Mamlakatda anʼanaviy va akademik musiqa hamda raqs sanʼatini rivojlantirish, ijrochilarning kasb mahoratini oshirish va iqtidorli yoshlarni aniqlash uchun shart-sharoitlar hamda imkoniyatlar yaratilgan, musiqa ijrochilari va raqs jamoalari ijodini har tomonlama qoʻllab-quvvatlash hamda ragʻbatlantirish taʼminlanmoqda.

Shu bilan birga, musiqa va raqs sanʼatini rivojlantirishni qoʻllab-quvvatlash boʻyicha davlat siyosatining vazifalarini kompleks hal etish ushbu sohadagi boshqaruv tizimini takomillashtirish zarurligini taqozo etmoqda.

Shuningdek, badiiy jamoalar va orkestrlarning moddiy-texnika bazasini yanada mustahkamlash, sanʼatni ommalashtirishning lozim darajadagi tizimini yaratish masalalarini hal etish ehtiyoji mavjud.

Xalqimizning maʼnaviy saviyasini oshirish, oʻsib kelayotgan avlodni musiqa-estetik jihatdan tarbiyalash tizimini takomillashtirish hamda milliy, mumtoz va zamonaviy sanʼatni targʻib qilish maqsadida:

1. Oʻzbekiston Respublikasi Madaniyat vazirligi, Moliya vazirligi, Qoraqalpogʻiston Respublikasi Vazirlar Kengashi va viloyatlar hokimliklarining:

Oʻzbekiston badiiy jamoalari ijodiy birlashmasi, Oʻzbekiston milliy simfonik, kamerli va xalq cholgʻu asboblari orkestrlari jamoalari birlashmasi hamda “Turkiston” sanʼat saroyi negizida davlat muassasasi shaklida Oʻzbekiston Respublikasi Madaniyat vazirligi huzuridagi Oʻzbekiston davlat filarmoniyasini (keyingi oʻrinlarda Davlat filarmoniyasi deb yuritiladi);

akademik va xalq badiiy jamoalari direksiyalari, birlashmalari negizida Davlat filarmoniyasining Qoraqalpogʻiston Respublikasidagi hamda viloyatlardagi hududiy boʻlinmalarini tashkil etish toʻgʻrisidagi takliflari maʼqullansin.

2. Belgilab qoʻyilsinki:

Davlat filarmoniyasi Oʻzbekiston badiiy jamoalari ijodiy birlashmasi, Oʻzbekiston milliy simfonik, kamerli va xalq cholgʻu asboblari orkestrlari jamoalari birlashmasi hamda “Turkiston” sanʼat saroyining barcha huquq, majburiyat va shartnomalari boʻyicha huquqiy vorisi hisoblanadi;

Davlat filarmoniyasining Qoraqalpogʻiston Respublikasidagi hamda viloyatlardagi hududiy boʻlinmalari tegishli akademik va xalq badiiy jamoalari direksiyalari, birlashmalarining huquqiy vorisi hisoblanadi.

3. Quyidagilar Davlat filarmoniyasining asosiy vazifalari etib belgilansin:

milliy, mumtoz va zamonaviy musiqa hamda raqs sanʼatini ilgʻor yutuqlar asosida rivojlantirish;

aholining musiqa va raqs sanʼatiga boʻlgan maʼnaviy ehtiyojini lektoriy, konsert ishlari hamda musiqiy-maʼrifiy ishlar orqali shakllantirish va qondirish;

musiqa va raqs sanʼati sohasidagi ijodkorlarning samarali ish yuritishi uchun shart-sharoitlar yaratish;

musiqa va raqs sanʼatidagi yutuqlarni Oʻzbekistonda va xorijda targʻib qilish;

Davlat filarmoniyasi repertuarini milliy va xorijiy mumtozning eng sara namunalari bilan toʻldirish;

musiqiy-maʼrifiy ishlar orqali barkamol shaxsni shakllantirish, aholini estetik va axloqiy tarbiyalash, isteʼdodli yoshlarni qoʻllab-quvvatlash va ragʻbatlantirish;

barcha turdagi va janrdagi musiqa hamda raqs sanʼatini faol targʻib qilish, ularni radio va televideniye, boshqa ommaviy axborot vositalari orqali, shu jumladan Internet tarmogʻida ommalashtirish;

aholini madaniy hayotga jalb etish maqsadida ularning barcha qatlamlari uchun konsert tadbirlariga borish imkoniyatlarini taʼminlash;

musiqa va raqs jamoalari hamda ijrochilarining badiiy darajasi va kasb mahoratini takomillashtirish.

4. Quyidagilar:

Oʻzbekiston davlat filarmoniyasining tuzilmasi 1-ilovaga muvofiq;

Oʻzbekiston davlat filarmoniyasi Qoraqalpogʻiston Respublikasi boʻlinmasining tuzilmasi hamda Oʻzbekiston davlat filarmoniyasi viloyatlar boʻlinmalarining namunaviy tuzilmasi 1 va 2-ilovalarga muvofiq;

Oʻzbekiston davlat filarmoniyasiga operativ boshqarish uchun beriladigan bino va inshootlar roʻyxati 3-ilovaga muvofiq tasdiqlansin.

Oʻzbekiston Respublikasi madaniyat vaziriga, zarur hollarda, Davlat filarmoniyasining tuzilmasiga, shuningdek, Davlat filarmoniyasi Qoraqalpogʻiston Respublikasi boʻlinmasi va viloyatlar boʻlinmalarining tegishincha tuzilmasi hamda namunaviy tuzilmalariga xodimlarning tasdiqlangan umumiy cheklangan soni va mehnatga haq toʻlash fondi doirasida oʻzgartirishlar kiritish huquqi berilsin.

5. Oʻzbekiston Respublikasi Vazirlar Mahkamasiga bir oy muddatda Oʻzbekiston davlat filarmoniyasining, jumladan, moddiy-texnika bazasini mustahkamlashni nazarda tutgan holda, uning faoliyatini rivojlantirish boʻyicha chora-tadbirlar dasturini tasdiqlasin.

6. Quyidagilar Davlat filarmoniyasi va uning hududiy boʻlinmalari faoliyatini moliyalashtirish manbalari etib belgilansin:

Oʻzbekiston Respublikasi Davlat budjeti mablagʻlari;

konsert-tomosha faoliyatidan tushumlar;

yuridik va jismoniy shaxslarning homiylik xayriyalari;

xalqaro moliya institutlari hamda donor tashkilotlar grantlari;

qonun hujjatlarida taqiqlanmagan boshqa manbalar.

Belgilansinki, Oʻzbekiston Respublikasi Davlat budjeti mablagʻlari Davlat filarmoniyasi va uning hududiy boʻlinmalarini saqlash, jumladan, moddiy-texnika taʼminot uchun ularning oʻz daromadlari bilan qoplanmagan xarajatlarini qoplash maqsadida ajratiladi.

7. Davlat filarmoniyasi va uning hududiy boʻlinmalari artistlari hamda badiiy xodimlariga Oʻzbekiston Respublikasi Prezidentining 1995-yil 20-oktabrdagi “Oʻzbekistonda teatr va musiqa sanʼatini yanada rivojlantirishni qoʻllab-quvvatlash va ragʻbatlantirish chora-tadbirlari toʻgʻrisida”gi PF-1280-son Farmonining amal qilishi, artistlar hamda badiiy xodimlarning avvalgi ish joylarida uzoq muddat xizmat qilgani saqlab qolingan holda, tatbiq etilsin.

8. Belgilansinki, Davlat filarmoniyasi va uning hududiy boʻlinmalari, qonun hujjatlari talablariga rioya qilgan holda, konsert-tomosha faoliyatini tegishli litsenziyani olmasdan, shuningdek, Oʻzbekiston Respublikasida konsert-tomosha tadbirlarini bir martalik ruxsatnoma olmasdan amalga oshirish huquqiga ega.

9. Oʻzbekiston Respublikasi Moliya vazirligi Davlat filarmoniyasiga samarali konsert-tomosha tadbirlari oʻtkazilishini taʼminlash uchun ikkita yengil avtomobil, ikkita katta sigʻimdagi avtobus va bitta yuk avtomobili xarid qilish uchun mablagʻlar ajratsin.

10. Davlat filarmoniyasi Toshkent shahri, Navoiy koʻchasi, 2-uy manzilida joylashtirilsin.

11. Oʻzbekiston Respublikasi Prezidentining 2017-yil 15-fevraldagi “Oʻzbekiston Respublikasi Madaniyat vazirligi faoliyatini tashkil etish toʻgʻrisida”gi PQ-2778-son qaroriga 4-ilovaga muvofiq oʻzgartishlar kiritilsin.

12. Oʻzbekiston Respublikasi Madaniyat vazirligi:

bir oy muddatda Davlat filarmoniyasi ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin;

Oʻzbekiston Respublikasi Bandlik va mehnat munosabatlari vazirligi, Moliya vazirligi bilan birgalikda bir oy muddatda Davlat filarmoniyasi hamda uning hududiy boʻlinmalari namunaviy shtatlarini tasdiqlasin;

manfaatdor idoralar bilan birgalikda bir oy muddatda qonun hujjatlariga mazkur qarordan kelib chiqadigan oʻzgartish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

13. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi X.M. Sultonov va Oʻzbekiston Respublikasi madaniyat vaziri B.S. Sayfullayev zimmasiga yuklansin.

1. Oʻzbekiston badiiy jamoalari ijodiy birlashmasining Toshkent shahar, Yakkasaroy tumani, Shota Rustaveli koʻchasi, 25-uy manzilida joylashgan binosi.

2. Oʻzbekiston badiiy jamoalari ijodiy birlashmasining Toshkent shahar, Yunusobod tumani, Amir Temur koʻchasi, 119-uy, “B” korpus manzilida joylashgan binosi.

3. Oʻzbekiston milliy simfonik, kamerli va xalq cholgʻu asboblari orkestrlari jamoalari birlashmasining Toshkent shahar, Yashnobod tumani, Mirzo Ulugʻbek koʻchasi, 2-uy manzilida joylashgan binosi (“Musiqa saroyi”).

4. Toshkent shahar, Navoiy koʻchasi, 2-uy manzilida joylashgan “Turkiston” sanʼat saroyi.

1. 1-ilovaning rus tilidagi matni quyidagi tahrirda bayon etilsin:

2. 2-ilovaning rus tilidagi matni quyidagi tahrirda bayon etilsin: