Xalq ta’limi tizimini tubdan takomillashtirish, uning barcha bo‘g‘inlari faoliyati samaradorligini hamda mas’uliyatini oshirish, xalq ta’limi muassasalaridagi o‘quv-tarbiya jarayoniga ilg‘or pedagogik va axborot-kommunikatsiya texnologiyalarini samarali joriy etish orqali ta’lim sifatini ta’minlash, maktab o‘quvchilarini vatanparvarlik, milliy an’analar va qadriyatlarni hurmat qilish ruhida tarbiyalash, ma’naviy va jismoniy sog‘lom avlodni kamol toptirish maqsadida:

1. Quyidagilar O‘zbekiston Respublikasi Xalq ta’limi vazirligining asosiy vazifalari va faoliyati yo‘nalishlari etib belgilansin:

birinchi, maktabgacha, umumiy o‘rta va maktabdan tashqari ta’limni har tomonlama rivojlantirish, o‘quvchilarning ma’naviy-axloqiy va intellektual rivojlanish darajasini yanada yuksaltirishga yo‘naltirilgan ta’lim sohasida yagona davlat siyosatini amalga oshirish;

ikkinchi, umumiy o‘rta ta’lim maktablari 10-11-sinf o‘quvchilariga kasb-hunar o‘rgatishni ta’minlash borasidagi faoliyatni muvofiqlashtirish hamda umumiy o‘rta ta’limning davlat ta’lim standartlariga, maktabgacha va maktabdan tashqari ta’limga qo‘yiladigan talablarga muvofiq xalq ta’limi muassasalariga, shuningdek, iqtidorli bolalar uchun ixtisoslashtirilgan ta’lim muassasalariga metodik rahbarlikni amalga oshirish;

uchinchi, o‘quv-tarbiya jarayoniga o‘qitishning zamonaviy ilg‘or shakllarini, yangi pedagogik va axborot texnologiyalarini, o‘quvchilarning o‘quv, psixologik va jismoniy yuklamasini optimallashtirishni hisobga olgan holda ta’lim-tarbiyaning samarali shakllari va usullarini joriy etish;

to‘rtinchi, umumiy o‘rta ta’lim muassasalarida chet tillarni o‘qitish samaradorligini ta’minlash, o‘quvchilarni kasb-hunarga yo‘naltirish va mehnat ta’limini yaxshilash bo‘yicha kompleks chora-tadbirlarni amalga oshirish;

beshinchi, ta’lim maktablari hamda o‘rta maxsus, kasb-hunar ta’limi muassasalari o‘rtasida o‘zaro integratsiyani ta’minlash orqali 11 yillik o‘rta ta’limni joriy etish bo‘yicha tashkiliy-metodik tadbirlar tizimini amalga oshirish;

oltinchi, o‘quv-tarbiya jarayoniga o‘qitishning zamonaviy ilg‘or shakllarini, yangi pedagogik va axborot texnologiyalarini, kasbga yo‘naltirish, ta’lim va tarbiyaning samarali shakllari hamda usullarini joriy etish;

yettinchi, xalq ta’limi muassasalarida O‘zbekiston Yoshlar ittifoqi bo‘limlari faoliyatini samarali yo‘lga qo‘yish orqali o‘quvchilarni umuminsoniy qadriyatlar, yuksak ma’naviyat, insonparvarlik ruhida tarbiyalash, ularning qalbi va ongiga mustaqillik g‘oyalarini yanada chuqur singdirish, “ommaviy madaniyat” ko‘rinishidagi yot g‘oyalarga qarshi immunitetni mustahkamlash;

sakkizinchi, mazmun va sifat jihatidan xalqaro talablarga javob beradigan, ilg‘or pedagogik va axborot-kommunikatsiya texnologiyalarini qo‘llagan holda yangilangan o‘quv rejalari va dasturlariga muvofiq ishlab chiqilgan o‘quv va o‘quv-metodik adabiyotlarning yangi avlodi yaratilishi va nashr etilishini tashkil qilish;

to‘qqizinchi, maktabgacha, umumiy o‘rta va maktabdan tashqari ta’lim muassasalari tomonidan davlat ta’lim standartlari va talablari bajarilishining tizimli monitoringini olib borish;

o‘ninchi, maktabgacha, umumiy o‘rta va maktabdan tashqari ta’lim muassasalarining moddiy-texnika bazasini belgilangan norma va standartlarga muvofiq yanada rivojlantirish va mustahkamlash, ular faoliyatining samaradorligi oshirilishini ta’minlash bo‘yicha tizimli asosda kompleks chora-tadbirlarni amalga oshirish;

o‘n birinchi, yangi pedagogik va axborot texnologiyalarini, xalqaro ilg‘or tajribani qo‘llagan holda pedagog kadrlarni tayyorlash, qayta tayyorlash va malakasini oshirish tizimining samarali faoliyatini tashkil etish, ta’lim muassasalarini zamonaviy bilimlarga ega bo‘lgan yuqori malakali kadrlar bilan ta’minlash;

o‘n ikkinchi, xalqaro aloqalarni kengaytirish va mustahkamlash, mamlakatimizning xalq ta’limi sohasida erishgan yutuqlarini konferensiyalar, ko‘rgazmalar va boshqa tadbirlarni o‘tkazish yo‘li bilan xalqaro darajada keng yoritish, xalq ta’limi tizimiga xorijiy investitsiyalar va grantlarni jalb etish.

O‘zbekiston Respublikasi xalq ta’limi vaziri U.I. Inoyatov zimmasiga vazirlikka yuklatilgan vazifalar va faoliyat yo‘nalishlari sifatli hamda to‘liq hajmda amalga oshirilishi yuzasidan shaxsiy mas’uliyat yuklansin

2. Quyidagilar:

O‘zbekiston Respublikasi Xalq ta’limi vazirligining tashkiliy tuzilmasi 1-ilovaga muvofiq;

O‘zbekiston Respublikasi Xalq ta’limi vazirligi markaziy apparatining boshqaruv xodimlari cheklangan soni 64 nafardan iborat bo‘lgan tuzilmasi 2-ilovaga muvofiq;

Qoraqalpog‘iston Respublikasi Xalq ta’limi vazirligining tuzilmasi 3-ilovaga muvofiq;

viloyatlar Xalq ta’limi boshqarmalarining namunaviy tuzilmasi 4-ilovaga muvofiq;

Toshkent shahar Xalq ta’limi bosh boshqarmasining tuzilmasi 5-ilovaga muvofiq;

O‘zbekiston Respublikasi Xalq ta’limi vazirligi Respublika ta’lim markazining tuzilmasi 6-ilovaga muvofiq;

O‘zbekiston Respublikasi Xalq ta’limi vazirligining O‘quvchilarni kasb-hunarga yo‘naltirish va psixologik-pedagogik respublika tashxis markazining tuzilmasi 7-ilovaga muvofiq tasdiqlansin.

3. Xalq ta’limi muassasalari faoliyatini metodik ta’minlash va tashkil etish tuman (shahar) bo‘limlari tuman (shahar) xalq ta’limi bo‘limlari etib qayta tashkil qilinsin.

Tuman (shahar) xalq ta’limi bo‘limlarining namunaviy tuzilmasi 8-ilovaga muvofiq tasdiqlansin.

4. O‘zbekiston Respublikasi xalq ta’limi vaziriga O‘zbekiston Respublikasi Xalq ta’limi vazirligi markaziy apparati va hududiy xalq ta’limi organlari tuzilmasiga xodimlarning tasdiqlangan umumiy soni doirasida o‘zgartirishlar kiritish huquqi berilsin.

5. O‘zbekiston Respublikasi Vazirlar Mahkamasi bir oy muddatda:

O‘zbekiston Respublikasi Xalq ta’limi vazirligi to‘g‘risida nizomni;

O‘zbekiston Respublikasi Xalq ta’limi vazirligi Respublika ta’lim markazining Ustavini;

O‘zbekiston Respublikasi Xalq ta’limi vazirligi O‘quvchilarni kasb-hunarga yo‘naltirish va psixologik-pedagogik respublika tashxis markazining ustavini tasdiqlasin.

6. Belgilansinki, Respublika ta’lim markazi hamda O‘quvchilarni kasb-hunarga yo‘naltirish va psixologik-pedagogik respublika tashxis markazi metodistlarining mehnatiga haq to‘lash Toshkent shahri Xalq ta’limi bosh boshqarmasi metodistlari uchun belgilangan mehnatga haq to‘lash shartlari asosida amalga oshiriladi.

7. O‘zbekiston Respublikasi Xalq ta’limi vazirligi bir oy muddatda:

Toshkent shahar Xalq ta’limi bosh boshqarmasi va viloyatlar xalq ta’limi boshqarmalari to‘g‘risidagi nizomlarni;

tuman (shahar) xalq ta’limi bo‘limlari to‘g‘risidagi nizomlarni tasdiqlasin.

8. Qoraqalpog‘iston Respublikasi Vazirlar Kengashi bir oy muddatda Qoraqalpog‘iston Respublikasi Xalq ta’limi vazirligi to‘g‘risidagi Nizomni tasdiqlasin.

9. O‘zbekiston Respublikasi Hukumatining 9-ilovaga muvofiq ayrim qarorlari o‘z kuchini yo‘qotgan deb hisoblansin.

10. O‘zbekiston Respublikasi Xalq ta’limi vazirligi Adliya vazirligi hamda boshqa manfaatdor vazirliklar va idoralar bilan birgalikda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida bir oy muddatda Vazirlar Mahkamasiga takliflar kiritsin.

11. Mazkur qarorning bajarilishini nazorat qilish O‘zbekiston Respublikasining Bosh vaziri A.N. Aripov, O‘zbekiston Respublikasi Prezidentining Davlat maslahatchisi A.N. Yunusxodjayev, O‘zbekiston Respublikasi xalq ta’limi vaziri U.I. Inoyatov zimmasiga yuklansin.

1. Vazirlar Mahkamasining “O‘zbekiston Respublikasi Xalq ta’limi vazirligi faoliyatini takomillashtirish to‘g‘risida” 2004-yil 5-avgustdagi 372-sonli qarori (O‘zbekiston Respublikasi QT, 2004-y., 8-son, 76-modda).

2. Vazirlar Mahkamasining “Xalq ta’limi hududiy organlari tuzilmasini takomillashtirish to‘g‘risida” 2011-yil 1-martdagi 52-sonli qarorining 1-ilovasi (O‘zbekiston Respublikasi QHT, 2011-y., 9-son, 91-modda).

3. Vazirlar Mahkamasining “O‘zbekiston Respublikasi Xalq ta’limi vazirligi faoliyatini tashkil etishni yanada takomillashtirish to‘g‘risida” 2016-yil 27-iyundagi 214-sonli qarori (O‘zbekiston Respublikasi QHT, 2016-y., 26-son, 316-modda).