Oʻzbekiston Respublikasi “Mahalliy davlat hokimiyati toʻgʻrisida”gi Qonunning (Oʻzbekiston Respublikasi Oliy Kengashining Axborotnomasi, 1993-yil, 9-son, 320-modda) 25-moddasi, Oʻzbekiston Respublikasi Vazirlar Mahkamasining 2003-yil 13-fevraldagi “Oʻzbekiston Respublikasida chakana savdo qoidalarini hamda Oʻzbekiston Respublikasida umumiy ovqatlanish mahsulotlarini (xizmatlarini) ishlab chiqarish va sotish qoidalarini tasdiqlash toʻgʻrisida”gi (“Oʻzbekiston Respublikasi qonun hujjatlari toʻplami” 2003-y., 3-son, 27-modda) 75-sonli, 2012-yil 28-avgustdagi “Bozorlar va savdo komplekslari faoliyatini tartibga solishga doir qoʻshimcha chora-tadbirlar toʻgʻrisida”gi 253-sonli (“Oʻzbekiston Respublikasi qonun hujjatlari toʻplami”, 2012-yil, 35-son, 403-modda) qarorlariga muvofiq, aholiga koʻrsatilayotgan savdo madaniyatini oshirish, bozorlar va savdo komplekslari hududida xavfsizlikni taʼminlash, shuningdek Toshkent shahar hokimligining iqtisodiy va ijtimoiy rivojlantirish, xizmat koʻrsatish sohasi va tadbirkorlik masalalari boʻyicha majmuasi, Savdo, xizmat koʻrsatish sohasi va xalq isteʼmol mollari ishlab chiqarish departamenti va “Toshbozorsavdo” uyushmasining 2016-yil 15-iyuldagi 04-214-sonli qoʻshma murojaatlarini inobatga olib, qaror qilaman:

1. Toshkent shahar hokimligining iqtisodiy va ijtimoiy rivojlantirish, xizmat koʻrsatish sohasi va tadbirkorlik masalalari boʻyicha majmuasi, Savdo, xizmat koʻrsatish sohasi va xalq isteʼmol mollari ishlab chiqarish departamenti va “Toshbozorsavdo” uyushmasining Toshkent shahridagi bozorlar va savdo komplekslari hududida faoliyat yurituvchi tadbirkorlar hamda xizmat koʻrsatuvchi ishchi, xodimlarni bozorlar va savdo komplekslari maʼmuriyati tomonidan taqdim etiladigan farqlash belgisi (beyjik) bilan taʼminlash haqidagi taklifi maʼqullansin.

2. Toshkent shahridagi bozorlar va savdo komplekslari hududida faoliyat yurituvchi tadbirkorlar hamda xizmat koʻrsatuvchi ishchi, xodimlarni bozorlar va savdo komplekslari maʼmuriyati tomonidan taqdim etiladigan farqlash belgisidan (beyjik) foydalanish toʻgʻrisidagi Yoʻriqnoma (keyingi oʻrinlarda — “Yoʻriqnoma” deb yuritiladi) ilovaga muvofiq tasdiqlansin.

3. Savdo, xizmat koʻrsatish va xalq isteʼmol mollari ishlab chiqarish departamenti (R. Abdumajitov), “Toshbozorsavdo” uyushmasi (S. Nematullayev), bozorlar va savdo komplekslari rahbarlari:

Toshkent shahridagi bozorlar va savdo komplekslari hududida faoliyat yurituvchi tadbirkorlar hamda xizmat koʻrsatuvchi ishchi, xodimlar farqlash belgisini (beyjik) rasmiylashtirish uchun ular tomonidan taqdim etiladigan hujjatlarning qabul qilib olish, hujjatlarni Yoʻriqnomada belgilangan muddat ichida koʻrib chiqish va murojaat etuvchiga farqlash belgisini (beyjik) berilishini nazorat qilish;

Toshkent shahridagi bozor va savdo komplekslari shtat jadvalini qayta koʻrib chiqish asosida har bir jamiyatda farqlash belgisini (beyjik)larni tayyorlash, saqlash, tarqatish va nazoratini olib borish bilan shugʻullanadigan alohida boʻlim tashkil etish yoki mutaxassis lavozimini kiritish masalasini koʻrib chiqish;

har bir bozorlar va savdo komplekslarda farqlash belgisi (beyjik) bilan toʻliq qamrab olinganligi haqida har chorak yakuni boʻyicha tahliliy maʼlumotlar tayyorlanib, Toshkent shahar hokimligiga kiritib borish vazifalari yuklatilsin.

4. “Toshkent oqshomi” va “Vecherniy Tashkent” gazetalari tahririyati (A. Akromov), “Kompyuterlashtirish markazi” DUK (M. Asamov) mazkur qarorni rasmiy eʼlon qilinishi va www.toshkent.uz veb-saytiga joylashtirilishini taʼminlasin.

5. Mazkur qaror rasmiy eʼlon qilingan kundan uch oy muddat oʻtganidan keyin qonuniy kuchga kiradi.

6. Mazkur qarorning ijrosini nazorat qilish Toshkent shahar hokimining oʻrinbosarlari M. Obidov va N. Xusanov zimmasiga yuklatilsin.

1. Ushbu Yoʻriqnoma “Toshbozorsavdo” uyushmasi tizimidagi bozorlar va savdo komplekslarida faoliyat yurituvchi tadbirkorlar hamda xizmat koʻrsatuvchi ishchi, xodimlarga beriladigan farqlash belgisini (beyjikni) tayyorlash, berish, almashtirish, saqlash va ularning hisobini yuritish hamda ulardan foydalanish tartibini belgilaydi.

2. Farqlash belgisi (beyjik) bozorlar va savdo komplekslarida faoliyat yurituvchi tadbirkorlar hamda xizmat koʻrsatuvchi ishchi, xodimlarga beriladigan guvohnoma turi hisoblanadi.

3. Farqlash belgisi (beyjik) blankalari qatʼiy hisobotda turuvchi blank boʻlib:

yuqori sifatli rasm qogʻozda;

oʻlchami 105x75 mm boʻlgan toʻgʻri toʻrt burchak shaklda;

ustki yuqori qismida bozor va savdo kompleksining nomi koʻrsatilgan;

oʻrta qismida tadbirkorlar hamda xizmat koʻrsatuvchi ishchi, xodim rasmi joylashtirilgan va uning tag qismiga pasportdagi maʼlumotlar asosida toʻldirilgan familiyasi, ismi, otasining ismi (toʻliq), faoliyat turi, faoliyat amalga oshiradigan joyi (mavjud boʻlsa) va uning tagida farqlash belgisi (beyjik) raqami koʻrsatilgan;

joylashtirilgan rasmning chap pastki burchagiga, farqlash belgisi (beyjik) oluvchi tadbirkorlar hamda xizmat koʻrsatuvchi ishchi, xodimlarga tegishli hujjatlar asosida qalbakilashtirishga qarshi himoya elementi qoʻyilgan;

farqlash belgisi (beyjik)ning orqa tomoniga pasport boʻyicha maʼlumotlar, yaʼni tugʻilgan oyi, yili, joyi, yashash manzili, pasport raqami, ish vaqti, tushlik vaqti va boshqa kerakli maʼlumotlar ketma-ketlikda yozilgan;

barcha maʼlumotlar kiritilgan farqlash belgisi (beyjik) pastki chap burchak qismi bozor yoki savdo kompleksining muhri bilan tasdiqlangan va plastik plyonka bilan himoyalangan holda tayyorlanadi.

4. Farqlash belgisini (beyjik) olgan shaxs uni ish faoliyati davomida taqib yuradi va oʻzga shaxslarga berish taqiqlanadi.

5. Barcha maʼlumotlar kiritilgan namunaviy farqlash belgisi (beyjik) bozor va savdo kompleksining buyurtmasi asosida tayyorlanadi.

6. Farqlash belgisi (beyjik)ning hisobi bozor va savdo komplekslari tomonidan yuritiladigan roʻyxatga olish kitobida qayd etib boriladi.

Roʻyxatga olish kitobida tartib raqami, farqlash belgisi (beyjik)ning raqami, shaxsning familiyasi, ismi va otasining ismi, amal qilish muddati, faoliyat turi, faoliyat amalga oshiradigan joyi (mavjud boʻlsa), pasport maʼlumotlari, turar joyi yoki vaqtincha roʻyxatga olingan manzili, farqlash belgisi (beyjik)ning olganligi toʻgʻrisida imzosi va sana, qaytarilgan sanasi, telefon raqami va qaytarib olgan masʼul shaxsning F.I.Sh., lavozimi, imzosi koʻrsatiladi.

7. Roʻyxatga olish kitobi varaqlari raqamlanib, ip bilan tikiladi hamda bozor va savdo kompleksi rahbari yoki oʻrinbosarining imzosi bilan tasdiqlanadi hamda kamida 5 yil saqlanadi.

8. Belgilangan tartibda rasmiylashtirilgan farqlash belgi (beyjik)lari bozor va savdo komplekslari maʼmuriyatida maxsus temir shkaf (seyf)larda saqlanadi. Ushbu shkaf (seyf)lar qulflanib, muhrlanadigan boʻlishi lozim.

9. Farqlash belgisi (beyjik)larning kirimi, sarfi va mavjud qoldigʻi har yil yakunida tegishli bozor va savdo kompleksining buyrugʻi bilan tashkil etilgan ishchi komissiyasi tomonidan tekshiriladi va dalolatnomalar rasmiylashtiriladi.

10. Farqlash belgisi (beyjik) bozor yoki savdo kompleksi hududida faoliyat yurituvchi tadbirkorlar hamda xizmat koʻrsatuvchi ishchi, xodimlarning arizasiga asosan beriladi.

11. Farqlash belgisi (beyjik)ni oluvchi oʻz arizasida F.I.Sh., pasport maʼlumotlari, yashash manzili, tugilgan yili va joyi, mobil telefon raqami, faoliyat turi, faoliyat amalga oshiradigan joyi (mavjud boʻlsa) va faoliyat muddatini koʻrsatgan holda taqdim etadi.

12. Arizasiga quyidagi hujjatlar ilova qilinadi:

pasport nusxasi doimiy yoki vaqtincha roʻyxatda (propiska) turish manzili bilan (asl nusxasini koʻrsatgan holda);

tadbirkorlar uchun tadbirkorlik faoliyati bilan shugʻullanish huquqini beruvchi hujjat nusxasi (asl nusxasini koʻrsatgan holda);

tegishli mahalliy davlat hokimiyati organi, fuqarolarning oʻzini oʻzi boshqarish organi, bogʻdorchilik-uzumchilik yoki polizchilik shirkati boshqaruvi tomonidan berilgan sotilayotgan mahsulot jismoniy shaxs tomonidan unga yoki uning oila aʼzolariga ajratilgan yer uchastkasida yetishtirilganligini tasdiqlovchi, belgilangan shakldagi hujjat (maʼlumotnoma).

13. Ariza va unga ilova hujjatlar topshirilganidan keyin, ariza beruvchi shaxs suratga olinib, shaxsga tegishli maʼlumotlar farqlash belgisi (beyjik) blankiga kiritiladi.

Tayyor boʻlgan farqlash belgisi (beyjik) blankasi jamiyatning xavfsizlik boʻlimi yoki mutaxassisi tomonidan shaxsning pasport nusxasi va boshqa hujjatlar bilan farqlash belgisi (beyjik)dagi maʼlumotlarni toʻgʻriligini tekshirib, qalbakilashtirishga qarshi himoya elementini qoʻyadi va farqlash belgisi (beyjik)ni roʻyxatga olish kitobiga kiritadi.

Farqlash belgisi (beyjik)ga himoya elementi qoʻyilganidan soʻng, jamiyat rahbari tomonidan imzolanib, muhr bilan tasdiqlanadi hamda plastik plyonka bilan qoplanib, qisqa muddatda arizachiga topshiriladi.

14. Farqlash belgisi (beyjik)ni olgan shaxs undan foydalanish, saqlash, qayta topshirish, yuqotmaslik, boshqa shaxslarga bermaslik va doimo koʻkragiga taqib yurishi lozimligi haqida ogohlantiriladi.

15. Bozor va savdo komplekslarining har bir kirish-chiqish joylarida farqlash belgisi (beyjik) berilishi va ulardan foydalanish tartibini tushuntiruvchi maʼlumotlar (eʼlonlar) oʻrnatiladi hamda radiotarmoq orqali oʻqib eshittirib turiladi.

16. Bozor yoki savdo kompleksi maʼmuriyati binosida, hududda faoliyat yurituvchi tadbirkorlar hamda xizmat koʻrsatuvchi ishchi, xodimlar uchun qulay boʻlgan joyda temir shkaf, stol va oʻrindiqlar hamda farqlash belgisini (beyjik) tayyorlash uchun kompyuter jihozi va fotosuratga olish moslamasi bilan jihozlangan alohida xona ajratiladi.

17. Farqlash belgisini (beyjik) olgan shaxsning arizasiga asosan, uning pasport yoki boshqa maʼlumotlari oʻzgargan yoxud farqlash belgisi (beyjik) yaroqsiz holga kelganida yoxud yoʻqotilganida, belgilangan muddatidan avval almashtiriladi.

18. Farqlash belgisini (beyjik) olgan shaxs oʻz faoliyatini toʻxtatganida, farqlash belgisini (beyjik) maʼmuriyatga qaytarishi lozim.

19. Farqlash belgisi (beyjik)dan foydalanish talablarini buzish, uni qalbakilashtirish qonun hujjatlarida belgilangan javobgarlikka tortishga asos boʻladi.