O‘zbekiston Respublikasi Prezidentining “O‘zbekiston Respublikasi Uy-joy kommunal xizmat ko‘rsatish vazirligi faoliyatini tashkil etish to‘g‘risida” 2017-yil 18-apreldagi PQ-2900-son qarorini bajarish yuzasidan, shuningdek Qurilish va uy-joy kommunal xo‘jaligi vazirligi tizimi xodimlari kasblarining jozibadorligini oshirish va ularni ijtimoiy muhofaza qilishni takomillashtirish maqsadida Vazirlar Mahkamasi qaror qiladi:

1. Qurilish va uy-joy kommunal xo‘jaligi vazirligi tizimi xodimlari mehnatiga haq to‘lash va ularni moddiy rag‘batlantirish tartibi to‘g‘risidagi nizom ilovaga muvofiq tasdiqlansin.

2. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — “O‘zbekiston temir yo‘llari” AJ boshqaruvi raisi A.J. Ramatov zimmasiga yuklansin.

1 Ushbu Nizom quyidagi xodimlarning mehnatiga haq to‘lash va ularni moddiy rag‘batlantirish tartibini belgilaydi:

O‘zbekiston Respublikasi Qurilish va uy-joy kommunal xo‘jaligi vazirligi (keyingi o‘rinlarda — Vazirlik) markaziy apparati, uning tashkiliy tuzilmasiga kiradigan O‘zbekiston Respublikasi Davlat budjeti mablag‘lari hisobiga moliyalashtiriladigan hududiy bo‘linmalari, tasarrufidagi tashkilotlar va budjetdan mablag‘ oluvchi buyurtmachi tashkilotlari (keyingi o‘rinlarda budjet tashkilotlari deb ataladi) xodimlari;

Vazirlik tizimiga kiradigan va o‘zini o‘zi moliyalashtiradigan (xo‘jalik hisobida faoliyat yuritadigan) tashkilotlar (keyingi o‘rinlarda — tizim tashkilotlari) xodimlari.

2. Vazirlik va tizim tashkilotlari xodimlari mehnatiga haq to‘lash O‘zbekiston Respublikasi Mehnat kodeksiga, ushbu Nizomga, boshqa qonun hujjatlariga, jamoaviy shartnomalarga, shuningdek boshqa mahalliy normativ hujjatlarga muvofiq amalga oshiriladi va u quyidagilarni o‘z ichiga oladi:

lavozim maoshlari (tarif stavkalari);

lavozim maoshlariga qo‘shimchalar va ustamalar;

rag‘batlantiruvchi to‘lovlar;

mehnatning yakuniy natijalariga ko‘ra belgilanadigan mukofotlar.

3. Tizim tashkilotlari xodimlarining lavozim maoshlariga qo‘shimchalar va ustamalar, shuningdek mukofotlar mazkur tashkilotlarning rahbarlari tomonidan, belgilangan tartibda moliyaviy imkoniyatlardan kelib chiqqan holda belgilanadi.

4. Boshqaruv xodimlarining, xizmat ko‘rsatuvchi va texnik xodimlarning lavozim maoshlari, shuningdek ishchilarning tarif stavkalari qonun hujjatlariga muvofiq Mehnatga haq to‘lash bo‘yicha yagona tarif setkasi asosida belgilanadi.

Xodimning lavozim maoshi belgilangan mehnatga haq to‘lashning eng kam miqdorini yagona tarif setkasining tegishli razryadi tarif koeffitsiyentiga ko‘paytirish yo‘li bilan aniqlanadi (oshirilgan va rag‘batlantiruvchi koeffitsiyentni inobatga olgan holda).

Soatbay tarif setkasi miqdori xodimning lavozim maoshini (tarif stavkasini) besh kunlik ish haftasi asosida, ish vaqti normal davom etgan taqdirda ish soatlarining o‘rtacha oylik miqdoriga bo‘lish yo‘li bilan aniqlanadi.

Vazirlik, budjet tashkilotlari va uning tashkiliy tuzilmasiga kiradigan tashkilotlar xodimlarining Yagona tarif setkasi bo‘yicha mehnatga haq to‘lashning tasdiqlangan razryadlariga muvofiq lavozim maoshi, lavozim maoshiga ustama haqlar, bayram puli, choraklik mukofot puli hamda boshqa to‘lovlar va ustamalarni belgilashda tarif koeffitsiyenti 1,8 baravarga oshirilgan miqdorda qo‘llaniladi.

Tizim tashkilotlari xodimlariga Vazirlik markaziy apparati xodimlari uchun belgilangan mehnatga haq to‘lash va moddiy rag‘batlantirish shartlari tatbiq etiladi, shuningdek, zarur hollarda boshqacha shartlar qo‘llanishi mumkin.

6. Xodimlarning lavozim maoshlarini o‘zgartirish quyidagi holatlarda amalga oshiriladi:

O‘zbekiston Respublikasi Prezidenti qarorlari bilan belgilangan mehnatga haq to‘lashning eng kam miqdoriga muvofiq ish haqi miqdorlari oshirilganda;

xodim ushbu tashkilotda boshqa lavozimga o‘tganda yoki xodimga yanada yuqori malaka razryadi berilganda.

O‘zbekiston Respublikasi Prezidenti va Vazirlar Mahkamasining qarorlari bilan tegishli tartib-taomillar belgilanganda.

7. Vazirlik va budjet tashkilotlari xodimlariga mehnat to‘g‘risidagi qonunchilikka muvofiq O‘zbekiston Respublikasi Davlat budjeti mablag‘lari hisobidan lavozim maoshiga quyidagi qo‘shimchalar va ustamalar to‘lanadi (oshirilgan va rag‘batlantiruvchi koeffitsiyentni inobatga olgan holda).

ish vaqtidan boshqa vaqtlarda, dam olish va bayram kunlarida ishlaganlik uchun — soatbay tarif stavkasidan kelib chiqqan holda 2 baravar miqdorida;

tungi vaqtda ishlaganlik uchun — soatbay tarif stavkasidan kelib chiqqan holda 1,5 baravar miqdorida;

uzoq muddat ishlaganlik uchun har oylik ustamalar (oshirilgan va rag‘batlantiruvchi koeffitsiyentlarni inobatga olgan holda) lavozim maoshiga foiz miqdorida to‘lanadi (to‘lash shartlari, miqdori va tartibi mahalliy hujjatlar bilan belgilanadi).

Jamoa kelishuvlarida, jamoa shartnomasida, ish beruvchi tomonidan kasaba uyushmasi qo‘mitasi bilan kelishuvga ko‘ra qabul qilinadigan ichki hujjatlarda, mehnat to‘g‘risidagi qonunchilikka muvofiq mehnat shartnomasida belgilangan boshqa qo‘shimcha to‘lovlar, ustamalar, rag‘batlantirish, bayram va mukofot pullari to‘lanadi hamda moddiy yordamlar ko‘rsatiladi.

8. Tizim tashkilotlari xodimlariga tashkilotlarning o‘z mablag‘lari hisobidan lavozim maoshiga (oshirilgan va rag‘batlantiruvchi koeffitsiyentni inobatga olgan holda) quyidagi qo‘shimchalar va ustamalar belgilanishi mumkin:

kasblarni (lavozimlarni) qo‘shib bajarganlik va xizmat ko‘rsatish hududini kengaytirganlik uchun — amalda bajarilgan ishlar uchun;

dam olish va bayram kunlarida ishlaganlik uchun — soatbay tarif stavkasidan kelib chiqqan holda ikki baravar miqdorda;

uzoq muddat ishlaganlik uchun lavozim maoshiga foizlar hisobida — har oyda ushbu Nizomning 7-bandida nazarda tutilgan miqdorlarda va shartlarda.

Shuningdek, jamoa kelishuvlarida, jamoa shartnomasida, ish beruvchi tomonidan kasaba uyushmasi qo‘mitasi bilan kelishuvga ko‘ra qabul qilinadigan ichki hujjatlarda, mehnat to‘g‘risidagi qonunchilikka muvofiq mehnat shartnomasida belgilangan boshqa qo‘shimchalar, ustamalar, rag‘batlantirish, bayram va mukofot pullari to‘lanadi hamda moddiy yordamlar ko‘rsatiladi.

10. Vazirlik xodimlarini mukofotlash va ularga moddiy yordam ko‘rsatish Davlat budjeti va Qurilish va uy-joy kommunal xo‘jaligi vazirligi faoliyatini qo‘llab-quvvatlash jamg‘armasi (keyingi o‘rinlarda — Jamg‘arma) mablag‘lari hisobidan amalga oshiriladi.

Budjet tashkilotlari xodimlarini mukofotlash va ularga moddiy yordam ko‘rsatish Davlat budjeti va budjetdan tashqari mablag‘lar hisobidan amalga oshiriladi.

11. Vazirlik va budjet tashkilotlari xodimlariga bayram kunlari uchun shtat jadvaliga muvofiq lavozim maoshining ikki baravari miqdorida mukofot to‘lanadi.

12. Mukofotlarning aniq miqdorlarini belgilash uchun Vazirlikda budjet tashkilotlari xodimlarini mukofotlash tartibini belgilash komissiyasi (keyingi o‘rinlarda — komissiya) tashkil etiladi.

A’zolari soni kamida 6 kishidan iborat bo‘lgan komissiyaning tarkibi O‘zbekiston Respublikasi qurilish va uy-joy kommunal xo‘jaligi vaziri tomonidan tuziladi.

Komissiya qarori ko‘pchilik ovoz bilan qabul qilinadi va tegishli bayon bilan rasmiylashtiriladi. Ovozlar teng bo‘lgan taqdirda, raisning ovozi hal qiluvchi hisoblanadi.

13. O‘zbekiston Respublikasi qurilish va uy-joy kommunal xo‘jaligi vaziri tomonidan tasdiqlanadigan Vazirlik tizimi xodimlari faoliyatini baholashning tarmoq reyting tizimiga muvofiq lavozim maoshiga quyidagi miqdorlarda har oylik shaxsiy ustamalar to‘lanadi:

70 balldan 75 ballgacha to‘plaganlarga — 50 foiz;

76 balldan 80 ballgacha to‘plaganlarga — 75 foiz;

81 balldan 85 ballgacha to‘plaganlarga — 100 foiz;

86 balldan 90 ballgacha to‘plaganlarga — 125 foiz;

91 balldan 95 ballgacha to‘plaganlarga — 150 foiz;

96 balldan 100 ballgacha to‘plaganlarga — 200 foiz.

Budjet tashkilotlari va tizim tashkilotlari tomonidan tuziladigan Komissiyalar hamda ishlab chiqilgan reyting ballari shkalasiga muvofiq budjet tashkilotlarining budjetdan tashqari mablag‘lari (budjetdan mablag‘ oluvchi buyurtmachi tashkilotlarda — buyurtmachining saqlash xarajatlari uchun ajratilgan mablag‘lar) va tizim tashkilotlarining o‘z mablag‘lari hisobidan xodimlar faoliyatini baholashning reyting tizimiga muvofiq lavozim maoshiga har oylik ustamalar to‘lanadi.

14. Vazirlik xodimlariga quyidagilar to‘lanadi:

yo‘lkira va ovqatlanish uchun — bazaviy hisoblash miqdorining uch baravari miqdorida har oylik kompensatsiya;

qishloq xo‘jaligi mahsulotlari va qand-shakar xarid qilish uchun — bazaviy hisoblash miqdorining o‘n baravaridan ko‘p bo‘lmagan miqdorda bir yo‘la moddiy yordam;

vazirlik va tizim tashkiloti xodimlariga jamoa kelishuvlarida, jamoa shartnomasida, ish beruvchi tomonidan kasaba uyushmasi qo‘mitasi bilan kelishuvga ko‘ra qabul qilinadigan ichki hujjatlarida, mehnat to‘g‘risidagi qonunchilikka muvofiq mehnat shartnomasida belgilangan boshqa qo‘shimcha to‘lovlar, ustamalar, rag‘batlantirish, bayram va mukofot pullari, moddiy yordam va boshqa turdagi to‘lovlar budjet tashkilotlarining budjetdan tashqari mablag‘lari (budjetdan mablag‘ oluvchi buyurtmachi tashkilotlarida — buyurtmachining saqlash xarajatlari uchun ajratilgan mablag‘lar) va tizim tashkilotlarining o‘z mablag‘lari hisobidan.

15. Tizim tashkilotlari xodimlarini mukofotlash umuman tashkilot bo‘yicha belgilangan asosiy ko‘rsatkichlarni bajarilganda, shuningdek ishlab chiqarish samaradorligini oshirishga, xarajatlarni kamaytirishga va ishlab chiqarishning ichki rezervlaridan foydalanishga yo‘naltirilgan tadbirlar o‘z vaqtida bajarilganda hamda kutilayotgan samaraga erishilganda hisobot davridagi ishlarning natijalari bo‘yicha amalga oshiriladi.

O‘zining funksional vazifalarini o‘z vaqtida, sifatli bajarish va tashkilot faoliyati natijalariga shaxsiy ulush qo‘shish tizim tashkilotlari xodimlariga alohida shaxsiy o‘rnak ko‘rsatganlik uchun mukofot belgilash uchun asosiy ko‘rsatkichlar hisoblanadi. Tizim tashkilotlari xodimlarini mukofotlashning aniq ko‘rsatkichlari tegishli tashkilotlar rahbarlari tomonidan kasaba uyushma qo‘mitasi bilan kelishilgan holda belgilanadi.

17. Tizim tashkilotlari xodimlarini bayram kunlarida mukofotlash miqdorlari tegishli tashkilotlarning rahbarlari tomonidan, moliyaviy imkoniyatlardan kelib chiqqan holda belgilanadi.

18. Tizim tashkilotlari xodimlariga moddiy yordam to‘lash ushbu Nizomning 15-bandida nazarda tutilgan miqdorlarda va shartlarda amalga oshiriladi.

18¹. Injiniring kompaniyasi xodimlarini mukofotlash va ularga moddiy yordam ko‘rsatish issiqlik ta’minoti obyektlarini qurish hamda rekonstruksiya qilish loyihalarini amalga oshirish doirasida buyurtmachini saqlash xarajatlarini belgilangan tartibda nazarda tutadigan Davlat budjeti mablag‘lari hamda qonunchilik hujjatlari bilan taqiqlanmagan boshqa manbalar hisobidan amalga oshiriladi.

18². Injiniring kompaniyasi xodimlariga:

ish vaqtidan boshqa vaqtlarda, dam olish va bayram kunlarida, tungi vaqtda ishlaganlik, shuningdek, uzoq muddat ishlaganlik uchun ushbu Nizomning 7-8-bandlarida nazarda tutilgan tartibda lavozim maoshiga ustamalar;

ovqatlanish xarajatlarini qoplash uchun — bazaviy hisoblash miqdorining bir baravari miqdorida har oylik to‘lov;

yo‘lkira xarajatlarini qoplash uchun — bazaviy hisoblash miqdorining bir baravari miqdorida har oylik to‘lov, xizmat avtotransporti biriktirilgan xodimlar bundan mustasno;

qishloq xo‘jaligi mahsulotlarini sotib olish uchun — bazaviy hisoblash miqdorining o‘n baravaridan ko‘p bo‘lmagan miqdorda bir yo‘la moddiy yordam puli to‘lanadi;

18³. Mukofotlar va ustamalarning aniq miqdorini belgilash uchun Injiniring kompaniyalarida xodimlarni mukofotlash tartibini belgilash komissiyasi (keyingi o‘rinlarda — komissiya) tashkil etiladi.

Komissiya Injiniring kompaniyasi rahbarining qarori bilan 7 kishidan iborat tarkibda tuziladi. Komissiya qarori ko‘pchilik ovoz bilan qabul qilinadi va tegishli bayonnoma bilan rasmiylashtiriladi. Ovozlar teng bo‘lgan taqdirda, komissiya raisining ovozi hal qiluvchi hisoblanadi.

23. Vazirlik va tizim tashkilotlarining rahbarlari va bosh buxgalterlari xodimlar mehnatini normalash va hisobga olishning tashkil etilishi, lavozim maoshlari va tarif stavkalarining to‘g‘ri belgilanganligi, ushbu Nizomda nazarda tutilgan qo‘shimchalar, ustamalar va mukofotlarning to‘g‘ri hisoblab chiqilganligi uchun shaxsan javob beradilar.