Oʻzbekiston Respublikasining “Dafn etish va dafn ishi toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2010-y., 52-son, 508-modda), Oʻzbekiston Respublikasi Vazirlar Mahkamasining 2011-yil 4-apreldagi 101-son “Dafn etish va dafn ishi toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida”gi qarori (Oʻzbekiston Respublikasi qonun hujjatlari toʻplami, 2011-y., 14-son, 138-modda) hamda Oʻzbekiston Respublikasi “Mahalliy davlat hokimiyati toʻgʻrisida”gi Qonunining (Oʻzbekiston Respublikasi Oliy Kengashining Axborotnomasi, 1993-y., 9-son, 320-modda) 6, 25-moddalariga asosan viloyatdagi dafn etish joylarini saqlash va obodonlashtirish ishlarini olib borish maqsadida qaror qilaman:

1. Shahar va tuman xokimliklari tomonidan oʻz hududlaridagi tuproq namligi va qattiqligini hisobga olgan holda dafn etish xizmatlarini koʻrsatish boʻyicha ishlab chiqilgan takliflariga rozilik berilsin.

2. Viloyatdagi qabristonlarda dafn etish xizmatlarini koʻrsatish boʻyicha tariflar miqdori ilovaga muvofiq belgilansin.

3. Tuman va shaharlar hokimlariga:

fuqarolarning oʻzini oʻzi boshqarish organlari bilan hamkorlikda qabristonlarni zarur darajada saqlash va obodonlashtirish hamda hasharlar, xotirlash kunlari va boshqa tadbirlarni tashkil etish;

Bir hafta muddatda Oʻzbekiston Respublikasi Vazirlar Mahkamasining 2011-yil 4-apreldagi “Dafn etish va dafn ishi toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida”gi 101-sonli qaroriga muvofiq dafn etish joylarini saqlash qoidalarini ishlab chiqib, tasdiqlash;

sanitariya qoidalari va meʼyorlariga qatʼiyan rioya etgan holda qabristonlarni ochish va yopishda qonuniylikni taʼminlash, qabristonlar tashkil etish uchun yer uchastkasi ajratishni yer toʻgʻrisidagi qonun hujjatlariga muvofiq amalga oshirish topshirilsin.

4. Tuman va shaharlar obodonlashtirish boshqarmalari (fuqarolik xizmati koʻrsatish boshqarmalari) hamda qabristonlarning maʼmuriyati:

xizmatlar uchun qatʼiyan belgilangan tariflar boʻyicha hisob-kitob qilgan holda fuqarolarning qabristonda koʻrsatiladigan xizmatlarga doir buyurtmalarini oʻz vaqtida va sifatli bajarsinlar;

qabristonlarda byustlar, haykaltaroshlik yodgorliklari yoki alohida arxitektura shakliga ega boʻlgan inshootlarni oʻrnatish, obyektlarni saqlash va ulardan foydalanish qoidalariga rioya etilishini taʼminlasinlar.

5. Viloyat arxitektura va qurilish bosh boshqarmasi (Eshonqulov), viloyat davlat sanitariya-epidemiologiya nazorati markazi (Yakubov) va viloyat tabiatni muhofaza qilish qoʻmitasi (Roziqov)ga:

qabristonlar tashkil etish uchun yer uchastkasi tanlashni shaharsozlik hujjatlari, gidrogeologik tavsiflar, joy relyefining xususiyatlari, tuproq tarkibi, atrof tabiiy muhitga eng koʻp yoʻl qoʻyiladigan ekologik yuklamalarni hisobga olgan holda aholi punktlari va hududlarni qurish qoidalariga, shuningdek sanitariya meʼyorlari va qoidalariga muvofiq amalga oshirish;

qabristonlarning xizmat koʻrsatish davri muddatlariga rioya etilishini taʼminlash hamda ishlab turgan va loyihalashtirilayotgan qabristonlarning sanitariya-himoyalash zonasi hududida biror-bir turar joy va jamoat binolarini qurish yoki dafn etish uchun ajratilgan yer uchastkalaridan nooʻrin foydalanilishining oldini olish hamda ularga yoʻl qoʻymaslik yuzasidan aniq chora-tadbirlarni amalga oshirish topshirilsin.

6. Mazkur qaror “Fargʻona haqiqati” va “Ferganskaya pravda” gazetalarida rasmiy eʼlon qilinsin hamda viloyat hokimligining rasmiy veb-saytiga joylashtirilsin.

7. Ushbu qaror rasmiy eʼlon qilingan kundan eʼtiboran kuchga kiradi.

8. Mazkur qaror ijrosining nazorati viloyat hokimining oʻrinbosari S. Qoʻchqorov zimmasiga yuklatilsin.