Respublikada koʻmir briketlari ishlab chiqarish va sotishni kompleks tashkil etish, koʻmir briketlarining aholi va budjet tashkilotlariga zarur sifat va maqbul narxlar boʻyicha resurslar va koʻmirni taqsimlash balansida nazarda tutilgan hajmlarda oʻz vaqtida va toʻliq yetkazib berilishini taʼminlash maqsadida Vazirlar Mahkamasi qaror qiladi:

1. Qayd etilsinki, Vazirlar Mahkamasining “Qoraqalpogʻiston Respublikasi, Buxoro va Xorazm viloyatlarida aholiga va budjet tashkilotlariga koʻmir sotishni tartibga solish chora-tadbirlari toʻgʻrisida” 2012-yil 29-fevraldagi 58-son hamda “Xorazm viloyati isteʼmolchilarini yoqilgʻi-energetika resurslari bilan taʼminlashga doir qoʻshimcha chora-tadbirlar toʻgʻrisida” 2013-yil 5-iyuldagi 193-son qarorlariga muvofiq, shuningdek “Oʻzbekkoʻmir” aksiyadorlik jamiyati tomonidan aholini va respublika mintaqalarining budjet tashkilotlarini qattiq yoqilgʻi bilan oʻz vaqtida va sifatli taʼminlashga yoʻnaltirilgan kompleks chora-tadbirlarni amalga oshirish doirasida 1-ilovaga* muvofiq roʻyxat boʻyicha 14 ta hududiy distribyutorlik markazlari va ularning 71 ta filiali tashkil etilgan.

2. Shunday tartib oʻrnatilsinki, unga muvofiq:

aholiga va budjet tashkilotlariga resurslar va koʻmirni taqsimlash balansida nazarda tutilgan hajmlarda koʻmir briketlarini sotish “Oʻzbekkoʻmir” aksiyadorlik jamiyatining 1-ilovada* koʻrsatilgan hududiy distribyutorlik markazlari va ularning filiallari orqali amalga oshiriladi;

resurslar va koʻmirni taqsimlash balansida nazarda tutilgan hajmlarda koʻmir briketlari ishlab chiqarish uchun ishlab chiqaruvchilarni tanlash Qoraqalpogʻiston Respublikasi Vazirlar Kengashi va viloyatlar hokimliklari huzurida tashkil etiladigan koʻmir briketlari ishlab chiqaruvchilar roʻyxatini aniqlash boʻyicha ishchi komissiyalar (keyingi oʻrinlarda ishchi komissiyalar deb ataladi) tomonidan tanlov asosida amalga oshiriladi;

Qoraqalpogʻiston Respublikasi Vazirlar Kengashi va viloyatlar hokimliklari huzuridagi ishchi komissiyalar tomonidan oʻtkaziladigan tanlovda ishtirok etish uchun koʻmir briketlari ishlab chiqaruvchilar 2-ilovada* keltirilgan talablarga muvofiq boʻlishi kerak;

oʻtkazilgan tanlovlar natijalari boʻyicha ishchi komissiyalar tomonidan resurslar va koʻmirni taqsimlash balansida nazarda tutilgan hajmda koʻmir briketlari ishlab chiqarish uchun koʻmir briketlari ishlab chiqaruvchilar roʻyxati shakllantiriladi va tasdiqlanadi;

tanlovni oʻtkazish, koʻmir briketlari ishlab chiqaruvchilar roʻyxatini shakllantirish, keyinchalik koʻmir yetkazib berish shartnomalarini tuzish uchun uni “Oʻzbekkoʻmir” aksiyadorlik jamiyatiga taqdim etish 3-ilovaga* muvofiq sxema boʻyicha amalga oshiriladi;

tanlovdan oʻtmagan koʻmir briketlari ishlab chiqaruvchilar koʻmir briketlari ishlab chiqarish uchun koʻmirni qonun hujjatlarida nazarda tutilgan tartibda birja savdolarida sotib oladilar.

3. Quyidagilar:

koʻmir briketlari ishlab chiqaruvchilar roʻyxatini aniqlash boʻyicha Qoraqalpogʻiston Respublikasi Vazirlar Kengashi va viloyatlar hokimliklari huzuridagi hududiy ishchi komissiyalarning namunaviy tarkibi 4-ilovaga* muvofiq;

Budjet tashkilotlari tomonidan budjet mablagʻlari hisobiga xarid qilinadigan koʻmir va koʻmir briketlarini sotish, yetkazib berish, tashish, qabul qilish va saqlash tartibi toʻgʻrisidagi nizom 5-ilovaga* muvofiq;

Respublika aholisini koʻmir mahsulotlari bilan taʼminlash tartibi toʻgʻrisidagi nizom 6-ilovaga* muvofiq tasdiqlansin.

Qoraqalpogʻiston Respublikasi Vazirlar Kengashi va viloyatlar hokimliklari ushbu qaror bilan tasdiqlangan namunaviy tarkib asosida koʻmir briketlari ishlab chiqaruvchilarning roʻyxatini aniqlash boʻyicha tegishli hududiy ishchi komissiyalar tarkiblarini uch kun muddatda tasdiqlasinlar.

4. Belgilansinki, aholi ehtiyojlari uchun koʻmirni koʻmir briketlari ishlab chiqaruvchilarga sotish koʻmir yetkazib berishning har bir turkumi uchun 100 foiz oldindan haq toʻlangan holda “Oʻzbekkoʻmir” aksiyadorlik jamiyati bilan tuziladigan toʻgʻridan toʻgʻri shartnomalar boʻyicha tartibga solinadigan narxlarda, budjet tashkilotlari uchun esa – mahsulot qaytarib berilishi asosida amalga oshiriladi.

5. “Oʻzbekkoʻmir” aksiyadorlik jamiyati:

qurilish-montaj ishlariga “Oʻzsanoatqurilishbank” aksiyadorlik-tijorat bankining kredit mablagʻlarini jalb etgan holda koʻmir briketlari ishlab chiqarish boʻyicha zarur ishlab chiqarish quvvatlari tashkil etilishini taʼminlasin;

resurslar va koʻmirni taqsimlash balansida nazarda tutilgan hajmlarda koʻmir briketlari ishlab chiqarish uchun, shu jumladan belgilangan tartibda ishchi komissiyalari tomonidan tanlov asosida tanlab olingan koʻmir briketlari ishlab chiqaruvchilarga koʻmirni zarur markalarda oʻz vaqtida yetkazib berish chora-tadbirlarini koʻrsin.

6. Belgilansinki:

ishchi komissiyalar tomonidan tanlov asosida tanlab olingan koʻmir briketlari ishlab chiqaruvchilarga, aholi va budjet tashkilotlariga “Oʻzbekkoʻmir” aksiyadorlik jamiyatining hududiy distribyutorlik markazlari orqali sotiladigan 1 tonna koʻmir briketlarining chakana narxi 2015-yil 1-iyuldan boshlab 238 000 soʻm miqdorida belgilanadi;

1 tonna koʻmir briketlarining chakana narxini oʻzgartirish “Oʻzbekkoʻmir” aksiyadorlik jamiyati tomonidan Oʻzbekiston Respublikasi Vazirlar Mahkamasiga belgilangan tartibda kiritiladigan, Oʻzbekiston Respublikasi Moliya vazirligi, Iqtisodiyot vazirligi va Davlat raqobat qoʻmitasi bilan kelishilgan takliflar asosida amalga oshiriladi;

1 tonna koʻmir briketlarining chakana narxi oʻrtacha ogʻirlik yoʻli bilan hisoblab chiqiladi hamda uning markasi va nomidan, uni temir yoʻlda, avtomobil transportida tashish xarajatlaridan va “Oʻzbekkoʻmir” aksiyadorlik jamiyatining hududiy distribyutorlik markazlari omborlarigacha tashish bilan bogʻliq tegishli xarajatlardan, koʻmir briketlari ishlab chiqarish xarajatlaridan, shuningdek “Oʻzbekkoʻmir” aksiyadorlik jamiyatining xususiy distribyutorlik markazlariga vositachilik haqi toʻlashdan kelib chiqib koʻmirning ulgurji-sotish narxidan shakllanadi.

7. Oʻzbekiston Respublikasi Moliya vazirligi Xususiylashtirish, monopoliyadan chiqarish va raqobatni rivojlantirish davlat qoʻmitasi, boshqa manfaatdor vazirliklar va idoralar bilan birgalikda “Oʻzbekkoʻmir” aksiyadorlik jamiyatining hududiy distribyutorlik markazlari orqali sotiladigan koʻmir va koʻmir briketlarining chakana narxini shakllantirish tartibini belgilangan tartibda ishlab chiqsin va tasdiqlasin.

8. Oʻzbekiston Respublikasi Iqtisodiyot vazirligi resurslar va koʻmirni taqsimlashning yillik balanslarini ishlab chiqishda budjet tashkilotlari va aholiga sotiladigan koʻmir briketlarini ishlab chiqarish uchun koʻmir yetkazib berish hajmini nazarda tutsin.

9. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi:

aholi va budjet tashkilotlari ehtiyojlari uchun koʻmir briketlari ishlab chiqarish uchun koʻmir briketlari ishlab chiqaruvchilar tomonidan koʻmirdan maqsadli foydalanilishi;

koʻmir briketlari ishlab chiqaruvchilar, “Oʻzbekkoʻmir” aksiyadorlik jamiyatining hududiy distribyutorlik markazlari tomonidan aholi va budjet tashkilotlariga koʻmir briketlari sotishda belgilangan chakana narxga rioya qilinishi yuzasidan qatʼiy nazorat oʻrnatsin.

10. Oʻzbekiston Respublikasi Hukumatining 7-ilovaga muvofiq ayrim qarorlariga oʻzgartirishlar kiritilsin.

11. Oʻzbekiston Respublikasi Iqtisodiyot vazirligi, Moliya vazirligi, Xususiylashtirish, monopoliyadan chiqarish va raqobatni rivojlantirish davlat qoʻmitasi, “Oʻzbekkoʻmir” aksiyadorlik jamiyati va “Oʻzbekiston respublika tovar-xomashyo birjasi” aksiyadorlik jamiyati Adliya vazirligi hamda boshqa manfaatdor vazirliklar va idoralar bilan birgalikda bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsinlar.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

1. Vazirlar Mahkamasining 2004-yil 5-fevraldagi 57-son qarori (Oʻzbekiston Respublikasi QT, 2004-y., 2-son, 10-modda) bilan tasdiqlangan Moddiy-texnika resurslari strategik turlarini sotishning maxsus tartibi toʻgʻrisidagi nizomning 39 va 40-bandlari quyidagi tahrirda bayon qilinsin:

“39. Balansdagi tasdiqlangan hajmlarga muvofiq koʻmir boshqariladigan narxlar boʻyicha toʻgʻridan toʻgʻri shartnomalar boʻyicha:

a) yetkazib berilgan koʻmir uchun 60 kun mobaynida toʻliq haq toʻlangan holda haqi 30% oldindan toʻlanishi sharti bilan:

budjet tashkilotlariga “Oʻzbekkoʻmir” aksiyadorlik jamiyatining hududiy distribyutorlik markazlari orqali ajratiladigan budjet mablagʻlariga muvofiq;

“Oʻzbekenergo” davlat-aksiyadorlik kompaniyasiga;

b) aholiga 100% oldindan haq toʻlangan holda “Oʻzbekkoʻmir” aksiyadorlik jamiyatining hududiy distribyutorlik markazlari orqali sotiladi.

40. Koʻmir, ushbu Nizomning 39-bandida nazarda tutilgan hajmlardan tashqari, tuzilgan shartnomalarga muvofiq yetkazib berilgan holda haqi 100% oldindan toʻlangan holda birja savdolari orqali sotiladi.

Birja savdolarida koʻmir qazib oluvchi korxonalar sotuvchilar, korxonalar va tashkilotlar – xaridorlar hisoblanadilar.

Birja savdolariga qoʻyishda koʻmirning boshlangʻich narxi boshqariladigan narxlar darajasida belgilanadi.

Birja savdolarida sotib olingan koʻmir qayta sotilmaydi”.

2. Vazirlar Mahkamasining “Qoraqalpogʻiston Respublikasi, Buxoro va Xorazm viloyatlarida aholiga va budjet tashkilotlariga koʻmir sotishni tartibga solish chora-tadbirlari toʻgʻrisida” 2012-yil 29-fevraldagi 58-son qarorining 1, 4-bandlari (Oʻzbekiston Respublikasi QT, 2012-y., 8-9-son, 87-modda) va qarorga ilova oʻz kuchini yoʻqotgan deb hisoblansin.