnda “Ishonchli hamkor” AAT deb yuritiladi)” orqali murojaat qilgan shaxs;

kontragent — soliq toʻlovchi bilan xoʻjalik munosabatlarida shartnoma tuzuvchi taraf;

maʼlumotlarni transchegaraviy uzatish — soliq toʻlovchi toʻgʻrisida hisob maʼlumotlarni soliq organlari tomonidan respublika hududidan tashqariga Oʻzbekiston Respublikasining xalqaro shartnomalarida nazarda tutilgan hollarda uzatish;

soliq toʻlovchilarning ayrim toifalari — toʻgʻridan-toʻgʻri xususiy chet el investitsiyalari ishtirokidagi yuridik shaxslar, maxsus iqtisodiy zonalarning ishtirokchilari, mahsulot taqsimotiga oid bitimlar ishtirokchilari, advokatlar hayʼatlari, advokatlik firmalari, advokatlik byurolari va advokatlar hamda xususiy amaliyot bilan shugʻullanuvchi notariuslar;

“Ishonchli hamkor” AAT — soliq toʻlovchilar toʻgʻrisidagi soliq sirini tashkil etmaydigan maʼlumotlar va hisob maʼlumotlar, hisobvaraq-fakturalar va cheklarda koʻrsatilgan mahsulotlarning (tovar va xizmatlarning) yagona elektron milliy katalogi boʻyicha identifikatsiya kodlarini, shuningdek, majburiy markirovkalangan mahsulotlar boʻyicha tahliliy va qayta ishlangan maʼlumotlarni uchinchi shaxslarga real vaqt rejimida yuborish imkoniyatiga ega avtomatlashtirilgan axborot tizimi.

2. Soliq organlariga soliq toʻlovchi tomonidan, shuningdek davlat organlari, muassasalari va tashkilotlari tomonidan taqdim etilgan soliq toʻlovchi toʻgʻrisidagi quyidagi hisob maʼlumotlari soliq sirini tashkil etadi:

tadbirkorlik subyekti boʻlgan yuridik va jismoniy shaxslarni davlat roʻyxatidan oʻtkazishni amalga oshiruvchi organlardan olingan yuridik shaxslarning davlat reyestridan koʻchirma, bundan soliq siri hisoblanmaydigan maʼlumotlar mustasno;

ichki ishlar organlaridan olingan pasport yoki identifikatsiya ID-karta maʼlumotlari, bundan jismoniy shaxsning shaxsiy identifikatsiya raqami (JSHSHIR) mustasno;

koʻchmas mulkka boʻlgan huquqni davlat roʻyxatidan oʻtkazuvchi organlardan olingan tegishli hududda joylashgan yer uchastkasi va boshqa koʻchmas mulk, uning mulkdorlari (egalari) toʻgʻrisidagi maʼlumotlar;

tabiiy resurslardan foydalanuvchilarni hisobga olishni va (yoki) ularni roʻyxatdan oʻtkazishni, shuningdek tabiiy resurslardan foydalanish bilan bogʻliq faoliyatni litsenziyalashni amalga oshiruvchi organlardan olingan litsenziya va ruxsatnomalar toʻgʻrisidagi maʼlumotlar;

suv resurslarini hisobga olishni amalga oshiruvchi organlardan olingan oʻlchov asboblarisiz foydalanilgan suv hajmlari toʻgʻrisidagi maʼlumotlar;

litsenziyalar va (yoki) boshqa ruxsat etuvchi hujjatlarni beradigan organlardan olingan shunday hujjatlar berilganligi, bekor qilinganligi, toʻxtatib turilganligi yoki ularning amal qilishi tugatilganligi toʻgʻrisidagi maʼlumotlar;

chet el yuridik shaxslarining vakolatxonalarini akkreditatsiyadan oʻtkazishni amalga oshiruvchi organlar hamda tashkilotlardan olingan chet el yuridik shaxslarining vakolatxonalari akkreditatsiyadan oʻtkazilganligi (akkreditatsiyadan mahrum etilganligi) toʻgʻrisidagi maʼlumotlar;

xalqaro tashkilotlarning hamda chet el notijorat tashkilotlarining vakolatxonalari reyestrini yuritish vakolatiga ega boʻlgan organdan olingan mazkur reyestrga tegishli tarzda kiritilganlik (reyestrdagi oʻzgartirishlar) toʻgʻrisidagi maʼlumotlar;

vasiylik va homiylik organlaridan olingan mol-mulk mulkdorlari (egalari) boʻlgan jismoniy shaxslarga nisbatan vasiylik, homiylik hamda mol-mulk boshqaruvi belgilanganligi toʻgʻrisida, shu jumladan mol-mulk mulkdori (egasi) boʻlgan bolaning vasiy oilaga topshirilganligi haqida, shu jumladan mazkur vasiylik, homiylik va mol-mulk boshqaruvi bilan bogʻliq keyingi oʻzgartirishlar toʻgʻrisidagi maʼlumotlar;

notariuslardan olingan koʻchmas mulk oldi-sotdi shartnomalari, mol-mulk ijarasi shartnomalari tasdiqlanganligi va ijara haqi miqdori, merosga egalik qilish huquqi toʻgʻrisidagi guvohnomalar berilganligi hamda hadya etish shartnomalari notarial tarzda tasdiqlanganligi haqidagi maʼlumotlar;

chet ellik fuqarolarga yoki fuqaroligi boʻlmagan shaxslarga ishlash uchun ruxsatnomalar yoki patentlar berishni amalga oshiruvchi organlardan olingan chet ellik fuqarolar yoxud fuqaroligi boʻlmagan shaxslar turgan joyi boʻyicha migratsiya hisobiga qoʻyilganligi toʻgʻrisidagi maʼlumotlar;

qimmatli qogʻozlarning markaziy depozitariysidan olingan oʻzi va investitsiya vositachilari tomonidan roʻyxatga olingan aksiyalarga doir bitimlar toʻgʻrisidagi axborotlar;

bojxona organlaridan olingan import operatsiyalari toʻgʻrisidagi, tovarlar bojxona chegarasini kesib oʻtganidan keyin eksport operatsiyalari boʻyicha, shuningdek, tovarlarni olib oʻtish, shu jumladan Oʻzbekiston Respublikasining bojxona chegarasi orqali elektron tijorat shaklida amalga oshirilgan tovarlarni olib oʻtish haqidagi, Oʻzbekiston Respublikasi norezidentlari tomonidan Oʻzbekiston Respublikasining bojxona omborlarida tovarlar saqlanayotganligi faktlari toʻgʻrisidagi axborotlar;

Internet jahon axborot tarmogʻi milliy segmentining domen nomlari tizimini belgilovchi organdan olingan domen nomlarining maʼmurlari toʻgʻrisidagi axborotlar.

3. Soliq organlariga soliq toʻlovchi tomonidan, shuningdek davlat organlari, muassasalari va tashkilotlari tomonidan taqdim etilgan soliq toʻlovchi toʻgʻrisidagi quyidagi hisob maʼlumotlari soliq siri hisoblanmaydi:

hamma foydalanishi mumkin boʻlgan, shu jumladan egasining roziligi bilan shunday foydalanish imkoni yaratilgan maʼlumotlar;

yuridik shaxslar uchun — soliq toʻlovchining identifikatsiya raqami (STIR), jismoniy shaxslar uchun — jismoniy shaxsning shaxsiy identifikatsiya raqami (JSHSHIR) toʻgʻrisidagi maʼlumotlar;

soliq toʻgʻrisidagi qonunchilik hujjatlarining buzilishlari va bu qoidabuzarliklar uchun javobgarlik choralari toʻgʻrisidagi maʼlumotlar;

soliq toʻlovchilar tomonidan qoʻllaniladigan soliq rejimlari va qoʻshilgan qiymat soligʻini toʻlovchilar sifatida hisobga qoʻyilganlik toʻgʻrisidagi maʼlumotlar;

toʻlangan soliqlarning va soliq qarzining summalari haqidagi maʼlumotlar;

yuridik shaxsning ishtirokchilari toʻgʻrisidagi maʼlumotlar;

xodimlarning roʻyxatdagi oʻrtacha soni toʻgʻrisidagi maʼlumotlar;

moliyaviy hisobot maʼlumotlari boʻyicha daromadlar va xarajatlar summalari toʻgʻrisidagi maʼlumotlar;

Oʻzbekiston Respublikasi Vazirlar Mahkamasining 2020-yil 4-sentabrdagi 539-son qarori bilan tasdiqlangan Yuridik shaxslar, faoliyatini vakolatxona, filial yoki doimiy muassasa orqali amalga oshirayotgan chet el yuridik shaxslari va tadbirkorlik faoliyati bilan shugʻullanuvchi jismoniy shaxslarning markaziy maʼlumotlar bazasini shakllantirish va yuritish tartibi toʻgʻrisida nizomda belgilangan soliq toʻlovchilarning ochiq turdagi maʼlumotlar tarkibiga kiritilgan hisob maʼlumotlari.

4. Soliq toʻlovchi boʻyicha soliq siri hisoblanadigan maʼlumotlarni uchinchi shaxslarga berish taqiqlanadi, bundan qonunchilik hujjatlarida nazarda tutilgan hollar mustasno.

5. Muayyan jismoniy shaxsga taalluqli boʻlgan yoki uni identifikatsiya qilish imkonini beradigan shaxsga doir maʼlumotlarni uchinchi shaxslarga taqdim etish Oʻzbekiston Respublikasining “Shaxsga doir maʼlumotlar toʻgʻrisida”gi Qonuniga muvofiq amalga oshiriladi.

6. Yuridik shaxs toʻgʻrisidagi hisob maʼlumotlari tarkibiga quyidagilar kiradi, xususan:

soliq toʻlovchining identifikatsiya raqami (STIR);

toʻliq va qisqartirilgan nomi;

joylashgan yeri (pochta manzili);

tashkiliy-huquqiy shakli;

mulkchilik shakli;

iqtisodiy faoliyat turi;

davlat boshqaruv idoralariga taalluqliligi;

davlat roʻyxatidan oʻtkazilgan sana, joyi va raqami, roʻyxatdan oʻtkazuvchi organ;

rahbar maʼlumotlari;

ustav fondining (ustav kapitalining) miqdori — tijorat tashkilotlari uchun;

faollik holati;

kichik tadbirkorlik subyektiga tegishliligi;

bank rekvizitlari;

alohida boʻlinmalar toʻgʻrisidagi maʼlumotlar;

soliq toʻgʻrisidagi qonunchilik hujjatlarining buzilishlari va bu qoidabuzarliklar uchun javobgarlik choralari toʻgʻrisidagi maʼlumotlar;

soliq toʻlovchilar tomonidan qoʻllaniladigan soliq rejimlari va qoʻshilgan qiymat soligʻini toʻlovchilar sifatida hisobga qoʻyilganlik toʻgʻrisidagi maʼlumotlar;

toʻlangan soliqlarning va soliq qarzining summalari haqidagi maʼlumotlar;

xodimlarning roʻyxatdagi oʻrtacha soni toʻgʻrisidagi maʼlumotlar;

moliyaviy hisobot maʼlumotlari boʻyicha daromadlar va xarajatlar summalari toʻgʻrisidagi maʼlumotlar;

Oʻzbekiston Respublikasining rezidentlari boʻlgan ishtirokchilar soliq toʻlovchisining identifikatsiya raqami, chet ellik ishtirokchining mamlakati hamda har bir muassisning ustav fondidagi (ustav kapitalidagi) ulushi koʻrsatilgan holda ishtirokchilarning toʻliq tarkibi — tijorat tashkilotlari uchun.

7. Jismoniy shaxslar toʻgʻrisidagi hisob maʼlumotlari tarkibiga ularning quyidagi shaxsiy maʼlumotlari kiritiladi:

familiyasi, ismi, otasining ismi;

fuqaroligi;

jismoniy shaxsning shaxsiy identifikatsiya raqami;

pasportining seriyasi va raqami, berilgan sanasi va joyi yoki identifikatsiya ID-karta maʼlumotlari;

yashash joyi (manzili).

8. Yakka tartibdagi tadbirkorlar uchun hisob maʼlumotlari tarkibiga mazkur Nizomning 7-bandida koʻrsatilgan maʼlumotlardan tashqari, quyidagilar ham kiritiladi:

davlat roʻyxatidan oʻtkazilgan sana, joyi va raqami;

faoliyat turi;

faoliyat amalga oshiriladigan joy.

9. Chet el yuridik shaxslarining hisob maʼlumotlari tarkibiga quyidagilar kiradi:

roʻyxatdan oʻtkazilgan mamlakatning roʻyxatga olish organi tomonidan berilgan roʻyxatdan oʻtkazish raqami;

roʻyxatga olingan mamlakatning soliq organi tomonidan berilgan soliq toʻlovchining xos raqami;

yuridik shaxsning toʻliq nomi;

roʻyxatga olingan mamlakati;

tashkiliy-huquqiy shakli;

asosiy faoliyat turi;

joylashgan yeri (pochta manzili);

rahbarining (vakolatli shaxsning) familiyasi, ismi, otasining ismi, pasport seriyasi va raqami yoki identifikatsiya ID-karta maʼlumotlari, elektron pochta manzili va telefon raqami;

alohida boʻlinmalar toʻgʻrisidagi maʼlumotlar — faoliyatini alohida boʻlinmalar orqali amalga oshiradigan chet el yuridik shaxslari uchun.

10. Soliq kodeksining 39-bobida nazarda tutilgan elektron shaklda xizmatlar koʻrsatuvchi chet el yuridik shaxslarining hisob maʼlumotlari tarkibiga ushbu Nizomning 9-bandida koʻrsatilgan maʼlumotlardan tashqari, quyidagilar ham kiritiladi:

Internet jahon axborot tarmogʻidagi rasmiy veb-sayti va xizmat koʻrsatayotgan veb-sayti;

elektron pochta manzili;

savdo belgisi nomi;

koʻrsatayotgan elektron xizmat turi;

elektron xizmat taqdim etayotgan mobil ilova nomi.

10¹. Soliq toʻlovchi soliq organlarining maʼlumotlar bazasida mavjud boʻlgan oʻz hisob maʼlumotlarini soliq organining soʻroviga koʻra soliq toʻlovchining shaxsiy kabineti orqali tasdiqlashi kerak.

11. Soliq toʻlovchilar toʻgʻrisidagi hisob maʼlumotlarini yuritish yuridik shaxslar uchun soliq toʻlovchining identifikatsiya raqami (STIR), jismoniy shaxslar uchun jismoniy shaxsning shaxsiy identifikatsiya raqami (JSHSHIR) asosida amalga oshiriladi.

12. Soliq toʻlovchilar toʻgʻrisidagi hisob maʼlumotlarini yuritish maʼlumotlarni kiritishni va ushbu maʼlumotlarni oʻzgartirishni oʻz ichiga oladi.

13. Soliq toʻlovchilar toʻgʻrisidagi hisob maʼlumotlari Oʻzbekiston Respublikasi soliq toʻlovchilarining yagona reyestriga kiritiladi.

14. Soliq toʻlovchilar toʻgʻrisidagi hisob maʼlumotlariga oʻzgartirish kiritish soliq toʻlovchi tomonidan soliq organlariga taqdim etilgan maʼlumotlar va (yoki) Soliq kodeksining 133-moddasida nazarda tutilgan tartibda davlat organlari, muassasalari va tashkilotlaridan olingan maʼlumotlar asosida soliq toʻlovchi hisobga qoʻyilgan hamda soliq solish obyekti boʻyicha hisobga qoʻyilgan soliq organi tomonidan amalga oshiriladi.

15. Yirik soliq toʻlovchilar toifasiga kiritilgan soliq toʻlovchilarning hisob maʼlumotlariga oʻzgartirish kiritish Yirik soliq toʻlovchilar boʻyicha hududlararo soliq inspeksiyasi tomonidan mazkur Nizomga muvofiq amalga oshiriladi.

16. Soliq toʻlovchilar toʻgʻrisidagi hisob maʼlumotlarini sudlarga, huquqni muhofaza qiluvchi organlarga hamda respublika davlat boshqaruvi organlariga taqdim etish Oʻzbekiston Respublikasi Soliq qoʻmitasi bilan oʻzaro elektron axborot almashish boʻyicha tuzilgan bitimlar asosida axborot xavfsizligi talablariga rioya qilgan holda elektron tarzda amalga oshiriladi.

Bunda, oʻzaro elektron axborot almashish tizimi yoʻlga qoʻyilmagan tashkilotlarga maʼlumotlarni taqdim etish, ularning soʻrovi asosida qogʻoz shaklda amalga oshiriladi.

17. Soliq toʻlovchilar toʻgʻrisidagi maʼlumotlardan faqat ulardan foydalanishga ruxsat berilgan mansabdor shaxslar tomonidan foydalanish imkoniyati yaratiladi.

18. Oʻzbekiston Respublikasi Jinoyat-protsessual kodeksining 201-moddasiga asosan sudlarga hamda huquqni muhofaza qiluvchi organlarga ularning soʻroviga asosan soliq sirini tashkil etuvchi maʼlumotlar taqdim etilishi mumkin.

19. Tijorat tashkilotlariga soliq toʻlovchilar toʻgʻrisidagi hisob maʼlumotlari axborot xavfsizligi talablariga rioya qilgan holda “Ishonchli hamkor” AAT orqali taqdim etiladi.

Bunda, soliq sirini tashkil etuvchi maʼlumotlarni taqdim etish soliq toʻlovchining roziligi bilan amalga oshiriladi.

20. Soliq toʻlovchilar toʻgʻrisidagi hisob maʼlumotlarini jismoniy shaxslarga taqdim etish Oʻzbekiston Respublikasi Soliq qoʻmitasining rasmiy veb-saytidagi soliq toʻlovchining shaxsiy kabineti (bundan buyon matnda shaxsiy kabinet deb yuritiladi) orqali real vaqt rejimida amalga oshiriladi.

Bunda, jismoniy shaxslar tomonidan yozma tarzda murojaat qilinganda maʼlumotlarni taqdim etish Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonunida belgilangan tartibda amalga oshiriladi.

21. Soliq toʻlovchi kontragentlarni tanlash chogʻida ularning soliq organlarida soliq toʻlovchi sifatida hisobga qoʻyilganligi toʻgʻrisidagi hamda mazkur Nizomning 3-bandida belgilangan maʼlumotlarni olishi mumkin.

Soliq toʻlovchiga kontragent boʻyicha maʼlumotlarni taqdim etish shaxsiy kabinet yoki “Ishonchli hamkor” AAT orqali real vaqt rejimida amalga oshiriladi.

22. Soliq toʻlovchilar toʻgʻrisida hisob maʼlumotlarini transchegaraviy uzatish soliq organlari tomonidan Oʻzbekiston Respublikasining xalqaro shartnomalarida nazarda tutilgan hollarda amalga oshiriladi.

Bunda, boshqa davlatlarning soliq organlariga yoki boshqa tegishli organlariga soliq toʻlovchi toʻgʻrisida soʻralgan maʼlumotlarni taqdim etish soliq sirini oshkor etish sirasiga kirmaydi.

23. Toʻgʻridan-toʻgʻri xususiy chet el investitsiyalari ishtirokidagi yuridik shaxslarning maʼlumotlar tarkibi quyidagilar asosida shakllanadi:

investitsiyalar Oʻzbekiston Respublikasining kafolatini taqdim etmasdan amalga oshirilayotganligi toʻgʻrisida Oʻzbekiston Respublikasi Iqtisodiyot va moliya vazirligidan olingan maʼlumotlar;

toʻliq shakllantirilgan ustav kapitali (fondi) va korxonaning ustav kapitalida (fondida) xorijiy investorning ulushi toʻgʻrisida tegishli organ va tashkilotlardan olingan maʼlumotlar.

24. Maxsus iqtisodiy zonalarning ishtirokchilari boʻyicha maʼlumotlar tarkibiga maxsus zonalar direksiyalari tomonidan taqdim etilgan maxsus zonalarning ishtirokchilari maxsus zonalar ishtirokchisi sifatida roʻyxatdan oʻtkazilganligi (ishtirokchi maqomidan mahrum etilgani) toʻgʻrisidagi maʼlumotlar kiritiladi.

25. Mahsulot taqsimotiga oid bitimlar ishtirokchilari boʻyicha maʼlumotlar tarkibiga Oʻzbekiston Respublikasi Vazirlar Mahkamasi yoki u vakolat bergan organdan olingan investor yoki yuridik shaxs maqomiga ega boʻlmagan yuridik shaxslar birlashmasi investor sifatida ish yuritayotgan boʻlsa, bunday birlashma ishtirokchilaridan biriga berilgan mahsulot taqsimotiga oid bitimda koʻrsatilgan yer qaʼri uchastkalaridan foydalanish huquqini beruvchi litsenziya toʻgʻrisidagi (amal qilish muddati va birlashmaning boshqa barcha ishtirokchilari toʻgʻrisidagi) maʼlumotlar kiritiladi.

26. Advokatlar hayʼati, advokatlik firmalari va advokatlik byurolari boʻyicha maʼlumotlar tarkibi adliya organlaridan olingan quyidagi maʼlumotlar asosida shakllanadi:

advokatlik faoliyati bilan shugʻullanish uchun berilgan litsenziyalarning davlat reyestridagi maʼlumotlar;

advokatlik tuzilmalari reyestridagi maʼlumotlar;

advokatlik tuzilmalarining pochta manzili oʻzgarganda bu oʻzgarishlar toʻgʻrisida olingan maʼlumotlar.

27. Xususiy amaliyot bilan shugʻullanuvchi notariuslar boʻyicha maʼlumotlar tarkibi adliya organlaridan olingan quyidagi maʼlumotlar asosida shakllanadi:

xususiy notarial faoliyat bilan shugʻullanish huquqi uchun berilgan litsenziyalar toʻgʻrisidagi (amal qilishi toʻxtatib turilgan, tugatilgan va bekor qilingan) maʼlumotlar;

xususiy notarial amaliyot bilan shugʻullanish uchun berilgan litsenziyalarning davlat reyestridagi maʼlumotlar.

28. Coliq toʻlovchilarning ayrim toifalari uchun maʼlumotlar tarkibi ushbu Nizomning 23 — 27-bandlarida nazarda tutilgan maʼlumotlardan tashqari tegishli organ va tashkilotlardan olingan maʼlumotlar asosida shakllantirilishi mumkin.

29. Uchinchi shaxs tomonidan soliq organlaridan olingan soliq siri hisoblangan maʼlumotlar va axborotlardan faqat xizmat doirasida foydalaniladi.

30. Maʼlumotlardan foydalanuvchi korxonalar va tashkilotlarning mansabdor shaxslari hamda fuqarolar soliq organlaridan olingan maʼlumotlar va axborotlarning sir tutilishini qonunchilik hujjatlarida belgilangan tartibda taʼminlashlari shart.

31. Soliq organlaridan olingan axborotlarni oʻz ichiga olgan hujjatlarning yoʻqotilishi yoki bunday maʼlumotlarning oshkor etilishi qonunda nazarda tutilgan javobgarlikka sabab boʻladi.

32. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladilar.

33. Mazkur Nizom Oʻzbekiston Respublikasi Moliya vazirligi bilan kelishilgan.