O‘zbekiston Respublikasining “Ta’lim to‘g‘risida”gi Qonuniga muvofiq buyuraman:

1. Umumiy o‘rta ta’lim tashkilotining pedagogik kengashi to‘g‘risidagi namunaviy nizom ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran kuchga kiradi.

Mazkur Namunaviy nizom umumiy o‘rta ta’lim tashkiloti (bundan buyon matnda ta’lim tashkiloti deb yuritiladi) pedagogik kengashining maqsadi, asosiy vazifalari va uning faoliyatini tashkil qilish tartibini belgilaydi hamda pedagogik kengash to‘g‘risidagi nizomni ishlab chiqishda qo‘llaniladi.

1. Pedagogik kengash ta’lim tashkiloti faoliyatiga doir asosiy masalalar kollegial muhokama qilinadigan, ta’lim tashkilotida o‘quv-tarbiya jarayonini rivojlantirish, takomillashtirish, uning faoliyati bilan bog‘liq barcha tashkiliy masalalarni muvofiqlashtirish bo‘yicha doimiy faoliyat yuritadigan oliy organ hisoblanadi. Pedagogik kengashning faoliyati jamoatchilik asosida tashkil etiladi.

2. Mazkur Namunaviy nizom talablari barcha ta’lim tashkilotlariga nisbatan tatbiq etiladi.

3. Pedagogik kengash o‘z faoliyatida O‘zbekiston Respublikasining Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlariga, ushbu Nizomga, boshqa normativ-huquqiy hujjatlarga, shuningdek ta’lim tashkilotining ustaviga amal qiladi.

4. Pedagogik kengashning maqsadi ta’lim tashkilotida davlatning ta’lim siyosatini amalga oshirish, ta’lim tashkilotining maqsadi va vazifalaridan kelib chiqqan holda ta’lim-tarbiya jarayonini rivojlantirish, uni takomillashtirishda pedagogik jamoaning faoliyat yo‘nalishini belgilash, ta’limdagi yutuqlarni va ilg‘or pedagogik tajribalarni amaliyotga joriy etishda pedagogik jamoani birlashtirish, demokratiya, oshkoralik, o‘zini o‘zi boshqarish tamoyillari asosida ta’lim tashkiloti boshqaruvini amalga oshirishdan iborat.

5. Pedagogik kengashning asosiy vazifalari quyidagilardan iborat:

ta’lim tashkiloti pedagogik jamoasining faoliyatini o‘quvchilarning egallashi lozim bo‘lgan bilim, ko‘nikma va malakalarini ta’minlashga, o‘quvchilarga ta’lim-tarbiya berish sifatini oshirishga yo‘naltirish;

o‘quv va darsdan tashqari mashg‘ulotlar dasturlarini muhokama qilish va tasdiqlash;

ta’lim tashkilotining kuzatuv kengashi hamda pedagog xodimlarining yo‘nalishlar bo‘yicha axborotlari va hisobotlarini eshitish, ta’lim tashkilotining sanitariya-gigiyenik holati, yong‘inga qarshi amalga oshiriladigan ishlar, mehnatni muhofaza qilish, o‘quvchilarning sog‘lig‘i va hayotiga oid hamda boshqa masalalarni muhokama qilish va yakuniy xulosa berish;

yangi o‘quv yili boshlanishiga qadar ta’lim tashkiloti huzuridagi ishchi guruhning Umumiy o‘rta ta’lim tashkilotining o‘rnak ko‘rsatgan xodimlarini rag‘batlantirishning direktor jamg‘armasi hisobidan pedagog xodimlarning bazaviy lavozim maoshlariga ustamalar belgilash to‘g‘risidagi qarori yuzasidan axborotini eshitish;

bosqichli nazorat va yakuniy davlat attestatsiyasini o‘tkazish, o‘quvchilarni sinfdan yuqori sinfga o‘tkazish, yakuniy davlat attestatsiyasiga ruxsat berish, shu jumladan eksternlarni attestatsiyaga qo‘yish, bitiruvchilarga o‘qishni bitirganlik to‘g‘risida hujjatlarni, shu jumladan ularning dublikatini berish, a’lo ko‘rsatkichlarga va namunali xulqqa ega bo‘lgan o‘quvchilarni rag‘batlantirish yuzasidan qarorlar qabul qilish;

ixtisoslashtirilgan fandan qo‘shimcha yakuniy attestatsiya kiritish masalasini ko‘rib chiqish (ayrim fanlar chuqur o‘rganiladigan davlat ixtisoslashtirilgan ta’lim tashkilotlarida);

o‘quvchilarga ta’lim berishda o‘qitishning ilg‘or pedagogik va axborot-kommunikatsion texnologiyalaridan foydalanishni tatbiq etish choralarini ko‘rish;

o‘quvchilarni yuksak ma’naviy-axloqiy, umuminsoniy va milliy ruhda, o‘z Vatani, xalqini ardoqlovchi, tinchlik va barqarorlikka qaratilgan milliy qadriyatlar asosida tarbiyalash yuzasidan tavsiyalar ishlab chiqish va joriy etish;

ta’lim tashkilotida ta’lim-tarbiya jarayonini tashkil etish va ta’lim samaradorligini oshirish bo‘yicha maqbul shart-sharoitlar yaratishga qaratilgan qarorlar qabul qilish;

fuqarolarning o‘zini o‘zi boshqarish organlari iltimosnomasiga va ota-onalar qo‘mitasining xulosasiga asosan darsliklar to‘plami bilan bepul ta’minlanadigan ijtimoiy yordamga muhtoj oilalardagi o‘quvchilar ro‘yxatini tasdiqlash;

ilg‘or o‘qituvchilarning ish tajribalarini o‘rganish, ommalashtirish, ularni davlat mukofotlariga tavsiya etish, yosh o‘qituvchilarga metodik yordam ko‘rsatish ishlarini tashkil etish;

o‘quv-tarbiya jarayonini tashkil etishda va ta’lim samaradorligini oshirishda maqbul shart-sharoitlar yaratishga oid pedagogik jamoaning ma’lum yo‘nalishlardagi faoliyatini tahlil qilish va yakuniy xulosa chiqarish;

ta’lim tashkiloti jamoasi uchun o‘z vakolati doirasida me’yoriy talablarni ishlab chiqish, tasdiqlash va bajarilishini nazorat qilish;

o‘quvchilarni O‘zbekiston Respublikasi Sog‘liqni saqlash vazirligining tegishli muassasasiga o‘tkazish haqida qaror qabul qilish (imkoniyati cheklangan bolalar uchun ixtisoslashtirilgan davlat ta’lim tashkilotlarida);

o‘z sinfdoshlariga nisbatan uch va undan ortiq katta yosh farqi bo‘lgan psixik rivojlanishi sust yoki aqli zaif bolalarni bir sinf yuqoriga ko‘chirish yuzasidan tegishli qaror qabul qilish (imkoniyati cheklangan bolalar uchun ixtisoslashtirilgan davlat ta’lim tashkilotlarida);

alohida sharoitlarda ta’minlash, tarbiyalash va ta’lim berishga muhtoj bolalar uchun ixtisoslashtirilgan maktab tarbiyalanuvchilarining mazkur ta’lim tashkilotida bo‘lish muddati bilan bog‘liq masalalarni ko‘rib chiqish (alohida sharoitlarda ta’minlash, tarbiyalash va ta’lim berishga muhtoj bolalar uchun ixtisoslashtirilgan maktablarda);

Mehribonlik uyi rahbari ishtirokida ushbu tashkilot tarbiyalanuvchisining o‘qishi har bir bosqichda qancha davom etishi to‘g‘risida xulosa qabul qilish (Mehribonlik uyi tarbiyalanuvchilari o‘qiyotgan ta’lim tashkilotlarida).

Pedagogik kengashga qonunchilik hujjatlariga muvofiq boshqa vazifalar ham yuklatilishi mumkin.

6. Pedagogik kengash tarkibi ta’lim tashkiloti direktori, direktor o‘rinbosarlari va pedagog xodimlardan iborat bo‘ladi. Ta’lim tashkilotining har bir pedagog xodimi ishga qabul qilingan paytdan boshlab pedagogik kengashning a’zosi hisoblanadi.

7. Pedagogik kengashda muhokama qilinadigan masalalarning mazmunidan kelib chiqib, yig‘ilishga tegishli tuman (shahar) maktabgacha va maktab ta’limi bo‘limi, tashkilotning ota-onalar qo‘mitasi, fuqarolarning o‘zini o‘zi boshqarish organi, mahalliy ijro etuvchi hokimiyat organlari, huquqni muhofaza qiluvchi organlar va boshqa tashkilotlar vakillari taklif qilinishi mumkin.

8. Ta’lim tashkiloti direktori pedagogik kengash raisi hisoblanadi. Pedagogik kengash kotibi pedagog xodimlar orasidan tayinlanadi.

Pedagogik kengash raisi o‘z vazifasini bajara olmaydigan (kasal bo‘lgan, xizmat safariga ketgan va hokazo) holatlarda uning vazifalari direktorning o‘quv ishlari bo‘yicha o‘rinbosari tomonidan amalga oshiriladi.

9. Pedagogik kengashning faoliyati tegishli tuman (shahar) maktabgacha va maktab ta’limi bo‘limi (bo‘ysunuviga ko‘ra yuqori turuvchi tashkilot) tomonidan nazorat qilinadi.

10. Pedagogik kengash faoliyati yillik ish reja asosida tashkil etiladi. Ish reja pedagogik kengash yig‘ilishida ko‘rib chiqilib, ma’qullanganidan so‘ng ta’lim tashkiloti direktori tomonidan tasdiqlanadi.

11. Pedagogik kengash yig‘ilishida ta’lim tashkilotining faoliyatiga oid eng muhim va dolzarb masalalar muhokama qilinadi.

12. Pedagogik kengash yig‘ilishi har chorakda kamida bir marta o‘tkaziladi. Zaruratga ko‘ra, navbatdan tashqari yig‘ilishlar o‘tkazilishi mumkin.

Pedagogik kengash yig‘ilishi bayonnomasi kengash kotibi tomonidan yuritiladi. Bayonnoma pedagogik kengash raisi va kotibi tomonidan imzolanadi.

Pedagogik kengash bayonnomasi elektron shaklda (matn ko‘rinishida) tayyorlanib, yig‘majildlarga (reyestr) tikib boriladi.

13. Bayonnomaning kirish qismida pedagogik kengash yig‘ilishi o‘tkazilgan sana, bayonnoma tartib raqami, ishtirok etganlar va ularning soni yoziladi.

Pedagogik kengash yig‘ilishi bayonnomasi matnida kun tartibiga kiritilgan masala muhokamasi, pedagogik kengash a’zolari tomonidan kiritilgan taklif va mulohazalar hamda kun tartibidagi har bir masala yuzasidan qabul qilingan qarorlar qayd etib boriladi.

Pedagogik kengash yig‘ilishi bayonnomalarini raqamlash har o‘quv yili boshida (avgust oyida) yangidan boshlanadi.

14. Pedagogik kengashning yig‘ilishlari, agar ularda barcha kengash a’zolari umumiy sonining kamida uchdan ikki qismi, navbatdan tashqari yig‘ilishda esa uchdan bir qismi ishtirok etayotgan bo‘lsa, vakolatli hisoblanadi.

15. Pedagogik kengash qarorlarini qabul qilish ochiq ovoz berish orqali amalga oshiriladi.

Pedagogik kengash qarori uning yig‘ilishida ishtirok etgan a’zolari umumiy sonining oddiy ko‘pchilik ovozi bilan qabul qilinadi. Ovozlar teng bo‘lib qolgan taqdirda pedagogik kengash raisi hal qiluvchi ovozga ega bo‘ladi.

16. Pedagogik kengash yig‘ilishini o‘tkazish vaqti, joyi va kun tartibi bir hafta oldin e’lon qilinadi.

17. Pedagogik kengash yig‘ilishida muhokama qilinadigan masalalar bo‘yicha materiallar doimiy yoki vaqtincha tashkil etilgan guruhlar yoxud tegishli pedagog xodimlar tomonidan tayyorlanadi.

18. Pedagogik kengash quyidagi huquqlarga ega:

ta’lim tashkilotining o‘quv jarayonini takomillashtirish va moddiy-texnik bazasini mustahkamlash bo‘yicha qarorlar qabul qilish;

o‘quv yili yakunida o‘quvchilarni keyingi sinfga ko‘chirish yoki sinfda qoldirish masalalarini hal etish;

o‘quv, ma’naviy-ma’rifiy, ilmiy-metodik va tajriba-sinov ishlarida faol ishtirok etgan pedagog xodimlarni moddiy rag‘batlantirish yuzasidan ta’lim tashkiloti huzuridagi ishchi guruhga taklif kiritish;

pedagog xodimlar orasidan ta’lim tashkiloti huzuridagi ishchi guruhning kamida ikki nafar a’zosini tayinlash;

pedagog xodimning malaka toifasini oshirish bo‘yicha tavsiya berish;

fan olimpiadalari, tanlovlar va turli musobaqalarda qatnashish uchun o‘qituvchilar va o‘quvchilar nomzodini tavsiya etish;

ta’lim tashkilotida o‘quv jarayonini takomillashtirish bo‘yicha choralar ko‘rish;

ta’lim tashkilotining istiqbol rejasini belgilash.

Pedagogik kengash qonunchilik hujjatlariga hamda o‘z vazifalariga muvofiq boshqa huquqlarga ham ega bo‘lishi mumkin.

19. Pedagogik kengash quyidagilarga majbur:

ta’lim tashkiloti ish rejasi bajarilishini ta’minlash;

pedagog xodimlar va o‘quvchilarning huquqlari va qonuniy manfaatlarini himoya qilish;

ta’lim tashkilotining faoliyatiga oid eng muhim va dolzarb masalalarni muhokama qilish;

har chorakda ta’lim tashkiloti metodik kengashining faoliyatiga doir hisobotini ko‘rib chiqish;

ta’lim-tarbiya sifatini yanada yaxshilash bo‘yicha berilgan har qanday taklifni qabul qilish va ko‘rib chiqish;

dars mashg‘ulotlari o‘quv rejasini o‘quvchilar tomonidan o‘zlashtirishga qulay bo‘lishi nuqtai nazaridan takomillashtirish;

ta’lim-tarbiyaga oid munozarali masalalarni muhokama qilish va yakuniy qaror qabul qilish;

zamonaviy axborot-kommunikatsion texnologiyalarni joriy etish bo‘yicha pedagogik izlanishlarni va ijodiy tashabbuskorliklarni qo‘llab-quvvatlash;

o‘quv jarayonini samarali tashkil qilishning turli shakl va uslublarini muhokama qilish va amaliyotga tatbiq etish;

pedagog xodimlarga umumiy o‘rta ta’limga oid normativ-huquqiy va metodik hujjatlarning yetkazilishi va tushuntirish ishlarining olib borilishini nazorat qilish.

Pedagogik kengash qonunchilik hujjatlariga hamda o‘z vazifalariga muvofiq boshqa majburiyatlarga ham ega bo‘lishi mumkin.

20. Ta’lim tashkilotida pedagogik kengash faoliyatiga oid quyidagi hujjatlar bo‘lishi lozim:

tuman (shahar) maktabgacha va maktab ta’limi bo‘limining (bo‘ysunuviga ko‘ra yuqori turuvchi tashkilotning) buyrug‘i bilan tasdiqlangan Umumiy o‘rta ta’lim tashkilotining pedagogik kengashi to‘g‘risidagi nizom;

pedagogik kengashning tasdiqlangan ish rejasi;

pedagogik kengash bayonnomasi yig‘majildlari (reyestri);

pedagogik kengash yig‘ilishi bayonnomalari;

pedagogik kengash yig‘ilishida muhokama qilingan masalalar yuzasidan tahliliy materiallar.

21. Pedagogik kengash hujjatlarining saqlanishiga pedagogik kengash raisi va kotibi javobgar hisoblanadi.

Pedagogik kengash yig‘ilishi bayonnomalari doimiy, tayyorlangan tahliliy materiallar va hujjatlar esa uch yil mobaynida saqlanadi hamda tegishli arxivga topshiriladi.

22. Pedagogik kengash qarorlarini bajarish ta’lim tashkilotining har bir xodimi uchun majburiy bo‘lib, qarorlar ijrosining umumiy nazorati pedagogik kengash raisi tomonidan amalga oshiriladi.

23. Mazkur Namunaviy nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladi.