Qayd etilsinki, aksiyadorlik jamiyatlariga strategik xorijiy investorlarni jalb etish, ishlab chiqarishni modernizatsiyalash va texnologik jihatdan yangilashda, raqobatbardoshli mahsulotlarni ishlab chiqarishni oʻzlashtirishda va tashqi bozorlarga kiritishda ularning faol ishtirokini taʼminlash chora-tadbirlarini amalga oshirish, shuningdek korxonalarda korporativ boshqaruvning zamonaviy metodlarini joriy etish natijasida davlat ulushiga ega boʻlgan aksiyadorlik jamiyatlari soni 2015-yilga nisbatan 1,7 baravar qisqardi.

Shu bilan birga, xorijiy investitsiyalarni jalb etish uchun istiqbolli boʻlgan 17 ta aksiyadorlik jamiyatida ular rahbarlarining harakatsizligi hamda menejmentning samarali tashkil etilmaganligi oqibatida xorijiy investorlarni jalb etishning belgilangan tarmoq jadvallari barbod qilindi.

Oʻzbekiston Respublikasi Prezidentining “Aksiyadorlik jamiyatlariga xorijiy investorlarni jalb etishga doir qoʻshimcha chora-tadbirlar toʻgʻrisida” 2015-yil 21-dekabrdagi PQ-2454-son qarori talablari soʻzsiz bajarilishini taʼminlash, shuningdek aksiyadorlik jamiyatlarining ustav kapitallarida davlat aktivlari va ulushlarini yanada qisqartirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki, aksiyadorlik jamiyatlariga xorijiy investorlarni jalb etish yuzasidan qabul qilingan qarorlarning amalga oshirilishi Vazirlar Mahkamasida tanqidiy koʻrib chiqilishi yakunlariga koʻra:

xorijiy investorlarni jalb etish yuzasidan belgilangan tarmoq jadvallarining bajarilishiga masʼuliyatsizlik bilan yondashgan hamda zamonaviy talablarga muvofiq ishlashga qodir boʻlmagan “Gidromaxsusqurilish” AJ (A.S. Radjabov), “Xovrenko nomidagi Samarqand vino kombinati” AJ (M. Nematov), “Toshkent qishloq xoʻjaligi texnikasi zavodi” AJ (B.B. Ishmetov), “Agregat zavodi” AJ (R.R. Raximov), “Oʻzneftgazmash” AJ (F.F. Yunusov), “Namangan ulgurji savdo” AJ (T.K. Abbosov), “Chimboymoy” AJ (D. Nurimbetov) va “Oʻzneftgazqurilishinvest” AJ (A.A. Alimov) aksiyadorlik jamiyatlari rahbarlari egallab turgan lavozimidan ozod qilingan;

xorijiy investorlar bilan samarali ishlarni taʼminlamagan 9 ta aksiyadorlik jamiyati hamda ularning yuqori idoralari rahbarlariga nisbatan intizomiy jazo choralari koʻrilgan hamda ular xorijiy investitsiyalarni jalb etish yuzasidan qabul qilingan qarorlarning soʻzsiz bajarilishi uchun shaxsan masʼul ekanliklari toʻgʻrisida qatʼiy ogohlantirilgan;

17 ta aksiyadorlik jamiyatining har biri boʻyicha xorijiy investorlardan ularning aksiyadorlar tarkibiga kirishi yuzasidan aniq takliflar kiritishni nazarda tutuvchi qoʻshimcha chora-tadbirlar kompleksi va yangi tarmoq jadvallari ishlab chiqilgan.

2. Oʻzbekiston Respublikasi Xususiylashtirish, monopoliyadan chiqarish va raqobatni rivojlantirish davlat qoʻmitasi, Iqtisodiyot vazirligi, Moliya vazirligi, xoʻjalik boshqaruvi organlari va aksiyadorlik jamiyatlari boshqaruv organlarining:

1-ilovaga* muvofiq 26 ta aksiyadorlik jamiyatiga xorijiy investorlarni jalb etishning uzil-kesil muddatini 2016-yil 1-noyabrgacha etib belgilash toʻgʻrisidagi;

2-ilovaga* muvofiq 61 ta aksiyadorlik jamiyatiga 2016-yil 31-dekabrgacha xorijiy investorlarni jalb etish toʻgʻrisidagi;

xorijiy investorlarning 3-ilovaga* muvofiq aksiyadorlik jamiyatlarining ishlab chiqarish quvvatlari negizida 15 ta qoʻshma korxona tashkil qilishda ishtirok etishi toʻgʻrisidagi;

4-ilovaga* muvofiq aksiyadorlik jamiyatlari aksiyalari paketlarini va davlat aktivlarini tanlov asosida “nol” sotish qiymati boʻyicha, investorlar tomonidan investitsiya majburiyatlari qabul qilingan holda xususiy mulk etib sotish toʻgʻrisidagi takliflariga rozilik berilsin.

3. Belgilab qoʻyilsinki:

ushbu qarorga 1 va 2-ilovalarga* kiritilgan aksiyadorlik jamiyatlariga 2-bandda koʻrsatilgan muddatlarda xorijiy investorlar jalb etilmagan taqdirda ular boshqa tashkiliy-huquqiy shakllarda qayta tashkil etiladi;

belgilangan muddatlarda xorijiy investorlar jalb etilishini taʼminlamagan ushbu qarorga 1 va 2-ilovalarda* koʻrsatilgan aksiyadorlik jamiyatlari rahbarlariga nisbatan egallab turgan lavozimidan ozod etishgacha boʻlgan qatʼiy intizomiy jazo choralari qoʻllaniladi.

4. Oʻzbekiston Respublikasi Prezidentining 2015-yil 31-martdagi PQ-2327-son qarori bilan tashkil etilgan Aksiyadorlik jamiyatlari faoliyati samaradorligini oshirish va korporativ boshqaruv tizimini takomillashtirish komissiyasi:

ushbu qarorga 4-ilovaga* kiritilgan obyektlarni “nol” xarid qiymati boʻyicha sotish yuzasidan tanlovlar oʻtkazish jadvallarini bir oy muddatda tasdiqlasin;

5-ilovaga* muvofiq roʻyxat boʻyicha aksiyadorlik jamiyatlarining belgilangan tartibda yuridik shaxslarning boshqa tashkiliy-huquqiy shakllarida qayta tashkil etishni 2017-yil 1-yanvargacha boʻlgan muddatda taʼminlasin;

vazirliklar, idoralar, xoʻjalik birlashmalari va aksiyadorlik jamiyatlari rahbarlarining ushbu qarorga muvofiq aksiyadorlik jamiyatlari ustav kapitalidagi davlat aktivlari va ulushlarini xorijiy investorlarga sotish toʻgʻrisidagi hisobotlarini muntazam ravishda eshitsin.

5. Vazirlar Mahkamasi komplekslari, vazirliklar, idoralar, xoʻjalik birlashmalari rahbarlari:

ushbu qarorga 1 — 4-ilovalarda koʻrsatilgan idoraviy mansub aksiyadorlik jamiyatlariga xorijiy investorlarning oʻz vaqtida jalb etilishi yuzasidan tizimli ishlarni taʼminlasinlar va qatʼiy nazorat oʻrnatsinlar;

xoʻjalik boshqaruvi organlari va aksiyadorlik jamiyatlari rahbarlarining ular tomonidan amalga oshirilgan ishlar va koʻrilgan chora-tadbirlarning samaradorligi toʻgʻrisidagi hisobotlarini oʻn kun muddatda eshitsinlar, aksiyadorlik jamiyatlariga xorijiy investorlarni jalb etishning belgilangan muddatlari soʻzsiz bajarilishi boʻyicha kechiktirib boʻlmaydigan chora-tadbirlarni qoʻllasinlar.

6. Oʻzbekiston Respublikasi Hukumatining 6-ilovaga muvofiq ayrim qarorlariga oʻzgartirish va qoʻshimchalar kiritilsin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

1. Vazirlar Mahkamasining “Toshkent viloyatidagi qurilishi tugallanmagan obyekt negizida zamonaviy toʻqimachilik ishlab chiqarishini tashkil etish chora-tadbirlari toʻgʻrisida” 2010-yil 18-noyabrdagi 252-son qarorining 2-bandida:

uchinchi xatboshi quyidagi tahrirda bayon qilinsin:

“2011-2012-yillar mobaynida birinchi bosqichda 50,0 mln AQSh dollari miqdoriga teng summani, ikkinchi bosqichda 2013 — 2017-yillar mobaynida loyihaning tasdiqlangan TIA natijalari boʻyicha aniqlangan summa miqdorida investitsiyalash”;

beshinchi xatboshi quyidagi tahrirda bayon qilinsin:

“har yili 6,0 ming tonna ip-gazlama kalavasi, 7,5 mln kv. metr trikotaj gazlamalar va 5,0 mln dona tayyor tikuvchilik buyumlari ishlab chiqarish quvvatlari foydalanishga topshirilishini taʼminlash”.

2. Oʻzbekiston Respublikasi Vazirlar Mahkamasining “Oʻzbekiston Respublikasi Prezidentining “Aksiyadorlik jamiyatlariga xorijiy investorlarni jalb etishga doir qoʻshimcha chora-tadbirlar toʻgʻrisida” 2015-yil 21-dekabrdagi PQ-2454-son qarorini amalga oshirish chora-tadbirlari haqida” 2016-yil 10-fevraldagi 33-son qarorida:

a) Ustav kapitalidagi davlat ulushining kamida 15 foizi xorijiy investorlarga sotiladigan aksiyadorlik jamiyatlarining roʻyxatidan (1-ilova) “Oʻzmaxsusmontajqurilish” AK, “Oʻzagromashservis” uyushmasi”, “Oʻzbekyengilsanoat” AJ” satrlari hamda 1 — 4, 6, 10, 11, 14, 15, 17, 18, 20, 21 va 24-pozitsiyalar chiqarib tashlansin;

b) Ustav kapitalidagi kamida 15 foiz ulushi, shu jumladan qoʻshimcha aksiyalarni chiqarish yoʻli bilan, xorijiy investorlarga sotiladigan aksiyadorlik jamiyatlarining roʻyxatidan (2-ilova) 19-pozitsiya, “Oʻzkimyosanoat” AJ” satri hamda 29 — 37-pozitsiyalar chiqarib tashlansin;

v) Ishlab chiqarish va strategik xomashyoni dastlabki qayta ishlash sohasida faoliyatni amalga oshiruvchi aksiyadorlik jamiyatlarining, shuningdek tabiiy monopoliyalar subyektlarining hamda ijtimoiy ahamiyatga ega boʻlgan tovarlar va xizmatlarni tartibga solib boriladigan narxlar boʻyicha yetkazib beruvchilarning roʻyxatida (3-ilova):

1) “Xalq banki” ATB” boʻlimi quyidagi tahrirda bayon qilinsin:

2) “Sogʻliqni saqlash vazirligi” boʻlimidan keyin quyidagi mazmundagi boʻlim qoʻshilsin:

3) quyidagi mazmundagi 262¹ — pozitsiya qoʻshilsin: