16 yoshga toʻlmagan Oʻzbekiston Respublikasi fuqarolarining chet elga vaqtincha chiqishlari tartibini soddalashtirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasining 16 yoshga toʻlmagan fuqarosi guvohnomasini rasmiylashtirish va berish tartibi toʻgʻrisidagi Nizom 1-ilovaga muvofiq;

Oʻzbekiston Respublikasining 16 yoshga toʻlmagan fuqarosi guvohnomasi namunasi 2-ilovaga* muvofiq tasdiqlansin.

2. Oʻzbekiston Respublikasi Markaziy banki huzuridagi “Davlat belgisi” davlat ishlab chiqarish birlashmasi Oʻzbekiston Respublikasi Ichki ishlar vazirligining buyurtmanomasiga koʻra Oʻzbekiston Respublikasining 16 yoshga toʻlmagan fuqarolari guvohnomalari tayyorlab berilishini taʼminlasin.

3. Oʻzbekiston Respublikasi Moliya vazirligi Oʻzbekiston Respublikasining 16 yoshga toʻlmagan fuqarolari guvohnomalarini tayyorlash uchun zarur pul mablagʻlari ajratsin.

4. Oʻzbekiston Respublikasining 16 yoshga toʻlmagan fuqarosi guvohnomasini berganlik uchun eng kam oylik ish haqining 30 foizi miqdorida davlat boji undiriladi.

5. Oʻzbekiston Respublikasining 16 yoshga toʻlmagan fuqarolarining chet elga chiqishlari masalalarini koʻrib chiqish va hal etish Oʻzbekiston Respublikasi Prezidentining 1999-yil 26-fevraldagi PF-2240-son* Farmoni bilan tashkil etilgan Qoraqalpogʻiston Respublikasi Vazirlar Kengashi, viloyatlar hokimliklari huzuridagi maxsus komissiyalarga yuklansin.

6. Manfaatdor vazirliklar va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda oʻz meʼyoriy hujjatlarini mazkur qarorga muvofiqlashtirsinlar.

7. Mazkur qarorning bajarilishini nazorat qilish Ichki ishlar vaziri Z. Almatov, Tashqi ishlar vaziri A. Komilov, Qoraqalpogʻiston Respublikasi Vazirlar Kengashi Raisi, viloyatlar hokimlari zimmasiga yuklansin.

1. Mazkur Nizom Oʻzbekiston Respublikasi Prezidentining 1999-yil 26-fevraldagi PF-2240-son Farmoni bilan tasdiqlangan Oʻzbekiston Respublikasida pasport tizimi toʻgʻrisidagi Nizomga va Oʻzbekiston Respublikasi Vazirlar Mahkamasining “Oʻzbekiston Respublikasi fuqarolarining chet elga borishlari tartibini va Oʻzbekiston Respublikasining diplomatik pasporti toʻgʻrisidagi Nizomni tasdiqlash haqida” 1995-yil 6-yanvardagi 8-son qaroriga muvofiq ishlab chiqilgan. Nizom Oʻzbekiston Respublikasining 16 yoshga toʻlmagan fuqarosi chet elga vaqtincha chiqishida guvohnomani rasmiylashtirish va berish tartibini nazarda tutadi.

2. 16 yoshga toʻlmagan fuqarolar oʻqish, davolanish, yoshlarning xalqaro festivallarida va sport musobaqalarida qatnashish uchun chet elga chiqishlarida ularning ota-onalari, vasiylari (homiylari), tashkilotlar va muassasalar Qoraqalpogʻiston Respublikasi Vazirlar Kengashi, viloyatlar hokimliklari huzuridagi maxsus komissiyalarga chet elga borayotgan fuqaro va uning ota-onalari toʻgʻrisidagi maʼlumotlar koʻrsatilgan ariza beradilar.

Komissiya 7 kun muddatda taqdim etilgan hujjatlarni oʻrganib chiqadi va tegishli qaror qabul qiladi. Maxsus komissiyaning qarori va 16 yoshga toʻlmagan Oʻzbekiston Respublikasining chet elga chiqayotgan fuqarolari roʻyxati chiqish hujjatlarini rasmiylashtirish uchun Oʻzbekiston Respublikasi Ichki ishlar vazirligi, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalariga joʻnatiladi.

Oʻzbekiston Respublikasi Ichki ishlar vazirligining Xorijga chiqish, kirish va fuqarolik xizmati boʻlinmalari taqdim etilgan anketa-ariza, buyurtmanoma, Tugʻilganlik toʻgʻrisida guvohnoma asosida voyaga yetmagan shaxsni vaqtincha chet elga chiqish uchun Oʻzbekiston Respublikasining 16 yoshga toʻlmagan fuqarosi guvohnomasi bilan 7 kun muddatda taʼminlaydi.

3. Guvohnoma ota-onalarga, vasiylarga (homiylarga), tashkilotlar, muassasalar vakillariga beriladi, ulardan voyaga yetmagan shaxs chet eldan qaytgandan soʻng guvohnoma ichki ishlar organlariga topshirilishi toʻgʻrisida tilxat olinadi. Voyaga yetmagan shaxsning Tugʻilganlik toʻgʻrisida guvohnomasi Oʻzbekiston Respublikasining 16 yoshga toʻlmagan fuqarosi guvohnomasi ichki ishlar organlariga topshirilgunga qadar Xorijga chiqish, kirish va fuqarolik xizmati boʻlinmasida saqlanadi.

4. Oʻzbekiston Respublikasining 16 yoshga toʻlmagan fuqarosi guvohnomasi chet elda Oʻzbekiston Respublikasi fuqarosi shaxsini tasdiqlovchi hujjat hisoblanadi va dunyoning barcha mamlakatlariga chiqish uchun haqiqiydir.

5. Guvohnoma Oʻzbekiston Respublikasi Ichki ishlar vazirligining buyurtmanomasiga koʻra Oʻzbekiston Respublikasi Markaziy banki huzuridagi “Davlat belgisi” davlat ishlab chiqarish birlashmasida qalbakilashtirishdan himoya qilish elementlari boʻlgan maxsus qogʻozda 86 mm. x 125 mm. kattalikda 16 betdan iborat qilib tayyorlanadi.

6. Guvohnoma qatʼiy hisobda turadigan blank hisoblanadi va seriyalari va tartib raqamlariga koʻra viloyatlar boʻyicha tayyorlanadi.

7. Guvohnomaning muqovasi Oʻzbekiston Respublikasi Davlat gerbi tasvirlangan va “Oʻzbekiston Respublikasining 16 yoshga toʻlmagan fuqarosi guvohnomasi” soʻzlari oʻzbek va ingliz tillarida oltin harflar bilan botirib yozilgan yashil rangda boʻladi. Muqova maxsus kimyoviy mato bilan himoyalanadi.

8. Guvohnoma Oʻzbekiston Respublikasi ichki ishlar organlari tomonidan oʻzbek, rus va ingliz (Qoraqalpogʻiston Respublikasida ham qoraqalpoq tilida) tillarida toʻldiriladi. Guvohnomaga quyidagi maʼlumotlar kiritiladi:

a) familiyasi, ismi, otasining ismi;

b) tugʻilgan vaqti;

v) tugʻilgan joyi;

g) millati;

d) jinsi;

e) guvohnomaning amal qilish muddati;

j) fuqaroning shaxsiy kodi;

z) guvohnoma kim tomonidan va qachon berilganligi;

i) dunyoning barcha mamlakatlariga borish uchun haqiqiyligi toʻgʻrisida belgi;

k) alohida belgilar (qon rezusi va boshqa maʼlumotlar);

l) vizalar toʻgʻrisida;

m) axborot maʼlumotlari va shaxsiy maʼlumotlar.

“a”—“z” kichik bandlarida sanab oʻtilgan maʼlumotlar hamda fuqaroning 35 x 45 mm kattalikdagi fotosurati guvohnomaning uchinchi betiga yoziladi va yopishtiriladi hamda maxsus plyonka bilan himoyalanadi, fotosuratning chetlari botirib mahkamlanadi.

9. Vaqtincha chet elga chiqish uchun Oʻzbekiston Respublikasining 16 yoshga toʻlmagan fuqarosi guvohnomasini olish uchun ota-onalar, vasiylar (homiylar), tashkilot va muassasalarning vakillari Oʻzbekiston Respublikasi ichki ishlar organlarining xorijga chiqish, kirish va fuqarolik xizmati boʻlinmalariga quyidagi hujjatlarni taqdim etadilar:

tugʻilganlik toʻgʻrisida guvohnoma;

35 x 45 mm kattalikdagi oq-qora yoki rangli toʻrtta fotosurat;

belgilangan shakldagi ariza-anketa;

tashkilot yoki muassasaning belgilangan namunadagi buyurtmanomasi;

voyaga yetmagan shaxsning chet elga chiqishi uchun ota-onalar, vasiylar (homiylar)ning notarial tasdiqlangan roziligi;

voyaga yetmagan shaxsga hamrohlik qiluvchi shaxsning notarial tasdiqlangan majburiyatlari.

Guvohnomani rasmiylashtirish jarayonida bolaning millati ota-onalarning millatiga koʻra belgilanadi. Agar ota-onalar turli millatga mansub boʻlsalar, unda guvohnoma berishda voyaga yetmagan shaxsning millati guvohnoma oluvchining xohishiga qarab ota yoki onaning millati yoziladi.

10. Guvohnoma Oʻzbekiston Respublikasi Ichki ishlar vazirligi, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari va Toshkent shahar Ichki ishlar bosh boshqarmasining Xorijga chiqish, kirish va fuqarolik xizmati boʻlinmalari tomonidan beriladi.

11. Guvohnoma Oʻzbekiston Respublikasi Ichki ishlar vazirligi, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari va Toshkent shahar Ichki ishlar bosh boshqarmasining Xorijga chiqish, kirish va fuqarolik xizmati boʻlinmasi boshligʻi yoki uning oʻrinbosari tomonidan imzolanadi va viza muhri bilan tasdiqlanadi.

12. Guvohnoma uch oy muddatga, chet elga oʻqish yoki davolanish uchun chiqishda esa oʻqish yoki davolanish muddatiga beriladi. Zarur boʻlgan hollarda (davolanish muddati uzaytirilganda, yaqin qarindoshlar vafoti va boshqalar) mazkur guvohnomaning amal qilishi Oʻzbekiston Respublikasining chet eldagi diplomatik vakolatxonasida yoki konsullik muassasasida muayyan muddatga uzaytirilishi mumkin. Bunday hollarda Oʻzbekiston Respublikasining chet eldagi diplomatik vakolatxonasi yoki konsullik muassasasining masʼul xodimi guvohnomaning oltinchi betidagi “maʼlumotlar” jadvaliga oʻzbek va ingliz tillarida tegishli yozuvni kiritib qoʻyadi. Yozuv elchi yoki konsul tomonidan imzolanadi va muhr bilan tasdiqlanadi.

Chet elda boʻlgan vaqtda guvohnoma egasi oʻn olti yoshga toʻlishi bilan mazkur shaxs Oʻzbekiston Respublikasining chet eldagi vakolatxonasiga yoki konsullik muassasasiga Oʻzbekiston Respublikasi fuqarosi pasportini berish toʻgʻrisidagi ariza bilan murojaat qiladi. Mazkur ariza belgilangan tartibda rasmiylashtiriladi va Oʻzbekiston Respublikasi Tashqi ishlar vazirligi orqali Ichki ishlar vazirligiga yuboriladi. Rasmiylashtirilgan pasport Tashqi ishlar vazirligi tomonidan Oʻzbekiston Respublikasining diplomatik vakolatxonasiga yoki konsullik muassasasiga uning egasiga topshirish uchun joʻnatiladi. Oʻzbekiston Respublikasi fuqarosi pasporti topshirilgandan soʻng guvohnoma belgilangan tartibda yoʻq qilinishi uchun Ichki ishlar vazirligiga yuboriladi.

13. Guvohnoma egasi uni ehtiyotlik bilan saqlashi kerak. Guvohnoma oʻgʻirlatib yoki yoʻqotib qoʻyilgan hollarda uning egasi Oʻzbekiston Respublikasi Ichki ishlar vazirligi, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari va Toshkent shahar Ichki ishlar bosh boshqarmasining Xorijga chiqish, kirish va fuqarolik xizmati boʻlinmalariga yoxud Oʻzbekiston Respublikasining chet eldagi diplomatik vakolatxonasiga yoki konsullik muassasasiga zudlik bilan xabar berishi kerak.

Fuqaroning yozma holdagi arizasiga koʻra belgilangan tartibda unga yangi guvohnoma yoki Oʻzbekiston Respublikasiga qaytib kelish uchun sertifikat beriladi.

14. Guvohnoma yoʻqotib qoʻyilganligi toʻgʻrisidagi xabar Oʻzbekiston Respublikasi Davlat xavfsizlik xizmatiga yuboriladi.

15. Vafot etgan voyaga yetmagan shaxslarning guvohnomalari Oʻzbekiston Respublikasi Ichki ishlar vazirligi, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari va Toshkent shahar Ichki ishlar bosh boshqarmasining Xorijga chiqish, kirish va fuqarolik xizmati boʻlinmalariga yoxud Oʻzbekiston Respublikasining chet eldagi diplomatik vakolatxonasiga yoki konsullik muassasasiga topshiriladi.

16. Topilgan guvohnomalar ichki ishlar organlariga yoxud Oʻzbekiston Respublikasining chet eldagi diplomatik vakolatxonalariga yoki konsullik muassasalariga topshirilishi kerak.

17. Guvohnomalarni olib qoʻyish (Oʻzbekiston Respublikasi qonun hujjatlarida nazarda tutilgan hollar bundan mustasno), shuningdek garovga qoʻyish va boshqa shaxslarga berish taqiqlanadi.

18. Guvohnoma berganlik uchun fuqarolardan eng kam oylik ish haqining 30 foizi miqdorida davlat boji undiriladi. Davlat taʼminotida boʻlgan fuqarolar davlat boji toʻlashdan ozod qilinadilar.

19. Mazkur Nizomni amalga oshirish uchun zarur boʻlgan gerbli muhrlar va viza muhrlari, shtamplar va blanklarning namunalari Oʻzbekiston Respublikasi Ichki ishlar vazirligi tomonidan belgilanadi.