O‘zbekiston Respublikasida aholining sanitariya-epidemiologik osoyishtaligi va xavfsizligini ta’minlash, koronavirus infeksiyasi tarqalishining oldini olishda mutasaddi davlat va xo‘jalik boshqaruvi organlari hamda tashkilotlarning muvofiqlashtirilgan faoliyatini tashkil etish, fuqarolarning hayoti va sog‘lig‘ini muhofaza qilish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining 2020-yil 29-yanvardagi F-5537-son farmoyishi bilan tashkil etilgan O‘zbekiston Respublikasiga koronavirusning kirib kelishi va tarqalishining oldini olish bo‘yicha chora-tadbirlar dasturini tayyorlash bo‘yicha respublika maxsus komissiyasi (keyingi o‘rinlarda — Komissiya) qarorlariga muvofiq:

dunyoning barcha davlatlari bilan O‘zbekiston Respublikasi o‘rtasida muntazam aviaqatnovlar to‘xtatilganligi;

xorijiy davlatlar fuqarolari va fuqaroligi bo‘lmagan shaxslarni, (respublikada doimiy istiqomat qiluvchi fuqaroligi bo‘lmagan shaxslar bundan mustasno), shuningdek, yo‘lovchi tashuvchi transport vositalarini (avtobus, yengil avtotransport va temir yo‘l transporti vositalari) O‘zbekiston Respublikasi hududiga barcha chegara o‘tkazish punktlari orqali kirib kelishi to‘xtatilganligi;

O‘zbekiston Respublikasi hududiga kirib kelayotgan shaxslarni 14 kun davomida maxsus ajratilgan tibbiyot muassasasi yoki karantin tadbirlarini tashkil etishga moslashtirilgan bazalar yoxud uy sharoitida karantinga olish talabi belgilanganligi;

O‘zbekiston Respublikasi hududida barcha ko‘ngilochar obyektlar, shu jumladan tungi klublar, diskoteka, restoran, kafe, oshxona, choyxona, spa va massaj salonlar, karaoke, bilyard zallari, chilim (kalyan) markazlari va kompyuter o‘yinlari xizmatini ko‘rsatuvchi tadbirkorlik faoliyati to‘xtatilganligi;

O‘zbekiston Respublikasi hududida barcha turdagi ommaviy tadbirlar, shu jumladan bayram tadbirlari, xalqaro tadbirlar va sport musobaqalari, shuningdek, teatr, kino va konsert dasturlari hamda to‘ylar, oilaviy tantanalar, ma’raka va marosimlar o‘tkazilishi (dafn marosimlari 10 — 15 kishidan ko‘p bo‘lmagan hollar bundan mustasno) to‘xtatilganligi;

davlat oliy ta’lim muassasalarida, umumiy o‘rta, o‘rta maxsus, maktabdan tashqari va maktabgacha ta’lim muassasalarida hamda barcha nodavlat ta’lim tashkilotlarida ta’lim jarayonlari to‘xtatilganligi va koronavirus infeksiyasi tarqalishining oldini olishga qaratilgan boshqa bir qator choralar ko‘rilganligi ma’lumot uchun qabul qilinsin.

2. O‘zbekiston Respublikasi hududida 2020-yil 24-mart soat 00.01 dan boshlab quyidagilarni nazarda tutuvchi koronavirus infeksiyasi tarqalishiga qarshi kuchaytirilgan tartib (keyingi o‘rinlarda — Tartib) joriy etilsin:

koronavirus infeksiyasi asosan Toshkent shahri hududida aniqlanganligini inobatga olib va ushbu infeksiya respublikaning boshqa hududlariga tarqalishining oldini olish maqsadida boshqa hududlardan Toshkent shahriga kirish (avtobus, mikroavtobus, yengil avtotransport, aviaqatnovlar va temir yo‘l transporti vositalari orqali) to‘xtatiladi, bundan ushbu bandning uchinchi xatboshisida nazarda tutilgan hollar mustasno;

Toshkent shahrida doimiy ro‘yxatdan o‘tgan shaxslar, shuningdek, Toshkent viloyatida doimiy ro‘yxatdan o‘tgan holda Toshkent shahrida mehnat (xizmat) faoliyatini amalga oshirayotgan davlat organlari va muassasalari (nodavlat tashkilotlarida — ish beruvchi tomonidan taqdim etiladigan tegishli ruxsatnoma asosida) xodimlari hamda yuk tashish bilan bog‘liq hollarda Toshkent shahriga kirish va chiqishga ruxsat beriladi;

Toshkent shahriga kiruvchi va chiquvchi shaxslarda koronavirus infeksiyasi alomatlarini aniqlash bo‘yicha majburiy tibbiy nazorat o‘rnatiladi;

birinchi bosqichda Toshkent shahrida, keyinchalik bosqichma-bosqich Nukus shahri, viloyat va tuman markazlarida joylashgan barcha yirik dehqon bozorlari va savdo majmualari (supermarket, gipermarket va boshqalar) kirish-chiqish joylarini tegishli mutaxassislar bilan ta’minlagan holda teplovizorlar va antiseptik vositalar bilan jihozlanadi;

respublika hududiga xorijiy davlatlardan, shuningdek, Toshkent shahriga boshqa hududlardan kirib kelayotgan barcha transport vositalari, tovar va yuklarning majburiy ravishda dezinfeksiya qilinishi ta’minlanadi;

davlat idoralari va tashkilotlarida fuqarolar va tadbirkorlik subyektlari vakillarini qabul qilish hamda ularga davlat va boshqa xizmatlarni ko‘rsatish imkon qadar “onlayn” rejimga o‘tkaziladi;

fuqarolar tomonidan Internet jahon axborot tarmog‘i va telefon aloqasi uchun to‘lovlar o‘z vaqtida amalga oshirilmaganligi sababli ikki oy davomida o‘chirilishiga yo‘l qo‘yilmaydi;

idoraviy bo‘ysunuvi va tashkiliy-huquqiy shaklidan qat’i nazar barcha tashkilotlarning asosiy ish faoliyatiga ta’sir etmagan holda qonun hujjatlarida belgilangan tartibda xodimlarni mehnat ta’tiliga chiqarish, qolgan qismining mehnat faoliyatini maksimal darajada masofadan turib (“onlayn” rejimda yoki masofaviy tarzda) tashkil etish choralari ko‘riladi.

Ushbu bandning beshinchi xatboshisida nazarda tutilgan chora-tadbirlarni moliyalashtirish Inqirozga qarshi kurashish jamg‘armasi hamda qonun hujjatlarida taqiqlanmagan boshqa manbalar hisobidan amalga oshiriladi.

O‘zbekiston Respublikasi Ichki ishlar vazirligi:

Milliy gvardiya va O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi” (keyingi o‘rinlarda Sanepidqo‘m deb yuritiladi) bilan birgalikda ushbu bandning uchinchi xatboshisida belgilangan talablarga so‘zsiz rioya etilishi ustidan qat’iy nazorat o‘rnatsin;

Tartibning amal qilish davrida, zaruratga ko‘ra, qo‘shimcha yo‘l-patrul xizmati statsionar postlari va blok postlar tashkil etish choralarini ko‘rsin.

Ichki ishlar organlari yo‘l-patrul xizmati xodimlariga, istisno tariqasida, Tartib davrida avtotransport vositasini maxsus ruxsatnomasiz boshqarganlik uchun Sanepidqo‘m xodimlari tomonidan rasmiylashtirilgan ma’muriy bayonnoma asosida O‘zbekiston Respublikasi Ma’muriy javobgarlik to‘g‘risidagi kodeksining 291-moddasida belgilangan tartibda avtotransport vositasini jarima maydonchasiga joylashtirish yo‘li bilan ushlab turish huquqi berilsin.

Bunda ma’muriy huquqbuzarlik to‘g‘risidagi qaror belgilangan tartibda ijro etilganidan yoxud ijrosi tugatilgandan so‘ng Sanepidqo‘m tomonidan beriladigan ma’lumotnoma asosida avtotransport vositasi jarima maydonchasidan olib chiqib ketiladi.

3. Tartibning amal qilish davrida quyidagilar o‘rnatilsin:

a) koronavirus infeksiyasi aniqlangan O‘zbekiston Respublikasi fuqarolari, fuqaroligi bo‘lmagan shaxslar va xorijiy fuqarolar, shu jumladan 2020-yil yanvar — mart oylarida koronavirus infeksiyasi qayd etilgan hududlarda bo‘lib, O‘zbekiston hududiga kirib kelgan shaxslar:

Komissiya qarorlariga, Sanepidqo‘m va epidemiyaga qarshi kurashishga jalb etilgan boshqa davlat tashkilotlarining qonuniy talablariga rioya etishga;

O‘zbekistonga qaytib kelganligi, koronavirus infeksiyasi qayd etilgan hududlarda bo‘lgan vaqti va joyi to‘g‘risida zudlik bilan sog‘liqni saqlash organlariga ma’lumot berishga;

o‘zida kasallik alomatlari vujudga kelganda kasallik yuqishi mumkin bo‘lgan davrda muloqotda bo‘lgan shaxslar va harakatlanish yo‘nalishlari haqida zudlik bilan sog‘liqni saqlash organlariga ma’lumot berishga;

14 kun davomida uyda yoki maxsus belgilangan joyda izolyatsiya sharoitida bo‘lishga;

sanitariya va epidemiyaga qarshi kurashish qoidalari va izolyatsiya rejimida bo‘lishga oid talablarga qat’iy rioya etish, shu jumladan tibbiy himoya vositalarini qo‘llash va jamiyatda bir-birlari orasida masofani saqlashga;

sog‘liqni saqlash organlari tomonidan tayinlanadigan tibbiy tekshiruv va davolanishdan o‘tishga majburdirlar;

b) Sanepidqo‘m organlari tomonidan izolyatsiya qilinishi lozimligi haqida talab qo‘yilgan shaxslar bilan birga yashovchi shaxslar ham 14 kun davomida yoki Sanepidqo‘m organlari tomonidan belgilab berilgan muddat davomida uyda yoki maxsus belgilangan joyda izolyatsiya sharoitida bo‘lishga majburdirlar;

v) koronavirus infeksiyasini yuqtirgan yoki ushbu infeksiyani yuqtirganlikda gumon qilinib karantinga joylashtirilgan shaxslarga tegishli bo‘lgan mobil telefon, audio va video vositalar, bank kartalari hamda boshqa axborot tashuvchi buyumlar vaqtincha olib qo‘yiladi;

g) idoraviy bo‘ysunuvi va tashkiliy-huquqiy shaklidan qat’i nazar barcha tashkilotlar rahbarlari (ish beruvchilar) quyidagilarga rioya etishlari shart:

tashrif buyuruvchi shaxslarni faqat tibbiy niqob va tibbiy vositalarni qo‘llagan holda kiritish tartibini majburiy joriy etish;

ish joylarida xodimlarning tana haroratini o‘lchash va tana harorati yuqori bo‘lgan xodimlarni ish joyida bo‘lishiga yo‘l qo‘ymaslik hamda ushbu xodimlar to‘g‘risida sog‘liqni saqlash organlariga zudlik bilan xabar yetkazish;

Sanepidqo‘m organlarining talabnomasiga muvofiq koronavirus infeksiyasini yuqtirgan xodim bilan muloqotda bo‘lganlar haqida darhol ma’lumot berish, kasallangan shaxs bo‘lgan joylarni dezinfeksiyadan o‘tkazish choralarini ko‘rish;

xodimlarga izolyatsiya rejimida bo‘lishga oid talablarga rioya etishda ko‘maklashish;

d) savdo va xizmat ko‘rsatish tashkilotlari Sanepidqo‘m va uning hududiy bo‘linmalari yoki boshqa tashkilotlar bilan shartnomalar tuzish yo‘li bilan dezinfeksiya vositalari bilan ta’minlanadi;

e) Toshkent shahri, Qoraqalpog‘iston Respublikasi va viloyatlarda joylashgan dehqon bozorlaridan tashqari barcha bozorlarning faoliyati to‘xtatiladi.

4. Belgilansinki:

Komissiya mazkur qarorda belgilangan chora-tadbirlar amalga oshirilishi bilan bog‘liq barcha masalalarni muvofiqlashtiradi va zarur hollarda qo‘shimcha kechiktirib bo‘lmaydigan tadbirlarni amalga oshirish bo‘yicha qaror qabul qiladi;

O‘zbekiston Respublikasi Sog‘liqni saqlash vazirligi, Ichki ishlar vazirligi, Milliy gvardiya, Transport vazirligi, Davlat bojxona qo‘mitasi boshqa manfaatdor vazirlik va idoralar hamda Qoraqalpog‘iston Respublikasi Vazirlar Kengashi va mahalliy hokimliklar bilan birgalikda mazkur qarorda belgilangan chora-tadbirlarni o‘z vaqtida va to‘liq amalga oshirish bilan bog‘liq barcha tashkiliy masalalar ijrosini ta’minlaydi.

5. Koronavirus infeksiyasi aniqlanganda (gumon qilinganda) bajariladigan profilaktik va epidemiyaga qarshi chora-tadbirlarni amalga oshirish tartibi to‘g‘risidagi nizom ilovaga muvofiq tasdiqlansin.

6. O‘zbekiston Respublikasi Sog‘liqni saqlash vazirligi manfaatdor vazirlik va idoralar bilan birgalikda:

o‘n kun muddatda respublikada koronavirus infeksiyasining tarqalish darajasini tahlil qilgan holda Sog‘liqni saqlash vazirligi bilan tuzilgan shartnoma asosida nodavlat tibbiyot tashkilotlarida ushbu infeksiya bilan kasallangan bemorlarga tibbiy xizmat ko‘rsatishni tashkil etish bo‘yicha takliflarni;

bir oy muddatda karantin guruhiga mansub bo‘lgan o‘ta xavfli va yuqumli kasalliklar infeksiyasi aniqlanganda (gumon qilinganda) o‘tkaziladigan profilaktik va epidemiyaga qarshi chora-tadbirlarni amalga oshirish tartibini ishlab chiqsin hamda O‘zbekiston Respublikasi Vazirlar Mahkamasiga kiritsin.

7. O‘zbekiston Respublikasi Davlat soliq qo‘mitasi va Markaziy bank tijorat banklari bilan birgalikda bir kun muddatda to‘lovlarni amalga oshirishning masofaviy shakllarini kengaytirish bo‘yicha qo‘shimcha chora-tadbirlarni ishlab chiqib amaliyotga tatbiq etish choralarini ko‘rsin.

8. O‘zbekiston Respublikasi Tashqi ishlar vazirligi Sog‘liqni saqlash vazirligi bilan birgalikda xorijiy mamlakatlarda koronavirus infeksiyasiga qarshi qabul qilingan qonun hujjatlari, amalga oshirilayotgan chora-tadbirlar, shu jumladan tibbiyot sohasidagi yangi yondashuv hamda ixtirolar to‘g‘risida har kunlik ma’lumotni Komissiyaga taqdim etib borsin.

9. Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari:

bir hafta muddatda O‘zbekiston Kasaba uyushmalari Federatsiyasi va Sog‘liqni saqlash vazirligi huzuridagi Tibbiy-ijtimoiy xizmatlar agentligiga qarashli sanatoriy va boshqa sog‘lomlashtirish maskanlarida hamda davlat tasarrufidagi dam olish va sog‘lomlashtirish maskanlari, mehmonxonalari negizida Qoraqalpog‘iston Respublikasida 4 ta, viloyatlar va Toshkent shahrida 3 tadan 14 kunlik karantin tadbirlari uchun moslashtirilgan bazalar tashkil etilishi choralarini ko‘rsin;

karantinda saqlanayotgan shaxslarni bir-biridan ajratgan holda ular o‘rtasida koronavirus infeksiyasi tarqalishining maksimal oldini olish imkonini beruvchi maxsus karantin obyektlari qurilishini qisqa muddatlarda ta’minlasin.

10. Komissiyaga joriy etilgan Tartibning amal qilish davrida quyidagi qo‘shimcha vazifalar yuklansin:

koronavirus infeksiyasi aholi o‘rtasida tarqalishini oldini olishga qaratilgan zarur chora-tadbirlarni ishlab chiqish va amalga oshirishni ta’minlash;

huquqni muhofaza qiluvchi va boshqa davlat organlarining faoliyatini o‘z vakolatlari doirasida muvofiqlashtirish;

birinchi navbatdagi dori vositalari, niqob va tibbiy buyumlarning (dezinfeksiya vositalari va boshqalar) aholiga qat’iy belgilangan narxlarda uzluksiz yetkazib berilishini nazorat qilish;

respublikada koronavirus infeksiyasi tarqalishi bilan bog‘liq vaziyatni muntazam tahlil qilish va vaziyat barqarorlashgandan so‘ng O‘zbekiston Respublikasi Vazirlar Mahkamasiga Tartibning amal qilishini tugatish yuzasidan taklif kiritish.

11. Komissiyaga uning zimmasiga yuklatilgan qo‘shimcha vazifalarni amalga oshirish uchun quyidagi huquqlar berilsin:

idoraviy bo‘ysunuvi va tashkiliy-huquqiy shaklidan qat’i nazar barcha tashkilotlarda koronavirus infeksiyasi tarqalishining oldini olish bo‘yicha amalga oshirilayotgan ishlarni tekshirish hamda nazoratni olib borish;

alohida aholi punktlari va hududlarda karantin tadbirlari hamda karantin joriy etish to‘g‘risida qaror qabul qilish;

idoraviy bo‘ysunuvi va tashkiliy-huquqiy shaklidan qat’i nazar barcha tashkilotlardan hujjatlar talab qilish hamda ularning rahbarlarini koronavirus infeksiyasi tarqalishining oldini olish yuzasidan ko‘rilayotgan chora-tadbirlar, sanitariya-gigiyena tadbirlari va epidemiyaga qarshi chora-tadbirlar bajarilishi to‘g‘risidagi axborotlarini Komissiya majlislarida eshitish;

vazirliklar, idoralar va boshqa tashkilotlar mansabdor shaxslarining aybi (harakati yoki harakatsizligi) bilan koronavirus infeksiyasi avj olishiga yo‘l qo‘yilganda, ularni egallab turgan lavozimidan ozod etish to‘g‘risida yuqori turuvchi tashkilotlarga, shuningdek, ma’muriy yoki jinoiy javobgarlikka tortish to‘g‘risidagi masalani huquqni muhofaza qiluvchi organlarga ko‘rib chiqishi uchun kiritish.

12. Belgilansinki, Komissiyaning o‘z vakolatlari doirasida qabul qilgan qarorlari idoraviy bo‘ysunuvi va tashkiliy-huquqiy shaklidan qat’i nazar barcha tashkilotlar va ularning mansabdor shaxslari, shuningdek, fuqarolar tomonidan bajarilishi majburiy hisoblanadi.

13. Shunday tartib o‘rnatilsinki, unga muvofiq Tartibning amal qilish davrida O‘zbekiston Respublikasi Sog‘liqni saqlash vazirligi va Farmatsevtika tarmog‘ini rivojlantirish agentligi tomonidan taqdim etilgan ro‘yxat bo‘yicha:

O‘zbekiston Respublikasi Davlat bojxona qo‘mitasi, istisno tariqasida, bojxona chegarasi orqali o‘tkazilayotgan zarur dori vositalari, tibbiy buyumlar, tibbiy texnika, ularni ishlab chiqarish uchun ishlatiladigan materiallar va substansiyalar uchun “yashil” yo‘laklar tashkil qiladi va ushbu tovarlarga nisbatan bojxona bojlari undirilmaydi;

dori vositalari, tibbiy buyumlar, tibbiy texnika, ularni ishlab chiqarish uchun ishlatiladigan materiallar va substansiyalar uchun, istisno tariqasida, tenderlar yoki tanlov savdolari o‘tkazmasdan eng yaxshi takliflarni tanlab olish yo‘li bilan to‘g‘ridan-to‘g‘ri shartnomalar tuzishga ruxsat beriladi.

14. O‘zbekiston Respublikasi Moliya vazirligi, Markaziy banki, Bandlik va mehnat munosabatlari vazirligi bilan birgalikda Tartibning amal qilish davrida aholining real daramodlarini barqarorligini ta’minlash maqsadida ishchilarga oylik ish haqlari uzluksiz va o‘z vaqtida to‘lanishini ta’minlab borsin hamda respublikadagi bandlik darajasini tushib ketmaslik bo‘yicha aniq va manzilli chora-tadbirlarni amalga oshirsin.

15. O‘zbekiston Respublikasi Ichki ishlar vazirligi, Mahalla va oilani qo‘llab-quvvatlash vazirligi Sanepidqo‘m bilan birgalikda koronavirus infeksiyasini yuqtirgan yoki ushbu infeksiyani yuqtirganlikda gumon qilinib uy sharoitida karantinga joylashtirilgan shaxslar tomonidan karantin qoidalariga rioya qilinishi ustidan qat’iy va tizimli nazorat o‘rnatsin hamda karantin o‘tash davrida ushbu shaxslarni birinchi navbatdagi oziq-ovqat mahsulotlari, dori vositalari, niqob va tibbiy buyumlar (dezinfeksiya vositalari va boshqalar) bilan ta’minlash choralarini ko‘rsin.

16. O‘zbekiston Respublikasi Ichki ishlar vazirligi, Mudofaa vazirligi, Favqulodda vaziyatlar vazirligi, Davlat xavfsizlik xizmati, Milliy gvardiya Tartibning amal qilish davrida jamoat tartibini saqlash choralarini kuchaytirsin.

17. O‘zbekiston Milliy axborot agentligi, O‘zbekiston Milliy teleradiokompaniyasi, Elektron ommaviy axborot vositalari milliy assotsiatsiyasi O‘zbekiston nodavlat notijorat tashkilotlari milliy assotsiatsiyasi bilan hamkorlikda:

ushbu qarorning maqsad va vazifalari ommaviy axborot vositalari va Internet jahon axborot tarmog‘ida keng tushuntirilishini;

mas’ul vazirlik va idoralarni jalb qilgan holda koronavirus tarqalishi bilan bog‘liq vaziyat hamda joriy etilgan Tartib to‘g‘risida to‘liq va xolisona ma’lumotlarni keng jamoatchilikka muntazam ravishda yetkazib borilishini ta’minlasin.

18. Ushbu qarorning ijrosini nazorat qilish o‘z zimmamda qoldiraman.

1. Mazkur Nizom koronavirus infeksiyasi aniqlanganda yoxud gumon qilinganda davlat organlari va boshqa tashkilotlari tomonidan profilaktik hamda epidemiyaga qarshi chora-tadbirlarni amalga oshirish tartibini belgilaydi.

2. Ushbu Nizomda quyidagi asosiy tushunchalar qo‘llaniladi:

karantin — ma’lum hududni koronavirus infeksiyasi tarqatuvchi manbadan muhofaza qilish va uni yo‘qotishga hamda koronavirus infeksiyasining bir joydan boshqa hududlarga tarqalishiga yo‘l qo‘ymaslikka qaratilgan ma’muriy va sanitariya-epidemiologik tadbirlar majmui;

observator — karantin zonada bemor bilan muloqotda bo‘lmagan sog‘lom kishilarni saqlash uchun moslashtirilgan binolarda (maktab, mehmonxona, ma’muriy binolar, sihatgohlar, bolalarning yozgi dam olish oromgohlari va boshqalarda) tashkil etiladigan maxsus ajratiladigan joy;

gospital — koronavirus infeksiyasini yuqtirganlarni davolash uchun yuqumli kasalliklar shifoxonasi yoki boshqa tibbiyot muassasasi bazasida tashkil etilgan davolash muassasasi;

provizor gospital — koronavirus infeksiyasiga gumon qilingan shaxslarni saqlash va davolash uchun yuqumli kasalliklar shifoxonasi yoki boshqa tibbiyot muassasasi bazasida tashkil etilgan davolash muassasasi;

izolyator — epidemiyaga qarshi rejimni ta’minlash uchun koronavirus infeksiyasi aniqlangan bemor bilan muloqotda bo‘lgan shaxslar joylashtiriladigan yuqumli kasalliklar shifoxonasi yoki boshqa alohida ajratilgan binolarning maxsus jihozlangan xonasi;

sanitariya-karantin punktlari — Davlat chegaralarini quruqlikda (avtomobil va temir yo‘llari), havo va suv yo‘llari orqali kesib o‘tish joylaridagi chegara-bojxona majmualarida tashkil etiladigan ixtisoslashgan profilaktik muassasa.

3. O‘zbekiston Respublikasi Sog‘liqni saqlash vazirligi huzuridagi Sanitariya-epidemiologik osoyishtalik va jamoat salomatligi qo‘mitasi (keyingi o‘rinlarda — Sanepidqo‘m) va uning Qoraqalpog‘iston Respublikasi, viloyatlar va Toshkent shahar boshqarmalari, tuman (shahar) bo‘limlari hamda barcha tibbiyot muassasalari koronavirus infeksiyasiga gumon qilingan bemor aniqlanganda zarur tibbiy-sanitariya chora-tadbirlarini amalga oshirish uchun mas’ul hisoblanadi.

4. Har bir tuman (shahar) tibbiyot birlashmasida koronavirus infeksiyasi aniqlanganda tezkor reja asosida harakatga keltiriladigan maslahat, evakuatsiya va dezinfeksiya guruhlari tashkil etiladi.

5. Koronavirus infeksiyasiga gumon qilingan bemor aniqlanganligi to‘g‘risida xabar kelganda, tuman (shahar) tibbiyot birlashmasi rahbari tomonidan bemorni ko‘rikdan o‘tkazish uchun maslahat-evakuatsiya va dezinfeksiya guruhlari yuboriladi.

6. Bemorni olib ketish uchun haydovchi joyi salondan ajratilgan va zich yopiladigan, maxsus (tez tibbiy yordam) avtotransport vositasi ajratiladi, guruh a’zolari tegishli shaxsiy himoya vositalarini kiygan holda bo‘lishlari shart.

Infeksionist vrach bemorga birlamchi tashxis qo‘yish va ahvolini baholash uchun tibbiy ko‘rikdan o‘tkazadi.

Epidemiolog vrach bemor bilan muloqotda bo‘lganlarni va uning harakatlanish yo‘nalishini aniqlash maqsadida epidemiologik surishtiruv o‘tkazadi.

Dezinfeksiya guruhi infeksiya o‘chog‘ida yakuniy dezinfeksiya tadbirlarini o‘tkazadi. Bemorni olib kelgan avtotransport vositasi maxsus maydonchada dezinfeksiya qilinadi.

7. Bemorda koronavirus infeksiyasiga gumon tashxisi kasallikning klinik belgilari (tana haroratining me’yoridan yuqoriligi, quruq yo‘tal, holsizlanish, nafas siqilishi) va epidemiologik surishtiruv natijalariga asoslanib qo‘yiladi.

8. Epidemiologik surishtiruv jarayonida koronavirus infeksiyasi bo‘yicha epidemik noxush bo‘lgan davlatda yoki hududda bo‘lganligi, shuningdek, yashash yoki ish joyida, safar davomida yuqori nafas yo‘llari infeksiyasi bilan og‘rigan yoki ushbu kasallikdan vafot etgan bemor bilan muloqotda bo‘lganligi aniqlanadi.

9. Chegara bojxona postlaridan o‘tayotgan yo‘lovchilar dastlab sanitariya-karantin punktlarida navbatchi xodimlar tomonidan tibbiy-sanitariya ko‘rigidan o‘tkazilgandan so‘ng chegara va bojxona xizmatlari nazoratidan o‘tkaziladi. Bu jarayonda koronavirus infeksiyasining belgilarini aniqlashga alohida e’tibor qaratiladi.

10. Koronavirus infeksiyasiga gumon qilingan shaxs aniqlanganda bu haqda zudlik bilan Davlat chegarasi orqali o‘tkazish punkti ma’muriyatiga, hududiy tibbiyot birlashmasi va Sanepidqo‘mning hududiy bo‘limiga xabar yetkaziladi.

11. Koronavirus infeksiyasiga gumon qilingan shaxs izolyatsiya qilinadi va zarur hollarda unga birinchi tibbiy yordam ko‘rsatiladi. Bunda maslahat guruhi yetib kelgunga qadar Davlat chegarasi orqali o‘tkazish punkti ma’muriyati tomonidan ushbu punkt faoliyati vaqtinchalik to‘xtatiladi.

12. Sanitariya-karantin punktlari xodimlari shaxsiy himoya vositalaridan foydalangan holda epidemiologik surishtiruv ishlarini o‘tkazib, mazkur shaxs bilan muloqotda bo‘lganlar (yo‘lovchi bilan birga kelgan va yaqin muloqotda bo‘lganlar, chegarachilar, tibbiyot xodimlari va boshqalar)ning ro‘yxatini tuzadilar hamda boshqa zarur ma’lumotlarni (kasallikning boshlanish vaqti, uning yashirin davrida qayerda bo‘lganligi, hududdagi epidemik vaziyat, kasallik belgilarining dinamikasi) aniqlaydilar.

Sanitariya-karantin punktlari xodimlarining keyingi harakatlari maslahat guruhi ko‘rsatmalari asosida olib boriladi.

13. Maslahat guruhi epidemiologik surishtiruv natijalariga qarab, koronavirus infeksiyasiga gumon qilingan bemorni provizor gospital (gospital)ga joylashtirish uchun evakuatsiya guruhini, shuningdek, sanitariya-karantin punktlarida dezinfeksiya ishlarini olib borish uchun dezinfeksiya guruhini chaqirtiradi.

14. Chegaradan kirib kelishda tibbiy-sanitariya tartib-taomillari Xalqaro tibbiy-sanitariya qoidalariga binoan belgilanadi.

15. Koronavirus infeksiyasiga gumon qilingan bemor sanitariya-karantin punktlarida aniqlanganda:

bemor koronavirus infeksiyasiga gumon qilinganda, darhol sanitariya-karantin punkti izolyatoriga joylashtiriladi hamda bu to‘g‘risida ushbu Nizomga ilovada belgilangan tartibda Sanepidqo‘mning tuman (shahar) bo‘limi rahbariga xabar beriladi;

sanitariya-karantin punktlarining tibbiyot xodimi shaxsiy himoya vositalarini (kombinezon, etik, tibbiy niqob, ko‘zoynak va qo‘lqop) kiygan holda tegishli tadbirlarni davom ettiradi;

Sanepidqo‘mning tuman (shahar) bo‘limi rahbari infeksiya o‘chog‘iga shaxsiy himoya vositalari va texnika bilan ta’minlangan evakuatsiya (infeksionist, epidemiolog, shoshilinch tibbiy yordam xizmati vrachi va o‘rta tibbiyot xodimi) hamda dezinfeksiya (dezinfeksiya shifokori va dezinfektor) guruhlarini yuboradi;

epidemiolog vrach epidemiologik surishtiruv ishlarini olib boradi hamda bemor bilan muloqotda bo‘lganlarni aniqlaydi;

dezinfeksiya guruhi infeksiya o‘chog‘ida yakuniy dezinfeksiya tadbirlarini o‘tkazadi;

evakuatsiya guruhi bemorni boks palatalari bo‘lgan maxsus ajratilgan yuqumli kasalliklar shifoxonasiga olib boradi;

tibbiyot muassasasi xodimlari bemordan laboratoriya tekshiruvi o‘tkazish uchun namunalar oladi va virusologiya laboratoriyasiga yuboradi.

16. Koronavirusga gumon qilingan bemor uyda aniqlanganda:

tibbiyot xodimi bemorni uyida tibbiy ko‘rikdan o‘tkazib, koronavirus infeksiyasiga gumon qilgan hollarda, ushbu Nizomga ilovada belgilangan tartibda darhol o‘zi ishlayotgan tibbiyot muassasasi rahbariga, rahbar esa, Sanepidqo‘mning tuman (shahar) bo‘limi hamda tuman (shahar) tibbiyot birlashmasiga xabar beradi;

tuman (shahar) tibbiyot birlashmasi rahbari infeksiya o‘chog‘iga kombinezon, etik, tibbiy niqob, ko‘zoynak va qo‘lqopdan iborat shaxsiy himoya vositalari bilan ta’minlangan tibbiyot xodimlari guruhini va tez tibbiy yordam mashinasini yuboradi;

Sanepidqo‘mning tuman (shahar) bo‘limi bosh vrachi bemorning uyiga tuman epidemiolog vrachi va dezinfeksion guruhni yuboradi;

epidemiolog vrach epidemiologik surishtiruv ishlarini olib boradi hamda bemor bilan muloqotda bo‘lganlarni va bemorning harakatlanish yo‘nalishini aniqlaydi;

dezinfeksiya guruhi infeksiya o‘chog‘ida yakuniy dezinfeksiya tadbirlarini o‘tkazadi;

bemordan laboratoriya tekshiruvi o‘tkazish uchun namunalar tibbiyot muassasalari tomonidan olinib, virusologiya laboratoriyasiga yuboriladi.

17. Koronavirus infeksiyasiga gumon qilingan bemor tibbiyot muassasasida aniqlanganda:

tibbiyot muassasasiga murojaat qilgan barcha bemorlar muassasaga kirish eshigi oldida yoki qabul bo‘limida filtrdan o‘tkaziladi, tana harorati yuqori, nafas siqishi hamda yo‘talga shikoyati aniqlanganlar izolyatorga joylashtiriladi;

koronavirus infeksiyasiga gumon qilingan bemor aniqlanganda, shifokor boshqa bemorlarni qabul qilishni to‘xtatadi va ushbu Nizomga ilovada belgilangan tartibda zudlik bilan bemor haqida tibbiyot muassasasi rahbariga, u esa, Sanepidqo‘mning tuman (shahar) bo‘limiga xabar beradi hamda Sog‘liqni saqlash vazirligi tomonidan tasdiqlanadigan shakldagi shoshilinch xabarnoma yuboradi;

Sanepidqo‘mning tuman (shahar) bo‘limi boshlig‘i bemorning uyiga tuman epidemiolog vrachi va dezinfeksiya guruhini yuboradi;

bemorni qabul qilayotgan shifokor shaxsiy himoya vositalarini kiyib, evakuatsiya va dezinfeksiya guruhlari kelgunga qadar davolash profilaktika muassasasida qoladi;

dezinfeksiya guruhi yoki tibbiyot muassasasi o‘zining ichki imkoniyatlaridan kelib chiqqan holda infeksiya o‘chog‘ida joriy dezinfeksiya tadbirlarini o‘tkazadi;

dezinfeksiya guruhi bemorning uyida yakuniy dezinfeksiya tadbirlarini o‘tkazadi;

bemorga aniq birlamchi tashxis qo‘yish maqsadida infeksionist vrach uni ko‘rikdan o‘tkazadi va surishtiruv ishlarini olib boradi, bemor ko‘rikdan o‘tkazilganidan keyin, evakuatsiya guruhi uni boks palatalari bo‘lgan maxsus ajratilgan yuqumli kasalliklar shifoxonasiga olib ketadi;

bemor bilan muloqotda bo‘lgan tibbiyot xodimlari va bemorning oila a’zolari bemor alohidalangan kundan boshlab, 14 kun davomida karantinga olinadi, agar ular orasida koronavirus infeksiyasining belgilari paydo bo‘lsa, ular gospitalga yotkaziladi;

bemorni olib kelgan avtotransport vositasi yuqumli kasalliklar shifoxonasining maxsus maydonchasida dezinfeksiya qilinadi;

bemordan laboratoriya tekshiruvi o‘tkazish uchun namunalar olinib, virusologiya laboratoriyasiga yuboriladi.

18. Koronavirus infeksiyasini yuqtirish xavfi darajasiga qarab, koronavirus infeksiyasi aniqlangan shaxslar bilan yaqin muloqotda va muloqotda bo‘lgan shaxslarga bo‘linadi.

19. Koronavirus infeksiyasi aniqlangan shaxslar bilan yaqin muloqotda bo‘lgan shaxslar doirasiga quyidagilar kiradi:

koronavirus infeksiyasi aniqlangan shaxs bilan bitta xonadonda yashagan shaxslar;

koronavirus infeksiyasi aniqlangan shaxs bilan bevosita jismoniy muloqotda (qo‘l siqish, quchoqlashish) bo‘lgan shaxs;

koronavirus infeksiyasi aniqlangan shaxs bilan muloqotda (masalan, yo‘talayotganda) himoyalanmagan shaxslar;

koronavirus infeksiyasi aniqlangan shaxs bilan 2 metrdan kam masofada 15 daqiqadan ko‘proq vaqt davomida yuzma-yuz bo‘lgan shaxslar;

15 daqiqa yoki undan ko‘proq vaqt 2 metrdan kam masofada koronavirus infeksiyasi aniqlangan shaxs bilan birga yopiq joyda (sinf xonasida, yig‘ilish xonasida, kasalxona kutish xonasida va boshqalar) bo‘lgan shaxslar;

tibbiy mutaxassis yoki koronavirus infeksiyasi aniqlangan shaxsni bevosita parvarishlashni amalga oshiruvchi boshqa shaxs yoki shaxsiy himoya vositalarisiz yoki ulardan foydalanish qoidalarini buzgan holda koronavirus infeksiyasi aniqlangan shaxsning bionamunalari bilan ishlagan laboratoriya mutaxassislari;

samolyotda, shaharlararo avtobusda, poyezdda koronavirus infeksiyasi aniqlangan shaxsdan har qanday yo‘nalishda ikki o‘rindiq oralig‘ida yoki bitta kupeda (poyezdda) bo‘lgan, shuningdek, koronavirus infeksiyasi aniqlangan shaxs uchib ketgan samolyotda xizmat ko‘rsatgan ekipaj a’zolari.

20. Koronavirus infeksiyasi aniqlangan shaxslar bilan yaqin muloqotda bo‘lgan shaxslar provizor gospital yoki izolyatorga joylashtiriladi.

21. Koronavirus infeksiyasi aniqlangan shaxslar bilan muloqotda bo‘lgan shaxslar doirasiga koronavirus infeksiyasi aniqlangan shaxslar bilan bir samolyotda, poyezdda, avtobusda bo‘lgan, ammo ular bilan yaqin muloqot qilmagan shaxslar kiradi.

22. Koronavirus infeksiyasi aniqlangan shaxslar bilan muloqotda bo‘lgan shaxslar uy karantinida saqlanadilar.

23. Koronavirus infeksiyasi aniqlangan shaxslar bilan muloqotda bo‘lgan shaxslarning yashash joyida uy sharoitida izolyatsiya qilish uchun sharoitlar bo‘lmagan taqdirda, ularning karantinga olinishi mahalliy hokimliklar tomonidan ta’minlanadi.

24. Koronavirus infeksiyasini yuqtirgan yoki ushbu infeksiyani yuqtirganlikda gumon qilinib karantinga joylashtirilgan shaxslarga tegishli bo‘lgan mobil telefon, audio va video vositalar, kredit kartalari hamda boshqa axborot tashuvchi buyumlar vaqtincha olib qo‘yiladi.

Bunda vaqtinchalik olib qo‘yilgan buyumlar shaxs infeksiya yuqishi mumkin bo‘lgan davrda muloqotda bo‘lgan shaxslar va borgan joylarini aniqlash maqsadida o‘rganiladi.

Vaqtinchalik olib qo‘yilgan buyumlar shaxs davolash muassasasidan chiqayotgan vaqtda o‘ziga qaytarib beriladi yoki uning yaqin qarindoshlari yoxud vakillariga topshiriladi.

Vaqtinchalik olib qo‘yilgan buyumlarni saqlash (qo‘riqlash) tegishli davolash muassasasi tomonidan ichki ishlar organlari va Milliy gvardiya bo‘linmalari bilan birgalikda tashkillashtiriladi.

25. Koronavirus infeksiyasi aniqlangan shaxslar hamda ular bilan yaqin muloqotda va muloqotda bo‘lgan shaxslarni karantinda saqlash muassasalariga yetkazish maxsus transport vositalarida (avtobus, mikroavtobus) amalga oshiriladi, bunda haydovchi o‘rindig‘i salondan ajratilishi, dezinfeksiya jihozlarlari va uskunalari, himoya niqoblari, tibbiy chiqindilarni bir martalik yig‘ish vositalari bilan ta’minlanishi lozim.

26. Maxsus transport vositalari har bir tashishdan oldin va keyin maxsus ajratilgan maydonchada yuviladi va dezinfeksiyalanadi, ishchilarning himoya va ish kiyimlari tashish yakuniga ko‘ra rejim bo‘yicha dezinfeksiya qilinadi.

27. Gospitalda, provizor gospitalda va izolyatorda har kuni joriy dezinfeksiya, ular bo‘shatilgandan keyin esa yakuniy dezinfeksiya ishlari olib borilishi kerak.

28. Karantin joyida muloqotda bo‘lgan shaxslarni, tashrif buyuruvchilar, transport vositalari kirishlari va chiqishlari, buyumlar, mahsulotlar va boshqalarni olib kirishni va olib chiqishni qat’iy nazorat qilish uchun Ichki ishlar vazirligi va Milliy gvardiya tomonidan kechayu-kunduz qo‘riqlanadi.

29. Koronavirus infeksiyasi aniqlangan shaxslar bilan muloqotda bo‘lib, karantinda saqlanayotgan shaxslar orasida koronavirus infeksiyasi bor boshqa shaxs aniqlansa, u gospitalga olinadi hamda qolgan shaxslar uchun karantin muddati qaytadan boshlanadi.

30. Koronavirus infeksiyasi aniqlangan shaxslar bilan muloqotda bo‘lib, karantinda saqlanayotgan shaxslar orasida karantin muddatida koronavirus infeksiyasi bor shaxslar aniqlanmasa ular davolash muassasasidan chiqariladi.

31. Koronavirus infeksiyasi aniqlangan shaxslar davolash muolajalaridan so‘ng koronavirus infeksiyasidan tuzalsa hamda bu tegishli laboratoriya tekshiruvlari natijalari bilan tasdiqlansa, shaxs davolash muassasasidan chiqariladi.

32. Bemor uyiga javob berilishi oldidan u sanitariya ishlovidan o‘tkaziladi. Gospitalda bemorlarning uyiga javob berish tartibi yuqumli kasalliklar bo‘yicha Sog‘liqni saqlash vazirligining tegishli buyruqlari asosida amalga oshiriladi.

33. Karantin davrida tashkil etilgan gospital, provizor gospital, izolyator va observator kabi muassasalar faoliyati Respublika, Qoraqalpog‘iston Respublikasi, viloyatlar va Toshkent shaxar epidemiyaga qarshi kurash favqulodda komissiyalarining tegishli qarori bilan tugatiladi.

34. Mazkur Nizom talablarining buzilishida aybdor bo‘lgan shaxslar qonun hujjatlarida belgilangan tartibda javob beradilar.