Oʻzbekiston Respublikasi Prezidentining “Farmatsevtika tarmogʻini boshqarish tizimini tubdan takomillashtirish chora-tadbirlari toʻgʻrisida” 2017-yil 7-noyabrdagi PF-5229-son Farmoniga muvofiq, Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi (keyingi oʻrinlarda Agentlik deb ataladi) faoliyatini samarali tashkil etishni taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining tashkiliy tuzilmasi 1-ilovaga muvofiq;

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining boshqaruv xodimlari cheklangan soni 40 nafardan iborat boʻlgan markaziy apparati tuzilmasi 2-ilovaga muvofiq;

Qoraqalpogʻiston Respublikasi, viloyatlar va Toshkent shahar farmatsevtika tarmogʻini rivojlantirish boshqarmalarining (keyingi oʻrinlarda hududiy boshqarmalar deb ataladi) namunaviy tuzilmasi 3-ilovaga muvofiq;

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi toʻgʻrisidagi nizom 4-ilovaga muvofiq;

Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi faoliyatining samaradorligini baholash mezonlari toʻgʻrisidagi nizom 5-ilovaga muvofiq tasdiqlansin.

Oʻzbekiston Respublikasi Sogʻliqni saqlash vaziriga, zaruratga koʻra, boshqaruv xodimlarining belgilangan umumiy soni va mehnatga haq toʻlash fondi doirasida Agentlik va uning hududiy boshqarmalarining tasdiqlangan tuzilmalariga oʻzgartirishlar kiritish huquqi berilsin.

2. Belgilansinki, ushbu qarorga 2-3-ilovalarga muvofiq tasdiqlanayotgan yangi tashkil etilayotgan Agentlik va uning hududiy boshqarmalarining boshqaruv xodimlari soni, shu jumladan, xodimlar soni tegishlicha qisqartirilishi (jami — 32 birlik) hisobiga shakllantiriladi:

Oʻzbekiston Respublikasi Sogʻliqni saqlash vazirligining Dori vositalari, tibbiy buyumlar va tibbiy texnika muomalasini tartibga solish Bosh boshqarmasi shtatlaridan — 2 birlik;

Qoraqalpogʻiston Respublikasi Sogʻliqni saqlash vazirligi, viloyatlar sogʻliqni saqlash boshqarmalari dori vositalari va tibbiy buyumlar chakana savdosi shartlari va litsenziya talablariga rioya etish ustidan nazorat qilish boʻlinmalarining har biridan — 2 birlikdan, Toshkent shahar Sogʻliqni saqlash bosh boshqarmasidan — 4 birlik.

3. Oʻzbekiston Respublikasi Sogʻliqni saqlash vazirligiga bir oy muddatda belgilangan tartibda:

Agentlikning markaziy apparati uchun Sogʻliqni saqlash vazirligi Avtobazasi uchun nazarda tutilgan avtotransport vositalarining limitlari doirasida 4 ta yengil avtotransport vositasi, shu jumladan, 3 ta — shaxsiy, 1 ta — navbatchi avtotransport vositasi ajratsin;

Qoraqalpogʻiston Respublikasi, viloyatlar va Toshkent shahar farmatsevtika tarmogʻini rivojlantirish boshqarmalari toʻgʻrisidagi nizomlarni tasdiqlasin;

Agentlikni zarur ixtisoslikka ega boʻlgan yuqori malakali mutaxassislar bilan taʼminlash va uning moddiy-texnika bazasini mustahkamlash choralarini koʻrsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.V. Akmalov, Oʻzbekiston Respublikasi Sogʻliqni saqlash vaziri A. Shadmanov va Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi direktori Z. Dusanov zimmasiga yuklansin.

1. Ushbu Nizom Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining (keyingi oʻrinlarda Agentlik deb ataladi) maqomi, asosiy vazifalari, funksiyalari, huquqlari va majburiyatlarini, faoliyatini tashkil etish asoslarini belgilaydi.

2. Agentlik oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Nizomga va boshqa qonun hujjatlariga hamda Oʻzbekiston Respublikasi Sogʻliqni saqlash vazirligining qarorlariga amal qiladi.

3. Agentlikning oʻz vakolatlari doirasida qabul qilgan qarorlari tashkiliy-huquqiy shakllaridan qatʼi nazar, davlat va xoʻjalik boshqaruvi organlari, mahalliy ijro etuvchi hokimiyat organlari, xoʻjalik subyektlari tomonidan bajarilishi majburiy hisoblanadi.

4. Agentlik oʻz faoliyatini davlat va xoʻjalik boshqaruvi organlari, mahalliy ijro etuvchi hokimiyat organlari, Sogʻliqni saqlash vazirligining tarkibiy boʻlinmalari, shuningdek, jismoniy va yuridik shaxslar bilan oʻzaro hamkorlikda amalga oshiradi.

5. Qoraqalpogʻiston Respublikasi, viloyatlar va Toshkent shahar Farmatsevtika tarmogʻini rivojlantirish boshqarmalari (keyingi oʻrinlarda hududiy boshqarmalar deb ataladi) oʻz faoliyatini Oʻzbekiston Respublikasi Sogʻliqni saqlash vazirligi tomonidan tasdiqlanadigan nizomlar asosida amalga oshiradi.

Agentlik tarkibiga kiruvchi “Oʻzmedimpeks” davlat unitar korxonasi, Dori vositalari, tibbiy buyumlar va tibbiyot texnikasi ekspertizasi va standartlashtirish davlat markazi, Oʻzbekiston kimyo-farmatsevtika ilmiy-tadqiqot instituti, Toshkent vaksina va zardoblar ilmiy-tadqiqot instituti va “Sharq tabobati” ilmiy-tadqiqot instituti (keyingi oʻrinlarda idoraviy mansub tashkilotlar deb ataladi) oʻz faoliyatini Oʻzbekiston Respublikasi Sogʻliqni saqlash vazirligi tomonidan tasdiqlanadigan ustavlarga muvofiq amalga oshiradi.

6. Agentlik faoliyatini moliyalashtirish Oʻzbekiston Respublikasi Davlat budjeti mablagʻlari va qonun hujjatlarida taqiqlanmagan boshqa mablagʻlar hisobiga amalga oshiriladi.

7. Agentlik mustaqil yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhr va blankalarga, bank hisob raqamlariga ega boʻladi.

8. Quyidagilar Agentlikning asosiy vazifalari hisoblanadi:

farmatsevtika tarmogʻini barqaror rivojlantirish strategiyasini, shu jumladan, davlat-xususiy sheriklikni joriy etish orqali ishlab chiqish va amalga oshirish, farmatsevtika tashkilotlari faoliyatini muvofiqlashtirish, aholi va davlat sogʻliqni saqlash muassasalarini dori vositalari, tibbiy buyumlar hamda tibbiyot texnikasi bilan taʼminlash dasturlarini amalga oshirish;

farmatsevtika bozori konyunkturasini oʻrganishni tashkil qilish, ichki va tashki bozorlarda raqobatbardosh, yuqori sifatli dori vositalari, tibbiy buyumlar va tibbiyot texnikasining yangi turlarini ishlab chiqarishni oʻzlashtirishga hamda ularning jahon bozorlariga kirishiga koʻmaklashish;

aholi va davlat sogʻliqni saqlash muassasalarining dori vositalari, tibbiy buyumlar va tibbiyot texnikasi, shu jumladan, ularning mahalliy ishlab chiqarilgan turlari bilan taʼminlanganligi holatini tizimli tahlil qilish, shu asosda ichki bozorni yanada toʻldirish va ishlab chiqarishni mahalliylashtirish boʻyicha takliflar ishlab chiqish;

farmatsevtika tarmogʻi korxonalarining asbob-uskunalarini modernizatsiya qilish va texnologik qayta jihozlashga koʻmaklashish, xorijiy investitsiyalarni, shu jumladan, xorijiy va xalqaro moliya institutlarining mablagʻlarini keng jalb qilish;

dori vositalari, tibbiy buyumlar va tibbiyot texnikasini ishlab chiqarish jarayoniga innovatsion texnologiyalarni yanada joriy etish uchun ilmiy-tadqiqot ishlari olib borilishini tashkil etish;

Ijtimoiy ahamiyatli dori vositalari va tibbiy buyumlarning roʻyxatini takomillashtirish boʻyicha takliflarni ishlab chiqishda bevosita ishtirok etish;

dori vositalari, tibbiy buyumlar va tibbiyot texnikasini mahalliy ishlab chiqaruvchilarga yetakchi chet el farmatsevtika kompaniyalari bilan hamkorlikni tashkil etishda koʻmaklashish;

dori vositalari, tibbiy buyumlar va tibbiyot texnikasini mahalliy ishlab chiqarilgan mahsulot deb eʼtirof etish uchun mezonlarni ishlab chiqishga koʻmaklashish;

dori vositalari, tibbiy buyumlar va tibbiyot texnikasini davlat roʻyxatidan oʻtkazish;

davlat sogʻliqni saqlash muassasalarida foydalanilayotgan tibbiyot texnikasining hisobi va reyestri yuritilishini taʼminlash hamda ularning holatini tahlil qilish;

davlat sogʻliqni saqlash muassasalari uchun dori vositalari, tibbiy buyumlar, tibbiyot texnikasi va maxsus tibbiyot avtotransportining markazlashtirilgan xaridini tashkil etish;

Oʻzbekiston Respublikasi Sogʻliqni saqlash vazirligining ijtimoiy dorixonalari tarmogʻini tashkil etish va faoliyat koʻrsatishini taʼminlash;

farmatsevtika tarmogʻiga xalqaro standartlar joriy etilishini muvofiqlashtirish.

9. Agentlik oʻziga yuklangan vazifalarga muvofiq quyidagi funksiyalarni amalga oshiradi:

a) farmatsevtika tarmogʻini barqaror rivojlantirish strategiyasini, shu jumladan, davlat-xususiy sheriklikni joriy etish orqali ishlab chiqish va amalga oshirish, farmatsevtika tashkilotlari faoliyatini muvofiqlashtirish, aholi va davlat sogʻliqni saqlash muassasalarini dori vositalari, tibbiy buyumlar hamda tibbiyot texnikasi bilan taʼminlash dasturlarini amalga oshirish sohasida:

farmatsevtika tarmogʻini rivojlantirishning strategik yoʻnalishlari boʻyicha oʻrtacha va uzoq muddatli istiqbolga moʻljallangan takliflar kiritadi;

aholi va davlat sogʻliqni saqlash muassasalarini dori vositalari, tibbiy buyumlar hamda tibbiyot texnikasi bilan taʼminlash boʻyicha yagona davlat siyosati amalga oshirilishini taʼminlaydi;

farmatsevtika tarmogʻini rivojlantirishning respublika va hududiy dasturlarini, shu jumladan, farmatsevtika tarmogʻining erkin iqtisodiy zonalar hududlariga moʻljallangan dasturlarni davlat-xususiy sheriklik mexanizmlaridan foydalangan holda ishlab chiqish va amalga oshirishda ishtirok etadi;

farmatsevtika korxonalari va tashkilotlari faoliyatini muvofiqlashtiradi, aholi va davlat sogʻliqni saqlash muassasalarini dori vositalari, tibbiy buyumlar hamda tibbiyot texnikasi bilan taʼminlash dasturlarini amalga oshiradi;

ijtimoiy ahamiyatli dori vositalari va tibbiy buyumlarning import oʻrnini bosuvchi ishlab chiqarishlarini tashkil qilish boʻyicha investitsiya dasturlari ishlab chiqilishi va amalga oshirilishida ishtirok etadi;

farmatsevtika faoliyati bilan shugʻullanish uchun (dori vositalari va tibbiy buyumlarning chakana savdosi bundan mustasno), shuningdek, giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyat uchun litsenziya olgan shaxslar tomonidan litsenziya talablari va shartlariga rioya qilinishi ustidan nazoratni amalga oshirishda ishtirok etadi;

b) farmatsevtika bozori konyunkturasini oʻrganishni tashkil qilish, ichki va tashki bozorlarda raqobatbardosh, yuqori sifatli dori vositalari, tibbiy buyumlar va tibbiyot texnikasining yangi turlarini ishlab chiqarishni oʻzlashtirishga hamda ularning jahon bozorlariga kirishiga koʻmaklashish sohasida;

farmatsevtika bozorida marketing tadqiqotlarini tashkil qiladi va amalga oshiradi, talab katta boʻlgan dori vositalari, tibbiy buyumlar hamda tibbiyot texnikasini, ularni ishlab chiqarishni oʻzlashtirish yoki mavjud ishlab chiqarishlarga tuzatishlar kiritish maqsadida aniqlaydi;

mahalliy dori vositalari, tibbiy buyumlar hamda tibbiyot texnikasini tashqi bozorlarga chiqarishga koʻmaklashadi, shuningdek, xorijiy davlatlarda talab katta boʻlgan dori vositalari, tibbiy buyumlar hamda tibbiyot texnikasini ishlab chiqarishni oʻzlashtirish boʻyicha mahalliy ishlab chiqaruvchilar uchun tavsiyalar ishlab chiqadi;

v) aholi va davlat sogʻliqni saqlash muassasalarining dori vositalari, tibbiy buyumlar va tibbiyot texnikasi, shu jumladan, ularning mahalliy ishlab chiqarilgan turlari bilan taʼminlanganligi holatini tizimli tahlil qilish, shu asosda ichki bozorni yanada toʻldirish va ishlab chiqarishni mahalliylashtirish boʻyicha takliflar ishlab chiqish sohasida:

aholi va davlat sogʻliqni saqlash muassasalarining dori vositalari, tibbiy buyumlar hamda tibbiyot texnikasi bilan taʼminlanganligi darajasini tahlil qiladi;

aholi va davlat sogʻliqni saqlash muassasalarini dori vositalari, tibbiy buyumlar hamda tibbiyot texnikasi bilan taʼminlash darajasini oshirish, shuningdek, ularni ishlab chiqarishni mahalliylashtirish dasturlarini ishlab chiqish va amalga oshirishni tashkil etadi;

ijtimoiy ahamiyatli dori vositalari va tibbiy buyumlarning hamda tibbiyot texnikasining import oʻrnini bosuvchi ishlab chiqarishlarini tashkil qilish boʻyicha takliflar kiritadi;

g) farmatsevtika tarmogʻi korxonalarining asbob-uskunalarini modernizatsiya qilish va texnologik qayta jihozlashga koʻmaklashish, xorijiy investitsiyalarni, shu jumladan, xorijiy va xalqaro moliya institutlarining mablagʻlarini keng jalb qilish sohasida:

dori vositalari, tibbiy buyumlar hamda tibbiyot texnikasi ishlab chiqarishda foydalanilayotgan moddiy-texnik baza va texnologiyalarning holati monitoringini olib boradi va tahlil qiladi hamda natijalari boʻyicha ishlab chiqarishni modernizatsiya qilish, texnik va texnologik jihatdan qayta jihozlash dasturlarini ishlab chiqadi;

ishlab chiqarishni modernizatsiya qilish, texnik va texnologik jihatdan qayta jihozlashni nazarda tutuvchi investitsiya dasturlari roʻyxatini har yil hududlar va har bir korxona boʻyicha ishlab chiqadi va vakolatli organlarga taqdim etadi;

dori vositalari, tibbiy buyumlar hamda tibbiyot texnikasining chet eldagi innovatsion va yuqori texnologik ishlab chiqarishlarini tahlil qiladi hamda ushbu tahlil asosida Oʻzbekiston Respublikasi Investitsiyalar va tashqi savdo vazirligiga yangi investitsiya loyihalarini shakllantirish boʻyicha takliflar kiritadi;

mavjud ishlab chiqarishlarni modernizatsiya qilish va ustuvor investitsiya loyihalarini amalga oshirish uchun xorijiy investitsiyalar, shu jumladan, xorijiy va xalqaro moliya institutlarining mablagʻlarini jalb qilishga qaratilgan chora-tadbirlarni amalga oshiradi;

d) dori vositalari, tibbiy buyumlar va tibbiyot texnikasini ishlab chiqarish jarayoniga innovatsion texnologiyalarni yanada joriy etish uchun ilmiy-tadqiqot ishlari olib borilishini tashkil etish sohasida:

original va samarali dori vositalari yaratish va ularning turkumli ishlab chiqarilishini oʻzlashtirish boʻyicha ilmiy-tadqiqot ishlari olib borilishini tashkil etadi;

ilmiy-tadqiqot muassasalari va farmatsevtika korxonalari oʻrtasida tayyor ilmiy ishlanmalarni ishlab chiqarishga joriy qilish va tadqiqotlarning, shu jumladan, oʻsimliklardan dori vositalari ishlab chiqarishga qaratilgan tadqiqotlarning yangi yoʻnalishlarini boshlash boʻyicha kooperatsiyani taʼminlaydi;

dori vositalari, tibbiy buyumlar hamda tibbiyot texnikasi ishlab chiqarish boʻyicha innovatsion ishlanmalarni ragʻbatlantirish chora-tadbirlarini ishlab chiqadi;

e) Ijtimoiy ahamiyatli dori vositalari va tibbiy buyumlarning roʻyxatini takomillashtirish boʻyicha takliflarni ishlab chiqishda bevosita ishtirok etish sohasida:

Ijtimoiy ahamiyatli dori vositalari va tibbiy buyumlar roʻyxatini takomillashtirish maqsadida import qilinadigan va mahalliy ishlab chiqaruvchilar tomonidan ishlab chiqariladigan dori vositalari va tibbiy buyumlarning nomenklaturasini tahlil qiladi;

ichki va tashqi farmatsevtika bozorlarining narx konyukturasini, import qilinadigan va mahalliy ishlab chiqaruvchilar tomonidan ishlab chiqariladigan dori vositalari va tibbiy buyumlarga narxlarning shakllanishi mexanizmlarini oʻrganadi;

j) dori vositalari, tibbiy buyumlar va tibbiyot texnikasini mahalliy ishlab chiqaruvchilarga yetakchi chet el farmatsevtika kompaniyalari bilan hamkorlikni tashkil etishda koʻmaklashish sohasida:

mahalliy ishlab chiqaruvchilar bilan yetakchi xorijiy kompaniyalar oʻrtasida hamkorlikni tashkil etadi;

mahalliy tashkilotlar vakillarining xalqaro farmatsevtika koʻrgazmalarida, forumlar, konferensiyalar, seminarlarda hamda xorijiy mamlakatlarda oʻtkaziladigan milliy koʻrgazmalarda ishtirok etishini taʼminlaydi;

xalqaro tashkilotlar, hukumatlararo komissiyalar (guruhlar) va biznes- forumlar ishida qatnashadi;

z) dori vositalari, tibbiy buyumlar va tibbiyot texnikasini mahalliy ishlab chiqarilgan mahsulot deb eʼtirof etish uchun mezonlarni ishlab chiqishga koʻmaklashish sohasida:

ishlab chiqaruvchi tashkilotlarda dori vositalari, tibbiy buyumlar va tibbiyot texnikasi ishlab chiqarishning texnologik jarayoni bosqichlarining mahalliylashtirilganligi darajasini tahlil qiladi;

dori vositalari, tibbiy buyumlari va tibbiyot texnikasini mahalliy ishlab chiqarilgan mahsulot deb eʼtirof etish uchun mezonlarni belgilash boʻyicha tavsiyalar kiritadi;

i) dori vositalari, tibbiy buyumlar va tibbiyot texnikasini davlat roʻyxatidan oʻtkazish sohasida:

dori vositalari, tibbiy buyumlar va tibbiyot texnikasini davlat roʻyxatidan oʻtkazish, sifatini nazorat qilish, standartlashtirish va sertifikatlash amalga oshirilishini taʼminlaydi;

tibbiyot amaliyotida qoʻllashga ruxsat etilgan Dori vositalari, tibbiy buyumlar va tibbiyot texnikasi davlat reyestri yuritilishi va davriy nashr eʼlon qilinishini taʼminlaydi;

Davlat farmakopeyasi shakllantirilishini taʼminlaydi;

farmokologik va/yoki dori vositalari va tibbiy buyumlarning klinikagacha va klinik tadqiqotlari natijalari ekspertizadan oʻtkazilishini tashkil qiladi;

dori vositalari va “in vitro” tashxis vositalariga farmakopeya hujjatlarini ekspertizadan oʻtkazish, kelishish va tasdiqlashni, shuningdek, tibbiy buyumlar (“in vitro” tashxis vositalaridan tashqari) va tibbiyot texnikasini texnik jihatdan tartibga solish sohasidagi normativ hujjatlarni ekspertizadan oʻtkazish va kelishishni tashkil qiladi;

farmokologik nazorat amalga oshirilishini taʼminlaydi;

dori vositalari, tibbiy buyumlar va tibbiyot texnikasining zararli taʼsiri aniqlanganda ularni ishlab chiqarish, tayyorlash, import qilish va sotishni belgilangan tartibda toʻxtatib turishni taʼminlaydi;

dori vositalari, tibbiy buyumlar va tibbiyot texnikasini sertifikatlash organlari, shu jumladan, sinov laboratoriyalari faoliyati muvofiqlashtirilishi va nazorat qilinishini taʼminlaydi;

sertifikatlanadigan dori vositalari va tibbiy buyumlar ishlab chiqarish sharoitlarini baholash amalga oshirilishini taʼminlaydi;

texnik jihatdan tartibga solish boʻyicha normativ-huquqiy hujjatlar fondini takomillashtirish chora-tadbirlarini amalga oshiradi;

huquqni muhofaza qilish organlarining murojaatlari boʻyicha dori vositalari, tibbiy buyumlar va tibbiyot texnikasini ekspertizadan oʻtkazishni taʼminlaydi;

farmatsevtika tarmogʻi mutaxassislarini malaka oshirish kurslarida, shu jumladan, xorijiy mamlakatlarda yoki xorijiy mutaxassislarni jalb qilgan holda oʻqitishni tashkil qiladi;

k) davlat sogʻliqni saqlash muassasalarida foydalanilayotgan tibbiyot texnikasining hisobi va reyestri yuritilishini taʼminlash hamda ularning holatini tahlil qilish sohasida:

davlat sogʻliqni saqlash muassasalarida foydalanilayotgan tibbiyot texnikasining elektron reyestrini ishlab chiqadi va yuritadi;

davlat sogʻliqni saqlash muassasalarida tibbiyot texnikasi holati monitoringini olib boradi, ularni taʼmirlash va yangilash, shuningdek, ularga texnik xizmat koʻrsatishni yaxshilash boʻyicha takliflar kiritadi;

l) davlat sogʻliqni saqlash muassasalari uchun dori vositalari, tibbiy buyumlar, tibbiyot texnikasi va maxsus tibbiyot avtotransportining markazlashtirilgan xaridini tashkil etish sohasida;

Oʻzbekiston Respublikasi Sogʻliqni saqlash vazirligi tomonidan har yili belgilanadigan ehtiyojlar asosida ijtimoiy ahamiyatli dori vositalari va tibbiy buyumlar, tibbiyot texnikasi va maxsus tibbiyot avtotransportining markazlashtirilgan xaridini taʼminlaydi;

davlat sogʻliqni saqlash muassasalari uchun dori vositalari va tibbiy buyumlar, tibbiyot texnikasi va maxsus tibbiyot avtotransportini xarid qilish boʻyicha tender savdolari oʻtkazilishini taʼminlaydi;

Oʻzbekiston Respublikasi Sogʻliqni saqlash vazirligi tizimida amalga oshiriladigan investitsiya loyihalari doirasida tashkil qilingan loyihalarni amalga oshirish guruhlari faoliyatini dori vositalari va tibbiy buyumlar, tibbiyot texnikasi va maxsus tibbiyot avtotransportining markazlashtirilgan xaridiga tegishli qismi boʻyicha muvofiqlashtiradi;

ijtimoiy ahamiyatli dori vositalari va tibbiy buyumlarning sunʼiy tanqisligini vujudga keltirish va narxlarini sunʼiy oshirishga yoʻl qoʻymaslikka qaratilgan kompleks chora-tadbirlarni doimiy ravishda ishlab chiqadi va amalga oshiradi;

ijtimoiy ahamiyatli dori vositalari va tibbiy buyumlar davlat sogʻliqni saqlash tizimining har bir davolash-profilaktika muassasasiga, shu jumladan, chekka qishloq joylariga yetkazib berilishini taʼminlaydi;

m) Oʻzbekiston Respublikasi Sogʻliqni saqlash vazirligining ijtimoiy dorixonalari tarmogʻini tashkil etish va faoliyat koʻrsatishini taʼminlash sohasida:

tasdiqlangan joylashtirishga muvofiq Oʻzbekiston Respublikasi Sogʻliqni saqlash vazirligining ijtimoiy dorixonalar tarmogʻi tashkil etilishi va faoliyat yuritishini taʼminlaydi;

Oʻzbekiston Respublikasi Sogʻliqni saqlash vazirligining ijtimoiy dorixonalarini dori vositalari va tibbiy buyumlar bilan uzluksiz taʼminlashni tashkil qiladi;

Oʻzbekiston Respublikasi Sogʻliqni saqlash vazirligining ijtimoiy dorixonalari faoliyatini muvofiqlashtiradi va ular faoliyati ustidan idoraviy nazoratni amalga oshiradi;

n) farmatsevtika tarmogʻiga xalqaro standartlarning joriy etilishini muvofiqlashtirish sohasida:

dori vositalari, tibbiy buyumlar va tibbiyot texnikasining mahalliy standartlarini xalqaro standartlar bilan uygʻunlashtirishni taʼminlaydi;

dori vositalarini ishlab chiqarish, muomalasini tartibga solish, sifatini nazorat qilish hamda “ISO” sifatni boshqarish tizimlarini va Zarur tarzdagi amaliyotni (GxP) joriy qilish sohasida xalqaro hamkorlikni muvofiqlashtiradi;

farmatsevtika tarmogʻi korxonalariga xalqaro standartlarni joriy qilishda koʻmaklashadi;

Zarur tarzda ishlab chiqarish amaliyoti qoidalari (GMP), Zarur tarzda distributsiya amaliyoti qoidalari (GDP), Zarur tarzda saqlash amaliyoti qoidalari (GSP), Zarur tarzda klinika amaliyoti qoidalari (GCP), Zarur tarzda laboratoriya amaliyoti qoidalari (GLP), Zarur tarzda dorixona amaliyoti qoidalari (GPP) talablariga muvofiqlik boʻyicha audit oʻtkazilishini va tegishli xulosa va/yoki sertifikatlar berilishini tashkil qiladi.

Agentlik qonun hujjatlariga muvofiq boshqa funksiyalarni ham amalga oshirishi mumkin.

10. Agentlik yuklangan vazifalar va funksiyalarni amalga oshirish uchun quyidagi huquqlarga ega:

respublika farmatsevtika tarmogʻini rivojlantirishni nazarda tutuvchi kompleks chora-tadbirlarni ishlab chiqish va amalga oshirish masalalari boʻyicha davlat organlari va boshqa tashkilotlarning ishini muvofiqlashtirish;

davlat organlari va boshqa tashkilotlardan Agentlik vakolatiga kiradigan masalalar boʻyicha hujjatlar, statistik maʼlumotlar, hisobotlar, tahliliy materiallar, xulosalar va boshqa maʼlumotlarni soʻrash va olish;

xorijiy mamlakatlardan import qilinadigan dori vositalari, tibbiy buyumlar va tibbiyot texnikasini belgilangan tartibda davlat roʻyxatidan oʻtkazish va sertifikatlashni amalga oshirish;

Agentlikka yuklangan vazifalarni bajarish doirasida davlat organlari va boshqa tashkilotlar, nodavlat notijorat tashkilotlari, yetakchi loyiha institutlari, ilmiy-taʼlim muassasalari, xalqaro tashkilotlar, xorijiy kompaniyalarning yuqori malakali xodimlarini va mutaxassislarni jalb qilish;

xorijiy davlatlarning vakolatli organlari bilan farmatsevtika tarmogʻini rivojlantirish masalalari boʻyicha toʻgʻridan-toʻgʻri maʼlumot almashish;

farmatsevtika tarmogʻining erkin iqtisodiy zonalarini tashkil qilish, faoliyatini yanada takomillashtirish va ularni boshqarish masalalarini kelishish;

belgilangan tartibda noshirlik faoliyatini amalga oshirish, axborot materiallari, davriy nashrlar va boshqa bosma mahsulotlarni chiqarish hamda tarqatish;

farmatsevtika korxonalarining Zarur tarzda ishlab chiqarish amaliyoti qoidalariga (GMP) muvofiqligini sertifikatlash;

farmatsevtika tarmogʻi mutaxassislarining malakasini oshirish;

farmatsevtika tarmogʻi sohasidagi muammolar boʻyicha muvofiqlashtiruvchi, ilmiy-texnik, idoralararo ekspert komissiyalari tashkil qilish, maxsus yigʻilishlar chaqirish, shuningdek, ushbu muammolarni oʻrganish, maslahatlashish va ularni hal qilish uchun mahalliy va xorijiy mutaxassislarni, ekspertlarni jalb qilish;

dori vositalari, tibbiy buyumlar va tibbiyot texnikasiga belgilangan tartibda muvofiqlik sertifikatlari berish;

farmatsevtika tarmogʻini rivojlantirish masalalari boʻyicha Oʻzbekiston Respublikasining xalqaro shartnomalarini, shu jumladan, idoralararo tusdagi shartnomalarni ishlab chiqishda qatnashish.

Agentlik qonun hujjatlariga muvofiq boshqa huquqlarga ham ega boʻlishi mumkin.

11. Agentlik oʻziga yuklangan vazifalar va funksiyalar samarali bajarilishi uchun javob beradi.

12. Agentlikka Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan direktor boshchilik qiladi.

Agentlik direktori maqomi, maishiy, tibbiy va transport taʼminoti shartlari boʻyicha Oʻzbekiston Respublikasi Sogʻliqni saqlash vazirining birinchi oʻrinbosariga tenglashtiriladi.

Agentlik direktori Oʻzbekiston Respublikasi Prezidenti bilan kelishgan holda Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod etiladigan oʻrinbosarlarga ega boʻladi.

Agentlikning hududiy boshqarmalariga Oʻzbekiston Respublikasi Sogʻliqni saqlash vaziri bilan kelishgan holda Agentlik direktori tomonidan lavozimga tayinlanadigan va lavozimdan ozod etiladigan boshliq rahbarlik qiladi.

Agentlik va uning hududiy boshqarmalari xodimlari mehnatga haq toʻlash shartlari boʻyicha Oʻzbekiston Respublikasi Sogʻliqni saqlash vazirligi va uning hududiy boʻlinmalarining tegishli xodimlariga tenglashtiriladi.

13. Agentlik direktori zimmasiga yuklangan vazifalarni bajarish uchun:

a) Agentlik faoliyatiga umumiy rahbarlik qiladi;

b) Agentlik va uning hududiy boshqarmalari xodimlarini belgilangan tartibda lavozimga tayinlaydi va lavozimdan ozod qiladi;

v) hududiy boshqarmalar rahbarlarining hisobotlarini eshitadi;

g) Oʻzbekiston Respublikasi Sogʻliqni saqlash vaziriga:

Agentlik faoliyati natijalari haqidagi hisobotni;

Agentlik vakolatiga kiradigan masalalar boʻyicha normativ-huquqiy hujjatlar va boshqa normativ hujjatlar loyihalarini;

idoraviy mansub tashkilotlar va hududiy boshqarmalar rahbarlarini lavozimga tayinlash va lavozimdan ozod qilish haqida taqdimnomalarni;

Agentlik va uning hududiy boshqarmalari tuzilmasiga oʻzgartirishlar kiritish haqidagi takliflarni kiritadi (taqdim etadi);

d) Agentlik vakolatiga kiradigan masalalar boʻyicha qarorlar qabul qiladi, oʻz oʻrinbosarlarining hamda Agentlik, hududiy boshqarmalar va idoraviy mansub tashkilotlarning boshqa mansabdor shaxslarining vakolatlari, majburiyatlari va javobgarligi darajalarini belgilaydi;

e) oʻz vakolatlari doirasida Agentlik xodimlari tomonidan bajarilishi majburiy boʻlgan buyruqlar va farmoyishlar chiqaradi hamda koʻrsatmalar beradi;

j) Agentlikka yuklangan vazifalar va funksiyalarning bajarilishi uchun shaxsan javob beradi;

z) qonun hujjatlari va ushbu Nizomga muvofiq boshqa vakolatlarni ham amalga oshiradi.

14. Agentlik direktori ish joyida boʻlmagan hollarda uning vakolatlarini direktorning birinchi oʻrinbosari amalga oshiradi.

15. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.

1. Ushbu Nizom Oʻzbekiston Respublikasining “Dori vositalari va farmatsevtika faoliyati toʻgʻrisida”gi Qonuniga va Oʻzbekiston Respublikasi Prezidentining “Farmatsevtika tarmogʻini boshqarish tizimini tubdan takomillashtirish chora-tadbirlari toʻgʻrisida” 2017-yil 7-noyabrdagi PF-5229-son Farmoniga muvofiq Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi faoliyatining samaradorligini baholash mezonlarini (keyingi oʻrinlarda baholash deb ataladi) belgilaydi.

2. Baholashdan maqsad Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligiga yuklangan vazifalar va funksiyalar bajarilishi samaradorligini aniqlashdir.

3. Baholash uchun quyidagilar maʼlumot manbalari hisoblanadi:

rasmiy statistik maʼlumotlar;

amalga oshirilgan ishlar toʻgʻrisidagi hisobotlar;

Agentlik faoliyati monitoringi natijalari boʻyicha axborot-tahliliy materiallar;

vakolatli organlar tomonidan oʻtkazilgan tekshirishlar va oʻrganishlar natijalari;

xolis ekspertlar xulosalari;

Agentlik faoliyati sohasidagi ijtimoiy tadqiqotlar natijalari;

nodavlat notijorat tashkilotlari maʼlumotlari.

4. Baholash Oʻzbekiston Respublikasi Sogʻliqni saqlash vazirligi (keyingi oʻrinlarda Sogʻliqni saqlash vazirligi deb ataladi) tomonidan yil yakuniga koʻra har yili oʻtkaziladi.

5. Baholashni oʻtkazish rejasi Agentlik tomonidan Sogʻliqni saqlash vazirligiga yil yakuniga koʻra statistik va boshqa maʼlumotlarning taqdim etilishi muddatlarini oʻz ichiga oladi.

6. Agentlik faoliyatining samaradorligi quyidagi mezonlarga koʻra baholanadi:

a) farmatsevtika tarmogʻini barqaror rivojlantirish strategiyasini, shu jumladan, davlat-xususiy sheriklikni joriy etish orqali ishlab chiqish va amalga oshirish, farmatsevtika tashkilotlari faoliyatini muvofiqlashtirish, aholi va davlat sogʻliqni saqlash muassasalarini dori vositalari, tibbiy buyumlar hamda tibbiyot texnikasi bilan taʼminlash dasturlarini amalga oshirish sohasida:

farmatsevtika tarmogʻini rivojlantirishning, shu jumladan, farmatsevtika tarmogʻini erkin iqtisodiy zonalarda rivojlantirishning ishlab chiqilgan dasturlari soni;

dori vositalari, tibbiy buyumlar va tibbiy texnika ishlab chiqarishning oʻsishi hamda ijtimoiy ahamiyatli dori vositalari va tibbiy buyumlarni ishlab chiqarish parametrlari bajarilishi;

davlat investitsiya dasturlari bajarilishi parametrlari bajarilishi, farmatsevtika tarmogʻiga investitsiyalar jalb etilishining oʻsishi;

b) farmatsevtika bozori konyunkturasini oʻrganishni tashkil qilish, ichki va tashki bozorlarda raqobatbardosh, yuqori sifatli dori vositalari, tibbiy buyumlar va tibbiyot texnikasining yangi turlarini ishlab chiqarishni oʻzlashtirishga hamda ularning jahon bozorlariga kirishiga koʻmaklashish sohasida:

yangi nomdagi dori vositalari, tibbiy buyumlar va tibbiy texnika ishlab chiqarishni oʻzlashtirish;

farmatsevtika mahsulotlarining yangi xorijiy bozorlarini oʻzlashtirishi;

xorijiy mamlakatlarda roʻyxatdan oʻtkazilgan dori vositalari, tibbiy buyumlar va tibbiy texnika soni;

mahsulot eksporti koʻrsatkichining oʻsishi;

v) aholi va davlat sogʻliqni saqlash muassasalarining dori vositalari, tibbiy buyumlar va tibbiyot texnikasi, shu jumladan, ularning mahalliy ishlab chiqarilgan turlari bilan taʼminlanganligi holatini tizimli tahlil qilish, shu asosda ichki bozorni yanada toʻldirish va ishlab chiqarishni mahalliylashtirish boʻyicha takliflar ishlab chiqish sohasida:

aholi va davlat sogʻliqni saqlash muassasalarining ijtimoiy ahamiyatli dori vositalari va tibbiy buyumlar bilan taʼminlanganligi darajasi;

yangi turdagi dori vositalari, tibbiy buyumlar va tibbiy texnika, shu jumladan, ijtimoiy ahamiyatli dori vositalari va tibbiy buyumlar ishlab chiqarishni mahalliylashtirish koʻrsatkichlarining bajarilishi;

g) farmatsevtika tarmogʻi korxonalarining asbob-uskunalarini modernizatsiya qilish va texnologik qayta jihozlashga koʻmaklashish, xorijiy investitsiyalarni, shu jumladan, xorijiy va xalqaro moliya institutlarining mablagʻlarini keng jalb qilish sohasida:

ishlab chiqaruvchi tashkilotlarni modernizatsiya qilish, texnik va texnologik jihatdan qayta jihozlash darajasi;

xorijiy investitsiyalarni jalb etish va oʻzlashtirish hajmlari;

d) dori vositalari, tibbiy buyumlar va tibbiyot texnikasini ishlab chiqarish jarayoniga innovatsion texnologiyalarni yanada joriy etish uchun ilmiy-tadqiqot ishlari olib borilishini tashkil etish sohasida:

yaratilgan yangi dori vositalari, tibbiy buyumlar va tibbiy texnika soni, shu jumladan, jalb etilgan grantlar hamda yaratilgan yangi dori vositalari, tibbiy buyumlar va tibbiy texnikaning ishlab chiqarishga joriy etilishi darajasi;

e) Ijtimoiy ahamiyatli dori vositalari va tibbiy buyumlarning roʻyxatini takomillashtirish boʻyicha takliflarni ishlab chiqishda bevosita ishtirok etish sohasida:

ijtimoiy ahamiyatli dori vositalari va tibbiy buyumlar importini, ularni ishlab chiqarishni oʻzlashtirish va ichki bozorda realizatsiya qilishni taʼminlash hisobiga qisqartirish;

j) dori vositalari, tibbiy buyumlar va tibbiyot texnikasini mahalliy ishlab chiqaruvchilarga yetakchi chet el farmatsevtika kompaniyalari bilan hamkorlikni tashkil etishda koʻmaklashish sohasida:

farmatsevtika tarmogʻini rivojlantirishning ustuvor yoʻnalishlari boʻyicha xorijiy farmatsevtika kompaniyalari bilan tuzilgan shartnomalar soni;

xorijiy farmatsevtika kompaniyalarini hamkorlikka jalb etish hisobiga ishlab chiqarishni kengaytirish darajasi hamda yangi tashkil etilgan qoʻshma korxonalar soni;

z) dori vositalari, tibbiy buyumlar va tibbiyot texnikasini mahalliy ishlab chiqarilgan mahsulot deb eʼtirof etish uchun mezonlarni ishlab chiqishga koʻmaklashish sohasida:

mahalliy ishlab chiqarishning dori vositalari, tibbiy buyumlar va tibbiyot texnikasi mezonlarga koʻra mahalliy ishlab chiqarilgan mahsulot deb eʼtirof etilishini asoslash darajasi;

i) dori vositalari, tibbiy buyumlar va tibbiyot texnikasini davlat roʻyxatidan oʻtkazish sohasida:

dori vositalari, tibbiy buyumlar va tibbiyot texnikasini davlat roʻyxatidan oʻtkazish tartibi va muddatlariga rioya etilishi;

klinik tadqiqotlar oʻtkazilishi holati;

k) davlat sogʻliqni saqlash muassasalarida foydalanilayotgan tibbiyot texnikasining hisobi va reyestri yuritilishini taʼminlash hamda ularning holatini tahlil qilish sohasida:

davlat sogʻliqni saqlash muassasalarida foydalanilayotgan tibbiyot texnikasi elektron reyestrining toʻliqligi va oʻz vaqtida yuritilishi;

davlat sogʻliqni saqlash muassasalaridagi tibbiyot texnikasining texnik holati darajasi;

l) davlat sogʻliqni saqlash muassasalari uchun dori vositalari, tibbiy buyumlar, tibbiyot texnikasi va maxsus tibbiyot avtotransportining markazlashtirilgan xaridini tashkil etish sohasida:

dori vositalari, tibbiy buyumlar, tibbiyot texnikasi va maxsus tibbiyot avtotransportining toʻliq va oʻz vaqtida markazlashtirilgan xaridi, shuningdek, ularning oʻz vaqtida yetkazib berilishi;

m) Oʻzbekiston Respublikasi Sogʻliqni saqlash vazirligining ijtimoiy dorixonalari tarmogʻini tashkil etish va faoliyat koʻrsatishini taʼminlash sohasida:

respublika hududlarini ijtimoiy dorixonalar tarmogʻi bilan qamrab olish darajasi;

ijtimoiy dorixonalarning ijtimoiy ahamiyatli dori vositalari va tibbiy buyumlar bilan taʼminlanganligi darajasi;

n) farmatsevtika tarmogʻiga xalqaro standartlarning joriy etilishini muvofiqlashtirish sohasida:

ISO xalqaro sifat menejmenti tizimi va Zarur tarzdagi ishlab chiqarish amaliyoti (GMP) xalqaro standartlari talablari joriy etilgan tashkilotlar soni;

dori vositalari, tibbiy buyumlar va tibbiyot texnikasi milliy standartlarining xalqaro standartlar bilan uygʻunlashtirilishi darajasi;

audit oʻtkazish va Zarur tarzdagi amaliyotlar qoidalariga (GxP) muvofiqlikka sertifikatlar yoki xulosalar berish muddatlari, tartiblariga rioya etish.

7. Ushbu Nizomning 6-bandida koʻrsatilgan mezonlar boʻyicha Agentlik faoliyatining samaradorligini baholash usulini ishlab chiqish va tasdiqlash, shuningdek, ularni metodologik qoʻllab-quvvatlash Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari bilan kelishgan holda Oʻzbekiston Respublikasi Sogʻliqni saqlash vazirligi tomonidan amalga oshiriladi.

8. Agentlik faoliyatini baholash natijalari boʻyicha Sogʻliqni saqlash vazirligi tomonidan Agentlik bilan birgalikda aniqlangan kamchiliklarni bartaraf etish boʻyicha tegishli takliflar tayyorlanadi va belgilangan tartibda Oʻzbekiston Respublikasi Vazirlar Mahkamasiga kiritiladi.

9. Sogʻliqni saqlash vaziri va Agentlik direktori agentlikning faoliyati toʻgʻrisida muntazam ravishda Vazirlar Mahkamasiga, Oʻzbekiston Respublikasi Prezidenti Administratsiyasining tegishli tarkibiy boʻlinmalariga va Oʻzbekiston Respublikasi Prezidentiga hisobot beradi.

10. Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari Agentlik rahbarlariga yuklangan vazifalar samarali bajarilishi uchun ular faoliyati ustidan muntazam monitoring olib boradi, Agentlik faoliyati samaradorligiga xolisona baho beradi.

11. Monitoring va baholash yakunlari boʻyicha Agentlikning alohida oʻrnak koʻrsatgan rahbarlari, mansabdor shaxslari va xodimlari ragʻbatlantiriladi yoxud yoʻl qoʻyilgan jiddiy kamchiliklar uchun egallab turgan lavozimidan ozod etishgacha boʻlgan javobgarlikka tortiladi.

12. Agentlik rahbariyati faoliyat samaradorligi sifatini oshirish choralari oʻz vaqtida koʻrilishi uchun shaxsan javob beradi.