Oʻzbekiston Respublikasi Oliy Majlisi Qonunchilik palatasining 2016-yil 28-oktabrdagi “Oʻzbekiston Respublikasining 2017-yilgi Davlat budjeti, davlat maqsadli jamgʻarmalarining budjetlari hamda soliq va budjet siyosatining asosiy yoʻnalishlari toʻgʻrisida”gi 618-III-sonli va shu haqidagi Oʻzbekiston Respublikasi Oliy Majlisi Senatining 2016-yil 13-dekabrdagi SQ-122-III-sonli hamda xalq deputatlari Surxondaryo viloyati Kengashining 2016-yil 28-dekabrdagi “Surxondaryo viloyatining 2016-yilgi mahalliy budjeti ijrosi va 2017-yil mahalliy budjeti asosiy koʻrsatkichlari toʻgʻrisida”gi 76/5-13-son qarorlariga asosan xalq deputatlari Angor tuman Kengashi qaror qiladi:

1. Xalq deputatlari Surxondaryo viloyati Kengashining 2016-yil 28-dekabrdagi “Surxondaryo viloyatining 2016-yilgi mahalliy budjeti ijrosi va 2017-yil mahalliy budjeti asosiy koʻrsatkichlari toʻgʻrisida”gi 76/5-13-sonli qarori maʼlumot va ijro uchun qabul qilinsin.

2. Angor tuman boʻyicha 2017-yil mahalliy budjet daromadlarining reja koʻrsatgichlari 1-ilovaga* muvofiq, mahalliy budjeting asosiy koʻrsatgichlari 2-ilovaga* muvofiq tasdiqlansin.

3. Angor tuman hokimining ijtimoiy-iqtisodiy masalalar boʻyicha oʻrinbosari (A. Raxmatov), tuman Davlat soliq inspeksiyasi (F. Qurbonov) va Moliya boʻlimi (Q. Xoʻjaqulov) tuman mahalliy budjeti daromadlar qismini soliq turlari boʻyicha belgilangan rejalarini oshirib bajarilishini taʼminlasin.

4. Angor tumani hokimligi moliya boʻlimi (Q. Xoʻjaqulov)ga:

2017-yilning “Xalq bilan muloqat va inson manfaatlari yili” deb eʼlon qilinishi munosabati bilan viloyat mahalliy budjetining 2017-yil davomida mahalliy budjet xarajatlarini maqbullashtirish natijasida shakllanadigan qoʻshimcha manbalar hisobidan tumanni ijtimoiy-iqtisodiy rivojlantirish borasidagi chora-tadbirlarni amalga oshirish uchun zarur tuzatishlar kiritib borish;

budjetdan mablagʻ oluvchilarning budjetdan mablagʻ bilan taʼminlanish asoslari mavjudligini muntazam tahlil qilib borish hamda budjet mablagʻlaridan saqlanish asoslari mavjud boʻlmagan hamda ajratilgan budjet mablagʻlarining natijadorligiga erishilmayotgan budjet muassasalarini qisqartirish yuzasidan viloyat hokimligiga va tegishli viloyat boshqarmalariga muntazam ravishda taklif kiritish;

gʻaznachilik organlari bilan birgalikda budjet mablagʻlaridan maqsadli foydalanilishi va ularning asossiz sarflanishini bartaraf etish ustidan qatʼiy nazorat oʻrnatish.

Xalq deputatlari Angor tumani Kengashiga mahalliy budjetning ijrosi toʻgʻrisida har chorakda axborot berib borish vazifasi yuklatilsin.

5. Angor tuman hokimining ijtimoiy-iqtisodiy masalalar boʻyicha oʻrinbosari (A. Raxmatov) tegishli mutasaddi tashkilotlar bilan birgalikda budjet daromadlarining tasdiqlangan koʻrsatgichlari bajarilishi, mintaqalarning soliq solish bazasi kengaytirilishi va moliyaviy salohiyati mustahkamlanishi yuzasidan zaruriy chora-tadbirlari koʻrsinlar, budjet mablagʻlaridan maqsadli foydalanishi ustidan qatʼiy nazorat oʻrnatsinlar.

6. Ushbu qaror ijrosini nazorat qilish xalq deputatlari Angor tuman Kengashining mahalliy budjetni shakllantirish va ijro etish, iqtisodiy islohotlarni amalga oshirish va tadbirkorlikni rivojlantirish masalalari boʻyicha doimiy komissiyasi (Sh. Shonazarov)ga yuklansin.

7. Mazkur qaror rasman eʼlon qilingan kundan kuchga kiradi.