Oʻzbekiston Respublikasi Prezidentining 2017-yil 29-maydagi PF-5059-son “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida”gi Farmoni va Oʻzbekiston Respublikasi Prezidentining 2017-yil 30-maydagi PQ-3016-son “Oʻzbekiston Respublikasi Bosh prokuraturasi huzuridagi Majburiy ijro byurosi faoliyatini tashkil etish toʻgʻrisida”gi qaroriga muvofiq Oʻzbekiston Respublikasi Moliya vazirligi va Davlat soliq qoʻmitasi qaror qiladi

1. Respublika isteʼmolchilariga elektr energiyasi va tabiiy gazni milliy valyutada sotishdan tushadigan Majburiy ijro byurosini rivojlantirish jamgʻarmasini shakllantirish manbasi sifatida belgilangan mablagʻlarni hisob-kitob qilish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2017-yil 29-maydagi PF-5059-son “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida”gi Farmoniga asosan respublika isteʼmolchilariga elektr energiyasi va tabiiy gazni milliy valyutada sotishdan kelib tushadigan, Majburiy ijro byurosini rivojlantirish jamgʻarmasini (bundan buyon matnda Jamgʻarma deb yuritiladi) shakllantirish manbasi sifatida belgilangan mablagʻlarni hisob-kitob qilish tartibini belgilaydi

1. Oʻzbekiston Respublikasi Prezidentining 2017-yil 29-maydagi PF–5059-son “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida”gi Farmonining 6-bandiga muvofiq respublika isteʼmolchilariga elektr energiyasi va tabiiy gazni sotishdan tushgan mablagʻlarning 10 foizi Jamgʻarmani shakllantirish manbalaridan biri sifatida belgilangan.

2. Respublika isteʼmolchilariga elektr energiyasini sotishdan tushadigan mablagʻlar, mazkur Nizomning 5-bandida koʻrsatilgan mablagʻlar bundan mustasno, hududiy elektr tarmoqlari korxonalarining elektr energiyasidan tushadigan pul mablagʻlarini jamlaydigan yagona maxsus hisobvaragʻiga (22636) oʻtkaziladi va qoʻshilgan qiymat soligʻini chegirgan holda quyidagi tartibda taqsimlanadi:

mablagʻlarning 10 foizi har kuni keyingi bank kunidan kechiktirmay, memorial order asosida, “toʻlov maqsadi” grafasida toʻlov mazkur Nizomga muvofiq amalga oshirilganligini koʻrsatgan holda, Jamgʻarmaning shaxsiy gʻazna hisobvaragʻiga yoʻnaltiriladi;

mablagʻlarning 90 foizi har kuni memorial order asosida hududiy elektr tarmoqlari korxonalarining maxsus hisobvaragʻiga (22604) keyinchalik qonunchilik hujjatlarida belgilangan tartibda mutanosiblikka muvofiq taqsimlash uchun oʻtkaziladi.

Chegirilgan qoʻshilgan qiymat soligʻi summasi hududiy elektr tarmoqlari korxonalari va “Oʻzbekenergo” AJning elektr energiyasi ishlab chiqaruvchi korxonalari soliq majburiyatlarini belgilangan tartibda bajarishga yoʻnaltiriladi.

3. Respublika isteʼmolchilariga tabiiy gazni sotishdan tushadigan mablagʻlar, mazkur Nizomning 5-bandida koʻrsatilgan mablagʻlar bundan mustasno, “Oʻztransgaz” AJning tabiiy gazdan tushadigan pul mablagʻlarini jamlaydigan yagona maxsus hisobvaragʻiga (22634) oʻtkaziladi va qoʻshilgan qiymat soligʻini chegirgan holda quyidagi tartibda taqsimlanadi:

mablagʻlarning 10 foizi har kuni, keyingi bank kunidan kechiktirmay memorial order asosida, “toʻlov maqsadi” grafasida toʻlov mazkur Nizomga muvofiq amalga oshirilganligini koʻrsatgan holda, Jamgʻarmaning shaxsiy gʻazna hisobvaragʻiga yoʻnaltiriladi;

mablagʻlarning 90 foizi har kuni memorial order asosida “Oʻztransgaz” AJning asosiy hisobvaragʻiga (20210) keyinchalik qonunchilik hujjatlarida belgilangan tartibda mutanosiblikka muvofiq taqsimlash uchun oʻtkaziladi.

Chegirilgan qoʻshilgan qiymat soligʻi summasi “Oʻztransgaz” AJ va “Oʻzbekneftegaz” AJ korxonalarining soliq majburiyatlarini belgilangan tartibda bajarishga yoʻnaltiriladi.

4. Mazkur Nizomning 2 va 3-bandlarida koʻrsatilgan mablagʻlar Oʻzbekiston Respublikasi Prezidentining 2017-yil 29-maydagi PF-5059-son “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida”gi Farmoni kuchga kirgan paytdan Jamgʻarmaning shaxsiy gʻazna hisobvaragʻiga oʻtkaziladi.

5. Mazkur Nizomning 2 va 3-bandlarida oʻrnatilgan tartib Oʻzbekiston Respublikasi Prezidenti qarorlariga muvofiq ajratiladigan, shu jumladan, Oʻzbekiston Respublikasi Suv xoʻjaligi vazirligining suv xoʻjaligi tashkilotlari tomonidan isteʼmol qilinadigan elektr energiyasi haqini toʻlashdan kelib tushadigan maqsadli mablagʻlarga tatbiq etilmaydi.

6. Respublika isteʼmolchilariga elektr energiyasi va tabiiy gazni sotishdan tushgan mablagʻlar boʻyicha Jamgʻarmaning shaxsiy gʻazna hisobvaragʻiga ortiqcha (xato) oʻtkazilgan mablagʻlar respublika isteʼmolchilariga elektr energiyasi va tabiiy gazni sotishdan kelgusida tushadigan mablagʻlar hisobidan qayta hisob-kitob qilinadi yoki oʻzaro hisob-kitoblar amalga oshiriladi.

6¹. Ortiqcha (xato) oʻtkazilgan mablagʻlarning oʻzaro hisob-kitob qilish quyidagi tartibda amalga oshiriladi.

Isteʼmolchilar, elektr energiyasi va tabiiy gaz uchun ortiqcha (xato) oʻtkazilgan mablagʻlarni qaytarish yuzasidan “Oʻzbekenergo” AJ yoki “Oʻztransgaz” AJga hamda uning hududiy boʻlinmalariga yozma yoki elektron shaklda (“Oʻzbekenergo” AJ yoki “Oʻztransgaz” AJning rasmiy veb-sayti) ariza (bundan buyon matnda ariza deb yuritiladi) bilan murojaat qiladi.

Isteʼmolchilarning mazkur arizasiga asosan “Oʻzbekenergo” AJ yoki “Oʻztransgaz” AJning hududiy boʻlinmalari va Oʻzbekiston Respublikasi Bosh prokuraturasi huzuridagi Majburiy ijro byurosining hududiy boʻlimi tomonidan elektr energiyasi yoki tabiiy gaz uchun ortiqcha (xato) toʻlangan mablagʻlarni qaytarish toʻgʻrisida dalolatnoma tuziladi hamda mazkur boʻlinmalarning rahbarlari va bosh hisobchilari tomonidan imzolanadi.

Ortiqcha (xato) toʻlangan mablagʻlarni qaytarish toʻgʻrisida dalolatnoma ikki ish kuni ichida “Oʻzbekenergo” AJ yoki “Oʻztransgaz” AJga taqdim etiladi.

Hududiy boʻlinmalar tomonidan taqdim etilgan dalolatnomalar asosida, bir ish kuni ichida “Oʻzbekenergo” AJ yoki “Oʻztransgaz” AJ tomonidan isteʼmolchilarning ortiqcha (xato) toʻlangan pul mablagʻlarini qaytarish toʻgʻrisidagi dalolatnomalar roʻyxati tuziladi va mazkur roʻyxat Jamgʻarmaga taqdim qilinadi.

Jamgʻarma, taqdim etilgan roʻyxat asosida ikki ish kuni davomida “Oʻzbekenergo” AJ hududiy boʻlinmalarining maxsus hisobvaragʻiga (22604) yoki “Oʻztransgaz” AJning asosiy hisobvaragʻiga (20210) mazkur Nizomning 62-bandida keltirilgan formulaga muvofiq hisob-kitob qilib, ortiqcha (xato) toʻlangan mablagʻlarni qaytaradi.

“Oʻzbekenergo” AJ yoki “Oʻztransgaz” AJ bir ish kuni davomida Jamgʻarma tomonidan qaytarilgan mablagʻlarga ortiqcha (xato) toʻlangan mablagʻlarning qolgan qismini qoʻshgan holda (dalolatnomada koʻrsatilgan mablagʻ) isteʼmolchilarning hisobvaragʻlariga oʻtkazib beradi.

“Oʻzbekenergo” AJ yoki “Oʻztransgaz” AJ va ularning hududiy boʻlinmalari tomonidan ortiqcha (xato) toʻlangan mablagʻlar isteʼmolchilarning hisobvaragʻiga qaytarishda banklar tomonidan xizmat haqi undirimaydi.

6². Jamgʻarma tomonidan qaytiralidigan mablagʻ miqdori quyidagi formulaga asosan aniqlanadi:

^S _(qaytarish) ^{= (S} _{ortiqcha(xato)} ^{) — ((S} _{ortiqcha(xato)}^{) x 20/120) x 10/100}

Bunda:

S _(qaytarish) = Jamgʻarma tomonidan qaytarib berish lozim boʻlgan mablagʻ miqdori;

S _{ortiqcha(xato)} = isteʼmolchi tomonidan ortiqcha (xato) oʻtkazilgan mablagʻ;

20/120 = isteʼmolchi tomonidan ortiqcha (xato) oʻtkazilgan mablagʻda qoʻshimcha qiymat soligʻi hissasi;

10/100 = isteʼmolchi tomonidan ortiqcha (xato) oʻtkazilgan mablagʻda Jamgʻarma hissasi.

7. Oʻzbekiston Respublikasi Bosh prokuraturasi huzuridagi Majburiy ijro byurosi (bundan buyon matnda Byuro deb yuritiladi) mazkur Nizomning 2, 3 va 5-bandlaridagi mablagʻlarning harakati boʻyicha:

tegishli hisobvaraqlari boʻyicha bank operatsiyalarini toʻliq koʻrib turish;

zarurat tugʻilganda “Oʻzbekenergo” AJ va “Oʻztransgaz” AJlardan ularning bank hisobvaraqlaridan qilingan xarajatlar toʻgʻrisidagi maʼlumotlarni ushbu xarajatlarning maqsadli yoʻnaltirilganligini toʻliq koʻrsatgan holda olish orqali monitoringni amalga oshiradi.

8. “Oʻzbekenergo” AJ, hududiy elektr tarmoqlari korxonalari va “Oʻztransgaz” AJ tomonidan boshqa bank hisobvaraqlarini ochish va ulardan xarajat qilish taqiqlanadi.

9. “Oʻzbekenergo” AJ va “Oʻztransgaz” AJ har oyda, keyingi oyning 10-sanasidan kechiktirmagan holda Byuroga barcha hisobvaraqlaridan qilingan xarajatlar toʻgʻrisida maʼlumot taqdim etadi.

Maʼlumotlarda xarajatlarning toʻliq maqsadi, shu jumladan:

soliqlar va boshqa majburiy toʻlovlarning toʻlanishi;

olingan kreditlarga xizmat koʻrsatish va qaytarilishi;

dividendlarning toʻlovi;

ish haqi va unga tenglashtirilgan toʻlovlarning, shuningdek, ular boʻyicha ajratmalarning toʻlanishi;

gaz qazib oluvchi korxonalarga ishlab chiqarilgan elektr energiyasi va ularni yetkazib berish uchun qilingan xarajatlarning toʻlanishi;

“Oʻzbekenergo” AJ va “Oʻztransgaz” AJ obyektlarini qoʻriqlash xizmati boʻyicha toʻlovlar;

elektr energiyasi va tabiiy gazni hisobga olish va nazorat qilishning avtomatlashtirilgan tizimini joriy qilish boʻyicha dasturlarning amalga oshirilishi bilan bogʻliq xarajatlar;

xato oʻtkazilgan mablagʻlarining qaytarilishi;

boshqa xarajatlar koʻrsatiladi.

Bunda taqdim etilgan maʼlumot oʻzida tegishli oydagi barcha bank hisobvaraqlaridan amalga oshirilgan xarajat operatsiyalarining toʻliq hajmini oʻz ichiga olishi lozim.

Zarur hollarda, Byuro yuqorida koʻrsatilgan yoʻnalishlardagi xarajatlarning mazmunini talab qilish huquqiga ega.

10. “Oʻzbekenergo” AJ, hududiy elektr tarmoqlari korxonalari va “Oʻztransgaz” AJning pul mablagʻlari harakatlarini monitoring qilish davomida qonunchilik talablari buzilganligi aniqlanganda, Byuro oʻzining vakolati doirasida ularni bartaraf etish hamda aybdor shaxslarni tegishli javobgarlikka tortish choralarini koʻradi.

11. Respublika isteʼmolchilariga elektr energiyasi va tabiiy gazni sotishdan tushgan mablagʻlarni mazkur Nizomda nazarda tutilmagan hisobvaraqlarga oʻtkazish va pul oʻtkazmalarini amalga oshirish bilan bogʻliq amaliyotlarni bajarish taqiqlanadi.

Yagona maxsus hisobvaraqlarga (22636) va (22634) kelib tushadigan mablagʻlarga nisbatan taqiq qoʻyilmaydi va ularga qonunchilikda belgilangan pul mablagʻlarini hisobdan chiqarish tartibi qoʻllanilmaydi.

12. Mazkur Nizomga rioya qilinishi uchun javobgarlik “Oʻzbekenergo” AJ korxonalarining va hududiy elektr tarmoqlari korxonalarining, shuningdek, “Oʻztransgaz” AJning bevosita rahbarlari va bosh hisobchilari (hisobchilari) zimmasiga yuklatiladi.

13. Xizmat koʻrsatuvchi banklar mablagʻlarni qonunchilik hujjatlariga muvofiq memorial order asosida oʻz vaqtida va toʻliq oʻtkazilishi uchun javobgar hisoblanadi.

14. Mazkur Nizom Oʻzbekiston Respublikasi Bosh vazirining oʻrinbosari — Geologiya, yoqilgʻi-energetika majmuasi, kimyo, neftkimyo va metallurgiya sanoati masalalari kompleksi rahbari, Oʻzbekiston Respublikasi Markaziy banki, “Oʻzbekenergo” AJ, “Oʻzbekneftegaz” AJ, “Oʻztransgaz” AJ, Majburiy ijro byurosini rivojlantirish jamgʻarmasi va Bosh prokuratura huzuridagi Majburiy ijro byurosi bilan kelishilgan.