“Fuqarolarning banklardagi omonatlarini himoyalash kafolatlari to‘g‘risida”gi O‘zbekiston Respublikasi Qonunini bajarish yuzasidan Vazirlar Mahkamasi qaror qiladi:

1. Fuqarolarning banklardagi omonatlarini kafolatlash fondi tashkil etilsin.

Belgilab qo‘yilsinki:

Fuqarolarning banklardagi omonatlarini kafolatlash fondi yuridik shaxs hisoblanadi va banklar bilan tuzilgan yozma bitimlar asosida faoliyat ko‘rsatadi;

Fuqarolarning banklardagi omonatlarini kafolatlash fondining mol-mulki banklarning majburiy badallari, mablag‘larni joylashtirishdan olingan daromadlar, shuningdek qonunchilikka muvofiq boshqa tushumlar hisobiga shakllantiriladi.

2. Quyidagilar:

Fuqarolarning banklardagi omonatlarini kafolatlash fondi to‘g‘risidagi Nizom 1-ilovaga muvofiq;

Fuqarolarning banklardagi omonatlarini kafolatlash fondi kuzatuv kengashining shaxsiy tarkibi 2-ilovaga* muvofiq tasdiqlansin.

Belgilansinki, Fuqarolarning banklardagi omonatlarini kafolatlash fondining kuzatuv kengashi a’zolari boshqa ishga o‘tgan taqdirda ularning lavozimiga yangidan tayinlangan shaxslar uning tarkibiga kiritiladi.

3. Fuqarolarning banklardagi omonatlarini kafolatlash fondi ijro etuvchi organining tuzilmasi shtatdagi xodimlarining cheklangan soni 5 nafardan iborat bo‘lgan holda (xizmat ko‘rsatuvchi xodimlardan tashqari) 3-ilovaga muvofiq ma’qullansin.

4. Fuqarolarning banklardagi omonatlarini kafolatlash fondi ikki oy muddatda tijorat banklari bilan tegishli yozma bitimlar tuzilishini ta’minlasin.

Belgilansinki, yangidan tashkil etiladigan tijorat banklari Fuqarolarning banklardagi omonatlarini kafolatlash fondi bilan bank operatsiyalari o‘tkazish huquqini beruvchi litsenziya olingan kundan boshlab bir oydan kechikmay yozma bitimlar tuzishlari shart.

5. Fuqarolarning banklardagi omonatlarini kafolatlash fondining kuzatuv kengashi O‘zbekiston Respublikasi Markaziy banki bilan birgalikda bir oy muddatda:

tijorat banklari tomonidan Fuqarolarning banklardagi omonatlarini kafolatlash fondiga majburiy badallar to‘lash va ma’lumotlar taqdim etish tartibini tasdiqlasin;

Fuqarolarning banklardagi omonatlarini kafolatlash fondi ijro etuvchi organini joylashtirish, uni o‘z funksiyalarini bajarish uchun zarur texnika va aloqa vositalari bilan jihozlash chora-tadbirlarini ko‘rsin.

6. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari R.S. Azimov va O‘zbekiston Respublikasi Markaziy banki raisi F.M. Mullajonov zimmasiga yuklansin.

1. Fuqarolarning banklardagi omonatlarini kafolatlash fondi (bundan buyon matnda “Fond” deb yuritiladi) O‘zbekiston Respublikasi fuqarolari, chet ellik fuqarolar va fuqaroligi bo‘lmagan shaxslarning (bundan buyon matnda “fuqarolar” deb yuritiladi) O‘zbekiston Respublikasi banklaridagi omonatlarini himoyalashni ta’minlash maqsadida “Fuqarolarning banklardagi omonatlarini himoyalash kafolatlari to‘g‘risida”gi O‘zbekiston Respublikasi Qonuniga muvofiq tashkil etilgan.

2. Fond o‘z faoliyatida “Banklar va bank faoliyati to‘g‘risida”, “Fuqarolarning banklardagi omonatlarini himoyalash kafolatlari to‘g‘risida”gi O‘zbekiston Respublikasi qonunlariga, boshqa qonunchilik hujjatlariga, shuningdek mazkur Nizomga amal qiladi.

3. Fond yuridik shaxs hisoblanadi, o‘z balansiga, o‘z ramzi tasviri tushirilgan va nomi yozilgan muhrga, shtamplarga, blankalarga egadir.

4. Fondning ustav sarmoyasi tijorat banklarining bir yo‘la to‘lanadigan majburiy badallari hisobiga shakllantiriladi.

5. Fond o‘z majburiyatlari bo‘yicha o‘zining butun mol-mulki bilan javob beradi.

6. Fondning mol-mulki banklarning majburiy badallari, mablag‘lar qo‘yishdan olingan daromadlar, shuningdek qonunchilikka muvofiq boshqa tushumlar hisobiga shakllantiriladi.

7. Bir yo‘la to‘lanadigan va kalendar badallar banklarning Fondga to‘laydigan majburiy badallari hisoblanadi.

Bankning Fondga bir yo‘la to‘laydigan badali bankning amalda shakllangan ustav sarmoyasi miqdorining 0,1 foizini tashkil etadi.

Kalendar badal banklar tomonidan yilning har choragida Fondga o‘tkaziladigan pul mablag‘laridan iborat bo‘ladi. Kalendar badallarning miqdori “Fuqarolarning banklardagi omonatlarini himoyalash kafolatlari to‘g‘risida”gi O‘zbekiston Respublikasi Qonuniga muvofiq kafolatlanishi lozim bo‘lgan fuqarolar omonatlarining amaldagi qoldig‘iga qarab yil choragi uchun Fondning kuzatuv kengashi tomonidan belgilangan miqdorda belgilanadi, biroq u omonatlar umumiy summasining 0,5 foizidan ko‘p bo‘lmasligi kerak.

8. To‘langan kalendar badallar summasi bankdagi omonatlar qoldiqlari umumiy summasining 5 foiziga yetganda banklar tomonidan kalendar badallarni to‘lash to‘xtatiladi. Fuqarolarning bankdagi omonatlari qoldiqlari umumiy summasi o‘zgarganda, Fondga to‘langan kalendar badallarining summasi qayta hisoblab chiqilishi kerak.

9. Fondning pul mablag‘lari O‘zbekiston Respublikasi Markaziy bankida saqlanadi.

10. “Fuqarolarning banklardagi omonatlarini himoyalash kafolatlari to‘g‘risida”gi O‘zbekiston Respublikasi Qonunida nazarda tutilgan shartlarda va hajmda bank operatsiyalarini amalga oshirish huquqi uchun bank litsenziyasi O‘zbekiston Respublikasi Markaziy banki tomonidan chaqirib olingan taqdirda fuqarolarning banklardagi omonatlari bo‘yicha kafolatli haq to‘lash Fond faoliyatining maqsadi hisoblanadi.

11. Fuqarolarning banklardagi omonatlari bo‘yicha Fond tomonidan kafolatli haq to‘lanishi bank qayta tashkil etilishi munosabati bilan litsenziya chaqirib olingan taqdirda joriy etilmaydi.

12. Quyidagilar Fond faoliyatining asosiy yo‘nalishlari hisoblanadi:

fuqarolarning omonatlari bo‘yicha haq to‘lanishini ta’minlash uchun banklarning majburiy badallarini jamlash;

jamlangan mablag‘lardan mazkur Nizomda belgilangan maqsadlar va tartibda foydalanish.

13. Fond quyidagilarga haqli:

banklardan fuqarolarning banklardagi kafolatlanadigan omonatlarining soni va miqdorlari to‘g‘risidagi ma’lumotlarni olish;

o‘z mablag‘larini davlat qimmatbaho qog‘ozlariga va boshqa aktivlarga joylashtirish.

Fond qonunchilikka muvofiq boshqa huquqlarga ega bo‘lishi mumkin.

14. Fond mablag‘larini joylashtirish bo‘yicha barcha operatsiyalar Fondning kuzatuv kengashi qarori bo‘yicha, u har yili tasdiqlaydigan Fond budjeti doirasida amalga oshiriladi.

15. Fondning moliyaviy yordam ko‘rsatish va xayriya faoliyati bilan shug‘ullanishi, shuningdek yuridik shaxslarning muassisi bo‘lishi mumkin emas.

16. Fond quyidagilarga majbur:

o‘z mablag‘laridan samarali foydalanishni ta’minlash;

Fond mablag‘laridan maqsadli foydalanilishi ustidan nazoratni amalga oshirish;

qatnashchi banklar ro‘yxatini ommaviy axborot vositalarida muntazam ravishda e’lon qilish.

17. Fondni boshqarish Fondning kuzatuv kengashi va Fondning ijro etuvchi organi tomonidan amalga oshiriladi.

18. Fondning kuzatuv kengashi Fond faoliyatiga umumiy rahbarlikni amalga oshiradi.

Fond kuzatuv kengashining shaxsiy tarkibi O‘zbekiston Respublikasi Vazirlar Mahkamasi tomonidan tasdiqlanadi.

19. Fondning kuzatuv kengashi vakolatiga quyidagilar kiradi:

banklarning kalendar badallari stavkalarini, ularni to‘lash hisob-kitobi tartibi va muddatlarini tasdiqlash;

fuqarolarning banklardagi omonatlari bo‘yicha haq to‘lash to‘g‘risida qarorlar qabul qilish;

O‘zbekiston Respublikasi Markaziy banki bilan kelishgan holda agent bankni tanlash;

Fond mablag‘larini davlat qimmatbaho qog‘ozlariga va boshqa aktivlarga joylashtirish bo‘yicha qarorlar qabul qilish;

Fond mablag‘laridan foydalanish tartibini, shu jumladan joriy faoliyat uchun xarajatlar smetasini tasdiqlash;

Fondning ijro etuvchi organini shakllantirish va uning faoliyatini nazorat qilish;

auditor tashkilotni belgilash;

qonunchilikka muvofiq boshqa vakolatlarni amalga oshirish.

20. Fond kuzatuv kengashi majlislari uning raisi yoki kuzatuv kengashi a’zolarining kamida uchdan bir qismi tomonidan zaruratga qarab, lekin har chorakda kamida bir marta chaqiriladi.

21. Fondning kuzatuv kengashi agar majlisda a’zolarining kamida uchdan ikki qismi qatnashsa qaror qabul qilishga haqli. Fond kuzatuv kengashi qarorlari ular uchun qatnashganlarning kamida uchdan ikki qismi yoqlab ovoz bergan taqdirda qabul qilinadi. Ovozlar soni teng bo‘lgan taqdirda Fond kuzatuv kengashi raisining ovozi hal qiluvchi hisoblandi.

22. Fond direksiyasi Fondning ijro etuvchi organi hisoblanadi, u joriy rahbarlikni amalga oshiradi va Fond faoliyati uchun javob beradi. Fond direksiyasi tarkibiga direktor, direktor o‘rinbosari va bosh buxgalter kiradi.

23. Fond direksiyasi:

banklar tomonidan bir yo‘la va kalendar badallarning o‘z vaqtida to‘liq o‘tkazilishini nazorat qiladi;

fuqarolarning omonatlari bo‘yicha haq to‘lash tadbirlarini amalga oshiradi;

joriy faoliyat uchun xarajatlar smetasi to‘g‘risidagi takliflarni Fond kuzatuv kengashiga tasdiqlash uchun kiritadi;

qonunchilikka muvofiq boshqa vakolatlarni amalga oshiradi.

24. Fond direktori:

Fondning joriy faoliyatini tashkil qiladi va unga yuklangan vazifalarning bajarilishi uchun javob beradi;

Fond xodimlarini ishga qabul qiladi va ishdan bo‘shatadi;

davlat organlarida,boshqa muassasalarda, shu jumladan xorijiy davlatlar muassasalarida, shuningdek xalqaro tashkilotlarda Fond nomidan vakillik qiladi;

ishonchnomasiz Fond nomidan ish ko‘radi;

lavozim yo‘riqnomalarini va Fondning boshqa ichki hujjatlarini tasdiqlaydi;

Fond nomidan da’volar bildiradi;

Fond xodimlarining bajarishi majburiy bo‘lgan buyruqlar va farmoyishlar chiqaradi;

ushbu Nizomga va amaldagi qonunchilikka muvofiq boshqa masalalar bo‘yicha qarorlar qabul qiladi.

Fond direktori Fondning kuzatuv kengashi majlislarida maslahat ovozi bilan qatnashadi.

25. Bank Fond bilan yozma bitim tuzish uchun fuqarolarning bankdagi kafolatlanishi lozim bo‘lgan omonatlarining soni va qoldiqlari miqdorlari to‘g‘risidagi ma’lumotlarni ko‘rsatgan holda Fondning kuzatuv kengashiga murojaat qiladi.

26. Fond kafolatnomasi bank Fond bilan yozma bitim tuzgan vaqtdan boshlab kuchga kiradi.

27. Bank yozma bitim tuzilgandan keyin uch kalendar kundan kechikmay bir yo‘la to‘lanadigan badalni Fondga o‘tkazishi shart.

28.Fond O‘zbekiston Respublikasi Markaziy bankini tuzilgan yozma bitimlar va bir yo‘la to‘lanadigan badallar banklar tomonidan Fondga to‘langani to‘g‘risida xabardor qiladi.

29. Fond bilan yozma bitimlar tuzgan banklar reyestri ommaviy axborot vositalarida muntazam ravishda e’lon qilib boriladi.

30. Banklar:

bank nomiga o‘zgartirishlar kiritilganda;

bank qayta tashkil etilganda Fondni yozma ravishda xabardor qilishi shart.

31. Fond bilan yozma bitim tuzgan bank nomi o‘zgargan taqdirda bankdan qayta ro‘yxatdan o‘tkazilganini va litsenziyaning qayta rasmiylashtirilganini tasdiqlovchi hujjatlar olingan vaqtdan boshlab o‘n ish kuni mobaynida reyestrga tegishli o‘zgartirishlar kiritiladi.

32. Qayta tashkil etish natijasida yangi paydo bo‘lgan bank O‘zbekiston Respublikasi Markaziy bankida ro‘yxatdan o‘tkazilgan kunidan boshlab uch ish kuni mobaynida Fond bilan yozma bitim tuzishi shart.

33. Bank qayta tashkil etilganda yoki belgilangan tartibda tugatilganda Fond oldidagi barcha majburiyatlarini bajargandan keyin Fond bilan yozma bitim tuzgan banklar reyestridan chiqariladi.

34. Bankni Fond bilan yozma bitim tuzgan banklar reyestridan chiqarish Fondning kuzatuv kengashi qarori bo‘yicha amalga oshiriladi.

35. Bankning Fond bilan yozma bitim tuzgan banklar reyestridan chiqarilganligi to‘g‘risidagi xabarnoma u reyestrdan chiqarilgan vaqtdan boshlab uch kun mobaynida matbuotda e’lon qilinadi.

36. Fondni tugatish va qayta tashkil etish O‘zbekiston Respublikasi qonunchiligiga muvofiq amalga oshiriladi.