Respublikaning ichki isteʼmol bozorini himoya qilishni kuchaytirish, aholini tovarlar bilan barqaror taʼminlash, mehnatkashlarning fikr va istaklarini hisobga olgan holda, tovarlarni kuponlar boʻyicha sotishni yanada tartibga solish maqsadida Vazirlar Mahkamasi qaror qiladi:

1. Oʻzbekiston Respublikasi Vazirlar Mahkamasining “1992-yilda Oʻzbekiston Respublikasining isteʼmol bozorini himoya qilish toʻgʻrisida” 1992-yil 2-yanvardagi 1-son qarori 1 va 4-bandlarining (undan toʻrtinchi xatboshini chiqarib tashlagan holda) amal qilishi 1992-yilning II choragi uchun ham saqlansin.

1992-yil 1-maydan boshlab yangi namunadagi kuponli kartochkalar muomalaga chiqarilsin. 1992-yilning I choragi namunasidagi kuponli kartochkalar shu yilning 1-iyuligacha muomalada boʻladi va almashtirilmaydi.

2. Quyidagilar tasdiqlansin:

kiritilgan oʻzgartishlarni va qoʻshimchalarni hisobga olib “Tovarlarni kuponli kartochkalar boʻyicha sotish, ularni berish, saqlash, inkassatsiya qilish va muomalaga chiqarish tartibi toʻgʻrisida”gi Vaqtinchalik nizom (1-ilova);

aholiga kuponlarsiz sotiladigan oziq-ovqat mahsulotlari va ashyoviy mollar roʻyxati (2-ilova).

3. Fuqarolarda ishlatilmagan kuponlar borligini tekshirish natijalarini hisobga olish yuzasidan hamda mavjud mol hajmini va aholi daromadlarini tartibga solish maqsadida belgilangan daromadlarga qarab kuponlar berish miqdorini belgilash yuzasidan 1992-yilning II choragiga yangi tabaqalashtirilgan shkala 3-ilovaga muvofiq belgilansin.

4. Vazirliklar, idoralar, uyushmalar, konsernlar, korxonalar, tashkilotlar va mulkchilikning barcha shakllaridagi xoʻjaliklar shu yilning 3-apreliga qadar banklarning tegishli muassasalariga belgilangan daromadlar boʻyicha beriladigan kuponlar miqdorini aniqlash yuzasidan yangi shkalaga muvofiq zarur miqdordagi kuponlarga talabnomalar bersinlar.

Respublika hududidagi barcha korxonalar, tashkilotlar, muassasalar, xoʻjaliklar ishlovchilarga, pensionerlarga, talabalarga va fuqarolarning boshqa toifalariga 1992-yilning 10-apreliga qadar aprel oyi uchun, 1-mayga qadar — may oyi uchun kuponlar berishni taʼminlasinlar.

5. Belgilab qoʻyilsinki, qiymati 2 ming soʻmdan ortiq boʻlgan tovarlar respublika aholisiga kuponlar, hisob-kitob cheklari, chek daftarchalari boʻyicha yoki omonatchilarning topshiriqlari boʻyicha pul oʻtkazish yoʻli bilan sotiladi.

6. Qoraqalpogʻiston Respublikasi Vazirlar Kengashi, viloyatlar, Toshkent shahar va nohiyalarning hokimliklari bir hafta muddat ichida chakana savdo korxonalari uchun ularning yuqori savdo tashkilotlari taqdimnomalari boʻyicha savdo tushumi miqdorining soʻmlar va kuponlarda hisoblangan nisbatini tasdiqlasinlar.

Oʻzbekiston davlat banki, Oʻzbekiston sanoat-qurilish banki, Oʻzbekiston dehqonchilik-sanoat banki savdo korxonalari tomonidan kuponlar inkassatsiyasiga doir belgilangan tartibning bajarilishini, topshiriladigan soʻmlar va kuponlarda hisoblangan tushum miqdori tasdiqlangan nisbatlarining bir-biriga mos kelishini doimiy ravishda nazorat qilib borishni amalga oshirsinlar. Savdo tashkilotlarining tovar sotishdan tushgan pullar va kuponlarning bir-biriga mos boʻlishi borasidagi ishlarining natijalari haqida har oyda Vazirlar Mahkamasiga xabar berib turilsin.

7. Oʻzbekiston Respublikasi Savdo vazirligi, Oʻzbekbirlashuv va savdo tarmoqlariga ega boʻlgan boshqa vazirliklar, idoralar tovarlarni kupon boʻyicha sotishning belgilangan tartibiga qatʼiy rioya etilishini taʼminlasinlar. Ana shu tartibning bajarilishini taʼminlamagan savdo korxonalari va tashkilotlarining rahbarlari lavozimidan boʻshatiladilar.

8. Ichki ishlar organlari kuponlarni olib-sotish bilan shugʻullanuvchi shaxslarni aniqlash ishlarini kuchaytirsinlar, qoidani buzganlarni qonunga muvofiq javobgarlikka tortsinlar va olib borilayotgan ishlarning keng oshkoraligini taʼminlasinlar.

9. Vazirlar Mahkamasining 1992-yilda Oʻzbekiston Respublikasi isteʼmol bozorini himoya qilishga doir qarorini amalga oshirish boʻyicha Respublika komissiyasi tarkibiga 4-ilovaga muvofiq oʻzgartishlar kiritilsin.

10. Vazirlar Mahkamasining “1992-yilda Oʻzbekiston Respublikasi isteʼmol bozorini himoya qilish toʻgʻrisida” 1992-yil 2-yanvardagi 1-son qarorining 2, 3, 5, 6—9-bandlari, 11-bandning 1-xatboshi, shuningdek, Vazirlar Mahkamasining 1992-yil 31-yanvardagi 41-son qarori oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari — tegishli komplekslarning rahbarlari zimmasiga yuklansin.

1. Oʻzbekiston Respublikasi hududida kuponli kartochkalar* 1992-yilning II choragi uchun ichki isteʼmol bozorini himoya qilish maqsadida joriy etiladi.

2. Kuponli kartochkalar tovarlarni sotib olish huquqini beradigan bir marta foydalaniladigan hujjatdir.

3. Davlat savdosi, tijorat, matlubot kooperatsiyasi tizimida, xususiy doʻkonlarda, shuningdek, ularni ishlab chiqarishni amalga oshiruvchi tovar almashuv operatsiyalari boʻyicha va valyutaga sotib oluvchi hamda ularni oʻz xodimlariga sotuvchi korxonalarda va tashkilotlarda kuponlar boʻyicha, mazkur nizomning 4 va 5-bandlarida koʻrsatilganlardan tashqari, oziq-ovqat mahsulotlari va ashyoviy mollar sotiladi.

Kuponlar bilan toʻlash tovarlar qiymatini mavjud pul belgilari bilan toʻlash bilan bir vaqtda kartochkadan kuponlarning ekvivalent summasini qirqib olish yoʻli bilan amalga oshiriladi.

4. Quyidagilar kuponlarsiz sotiladi:

2-ilovadagi oziq-ovqat mahsulotlari va ashyoviy mollar;

umumiy ovqatlanish korxonalarining mahsulotlari;

harbiy qismlar (muddatli xizmat harbiy xizmatchilariga), koloniyalar va axloq tuzatish-mehnat muassasalari hududida joylashgan doʻkonlardagi tovarlar;

xususiy doʻkonlarning oʻz mablagʻlariga respublikadan tashqaridan sotib olingan tovarlar;

ikkilamchi xomashyo topshirgan aholiga sotiladigan xalq isteʼmoli tovarlari;

foydalanilgan materiallar va ehtiyot qismlar qiymati ham qoʻshilgan xar xil xizmatlar koʻrsatish.

5. Qiymati 2000 soʻmdan koʻp boʻlgan tovarlar respublika aholisiga kuponlar boʻyicha ham, cheklar, chek daftarchalari boʻyicha ham yoki omonatchilarning topshirigʻiga koʻra ularning bank muassasalaridagi shaxsiy hisobvaraqlaridan pul oʻtkazish yoʻli bilan sotiladi.

6. Korxonalar, muassasalar, tashkilotlar, kooperativlarning chakana savdo shoxobchalari orqali naqd pulga kuponsiz tovarlar sotishlari taqiqlanadi. Kartochkasiz kuponlar yoki tegishli tartibda rasmiylashtirilmagan kuponlar oʻtmaydi.

7. 50 tiyinlikka teng boʻlgan va undan kam qiymat boʻyicha xarid uchun hisob-kitob kuponsiz amalga oshiriladi. Soʻm va tiyinda ifodalangan xarid uchun hisob-kitob kupon bilan toʻlanayotganda yiriklashtirish qoidalariga koʻra soʻm hisobida tegishli miqdorigacha yiriklashtiriladi (50 tiyingacha va undan kami kam tomonga, 51 tiyin va undan koʻpi koʻp tomonga).

8. Savdo korxonalari, muassasalari va tashkilotlarida, shuningdek, avtoyoqilgʻi quyish stansiyalarida kuponlar kesib olish va qadab qoʻyish yoʻli bilan toʻlanadi, ular yozib qoʻyilgan qiymatlari boʻyicha guruhlarga ajratiladi va ish kuni davomida korxonaning moddiy javobgar shaxsida (sotuvchi, kassir, nazoratchi kassir), korxonada tovarlarning sotilishi uchun masʼul boʻlgan shaxsda saqlanadi. Kartochkalar xaridorga qaytarib berilishi lozim.

9. Magazinlarning sotuvchilari, shuningdek, korxonalarda va tashkilotlarda amalga oshiriladigan almashuv operatsiyalari natijasida va valyutaga olingan tovarlarni sotish uchun masʼul boʻlgan shaxslar savdodan olingan tushumni soʻm va kupon bilan ikki tomonlama hisoblab chiqadilar. Kuponlar qatʼiy hisob-kitob hujjati boʻlib hisoblanadi.

10. Tushum miqdorining soʻm va kupon hisobida bir-biriga toʻgʻri kelishi uchun masʼuliyat savdo korxonasining rahbari zimmasiga yuklatiladi. Yoʻl qoʻyilishi mumkin boʻlgan farq foizi yuqori savdo tashkiloti tomonidan tegishli bank organlari bilan kelishib belgilanadi.

Savdo tashkilotlarining rahbarlari tovar-pul hisobotlarini taqdim qilish boʻyicha belgilangan muddatga koʻra (har 5 yoki 7 kunda) har bir doʻkon tomonidan tasdiqlangan inkassatsiya tartibi hamda soʻm va kuponlarda tushum miqdorining belgilangan nisbatiga rioya qilinishini albatta tekshirib boradilar. Bu foizga rioya qilinishi, kuponlarning tushum bilan birga topshirilishini taʼminlamagan va kuponlarni inkassatsiya qilish boʻyicha belgilangan tartibga (kuponlarni qirqish, qadab qoʻyish, taxlash yoʻli bilan toʻlash va hokazo) amal qilmagan savdo korxonalari (doʻkonlari)ning rahbarlari egallab turgan lavozimlaridan boʻshatiladi

Oʻziga qarashli savdo korxonalarida (doʻkonlarda) Vaqtinchalik nizomga amal qilinishini taʼminlamagan savdo tashkilotlarining rahbarlari ham shunday javobgarlikka tortiladilar.

11. Bank muassasalarida tushgan kuponlarni hisobga olish, uning harakati va topshirish tartibi Oʻzbekiston Respublikasi Davlat banki, Oʻzbekiston sanoat-qurilish banki, Oʻzbekiston dehqonchilik-sanoat banki, Savdo vazirligi, Oʻzbekbirlashuv, Oʻzbekiston jamgʻarmalar banki, Oʻzbekiston Respublikasi Aloqa vazirligi, “Oʻzkooptayyorlovsavdo” va Oʻzbekiston Respublikasi Neft mahsulotlari bilan taʼminlash davlat qoʻmitasining yoʻriqnomalariga va tartibiga muvofiq amalga oshiriladi.

12. Kuponlar:

asosiy ish, oʻqish, xizmat joyidan, pensiyalar, oʻtkazilgan pullar olinadigan aloqa boʻlimlari va tegishli banklardan;

shaxsiy yordamchi xoʻjaliklarda band boʻlgan va oʻz mahsulotini topshiruvchi shaxslarga — umumiy asoslarda tegishli tashkilotlar tomonidan;

harbiy xizmatchi boʻlgan pensionerlarga va ularga tenglashtirilgan shaxslarga — bank muassasalaridan;

korxonalar va tashkilotlardan stipendiya oluvchi studentlarga—faqat oʻqish joyidan beriladi.

Ish haqi toʻlashga bank muassasalaridan naqd pul olmaydigan va ish haqini tushgan daromaddan toʻlaydigan tashkilotlar kuponni umumiy asoslarda bankdan oladilar.

Respublika hududida joylashgan, lekin ish haqini pul oʻtkazish yoʻli bilan boshqa hududlardan oladigan korxonalar, muassasalar va tashkilotlarga kuponlar bank muassasalari tomonidan belgilangan tartibda ish haqi vedomostlariga binoan beriladi.

Oʻrindoshlik bilan ishlovchi shaxslarga kuponlar asosiy ish joyidan umumiy daromadga qarab, mehnat shartnomalari boʻyicha ish haqi oluvchilarga esa umumiy asoslarda beriladi.

13. Xodimlarga taʼtil mablagʻlari yozilayotganda beriladigan kuponlarning miqdori har bir taʼtil oyiga alohida hisoblanadigan miqdorlar asosida aniqlanadi.

Banklar va korxonalar bergan kreditlar, shuningdek, sugʻurta organlari tomonidan toʻlanadigan pullar kupon bilan taʼminlanmaydi.

14. Beriladigan kuponlar miqdori 3-ilovaga muvofiq tabaqalashtirilgan shkala boʻyicha ish haqi, pensiya, nafaqa, stipendiya va boshqa berilishi lozim boʻlgan qayd qilingan daromadlarning (soliqlarni, alimentlarni va boshqa ushlab qolishlarni chiqarib tashlab) miqdoriga bogʻliq boʻladi, yiriklashtirish qoidalariga muvofiq tegishli miqdorgacha yiriklashtiriladi (5 soʻmgacha kam tomonga, 5 soʻm va undan koʻpi koʻp tomonga).

Kuponlar har oyda bir marta yangi tabaqalashtirilgan shkala boʻyicha beriladi.

Aprel oyi uchun kuponlar shu yilning 10-apreliga qadar I chorak nusxalari boʻyicha, ish haqi, pensiyalar, nafaqalar, stipendiyalar va boshqa qayd qilingan daromadlarga koʻra belgilangan miqdorda beriladi, ular yetishmay qolsa yangi nusxadagi kuponlar beriladi. May oyi uchun yangi nusxadagi kuponlar 1992-yilning 1-mayiga qadar, iyun oyi uchun 16-iyuniga qadar, keyinchalik qayta hisob-kitob qilish sharti bilan beriladi.

Yilning I choragi uchun berilgan kuponlar shu yilning 1-iyuliga qadar oʻtadi va almashtirilmaydi.

Doimiy ish joyiga ega boʻlmagan va yakka tartibda mehnat faoliyati bilan shugʻullanuvchi yoki qishloq xoʻjaligi mahsulotlari yetishtirib, oʻz mahsulotini kolxoz bozorida sotuvchi yoki kooperativlarga topshiruvchi yoxud mualliflik gonorarlari oluvchi shaxslarga, shuningdek, respublika tashqarisida ishlovchi kishilarga kuponlar ularni olishga ruxsatnoma koʻrsatilgach, yashash joyidagi bank muassasalarida shkala bilan belgilangan miqdorda beriladi (3-ilova). Kuponlar olishga ruxsatnoma soliq inspeksiyalari tomonidan berilgan daromadlar toʻgʻrisidagi maʼlumotnomalar asosida yashash joyidagi mahalliy boshqaruv organlari (hokimliklar) tomonidan beriladi.

Mualliflik gonorarlari oluvchi fuqarolar davlat soliq inspeksiyalariga daromadlarni olgan joydan berilgan oʻtgan yildagi daromadlar toʻgʻrisidagi maʼlumotnomalarni taqdim etadilar.

Sovet Armiyasi saflaridan xizmatdan boʻshatilgan va vaqtincha (uch oygacha) ishlamaydigan harbiy xizmatchilar, oʻz xohishi bilan yoki qisqarish sababli ishdan boʻshagan va vaqtincha (bir oygacha) ishlamaydigan fuqarolar, yolgʻiz yashovchi keksayib qolgan fuqarolar hamda pensiya va ijtimoiy yordam olmaydigan fuqarolar, shuningdek, qamoq joylaridan ozod qilingan va vaqtincha (bir oygacha) ishlamaydigan fuqarolar yashash joyidagi mahalliy boshqaruv organlari (hokimliklar) harbiy bilet, pasport, mehnat daftarchasi, ozod qilinganligi toʻgʻrisidagi maʼlumotnoma asosida bergan kuponlarni olishga ruxsatnomani koʻrsatib, bank muassasalaridan 150 soʻm miqdorida kupon oladilar.

Oʻzbekiston Respublikasi Oliy Kengashining “Aholini ish bilan taʼminlash toʻgʻrisida”gi Qonunni kuchga kiritish tartibi haqida”gi qarori 1-bandida belgilangan shu Qonunning “Ishdan mahrum boʻlgan chogʻda ijtimoiy kafolatlar” sarlavhali 4-boʻlimi kuchga kirgunga qadar vaqtincha ish bilan taʼminlanmagan va Vazirlar Mahkamasining 1991-yil 25-martdagi 65-son qaroriga muvofiq nafaqa oluvchi aholiga 150 soʻm miqdorida kupon beriladi.

Bolasini boqayotganligi uchun taʼtilda boʻlgan ayollar har oyda ish joyidan nafaqa va boshqa daromadlar hisobidan, kompensatsiya kam shu jumlaga kiradi, belgilangan miqdorda kuponlar oladilar. Bola uch yoshga toʻlgunga qadar unga qarash uchun oʻz taʼtilini davom ettirayotgan, lekin bu nafaqa va kompensatsiyalarni olish muddati tugaganligi uchun ularni olmayotgan ayollarga kuponlar ularning ish joyidan 150 soʻm miqdorida beriladi.

Mavsumlar orasida mavsumiy ishlar bilan band boʻlgan fuqarolar mahalliy boshqaruv organlari (hokimliklar) bergan ruxsatnoma asosida bank muassasalaridan oyiga 150 soʻm miqdorida kupon oladilar.

Daromad manbaiga ega boʻlmagan va oila qaramogʻidagi uy bekalariga kuponlar mahalliy boshqaruv organlari (hokimliklar) beradigan maʼlumotnomalar taqdim etilgach, bank muassasalaridan oyiga 150 soʻm miqdorida beriladi.

Benzin uchun pul kompensatsiyasi oluvchi nogironlarga kuponlar kompensatsiya pulining 100 foizi miqdorida, kompensatsiya olinadigan joyda, yilning har choragida bir marta beriladi.

Bolalarga atalgan tovarlarning qimmatlashganligi sababli nafaqa oluvchi bolalar uchun kuponlar kompensatsiya pulining 100 foizi miqdorida, boshqa nafaqalar uchun esa belgilangan tartibda beriladi.

Moddiy yoki jismoniy zarar koʻrgan fuqarolarga kuponlar moddiy yordam puli summasi hisobidan toʻla miqdorda beriladi.

Yil choragi, yil uchun mukofotlar, mukofot pullari va moddiy yordam puli uchun kuponlar hisoblab chiqarilgan oʻrtacha oylik hisobidan belgilangan miqdorda beriladi.

Respublika hududida ishlovchi va soʻmlarda ish haqi oluvchi chet el fuqarolariga kuponlar umumiy asoslarda ishlovchilarga belgilangan tartibda beriladi.

Ish haqini soʻmlarda olmaydigan, biroq respublikada yashayotgan yoki xizmat safarida boʻlgan chet el fuqarolari bank muassasalarida erkin almashtiriladigan valyutaning bozor qadri boʻyicha soʻmga almashtirish va almashtirilgan pulning 15 foizi miqdorida kupon olish (bunda ushlab qolingan komission haq hisobga olinadi) huquqiga egadirlar.

Respublika oʻquv yurtlarida oʻqiyotgan chet el fuqarolariga kuponlar belgilangan miqdorda beriladi. Ular erkin almashtiriladigan valyutani soʻmga almashtirganda almashtirishning 15 foizi miqdorida kupon olish (bunda ushlab qolingan komission haq hisobga olinadi) huquqiga egadirlar.

Respublika tashqarisida vaqtincha harbiy xizmatni oʻtayotgan, oila aʼzolari respublikada doimiy yashayotgan fuqarolar xizmatni oʻtayotgan joyidan ish haqi toʻgʻrisida berilgan maʼlumotnoma asosida harbiy komissarliklar beradigan ruxsatnoma boʻyicha bank muassasalaridan shkalada (3-ilova) belgilangan miqdorda kupon oladilar.

Chet elda ishlagandan keyin yoki navbatdagi mehnat taʼtiliga kelgan respublika fuqarolari kuponlarni chet elga xizmat safariga borgunga qadar ishlagan korxonalaridan, harbiy xizmatchilar esa harbiy komissarliklardan umumiy asoslarda oladilar.

Respublika hududida doimiy yashovchi va respublika tashqarisida koʻchib ishlab yuruvchi shaxslar daromadlari toʻgʻrisidagi maʼlumotnomalarni koʻrsatgach, mahalliy boshqaruv organlari (hokimliklar) kupon olish uchun bergan ruxsatnomalarni koʻrsatib, bank muassasalaridan kuponlarni oladilar.

I guruh nogironlarga, shuningdek, internat uylarda yashovchi hamda toʻla davlat taʼminotida boʻlgan pensionerlar va nogironlarga kuponlar oʻzlari oladigan pensiya miqdorida beriladi.

Mualliflik kashfiyotlari, ixtirolari, ratsionalizatorlik takliflari va hokazo hisobiga haq va mukofotlar oluvchi fuqarolar kuponlarni asosiy ish joyidan umumiy asoslarda hamma daromadlari yuzasidan oladilar.

Etimlikda va ota-onasining qarovisiz oʻsgan bolalar boʻlgan talabalar va oʻquvchilarning, toʻla davlat taʼminotida boʻlgan talabalar va oʻquvchilarning stipendiyalari toʻla miqdorda kuponlar bilan taʼminlanadi.

Muvaqqat ijodiy jamoalarning aʼzolariga, shuningdek, pudrat shartnomasi boʻyicha ish bajaruvchi shaxslarga kuponlar asosiy ish joyida hamma daromadlari yuzasidan shkalada (3-ilova) belgilangan miqdorda beriladi.

VTEK (mehnat qobiliyati yoʻqolishi darajasini aniqlaydigan tibbiyot komissiyasi) dan qayta tekshiruvdan oʻtgan va pul daromadlari olmaydigan fuqarolarga bank muassasalarida mahalliy boshqaruv organlari (hokimliklar) tomonidan berilgan ruxsatnoma koʻrsatilgandan keyin koʻrikdan oʻtishning butun davri uchun har oyda 150 soʻmlik kupon beriladi.

Korxonalar, muassasalar va tashkilotlarning oʻz hisobidan taʼtil olgan xodimlari ish joyidan kuponlarni taʼtilga chiqishidan oldingi oxirgi oyda olingan belgilangan daromadlardan shkalada (3-ilova) belgilangan miqdorda oladilar.

Donorlar donorligi uchun davolash muassasalaridan olingan pulning toʻla miqdorida kuponlar bilan taʼminlanadilar.

Boshqa respublikalarning uzoq muddatga (bir oydan koʻp) xizmat safariga kelgan fuqarolari kuponlarni xizmat safariga kelgan tashkilotlar va korxonalardan oyiga 150 soʻm miqdorida oladilar.

Naqd pulsiz tartibda keladigan alimentlar shkalada (3-ilova) belgilangan miqdorda kuponlar bilan taʼminlanadi.

15. Kuponni kartochkalar muomalaga blankaning 10, 25, 50, 100, 200 va 500 soʻmlik qiymati bilan chiqariladi.

Korxonalar, tashkilotlar va muassasalarning kassalaridan kuponli kartochka berishda kuponlar yiriklashtirish qoidalari boʻyicha (5 soʻmgacha kam tomonga, 5 soʻm va undan koʻp boʻlganda koʻp tomonga) soʻmlarda tegishli summagacha yiriklashtiriladi.

Kartochkalar aniq bar shaxsning nomiga yozib beriladi va rahbar, bosh buxgalterning imzosi hamda korxona, tashkilot va muassasa muhri bilan tasdiqlanadi.

Kuponlar sarflangandan soʻng kartochkalar ular olingan joydagi kassalarga qaytarilishi va ular oʻz navbatida bu kartochkalarni yoʻq qilish uchun bank muassasalariga topshirishlari shart.

Yoʻqotib qoʻyilgan va buzilgan kuponlar tiklanmaydi.

16. Kuponlar respublika hududida joylashgan barcha bank muassasalarida, shu jumladan, tijorat banklarida beriladi.

17. Korxona, muassasa, tashkilot rahbarining buyrugʻi bilan kuponlarni olish, saqlash va berish boʻyicha masʼul shaxs tayinlanadi hamda unga shartnoma boʻyicha javobgarlik yuklatiladi.

Kuponlarni olish va berish korxona, muassasa va tashkilotlar tomonidan alohida hisobga olish daftarida qayd etiladi. U nomerlangan, ip oʻtkazib tikilgan, muhr bilan tasdiqlangan boʻlishi kerak. Hisobga olish daftaridagi varaqlar soni korxona, muassasa, tashkilot rahbari va bosh buxgalterning imzosi bilan tasdiqlanadi. Daftardagi yozuvlar kirim-chiqim orderlari va toʻlov vedomostlari asosida amalga oshiriladi.

18. Oluvchiga berilgan kuponlarning miqdori ish haqi, pensiyalar, stipendiyalar va boshqalarni berishda toʻlov vedomostida qoʻshimcha ravishda kiritilgan ustun (qator)da yoki toʻlov hujjatida aks ettiriladi.

Kuponlarni korxonalar, muassasalar va tashkilotlarning vakillari (mulkchilik shaklidan qatʼi nazar) oldindan berilgan talabnomalarga muvofiq naqd pul olinadigan bank muassasasidan topshiriq boʻyicha oladilar.

Pensiyalar, nafaqalar beruvchi aloqa korxonalari kuponlarni bank muassasalaridan ijtimoiy taʼminot organlari tomonidan tuzilgan toʻlov vedomostlariga muvofiq oladilar. Toʻlov vedomostida berilishi lozim boʻlgan kuponlar miqdori alohida ustunda koʻrsatiladi. Pul oʻtkazish operatsiyalari boʻyicha kuponlar berish uchun aloqa muassasalari tomonidan rezerv tashkil etiladi.

Kuponlarning hosil boʻlgan kamomadi yoʻqotilgan qiymatiga muvofiq (yaʼni 1 kupon uchun 1 soʻm — pul bilan 1 soʻm) hisoblab chiqiladi.

Kuponlarning berilgan miqdorini nazorat qilish uchun bank muassasalari tomonidan order rasmiylashtiriladi, uning nusxasi korxonalar, muassasalar va tashkilotlarga beriladi.

Har gal navbatdagi kuponlarni olish uchun korxona, muassasa, tashkilot oldingi davrda foydalanilgan kuponlar toʻgʻrisidagi maʼlumotnoma bilan birgalikda talabnoma beradilar va belgilangan forma boʻyicha yoʻq qilib tashlash maqsadida ishlatilgan kuponlarning kartochkalarini bank muassasalariga topshiradilar.

19. Olingan kuponlarni korxonalar, tashkilotlar va muassasalarda saqlash qimmatdor qogʻozlarni saqlash toʻgʻrisidagi yoʻriqnomaga hamda “Xalq xoʻjaligida kassa operatsiyalarini yuritish tartibi toʻgʻrisida”gi Nizomga muvofiq amalga oshiriladi.

Kuponlarning kirim daftarida qayd qilinishi nominal qiymati boʻyicha kirim-chiqim nakladnoylari asosida yuritiladi va hisobga olish balansdan tashqari 004 — “Qatʼiy hisobdagi blanklar” schyotida amalga oshiriladi.

Davlat soliq organlari kooperativlar, kichik korxonalar va xoʻjalik hisobidagi boshqa tuzilmalarni moliyaviy taftish qilganlarida majburiy tartibda olingan kuponlar miqdorining ish haqi beriladigan toʻlov vedomostlariga muvofiq kelishini tekshiradilar.

Korxonalarning (tashkilotlarning, muassasalarning) moliya-xoʻjalik faoliyatini taftish qiluvchi va tekshiruvchi organlar ushbu tartibning bajarilishini nazorat qilishga majburdirlar.

Kuponlarni berish tugallangandan keyin, biroq ular bankdan olingandan keyin 5 kundan kechikmay, kuponlarni saqlash va berish uchun javobgar shaxs kuponlarning olinishi va berilishi toʻgʻrisidagi maʼlumotlarni tekshiradi.

20. Kuponli kartochkalar Oʻzbekiston Respublikasi Davlat bankining buyurtmasi bilan bosib chiqariladi. Kuponlarni bosish, hisobga olish, tashish va bankda saqlash Ichki ishlar vazirligi, respublika inkassatsiya boshqarmasi hamda ularni bosib chiqaruvchi korxonalarning maxsus nazoratida boʻladi.

Kartochkalarni hisobga olish va hisobdan chiqarish tartibi respublika banklarida buxgalteriya ucheti hisob-kitoblari rejasini qoʻllash toʻgʻrisidagi koʻrsatmalarga muvofiq belgilanadi.

Bank muassasasining rahbari, bosh buxgalteri va kassa mudiri kuponli kartochkalarni qabul qilib olish, saqlash va ularni berish qoidalariga qattiq rioya etilishini taʼminlaydilar. Kuponlarning saqlanishi uchun moddiy javobgarlik kassa mudiri zimmasiga yuklatiladi.

21. Bank muassasalari kuponlarning toʻla inkassatsiya qilinganligi, saqlanishini, keyinchalik esa ularning belgilangan tartibda ikkilamchi xomashyo korxonalariga topshirilishini taʼminlaydilar.

22. Bank muassasalari tovarlarni kuponlar boʻyicha sotish borasida belgilangan tartibning savdo tashkilotlari tomonidan bajarilishini doimo nazorat qilib turadilar. Kuponlarni qayta hisoblash chogʻida aniqlangan kamomadlar haqida banklar aybdor xodimlarni maʼmuriy-huquqiy javobgarlikka tortish uchun savdo tashkilotlari rahbarlariga xabar qiladilar.

Oʻzbekiston Respublikasi davlat banki, Oʻzbekiston sanoat qurilish banki, Oʻzbekiston dehqonchilik-sanoat bankining boshqarmalari bank muassasalarida bu masala boʻyicha ishning qanday yoʻlga qoʻyilganligini muntazam tekshirib boradilar.

Tovarlarni kuponlar boʻyicha sotishni nazorat qilish ishining qoniqarsiz yoʻlga qoʻyilganligi uchun banklarning rahbarlari va boshqa xodimlari mukofotdan mahrum etilib, maʼmuriy jazoga tortiladilar.

23. Pochta tashkilotlarining pul oʻtkazish operatsiyalari boʻyicha kuponlarni berish tartibi Oʻzbekiston Respublikasi Aloqa vazirligi tomonidan belgilanadi

24. Kuponlarni muomalaga chiqarish va ularni inkassatsiya qilish barcha bank muassasalari tomonidan amalga oshiriladi.

25. Soxta kuponlar yasaganlik uchun davlatning soxta xazina biletlarini yasashga teng darajada qonunga muvofiq jazolaniladi.

un;

makaron mahsulotlari;

guruch;

oʻsimlik moyi,

choy;

qand-shakar;

tuxum;

goʻsht va goʻsht mahsulotlari;

aroq;

kir sovun;

kalishlar;

ip-gazlama matolar (chit va xomsurp);

bolalar assortimenti (yangi tugʻilgan chaqaloqlar uchun komplektlar, oʻgʻil bolalar koʻylagi va shimi, qiz bolalar koʻylagi va yubkasi, 12 yoshgacha boʻlgan bolalar poyabzali, bolalar paypoqlari va kolgotkalari).

bolalar oziq-ovqat mahsulotlari (vrach retseptlari boʻyicha);

tirik baliq;

sut, qatiq, ivitilgan qatiq, chuchuk qatiq;

butilkalarda va quyib sotiladigan salqin ichimliklar, pivo;

tortlar, muzqaymoq;

yangi uzilgan meva-sabzavot mahsulotlari, kartoshka, shuningdek, qayta ishlangan sabzavot mahsulotlari (achitilgan-tuzlangan karam, pomidor, bodring);

konserva qilingan sharbatlar;

koʻmir, oʻtin;

omuxta em, taxtakunjara, sheluxa, barda va pivo quyqasi;

gullar, polietilen paketlar, gramplastinkalar;

vositachi doʻkonlar orqali sotiladigan ilgari foydalanilgan tovarlar;

kelin-kuyovlar uchun doʻkonlar va boʻlimlardagi tovarlar, shuningdek, marosimlar uchun koʻzda tutilgan tovarlar (mahalliy boshqaruv organlari maʼlumotnomalari boʻyicha);

matbaachilik mahsulotlari;

dorixonalarda, “Optika” doʻkonlarida sotiladigan dori-darmon vositalari, protez-ortopediya korxonalari mahsulotlari, shuningdek, nogironlar aravachalari;

topshirilgan qishloq xoʻjaligi mahsulotlariga almashtirib sotiladigan tovarlar;

kooperativlar va fuqarolar tomonidan ishlab chiqariladigan hamda mustaqil ravishda va kolxoz bozorida sotiladigan tovarlar va qishloq xoʻjaligi mahsulotlari;

tijorat narxlarida sotiladigan neft mahsulotlari;

arzonlashtirilgan konditsiyasiz buyumlar va ishlatishga yaroqli chiqindilar;

tomosha koʻrsatish muassasalari uchun ovoz kuchaytirgich apparatlar;

sport anjomlari (toshlar, bruslar, konlar, gantellar, shtanga);

noruda qurilish materiallari (qum-tosh, qum, tozalangan shagʻal, maydalangan tosh, keramzit, ohak, sement, xarsangtosh, marmar va granit plitalar);

marmar maydasi va ulardan tayyorlangan buyumlar, shlak bloklar, agloporit, mineral momiq paxta va undan tayyorlangan buyumlar, tomga yopiladigan yumshoq materiallar;

asbotsement, choʻyan, polietilen, sopol quvurlar;

temir-beton buyumlar;

gʻisht va yogʻoch materiallar (mahalliy boshqaruv organlarining qarori boʻyicha).

B.S. Hamidov — Oʻzbekiston Respublikasi Bosh vazirining oʻrinbosari — Umumiqtisodiyot kompleksining rahbari

A.N. Voznenko — Oʻzbekiston Respublikasi Bosh vazirining oʻrinbosari — Xalq isteʼmoli mollari, savdo va xizmat koʻrsatish kompleksining rahbari

E.S. Samandarov — Oʻzbekiston Respublikasi Bosh vazirining oʻrinbosari — Ijtimoiy rivojlanish va madaniyat kompleksining rahbari

T.S. Azimov — Oʻzbekiston sanoat-qurilish banki boshqaruvining raisi

B.A. Allamurodov — Oʻzbekiston Kasaba uyushmalari Federatsiyasi Kengashining raisi

Z.A. Almatov — Ichki ishlar vaziri

A.A. Ahadov — Oʻzbekiston dehqonchilik-sanoat banki boshqaruvining raisi

E.J. Boqiboyev — Moliya vaziri

G.G. Volkov — Oʻzbekbirlashuv raisi

F.M. Mullajonov — Oʻzbekiston davlat banki boshqaruvining raisi

E.T. Moʻminov — Neft mahsulotlari bilan taʼminlash davlat qoʻmitasining raisi

M.Muhammad Doʻst — OʻzA direktori

R.A. Norboyev — Mehnat vazirining oʻrinbosari

K.R. Rahimov — Aloqa vaziri

Oʻ.Q. Rahmatullayev — Oʻzbekiston jamgʻarmalar banki boshqaruvining raisi

T.H. Haydarov — Respublika pensiya fondining raisi

A. Xoʻjayeva — Ijtimoiy taʼminot vaziri

M.Z. Usmonov — Savdo vaziri