Oʻzbekiston Respublikasi Soliq kodeksi, Oʻzbekiston Respublikasi “Davlat soliq xizmati toʻgʻrisida”gi Qonunining 7-moddasi va Oʻzbekiston Respublikasi Prezidentining 2018-yil 7-fevraldagi PQ-3514-son “Ichki turizmni jadal rivojlantirishni taʼminlash chora-tadbirlari toʻgʻrisida”gi qaroriga muvofiq Oʻzbekiston Respublikasi Moliya vazirligi, Davlat soliq qoʻmitasi va Oʻzbekiston Respublikasi Turizmni rivojlantirish davlat qoʻmitasi qaror qiladi:

1. Xoʻjalik yurituvchi subyektlarning soliq solinadigan bazasini alohida xarajatlari boʻyicha kamaytirish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga qiradi.

Mazkur Nizom Oʻzbekiston Respublikasi Soliq kodeksi va Oʻzbekiston Respublikasi Prezidentining 2018-yil 7-fevraldagi PQ-3514-son “Ichki turizmni jadal rivojlantirishni taʼminlash chora-tadbirlari toʻgʻrisida”gi qaroriga muvofiq xoʻjalik yurituvchi subyektlarning soliq solinadigan bazasini alohida xarajatlari boʻyicha kamaytirish tartibini belgilaydi.

1. Oʻzbekiston Respublikasi Prezidentining 2018-yil 7-fevraldagi PQ-3514-son “Ichki turizmni jadal rivojlantirishni taʼminlash chora-tadbirlari toʻgʻrisida”gi qarorining 15-bandiga muvofiq soliq solinadigan baza quyidagi summalarga kamaytiriladi:

100 million soʻmgacha — xoʻjalik yurituvchi subyektlarning 2020-yilning 1-yanvariga qadar sanitariya qoidalari, meʼyorlari va gigiyena normativlariga muvofiq keladigan zamonaviy sanitariya-gigiyena tarmoqlarini qayta tiklash, kapital taʼmirlash va qurishga yoʻnaltirilgan xarajatlari;

12 million soʻmgacha — har yili 2025-yilning 1-yanvariga qadar xoʻjalik yurituvchi subyektlarning sanitariya qoidalari, meʼyorlari va gigiyena normativlariga muvofiq keladigan sanitariya-gigiyena tarmoqlarini (farroshlar ish haqi, gigiyena, tozalash va yuvish vositalarini sotib olish, kommunal xarajatlarni toʻlash), turizm infratuzilmasi obyektlarini (tarixiy va meʼmoriy yodgorliklar, muzeylar, teatrlar, madaniyat uylari, umumiy ovqatlanish punktlari, xizmat koʻrsatish obyektlari, avtomobillarga yoqilgʻi quyish shoxobchalari, avtomobillar uchun vaqtincha toʻxtash joylari, yoʻlboʻyi infratuzilmasining servis xizmatlar koʻrsatiladigan hududlari, bozorlar, rastalar, doʻkonlar va odamlar gavjum boʻladigan boshqa joylarni) saqlashga yoʻnaltirilgan xarajatlari.

2. Soliq solinadigan bazaning kamaytirilishi foyda soligʻi va aylanmadan olinadigan soliq boʻyicha amalga oshiriladi.

3. Ushbu Nizomning 1-bandi ikkinchi xatboshisida belgilangan soliq solinadigan bazaning 100 million soʻmgacha kamayishi, bir martalik yoki qismlarga boʻlingan holda, 2020-yil 1-yanvar muddatigacha amalga oshiriladi.

4. Ushbu Nizomning 1-bandi uchinchi xatboshisida belgilangan soliq solinadigan bazaning 12 million soʻmgacha kamayishi har yili 2025-yil 1-yanvargacha amalga oshiriladi.

5. Ushbu Nizomning 3-bandida koʻrsatilgan imtiyozga ega boʻlish uchun soliq toʻlovchi sanitariya-gigiyenik tarmoqlarning sanitariya qoidalari, meʼyorlari va gigiyena normativlariga muvofiqligi toʻgʻrisida Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasining Qoraqalpogʻiston Respublikasi, viloyatlar va Toshkent shahar boshqarmalari, tuman (shahar) boʻlimlarining xulosasini (bundan buyon matnda Sanepidqoʻmning hududiy boshqarmalari va tuman (shahar) boʻlimlarining xulosasi deb yuritiladi) olishi lozim.

Sanitariya qoidalari, normalari va gigiyena normativlariga muvofiq keladigan zamonaviy sanitariya-gigiyenik tarmoqlarini qayta tiklash, kapital taʼmirlash va qurish tegishli soliq boʻyicha bir nechta hisobot davrlarida olib borilgan hollarda, soliq solinadigan bazasini kamaytirishni ishlar yakunlanganidan keyin Sanepidqoʻmning hududiy boshqarmalari va tuman (shahar) boʻlimlarining xulosasini taqdim etish sharti bilan amalga oshirishga ruxsat etiladi.

Bunda soliq toʻlovchi tomonidan 2020-yil 1-fevralgacha Sanepidqoʻmning hududiy boshqarmalari va tuman (shahar) boʻlimlarining xulosasi olinmagan taqdirda, soliq toʻlovchining ushbu obyektning tegishli qismiga nisbatan soliq solinadigan bazasini kamaytirishga boʻlgan imtiyoz bekor qilinadi va u soliq solinadigan bazasining kamaytirilgan davrlari uchun aniqlashtirilgan soliq hisobotlarini qonunchilik hujjatlarida belgilangan tartibda taqdim etishi lozim.

6. Ushbu Nizomning 3-bandiga muvofiq soliq solinadigan bazasi hujjatlar bilan tasdiqlangan, sanitariya qoidalari, normalari va gigiyena normativlariga muvofiq keladigan zamonaviy sanitariya-gigiyenik tarmoqlarini qayta tiklash, kapital taʼmirlash yoki qurish bilan bogʻliq xarajatlar summasiga kamaytiriladi.

7. Mazkur Nizomning 4-bandida koʻrsatilgan imtiyoz, soliq toʻlovchi tomonidan Sanepidqoʻmning hududiy boshqarmalari va tuman (shahar) boʻlimlarining xulosasini olganidan keyin, taqdim etiladi.

8. Ushbu Nizomning 4-bandiga muvofiq soliq solinadigan bazasi sanitariya qoidalari, meʼyorlari va gigiyena normativlariga muvofiq keladigan sanitariya-gigiyena tarmoqlarini (farroshlar ish haqi, gigiyena, tozalash va yuvish vositalarini sotib olish, kommunal xarajatlarni toʻlash), turizm infratuzilmasi obyektlarini (tarixiy va meʼmoriy yodgorliklar, muzeylar, teatrlar, madaniyat uylari, umumiy ovqatlanish punktlari, xizmat koʻrsatish obyektlari, avtomobillarga yoqilgʻi quyish shoxobchalari, avtomobillar uchun vaqtincha toʻxtash joylari, yoʻl boʻyi infratuzilmasining xizmatlar koʻrsatiladigan hududlari, bozorlar, rastalar, doʻkonlar va odamlar gavjum boʻladigan boshqa joylarni) saqlashga yoʻnaltirilgan xarajatlarining hujjatlar bilan tasdiqlangan summasiga kamaytiriladi.

Sanitariya-gigiyenik tarmoqlarni saqlashga yoʻnaltirilgan xarajatlarni aniqlash imkoniyati boʻlmagan hollarda, ular sanitariya-gigiyenik tarmoqlarning farroshlar xizmat koʻrsatadigan umumiy maydonga nisbati (yigʻishtirish boʻyicha xarajatlarni hisoblash vaqtida) yoki xoʻjalik yurituvchi subyekt tomonidan band etilgan umumiy maydonga nisbati (kommunal toʻlovlarni aniqlash vaqtida) bilan belgilanadi.

9. Ushbu Nizom talablarini buzishda aybdor shaxslar qonunchilik hujjatlariga muvofiq javobgarlikka tortiladi.

10. Soliq imtiyozlarini toʻgʻri qoʻllanish ustidan nazorat davlat soliq xizmati organlari tomonidan qonunchilik hujjatlariga muvofiq amalga oshiriladi.

11. Ushbu Nizom Oʻzbekiston Respublikasi Sogʻliqni saqlash vazirligi va Savdo-sanoat palatasi bilan kelishilgan.