O‘zbekiston Respublikasi Prezidentining 2018-yil 5-sentabrdagi PF-5538-son “Xalq ta’limini boshqarish tizimini takomillashtirish bo‘yicha qo‘shimcha chora-tadbirlar to‘g‘risida”gi Farmoniga muvofiq buyuraman:

1. Umumiy o‘rta ta’lim muassasasining kuzatuv kengashi haqidagi namunaviy nizom ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran kuchga kiradi.

Mazkur Nizom O‘zbekiston Respublikasi Prezidentining 2018-yil 5-sentabrdagi PF-5538-son “Xalq ta’limini boshqarish tizimini takomillashtirish bo‘yicha qo‘shimcha chora-tadbirlar to‘g‘risida”gi Farmoniga muvofiq umumiy o‘rta ta’lim muassasasi kuzatuv kengashining (bundan buyon matnda Kengash deb yuritiladi) maqsadi, vazifalari, vakolatlari hamda faoliyatini tashkil etish tartibini belgilaydi.

1. Mazkur Nizom davlat umumiy o‘rta ta’lim muassasalariga (bundan buyon matnda ta’lim muassasasi deb yuritiladi) tatbiq etiladi.

Mazkur Nizom nodavlat umumta’lim tashkilotlari uchun tavsiyaviy xususiyatga ega.

2. Kengash yuridik shaxs hisoblanmaydi va davlat ro‘yxatidan o‘tkazilmaydi.

3. Kengashning asosiy maqsadlari quyidagilardan iborat:

ta’lim muassasasini rivojlantirishning ustuvor yo‘nalishlarini belgilash;

ta’lim muassasasining maqsadlari va vazifalarini hamda ularga erishish rejalarini tasdiqlash;

ta’lim muassasasida amalga oshirilishi belgilangan vazifalarning bajarilishi va maqsadli ko‘rsatkichlarga erishilishi ustidan nazorat olib borish.

4. Kengash o‘z faoliyatini O‘zbekiston Respublikasining Konstitutsiyasi, qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining qarorlari, farmonlari va farmoyishlari, O‘zbekiston Respublikasi Vazirlar Mahkamasining qarorlari hamda boshqa qonunchilik hujjatlari, shuningdek, ta’lim muassasasining Ustavi hamda mazkur Nizom asosida amalga oshiradi.

5. Kengashning asosiy vazifalari quyidagilardan iborat:

ta’lim muassasasini rivojlantirishning ustuvor yo‘nalishlarini belgilash;

ta’lim muassasasi rahbarining muassasa faoliyatini takomillashtirish, moliyaviy-xo‘jalik holati, daromadlar va xarajatlar, budjet, budjetdan tashqari, homiylik va boshqa mablag‘lardan foydalanish bo‘yicha ko‘rilgan chora-tadbirlar to‘g‘risidagi hisobotlarini vaqti-vaqti bilan tinglash;

ta’lim muassasasi rahbarining taqdimnomasi bo‘yicha yillik moliyaviy rejalarni, ko‘rsatilayotgan pullik xizmatlar narxining miqdorlarini va muassasa mulkidan foydalanganlik uchun ijara haqi miqdorini, shu jumladan auksiondagi boshlang‘ich narxni ko‘rib chiqish va tasdiqlash;

o‘quvchilar uchun yaratilgan sharoitlar ustidan tizimli ravishda monitoring o‘rnatish;

o‘quvchilar va ular ota-onalarining murojaatlarini ko‘rib chiqish, ta’lim muassasasining pedagog va rahbar xodimlari faoliyati to‘g‘risida ijtimoiy so‘rovlarni o‘tkazish;

ta’lim muassasasining faoliyatini tashkil etishga taalluqli boshqa masalalarni hal qilishda ishtirok etish.

6. Ta’lim jarayonining shaffofligini ta’minlash, jamoatchilik ta’sirini kuchaytirish, o‘quvchilarning sifatli ta’lim olishlari, ularga tegishli shart-sharoitlar yaratish hamda ta’lim-tarbiya jarayonlarini qo‘llab-quvvatlash maqsadida har bir ta’lim muassasasida Kengash tashkil etiladi.

7. Kengash 7 kishidan kam bo‘lmagan toq sondan iborat tarkibda tuziladi. Bunda, Kengash tarkibiga o‘quvchilarning ota-onalari orasidan kamida 2 nafar, sobiq bitiruvchilar orasidan 2 nafar va nafaqadagi sobiq pedagoglar orasidan 1 nafar hamda homiylar orasidan 2 nafar a’zo kiritiladi.

Kengash a’zolarining soni cheklanmaydi.

8. Kengash a’zolari tegishli ta’lim muassasasi umumiy yig‘ilishida o‘quvchilarning ota-onalari yoki ularning o‘rnini bosuvchi shaxslar tomonidan ochiq ovoz berish orqali saylanadi.

Kengashning birinchi yig‘ilishida ishtirok etayotgan a’zolar umumiy sonining oddiy ko‘pchilik ochiq ovoz berishi orqali Kengash raisi va kotibi saylanadi. Bunda, Kengash raisi va kotibi Kengash a’zolari tomonidan saylanadi.

9. Ta’lim muassasasi direktori yoki uning o‘rinbosarlari, shuningdek, ularning yaqin qarindoshlari Kengash a’zolari sifatida saylanishiga yo‘l qo‘yilmaydi.

10. Kengash tarkibi 3 yil muddatga saylanadi. Bunda Kengash tarkibi har o‘quv yili boshida ko‘rib chiqilishi mumkin.

11. Kengash a’zosi etib saylangan ota-onalarning farzandlari boshqa ta’lim muassasasiga o‘tkazilganda yoki bitirib ketganda, Kengashning ushbu a’zosi Kengash a’zolari qatoridan chiqariladi va uning o‘rniga ota-onalar orasidan boshqa a’zo saylanadi.

Kengash a’zosi kengashning yig‘ilishlarida surunkali 3-marta uzrli sabablarsiz ishtirok etmagan taqdirda, u Kengash a’zolari tarkibidan chiqariladi.

12. Kengashning birinchi yig‘ilishi tuman (shahar) maktabgacha va maktab ta’limi bo‘limi tomonidan tegishli ta’lim muassasasida tashkil etiladi.

Bevosita O‘zbekiston Respublikasi Maktabgacha va maktab ta’limi vazirligi yoki Qoraqalpog‘iston Respublikasi Maktabgacha va maktab ta’limi vazirligi, viloyatlar va Toshkent shahar maktabgacha va maktab ta’limi boshqarmalariga (bundan buyon matnda hududiy boshqarmalar deb yuritiladi) bo‘ysunadigan ta’lim muassasalarida Kengashning birinchi yig‘ilishi tegishlicha O‘zbekiston Respublikasi Maktabgacha va maktab ta’limi vazirligi yoki uning hududiy boshqarmalari tomonidan tegishli ta’lim muassasasida tashkil etiladi.

13. Kengash har chorakda kamida bir marta yig‘iladi. Zarur hollarda navbatdan tashqari yig‘ilishlar o‘tkazilishi mumkin.

14. Kengash yig‘ilishi bayonnoma bilan rasmiylashtiriladi.

15. Kengash yig‘ilishida uning umumiy a’zolarining uchdan ikki qismi ishtirok etganda Kengash qaror qabul qilishi mumkin.

16. Kengash o‘z faoliyatini daxlsizlik, oshkoralik, shaffoflilik, adolatlilik tamoyillariga muvofiq olib boradi.

17. Kengash qarorlari a’zolarning teng huquqliligi asosida ochiq ovoz berish yo‘li bilan qabul qilinadi. Har bir Kengash a’zosi bitta ovoz huquqiga ega. Ovozlar teng bo‘lgan hollarda Kengash raisining ovozi hal qiluvchi hisoblanadi.

18. Kengash yig‘ilishlariga Kengash raisi raislik qiladi.

19. Kengash raisi o‘z vakolatini vaqtinchalik bajarish imkoniyati bo‘lmagan hollarda (xizmat safari, ta’til va kasallik davrida), uning vazifasini bajarish Kengash a’zolaridan biriga vaqtincha yuklatiladi.

20. Kengash yig‘ilishlari mazkur Nizom talablariga muvofiq tashkillashtirilishi va o‘tkazilishi hamda hujjatlarning to‘g‘ri va to‘liq rasmiylashtirilishi uchun Kengash raisi mas’ul hisoblanadi.

21. Kengash yig‘ilishi o‘tkazilishidan kamida 10 kun oldin yig‘ilish o‘tkaziladigan kun, vaqti, joyi va muhokama etiladigan masalalar haqida kengash a’zolari xabardor qilinishi lozim. Kengash a’zolarini xabardor qilish uchun Kengash raisi mas’ul hisoblanadi.

22. Ta’lim muassasasi rahbari Kengash ishini tashkil qilish (hujjatlarni rasmiylashtirish va saqlash uchun zarur bo‘lgan xona, ta’lim muassasasi faoliyati bilan bog‘liq ma’lumotlar va kanselyariya jihozlari bilan ta’minlash) uchun mas’ul hisoblanadi.

23. Kengash yig‘ilishlari o‘tkazilganligi haqida bayonnomalar yig‘ilish o‘tkazilgan kundan boshlab 3 kundan kechiktirmay tegishlicha O‘zbekiston Respublikasi Maktabgacha va maktab ta’limi vazirligi hamda uning hududiy boshqarmalariga taqdim etilishi lozim.

24. Kengash faoliyatiga tuman (shahar) maktabgacha va maktab ta’limi bo‘limi aralashmaydi va unga hisobdor emas.

25. Kengashning faoliyati bo‘yicha ma’lumotlarni har chorakda ta’lim muassasasining rasmiy veb-saytida, ommaviy axborot vositalarida yoki ta’lim muassasasining barcha ko‘rishi mumkin bo‘lgan joyiga joylashtirish tavsiya etiladi.

26. Kengash o‘ziga yuklatilgan vazifalarni amalga oshirishda quyidagi huquqlarga ega:

ta’lim muassasasining tegishli davridagi faoliyati bo‘yicha ta’lim muassasasi direktoridan ma’lumotlarni so‘rash va olish;

ta’lim muassasasining moliyaviy hisobotlari bilan tanishish;

homiylik va xayriya mablag‘larining kirim qilinishi hamda sarflanishi haqidagi ma’lumotlar bilan tanishish;

ta’lim muassasasi pedagoglarining sha’ni, qadr-qimmati, obro‘sini himoya qilish bo‘yicha takliflar kiritish.

27. Kengash quyidagi vakolatlarga ega:

ta’lim muassasasi direktori va direktor o‘rinbosarlarining boshqaruv faoliyati, ta’lim-tarbiya jarayonini sifatli tashkil etilishi hamda o‘quvchilar, ularning ota-onalaridan noqonuniy pul yig‘imlari undirilmasligi bo‘yicha jamoatchilik nazoratini o‘rnatadi;

ta’lim muassasasining umumiy yig‘ilishlarida qatnashadi, o‘quvchilar va ota-onalarning manfaatlarini himoya qiladi;

ta’lim muassasasida ijtimoiy-ma’naviy muhitning buzilishi, ta’lim sifatining pasayib ketishi, tizimli muammolarning kelib chiqishi, pedagoglar bilan ma’muriyat o‘rtasida yoki ota-onalar bilan ma’muriyat o‘rtasida nizoli holatlar kelib chiqqan taqdirda, ta’lim muassasasi direktorini lavozimidan ozod etish bo‘yicha hududiy boshqarmalarga taklif kiritadi.

28. Kengash a’zolariga mazkur Nizomda belgilanmagan vakolatlariga ega bo‘lishlariga, ta’lim muassasasi direktorining qonunda belgilangan vakolatlariga aralashishiga yo‘l qo‘yilmaydi.

29. Kengash o‘z vakolati doirasiga kirmaydigan ishlarga aralashsa yoki o‘z vazifalarini to‘liq ta’minlay olmasa, O‘zbekiston Respublikasi Maktabgacha va maktab ta’limi vazirligi yoki uning hududiy boshqarmalari tomonidan tarqatilib yuboriladi. Bunda, Kengashning yangi tarkibi mazkur Nizomning 3-bobida nazarda tutilgan talablar asosida qayta shakllantiriladi.

30. Kengashning faoliyatiga ta’lim muassasasi rahbari, hududiy boshqarmalar, mahalliy hokimliklar va boshqa tashkilotlar aralashuviga yo‘l qo‘yilmaydi.

31. Ta’lim muassasasida o‘quvchilar va ularning ota-onalaridan turli xil sabablar bilan Kengash a’zolari, ta’lim muassasasi rahbari va boshqa xodimlari tomonidan pul mablag‘larini yig‘ish qat’iyan taqiqlanadi.

32. Mazkur Nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladilar.

33. Kengash raisi, kotibi va a’zolari jamoatchilik asosida amalga oshiradigan Kengashdagi faoliyati yuzasidan intizomiy javobgarlikka tortilishi mumkin emas.

34. Mazkur Nizom O‘zbekiston Respublikasi Bandlik va mehnat munosabatlari vazirligi hamda O‘zbekiston Kasaba uyushmalari Federatsiyasi Kengashi bilan kelishilgan.