Siyosiy, savdo-iqtisodiy va madaniy-gumanitar sohalarda ikki tomonlama va koʻp tomonlama hamkorlikning ustuvor yoʻnalishlarini yanada ilgari surish va amalga oshirish, shuningdek, Oʻzbekiston Respublikasi fuqarolarining huquqlari va qonuniy manfaatlarini samarali himoya qilishni taʼminlash maqsadida:

1. 2020-yilning 1-fevralidan Oʻzbekiston Respublikasining BMT huzuridagi Doimiy vakolatxonasi (keyingi oʻrinlarda — Doimiy vakolatxona) va Oʻzbekiston Respublikasining Nyu-York shahridagi (AQSH) Bosh konsulxonasi (keyingi oʻrinlarda — Bosh konsulxona) shtatlar jadvaliga mehnatga haq toʻlash fondini tegishli ravishda oʻzgartirgan holda tegishlicha haydovchi-mexanik va birinchi kotib qoʻshimcha lavozimlari kiritilsin.

2. Oʻzbekiston Respublikasining BMT huzuridagi Doimiy vakolatxonasi va Oʻzbekiston Respublikasining Nyu-York shahridagi Bosh konsulxonasi yangilangan shtatlar jadvallari 1 va 2-ilovalarga muvofiq tasdiqlansin.

3. Oʻzbekiston Respublikasi Tashqi ishlar vazirligi Doimiy vakolatxona va Bosh konsulxonaning 2020-yildagi taʼminoti uchun xarajatlar smetasini shtat jadvallaridagi oʻzgarishlarni hisobga olgan holda belgilangan tartibda tasdiqlasin.

4. Oʻzbekiston Respublikasi Moliya vazirligi Doimiy vakolatxona va Bosh konsulxona xarajatlarini shtat jadvallaridagi oʻzgarishlarni inobatga olgan holda joriy moliya yilining budjetida xorijdagi muassasalarni moliyalashtirish boʻyicha tasdiqlangan mikdorlar doirasida moliyalashtirsin.

5. Oʻzbekiston Respublikasi Prezidentining 2019-yil 14-maydagi “Oʻzbekiston Respublikasi Tashqi ishlar vazirligi, xorijdagi diplomatik vakolatxonalari va konsullik muassasalarining faoliyatini yanada takomillashtirish chora-tadbirlari toʻgʻrisida”gi PQ-4318-son qarorining 28-ilovasi va Oʻzbekiston Respublikasi Vazirlar Mahkamasining 1996-yil 8-oktabrdagi “Oʻzbekiston Respublikasi Vazirlar Mahkamasining 1994-yil 7-apreldagi 192-son qaroriga qoʻshimchalar va oʻzgartirishlar kiritish toʻgʻrisida”gi 353-son qarorining 5 va 6-ilovalari oʻz kuchini yoʻqotgan deb hisoblansin.

6. Mazkur qarorning ijrosini nazorat qilish Oʻzbekiston Respublikasi Prezidenti huzuridagi Xavfsizlik kengashi kotibi V.V. Maxmudov va Oʻzbekiston Respublikasi tashqi ishlar vaziri A.X. Kamilov zimmasiga yuklansin.