Qishloq xoʻjaligi ekinlarini zararkunanda va kasalliklardan himoya qilish ishlari sifatini yaxshilash, oʻsimliklarni himoya qilish xizmatini takomillashtirish, himoya tadbirlari samaradorligini oshirish maqsadida Vazirlar Mahkamasi qaror qiladi:

1. Maʼmuriy islohotlarni chuqurlashtirish va iqtisodiyotni boshqarish tuzilmasini takomillashtirish boʻyicha takliflar tayyorlash Respublika komissiyasi, Oʻzbekiston Respublikasi Qishloq va suv xoʻjaligi vazirligining tugatilgan “Oʻzqishloqxoʻjalikkimyo” davlat-aksiyadorlik kompaniyasining qishloq xoʻjaligiga agrokimyo xizmati koʻrsatish korxonalari va tashkilotlari negizida Qishloq va suv xoʻjaligi vazirligi huzurida Respublika oʻsimliklarni himoya qilish va agrokimyo markazi tashkil etish toʻgʻrisidagi taklifi qabul qilinsin.

2. Quyidagilar:

Respublika oʻsimliklarni himoya qilish va agrokimyo markazining tashkiliy tuzilmasi 1-ilovaga muvofiq;

Respublika oʻsimliklarni himoya qilish va agrokimyo markazini boshqarish ijro etuvchi apparatining xodimlarning cheklangan umumiy soni 20 nafar, shu jumladan boshqaruv xodimlari soni 17 nafar boʻlgan tuzilmasi 2-ilovaga muvofiq;

Qoraqalpogʻiston Respublikasi va viloyatlar Oʻsimliklarni himoya qilish markazi ijro etuvchi apparatining namunaviy tuzilmasi 3-ilovaga muvofiq;

Respublika agrokimyo stansiyasi markaziy apparati, Qoraqalpogʻiston Respublikasi va viloyatlar agrokimyo stansiyasi apparati tuzilmasi 4 va 5-ilovalarga muvofiq tasdiqlansin.

3. Quyidagilar Respublika oʻsimliklarni himoya qilish va agrokimyo markazining asosiy vazifalari etib belgilansin:

qishloq xoʻjaligida oʻsimliklarni kimyoviy va biologik himoya qilish, oʻsimliklar kasalliklari, qishloq xoʻjaligi zararkunandalari, begona oʻtlar va chigirtkaga qarshi kurashish va ularning profilaktikasi boʻyicha yagona texnika va texnologiya siyosatini oʻtkazish;

kompleks tadqiqotlarni amalga oshirish, zararkunandalar, kasalliklar va begona oʻtlarning tarqalishi imkoniyatlarini oʻrganish va prognoz qilish, qishloq xoʻjaligi tovar ishlab chiqaruvchilarini himoyaning kimyoviy va biologik vositalari, stimulyatorlar bilan taʼminlash;

qishloq xoʻjaligi korxonalari va aholini oʻsimliklarni himoya qilish sohasida metodik taʼminlash, qishloq xoʻjaligiga agrokimyo xizmati koʻrsatish boʻyicha ishlarni shartnoma shartlarida amalga oshirish;

qishloq xoʻjaligi ekinlarining oʻta xavfli zararkunandalarini qirib tashlashning ilmiy asoslangan tadbirlarini oʻtkazish;

oʻsimliklarni himoya qilish sohasida rahbarlar va mutaxassislarni qayta tayyorlash va ularning malakasini oshirishni tashkil etish.

4. Oʻzbekiston Respublikasi Qishloq va suv xoʻjaligi vazirligi bir oy muddatda:

Adliya vazirligi bilan birgalikda Respublika oʻsimliklarni himoya qilish va agrokimyo markazi toʻgʻrisidagi nizomni, uning hududiy boʻlinmalari toʻgʻrisidagi namunaviy nizomni, shuningdek Kimyoviy va biologik mahsulotlarga buyurtmanomalarni shakllantirish va qishloq xoʻjaligi tovar ishlab chiqaruvchilarini ular bilan taʼminlash tartibini tasdiqlasin;

Qoraqalpogʻiston Respublikasi Vazirlar Kengashi, viloyatlar hokimliklari bilan birgalikda Oʻsimliklarni himoya qilish va agrokimyo markazi hududiy boʻlinmalarini tashkil etishga doir tashkiliy tadbirlarni amalga oshirsin.

5. Quyidagilar:

Respublika oʻsimliklarni himoya qilish va agrokimyo markazi hamda uning hududiy va tasarrufidagi tashkilotlar faoliyatini budjet mablagʻlari va xoʻjalik hisobidagi faoliyatdan olinadigan daromadlar hisobiga moliyalashtirishning amaldagi tartibi;

Oʻzbekiston oʻsimliklarni himoya qilish ilmiy-tadqiqot instituti va uning filiallari uchun — Oʻzbekiston qishloq xoʻjaligi ilmiy-ishlab chiqarish markazidagi moliyalashtirish va xodimlar mehnatiga haq toʻlashning amaldagi shartlari saqlab qolinsin.

6. Quyidagilarga:

Oʻzbekiston Respublikasi Qishloq va suv xoʻjaligi vaziriga zarurat boʻlganda Respublika oʻsimliklarni himoya qilish va agrokimyo markazining markaziy apparati va tasarrufidagi tashkilotlar tuzilmasiga xodimlarning belgilangan soni doirasida oʻzgartirishlar kiritish;

Respublika oʻsimliklarni himoya qilish va agrokimyo markaziga xorijiy investorlardan tushadigan mablagʻlar, xalqaro grantlar va boshqa manbalar (budjet mablagʻlaridan tashqari) hisobiga belgilangan tartibda maxsus innovatsiya jamgʻarmasi tashkil etish huquqi berilsin.

7. Tugatilgan “Oʻzqishloqxoʻjalikkimyo” davlat-aksiyadorlik kompaniyasi va uning boʻlinmalari tomonidan budjet mablagʻlari hisobiga sotib olingan asosiy va aylanma vositalar Respublika oʻsimliklarni himoya qilish va agrokimyo markaziga va unga qarashli tashkilotlarga berilsin.

8. Respublika oʻsimliklarni himoya qilish va agrokimyo markazi uchun 2 ta yengil avtomobil limiti belgilansin.

9. Respublika oʻsimliklarni himoya qilish va agrokimyo markazi Toshkent viloyati, Qibray tumani, Bobur koʻchasi, 4-uydagi Oʻzbekiston oʻsimliklarni himoya qilish ilmiy-tadqiqot instituti binosiga joylashtirilsin.

10. Oʻzbekiston aloqa va axborotlashtirish agentligi Respublika oʻsimliklarni himoya qilish va agrokimyo markazini telefon aloqasi, shu jumladan Hukumat telefon aloqasi bilan belgilangan tartibda taʼminlasin.

11. Oʻzbekiston Respublikasi Adliya vazirligi bir oy muddatda amaldagi qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

Vazirliklar va idoralar bir oy muddatda oʻz normativ hujjatlarini ushbu qarorga belgilangan tartibda muvofiqlashtirsinlar.

12. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.