Oʻzbekiston Respublikasi Prezidentining “Yoqilgʻi-energetika resurslari hamda boshqa yuqori likvidli mahsulotlar bilan taʼminlash borasida raqobat muhitini takomillashtirish, suiisteʼmolchiliklar va talon-tarojliklar sharoitini tugatish, toʻlov intizomini mustahkamlash, debitorlik va kreditorlik qarzlarini kamaytirish chora-tadbirlari toʻgʻrisida” 2017-yil 14-noyabrdagi PQ-3386-son, Vazirlar Mahkamasining “Yoqilgʻi-energetika resurslari bilan oʻz vaqtida taʼminlash boʻyicha qoʻshimcha chora-tadbirlar toʻgʻrisida” 2017-yil 14-noyabrdagi 913-son qarorlariga muvofiq, Toshkent shahrining shahar yoʻlovchi tashish transporti tashkilotlarini qoʻllab-quvvatlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Yoqilgʻi-energetika resurslari hamda boshqa yuqori likvidli mahsulotlar bilan taʼminlash borasida raqobat muhitini takomillashtirish, suiisteʼmolchiliklar va talon-tarojliklar sharoitini tugatish, toʻlov intizomini mustahkamlash, debitorlik va kreditorlik qarzlarini kamaytirish chora-tadbirlari toʻgʻrisida” 2017-yil 14-noyabrdagi PQ-3386-son qarori bilan Toshkent shahrida transportda tashuvlarga tariflarning keskin oshishiga yoʻl qoʻymaslik maqsadida Oʻzbekiston Respublikasi Moliya vazirligi tomonidan Oʻzbekiston Respublikasi Davlat budjeti mablagʻlari hisobiga 2017-2018-yillarda “Toshshahartransxizmat” AJga subsidiyalar ajratish nazarda tutilganligi maʼlumot uchun qabul qilinsin.

2. Belgilab qoʻyilsinki, Oʻzbekiston Respublikasi Davlat budjetidan ajratiladigan mablagʻlar hisobiga:

2017-yil 15-noyabrdan keyin “Toshshahartransxizmat” AJ tashkilotlari tomonidan sotib olinayotgan hamda muntazam harakatlanadigan shahar yoʻlovchi, navbatchi, xoʻjalik tashuvlarini bajarish, shuningdek, avtobuslarni servis xizmatlari koʻrsatishga yoʻnaltirish uchun foydalanilayotgan dizel yonilgʻisi qiymatidagi tafovut summasiga subsidiya beriladi;

yuridik va jismoniy shaxslarning buyurtmanomalariga binoan soatbay va boshqa tijorat tashuvlari boʻyicha “Toshshahartransxizmat” AJ tashkilotlari tomonidan xizmatlar koʻrsatishda foydalaniladigan yonilgʻiga xarajatlarga subsidiya berilmaydi.

3. Oʻzbekiston Respublikasi Moliya vazirligi “Toshshahartransxizmat” AJga uning asoslangan hisob-kitoblariga koʻra, Oʻzbekiston Respublikasi Davlat budjeti mablagʻlari hisobiga “Toshshahartransxizmat” AJ tashkilotlari tomonidan 2017-yilda sotib olingan va 2018-yilda sotib olinadigan dizel yonilgʻisi qiymatidagi narx tafovutini qoplash uchun subsidiyalar ajratilishini taʼminlasin.

4. Shunday tartib oʻrnatilsinki, unga muvofiq “Toshshahartransxizmat” AJ subsidiyalar olish uchun har oyda Toshkent shahri hokimligining Moliya bosh boshqarmasiga quyidagi hujjatlarni taqdim etadi:

“Toshshahartransxizmat” AJ tashkilotlari boʻyicha sotib olingan dizel yonilgʻisi miqdori va qiymati toʻgʻrisidagi axborotni 1-ilovaga* muvofiq shakl boʻyicha;

“Toshshahartransxizmat” AJ tashkilotlarining hamda neft mahsulotlari sotishni amalga oshiruvchi “Oʻzneftmahsulot” AJning tegishli tashkilotlari masʼul shaxslari imzolari bilan tasdiqlangan, olingan dizel yonilgʻisining schyot-fakturasi;

yuridik va jismoniy shaxslarning buyurtmanomalari boʻyicha “Toshshahartransxizmat” AJ tashkilotlari tomonidan koʻrsatiladigan soatbay va boshqa tijorat tashuvlarida foydalanilgan dizel yonilgʻisi qiymatining hisob-kitobi 2-ilovaga* muvofiq shakl boʻyicha;

Oʻzbekiston Respublikasi Davlat budjeti mablagʻlari hisobiga subsidiya beriladigan “Toshshahartransxizmat” AJ tashkilotlari tomonidan sotib olinadigan dizel yonilgʻisining 2017-yil 15-noyabrdan boshlab belgilangan qiymatidagi tafovutning hisob-kitobi 3-ilovaga* muvofiq shakl boʻyicha.

5. Belgilansinki:

Toshkent shahri hokimligining Moliya bosh boshqarmasi ushbu qarorning 4-bandida nazarda tutilgan hujjatlar olingandan keyin uch kun muddatda Toshkent shahar Davlat moliya nazorati boshqarmasi bilan birgalikda, subsidiyalar ajratishning maqsadga muvofiqligi toʻgʻrisida tegishli xulosani tayyorlaydi va uni barcha zarur hujjatlarni ilova qilgan holda Oʻzbekiston Respublikasi Moliya vazirligiga yuboradi;

Oʻzbekiston Respublikasi Moliya vazirligi subsidiyalar ajratishning maqsadga muvofiqligi toʻgʻrisida tegishli xulosa olingandan keyin bir hafta muddatda ularning Oʻzbekiston Respublikasi Davlat budjeti mablagʻlari hisobiga “Toshshahartransxizmat” AJga ajratilishini taʼminlaydi, bu toʻgʻrida “Toshshahartransxizmat” AJni yozma shaklda xabardor qiladi. Xabarnomada ajratilgan subsidiyalar summasi, ajratish sanasi hamda subsidiyalar uning uchun ajratilgan hisobot davri koʻrsatiladi.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov zimmasiga yuklansin.