Oʻzbekiston Respublikasining “Dori vositalari va farmatsevtika faoliyati toʻgʻrisida”gi Qonuniga, Oʻzbekiston Respublikasi Vazirlar Mahkamasining 2017-yil 6-apreldagi 185-son “Dori vositalari va farmatsevtika faoliyati toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” 2016-yil 4-yanvardagi OʻRQ-399-son Oʻzbekiston Respublikasi Qonunini amalga oshirish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi sogʻliqni saqlash vazirining 2013-yil 27-avgustdagi 284-son “Ambulatoriyada davolanishda shaxslarning ayrim toifalarini imtiyozli asosda dori vositalari bilan taʼminlash boʻyicha retseptura blankalarini toʻldirish, dorixona muassasalari tomonidan retseptlarni rasmiylashtirish, retseptura blankalarini va dori vositalarini bepul berish uchun yozilgan retseptlarni hisobga olish, saqlash va yoʻq qilish tartibi toʻgʻrisidagi nizomni tasdiqlash haqida”gi buyrugʻiga (roʻyxat raqami 2509, 2013-yil 17-sentabr) (Oʻzbekiston Respublikasi qonun hujjatlari toʻplami, 2013-y., 38-son, 499-modda) ilovaga muvofiq oʻzgartirishlar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Buyruqda:

a) nomi va 1-bandidagi “dorixona muassasalari” degan soʻzlar “dorixonalar” degan soʻz bilan almashtirilsin;

b) muqaddima quyidagi tahrirda bayon etilsin:

“Oʻzbekiston Respublikasining “Fuqarolar sogʻligʻini saqlash toʻgʻrisida”gi va “Dori vositalari va farmatsevtika faoliyati toʻgʻrisida”gi qonunlariga, Oʻzbekiston Respublikasi Vazirlar Mahkamasining 2013-yil 22-iyuldagi 204-sonli “Shaxslarning ayrim toifalarini imtiyozli asosda dori vositalari bilan taʼminlash tartibini yanada takomillashtirish chora-tadbirlari toʻgʻrisida”gi qaroriga muvofiq buyuraman:”.

2. Nizomda:

a) nomidagi, muqaddimadagi, 1 va 3-bandlardagi hamda 1, 4 va 5-ilovalarning belgilaridagi “dorixona muassasalari” degan soʻzlar “dorixonalar” degan soʻz bilan almashtirilsin;

b) muqaddima quyidagi tahrirda bayon etilsin:

“Mazkur Nizom Oʻzbekiston Respublikasining “Fuqarolar sogʻligʻini saqlash toʻgʻrisida”gi va “Dori vositalari va farmatsevtika faoliyati toʻgʻrisida”gi qonunlariga, Oʻzbekiston Respublikasi Vazirlar Mahkamasining 2013-yil 22-iyuldagi 204-sonli “Shaxslarning ayrim toifalarini imtiyozli asosda dori vositalari bilan taʼminlash tartibini yanada takomillashtirish chora-tadbirlari toʻgʻrisida”gi qaroriga muvofiq, ambulatoriyada davolanishda shaxslarning ayrim toifalarini (bundan buyon matnda bemorlar deb yuritiladi) imtiyozli asosda dori vositalari bilan taʼminlash boʻyicha retseptura blankalarini toʻldirish, dorixonalar tomonidan retseptlarni rasmiylashtirish, retseptura blankalarini va dori vositalarini bepul berish uchun yozilgan retseptlarni hisobga olish, saqlash va yoʻq qilish tartibini belgilaydi.”;

v) 13-band quyidagi tahrirda bayon etilsin:

“13. Retseptni yozishda Davolash-profilaktika muassasalarida dori vositalarini tayinlash hamda bemorning dori vositalarini qabul qilish, saqlash va qoʻllash tartibi, shuningdek dorixonalar tomonidan aholiga dori vositalarini retsept asosida berish toʻgʻrisida nizomning (roʻyxat raqami 2118, 2010-yil 29-iyun) 3-ilovasida nazarda tutilgan asosiy retseptura qisqartmalaridan foydalanilishi mumkin.”;

g) 21-banddagi “dorixona muassasasida” degan soʻzlar “dorixonada” degan soʻz bilan almashtirilsin;

d) 24-banddagi “Dorixona muassasalaridan” degan soʻzlar “Dorixonalardan” degan soʻz bilan almashtirilsin;

e) 25-banddagi “dorixona muassasalarida” va “dorixona muassasasi” degan soʻzlar tegishincha “dorixonalarda” va “dorixona” degan soʻzlar bilan almashtirilsin;

j) 29-band quyidagi tahrirda bayon etilsin:

“29. Vazirlar Mahkamasining 2017-yil 6-apreldagi 185-son qarori bilan tasdiqlangan Dori vositalarini va tibbiy buyumlarni chakana realizatsiya qilish tartibi toʻgʻrisidagi nizomning 36-bandiga asosan shaxslarning ayrim toifalariga dori vositalarini imtiyozli berish uchun retseptlar dorixonalarda 3 yil davomida, maxsus pushti rangdagi blankalar boʻyicha berilgan giyohvand vositalar retseptlari 5 yil davomida saqlanadi.”;

z) 2-ilovada:

ilova belgisidagi “dorixona muassasalari” degan soʻzlar “dorixonalar” degan soʻz bilan almashtirilsin;

“Dorixona muassasasi mudiri” degan soʻzlar “Dorixona mudiri” degan soʻzlar bilan almashtirilsin;

i) 3-ilova mazkur oʻzgartirishlarning ilovasiga muvofiq tahrirda bayon etilsin;

k) 6-ilovada:

ilova belgisidagi “dorixona muassasalari” degan soʻzlar “dorixonalar” degan soʻz bilan almashtirilsin;

nomidagi “Dorixona muassasalari” degan soʻzlar “Dorixonalar” degan soʻz bilan almashtirilsin.

3. Mazkur oʻzgartirishlar Oʻzbekiston Respublikasi Savdo-sanoat palatasi bilan kelishilgan.