Soʻnggi yillarda oliy taʼlim muassasalariga kirish test sinovlarini topshiruvchi abituriyentlar sonining oshib borishi yiliga oʻrtacha 10 foizni tashkil etmoqda. Xususan, 2016-yilda 663 ming, 2017-yilda 729 mingdan ortiq abituriyentlar oliy taʼlim muassasalariga hujjat topshirgan. Tahlillarga koʻra, 2018-yilda oliy taʼlim muassasalariga 810 mingdan ortiq abituriyentlarning hujjat topshirishi kutilmoqda.

Abituriyentlar sonining keskin oʻsishi tegishli ravishda test sinovlari jarayoniga davlat boshqaruvi organlari bilan kelishilgan holda jalb etilayotgan nazoratchilar soni va test materiallarini sifatli tayyorlash bilan bogʻliq ishlar hajmi ortib borishiga sabab boʻlmoqda.

Test sinovlari jarayoniga jalb etilayotgan ishtirokchilar soni va test materiallarini sifatli tayyorlash bilan bogʻliq ish hajmining ortib borishi tanlangan bino va auditoriyalarning jihozlanishi belgilangan talablarga javob bermasligiga, binolar oliy taʼlim muassasalarida tashkil etilgan bosh shtabdan uzoq masofada va tarqoq joylashishiga olib keldi. Buning natijasida test sinovlarini nazorat qilish sifatining tushib ketishi, amaldagi tartibda test sinovlarini oʻtkazishda qator muammolar yuzaga kelishi kuzatildi.

Oʻzbekiston Respublikasi Prezidentining “Respublika oliy taʼlim muassasalari bakalavriatiga kirish test sinovlarini oʻtkazish tartibini takomillashtirish toʻgʻrisida” 2017-yil 16-noyabrdagi PQ-3389-son qarori bilan 2018/2019 oʻquv yilidan boshlab kirish test sinovlarining ochiqligi va shaffofligini taʼminlash, ularni katta sigʻimdagi binolarda videokuzatuvlar orqali keng jamoatchilikka onlayn rejimda kuzatib borish imkoniyatini yaratgan holda oʻtkazish, test sinovlari natijalarini test oʻtkazilgan kunning ertasiga rasmiy veb-saytda eʼlon qilish belgilandi.

Test sinovlari bilan bogʻliq boʻlgan ishlarni sifatli, oʻz vaqtida va samarali amalga oshirish Oʻzbekiston Respublikasi Vazirlar Mahkamasi huzuridagi Davlat test markazining (keyingi oʻrinlarda Davlat test markazi deb ataladi) vazifalari va funksiyalarini, tashkiliy tuzilmasini qayta koʻrib chiqishni, shuningdek, uning hududlardagi boʻlimlarini tashkil etishni taqozo etmoqda.

Davlat test markazining faoliyatini yanada takomillashtirish va unga yuklangan vazifalarning ijrosini yuqori darajada taʼminlash maqsadida Vazirlar Mahkamasi qaror qiladi:

1. Davlat test markazi taʼlim muassasalariga oʻqishga qabul qilishda test sinovi orqali tanlab olishga oid davlat siyosatini amalga oshiruvchi yagona vakolatli davlat boshqaruvi organi deb hisoblansin.

2. Quyidagilar Davlat test markazining asosiy vazifalari etib belgilansin:

test sinovlarini tashkil etish, oʻtkazish, natijalarini tahlil etish va eʼlon qilish;

test texnologiyalarini rivojlantirish, pedagogik oʻlchov vositalarini takomillashtirish;

umumtaʼlim fanlarini bilish darajasini baholashning milliy test tizimini rivojlantirish;

3. Davlat test markazining markaziy apparati tuzilmasida Test sinovlarini tashkil etish va muvofiqlashtirish bosh boshqarmasi, Test sinovlarining kompyuter tahlili va axborotlashtirish boshqarmasi hamda uning Qoraqalpogʻiston Respublikasi va viloyatlardagi boʻlimlari tashkil etilsin.

4. Quyidagilar:

Oʻzbekiston Respublikasi Vazirlar Mahkamasi huzuridagi Davlat test markazining tuzilmasi 1-ilovaga muvofiq;

Oʻzbekiston Respublikasi Vazirlar Mahkamasi huzuridagi Davlat test markazi toʻgʻrisidagi nizom 2-ilovaga muvofiq tasdiqlansin.

Davlat test markazi direktoriga, zarur hollarda, tuzilmaga xodimlarning belgilangan umumiy cheklangan soni doirasida oʻzgartirishlar kiritish huquqi berilsin.

5. Oʻzbekiston Respublikasining Davlat budjeti mablagʻlari, budjetdan tashqari mablagʻlar, oliy taʼlim muassasalarining oshirilgan toʻlov-kontrakt tushumlari (5 foizgacha miqdorda), abituriyentlardan test sinovlarida ishtirok etish uchun undiriladigan yigʻim va qonun hujjatlarida taqiqlanmagan boshqa manbalar Davlat test markazi faoliyatini moliyalashtirishning asosiy manbalari etib belgilansin.

6. Belgilansinki:

Oʻzbekiston Respublikasi Moliya vazirligi Davlat test markaziga 5 ta, shu jumladan, 3 ta biriktirilgan, 1 ta navbatchi va 1 ta maxsus avtotransport vositasini saqlash uchun limit ajratadi;

Davlat test markazi Toshkent shahri, Yunusobod tumani, Bogʻishamol koʻchasi, 12-uy manzilida joylashadi.

7. Qoraqalpogʻiston Respublikasi Vazirlar Kengashi va viloyatlar hokimliklari bir oy muddatda Davlat test markazining boʻlimlari uchun hudud markazlarida joylashgan, kommunikatsiya tizimlariga ega boʻlgan binolardan 3 tadan alohida xona ajratsin hamda ularning zarur moddiy-texnika vositalari bilan toʻliq jihozlanishini taʼminlasin.

8. Davlat test markazi va boshqa manfaatdor vazirliklar va idoralar bir oy muddatda oʻzlari tomonidan qabul qilingan normativ-huquqiy hujjatlarni ushbu qarorga muvofiqlashtirsinlar.

9. Vazirlar Mahkamasining “Oʻzbekiston Respublikasi Vazirlar Mahkamasi huzuridagi Davlat test markazi faoliyatini yanada takomillashtirish toʻgʻrisida” 2017-yil 17-iyuldagi 508-son qarori (Oʻzbekiston Respublikasi QHT, 2017-yil, 29-son, 697-modda) oʻz kuchini yoʻqotgan deb hisoblansin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.V. Akmalov va Oʻzbekiston Respublikasi Vazirlar Mahkamasi huzuridagi Davlat test markazi direktori M.M. Karimov zimmasiga yuklansin.

1. Ushbu Nizom Oʻzbekiston Respublikasi Vazirlar Mahkamasi huzuridagi Davlat test markazining (keyingi oʻrinlarda Davlat test markazi deb ataladi) maqomi, asosiy vazifalari, funksiyalari, huquqlari, majburiyatlari va javobgarligi, faoliyatini tashkil etish hamda hisobot berish tartibini belgilaydi.

2. Davlat test markazi taʼlim muassasalariga oʻqishga qabul qilishda test sinovi orqali tanlab olishga oid davlat siyosatini ishlab chiqish va amalga oshirish hamda test sinovlarini oʻtkazish tartibiga rioya etilishi ustidan nazorat qilish uchun javob beradigan vakolatli davlat boshqaruvi organi hisoblanadi.

3. Davlat test markazi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonun hujjatlariga amal qiladi.

4. Davlat test markazining oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiydir.

5. Davlat test markazi tizimiga uning markaziy apparati va Qoraqalpogʻiston Respublikasi va viloyatlarda joylashgan boʻlimlari kiradi.

6. Davlat test markazi yuridik shaxs hisoblanadi, Oʻzbekiston Respublikasining Davlat gerbi tasviri tushirilgan va oʻz nomi davlat tilida yozilgan muhrga hamda blankalarga, mustaqil balansga, Oʻzbekiston Respublikasi Moliya vazirligining Gʻaznachiligida shaxsiy gʻazna hisobvaraqlariga, bank hisob raqamlariga, shu jumladan, chet el valyutasidagi bank hisob raqamlariga ega boʻladi.

Davlat test markazining Qoraqalpogʻiston Respublikasi va viloyatlardagi boʻlimlari yuridik shaxs hisoblanmaydi.

7. Davlat test markazining rasmiy nomi:

davlat tilida:

toʻliq nomi — Oʻzbekiston Respublikasi Vazirlar Mahkamasi huzuridagi Davlat test markazi, qisqartmasi — DTM;

rus tilida:

toʻliq nomi — Gosudarstvenniy sentr testirovaniya pri Kabinete Ministrov Respubliki Uzbekistan, qisqartmasi — GST;

ingliz tilida:

toʻliq nomi — State test center under the Cabinet of Ministers of the Republic of Uzbekistan, qisqartmasi — STC.

8. Quyidagilar Davlat test markazining asosiy vazifalari hisoblanadi:

1) test sinovlarini tashkil etish, oʻtkazish, natijalarini tahlil etish va eʼlon qilish;

2) test texnologiyalarini rivojlantirish, pedagogik oʻlchov vositalarini takomillashtirish;

3) umumtaʼlim fanlarini bilish darajasini baholashning milliy test tizimini rivojlantirish;

9. Davlat test markazi oʻziga yuklangan vazifalarga muvofiq quyidagi funksiyalarni amalga oshiradi:

1) test sinovlarini tashkil etish, oʻtkazish, natijalarini tahlil etish va eʼlon qilish sohasida:

taʼlim muassasalariga oʻqishga qabul qilish boʻyicha test sinovi orqali tanlab olish tartiblarini ishlab chiqish;

bino va inshootlarni test sinovlarini oʻtkazish uchun jihozlash borasida qoʻyiladigan talablarni tegishli vazirliklar va idoralar bilan ishlab chiqish;

test sinovi ishtirokchilari bankini shakllantirish, test sinovini oʻtkazish tartibi boʻyicha ular uchun amaliy seminarlar tashkil qilish;

manfaatdor vazirliklar va idoralar hamda taʼlim muassasalari bilan hamkorlikda test topshiruvchilar haqida maʼlumotlar bankini shakllantirish, ularning yoʻnalishlar va guruhlar boʻyicha taqsimotini amalga oshirish;

amaldagi va rivojlangan mamlakatlar tajribasi asosida test sinovlarini tashkil etishni takomillashtirib borish;

test topshiruvchilar uchun test sinovi tartibi boʻyicha koʻrsatmalar ishlab chiqish;

test sinovlarining shaffofligini taʼminlash uchun test sinovlari ishtirokchilarini belgilangan vazifalariga koʻra guruhlarga taqsimlash;

test sinovlarining belgilangan tartib va qoidalar asosida oʻtkazilishini nazorat qilish;

test sinovlari nazoratini amalga oshiruvchi masʼul shaxslarning bilim, koʻnikma va malakasini shakllantiruvchi dastur ishlab chiqish, rivojlangan mamlakatlar tajribasi asosida takomillashtirib borish;

test sinovlarini tashkil etish va oʻtkazish boʻyicha oʻquv-metodik qoʻllanmalarni ishlab chiqish;

test sinovlari nazoratini amalga oshiruvchi masʼul shaxslarning bilim, koʻnikma va malakasini shakllantiruvchi amaliy seminarlar tashkil qilish hamda metodik qoʻllanmalarni yaratish va chop etish.

test topshiriqlari asosida koʻp variantli savollar kitobini shakllantirish hamda ularning maxfiyligini taʼminlagan holda nashr qilish;

test sinovlarida ishlatiladigan javoblar varaqalariga ishlov berish, tekshirish;

manfaatdor vazirliklar va idoralar bilan birgalikda test sinovlari natijalarini baholash mezonlarini ishlab chiqish va tasdiqlash;

test sinovi natijalarini hisoblash, har xil shakllarda tahlil qilish va natijalarni eʼlon qilish;

buyurtmachilarning buyurtmanomalariga muvofiq test sinovlarini oʻtkazish, toʻlov normativlarini ishlab chiqish va belgilangan tartibda tasdiqlash;

2) test texnologiyalarini rivojlantirish, pedagogik oʻlchov vositalarini takomillashtirish sohasida:

yuqori malakali mutaxassislardan iborat umumtaʼlim va maxsus fanlar ekspertlari haqidagi maʼlumotlar bankini shakllantirish;

pedagogik oʻlchov vositalarini ishlab chiqish va ekspertizadan oʻtkazish talablari boʻyicha metodik koʻrsatmalarni ishlab chiqish, ekspertlar uchun testologiya asoslari boʻyicha seminarlar tashkil etish;

davlat taʼlim standartlariga muvofiq boʻlgan fanlar boʻyicha turli xil murakkablik darajasidagi test topshiriqlarini ishlab chiqish, ular bosqichma-bosqich takomillashtirib borilishini tashkil etish;

amaldagi va rivojlangan mamlakatlarning tajribasini oʻrganish asosida test topshiriqlari bankini shakllantirish texnologiyasini takomillashtirish;

test topshiriqlari bankini shakllantirish sohasida xalqaro hamkorlikni amalga oshirish;

test topshiriqlari maxfiyligini saqlash chora-tadbirlari kompleksini amalga oshirish;

manfaatdor vazirliklar va idoralar hamda taʼlim muassasalari bilan hamkorlikda test topshiriqlari bankini shakllantirish;

pedagogik oʻlchov vositalarini takomillashtirish boʻyicha mutaxassislar uchun oʻquv seminarlari tashkil etish;

3) umumtaʼlim fanlarini bilish darajasini baholashning milliy test tizimini rivojlantirish sohasida:

xalqaro eʼtirof etilgan baholash standartlari asosida umumtaʼlim fanlari boʻyicha test topshiriqlari tuzilmasini ishlab chiqish va sinovdan oʻtkazish;

umumtaʼlim fanlarini bilish va egallash darajasini aniqlash boʻyicha xalqaro eʼtirof etilgan baholash standartlari talablariga muvofiq toʻlov asosida test sinovlarini oʻtkazish;

rivojlangan mamlakatlarning tajribasiga tayangan holda umumtaʼlim fanini bilish koʻnikmalarini baholash mezonlarini ishlab chiqish va sinovdan oʻtkazish;

oylik ish haqiga ustama belgilangan umumtaʼlim fanlari oʻqituvchilarini koʻp komponentli test sinovlaridan oʻtkazish;

umumtaʼlim fanlarini bilish darajasiga davlat namunasidagi sertifikatni berish;

umumtaʼlim fanlaridan test sinovlaridan oʻtuvchi shaxslar uchun oʻquv-metodik qoʻllanmalarni ishlab chiqish va nashr qilish;

rivojlangan mamlakatlar tajribasini oʻrganish asosida test sinovlari texnologiyasini takomillashtirish;

test materiallarini ishlab chiqishda hamda ulardan foydalanishda taʼlim muassasalariga va boshqa muassasalarga metodik yordam koʻrsatish.

10. Davlat test markazi oʻziga yuklangan vazifalar va funksiyalarni amalga oshirish uchun quyidagi huquqlarga ega:

normativ-huquqiy hujjatlar loyihalarini, shuningdek, oʻziga yuklangan vazifalar va funksiyalarni bajarish bilan bogʻliq boʻlgan boshqa hujjatlarni belgilangan tartibda Vazirlar Mahkamasiga yoki Oʻzbekiston Respublikasi Prezidenti Administratsiyasiga kiritish;

taʼlim muassasalariga oʻqishga qabul qilishda test sinovlarini oʻtkazish jarayonida taʼlim muassasalari rahbarlari tomonidan taʼlim toʻgʻrisidagi qonun hujjatlari buzilgan holda qabul qilingan buyruqlar, farmoyishlar va boshqa qarorlarning amal qilishini toʻxtatib qoʻyish;

oʻz vakolatiga kiradigan masalalarni hal etish uchun davlat va xoʻjalik boshqaruvi organlaridan, mahalliy davlat hokimiyati organlaridan zarur axborotni belgilangan tartibda soʻrash va olish;

Davlat budjeti hisobidan xarajatlar smetasida nazarda tutilgan va Davlat test markazining budjetdan tashqari mablagʻlari hisobidan unga yuklangan vazifalarni bajarish uchun toʻlov asosida mustaqil ekspertlarni va imtihon oluvchilarni jalb etish;

vakolatiga kiradigan masalalar boʻyicha Oʻzbekiston Respublikasining xalqaro shartnomalarini belgilangan tartibda ishlab chiqishda ishtirok etish, idoralararo tusdagi xalqaro shartnomalarni belgilangan tartibda tuzish;

shartnoma boʻyicha jismoniy va yuridik shaxslarga ilmiy-metodik, axborot-konsalting hamda namunaviy test topshiriqlari asosida diagnostik test sinovlari oʻtkazish xizmatlari koʻrsatish;

oʻz vakolatlari doirasida normativ-huquqiy hujjatlar qabul qilish, zarur hollarda davlat boshqaruvi boshqa organlari bilan birgalikda qarorlar va boshqa hujjatlarni birgalikda qabul qilish;

oʻziga yuklangan vazifalarni hal etish uchun olimlar, yetakchi pedagog-mutaxassislar va xorijiy ekspertlarni jalb etish, shuningdek, ixtisoslashtirilgan, maqsadli va vaqtinchalik ilmiy-tadqiqot guruhlari va ijodiy guruhlar tashkil etish;

oʻz vakolatlari doirasida xalqaro va xorijiy tashkilotlar bilan hamkorlik qilish;

Davlat test markazi faoliyatini keng yoritish maqsadida ijtimoiy tarmoqlarda rasmiy veb-saytlar, shuningdek, sahifalar yaratish;

oʻz vakolatlari doirasida konferensiyalar, seminarlar, simpoziumlar, koʻrgazmalar, yarmarkalar oʻtkazish, shuningdek, boshqa tashkilotlar tomonidan tashkil etilgan shunga oʻxshash tadbirlarda ishtirok etish;

oʻz vakolatiga kiradigan masalalar boʻyicha metodik materiallar va tavsiyalar ishlab chiqish;

noshirlik faoliyati bilan shugʻullanish.

Davlat test markazi qonun hujjatlariga muvofiq boshqa huquqlarga ham ega boʻlishi mumkin.

11. Quyidagilar Davlat test markazining majburiyatlari hisoblanadi:

oʻziga yuklangan vazifalar va funksiyalarning samarali bajarilishi, shuningdek, taʼlim muassasalariga oʻqishga qabul qilishda test sinovi orqali tanlab olishga oid davlat siyosatini hamda test sinovlarini oʻtkazish tartibiga rioya etilishi ustidan nazoratni samarali amalga oshirish;

Vazirlar Mahkamasiga va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalari, shuningdek, Davlat test markazi tomonidan qabul qilinadigan buyruqlar ijrosini samarali amalga oshirish;

taʼlim muassasalariga oʻqishga qabul qilishda test sinovi natijalarining xolisonaligi va ishonchliligini taʼminlash sohasida dasturlar, chora-tadbirlar rejasi, “yoʻl xaritalari” va boshqa dasturiy hujjatlarni samarali amalga oshirish.

12. Quyidagilar Davlat test markazi direktorining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilish;

2) Davlat test markazining faoliyatiga umumiy rahbarlik qilish, Oʻzbekiston Respublikasi Prezidenti, Vazirlar Mahkamasining qarorlari va boshqa qonun hujjatlari bilan Davlat test markaziga yuklangan vazifalar va funksiyalar bajarilishini tashkil etish;

3) Oʻzbekiston Respublikasi Prezidenti va Vazirlar Mahkamasining qarorlari bilan tasdiqlangan Davlat test markazi faoliyatini yanada takomillashtirish boʻyicha kompleks dasturlar va tadbirlar ijrosini chuqur tahlil qilish;

4) Oʻzbekiston Respublikasi Prezidenti Administratsiyasi tarkibiy boʻlinmalari va Vazirlar Mahkamasi, shuningdek, tegishli vazirliklar va idoralar bilan hamkorlik qilish, Vazirlar Mahkamasi va uning Rayosati majlislarida masalalarni koʻrib chiqishda ishtirok etish;

5) Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari topshiriqlarini bajarish;

6) oʻz oʻrinbosarlari va Davlat test markazining boshqa mansabdor shaxslari vakolatlarini belgilash, Davlat test markazining tegishli boshqarma, boʻlimlari, Qoraqalpogʻiston Respublikasi va viloyatlardagi boʻlimlari (keyingi oʻrinlarda boʻlinma deb ataladi) mansabdor shaxslarining shaxsiy javobgarligi darajasini belgilash;

7) Davlat test markazining faoliyatini rejalashtirishni tashkil etish, Davlat test markazining va oʻz oʻrinbosarlarining ish rejasini tasdiqlash, ularning bajarilishi ustidan nazoratni taʼminlash;

8) Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoring olib borishning amaliy tizimini yaratish, Davlat test markazi faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq boʻlinmalar rahbarlarining shaxsiy masʼuliyatini oshirish chora-tadbirlarini koʻrish;

9) Davlat test markazi xodimlarining tizimli ravishda malakasini oshirishni tashkil etish;

10) Davlat test markazining xodimlarini tanlab olish va lavozimga tayinlash, ularning samarali ishlashi uchun zarur sharoitlarni yaratish, xodimlar zaxirasini tashkil etish;

11) Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi va Vazirlar Mahkamasi nomenklaturasiga kiradigan boʻsh lavozimlarga taklif etilgan kadrlarning, shuningdek, Davlat test markaziga ishga qabul qilinayotgan boshqa kadrlarning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash;

12) faoliyat sohasi masalalari boʻyicha normativ-huquqiy hujjatlar loyihalari sifatli ishlab chiqilishini, ular “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlari, Vazirlar Mahkamasining Reglamenti va Oʻzbekiston Respublikasi Prezidenti Administratsiyasining Reglamenti talablariga qatʼiy muvofiq ravishda oʻz vaqtida kiritilishini tashkil etish, ularning Vazirlar Mahkamasi apparatida puxta ishlanishida, Vazirlar Mahkamasi rahbariyati huzurida himoya qilinishida va Oʻzbekiston Respublikasi Prezidenti Administratsiyasida koʻrib chiqilishida ishtirok etish;

13) Davlat test markaziga taqdim etilgan takliflar va normativ-huquqiy hujjatlar loyihalari toʻliq va oʻz vaqtida koʻrib chiqilishini taʼminlash, shuningdek, Oʻzbekiston Respublikasi Prezidenti Administratsiyasining Reglamenti va Vazirlar Mahkamasining Reglamentida belgilangan muddatlarda kelishish (viza qoʻyish);

14) Davlat test markazi rahbarlari va xodimlarining xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

15) oʻz oʻrinbosarlari, boʻlinmalar faoliyatining samaradorligi va natijadorligini tizimli ravishda tanqidiy tahlil qilish, boʻlinmalar ish rejalarini tasdiqlash, hisobotlarini eshitish, ularning yakunlari boʻyicha zarur chora-tadbirlar koʻrish;

16) Davlat test markazi xodimlarini ragʻbatlantirish va intizomiy javobgarlikka tortish masalalarini hal qilish, oʻz oʻrinbosarlarini ragʻbatlantirish va intizomiy javobgarlikka tortish, shuningdek, uning egallab turgan lavozimida qolish masalasini koʻrib chiqish boʻyicha taklif kiritish, uning shaxsiy javobgarligini oshirish boʻyicha tizimli chora-tadbirlarni amalga oshirish;

17) Davlat test markazi xodimlari tomonidan Vazirlar Mahkamasining 2016-yil 2-martdagi 62-son qarori bilan tasdiqlangan Davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida tasdiqlangan Davlat test markazi xodimlarining odob-axloq qoidalari talablariga rioya etilishini taʼminlash;

18) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Davlat test markazi tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

19) Davlat test markazining hamda boʻlinmalarining ishlari zamonaviy shakllarda tashkil etilishini taʼminlash;

20) Oʻzbekiston Respublikasining “Elektron hukumat toʻgʻrisida”gi Qonunini amalga oshirish doirasida zamonaviy axborot-kommunikatsiya texnologiyalaridan foydalangan holda davlat xizmatlarini koʻrsatish samaradorligini, sifatini va foydalanish imkoniyatini oshirish;

21) jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

22) Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Davlat test markazi xodimlari va rahbarlarining faol ishtirok etishini tashkil etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasidan tushgan murojaatlari oʻz vaqtida va toʻliq koʻrib chiqilishini taʼminlash;

23) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish;

24) Davlat test markazi faoliyatiga umumiy rahbarlik qilish;

25) Davlat test markazi xodimlarini qonun hujjatlarida belgilangan tartibda lavozimga tayinlash va lavozimdan ozod etish;

26) Davlat test markazi xodimlari bajarishi majburiy boʻlgan buyruqlar chiqarish va koʻrsatmalar berish, shuningdek, ularning ijrosini belgilangan tartibda nazorat qilish;

27) Davlat test markazi tuzilmasi va shtat jadvalini Vazirlar Mahkamasi tomonidan tasdiqlangan xodimlarning soni doirasida belgilangan tartibda tasdiqlash;

28) Davlat test markazi boʻlinmalarining nizomlarini tasdiqlash.

13. Quyidagilar Davlat test markazi direktori oʻrinbosarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) Davlat test markazi direktori vaqtincha boʻlmaganda uning vazifasini tegishli buyruq asosida bajarish;

3) Davlat test markazining boʻlinmalari faoliyatini muvofiqlashtirish, nazorat qilish va majburiyatlarni xodimlari oʻrtasida taqsimlash;

4) Davlat test markazi boʻlinmalarining faoliyatini yanada rivojlantirish maqsadida Oʻzbekiston Respublikasi Prezidentining farmonlari, qarorlari va farmoyishlari va Vazirlar Mahkamasining qarorlari bilan tasdiqlangan konsepsiya, kompleks dasturlar va tadbirlarning bajarilishini chuqur tahlil qilish;

5) boʻlinmalarga yuklangan vazifalar bajarilishini soʻzsiz taʼminlash chora-tadbirlarini koʻrish, boʻlinmalar rahbarlarining hisobotlarini eshitish va ushbu vazifalarni sifatli bajarish uchun ularning shaxsiy javobgarligini oshirish;

6) Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini taʼminlash, Davlat test markazining mutasaddilik qilinadigan tarkibiy boʻlinmalarida ijro intizomi boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlar oʻz vaqtida va sifatli ijro etilishi uchun tarkibiy boʻlinmalar rahbarlarining shaxsiy masʼuliyatini oshirish chora-tadbirlarini koʻrish;

7) Davlat test markazi direktorining buyruqlari va topshiriqlarini oʻz vaqtida va sifatli bajarilishini taʼminlash;

8) boʻlinmalarga xodimlarni tanlash va lavozimga tayinlash boʻyicha Davlat test markazi direktoriga takliflar kiritish, oʻz kasbining ustasi ekanligiga, yuqori kasbiy malakaga, amaliy ish tajribasiga va yuksak maʼnaviy-axloqiy fazilatlarga egaligiga kafolat berish, ularning kasbiy malakalarini oshirish chora-tadbirlarini ishlab chiqish, xodimlar zaxirasini shakllantirish;

9) boʻlinmalar tomonidan normativ-huquqiy hujjatlar loyihasining sifatli ishlab chiqilishini tashkil etish, Davlat test markazi direktori koʻrib chiqishi va imzolashi uchun koʻrib chiqib imzolash, shuningdek, Davlat test markazi direktorining topshirigʻiga muvofiq Vazirlar Mahkamasi ijro apparatida normativ-huquqiy hujjatlarni qayta ishlashda ishtirok etish;

10) Davlat test markaziga taqdim etilgan normativ-huquqiy hujjatlar loyihalarini belgilangan tartibda koʻrib chiqish;

11) xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga toʻliq muvofiq amalga oshirish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

12) boʻlinmalar boshliqlari faoliyatining samaradorligini va natijadorligini tizimli ravishda tanqidiy tahlil qilish, ularning shaxsiy hisobotlarini eshitish, uning yakunlari boʻyicha zarur chora-tadbirlar koʻrish;

13) taʼlim muassasalariga oʻqishga qabul qilishda test sinovi orqali tanlab olish faoliyati samaradorligini oshirish boʻyicha Amaliy chora-tadbirlarni belgilash, qonunchilikni takomillashtirish yuzasidan takliflar ishlab chiqish va uni Davlat test markazi direktoriga kiritish;

14) boʻlinmalar rahbarlari va xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqlik masalasini koʻrib chiqish boʻyicha takliflarni direktorga kiritish, funksional va yuklangan vazifalar bajarilishi uchun ularning shaxsiy masʼuliyatini oshirish boʻyicha tizimli chora-tadbirlar koʻrish;

15) xodimlarning odob-axloq qoidalari talablariga rioya qilishini, mutasaddilik qilinadigan tarkibiy boʻlinmalar rahbarlari va xodimlarining ushbu qoidalarga rioya etishini taʼminlash;

16) huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

17) Davlat test markazi direktoriga davlat xizmatlarini koʻrsatish samaradorligini, sifatini va foydalanish imkoniyatlarini oshirish boʻyicha takliflar kiritish;

18) davlat xizmatlari samaradorligi, sifati va ulardan erkin foydalanishni oshirishga doir takliflarni direktorga kiritish;

19) jismoniy va yuridik shaxslarning murojaatlarini “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunida belgilangan muddatlarda va tartibda koʻrib chiqish boʻyicha samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

20) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslar vakillarining Oʻzbekiston Respublikasi Prezidentining Virtual qabulxonasidan tushgan murojaatlari oʻz vaqtida va toʻlaqonli koʻrib chiqilishini taʼminlash;

21) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

14. Quyidagilar Davlat test markazi boʻlinma boshliqlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

2) boʻlinmalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalar bajarilishini tashkil etish;

3) tegishli tarkibiy boʻlinmalar faoliyatini oʻz vakolatlari doirasida muvofiqlashtirish;

4) prognoz koʻrsatkichlarining bajarilishini tahlil qilish hamda tarkibiy boʻlinmalar ushbu koʻrsatkichlarga soʻzsiz erishishini taʼminlashga qaratilgan qoʻshimcha chora-tadbirlar koʻrish boʻyicha takliflarni direktor oʻrinbosariga kiritish;

5) Oʻzbekiston Respublikasi Prezidenti va Vazirlar Mahkamasi qarorlari va topshiriqlari ijrosini taʼminlash, Davlat test markazi boʻlinmalari xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy masʼuliyatini oshirish chora-tadbirlarini koʻrish;

6) Davlat test markazi rahbarlarining buyruqlari hamda topshiriqlari oʻz vaqtida va sifatli bajarilishini taʼminlash;

7) boʻlinmaning ish rejasi ishlab chiqilishini taʼminlash, ularni tasdiqlash uchun kiritish, unda koʻrsatilgan vazifalar va tadbirlarning oʻz vaqtida va sifatli bajarilishi taʼminlash;

8) boʻlinmaga yuklangan vazifalar bajarilishini nazorat qilish va muvofiqlashtirish;

9) boʻlinma faoliyatiga oid masalalar yuzasidan qonun hujjatlarini takomillashtirish boʻyicha takliflarni ishlab chiqish va ularni koʻrib chiqish uchun rahbarlarga kiritish;

10) boʻlinmaga kadrlarni tanlash yuzasidan direktor oʻrinbosariga takliflar taqdim etish, professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasb malakasini oshirish choralarini koʻrish, boʻlinmada kadrlar zaxirasini shakllantirish;

11) boʻlinma tomonidan normativ-huquqiy hujjatlar loyihalarini sifatli ishlab chiqilishini tashkil etish, Davlat test markazining boʻlinmalarida tayyorlangan hujjatlar loyihalarini keyinchalik rahbariyat tomonidan koʻrib chiqish, imzolash (viza qoʻyish) uchun koʻrib chiqish va viza qoʻyish, ularning Oʻzbekiston Respublikasi Prezidenti Administratsiyasining Reglamenti va Vazirlar Mahkamasi Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, rahbariyatning topshirigʻi boʻyicha normativ-huquqiy hujjatlar loyihalarini Vazirlar Mahkamasi apparatida ishlab chiqishda ishtirok etish;

12) Davlat test markaziga taqdim etilgan normativ-huquqiy hujjatlar loyihasini toʻliq va har tomonlama koʻrib chiqish;

13) xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq amalga oshirish, xizmat safarlari asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

14) boʻlinma xodimlari faoliyati samaradorligi va natijadorligini tizimli ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

15) xodimlarning odob-axloq qoidalari talablariga rioya qilishini taʼminlash;

16) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Davlat test markazi tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

17) davlat xizmatlarining samaradorligi, sifati va ulardan erkin foydalanishni oshirishga doir takliflar kiritish;

18) jismoniy va yuridik shaxslarning murojaatlarini “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatlarda va tartibda koʻrib chiqish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

19) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushgan murojaatlarini oʻz vaqtida va toʻlaqonli koʻrib chiqish;

20) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

15. Davlat test markazi direktori:

1) Davlat test markaziga yuklangan vazifalar va funksiyalarning samarali va oʻz vaqtida bajarilishiga;

2) ushbu Nizomning 11-bandida nazarda tutilgan majburiyatlar boʻyicha;

3) ushbu Nizomning 12-bandida koʻrsatilgan funksional vazifalarning sifatli bajarilishiga shaxsan javob beradi.

16. Davlat test markazi direktori oʻrinbosari:

1) Davlat test markaziga yuklangan vazifalar va funksiyalarning samarali bajarilishiga;

2) ushbu Nizomning 11-bandida nazarda tutilgan majburiyatlar boʻyicha;

3) ushbu Nizomning 13-bandida koʻrsatilgan funksional vazifalarning sifatli bajarilishiga shaxsan javob beradi.

17. Boʻlinma boshliqlari:

1) boʻlinmaga yuklangan vazifalar va funksiyalarning amalga oshirilishiga;

2) ushbu Nizomning 11-bandida nazarda tutilgan majburiyatlar boʻyicha;

3) ushbu Nizomning 14-bandida koʻrsatilgan funksional vazifalarning sifatli bajarilishi uchun shaxsan javob beradi.

18. Davlat test markaziga Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan direktor boshchilik qiladi.

Davlat test markazi direktori maqomiga koʻra vazirning birinchi oʻrinbosariga tenglashtiriladi.

19. Davlat test markazi direktorining ikki nafar oʻrinbosari boʻladi va ular Vazirlar Mahkamasi tomonidan lavozimga tayinlanadi hamda lavozimdan ozod etiladi.

Davlat test markazi direktorining ikki nafar oʻrinbosari maqomiga koʻra tibbiy xizmat koʻrsatish shart-sharoitlaridan tashqari vazir oʻrinbosariga tenglashtiriladi.

20. Davlat test markazi direktori boʻlmagan vaqtda uning vakolatlarini direktorning oʻrinbosari bajaradi.

21. Davlat test markazining bosh boshqarmasi boshligʻi, boshqarma boshliqlari, boʻlim boshliqlari va xodimlari, Qoraqalpogʻiston Respublikasi va viloyatlardagi boʻlim boshliqlari va xodimlari direktor tomonidan lavozimga tayinlanadi va lavozimdan ozod etiladi.

22. Davlat test markazi oʻz vazifa va funksiyalarini mahalliy davlat hokimiyati organlari va boshqa tashkilotlar bilan hamkorlikda amalga oshiradi.

23. Davlat test markazining Qoraqalpogʻiston Respublikasi va viloyatlardagi boʻlimlari oʻz vakolati doirasida boshqa davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlarning hududiy boʻlinmalari bilan hamkorlikda faoliyat yuritadi.

24. Davlat test markazida uning direktori (hayʼat raisi), direktorning oʻrinbosarlari, shuningdek, Davlat test markazi faoliyatining asosiy yoʻnalishlarini muvofiqlashtiruvchi tarkibiy boʻlinmalar rahbarlaridan iborat tarkibda hayʼat tuziladi.

Hayʼat tarkibining soni va shaxsiy tarkibi Davlat test markazi direktorining taqdimnomasiga muvofiq Vazirlar Mahkamasi tomonidan tasdiqlanadi.

25. Hayʼatga quyidagi vazifalar yuklanadi:

Davlat test markazi faoliyatining asosiy yoʻnalishlarini ishlab chiqish va amalga oshirish;

qonun hujjatlarida belgilangan vazifalar oʻz vaqtida va sifatli amalga oshirilishini taʼminlash uchun Davlat test markazining boʻlinmalari rahbar va xodimlarining shaxsiy javobgarligini oshirish boʻyicha chora-tadbirlar koʻrgan holda ularning hisobotlari muntazam ravishda eshitilishini tashkil etish;

joylarda sohaga oid dolzarb masalalar muhokama qilinishi taʼminlangan holda hayʼatning kengaytirilgan sayyor majlislari oʻtkazilishini tashkil etish, shuningdek, yuzaga kelgan muammolarni bartaraf etish boʻyicha tegishli qarorlarni ishlab chiqish va qabul qilish;

Davlat test markazi markaziy apparatiga va uning tizimiga kiradigan lavozimlar nomenklaturasini koʻrib chiqish va tasdiqlash;

Davlat test markazi nomenklaturasiga kiradigan lavozimlarga kadrlarni tanlash, joy-joyiga qoʻyish masalasini koʻrib chiqish;

Oʻzbekiston Respublikasi Prezidenti va Vazirlar Mahkamasining qarorlari va topshiriqlari bilan belgilangan vazifalar oʻz vaqtida va sifatli bajarilishini taʼminlash uchun Davlat test markazining boʻlinmalari rahbar va xodimlarining ijro intizomini mustahkamlash va shaxsiy javobgarligini oshirish.

Hayʼat Davlat test markazi vakolatiga kiritilgan boshqa masalalarni ham koʻrib chiqishga haqlidir.

26. Hayʼat majlisiga Davlat test markazi vakolatiga kiradigan masalalar yuzasidan davlat va xoʻjalik boshqaruvi organlari, boshqa tashkilotlar vakillari taklif etilishi mumkin.

27. Hayʼat, agar uning majlisida tarkibining yarmidan koʻpi qatnashsa, vakolatli hisoblanadi. Koʻrib chiqilayotgan masalalar yuzasidan qarorlar oddiy koʻpchilik ovoz berish yoʻli bilan qabul qilinadi.

28. Hayʼat qarorlari Davlat test markazi direktorining buyrugʻi bilan amalga oshiriladi.

29. Davlat test markazi direktori va hayʼat aʼzolari oʻrtasida kelishmovchiliklar yuzaga kelgan taqdirda, direktor yuzaga kelgan kelishmovchiliklar haqida Vazirlar Mahkamasiga axborot bergan holda mustaqil ravishda qaror qabul qiladi. Shuningdek, hayʼat aʼzolari ham Vazirlar Mahkamasiga oʻz fikrini maʼlum qilishi mumkin.

30. Hayʼat faoliyati tartibi hayʼat tomonidan tasdiqlanadigan uning reglamenti bilan belgilanadi.

31. Davlat test markazida direktor oʻrinbosari (ilmiy-metodik kengash raisi), bosh boshqarma, boshqarma va boʻlim boshliqlari hamda Davlat test markazining yuqori malakali xodimlaridan iborat tarkibda ilmiy-metodik kengash tuziladi.

Ilmiy-metodik kengash aʼzolarining soni va shaxsiy tarkibi Davlat test markazi direktorining buyrugʻi bilan tasdiqlanadi.

32. Nizomga muvofiq, Davlat test markaziga yuklangan vazifalarning sifatli amalga oshirilishi, Davlat test markazi faoliyatiga oid ilmiy, metodik va normativ-huquqiy hujjatlarni koʻrib chiqish va loyihalarini tayyorlash hamda hayʼat kun tartibiga dolzarb masalalar boʻyicha takliflar kiritish ilmiy-metodik kengashning asosiy vazifasi hisoblanadi.

33. Ilmiy-metodik kengash, agar uning majlisida tarkibining uchdan ikki qismi qatnashsa, vakolatli hisoblanadi. Koʻrib chiqilayotgan masalalar yuzasidan qarorlar oddiy koʻpchilik ovoz berish yoʻli bilan qabul qilinadi.

34. Ilmiy-metodik kengash qarorlari Davlat test markazi direktorining buyrugʻi bilan amalga oshiriladi.

35. Ilmiy-metodik kengash faoliyati tartibi ilmiy-metodik kengash tomonidan tasdiqlanadigan uning reglamenti bilan belgilanadi.

36. Davlat test markazi faoliyatining samaradorligi va natijadorligi muntazam baholanishi lozim.

37. Davlat test markazi faoliyati samaradorligi va natijadorligiga berilgan baholar Oʻzbekiston Respublikasi Prezidenti Administratsiyasining tegishli tarkibiy boʻlinmalari va Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari tomonidan tasdiqlanadigan Davlat test markazi faoliyati samaradorligi va natijadorligini baholash mezonlari va ish indikatorlariga asoslanadi.

38. Davlat test markazining faoliyati samaradorligi va natijadorligini baholash yakunlari boʻyicha:

Davlat test markazi rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Davlat test markazi faoliyatida aniqlangan kamchiliklarni bartaraf etish va uning faoliyatini yanada takomillashtirish chora-tadbirlari koʻriladi.

Davlat test markazining faoliyati samaradorligi va natijadorligini baholash tartibi va metodikasi qonun hujjatlariga koʻra belgilanadi.

39. Davlat test markazini moddiy-texnik taʼminlash va xodimlar mehnatiga haq toʻlash — Oʻzbekiston Respublikasi respublika budjeti mablagʻlari, Davlat test markazi faoliyatini rivojlantirish jamgʻarmasi, shuningdek, qonun hujjatlarida taqiqlanmagan boshqa manbalar hisobiga moliyalashtiriladi.

40. Davlat test markazi xodimlarining ish haqi lavozim maoshi, mukofotlar, qoʻshimcha haqlar, ustamalardan va qonun hujjatlarida nazarda tutilgan boshqa toʻlovlardan iborat.

Davlat test markazi xodimlari lavozim maoshlariga har oyda qoʻshiladigan ragʻbatlantirish xususiyatiga ega boʻlgan qoʻshimcha haqlar va ustamalar Davlat test markazi direktori tomonidan tasdiqlangan nizomga muvofiq toʻlanadi.

41. Davlat test markazi xodimlariga ish haqi toʻlash va ularni moddiy ragʻbatlantirish manbalari mehnatga haq toʻlash jamgʻarmasi, budjetdan tashqari jamgʻarmalar mablagʻlaridan va qonun hujjatlarida taqiqlanmagan boshqa manbalardan iborat.

42. Direktor Davlat test markazining faoliyati toʻgʻrisida Vazirlar Mahkamasiga, Oʻzbekiston Respublikasi Prezidenti Administratsiyasining tegishli tarkibiy boʻlinmasiga va Oʻzbekiston Respublikasi Prezidentiga muntazam ravishda hisobot beradi.

43. Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari Davlat test markazi rahbarlariga yuklangan vazifalar samarali bajarilishi uchun ular faoliyati ustidan monitoring olib boradi, Davlat test markazi faoliyati samaradorligiga xolisona baho beradi.

44. Monitoring va baholash yakunlari boʻyicha Davlat test markazining alohida oʻrnak koʻrsatgan rahbarlari, mansabdor shaxslari va xodimlari ragʻbatlantiriladi yoki yoʻl qoʻyilgan jiddiy kamchiliklar uchun egallab turgan lavozimidan ozod etishgacha boʻlgan javobgarlikka tortiladi.

45. Davlat test markazini qayta tashkil etish va tugatish qonun hujjatlarida belgilangan tartibda amalga oshiriladi.