Oʻzbekiston Respublikasi Prezidentining 2017-yil 28-apreldagi PQ-2932-son “Toshkent davlat yuridik universitetida kadrlar tayyorlash tizimini tubdan takomillashtirish va samaradorligini oshirish chora-tadbirlari toʻgʻrisida”gi qarori hamda Oʻzbekiston Respublikasi Vazirlar Mahkamasining 2017-yil 2-iyundagi “Toshkent davlat yuridik universitetida kadrlar tayyorlash tizimini yanada takomillashtirish chora-tadbirlari toʻgʻrisida”gi 347-son qaroriga muvofiq Oʻzbekiston Respublikasi Oliy va oʻrta-maxsus taʼlim vazirligi hamda Adliya vazirligi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligi hamda Adliya vazirligining 2016-yil 22-apreldagi 1-2016 va 4-son qarori (roʻyxat raqami 2780, 2016-yil 22-aprel) (Oʻzbekiston Respublikasi qonun hujjatlari toʻplami, 2016-y., 16-son, 172-modda) bilan tasdiqlangan Toshkent davlat yuridik universitetida oʻqitishning modul tizimi sharoitlarida talabalar bilimini nazorat qilish tartibi va baholash mezonlari toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. Quyidagi mazmundagi 3¹-band bilan toʻldirilsin:

“3¹. Modulning oʻquv dasturi mazmunini oʻzlashtirish kreditni — talabalarning oʻquv yuklama hajmini aniqlashning shartli birligini qoʻllagan holda belgilanadi.

Kredit talaba tomonidan tegishli oʻquv ishlarini (modul xususiyati va boʻlajak mutaxassisni shakllantirish uchun oʻquv ishlarining muhimligidan kelib chiqib universitet tomonidan belgilanadigan) bajarishga ketadigan vaqt (soatlar)dan tashkil topadi. Har bir modul mustaqil kredit hisobiga ega boʻladi.

Universitet bir kredit tarkibini, har bir modul boʻyicha kreditlar sonini, shuningdek har bir kursni va umuman oʻqish davrini tamomlash uchun talaba tomonidan toʻplanishi lozim boʻlgan kreditlarning umumiy sonini mustaqil ravishda belgilaydi.

Talaba mazkur Nizomga muvofiq modul oʻquv dasturi mazmunini oʻzlashtirgan (olgan reyting ballidan qatʼi nazar) taqdirda, u tegishli modul boʻyicha kreditlarning zarur sonini toʻplagan deb hisoblanadi.”.

2. 7-bandning ikkinchi xatboshisida “ishchi oʻquv dasturida” soʻzlari “oʻquv dasturida” soʻzlari bilan almashtirilsin.

3. 12-band quyidagi tahrirda bayon etilsin:

“12. Agar universitet Oʻquv-uslubiy kengashi qarorida boshqacha tartib nazarda tutilmagan boʻlsa, barcha modullar boʻyicha oraliq nazorat talaba tomonidan oʻquv xonasida (yozma imtihon) yoki oʻquv xonasidan tashqarida tayyorlanadigan yozma ish shaklida semestr davomida bir marotaba oʻtkaziladi. Oraliq nazoratining aniq shakli universitetning Oʻquv-uslubiy kengashi qarori bilan belgilanadi.

Yozma ish talaba tomonidan tegishli semestr davomida mazkur Nizomning 59-bandida belgilangan muddatlarda topshiriladi.”.

4. 13-bandning beshinchi xatboshisidan “va oʻz ichiga oʻquv dasturida aks etgan nazariy va amaliy savollarni qamrab olishi” soʻzlari chiqarib tashlansin.

5. 17-band uchinchi xatboshisining oxirgi jumlasi quyidagi tahrirda bayon etilsin:

“Titul varagʻining qirqish chizigʻiga boshqarmaning shtampi bosiladi.”.

6. Quyidagi mazmundagi 18¹-band bilan toʻldirilsin:

“18¹. Yozma imtihon shaklidagi oraliq nazoratini oʻtkazishda imtihon savollari, qoida tariqasida, vaziyatli masalalarni oʻz ichiga oladi va talabalarga oldindan taqdim etilmaydi. Bunda imtihon vaqtida ularga adabiyotlar va normativ-huquqiy hujjatlardan foydalanishga imkoniyat beriladi.

Yozma imtihon, agar mazkur bobda boshqacha holat nazarda tutilmagan boʻlsa, mazkur Nizomning 5-bobida koʻrsatilgan tartibga muvofiq oʻtkaziladi.”.

7. 22-band quyidagi tahrirda bayon etilsin:

“22. Yozma imtihon savollari, qoida tariqasida, mantiqiy savollar va muammoli vaziyatlarni oʻz ichiga oladi. Modullar boʻyicha yakuniy nazorat savollarining mazmuni kafedralar tomonidan belgilanadi.

Yozma imtihon savollari boʻyicha ballar miqdori universitet Oʻquv-uslubiy kengashi qarori bilan taqsimlanadi.”.

8. 30-bandning birinchi xatboshisidagi “Oʻquv-uslubiy boshqarma boshligʻi” soʻzlari “Oʻquv-uslubiy boshqarma boshligʻi va uning oʻrinbosari, shuningdek dekanlar” soʻzlari bilan almashtirilsin.

9. 35-bandning birinchi xatboshisi “maʼlumotnomalar va boshqa adabiyotlar” soʻzlaridan keyin “normativ-huquqiy hujjatlar” soʻzlari bilan toʻldirilsin.

10. 39-bandda “uch kun” soʻzlari “besh kun” soʻzlari bilan almashtirilsin.

11. 60-bandning ikkinchi xatboshisi quyidagi tahrirda bayon etilsin:

“Amaliyot (stajirovka) boʻyicha imtihonni tashkil qilish qonun hujjatlariga muvofiq amalga oshiriladi. Amaliyot (stajirovka)ni oʻtash nazariy bilimlar bilan navbatlanish yoʻli orqali amalga oshirilganida uning natijalari universitet Oʻquv-uslubiy kengashi qaroriga asosan joriy nazorat doirasida baholanishi mumkin.”.

12. 62-bandning toʻrtinchi xatboshisidagi “Shu muddat davomida modulni oʻzlashtira olmagan talaba Oʻquv-uslubiy boshqarma boshligʻining tavsiyasiga koʻra, belgilangan tartibda rektorning buyrugʻi bilan talabalar safidan chetlashtiriladi, mazkur Nizomning 63-bandida nazarda tutilgan hollar bundan mustasno” soʻzlari chiqarib tashlansin.

13. 63-bandda:

birinchi xatboshisidan “va semestr yakuni boʻyicha toʻrttadan koʻp boʻlmagan oʻquv fanlari boʻyicha akademik qarzdorligi boʻlgan” soʻzlari chiqarib tashlansin;

toʻrtinchi xatboshisidagi “belgilangan tartibda talabalar safidan chiqariladi” soʻzlari “kreditlar toʻplanmagan modullarni qayta oʻqish uchun tegishli kursda qoldiriladi. Bu holatda boshqa modullar boʻyicha toʻplangan kreditlar saqlanib qolinadi va bunda talaba ushbu modullar boʻyicha oʻquv mashgʻulotlarida ishtirok etishi mumkin” soʻzlari bilan almashtirilsin.

14. 65-band quyidagi tahrirda bayon etilsin:

“65. Ushbu Nizomning 63-bandida belgilangan tartibda kelgusi semestrda oʻqishni davom ettirayotgan talaba oʻqishning tegishli kursida qoldirilganda, u akademik qarzdorlik vujudga kelgan kursda qoldirilgan deb hisoblanadi. Ushbu talaba qonun hujjatlarida belgilangan hollarda talabalar safidan chetlashtirilganda, talabalar safidan chetlashtirish asosidan qatʼi nazar, akademik qarzdorlik paydo boʻlgan kursidan chetlashtirilgan deb hisoblanadi.

Akademik qarzdorlik tufayli tegishli kursda qoldirilgan talaba akademik qarzdorlik vujudga kelgan semestrdan takroriy oʻqishni oʻtaydi.”.

15. 69-banddagi “reytingi” soʻzi “reytingi, shuningdek modullar boʻyicha toʻplangan kreditlar soni” soʻzlari bilan almashtirilsin.

16. 70-banddagi “reytinglar yigʻindisi” soʻzlaridan keyin “va toʻplangan kreditlar soni” soʻzlari bilan toʻldirilsin.

17. 2-ilovada:

“Sizning javobingiz quyidagi baholash mezonlari asosida baholanadi” soʻzlaridan keyin “(oraliq nazorati bir martadan ortiq oʻtkazilganda, umumiy ball tegishli songa boʻlinadi)” soʻzlari bilan toʻldirilsin;

“Qabul qiluvchining F.I.O. va imzosi” soʻzlari chiqarib tashlansin”.

18. 3-ilovadagi:

“ikkita” soʻzi “(son)” soʻzi bilan almashtirilsin”;

“Ikkita savol uchun maksimal 25 ball (har bir savol uchun 12,5 ball)” soʻzlari chiqarib tashlansin”;

“bitta” soʻzi “(son)” soʻzi bilan almashtirilsin”;

“Bir kazus uchun 25 ball” soʻzlari chiqarib tashlansin.

19. Mazkur oʻzgartirish va qoʻshimchalar Toshkent davlat yuridik universiteti bilan kelishilgan.