Oʻzbekiston Respublikasi Prezidentining 2016-yil 9-fevraldagi PQ-2487-son “Sogʻlom ona va bola yili” Davlat dasturi toʻgʻrisida”gi qaroriga asosan Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Mehnat vazirligi, Xalq taʼlimi vazirligi qaror qiladi:

1. Yetim va ota-ona qaramogʻidan mahrum boʻlgan, toʻliq davlat taʼminotida boʻlmagan oʻrta maxsus, kasb-hunar taʼlimi muassasalari bitiruvchilarini “Mahalla” xayriya jamoat fondi tomonidan tanlab olish hamda ularga nafaqa toʻlash tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2016-yil 9-fevraldagi PQ-2487-son “Sogʻlom ona va bola yili” Davlat dasturi toʻgʻrisida”gi qaroriga muvofiq, yetim va ota-ona qaramogʻidan mahrum boʻlgan, toʻliq davlat taʼminotida boʻlmagan oʻrta maxsus, kasb-hunar taʼlimi muassasalari bitiruvchilarini (bundan buyon matnda bitiruvchi deb yuritiladi) “Mahalla” xayriya jamoat fondi tomonidan tanlab olish hamda ularga nafaqa toʻlash tartibini belgilaydi.

1. Quyidagi toifadagi bitiruvchilar mazkur Nizomda belgilangan tartibda “Mahalla” xayriya jamoat fondi mablagʻlari hisobiga toʻlanadigan eng kam oylik ish haqining yigirma baravari miqdorida bir yoʻla nafaqa (bundan buyon matnda nafaqa deb yuritiladi) olish uchun murojaat qilish huquqiga ega:

yetim bolalar — otasi ham, onasi ham vafot etgan yoki ular sud qaroriga binoan vafot etgan deb eʼlon qilingan bolalar;

ota-ona qaramogʻidan mahrum boʻlgan bolalar — ota-onasi ota-onalik huquqidan mahrum etilgan, ularning ota-onalik huquqi cheklangan, ular muomalaga layoqatsiz deb topilgan, kasal boʻlgan, uzoq muddat boʻlmagan, ota-ona bolalarni tarbiyalash yoki ularning huquq va manfaatlarini himoya qilishdan boʻyin tovlagan, shu jumladan ota-ona tarbiya, davolash, aholini ijtimoiy himoyalash muassasalari va shunga oʻxshash boshqa muassasalardagi bolasini olishdan bosh tortgan, shuningdek boshqa sabablarga koʻra ota-ona qaramogʻidan mahrum boʻlgan bolalar.

Bunda bitiruvchi oʻrta maxsus, kasb-hunar taʼlimi muassasasida oʻqish davrida yetim bolalar va ota-ona qaramogʻidan mahrum boʻlgan bolalar uchun moʻljallangan muassasalarga joylashtirilmagan va boshqa qonuniy vakillari — vasiysi, homiysi, tutingan ota-onasi (patronat) qaramogʻida turgan boʻlishi lozim.

2. Mazkur Nizom oʻrta maxsus, kasb-hunar taʼlimi muassasasida oʻqish davrida toʻliq davlat taʼminotida boʻlgan bolalarga nisbatan tatbiq etilmaydi.

3. Nafaqa bitta bitiruvchiga faqat bir marta, yaʼni oʻrta maxsus, kasb-hunar taʼlimi muassasasini bitirib, ishga joylashganida beriladi.

4. “Mahalla” xayriya jamoat fondi 2015/2016 oʻquv yilidan boshlab muntazam ravishda bitiruvchilarga nafaqa toʻlash uchun mablagʻlar ajratishni rejalashtiradi. Nafaqa toʻlash uchun ajratiladigan mablagʻlar miqdori “Mahalla” xayriya jamoat fondining Vasiylik kengashi tomonidan tasdiqlanadi.

5. Bitiruvchi nafaqa olish uchun oʻrta maxsus, kasb-hunar taʼlimi muassasasini bitirib, ishga joylashgandan keyin oʻzi tamomlagan oʻrta maxsus, kasb-hunar taʼlimi muassasasi direktoriga nafaqa berilishini soʻrab ariza bilan murojaat qiladi. Arizaga quyidagi hujjatlar ilova qilinadi:

tugʻilganlik haqida guvohnoma (asli koʻrsatilgan holda nusxasi taqdim etiladi);

fuqarolik pasporti (asli koʻrsatilgan holda nusxasi taqdim etiladi);

oʻrta maxsus va kasb-hunar maʼlumoti toʻgʻrisida diplom (asli koʻrsatilgan holda nusxasi taqdim etiladi);

vasiy yoki homiy tayinlash haqida tuman (shahar) hokimi qarorining yoki bolani oilaga tarbiyaga olish (patronat) toʻgʻrisidagi kelishuvning nusxasi;

doimiy yashash joyidagi fuqarolarning oʻzini oʻzi boshqarish organi tomonidan berilgan bitiruvchining oilaviy va mulkiy ahvoli haqida maʼlumotnoma;

soliq toʻlovchining identifikatsiya raqami (STIR);

mehnat daftarchasining ish beruvchi tomonidan tasdiqlangan nusxasi;

bitiruvchi yoki uning ota-onasida mulk huquqi asosida koʻchmas mulk mavjudligi (mavjud emasligi) haqida tuman (shahar) yer tuzish va koʻchmas mulk davlat korxonasi tomonidan berilgan maʼlumotnoma;

bitiruvchining tibbiy-ijtimoiy ahvoli — nogironligi, uzoq muddat davolanishga muhtojligi yoki mehnatga vaqtincha layoqatsizligini tasdiqlovchi hujjatlar (mavjud boʻlgan taqdirda).

6. Oʻrta maxsus, kasb-hunar taʼlimi muassasasi direktori ariza va unga ilova qilingan hujjatlarning toʻliqligini tekshirib qabul qiladi hamda bir ish kuni ichida kuzatuv xati bilan “Mahalla” xayriya jamoat fondining Qoraqalpogʻiston Respublikasi, viloyatlar va Toshkent shahar boʻlimiga (bundan buyon matnda “Mahalla” xayriya jamoat fondining hududiy boʻlimi deb yuritiladi) taqdim etadi.

7. Arizalarni koʻrib chiqish uchun “Mahalla” xayriya jamoat fondining hududiy boʻlimi huzurida komissiya tashkil etiladi. Komissiya tarkibiga quyidagilar kiritiladi:

“Mahalla” xayriya jamoat fondining hududiy boʻlimi boshqaruvi raisi — komissiya raisi;

hududiy oʻrta maxsus, kasb-hunar taʼlimi boshqarmasi boshligʻi — komissiya aʼzosi;

Qoraqalpogʻiston Respublikasi mehnat vaziri, viloyatlar va Toshkent shahar Mehnat bosh boshqarmasi boshligʻi — komissiya aʼzosi;

“Mahalla” xayriya jamoat fondining hududiy boʻlimi boshqaruvining ijtimoiy himoya masalalari boʻyicha yetakchi mutaxassisi — komissiya masʼul kotibi.

Komissiya ishiga zaruratga qarab oʻrta maxsus, kasb-hunar taʼlimi muassasasi direktorlari, vasiylik va homiylik organlari, “Mahalla” xayriya jamoat fondining tuman (shahar) boʻlinmasi boshqaruvi raislari ham ovoz berish huquqisiz jalb etilishi mumkin.

8. Arizalar komissiyaning navbatdagi majlisida koʻrib chiqiladi. Komissiya majlislari komissiya raisi tomonidan zaruratga qarab, lekin har chorakda kamida bir marta chaqiriladi.

Komissiya majlisida komissiya aʼzolarining barchasi ishtirok etishi shart.

9. Arizalarni koʻrib chiqishda komissiya tomonidan quyidagi masalalar oʻrganiladi:

bitiruvchining ota-ona qarovisiz qolishiga asos boʻlgan holatlar (ota-onasi vafot etgan, bedarak yoʻqolgan, ota-onalik huquqidan mahrum etilgan, uzoq muddat ishlash, oʻqish yoki boshqa maqsadlarda ketgan, ozodlikdan mahrum etilgan va h. k.);

doimiy yashash joyidagi fuqarolarning oʻzini oʻzi boshqarish organi hamda tuman (shahar) yer tuzish va koʻchmas mulk kadastri davlat korxonasi tomonidan berilgan maʼlumotnomalarga koʻra bitiruvchining oilaviy va mulkiy ahvoli, turar joy bilan taʼminlanganlik darajasi;

bitiruvchi taqdim etgan hujjatlarga koʻra uning tibbiy-ijtimoiy ahvoli (nogironligi, uzoq muddat davolanishga muhtojligi yoki mehnatga vaqtincha layoqatsizligi).

10. Komissiya mazkur Nizomning 9-bandida koʻrsatilgan holatlarni oʻrganish natijalariga koʻra bitiruvchining nafaqa olishga muhtoj yoki muhtoj emasligi haqida qaror qabul qiladi.

11. Komissiya qarorlari komissiya aʼzolaridan kamida uchtasining ovozi bilan qabul qilinadi. Komissiya qarori komissiya majlisi bayoni shaklida rasmiylashtiriladi va uning barcha aʼzolari tomonidan imzolanadi.

12. Komissiya qaroriga koʻra nafaqa olishga muhtoj deb topilgan bitiruvchilar roʻyxati uch ish kuni ichida tasdiqlash uchun bitiruvchining doimiy yashash joyidagi tuman (shahar) hokimligiga yuboriladi.

13. Nafaqa olishga muhtoj deb topilgan bitiruvchilar roʻyxati besh ish kuni ichida vasiylik va homiylik organlari tomonidan koʻrib chiqilib, tuman (shahar) hokimining qarori bilan tasdiqlanadi va “Mahalla” xayriya jamoat fondining hududiy boʻlimiga taqdim etiladi. “Mahalla” xayriya jamoat fondining hududiy boʻlimi ikki ish kuni ichida bitiruvchilarni roʻyxatga kiritilganligi haqida xabardor qiladi.

14. Nafaqa bitiruvchiga xizmat koʻrsatuvchi tijorat bankda ochilgan omonat (depozit) hisobvaragʻiga yoki bank plastik kartasiga “Mahalla” xayriya jamoat fondining hududiy boʻlimi tomonidan oʻtkazib beriladi.

15. Pul mablagʻlari bitiruvchi “Mahalla” xayriya jamoat fondining hududiy boʻlimiga oʻzining bank maʼlumotlarini taqdim etgan kundan boshlab ikki ish kuni ichida oʻtkazib beriladi.

16. Nafaqa summasi pul mablagʻi oʻtkazib berilayotgan kundagi eng kam oylik ish haqidan kelib chiqib hisoblanadi.

Bitiruvchining soʻroviga koʻra “Mahalla” xayriya jamoat fondining hududiy boʻlimi tomonidan tegishli toʻlov topshiriqnomasining nusxasi taqdim etiladi.

17. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

18. Oʻrta maxsus, kasb-hunar taʼlimi muassasasi direktori Nizomning 5-bandida koʻrsatilgan hujjatlarning haqiqiyligi uchun masʼul hisoblanadi.

19. Komissiya raisi va aʼzolari hujjatlarni koʻrib chiqishning xolis boʻlishi uchun masʼul hisoblanadi.

20. Vasiylik va homiylik organlari hamda tuman (shahar) hokimi nafaqa tayinlanadigan bitiruvchining oʻrta maxsus, kasb-hunar taʼlimi muassasasida oʻqish davrida toʻliq davlat taʼminotida boʻlmaganligini, xususan yetim bolalar va ota-ona qaramogʻidan mahrum boʻlgan bolalar uchun moʻljallangan muassasalarga joylashtirilmaganligi va boshqa qonuniy vakillari — vasiysi, homiysi, tutingan ota-onasi (patronat) qaramogʻida turganligini tasdiqlash uchun masʼul hisoblanadi.

21. “Mahalla” xayriya jamoat fondining hududiy boʻlimi pul mablagʻlarining oʻz vaqtida va toʻliq oʻtkazilishi uchun masʼul hisoblanadi.

22. Oʻrta maxsus, kasb-hunar taʼlimi muassasasi direktori, komissiya, vasiylik va homiylik organlari hamda tuman (shahar) hokimining xatti-harakatlaridan (qarorlaridan) norozi boʻlgan shaxslar qonunchilikda belgilangan tartibda yuqori turuvchi organga (mansabdor shaxsga) yoki sudga shikoyat qilishga haqli.

23. Mazkur Nizom “Mahalla” xayriya jamoat fondi bilan kelishilgan.