Oʻzbekiston Respublikasi Prezidentining “Ichki ishlar organlarining jamoat tartibini saqlash va jamoat xavfsizligini taʼminlash sohasidagi faoliyatini tubdan takomillashtirish chora-tadbirlari toʻgʻrisida” 2017-yil 1-maydagi PQ-2940-son qaroriga muvofiq Vazirlar Mahkamasi qaror qiladi:

1. Ichki ishlar organlarining patrul-post xizmati boʻlinmalari tomonidan fuqarolar gavjum boʻladigan joylarda jamoat tartibini saqlash va jamoat xavfsizligini taʼminlash borasidagi xizmatlarni shartnomaviy-huquqiy asosda amalga oshirish tartibi toʻgʻrisidagi Nizom ilovaga muvofiq tasdiqlansin.

2. Oʻzbekiston Respublikasi Ichki ishlar vazirligi bir oy muddatda:

Moliya vazirligi bilan birgalikda ichki ishlar organlarining patrul-post xizmati boʻlinmalari tomonidan fuqarolar gavjum boʻladigan joylarda jamoat tartibini saqlash va jamoat xavfsizligini taʼminlash borasidagi xizmatlar tarifini belgilangan tartibda ishlab chiqsin va tasdiqlasin;

oʻzining meʼyoriy-huquqiy hujjatlarini mazkur qarorga muvofiqlashtirsin;

Qoraqalpogʻiston Respublikasi Vazirlar Mahkamasi, viloyatlar va Toshkent shahri hokimliklari bilan birgalikda tadbirkorlik subyektlari oʻrtasida mazkur qarorning maqsadi, mohiyati va amaliy ahamiyatini tushuntirish yuzasidan tadbirlarni tashkillashtirsin va amalga oshirsin.

3. Mazkur qarorning bajarilishini nazorat qilish Oʻzbekiston Respublikasi Ichki ishlar vaziri P.R. Bobojonov zimmasiga yuklansin.

1. Ushbu Nizom ichki ishlar organlarining patrul-post xizmati boʻlinmalari tomonidan fuqarolar gavjum boʻladigan joylarda jamoat tartibini saqlash va jamoat xavfsizligini taʼminlash borasidagi xizmatlarni shartnomaviy-huquqiy asosda koʻrsatish tartibini belgilaydi.

2. Ushbu Nizom ommaviy tadbirlarni tashkil etish va oʻtkazishga, shuningdek yigʻilishlar, mitinglar, koʻcha namoyishlari va demonstratsiyalarga nisbatan tatbiq etilmaydi.

3. Bozorlar, yirik savdo, koʻngilochar, dam olish majmualari va markazlari hamda fuqarolar gavjum boʻladigan boshqa joylarda (keyingi oʻrinlarda fuqarolar gavjum boʻladigan joylar deb ataladi) jamoat tartibini saqlash va jamoat xavfsizligini taʼminlash borasidagi tadbirlar shartnomaviy-huquqiy asosda ichki ishlar organlarining patrul-post xizmati boʻlinmalari (keyingi oʻrinlarda PPX boʻlinmalari deb ataladi) tomonidan mazkur joylarda faoliyat koʻrsatuvchi yuridik shaxslar (keyingi oʻrinlarda yuridik shaxslar deb ataladi) bilan tuziladigan shartnomalarga muvofiq pulli asosda amalga oshiriladi.

4. Jamoat tartibini saqlash va jamoat xavfsizligini taʼminlash xizmatlari koʻrsatish toʻgʻrisida shartnoma (keyingi oʻrinlarda shartnoma deb ataladi) tuzish uchun yuridik shaxs tuman (shahar) ichki ishlar boshqarmasi (boʻlim)ga ariza bilan murojaat qiladi. Arizada yuridik shaxsning nomi va tashkiliy-huquqiy shakli, fuqarolar gavjum boʻladigan joyning nomi, manzili, bino va inshootlar hamda atrofidagi hududning sxemasi ilova qilingan holda koʻrsatiladi.

5. Shartnoma tuzish toʻgʻrisidagi ariza ushbu Nizomning 1-ilovasidagi sxema asosida koʻrib chiqiladi.

6. Shartnoma tuzish toʻgʻrisidagi ariza tuman (shahar) ichki ishlar boshqarmasining (boʻlimining) jamoat tartibini saqlash boʻlimi (boʻlinmasi, guruhi) tomonidan ariza kelib tushgan kundan boshlab oʻn ish kuni ichida koʻrib chiqiladi.

7. Arizani koʻrib chiqishda tuman (shahar) ichki ishlar boshqarmasining (boʻlimining) jamoat tartibini saqlash boʻlimi (boʻlinmasi, guruhi) yuridik shaxs bilan birgalikda fuqarolar gavjum boʻladigan joy koʻzdan kechiriladi.

8. Fuqarolar gavjum boʻladigan joyni koʻzdan kechirish natijasi boʻyicha dalolatnoma tuzilib, unda obyekt hududining chegarasi, PPX boʻlinmasi shaxsiy tarkibining talab etiladigan soni, xizmat xonalari, post va marshrutlarning joylashuvi, javobgarlik hududi, PPX boʻlinmasi xodimlarining xizmat olib borish vaqti hamda tartiblari belgilanadi, shuningdek, shartnoma loyihasi ishlab chiqiladi.

Koʻzdan kechirish dalolatnomasi va shartnoma loyihasi tegishli ravishda Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari hamda Toshkent shahar Ichki ishlar bosh boshqarmasining Patrul-post xizmati va jamoat tartibini saqlash boshqarmasiga yuboriladi.

9. Fuqarolar gavjum boʻladigan joyning oʻziga xos xususiyatlari inobatga olingan holda, koʻzdan kechirish dalolatnomasi va shartnoma loyihasida PPX boʻlinmasining xizmatini tashkil etishning alohida shartlari koʻrsatilishi mumkin.

10. Yuklangan vazifalarni bajarish uchun PPX boʻlinmasi shaxsiy tarkibining soni, post va patrul yoʻnalishlarining joylashuvi, shuningdek xizmatni oʻtash qoidalari Oʻzbekiston Respublikasi Ichki ishlar vaziri tomonidan belgilangan tartibda amalga oshiriladi.

11. Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari yoki Toshkent shahar ichki ishlar bosh boshqarmasining Patrul-post xizmati va jamoat tartibini saqlash boshqarmasi koʻzdan kechirish dalolatnomasi va shartnoma loyihasini koʻrib chiqish yakunlari boʻyicha ularni besh ish kunidan kechiktirmagan holda, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari yoki Toshkent shahar Ichki ishlar bosh boshqarmasi rahbariyatiga taqdim etadi.

12. Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari yoki Toshkent shahar Ichki ishlar bosh boshqarmasining Patrul-post xizmati va jamoat tartibini saqlash boshqarmalari tomonidan koʻzdan kechirish dalolatnomasida obyektlar chegarasini, PPX boʻlinmasining javobgarlik zonalarini, post va patrul yoʻnalishlarining joylashuvi, soni hamda koʻrsatiladigan xizmatlar smeta qiymatini belgilashda jiddiy kamchiliklar aniqlanganda, tuman (shahar) ichki ishlar boshqarmasiga (boʻlimiga) mazkur kamchiliklar hamda ularni bartaraf etish tartiblari koʻrsatilgan bildirishnoma yuboriladi.

13. Shartnoma loyihasi amaldagi qonunlarga muvofiq boʻlgan taqdirda, Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari hamda Toshkent shahar Ichki ishlar bosh boshqarmasi uch ish kunidan oshmagan muddatda Oʻzbekiston Respublikasi Ichki ishlar vazirligiga yuridik shaxs bilan shartnoma tuzish hamda PPX boʻlinmasi xodimlari uchun qoʻshimcha shtat birliklari ajratish toʻgʻrisida taqdimnoma kiritadi.

14. Yuridik shaxslar Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari hamda Toshkent shahar Ichki ishlar bosh boshqarmasi bilan shartnoma tuzadi.

15. Shartnoma tuzish va PPX boʻlinmasi xodimlari uchun qoʻshimcha shtat birliklari ajratish qonunchilikda belgilangan tartibda amalga oshiriladi.

16. PPX boʻlinmasi zimmasidagi vazifalarni qoʻshimcha shtat birliklari ajratilgandan soʻng amalga oshiradi.

17. Fuqarolar gavjum boʻladigan joylarda jamoat tartibini saqlash va jamoat xavfsizligini taʼminlash xizmatlari PPX boʻlinmalari naryadlarining faoliyatini tashkil etish orqali koʻrsatiladi.

18. PPX boʻlinmalari faoliyatini moliyalashtirish va ularni moddiy-texnik vositalar bilan taʼminlash tuzilayotgan shartnomalar boʻyicha tushadigan mablagʻlar hisobidan amalga oshiriladi.

19. PPX boʻlinmasi xodimlarining xizmatni olib borish tartibi va vaqti, post va marshrutlarning joylashuvi hamda javobgarlik hududlari tuman (shahar) ichki ishlar boshqarmasi (boʻlimi) boshligʻi tomonidan yuridik shaxs bilan kelishilgan holda tasdiqlanadi.

20. Fuqarolar gavjum boʻladigan joy bir nechta tumanlar (shaharlar) hududida joylashgan taqdirda, PPX boʻlinmasi xodimlarining xizmatni olib borish tartibi va vaqti, post va marshrutlarning joylashuvi hamda javobgarlik hududlari Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari hamda Toshkent shahar Ichki ishlar bosh boshqarmasining Patrul-post xizmati va jamoat tartibini saqlash boshqarmasi boshligʻi tomonidan tasdiqlanadi.

21. PPX boʻlinmalari xodimlari Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari hamda Toshkent shahar Ichki ishlar bosh boshqarmasi Patrul-post xizmati va jamoat tartibini saqlash boshqarmasi boshliqlari taqdimnomasiga asosan, Qoraqalpogʻiston Respublikasi Ichki ishlar vaziri, viloyatlar ichki ishlar boshqarmalari hamda Toshkent shahar Ichki ishlar bosh boshqarmasi boshliqlari tomonidan lavozimga tayinlanadi va lavozimdan ozod etiladi.

22. PPX boʻlinmalarining boshqaruv apparati va komandirlar tarkibining umumiy soni (otryad, guruh komandirlari) shartnomalarga asosan ajratilgan shtat birliklarining toʻrt foizidan oshmasligi kerak.

23. PPX boʻlinmalarining amaldagi shartnomalar asosida kiritilgan shtat birliklari belgilangan tartibda qisqartiriladi.

24. Ichki ishlar organlarining shartnoma asosida fuqarolar gavjum boʻladigan joylarda jamoat tartibini saqlash va jamoat xavfsizligini taʼminlash xizmatlari koʻrsatish tariflari belgilangan tartibda Oʻzbekiston Respublikasi Moliya vazirligida ushbu tariflarni deklaratsiya qilish (tasdiqlash) yoʻli bilan belgilanadi.

25. Shartnomalar asosida xizmatlar koʻrsatishdan tushadigan mablagʻlar Qoraqalpogʻiston Respublikasi Ichki ishlar vazirligi, viloyatlar ichki ishlar boshqarmalari hamda Toshkent shahar Ichki ishlar bosh boshqarmasining budjetdan tashqari maxsus hisob-raqamlariga oʻtkaziladi.

26. Koʻrsatiladigan xizmatlar uchun kelib tushadigan mablagʻlar xodimlarga oylik maosh berish, ularni moddiy ragʻbatlantirish, ijtimoiy himoya qilish PPX boʻlinmalarining moddiy-texnik bazasini, jumladan zamonaviy axborot-kommunikatsiya texnologiyalari bilan jihozlash va yangilash uchun sarflanadi.

27. Mazkur Nizom talablari buzilishida aybdor shaxslar qonunchilikda belgilangan tartibda javob beradilar.