“Navoiy KMK” davlat korxonasining kadrlar salohiyatini yanada mustahkamlash, yuqori malakali mutaxassislarining kasbiy va moddiy manfaatdorligini oshirish, shuningdek ularning ijtimoiy muhofazasini kuchaytirish maqsadida Vazirlar Mahkamasi qaror qiladi:

1. “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamg‘armasi” davlat muassasasi xodimlarining ish haqiga quyidagi miqdorlarda tuman (hududiy) koeffitsiyentlari belgilansin:

1,60 — Navoiy viloyatining Zarafshon, Uchquduq shaharlarida, Tomdi, Uchquduq, Konimex, Nurota tumanlarida, Buxoro viloyatining G‘ijduvon, Peshku va Shofirkon tumanlarida, Xorazm viloyatining Tuproqqal’a tumanida joylashgan bo‘linmalar xodimlari uchun;

1,30 — Samarqand viloyatining Nurobod shahrida, Qo‘shrabod, Nurobod, Paxtachi, Urgut tumanlarida, Jizzax viloyatining G‘allaorol, Zomin va Forish tumanlarida, Navoiy viloyatining Navbahor, Qiziltepa va Xatirchi tumanlarida joylashgan bo‘linmalar xodimlari uchun;

1,20 — Navoiy viloyatining Navoiy shahrida va Karmana tumanida, Qashqadaryo viloyatining Shahrisabz shahrida, Kitob, Muborak va Koson tumanlarida, Toshkent viloyatining Angren va Olmaliq shaharlarida, Piskent va Ohangaron tumanlarida hamda Namangan viloyatining Pop tumanida joylashgan bo‘linmalar xodimlari uchun;

1,15 — Qoraqalpog‘iston Respublikasi Taxiatosh tumanida joylashgan bo‘linmalar xodimlari uchun.

2. Belgilab qo‘yilsinki:

“Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamg‘armasi” davlat muassasasi xodimlarining ish haqiga tuman (hududiy) koeffitsiyentlarini hisoblashning cheklangan summasi O‘zbekiston Respublikasi hududida belgilangan mehnatga haq to‘lashning eng kam miqdorining 2,11 baravarini tashkil etadi;

Vazirlar Mahkamasining “Mehnat bozorida mehnat munosabatlarini tartibga solishga doir qo‘shimcha chora-tadbirlar to‘g‘risida” 2019-yil 6-sentabrdagi 743-son qarori 1-ilovasiga muvofiq tasdiqlangan Tabiiy-iqlim va maishiy sharoitlari og‘ir va noqulay bo‘lgan joylarda ishlovchi xodimlar mehnatiga haq to‘lashga tuman koeffitsiyentlarini, shuningdek, ularga har yili beriladigan qo‘shimcha ta’tilning eng kam muddatini belgilash va qo‘llash tartibi to‘g‘risidagi nizom “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamg‘armasi” davlat muassasasining xodimlariga nisbatan qo‘llanmaydi.

3. Xodimlarning ish haqiga koeffitsiyentlar belgilash bilan bog‘liq xarajatlar “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamg‘armasi” davlat muassasasi mablag‘lari hisobiga amalga oshirilsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari G‘.I. Ibragimov zimmasiga yuklansin.