Oʻzbekiston Respublikasi Prezidentining “Toshkent shahrining Yashnobod tumanida innovatsiya texnoparkini tashkil qilish toʻgʻrisida” 2017-yil 5-iyundagi PF-5068-son Farmonini bajarish yuzasidan Vazirlar Mahkamasi qaror qiladi:

1. Toshkent shahri hokimligi muassisi hisoblanadigan “Yashnobod” innovatsiya texnoparki direksiyasi” (keyingi oʻrinlarda “Yashnobod” texnoparki direksiyasi deb ataladi) davlat unitar korxonasi tashkil etilsin.

2. Quyidagilar:

Toshkent shahri hokimligi huzuridagi “Yashnobod” innovatsiya texnoparki direksiyasi” davlat unitar korxonasining boshqaruv xodimlari soni 9 nafar boʻlgan tuzilmasi 1-ilovaga muvofiq;

“Yashnobod” innovatsiya texnoparki (keyingi oʻrinlarda “Yashnobod” texnoparki deb ataladi) toʻgʻrisidagi nizom 2-ilovaga muvofiq;

“Yashnobod” texnoparkining Muvofiqlashtiruvchi kengashi toʻgʻrisidagi nizom 3-ilovaga muvofiq tasdiqlansin.

Oʻzbekiston Respublikasi Prezidentining 2017-yil 5-iyundagi PF-5068-son Farmoni bilan tashkil etilgan Muvofiqlashtiruvchi kengashga (keyingi oʻrinlarda Muvofiqlashtiruvchi kengash deb ataladi) “Yashnobod” texnoparki hududida amalga oshirilayotgan loyihalar soni koʻpayishiga koʻra “Yashnobod” texnoparki direksiyasi tuzilmasiga va xodimlari soniga oʻzgartirish kiritish huquqi berilsin.

3. Belgilansinki, “Yashnobod” texnoparki direksiyasi:

“Yashnobod” texnoparki rezidenti maqomini olish uchun yuridik va jismoniy shaxslardan buyurtmanomalar qabul qilinishini tashkil etadi, Muvofiqlashtiruvchi kengash qarori asosida “Yashnobod” texnoparki rezidentlarini roʻyxatdan oʻtkazadi va ularni “Yashnobod” texnoparki rezidentlari reyestriga kiritadi va ularga rezident maqomi toʻgʻrisida guvohnoma beradi;

“Yashnobod” texnoparki hududida investitsiyalash toʻgʻrisida investorlar bilan bitimlar hamda “Yashnobod” texnoparki rezidentlari bilan investitsiya loyihalarini amalga oshirish toʻgʻrisida shartnomalar tuzadi;

“Yashnobod” texnoparki rezidentlari uchun imtiyozli kreditlar olish maqsadida kafil sifatida ishtirok etadi;

“Yashnobod” texnoparki rezidentlarida innovatsiya loyihalarini amalga oshirishda paydo boʻladigan tashkiliy va boshqa masalalarni hal etish chora-tadbirlarini koʻradi, shuningdek “Yashnobod” texnoparki rezidentlari va qatnashchilarining ogʻzaki va yozma murojaatlarini qanoatlantirishda tezkor amaliy yordam koʻrsatadi;

“Yashnobod” texnoparki rezidentlari tomonidan oʻzlariga qabul qilgan majburiyatlarning zarur darajada bajarilishi yuzasidan nazoratni amalga oshiradi, keyinchalik uning natijalarini Toshkent shahri Yashnobod tumani hokimligiga va Muvofiqlashtiruvchi kengashga taqdim etadi;

Toshkent shahrida joylashgan va Toshkent shahri hamda Yashnobod tumani hokimliklari, shuningdek texnopark qatnashchilari tomonidan “Yashnobod” texnoparki direksiyasiga belgilangan tartibda berilgan ishlab chiqarish maydonlari, bino va inshootlarni oʻz vakolatlari doirasida operativ boshqaradi;

investorlar yoki rezidentlar tomonidan qabul qilingan majburiyatlar bajarilmagan taqdirda Muvofiqlashitiruvchi kengash qarorlari asosida, “Yashnobod” texnoparki hududida investitsiyalash toʻgʻrisida investorlar bilan tuzilgan bitimlarni va investitsiya loyihalarini amalga oshirish toʻgʻrisida “Yashnobod” texnoparki rezidentlari bilan tuzilgan shartnomalarni bekor qilish uchun sudga daʼvo arizalari bilan murojaat qiladi;

“Yashnobod” texnoparki faoliyatini operativ boshqarish va rezidentlar tomonidan innovatsiya loyihalarining amalga oshirilishi yuzasidan nazoratni taʼminlash boʻyicha boshqa funksiyalarni amalga oshiradi.

4. “Yashnobod” texnoparkida amalga oshirish tavsiya etilayotgan innovatsiya loyihalari roʻyxati 4-ilovaga* muvofiq maʼqullansin.

5. “Yashnobod” texnoparki rezidentlari faoliyatini moliyalashtirishning quyidagi mexanizmi belgilansin:

birinchi bosqich — ilmiy tadqiqotlarning barcha bosqichlarini oʻtkazish — Fan va texnologiyalar boʻyicha Davlat komissiyasi huzuridagi Ilmiy-texnik faoliyatni qoʻllab-quvvatlash va rivojlantirish jamgʻarmasi mablagʻlari, innovatsiya ishlanmalari buyurtmachilari, asosiy foydalanuvchilari va donorlar mablagʻlari, shuningdek xalqaro moliya institutlari grantlari hisobiga;

ikkinchi bosqich — tajriba loyihalarini amalga oshirish — innovatsiya ishlanmalarining buyurtmachilari va asosiy foydalanuvchilari mablagʻlari hisobiga;

uchinchi bosqich — tajriba-sanoat jihatidan joriy etish — innovatsiya ishlanmalari buyurtmachilari, asosiy foydalanuvchilari va donorlar mablagʻlari, shuningdek tijorat banklari kreditlari va xalqaro moliya institutlari grantlari hisobiga;

toʻrtinchi bosqich — tijorat jihatidan joriy etish — tijorat banklari kreditlari, xalqaro moliya institutlari kreditlari va donorlar mablagʻlari hisobiga amalga oshiriladi.

6. Oʻzbekiston Respublikasi Fan va texnologiyalar agentligi Iqtisodiyot vazirligi, Oʻzbekiston Savdo-sanoat palatasi va “Yashnobod” texnoparki direksiyasi bilan birgalikda bir oy muddatda Muvofiqlashtiruvchi kengashga belgilangan tartibda tasdiqlash uchun:

Innovatsiya loyihalarini tanlab olish mezonlarini belgilagan holda arizachilarning “Yashnobod” texnoparki rezidenti maqomini olishi uchun tanlov oʻtkazish tartibi toʻgʻrisidagi nizomni;

2017-2018-yillarda “Yashnobod” texnoparkini rivojlantirish tadbirlari Dasturini kiritsin.

7. Belgilab qoʻyilsinki, “Yashnobod” texnoparki direksiyasi taʼminoti:

Muvofiqlashtiruvchi kengash qaroriga koʻra belgilangan stavkalarni qayta koʻrib chiqish huquqi berilgan holda “Yashnobod” texnoparki hududida tijorat faoliyatini amalga oshirayotgan “Yashnobod” texnoparki rezidentlarining sof tushumning 0,1 foizi miqdoridagi har choraklik ajratmalari;

“Yashnobod” texnoparki rezidentlari va qatnashchilariga xizmatlar koʻrsatishdan olingan daromadlar;

davlat mulki boʻlgan hamda operativ boshqarish uchun belgilangan tartibda “Yashnobod” texnoparki direksiyasiga berilgan bino va inshootlarni ijaraga berishdan olingan tushumlarning bir qismi;

“Yashnobod” texnoparki direksiyasining oʻz mablagʻlari;

qonun hujjatlarida taqiqlanmagan boshqa manbalar hisobiga amalga oshiriladi.

8. Oʻzbekiston Respublikasi Moliya vazirligi asoslangan hisob-kitoblar boʻyicha “Yashnobod” texnoparki direksiyasining 2017-yilgi taʼminoti uchun, keyingi yillarda uning oʻzini oʻzi moliyalashtirishga oʻtishi sharti bilan, Oʻzbekiston Respublikasi Vazirlar Mahkamasining zaxira jamgʻarmasi hisobidan mablagʻ ajratsin.

9. Toshkent shahri hokimligi:

oʻn kun muddatda “Yashnobod” texnoparki direksiyasi ustavini ishlab chiqsin va tasdiqlasin hamda uning belgilangan tartibda davlat roʻyxatidan oʻtkazilishini taʼminlasin;

“Yashnobod” texnoparki direksiyasi faoliyatini tashkil etishda koʻmaklashsin hamda “Yashnobod” texnoparki direksiyasiga avtotransport vositalari, shuningdek ularni saqlashga tegishli limitlar ajratish yuzasidan belgilangan tartibda taklif kiritsin.

10. “Yashnobod” texnoparki direksiyasi Toshkent shahri, Yashnobod tumani, Majnuntol koʻchasi, 5-uy manziliga joylashtirilsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov zimmasiga yuklansin.

1. Ushbu Nizom “Yashnobod” innovatsiya texnoparkining maqsadi, faoliyatining asosiy yoʻnalishlari, funksiyalarini, shuningdek “Yashnobod” innovatsiya texnoparki faoliyatini boshqarish tartibini belgilaydi.

2. Ushbu Nizomda quyidagi tushunchalardan foydalaniladi:

“Yashnobod” innovatsiya texnoparki (keyingi oʻrinlarda “Yashnobod” texnoparki deb ataladi) — oʻzaro, davlat hokimiyati organlari, fuqarolarning oʻzini oʻzi boshqarish organlari bilan hamkorlik qiluvchi, tadbirkorlik, investitsiya faoliyatini va ilmiy faoliyatni yuritish maqsadida zamonaviy texnologik va tashkiliy muhitni shakllantiruvchi ilm-fan va taʼlimning tijorat va notijorat tashkilotlari, moliya institutlari va tadbirkorlarning integratsiyalashuvi shakli;

texnopark rezidenti — texnopark hududida texnoparkning mol-mulkidan, nomoddiy aktivlaridan, preferensiyalar va koʻrsatiladigan xizmatlardan foydalanadigan va belgilangan tartibda “Yashnobod” texnoparki rezidentlari reyestriga (keyingi oʻrinlarda Rezidentlar reyestri deb ataladi) kiritilgan, ilmiy ishlanmalarni, tadqiqotlarni, tajriba loyihalarini (keyingi oʻrinlarda investitsiya loyihasi deb ataladi) sanoatda, tijoratda joriy etishni amalga oshiruvchi yuridik shaxs;

texnopark hududi — “Yashnobod” texnoparki direksiyasining operativ boshqaruvidagi, shuningdek texnopark rezidentlari tomonidan, Toshkent shahri boʻyicha sobiq hudud prinsipini hisobga olgan holda innovatsiya loyihalarini amalga oshirish doirasida foydalaniladigan ishlab chiqarish maydonlari, binolar, inshootlar va yer uchastkalari;

Muvofiqlashtiruvchi kengash — Oʻzbekiston Respublikasi Prezidentining “Toshkent shahrining Yashnobod tumanida innovatsiya texnoparkini tashkil qilish toʻgʻrisida” 2017-yil 5-iyundagi PF-5068-son Farmoni bilan tuzilgan kollegial organ.

3. Texnoparkning faoliyat koʻrsatish muddati — uzaytirish imkoniyati bilan 30 yil.

4. “Yashnobod” texnoparkini tashkil etishning maqsadi hisoblanadi:

Innovatsiya mahsulotlari yaratishning barcha bosqichlarida, shuningdek mahalliy va xorijiy ishlanmalar va texnologiyalar asosida innovatsiya, yuqori texnologiyali va ilmtalab mahsulotlar ishlab chiqarish tashabbuskorlariga koʻmaklashishni nazarda tutadigan innovatsiya tadbirkorligini rivojlantirish uchun qulay shart-sharoitlar yaratish;

texnopark rezidentlari texnologiyalarini sanoatning turli sektorlariga berish, texnopark hududida ishlab chiqarishni tashkil etgan holda zamonaviy xorijiy va mahalliy texnologiyalarning transferini taʼminlash;

kichik va xorijiy innovatsiya tadbirkorligini, olimlar va ishlanmalar yaratuvchilari jamoalarini xalqaro kooperatsiyaga kiritish masalalarini hal etish, eksportga yoʻnaltirilgan innovatsiya ishlab chiqarishlarini jadal rivojlantirish;

innovatsiya tadbirkorligi, oliy taʼlim va ilmiy-tadqiqot muassasalari bilan oʻzaro hamkorlikni tashkil etish, shu jumladan qoʻshma loyihalarni amalga oshirish sohasida samarali davlat-xususiy sherikchilikni yoʻlga qoʻyishga koʻmaklashish.

5. “Yashnobod” texnoparki:

kimyo texnologiyalari, biotexnologiyalar, farmatsevtika va tibbiyot biotexnologiyalari, oʻsimliklarni himoya qilish vositalari;

materialshunoslik, metallarga ishlov berish texnologiyalari, seysmochidamlik, qurilish materiallari;

oziq-ovqat sanoati;

energiyani tejash, energiyaning muqobil va qayta tiklanadigan manbalarini yaratish;

elektron oʻlchov asboblari, robototexnika, mashinasozlik, elektrotexnika sohalarida ilmiy ishlanmalar va tadqiqotlar, sanoat-tajriba sinovlari oʻtkazishga va innovatsiya mahsulotlari namunalarini oʻzlashtirish uchun berishga ixtisoslashadi.

“Yashnobod” texnoparkining ixtisoslashuv sohasi Muvofiqlashtiruvchi kengash qarorlariga binoan kengaytirilishi mumkin.

6. Quyidagilar “Yashnobod” texnoparki faoliyatining asosiy yoʻnalishlari hisoblanadi:

patent tozaligini inobatga olgan holda innovatsiya ishlanmalarini, ichki va tashqi bozorlarda talab qilingan yuqori texnologiyali, raqobatbardoshli mahsulotlar ishlab chiqarish uchun sanoat-tajriba va kichik innovatsiya korxonalarini tashkil etish;

innovatsiya ishlanmalarining sanoat-tajriba sinovlarini oʻtkazish va ulardan ishlab chiqarishda intellektual mulk obyektlaridan foydalanishda huquqiy muhofazani taʼminlash;

zamonaviy xorijiy va mahalliy texnologiyalarni, mahalliy ishlab chiqaruvchilar oʻrtasida joriy etish imkoniyatini inobatga olgan holda ularning transferini taʼminlash;

yuqori texnologiyali va innovatsiya ishlab chiqarishlarini tashkil etishdan manfaatdor boʻlgan, shuningdek ushbu maqsadlar uchun salohiyat va resurslarga ega boʻlgan mahalliy va xorijiy investorlarni jalb qilish;

ilmiy-tadqiqot va innovatsiya ishlanmalari samaradorligini oshirish, ular uchun qulay shart-sharoitlar yaratish, yuqori malakali mutaxassislarni, shuningdek taʼlim muassasalari talabalarni jalb etish maqsadida oliy taʼlim muassasalari, Oʻzbekiston Respublikasi Fanlar akademiyasi va ishlab chiqarish sohasi subyektlari bilan yaqin va amaliy oʻzaro hamkorlikni taʼminlash;

innovatsiya ishlanmalari natijalarini tegishli tarmoqlarda mahalliy ishlab chiqaruvchilarning amaliy faoliyatiga keng joriy qilish.

7. “Yashnobod” texnoparki faoliyatining asosiy yoʻnalishlari uning hududida quyidagi funksiyalarini bajarish yoʻli bilan amalga oshiriladi:

tadqiqotlar va ishlanmalarni tijoratlashtirishga moʻljallangan kichik innovatsiya korxonalarini tashkil etish va rivojlantirishga, shuningdek boshlovchi tadbirkorlarga innovatsiya loyihalarini amalga oshirishda koʻmaklashish;

oliy taʼlim muassasalarining professor-oʻqituvchilar tarkibi va talabalarini, ilmiy tashkilotlar xodimlarini, alohida olimlar va mutaxassislarni tadbirkorlik faoliyatiga faol jalb qilish, ularning gʻoya va loyihalarini amalga oshirishga koʻmaklashish;

texnopark rezidentlariga keng koʻlamli xizmatlar koʻrsatish, shuningdek texnopark rezidentlariga ilmiy-texnik tadqiqotlar, ishlanmalar va ixtirolar natijalarini tijoratlashtirishda koʻmaklashish;

innovatsiya menejmenti va innovatsiyalar marketingi sohasida tadbirkorlar va mutaxassislarni oʻqitishni va tayyorlashni tashkil etish, ularning kasbiy, huquqiy, iqtisodiy va boshqaruv bilimlari darajasini oshirish;

ilmtalab texnologiyalar va raqobatbardoshli mahsulotlar yaratishga yoʻnaltirilgan ilmiy-texnik loyihalar va dasturlar ishlab chiqilishiga va ularning amalga oshirilishiga koʻmaklashish;

qonun hujjatlariga muvofiq xalqaro ilmiy-texnik hamkorlikni tashkil etish va amalga oshirish;

innovatsiya loyihalarini moliyalashtirishga yoki tijoratlashtirishga koʻmaklashuvchi xorijiy va mahalliy moliya institutlari, tashkilotlar va yirik korxonalarning loyihalarini jalb etish;

tijorat, eksport, ilmiy salohiyatga ega boʻlgan hamda ilgʻor texnika va ilmtalab texnologiyalar asosida yangi mahsulotlar va xizmatlarni ishlab chiqarishga yoʻnaltirilgan innovatsiya takliflarini tanlab olishni tashkil etish;

texnopark rezidentlari va qatnashchilariga ilmiy-tadqiqot va tajriba-konstruktorlik ishlarini oʻtkazishda, ilmiy-tadqiqot va tajriba-konstruktorlik ishlarini bajarish uchun laboratoriya, eksperimental-ishlab chiqarish maydonlarini, asbob-uskunalarni, shuningdek ofis, ishlab chiqarish, omborxona, oʻquv binolarini, konferens-zallar, auditoriyalar va boshqa binolarni shartnoma asosida ijaraga berish yoʻli bilan ularning natijalarini ishlab chiqarishda oʻzlashtirishda koʻmaklashish.

8. “Yashnobod” texnoparki faoliyatini muvofiqlashtirish Muvofiqlashtiruvchi kengash tomonidan amalga oshiriladi.

9. Oʻzbekiston Respublikasi Prezidentining “Toshkent shahrining Yashnobod tumanida innovatsiya texnoparkini tashkil etish toʻgʻrisida” 2017-yil 5-iyundagi PF-5068-son Farmonida belgilangan tashkilotlar “Yashnobod” texnoparkining qatnashchilari hisoblanadi.

Zaruratga koʻra, Muvofiqlashtiruvchi kengashning qarori asosida “Yashnobod” texnoparki qatnashchilari tarkibi yangi innovatsion, ilmiy-texnik va ishlab chiqarish jarayonlari integratsiyalashuvidan va qoʻshimcha vazifalar belgilanishidan kelib chiqib oʻzgartirilishi mumkin.

Vazirliklar, idoralar hamda ilm-fan sohasida tegishli ilmiy boʻlinmalar va infratuzilmaga va texnologiyalarga, shuningdek ilgari suriladigan innovatsiya ishlanmalarini baholash va ekspertizadan oʻtkazish sohasida tajribaga ega boʻlgan boshqa tashkilotlar “Yashnobod” texnoparki qatnashchilari boʻlishi mumkin.

10. Quyidagilar “Yashnobod” texnoparki qatnashchilarining asosiy vazifalari hisoblanadi:

“Yashnobod” texnoparkini rivojlantirish strategiyasi boʻyicha takliflar tayyorlash;

“Yashnobod” texnoparki faoliyatining ustuvor yoʻnalishlarini va sohalarini, ularni Muvofiqlashtiruvchi kengash muhokamasiga kiritish uchun belgilash;

Muvofiqlashtiruvchi kengash tomonidan belgilangan tartibda innovatsiya mahsulotlarini yaratishga buyurtmalarni shakllantirish;

amalga oshirish tavsiya etilayotgan innovatsiya loyihalari boʻyicha, keyinchalik ularni Muvofiqlashtiruvchi kengash majlislarida muhokama qilish uchun tanlab olish mezonlariga muvofiq xulosalar taqdim etish.

“Yashnobod” texnoparki direksiyasiga “Yashnobod” texnoparki faoliyatining asosiy yoʻnalishlari va funksiyalariga muvofiq Direksiyaga yuklangan vazifalarni amalga oshirishda koʻmaklashish.

11. Texnopark faoliyatini operativ boshqarish Toshkent shahri hokimligi huzuridagi “Yashnobod innovatsiya texnoparki direksiyasi” davlat unitar korxonasi (keyingi oʻrinlarda Direksiya deb ataladi) tomonidan amalga oshiriladi.

12. Direksiyaga Oʻzbekiston Respublikasi Iqtisodiyot vazirligining taqdimnomasi boʻyicha Muvofiqlashtiruvchi kengash tomonidan lavozimga tayinlanadigan va lavozimdan ozod etiladigan direktor boshchilik qiladi.

“Yashnobod” texnoparki direksiyasi direktorining oʻrinbosari va xodimlari “Yashnobod” texnoparki direksiyasining direktori tomonidan lavozimga tayinlanadi va lavozimdan ozod qilinadi.

13. Quyidagilar “Yashnobod” texnoparki direksiyasining asosiy vazifalari hisoblanadi:

texnopark rezidenti maqomini olish uchun yuridik va jismoniy shaxslardan buyurtmanomalar qabul qilinishini tashkil etish;

Muvofiqlashtiruvchi kengashning qaroriga asosan rezidentlarni roʻyxatdan oʻtkazish va ularni Rezidentlar reyestriga kiritish, Texnopark rezidenti maqomi berilganligi toʻgʻrisida guvohnoma (keyingi oʻrinlarda Guvohnoma deb ataladi) berish;

texnopark rezidentlarini texnopark hududida joylashtirish, shuningdek “Yashnobod” texnoparki direksiyasi tomonidan belgilangan tartibda Rezidentlar reyestrini yuritish;

texnopark rezidentlariga innovatsiya jarayoni va innovatsiya mahsulotlarini tijoratlashtirishning barcha bosqichlarida moliyalashtirishni, shu jumladan davlatning, ilmiy tashkilotlar va taʼlim muassasalarining, tadbirkorlik subyektlarining, tijorat banklarining, xalqaro moliya institutlari va donor mamlakatlarning, venchur fondlarning, ijtimoiy moliyalashtirishning (kraudfanding) moliyaviy resurslarini va qonun hujjatlarida taqiqlanmagan boshqa mablagʻlarni jalb etishda koʻmaklashish;

texnopark rezidentlarining innovatsiya loyihalarini amalga oshirishi davomida, shu jumladan ularni texnopark hududida joylashtirishda, ushbu maqsadlar uchun zarur boʻlgan hujjatlarni ishlab chiqishda, ekspertizadan oʻtkazish va kelishishda, pudratchilarni tanlashda hamda qurilish pudrati shartnomalarini tuzishda, qurilish-montaj va ishga tushirish-sozlash ishlarini amalga oshirishda, zarur mehnat, energetika, tabiiy va boshqa resurslar bilan taʼminlashda tashkiliy va boshqa masalalarni hal etishda koʻmaklashish;

Toshkent shahrida joylashgan hamda Toshkent shahri hokimligi va Yashnobod tumani hokimligi, shuningdek “Yashnobod” texnoparki qatnashchilari tomonidan belgilangan tartibda “Yashnobod” texnoparki direksiyasiga berilgan bino va inshootlarni berilgan vakolatlar doirasida operativ boshqarish;

“Yashnobod” texnoparkida ishlash, “Yashnobod” texnoparki va uning rezidentlari muhandislik-kommunikatsiya tarmoqlari va mulkiy komplekslariga xizmat koʻrsatish uchun yuqori malakali mutaxassislarni jalb etish;

innovatsiya ishlanmalarini litsenziyalash, patentlash va kiritishda koʻmaklashish;

rezidentlar mahsulotlarining xalqaro koʻrgazmalarda namoyish etishda koʻmaklashish, shuningdek Muvofiqlashtiruvchi kengash qarorlari asosida taʼlim dasturlari va treninglar tashkil etish;

texnopark rezidentlariga ularning muhandislik-kommunikatsiya tarmoqlariga belgilangan tartibda ulanishida koʻmaklashish;

xalqaro xamkorlikni va xorijiy innovatsiya texnoparklari tajriba almashishini amalga oshirish, “Yashnobod” texnoparkini rivojlantirish uchun xorijiy ekspertlarni jalb etish.

“Yashnobod” texnoparki direksiyasi “Yashnobod” texnoparki faoliyatining asosiy yoʻnalishlari va funksiyalariga, shuningdek Muvofiqlashtiruvchi kengash qarorlariga muvofiq boshqa vazifalarni ham bajarishi mumkin.

14. “Yashnobod” texnoparki direksiyasi oʻziga yuklangan vazifalarni bajarish uchun quyidagi huquqlarga ega:

“Yashnobod” texnoparki hududida investitsiyalash toʻgʻrisida investorlar bilan bitimlar tuzish hamda “Yashnobod” texnoparki rezidentlari bilan innovatsiya loyihalarini amalga oshirish uchun shartnomalar tuzish;

imtiyozli kreditlar olish maqsadida “Yashnobod” texnoparki rezidentlari uchun kafil boʻlish;

shartnoma asosida xizmatlar koʻrsatish, shu jumladan konsalting, muhandislik, logistika, taʼlim, servis, yuridik, marketing, taʼmirlash, savdo-maishiy, moliyaviy, foydalanish, vositachilik xizmatlari va xizmatlarning boshqa turlarini, shuningdek huquqiy muhofaza, intellektual mulkni himoya qilish va ulardan foydalanish sohasida patent-litsenziya kuzatuvi va xizmatlarini, shu jumladan chet tashkilotlarni jalb etgan holda koʻrsatish;

texnopark rezidentlari va qatnashchilariga, boshqa xoʻjalik subyektlariga “Yashnobod” texnoparki direksiyasiga operativ boshqarish uchun innovatsiya mahsulotlari ishlab chiqarishni tashkil etish, xorijiy va mahalliy texnologiyalarning transfer qilinishini taʼminlagan holda yuqori texnologiyali ishlab chiqarishlarni barpo etish, raqobatbardoshli, importning oʻrnini bosuvchi mahsulotlar ishlab chiqarishni tashkil etish uchun belgilangan tartibda berilgan asbob-uskunalarni, laboratoriya, eksperimental-ishlab chiqarish maydonlarini, ofis, ishlab chiqarish, omborxona, oʻquv binolarini, konferens-zallar, auditoriyalar va boshqa binolarni shartnoma asosida ijaraga berish;

innovatsiya loyihalarini, shu jumladan moliyaviy resurslarni va “Yashnobod” texnoparki direksiyasining oʻz mablagʻlarini jalb etish hisobiga tijoratlashtirish tashabbuskori (sherigi) boʻlish, shuningdek texnopark rezidentlari innovatsiya loyihalarini tijoratlashtirish maqsadida grantlar olish uchun buyurtmanomalar berish;

innovatsiya loyihalari amalga oshirilishi monitoringini va texnopark investorlari va rezidentlari tomonidan qabul qilingan majburiyatlar zarur tarzda bajarilishini nazorat qilish, keyinchalik ishlar natijalarini Muvofiqlashtiruvchi kengashga va Yashnobod tumani hokimligiga taqdim etish;

Muvofiqlashtiruvchi kengash qarorlari asosida investorlar yoki rezidentlar tomonidan qabul qilingan majburiyatlar bajarilmagan taqdirda “Yashnobod” texnoparki hududida investitsiyalash toʻgʻrisida investorlar bilan tuzilgan bitimlarni hamda “Yashnobod” texnoparki rezidentlari bilan tuzilgan innovatsiya loyihalarini amalga oshirish toʻgʻrisida shartnomalarni bekor qilish yuzasidan sudga daʼvo arizalari bilan murojaat qilish.

“Yashnobod” texnoparki direksiyasi qonun hujjatlariga muvofiq boshqa huquqlarga ham ega boʻlishi hamda faoliyatning qonun hujjatlarida taqiqlanmagan boshqa turlarini amalga oshirishi mumkin.

Ushbu Nizomda nazarda tutilgan tegishli faoliyat qonun hujjatlarida litsenziyalanishi belgilab qoʻyilgan taqdirda “Yashnobod” texnoparki direksiyasi faoliyatning ushbu turini tegishli litsenziyalovchi organ bilan tuzilgan litsenziya bitimi asosida litsenziya olmasdan amalga oshirishga haqli.

15. “Yashnobod” texnoparki direksiyasi taʼminoti:

Muvofiqlashtiruvchi kengash qaroriga koʻra belgilangan stavkalarni qayta koʻrib chiqish huquqi berilgan holda “Yashnobod” texnoparki hududida tijorat faoliyatini amalga oshirayotgan “Yashnobod” texnoparki rezidentlarining sof tushumning 0,1 foizi miqdoridagi har choraklik ajratmalari;

“Yashnobod” texnoparki rezidentlari va qatnashchilariga xizmatlar koʻrsatishdan olingan daromadlar;

davlat mulki boʻlgan hamda operativ boshqarish uchun belgilangan tartibda “Yashnobod” texnoparki direksiyasiga berilgan bino va inshootlarni ijaraga berishdan olingan tushumlarning bir qismi;

“Yashnobod” texnoparki direksiyasining oʻz mablagʻlari;

qonun hujjatlarida taqiqlanmagan boshqa manbalar hisobiga amalga oshiriladi.

16. “Yashnobod” texnoparki direksiyasi huzurida yuridik shaxs tashkil etmagan “Yashnobod” texnoparkini rivojlantirish jamgʻarmasi tashkil etiladi.

Ushbu Nizomning 15-bandida koʻrsatib oʻtilgan mablagʻlar “Yashnobod” texnoparkini rivojlantirish jamgʻarmasining bank hisob raqamida jamlanadi hamda “Yashnobod” texnoparki infratuzilmasini va hududini, “Yashnobod” texnoparki direksiyasini va uning binolarini saqlash va rivojlantirishga, “Yashnobod” texnoparki direksiyasi xodimlarini moddiy ragʻbatlantirishga, shuningdek “Yashnobod” texnoparki faoliyatining asosiy yoʻnalishlari va funksiyalariga muvofiq boshqa maqsadlarga yoʻnaltiriladi.

17. “Yashnobod” texnoparkini rivojlantirish jamgʻarmasi toʻgʻrisidagi nizom, “Yashnobod” texnoparki direksiyasining shtatlar jadvali va xarajatlari smetasi Muvofiqlashtiruvchi kengash tomonidan tasdiqlanadi.

18. Yuridik va jismoniy shaxs (Oʻzbekiston Respublikasi rezidenti) texnopark rezidenti maqomini olish uchun talabgor boʻlishi mumkin.

Jismoniy shaxsga texnopark rezidenti maqomini berish yuzasidan Muvofiqlashtiruvchi kengashning xulosasi ijobiy boʻlgan taqdirda ushbu jismoniy shaxs belgilangan tartibda Toshkent shahrining Yashnobod tumanida yuridik shaxsni roʻyxatdan oʻtkazadi (tashkil etadi).

19. “Yashnobod” texnoparki rezidenti maqomini olish uchun talabgorlarni tanlab olish ushbu Nizomga ilovaga muvofiq sxema boʻyicha amalga oshiriladi.

Texnopark rezidentlari soni cheklanmagan.

20. Texnopark rezidenti maqomi “Yashnobod” texnoparki rezidenti maqomini olish uchun talabgorlarni tanlab olish natijalariga koʻra Muvofiqlashtiruvchi kengash qaroriga binoan 10 yilgacha muddatga beriladi.

“Yashnobod” texnoparki direksiyasi Muvofiqlashtiruvchi kengash qarori asosida texnopark rezidentini roʻyxatdan oʻtkazadi, Rezidentlar reyestriga kiritadi va Guvohnoma beradi.

Texnopark rezidentlarining, shu jumladan texnopark rezidenti maqomi sobiq hudud prinsipini hisobga olgan holda berilgan holatlarda ham statistik hisobi Toshkent shahrining Yashnobod tumanida amalga oshiriladi.

21. Texnopark rezidentiga investitsiya loyihalarini amalga oshirish toʻgʻrisida “Yashnobod” texnoparki direksiyasi bilan tuzilgan shartnomada “Yashnobod” texnoparki rezidentlari zimmasiga qoʻyilgan majburiyatlar belgilangan tartibda yuklanadi.

Texnopark rezidenti oʻz huquqlari va majburiyatlarini boshqa shaxsga berishga haqli emas.

22. Texnopark rezidenti maqomidan mahrum qilishga Muvofiqlashtiruvchi kengash qaroriga, shu jumladan texnopark rezidenti tomonidan innovatsiya loyihasini amalga oshirish toʻgʻrisidagi shartnomada belgilangan shartlar va talablar bajarilmagan taqdirda “Yashnobod” texnoparki direksiyasining xulosasiga koʻra, shuningdek ixtiyoriy tarzda yoki qonun hujjatlarida belgilangan tartibda yoʻl qoʻyiladi.

23. Alohida soliq rejimi va bojxona imtiyozlarining amal qilishi faqat texnopark hududida amalga oshiriladigan texnopark rezidentlari faoliyatiga, shuningdek texnopark rezidentining investitsiya loyihalarini amalga oshirish toʻgʻrisida “Yashnobod” texnoparki rezidentlari bilan tuzilgan shartnomada nazarda tutilgan faoliyat turlariga tatbiq etiladi.

24. Qonun hujjatlarida belgilangan imtiyozlar va preferensiyalarning amal qilishi Guvohnoma berilgan sanadan boshlab hisoblanadi.

“Yashnobod” texnoparki direksiyasi texnopark rezidenti maqomi berilganligi fakti toʻgʻrisida soliq, statistika organlarini va boshqa manfaatdor organlarni Muvofiqlashtiruvchi kengash qarorini ilova qilgan holda xabardor qiladi.

25. Texnopark rezidentlari boʻlgan yuridik shaxslarning investitsiya loyihalarini amalga oshirish toʻgʻrisida “Yashnobod” texnoparki rezidentlari bilan tuzilgan shartnomada nazarda tutilmagan boshqa sohalardagi faoliyatini tartibga solish umumiy belgilangan tartibda amalga oshiriladi.

26. Toshkent shahri Yashnobod tumani hududidagi yer uchastkalari texnopark rezidentlariga innovatsiya ishlab chiqarishi va “startaplar” tashkil etish uchun doimiy foydalanishga beriladi.

27. Yashnobod tumani hokimligi Toshkent shahri arxitektura va qurilish bosh boshqarmasi bilan birgalikda Toshkent shahri Yashnobod tumanida joylashgan va texnopark rezidentlariga doimiy foydalanishga berish uchun tavsiya etilayotgan yer uchastkalari roʻyxati, uning davriy ravishda yangilab turilishini taʼminlagan holda shakllantiriladi hamda Yashnobod tumani hokimligining va “Yashnobod” texnopark direksiyasining rasmiy veb-saytida joylashtiriladi.

28. Texnopark rezidentlari “Yashnobod” texnoparki direksiyasiga “Yashnobod” texnoparki direksiyasi tomonidan tasdiqlanadigan innovatsiya ishlab chiqarishi va “startaplar” tashkil etish maqsadida obyekt qurish uchun yer uchastkasi berish toʻgʻrisida “Yashnobod” texnoparki direksiyasiga ariza taqdim etadilar.

“Yashnobod” texnoparki direksiyasi texnopark rezidentidan ariza olingan kundan boshlab ikki ish kuni mobaynida uni, arizachiga texnopark rezidenti maqomini berish toʻgʻrisida Muvofiqlashtiruvchi kengash qarori (yoki qarorning koʻchirmasi)ni ilova qilgan holda Yashnobod tumani hokimligiga yuboradi.

Yashnobod tumani hokimligi ikki ish kuni mobaynida texnopark rezidentiga yer uchastkasi berish toʻgʻrisida Yashnobod tumani hokimining iltimosnomasi bilan birga hujjatlarni belgilangan tartibda Toshkent shahri hokimligiga hamda Toshkent shahri arxitektura va qurilish bosh boshqarmasiga yuboradi.

29. Toshkent shahri arxitektura va qurilish bosh boshqarmasi besh ish kuni mobaynida Toshkent shahri hokimining yer uchastkasi berish toʻgʻrisidagi qarori loyihasini tayyorlaydi, qarorga quyidagilar ilova qilinadi:

yer uchastkasi berish boʻyicha dalolatnoma;

ajratilayotgan yer uchastkasining tutash yer uchastkalari va ularning foydalanilishi maqsadi koʻrsatilgan holdagi rejasi;

yer uchastkalari egalari, foydalanuvchilari, ijarachilari va mulkdorlari zararlarining (mavjud boʻlsa) hisob-kitobi;

buzilayotgan binolar va inshootlarning (ular mavjud boʻlsa) bahosi toʻgʻrisida baholash tashkilotining hisoboti;

ajratilayotgan yer uchastkasining egalari, foydalanuvchilari, ijarachilari va mulkdorlari yerning olib qoʻyilayotgan (xarid qilinayotgan) yerlari aks ettirilgan holdagi chegaralari rejasi.

30. Yer uchastkalari berish materiallarini tayyorlash boʻyicha ishlar, ularga tasdiqlangan narxlar boʻyicha, yer uchastkalari berilayotgan texnopark rezidentlari mablagʻlari hisobiga Toshkent shahri arxitektura va qurilish bosh boshqarmasi tomonidan shartnoma asosida bajariladi.

Yer uchastkalari berish boʻyicha materiallarni kelishish Oʻzbekiston Respublikasi Vazirlar Mahkamasining 2015-yil 7-oktabrdagi 285-son qarori bilan tasdiqlangan yuridik va jismoniy shaxslarga tadbirkorlik faoliyatini amalga oshirish uchun yer uchastkalarini tanlov asosida doimiy foydalanishga berish tartibi toʻgʻrisidagi nizomning 19 — 22-bandlarida belgilangan tartibda amalga oshiriladi.

31. Toshkent shahri arxitektura va qurilish bosh boshqarmasi kelishuv yakunlariga koʻra, koʻrib chiqish va texnopark rezidentiga yer uchastkasi ajratish toʻgʻrisida qaror qabul qilish uchun Toshkent shahri hokimligiga yer uchastkasi ajratish boʻyicha materiallarni kiritadi.

Materiallarni koʻrib chiqish va Toshkent shahri hokimining qarorini qabul qilish bir ish kuni mobaynida amalga oshiriladi.

32. Yer uchastkasi ajratish toʻgʻrisida qaror qabul qilingandan keyin bir ish kuni mobaynida Toshkent shahri arxitektura va qurilish bosh boshqarmasi Toshkent shahri yer resurslari va davlat kadastri bosh boshqarmasi bilan birgalikda yer uchastkasi chegaralarini naturaga koʻchirishni amalga oshiradi, dalolatnoma tuzadi, dalolatnoma ishlarni bajaruvchilar hamda yer uchastkasi berilayotgan texnopark rezidenti tomonidan imzolanadi.

33. Toshkent shahri hokimining yer uchastkasi berish toʻgʻrisidagi qarori asosida Toshkent shahri yer resurslari va davlat kadastri bosh boshqarmasi tomonidan bir ish kuni mobaynida texnopark rezidentining yer uchastkasiga boʻlgan huquqi davlat roʻyxatidan oʻtkaziladi va unga yer uchastkasiga huquq davlat roʻyxatidan oʻtkazilgani toʻgʻrisidagi guvohnomani beradi.

34. Yer uchastkasi ajratish materiallari rasmiylashtirilgandan keyin Toshkent shahri hokimligi texnopark rezidenti bilan yer uchastkasidan doimiy foydalanish toʻgʻrisida shartnoma tuzadi.

Yer uchastkasidan foydalanish toʻgʻrisidagi shartnomada yer uchastkasidan doimiy foydalanish shartlari, tomonlarning yer uchastkasidan foydalanish boʻyicha huquqlari va majburiyatlari, shartnomaning tugatilish holatlari, shuningdek yer uchastkasidan doimiy foydalanish huquqining uzaytirilishi va tomonlarining xohishiga koʻra boshqa masalalar belgilanadi.

35. Texnopark faoliyati u tashkil qilingan muddat tamom boʻlgandan keyin toʻxtatilishi mumkin.

36. Oʻzbekiston Respublikasining milliy xavfsizligi manfaatlari himoya qilinishini taʼminlash zarur boʻlganda, shuningdek qonun hujjatlarida belgilangan boshqa holatlarda texnopark faoliyatini muddatidan oldin toʻxtatishga yoʻl qoʻyiladi.

37. Texnopark faoliyatini toʻxtatish toʻgʻrisidagi qaror Oʻzbekiston Respublikasi Prezidenti tomonidan qabul qilinadi.

1. Ushbu Nizom “Yashnobod” texnoparkining Muvofiqlashtiruvchi kengashi (keyingi oʻrinlarda Muvofiqlashtiruvchi kengash deb ataladi) faoliyatini tashkil etish tartibini, vazifalari, funksiyalari va huquqlarini belgilaydi.

2. Muvofiqlashtiruvchi kengash Oʻzbekiston Respublikasi Prezidentining “Toshkent shahrining Yashnobod tumanida innovatsiya texnoparkini tashkil qilish toʻgʻrisida” 2017-yil 5-iyundagi PF-5068-son Farmoni bilan tashkil etilgan davlat boshqaruvi organlari, mahalliy davlat hokimiyati organlari va boshqa tashkilotlarning vakillaridan iborat boʻlgan kollegial organ hisoblanadi.

3. Muvofiqlashtiruvchi kengash oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga, shuningdek ushbu Nizomga amal qiladi.

Muvofiqlashtiruvchi kengashning oʻz vakolatlari doirasida qabul qilingan qarorlari “Yashnobod” texnoparkining barcha qatnashchilari tomonidan bajarilishi majburiy hisoblanadi.

4. Quyidagilar Muvofiqlashtiruvchi kengashning asosiy funksiyalari hisoblanadi:

davlat va xoʻjalik boshqaruvi organlari, tijorat banklari, ilmiy muassasalar va taʼlim muassasalarining “Yashnobod” texnoparkini rivojlantirishga koʻmaklashish boʻyicha faoliyatini muvofiqlashtirish, innovatsiya ishlanmalari negizida “startaplar” tashkil etish uchun qulay shart-sharoitlarni taʼminlash;

innovatsiya jarayonining barcha bosqichlarida “Yashnobod” texnoparki rezidentlariga moliyalashtirishda, shu jumladan innovatsiya mahsulotlarining potensial isteʼmolchilari, tijorat banklari, homiylarning, shu jumladan xorijiy homiylarning mablagʻlari hisobiga moliyalashtirishda koʻmaklashish;

“Yashnobod” texnoparki direksiyasi (keyingi oʻrinlarda Direksiya deb ataladi) faoliyatiga, shu jumladan investitsiya faoliyatini amalga oshiruvchi rezidentlarni jalb etish, yangi ishlab chiqarishlarni tashkil etish uchun ishlab chiqarish binolari va yer uchastkalari ajratilishi masalalarida koʻmaklashish;

yuqori texnologik loyihalarni amalga oshiruvchi kichik biznes va xususiy tadbirkorlik subyektlarining innovatsiya ishlanmalarini, keyinchalik ularga “Yashnobod” texnoparki rezidentlari maqomini berish uchun ekspertizadan oʻtkazish;

ichki bozorda barqaror kooperatsiya aloqalarini yoʻlga qoʻyishda va ishlab chiqarilgan innovatsiya mahsulotlari eksport qilinishida xoʻjalik yurituvchi subyektlarga — “Yashnobod” texnoparki rezidentlariga koʻmaklashish;

tajriba-sanoat va (yoki) kichik innovatsiya ishlab chiqarishini tashkil etish, investitsiya loyihalarini amalga oshirish uchun beriladigan, “Yashnobod” texnoparki istalgan qatnashchisiga, Toshkent shahri va Yashnobod tumani hokimliklariga tegishli ishlab chiqarish binolarini (ularning bir qismini) va yer uchastkalarini “Yashnobod” texnoparki hududiga kiritish boʻyicha qarorlar qabul qilish;

“Yashnobod” texnoparki mahsulotini olishga, shu jumladan eksʼhududiylik prinsipini hisobga olgan holda tanlov oʻtkazish asosida 10 yilgacha boʻlgan muddat bilan “Yashnobod” texnoparki rezidenti maqomini berish boʻyicha qaror qabul qilish, keyinchalik ularni rezident sifatida Direksiya tomonidan roʻyxatdan oʻtkazish;

“Yashnobod” texnoparki investorlari va rezidentlari tomonidan oʻzlari qabul qilgan majburiyatlarining zarur tarzda bajarilishini nazorat qilish, samarasiz faoliyat aniqlangan taqdirda “Yashnobod” texnoparkining rezidenti maqomidan mahrum qilish toʻgʻrisida qaror qabul qilish.

Muvofiqlashtiruvchi kengash “Yashnobod” texnoparkining samarali faoliyatini taʼminlash maqsadida boshqa funksiyalarni ham amalga oshirishi mumkin.

5. Muvofiqlashtiruvchi kengash oʻziga yuklangan vazifalarni bajarish uchun quyidagi huquqlarga ega:

xoʻjalik yurituvchi subyektlarga “Yashnobod” texnoparki rezidentlari maqomini berish, keyinchalik ularni ushbu sifatda Direksiya tomonidan roʻyxatdan oʻtkazish;

Direksiyaning, shuningdek “Yashnobod” texnoparki qatnashchilarining innovatsiya loyihalarini amalga oshirish va joriy etish boʻyicha olib borilayotgan ishlari, “Yashnobod” texnoparki rezidentlari faoliyati uchun qulay shart-sharoitlar yaratish boʻyicha hisobotlarini eshitish;

Oʻzbekiston Respublikasi Iqtisodiyot vazirligining taqdimnomasi boʻyicha Texnopark direksiyasi direktorini lavozimga tayinlash va lavozimdan ozod qilish toʻgʻrisida qaror qabul qilish;

“Yashnobod” texnoparkini rivojlantirish jamgʻarmasi toʻgʻrisidagi nizomni, Direksiyaning shtat jadvalini va Direksiyaning daromadlari va xarajatlari smetasini tasdiqlash, shuningdek Direksiya direktorining ish haqi miqdori va uni moddiy ragʻbatlantirish toʻgʻrisida qaror qabul qilish;

Oʻzbekiston Respublikasi Vazirlar Mahkamasiga texnoparkda innovatsiya faoliyatini kengaytirish uchun qonunchilik bazasini takomillashtirish toʻgʻrisida takliflar kiritish;

zaruratga koʻra “Yashnobod” texnoparki ishtirokchilari tarkibiga oʻzgartirishlar kiritish;

davlat va xoʻjalik boshqaruvi organlaridan, mahalliy davlat hokimiyati organlaridan, “Yashnobod” texnoparki rezidentlaridan Muvofiqlashtiruvchi kengash vakolatiga tegishli boʻlgan statistik va boshqa axborotni belgilangan tartibda soʻrash va olish;

Toshkent shahri hokimligi tomonidan “Yashnobod” texnoparki rezidentlari tomonidan tajriba-sanoat va kichik innovatsion ishlab chiqarishni tashkil etish uchun davlat mulki boʻlgan foydalanilmayotgan binolar va inshootlarni, keyinchalik “Yashnobod” texnoparki direksiyasiga bergan holda, Yashnobod tumani hokimligiga operativ boshqarish uchun berish boʻyicha qaror qabul qilish;

ilmiy ishlanmalarni va tadqiqotlarni oʻtkazish, tajriba loyihalarini amalga oshirish, innovatsiya ishlanmalarini sanoat-tajriba tarzida joriy etish va tijoratlashtirish innovatsiya loyihalarini amalga oshirish uchun “Yashnobod” texnoparki qatnashchilarining (uyushgan aʼzolarining) foydalanilmayotgan binolari, inshootlari va hududlarini “Yashnobod” texnoparki rezidentlariga berish toʻgʻrisida qaror qabul qilish.

Muvofiqlashtiruvchi kengash qonun hujjatlariga muvofiq boshqa huquqlarga ham ega boʻlishi mumkin.

6. Muvofiqlashtiruvchi kengashga rais boshchilik qiladi, uning vakolatlariga quyidagilar kiradi:

Muvofiqlashtiruvchi kengash majlislari kun tartibini belgilash va ularni chaqirish;

Muvofiqlashtiruvchi kengash tomonidan qabul qilingan qarorlar bajarilishining nazoratini tashkil etish;

yuklangan vazifalarni bajarish boʻyicha Muvofiqlashtiruvchi kengash aʼzolari ishlarini muvofiqlashtirish;

Muvofiqlashtiruvchi kengashning samarali ishlashini taʼminlash uchun qonun hujjatlarida taqiqlanmagan boshqa harakatlarni bajarish.

7. Oʻzbekiston Respublikasi Fan va texnologiyalar agentligi Muvofiqlashtiruvchi kengashning ishchi organi va uni ilmiy-metodologik taʼminlash organi (keyingi oʻrinlarda ishchi organ deb ataladi) hisoblanadi.

8. Ishchi organ:

barcha zarur materiallarning Muvofiqlashtiruvchi kengashning navbatdagi majlisiga oʻz vaqtida tayyorlanishini taʼminlaydi va unga “Yashnobod” texnoparki direksiyasidan, davlat va xoʻjalik boshqaruvi organlaridan, mahalliy davlat hokimiyati organlaridan va Muvofiqlashtiruvchi kengash aʼzolaridan zarur materiallarni va ekspert xulosalarni olish huquqi beriladi;

Muvofiqlashtiruvchi kengash aʼzolarining, “Yashnobod” texnoparki direksiyasi va rezidentlarining, tijorat banklarining, homiylarning, shu jumladan xorijiy homiylarning, manfaatdor vazirliklar, idoralar va boshqa tashkilotlarning takliflarini hisobga olgan holda Muvofiqlashtiruvchi kengash majlisi kun tartibini shakllantiradi, keyinchalik kelishish uchun Muvofiqlashtiruvchi kengash raisiga kiritadi;

kun tartibi masalalari boʻyicha tahliliy materiallarni, shuningdek Muvofiqlashtiruvchi kengashning qarorlariga muvofiq boshqa materiallarni tayyorlashni tashkil etadi va Muvofiqlashtiruvchi kengash aʼzolarining koʻrib chiqishi uchun oldindan taqdim etadi;

Muvofiqlashtiruvchi kengash majlislari bayonlarini yuritadi va ularning Muvofiqlashtiruvchi kengash aʼzolari bilan kelishilishini taʼminlaydi;

Muvofiqlashtiruvchi kengash qarorlari bajarilishini nazorat qiladi;

Muvofiqlashtiruvchi kengashni uning qarorlari ijrosi toʻgʻrisida tizimli asosda xabardor qiladi.

9. Muvofiqlashtiruvchi kengash majlislarni zaruriyatga koʻra, biroq har chorakda kamida bir marta oʻtkazadi.

10. Majlisni Muvofiqlashtiruvchi kengash raisi, u boʻlmagan taqdirda — Muvofiqlashtiruvchi kengash raisining oʻrinbosari oʻtkazadi.

Muvofiqlashtiruvchi kengash majlisi unda Muvofiqlashtiruvchi kengash aʼzolarining kamida uchdan ikki qismi qatnashgan taqdirda qonuniy hisoblanadi (kvorumga ega boʻladi).

11. Muvofiqlashtiruvchi kengashning qarori uning majlisda ishtirok etayotgan aʼzolarning oddiy koʻpchilik ovozi bilan qabul qilinadi. Ovozlar teng boʻlganda Muvofiqlashtiruvchi kengash raisining ovozi hal qiluvchi ovoz hisoblanadi.

Muvofiqlashtiruvchi kengashning har bir aʼzosi qabul qilinayotgan qarorlar boʻyicha oʻz fikrini yozma ravishda ifodalashga haqlidir.

Muvofiqlashtiruvchi kengash raisi qarorlarni tezkor qabul qilish maqsadida Muvofiqlashtiruvchi kengash aʼzolari bilan kelishilgan ayrim masalalar boʻyicha qarorlarni soʻrov yoʻli bilan tasdiqlashi mumkin.

12. Muvofiqlashtiruvchi kengash qarorlari Muvofiqlashtiruvchi kengash majlisining bayoni bilan rasmiylashtiriladi. Muvofiqlashtiruvchi kengash majlisining bayoniga barcha aʼzolar tomonidan viza qoʻyiladi, kotib tomonidan imzolanadi, Muvofiqlashtiruvchi kengash raisi tomonidan tasdiqlanadi va bir hafta muddatda Muvofiqlashtiruvchi kengash aʼzolariga, “Yashnobod” texnoparki direksiyasiga va manfaatdor tashkilotlarga yuboriladi.

Muvofiqlashtiruvchi kengash bayonining asl nusxasi va unga doir materiallar ishchi organda saqlanadi.

13. Ishchi organ Muvofiqlashtiruvchi kengash qarorlari bajarilishini tizimli ravishda oʻrganadi va koʻrib chiqadi, zarurat boʻlganda Muvofiqlashtiruvchi kengash raisiga tegishli takliflar kiritadi.

14. Muvofiqlashtiruvchi kengash aʼzolaridan birining tashabbusi bilan Muvofiqlashtiruvchi kengashning navbatdan tashqari majlisi oʻtkazilishi mumkin. Muvofiqlashtiruvchi kengashning navbatdan tashqari majlisini oʻtkazish toʻgʻrisidagi asoslangan talab yozma shaklda ishchi organga yuboriladi.

15. Muvofiqlashtiruvchi kengashning navbatdagi majlisi kun tartibiga kiritilgan masalalar ishchi organ tomonidan majlis oʻtkaziladigan sanadan kamida besh kun oldin Muvofiqlashtiruvchi kengashning har bir aʼzosiga yuboriladi.

16. Kun tartibi oʻzgargan taqdirda ishchi organ Muvofiqlashtiruvchi kengashning har bir aʼzosini Muvofiqlashtiruvchi kengashning navbatdagi majlisi oʻtkazilishi sanasi eʼlon qilinishigacha uch kundan kech boʻlmagan muddatda roʻy bergan oʻzgarishlar toʻgʻrisida xabardor qiladi.

17. Muvofiqlashtiruvchi kengash oʻz faoliyatini Oʻzbekiston Respublikasi Prezidentining qaroriga binoan belgilangan tartibda toʻxtatadi.