Oʻzbekiston Respublikasining “Oʻzbekiston Respublikasida chet el investitsiyalari toʻgʻrisida”gi va “Oʻzbekiston Respublikasining tashqi iqtisodiy faoliyati toʻgʻrisida”gi qonunlariga muvofiq, 1992-yilning 16-yanvaridagi Oʻzbekiston Respublikasi Hukumati bilan “Nyumont Mayning Korporeyshn” firmasi oʻrtasidagi “Zarafshon-Nyumont” qoʻshma korxonasini tuzish toʻgʻrisida shartnoma bayonnomasiga asoslanib, shuningdek, chet el investitsiyalari va ilgʻor texnologiyalarini Oʻzbekiston iqtisodiyotiga jalb qilishni, Muruntov konidagi minerallashgan jins uyumlarini xalq xoʻjaligi tasarrufiga jalb qilishni jadallashtirish uchun real asoslarni taʼminlash, oltin qazib chiqarishni koʻpaytirish, valyuta tushumlarini tezlashtirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat geologiya va mineral resurslar qoʻmitasining Oʻzbekiston tomonidan Davlat geologiya va mineral resurslar qoʻmitasi va Navoiy kon-metallurgiya kombinati hamda Amerika tomonidan “Nyumont Mayning Korporeyshn” firmalari taʼsis etgan “Zarafshon-Nyumont” qoʻshma korxonasini tashkil etish toʻgʻrisidagi taklifi qabul qilinsin.

2. Oʻzbekiston Respublikasiga valyuta tushumlarini jadallashtirish, “Zarafshon-Nyumont” qoʻshma korxonasining samarali ishlashi bilan bogʻliq masalalarni hal qilish uchun zarur shart-sharoitlarni yaratish maqsadida, bayonnomada koʻrsatilgan huquqlar bilan bir qatorda, unga quyidagi huquqlar berilsin:

oʻzi ishlab chiqargan oltinni, uning kamida 50 foizi Oʻzbekiston Respublikasida realizatsiya qilinishini nazarda tutib, dunyo bozori narxlarida erkin realizatsiya qilish;

Oʻzbekiston banklarida yoki undan tashqarida hisob-kitob schyotlarini ochish, oʻz mulki yoki mulkka egalik huquqi kafolati asosida istalgan valyutada qarz olish, mazkur qarzlar boʻyicha bitta yoki bir necha xalqaro moliya muassasasiga kerakli toʻlovlarni amalga oshirish.

3. “Zarafshon-Nyumont” qoʻshma korxonasi faoliyatining Oʻzbekiston Respublikasi iqtisodiyoti uchun ahamiyatini hisobga olib:

unga eng qulay boʻlgan rejim yaratilsin, bunda agar u roʻyxatga olingan paytdan boshlab uch yil mobaynida foydali qazilmalarni qazib chiqarish va qayta ishlash sohasida chet el investitsiyasiga ega boʻlgan boshqa har qanday korxonaga mazkur qarorda nazarda tutilganidan ham qulayroq soliq imtiyozlari berilsa, aynan shunday imtiyozlar “Zarafshon-Nyumont” qoʻshma korxonasi uchun ham taalluqli boʻlishi nazarda tutilsin;

“Zarafshon-Nyumont” qoʻshma korxonasi foyda toʻplashga erishish davrigacha qoʻshma korxona muassislarining dastlabki investitsiyalari summasi miqdorida, shuningdek, shu maqsadlar uchun jalb qilingan kreditlardan soliq toʻlashdan ozod qilinsin;

belgilab qoʻyilsinki, soliq toʻlashdan ozod qilingan davr oʻtgach, “Zarafshon-Nyumont” qoʻshma korxonasidan olinadigan soliqlarning umumiy miqdori qoʻshma korxona daromadining 10 foizidan oshmasligi kerak;

qoʻshma korxona oʻzining ishlab turishini taʼminlash bilan bogʻliq chet eldan keltiriladigan mahsulot uchun soliq toʻlashdan, mulkdan olinadigan soliqdan, qoʻshma korxonada chet elliklarning ulush qoʻshib qatnashib oladigan daromadlaridan soliq toʻlashdan ozod qilinsin;

“Zarafshon-Nyumont” korxonasi faoliyatiga nisbatan xalqaro meʼyorlarga muvofiq, agar qoʻshma korxona zarar koʻrsa, u holda solinadigan soliq miqdorini keyingi istalgan 7 yil mobaynida koʻrilgan zarar miqdoriga kamaytirish qoidasini qoʻllash nazarda tutilsin.

Belgilab qoʻyilsinki, Oʻzbekiston Respublikasida “Zarafshon-Nyumont” qoʻshma korxonasining bir maromda ishlab turish sharoitini ogʻirlashtiradigan qonun va meʼyoriy hujjatlar qabul qilingan taqdirda, qoʻshma korxonani tashkil qilish toʻgʻrisidagi bayonnoma imzolangan paytda amalda boʻlgan qonun va boshqa meʼyoriy hujjatlar hamda mazkur qarorda qabul qilingan meʼyorlar qoʻllaniladi.

4. “Zarafshon-Nyumont” qoʻshma korxonasiga hukumatning quyidagi kafolatlari belgilansin:

“Zarafshon-Nyumont” qoʻshma korxonasini tashkil etish va uning faoliyat koʻrsatishi toʻgʻrisidagi bayonnomaga muvofiq oʻzbekistonlik muassislarning barcha mulklari va boshqa majburiyatlari boʻyicha hamda hamkorlikdagi korxonaning mulk huquqlarini uchinchi tomon daʼvolaridan himoyalash kafolatlari;

oʻzbekistonlik muassislarning bayonnomada koʻrsatilgan badallarni qoʻshma korxonaning ustav fondiga toʻlab turish kafolatlari;

narxlar hamda tariflar boʻyicha kelishilgan qoidalar va shartlarga muvofiq ravishda qoʻshma korxonaga kerakli barcha ishlab chiqarish resurslarini respublika hududida belgilangan tartibda berish. Bunga zarur miqdordagi minerallashgan materiallarni sotib olish huquqi, yetarli miqdorda elektr energiyasi, suv limitlari, shuningdek, qoʻshma korxonaning ishlab chiqarish faoliyati uchun ijara shartnomasiga muvofiq yer uchastkasidan foydalanish huquqi ham kiradi;

“Zarafshon-Nyumont” qoʻshma korxonasiga kredit bergan xalqlar moliya muassasalarining va boshqa tashkilotlarning mablagʻlarini yetarlicha himoya qilish, shu jumladan, Hukumat qoʻshma korxona tomonidan qarzlar yoki uning ustav faoliyati boʻyicha toʻlovlarga cheklash belgilamasligi ham nazarda tutiladi.

5. Oʻzbekiston Respublikasi Moliya vazirligi belgilangan tartibda “Zarafshon-Nyumont” qoʻshma korxonasini huquqiy shaxs sifatida roʻyxatdan oʻtkazsin.

6. Oʻzbekiston Respublikasi Tashqi iqtisodiy aloqalar vazirligi “Zarafshon-Nyumont” qoʻshma korxonasini tashqi iqtisodiy aloqalar qatnashchisi sifatida roʻyxatdan oʻtkazsin.

7. Oʻzbekiston Respublikasi Davlat geologiya va mineral resurslar qoʻmitasi hamda Navoiy kon-metallurgiya kombinati:

qoʻshma korxonani loyihaga muvofiq oʻz vaqtida qurilishi va ishga tushirilishini taʼminlasinlar;

“Zarafshon-Nyumont” qoʻshma korxonasiga, uning butun faoliyati davomida kelishilgan hajmda, sifatda, shakllangan bahoda minerallashgan massani sotishni taʼminlasinlar;

“Zarafshon-Nyumont” qoʻshma korxonasi uchun suv taʼminoti hamda ijara shartlari boʻyicha togʻ etagi chegaralarida yer uchastkasi ajratish masalasini hal qilsinlar.

8. Oʻzbekiston Respublikasi Energetika va elektrlashtirish vazirligi “Zarafshon-Nyumont” qoʻshma korxonasini elektr quvvati isteʼmolchilarining birinchi toifasiga kiritsin.

9. Oʻzbekiston Respublikasi Aloqa vazirligi yer yoʻldoshi orqali aloqa oʻrnatishga ruxsat bersin.

10. Oʻzbekiston Respublikasi Binokorlik materiallari sanoati vazirligi “Zarafshon-Nyumont” qoʻshma korxonasi qurilishini mahalliy qurilish materiallari bilan bir qatorda sement, gʻisht, ohak bilan buyurtmaga muvofiq, amaldagi narxlar boʻyicha taʼminlasin.

11. Oʻzbekiston Respublikasi Sogʻliqni saqlash vazirligi “Zarafshon-Nyumont” qoʻshma korxonasi xodimlariga malakali tibbiy xizmat koʻrsatishni tashkil qilishda yordam bersin.

12. Belgilab qoʻyilsinki, mazkur qaror “Zarafshon-Nyumont” qoʻshma korxonasining butun faoliyati davrida amal qiladi.

13. Mazkur qarorning bajarilishini nazorat qilish Vazirlar Mahkamasining yoqilgʻi sanoati, energetika, kimyo va metallurgiya kompleksi (oʻrtoq Haqqulov)ga yuklatilsin.