“Navoiy KMK” davlat korxonasining kadrlar salohiyatini yanada mustahkamlash, yuqori malakali mutaxassislarining kasbiy va moddiy manfaatdorligini oshirish, shuningdek ularning ijtimoiy muhofazasini kuchaytirish maqsadida Vazirlar Mahkamasi qaror qiladi:

1. 2017-yil 1-maydan boshlab “Navoiy KMK” davlat korxonasi xodimlarining ish haqiga quyidagi miqdorlarda tuman (hududiy) koeffitsiyentlari belgilansin:

1,60 — Navoiy viloyatining Zarafshon, Uchquduq shaharlarida, Tomdi, Uchquduq, Konimex, Nurota tumanlarida, Buxoro viloyatining Gʻijduvon, Peshku tumanlarida, Xorazm viloyatining Hazorasp tumanida joylashgan boʻlinmalar xodimlari uchun;

1,30 — Samarqand viloyatining Nurobod shahrida, Qoʻshrabod, Nurobod, Paxtachi, Urgut tumanlarida, Jizzax viloyatining Gʻallaorol va Zomin tumanlarida joylashgan boʻlinmalar xodimlari uchun;

1,20 — Navoiy viloyatining Navoiy shahrida va Karmana tumanida, Qashqadaryo viloyatining Shahrisabz shahrida, Kitob tumanida, Toshkent viloyatining Olmaliq shahrida, Pskent va Ohangaron tumanlarida joylashgan boʻlinmalar xodimlari uchun;

2. Belgilab qoʻyilsinki, 2017-yil 1-maydan boshlab:

“Navoiy KMK” davlat korxonasi xodimlarining ish haqiga tuman (hududiy) koeffitsiyentlarini hisoblashning cheklangan summasi Oʻzbekiston Respublikasi hududida belgilangan mehnatga haq toʻlashning eng kam miqdorining 2,11 baravarini tashkil etadi;

Vazirlar Mahkamasining “Navoiy viloyati xalq xoʻjaligi tarmoqlari xodimlarining ish haqini hududiy tartibga solishni takomillashtirish toʻgʻrisida” 1992-yil 20-apreldagi 200-son qarori bilan belgilangan tuman (hududiy) koeffitsiyentlari, shuningdek Vazirlar Mahkamasining “Pensiyalar, stipendiyalar va budjetdagi muassasalar xodimlarining ish haqi miqdorlarini oshirish choralari toʻgʻrisida” 1992-yil 4-sentabrdagi 407-son qarori bilan belgilangan tuman (hududiy) koeffitsiyentlarini hisoblashning cheklangan summasi miqdori “Navoiy KMK” davlat korxonasining xodimlariga nisbatan qoʻllanmaydi.

3. Xodimlarning ish haqiga koeffitsiyentlar belgilash bilan bogʻliq xarajatlar “Navoiy KMK” davlat korxonasi mablagʻlari hisobiga amalga oshirilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.