Oʻzbekiston Respublikasi Prezidentining 1998-yil 28-oktabrdagi PF-2100-son Farmoni (Oʻzbekiston Respublikasi Oliy Majlisi Axborotnomasi, 1998-y., 10-11-son, 203-modda) ijrosini taʼminlash hamda tuman hududidagi toʻy-hashamlar, oilaviy tantanalar, maʼraka va marosimlarni oʻtkazishda ortiqcha dabdababozlik va isrofgarchilikka yoʻl qoʻymaslik, fuqarolar sogʻligʻi va xavfsizligini taʼminlash maqsadida, Oʻzbekiston Respublikasining “Mahalliy davlat hokimiyati toʻgʻrisida”gi Qonuniga (Oʻzbekiston Respublikasi Oliy Kengashining Axborotnomasi, 1993-y., 9-son, 320-modda) asosan xalq deputatlari Surxondaryo viloyati Kengashi qaror qiladi:

1. Xalq deputatlari viloyat Kengashining qonuniylik, huquq-tartibot va fuqarolar xavfsizligini taʼminlash masalalari boʻyicha doimiy komissiyasi raisi A.Ch. Soatovning axboroti maʼlumot uchun qabul qilinsin.

2. “Mahalla” xayriya jamoat fondi, “Nuroniy” jamgʻarmasi, Maʼnaviyat targʻibot markazi, Xotin-qizlar qoʻmitasining boshqa nodavlat notijorat tashkilotlar va fuqarolarning oʻzini oʻzi boshqarish organlari bilan birgalikda barcha tumanlarda toʻy-hasham, marosim va oilaviy tadbirlarni muvofiqlashtiruvchi Jamoatchilik Kengashlarini tuzish taklifi maʼqullansin.

3. Viloyatda toʻy-hasham, marosim va oilaviy tadbirlar oʻtkazilishini oʻrganib boruvchi viloyat Jamoatchilik Kengashi tarkibi ilovaga muvofiq tasdiqlansin.

4. Jamoatchilik Kengashining asosiy vazifalari etib:

keng jamoatchilik vakillarini jalb qilgan holda, viloyat xududidagi toʻy-hashamlar, oilaviy tantanalar, maʼraka va marosimlar, marhumlar xotiralariga bagʻishlangan tadbirlarni tartibga solish hamda ixcham va milliy qadriyatlar asosida oʻtkazish boʻyicha takliflarni ishlab chiqib, targʻibot orqali jamiyat hayotiga tatbiq etish;

toʻy-hashamlar, oilaviy tantanalar va marosimlarni oʻtkazish boʻyicha jamoatchilik fikrini inobatga olmaydiganlar ustidan jamoatchilik nazoratini oʻrnatish, aniqlangan salbiy holatlar boʻyicha tegishli davlat va nazorat qiluvchi organlarga maʼlumot kiritish;

mazkur holatlarda Jamoatchilik Kengashi tushuntirishlariga rioya qilmagan fuqarolar haqida viloyat YXXBning navbatchi telefonlariga (221-27-51, 221-31-04) axborot berib borish belgilansin.

5. Viloyat hududidagi barcha davlat boshqaruvi organlari, korxona, tashkilot va muassasalarda mehnat unumdorligini saqlash maqsadida restoran, oshxona, kafe va toʻyxonalarda ish kunlari toʻy va marosim munosabati bilan soat 07.00 dan 09.00 gacha yoki 12.00 dan 14.00 gacha osh berish va aksincha ish vaqtida soat 09.00 dan 12.00 gacha, 14.00 dan 18.00 gacha osh berishni taʼqiqlash, hamda soat 23.00 dan keyin toʻy va bazmlarni davom ettirish holatlarining oldini olish boʻyicha jamoatchilikning takliflari qoʻllab-quvvatlansin.

6. Oʻzbekiston musulmonlari idorasi viloyat vakilligi (E. Rustamov), xalq deputatlari mahalliy Kengashlari deputatlari, viloyatdagi nodavlat notijorat tashkilotlariga:

nikoh toʻylarida fuqarolarning turli spirtli ichimlik isteʼmol qilishi oqibatida milliy urf-odatlardan biri boʻlgan ziyorat qilish odobiga hurmatsizlik boʻlayotgani sababli “Al Hakim at-Termiziy” yodgorlik majmuasi va boshqa ziyoratgohlarning kirish qismida fuqarolarga tushuntirish ishlarini olib borish;

toʻy-hashamlar, oilaviy tantanalar, maʼraka va marosimlar, marhumlar xotiralariga bagʻishlangan tadbirlarni milliy qadriyatlarimizga mos ravishda ixcham va dabdabasiz oʻtkazishni aholi oʻrtasida keng targʻib qilish;

imom-xatiblar toʻylar va marosimlardagi maʼruzalarida aholini eʼtiborini yoshlar tarbiyasi, ota-onaning masʼuliyati, jamiyat hayotiga xavf solayotgan tahdidlarni oldini olish, tinchlik va mustaqillik neʼmatini asrash kabi masalalarga qaratishi tavsiya etilsin.

7. Yoʻl harakati xavfsizligi qoidalariga rioya qilishni kuchaytirish maqsadida kelin-kuyov va ularning yaqinlariga fuqarolik holati dalolatnomalarini yozish boʻlimlari yoki diqqatga sazovor joylarga sayr qilish jarayonida 4 tadan ortiq avtoulovlardan foydalanmaslik boʻyicha jamoatchilikning takliflari qoʻllab-quvvatlansin.

8. Viloyat ichki ishlar boshqarmasi (J. Atayev), viloyat yoʻl xarakati xavfsizligi boshqarmasi (R. Joʻrabekov)larga:

joylarda yoʻl harakati xavfsizligini taʼminlash hamda fuqarolar xavfsizligiga jiddiy xavf solishi mumkin boʻlgan koʻngilsiz holatlarning oldini olish maqsadida, nikoh toʻylarida kelin-kuyov va ularning yaqinlarini transport vositalarida tartibsiz harakatlanishlarini bartaraf etish choralarini koʻrish;

Termiz shahridagi “Al Hakim at-Termiziy” yodgorlik majmuasi va tumanlardagi boshqa ziyoratgohlarga kirish qismida nikoh toʻylari munosabati bilan haydovchilarning guruh boʻlib harakatlanish tartiblarini nazoratga olish va tegishli choralar koʻrish;

viloyat Davlat soliq boshqarmasi (Sh. Raximov) bilan birgalikda toʻy-hashamlarda avtotransport xizmatlarini koʻrsatuvchi yuridik va jismoniy shaxslar faoliyati qonuniyligini nazorat qilish hamda viloyat hokimligiga har chorakda axborot va takliflar kiritish topshirilsin.

9. Viloyat teleradiokompaniyasi (Z. Toʻrayev), Matbuot va axborot agentligi hududiy boshqarmasi (Oʻ. Oltiboyev)ga doimiy ravishda toʻy-hashamlarda mavjud muammolarni muhokama etish va aholi orasida zarur tushuntirish ishlarini olib borishga qaratilgan ochiq tele va radio muloqotlar tashkil etib borish tavsiya etilsin.

10. Mulkchilik shaklidan qatʼi nazar, viloyat hududida joylashgan barcha korxona, tashkilot, muassasa va fuqarolar yigʻiniga ushbu qarorning mazmun-mohiyatini aholi va mehnat jamoasiga yetkazish hamda joylarda qarorning ijrosini taʼminlash vazifalari topshirilsin.

11. Mazkur qarorning ijrosini nazorat qilish xalq deputatlari viloyat Kengashining Qonuniylik, huquq-tartibot va fuqarolar xavfsizligini taʼminlash masalalari boʻyicha doimiy komissiyasi (A. Soatov), Ijtimoiy-madaniy rivojlanish, yoshlar siyosati va sogʻlom avlodni tarbiyalash masalalari boʻyicha doimiy komissiyasi (M. Xaydarov) zimmasiga yuklatilsin.

12. Ushbu qaror rasman eʼlon qilingan kundan kuchga kiradi.