Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Banklar va bank faoliyati toʻgʻrisida”gi, “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisida”gi qonunlari va Oʻzbekiston Respublikasi Prezidentining 2018-yil 23-maydagi PF-5446-son “Budjet mablagʻlaridan foydalanish samaradorligini tubdan oshirish va iqtisodiy jinoyatlarga qarshi kurashish mexanizmlarini takomillashtirish chora-tadbirlari toʻgʻrisida”gi Farmoniga muvofiq Oʻzbekiston Respublikasi Markaziy banki Boshqaruvi va Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti qaror qiladi:

1. Oʻzbekiston Respublikasi Markaziy banki Boshqaruvi va Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentining 2017-yil 17-apreldagi 343-V va 14-son qarori (roʻyxat raqami 2886, 2017-yil 23-may) (Oʻzbekiston Respublikasi qonun hujjatlari toʻplami, 2017-y., 21-son, 401-modda) bilan tasdiqlangan Tijorat banklarida jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish boʻyicha ichki nazorat qoidalariga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran uch oy oʻtgach kuchga kiradi.

1. 1-bandning oʻninchi xatboshisi quyidagi tahrirda bayon etilsin:

“maxsus vakolatli davlat organi — Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti;”.

2. 5-bandning beshinchi xatboshisi “uning tijorat bankining” degan soʻzlardan keyin “rahbariyati,” degan soʻz bilan toʻldirilsin.

3. 22-bandda:

a) “a” kichik bandda:

ikkinchi xatboshi quyidagi tahrirda bayon etilsin:

“yuridik yoki jismoniy shaxs bank hisobvaragʻini (omonatni) ochish uchun ariza bilan murojaat qilganda, tijorat banki avval taqdim etilgan, tekshirish davriga haqiqiy va verifikatsiya qilingan hujjatlari asosida lozim darajada tekshirish imkoniyati mavjud boʻlgan hollar bundan mustasno;”;

uchinchi xatboshidan “plastik” degan soʻz chiqarib tashlansin;

b) “b” kichik bandda:

beshinchi xatboshida “plastik kartalardan” degan soʻzlar “bank kartalaridan” degan soʻzlar bilan almashtirilsin;

oltinchi xatboshida “plastik kartalar” degan soʻzlar “bank kartalari” degan soʻzlar bilan almashtirilsin;

quyidagi mazmundagi xatboshi bilan toʻldirilsin:

“eng kam ish haqi miqdorining 500 baravariga teng yoki undan oshgan summada jismoniy shaxslar tomonidan Oʻzbekiston Respublikasi Markaziy bankining qimmatbaho metallardan tayyorlangan tangalarini sotib olinishida.”.

4. 38-bandning beshinchi va oltinchi xatboshilaridagi “25” raqami “50” raqami bilan almashtirilsin.

5. 45-bandning toʻrtinchi xatboshisi quyidagi tahrirda bayon etilsin:

“hisobvaraq ochayotgan shaxsning yoxud uning vakolatli vakilining shaxsan ishtirokisiz hisobvaraq ochish, tijorat banki avval taqdim etilgan, tekshiruv davriga haqiqiy va verifikatsiya qilingan hujjatlar asosida identifikatsiya qilish imkoniyati mavjud boʻlgan holatlar bundan mustasno;”.

6. 48-bandda:

oʻn uchinchi xatboshi quyidagi tahrirda bayon etilsin:

“mijoz tomonidan operatsiya amalga oshirilish kuniga belgilangan eng kam ish haqining 500 baravari miqdoriga teng yoki undan oshadigan umumiy summada bajarilayotgan operatsiyalarga oʻxshash operatsiyalarning summalari asossiz taqsimlanishi;”;

oʻn beshinchi xatboshi chiqarib tashlansin;

oʻn oltinchi — yigirma uchinchi xatboshilar tegishlicha oʻn beshinchi — yigirma ikkinchi xatboshilar deb hisoblansin;

oʻn oltinchi xatboshi quyidagi tahrirda bayon etilsin:

“jismoniy shaxs tomonidan operatsiya amalga oshirilish kuniga belgilangan eng kam ish haqining 500 baravari miqdoriga teng yoki undan oshadigan summada naqd pul koʻrinishidagi pul mablagʻlarini yuridik shaxsning yoki yakka tartibdagi tadbirkorning bank hisobvaragʻiga qarz, moliyaviy yordam, ustav fondi (kapital)ga qoʻyilma sifatida kiritilishi yoxud aylanma mablagʻlarini toʻldirilishi;”;

oʻn yettinchi xatboshi chiqarib tashlansin;

oʻn sakkizinchi — yigirma ikkinchi xatboshilar tegishlicha oʻn toʻqqizinchi — yigirma birinchi xatboshilar deb hisoblansin;

oʻn yettinchi xatboshidagi “500” raqami “1000” raqami bilan almashtirilsin;

oʻn sakkizinchi xatboshi quyidagi tahrirda bayon etilsin:

“jismoniy shaxslarning hisobvaraqlariga yuridik shaxslar yoki yakka tartibdagi tadbirkorlar hisobvaraqlaridan operatsiya amalga oshirilish kuniga belgilangan eng kam ish haqining 1000 baravari miqdoriga teng yoki undan oshadigan summadagi pul mablagʻlarining dividend yoki daromad sifatida koʻchirilishi;”;

yigirmanchi xatboshidagi “100” raqami “500” raqami bilan almashtirilsin;

quyidagi mazmundagi xatboshi bilan toʻldirilsin:

“pul mablagʻlarini Oʻzbekiston Respublikasi hududidan tashqariga, oluvchi roʻyxatdan oʻtgan joydan farqlanuvchi hududda joylashgan bankda ochilgan oluvchining hisobvaragʻiga oʻtkazilishi.”.

7. 49-bandda:

uchinchi va toʻrtinchi xatboshilar quyidagi tahrirda bayon etilsin:

“jismoniy shaxslar tomonidan (shu jumladan, bir nechta jismoniy shaxslar tomonidan bir kontragent nomiga), shu jumladan, pul oʻtkazmalari tizimlari orqali bir vaqtda yoki koʻp marotaba 1 oydan oshmagan muddat davomida eng kam ish haqining 500 baravari miqdoriga teng yoki undan oshadigan umumiy summada chet el valyutasida chet eldan joʻnatilgan pul mablagʻlari olinishi yoki chet elga pul mablagʻlari joʻnatilishi;

jismoniy shaxslar va/yoki yakka tartibdagi tadbirkorlar tomonidan bir vaqtda yoki koʻp marotaba 1 oydan oshmagan muddat davomida eng kam ish haqining 500 baravari miqdoriga teng yoki undan oshadigan umumiy summada chet el valyutasidagi pul mablagʻlari sotilishi, sotib olinishi yoki xalqaro toʻlov kartalaridan yechib olinishi;”;

toʻqqizinchi xatboshi chiqarib tashlansin;

oʻninchi — oʻn birinchi xatboshilar tegishlicha toʻqqizinchi — oʻninchi deb hisoblansin;

quyidagi mazmundagi xatboshilar bilan toʻldirilsin:

“norezident tomonidan rezidentga grantlar, moliyaviy yordam, qarz yoki begʻaraz yordam sifatida pul mablagʻlari berilishi;

operatsiya bajaruvchi tomonlardan biri faol terroristik harakatlar olib borilayotgan hududlarda doimiy yashayotgan, turgan yoki roʻyxatga olingan shaxs boʻlsa (mamlakatlar va tumanlar roʻyxati maxsus vakolatli davlat organi tomonidan taqdim qilinadi);

terroristik tusdagi jinoyatni sodir etganligi uchun xalqaro qidiruvda boʻlgan shaxslarning operatsiyalari (shaxslar roʻyxati maxsus vakolatli davlat organi tomonidan taqdim qilinadi);

yangi tashkil etilganiga uch oydan koʻp boʻlmagan yuridik shaxs — mijozning uning faoliyati xarakteriga muvofiq boʻlmagan maqsadlarda pul aylanmasi eng kam ish haqining 20000 baravari miqdoriga teng yoki undan oshsa;

jismoniy shaxslar tomonidan bir vaqtda yoki 1 oydan oshmagan muddat davomida koʻp marotaba eng kam ish haqining 500 baravari miqdoriga teng yoki undan oshadigan umumiy summada Markaziy bankning qimmatbaho metallardan tayyorlangan tangalarini sotib olinishi.”.

8. 54-bandning toʻrtinchi xatboshisi “geografik hududlar” degan soʻzlardan keyin “, shuningdek mahsulot va xizmatlar yetkazish kanallari” degan soʻzlar bilan toʻldirilsin.

9. 55-bandning “v” kichik bandidagi “fuqarolari boʻlmagan jismoniy shaxslar” degan soʻzlar “norezident — jismoniy shaxslar” degan soʻzlar bilan almashtirilsin.

10. 67-bandda:

birinchi xatboshidagi “bank boshqaruvi raisiga” degan soʻzlarni “tijorat banki rahbariyatiga” degan soʻzlar bilan almashtirilsin;

quyidagi mazmundagi xatboshi bilan toʻldirilsin:

“Rahbariyatni xabardor qilish tartibi va shakli tijorat bankining ichki qoidalari bilan belgilanadi.”.

11. 84-bandning birinchi xatboshisi quyidagi tahrirda bayon etilsin:

“84. Barcha mijozlar (lozim darajada tekshirish talab etilmaydigan mijozlar bundan mustasno) boʻyicha anketalar maxsus dasturlar yordamida elektron shaklda toʻldiriladi. Gumonli va (yoki) shubhali operatsiyalarni amalga oshiruvchi va yuqori tavakkalchilik darajasi toifasiga kiritilgan mijozlar boʻyicha anketalar reyestri elektron shaklda yuritiladi.”.

12. 85-banddan ikkinchi xatboshisi chiqarib tashlansin.