Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid Davlat dasturi toʻgʻrisida” 2019-yil 17-yanvardagi PF-5635-son Farmoni hamda “Oʻzbekiston Respublikasi Prezidentining ayrim qarorlariga oʻzgartishlar kiritish toʻgʻrisida” 2018-yil 21-noyabrdagi PQ-4023-son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga yuklansin.

1. Vazirlar Mahkamasining “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasining Mehnat kodeksiga oʻzgartish va qoʻshimchalar kiritish haqida”gi Oʻzbekiston Respublikasi Qonunini amalga oshirish uchun zarur boʻlgan normativ-huquqiy hujjatlarni tasdiqlash haqida” 2011-yil 7-apreldagi 107-son qarorida (Oʻzbekiston Respublikasi QT, 2011-y., 4-son, 27-modda):

a) 1-bandning uchinchi xatboshisi quyidagi tahrirda bayon etilsin:

“Pensiya tayinlash uchun zarur boʻlgan ish stajiga ega boʻlmagan qariyalarga, mehnatga layoqatsiz fuqarolarga hamda bolalikdan nogironligi boʻlgan farzandi bor onalarga nafaqalar tayinlash va toʻlash tartibi toʻgʻrisidagi nizom 2-ilovaga muvofiq tasdiqlansin”;

b) 2-ilovada:

Nizomning nomlanishi quyidagi tahrirda bayon etilsin:

“Pensiya tayinlash uchun zarur boʻlgan ish stajiga ega boʻlmagan qariyalarga, mehnatga layoqatsiz fuqarolarga hamda bolalikdan nogironligi boʻlgan farzandi bor onalarga nafaqalar tayinlash va toʻlash tartibi toʻgʻrisida nizom”;

1-bandning birinchi xatboshisi quyidagi tahrirda bayon qilinsin:

“1. Ushbu Nizom “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq davlat pensiyasini tayinlash uchun zarur boʻlgan ish stajiga ega boʻlmagan qariyalarga, mehnatga layoqatsiz fuqarolarga va bolalikdan nogironligi boʻlgan farzandi bor onalarga har oylik nafaqalar (keyingi oʻrinlarda nafaqa deb ataladi) tayinlash va toʻlash tartibini belgilaydi.”;

6-band quyidagi tahrirda bayon qilinsin:

“6. Yoshga doir nafaqa:

erkaklarga — 65 yoshga yetganlarida;

ayollarga — 60 yoshga yetganlarida;

bolalikdan nogironligi boʻlgan farzandi bor onalarga — 55 yoshga yetganlarida tayinlanadi.”;

8-bandda:

birinchi xatboshiga “Ish stajiga ega boʻlmagan shaxsga” soʻzlaridan keyin “(bolalikdan nogironligi boʻlgan farzandi bor onalardan tashqari)” soʻzlari qoʻshilsin;

quyidagi mazmundagi xatboshi qoʻshilsin:

“Bolalikdan nogironligi boʻlgan farzandi bor onalarga yoshga doir nafaqa farzandi bolalikdan nogiron deb eʼtirof etilganligi toʻgʻrisida Tibbiy-maslahat komissiyasining (keyingi oʻrinlarda TMK deb yuritiladi) tibbiy xulosasi yoki Tibbiy mehnat ekspertiza komissiyasining (keyingi oʻrinlarda TMEK deb yuritiladi) nogironlik toʻgʻrisidagi maʼlumotnomasi bilan tasdiqlangan taqdirda tayinlanadi. Bunda nafaqa miqdori pensiya tayinlash uchun zarur boʻlgan ish stajiga ega boʻlmagan qariyalar va mehnatga layoqatsiz fuqarolarning nafaqasi miqdorida belgilanadi.”;

10-banddagi “tibbiy-mehnat ekspert komissiyalari (keyingi oʻrinlarda TMEK deb ataladi)” soʻzlari “TMEK” soʻzi bilan almashtirilsin;

18-bandda:

quyidagi mazmundagi “v¹” kichik xatboshi qoʻshilsin:

“v¹) bolalikdan nogironligi boʻlgan farzandi bor onalarga yoshga doir nafaqa tayinlashda — bolalikdan nogironligi boʻlgan farzandining tugʻilganlik haqidagi guvohnoma nusxasi, farzandi bolalikdan nogiron deb eʼtirof etilganligi toʻgʻrisida TMK tomonidan berilgan tibbiy xulosa yoki TMEKning nogironlik toʻgʻrisidagi maʼlumotnomasining tegishli qismi”;

beshinchi xatboshiga “Ish stajiga ega boʻlmagan shaxsga” soʻzlaridan keyin “(bolalikdan nogironligi boʻlgan farzandi bor onalardan tashqari)” soʻzlari qoʻshilsin;

30-bandda:

ikkinchi xatboshi chiqarib tashlansin;

uchinchi xatboshi ikkinchi xatboshi deb hisoblansin.

2. Vazirlar Mahkamasining 2018-yil 30-martdagi 249-son qarori (Oʻzbekiston Respublikasi QT, 2018-y., 3-son, 70-modda) bilan tasdiqlangan Narxlari (tariflari) davlat tomonidan tartibga solinadigan ijtimoiy ahamiyatli tovarlar (xizmatlar) va ularning strategik turlari Roʻyxatining 3 va 9-bandlari oʻz kuchini yoʻqotgan deb hisoblansin.