Oʻzbekiston Respublikasi Prezidentining 2018-yil 5-iyuldagi PQ-3839-son “Oʻzbekiston Respublikasining tashqi mehnat migratsiya tizimini yanada takomillashtirish boʻyicha qoʻshimcha chora-tadbirlar toʻgʻrisida”gi qaroriga muvofiq buyuraman:

1. Xususiy mehnat shartnomalari boʻyicha mehnat faoliyatini amalga oshirish uchun xorijga ketayotgan, shuningdek xorijda mehnat faoliyatini amalga oshirayotgan fuqarolarning ixtiyoriy roʻyxatdan oʻtish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2018-yil 5-iyuldagi PQ-3839-son “Oʻzbekiston Respublikasining tashqi mehnat migratsiya tizimini yanada takomillashtirish boʻyicha qoʻshimcha chora-tadbirlar toʻgʻrisida”gi qaroriga muvofiq xususiy mehnat shartnomalari boʻyicha mehnat faoliyatini amalga oshirish uchun xorijga ketayotgan, shuningdek xorijda mehnat faoliyatini amalga oshirayotgan fuqarolarning (bundan buyon matnda Fuqaro deb yuritiladi) ixtiyoriy roʻyxatdan oʻtish tartibini belgilaydi.

1. Fuqarolarning roʻyxatdan oʻtishlari ixtiyoriy hisoblanadi va elektron shaklda amalga oshiriladi.

2. Fuqarolarning roʻyxatdan oʻtishlarini elektron tizimda amalga oshirish, shuningdek elektron tizimning xarajatlarini qoplash va uni doimiy ravishda takomillashtirib borish maqsadida roʻyxatdan oʻtish uchun fuqaro tomonidan Oʻzbekiston Respublikasida belgilangan eng kam oylik ish haqining bir barobari miqdorida toʻlov amalga oshiriladi.

3. Fuqaro roʻyxatdan oʻtish uchun internet tarmogʻiga ulangan holda Tashqi mehnat migratsiyasi agentligining rasmiy veb-saytiga (www.migration.uz) ulanadi.

4. Saytda Fuqaroga roʻyxatdan oʻtishda qaysi tildan foydalanishni tanlash taklif etiladi. Fuqaro oʻziga qulay boʻlgan til koʻrsatilgan tugmani bosadi.

5. Fuqaroga Jismoniy shaxslar maʼlumotlar bazasi (id.gov.uz) orqali avtorizatsiyadan oʻtish taklif etiladi. Bunda Fuqaro “avtorizatsiya” tugmasini bosishi lozim.

6. Fuqaroga jismoniy yoki yuridik shaxs sifatida faoliyat yuritmoqchiligini tanlash taklif etiladi. Fuqaro tegishli tugmani belgilaydi va “Tanlash” tugmasini bosadi, bunda u shaxsiy kabinetga oʻtadi.

7. Shaxsiy kabinetda onlayn xizmatlar boʻlimida konsullik hisobiga turish uchun “Konsullik hisobiga turish uchun maʼlumotnoma olish” tugmasini bosadi. Mazkur tugma bosilganda Fuqaroga Oʻzbekiston Respublikasi fuqarosining xorijiy davlatda ishga joylashishi toʻgʻrisidagi Guvohnomaning shakli taqdim etiladi.

8. Fuqaro mazkur shakldagi “doimiy yashash joyi” hamda “mehnat faoliyati toʻgʻrisidagi maʼlumotlar” deb nomlangan qatorni toʻldiradi.

Bunda, Fuqaro “doimiy yashash joyi” qismida davlat, shahar va manzil deb nomlangan qatorlarga, shuningdek “mehnat faoliyati toʻgʻrisidagi maʼlumotlar” qismida davlat, shahar, manzil, korxona nomi, lavozimi va kasbi, mehnat faoliyatini boshlagan vaqti va oylik ish haqi deb nomlangan qatorlarga oʻzi haqidagi maʼlumotlarni toʻgʻri va toʻliq kiritadi. Fuqaro mazkur shaklda “qoʻshimcha maʼlumotlar” deb nomlangan qatorga oʻzi haqidagi qoʻshimcha maʼlumotlarni kiritishi mumkin.

9. Fuqaro tomonidan oʻzi haqidagi maʼlumotlar kiritilgandan keyin u oʻzi uchun qulay boʻlgan elektron toʻlov turini tanlaydi va onlayn toʻlov va qabul qilish tugmasini bosadi.

10. Fuqaroga toʻlanishi lozim boʻlgan pul miqdori (eng kam oylik ish haqining bir barobari) koʻrsatilgan sahifa taqdim etiladi. Fuqaro “davom ettirish” tugmasini bosadi. Fuqaroga u tomonidan tanlangan toʻlov turi boʻyicha maʼlumotlarni kiritish maydonchalari taqdim qilinadi.

11. Fuqaro toʻlovni amalga oshirish uchun toʻlov plastik kartasining maʼlumotlarini kiritadi hamda davom ettirish tugmasini bosadi.

12. Fuqaro tomonidan toʻlov amalga oshirilgandan keyin Fuqaroga Guvohnomaning elektron shakli taqdim etiladi.

Guvohnoma Fuqaroning xorijiy davlatda mehnat faoliyatini amalga oshirish shartnomasi amal qilishi muddatiga muvofiq amal qiladi.

13. Oʻzbekiston Respublikasi Prezidentining 2018-yil 5-iyuldagi PQ-3839-son “Oʻzbekiston Respublikasining tashqi mehnat migratsiya tizimini yanada takomillashtirish boʻyicha qoʻshimcha chora-tadbirlar toʻgʻrisida”gi qaroriga asosan xorijda mehnat faoliyatini amalga oshiruvchi fuqarolar tomonidan Oʻzbekiston Respublikasi Moliya vazirligi huzuridagi Budjetdan tashqari pensiya jamgʻarmasiga eng kam ish haqining toʻrt yarim baravari miqdorida yillik sugʻurta toʻlovlarini ixtiyoriy ravishda toʻlash tartibi joriy etiladi, bunda toʻlovlar amalga oshirilgan davrlar belgilangan tartibda mehnat stajiga qoʻshiladi.

14. Oʻzbekiston Respublikasi Prezidentining 2018-yil 5-martdagi PQ-3584-son “Oʻzbekiston Respublikasi fuqarolarining vaqtinchalik mehnat faoliyatini amalga oshirish uchun respublika tashqarisiga transportda chiqish vaqtida xavfsizligini taʼminlash chora-tadbirlari toʻgʻrisida”gi qaroriga muvofiq Tashqi mehnat migratsiyasi agentligining elektron bazasida roʻyxatdan oʻtgan vaqtinchalik mehnat faoliyatini amalga oshirish uchun xorijga ketayotgan fuqarolarga “Oʻzbekiston temir yoʻllari” AJ tomonidan platskart va umumiy vagonlarga temir yoʻl chiptalariga hamda “Oʻzbekiston havo yoʻllari” MAK tomonidan fuqarolar uchun ekonom klass aviachiptalarining narxlariga 20 foiz chegirmalar taqdim etiladi.

15. Oʻzbekiston Respublikasi Prezidentining 2018-yil 5-martdagi PQ-3584-son “Oʻzbekiston Respublikasi fuqarolarining vaqtinchalik mehnat faoliyatini amalga oshirish uchun respublika tashqarisiga transportda chiqish vaqtida xavfsizligini taʼminlash chora-tadbirlari toʻgʻrisida”gi qaroriga asosan Tashqi mehnat migratsiyasi agentligining elektron bazasida roʻyxatdan oʻtgan vaqtinchalik mehnat faoliyatini amalga oshirish uchun xorijga ketayotgan fuqarolarga “Aloqabank” AK tomonidan soddalashtirilgan ochish shartlari, xizmat koʻrsatish uchun minimal vositachilik haqi va “nol” summadagi kafolat depoziti bilan “VISA-migrant” bank plastik kartalari chiqariladi va xizmat koʻrsatiladi, shuningdek yiliga bir marotaba bir martalik temir yoʻl va aviachiptalar olish uchun boʻlgan xarajatlar 2018-2019-yillarda 300 ming soʻmgacha miqdorda qisman qoplanadi.

16. Mazkur Nizomning talablarini buzilishida aybdor shaxslar qonunchilikda belgilangan tartibda javobgarlikka tortiladi.